(1)

Fl-24 ta’ Mejju 2024, il-Kummissjoni Ewropea (“il-Kummissjoni”) bdiet investigazzjoni anti-dumping fir-rigward tal-importazzjonijiet ta’ vanillin li joriġinaw mir-Repubblika tal-Poplu taċ-Ċina (“il-pajjiż ikkonċernat” jew “ir-RPĊ”) abbażi tal-Artikolu 5 tar-Regolament bażiku. Hija ppubblikat Notifika tal-Bidu f’Il-Ġurnal Uffiċjali tal-Unjoni Ewropea (2) (“in-Notifika tal-Bidu”).

(2)

Il-Kummissjoni bdiet l-investigazzjoni wara lment ippreżentat fid-9 ta’ April 2024 minn Syensqo (“l-ilmentatur”). L-ilment sar f’isem l-industrija tal-Unjoni tal-vanillin fis-sens tal-Artikolu 5(4) tar-Regolament bażiku. L-ilment kien fih evidenza ta’ dumping u tad-dannu materjali li jirriżulta li kienet biżżejjed sabiex tiġġustifika l-bidu tal-investigazzjoni.

(3)

Il-Kummissjoni għamlet l-importazzjonijiet tal-prodott ikkonċernat soġġetti għar-reġistrazzjoni bir-Regolament ta’ Implimentazzjoni tal-Kummissjoni (UE) 2024/2716 (“ir-Regolament dwar ir-reġistrazzjoni”) (3).

(4)

Fin-Notifika tal-Bidu, il-Kummissjoni stiednet lill-partijiet interessati jikkuntattjawha sabiex jipparteċipaw fl-investigazzjoni. Barra minn hekk, il-Kummissjoni speċifikament infurmat lill-ilmentatur, lill-produtturi esportaturi magħrufa u lill-awtoritajiet tar-RPĊ, lill-importaturi, lill-fornituri u lill-utenti magħrufa, lin-negozjanti dwar il-bidu tal-investigazzjoni u stednithom jipparteċipaw.

(5)

Il-partijiet interessati kellhom l-opportunità li jikkummentaw dwar il-bidu tal-investigazzjoni u li jitolbu seduta ta’ smigħ mal-Kummissjoni u/jew mal-Uffiċjal tas-Smigħ fil-proċedimenti kummerċjali.

(6)

Utent wieħed, Frey & Lau GmbH (“Frey & Lau”), li huwa wkoll importatur, irreġistra bħala parti interessata iżda ma ppreżentax tweġiba għall-kwestjonarju. Huwa esprima l-oppożizzjoni tiegħu għall-bidu tal-investigazzjoni. L-argumenti tiegħu ġew miġbura fil-qosor hawn taħt.

(7)

Frey & Lau sostna li, peress li l-produttur tal-Unjoni li ressaq l-ilment ma mmanifatturax it-tipi kollha ta’ vanillin, ma setax jikkostitwixxi l-industrija tal-Unjoni għal dawk it-tipi ta’ vanillin li ma kienx immanifattura. Huwa rrefera wkoll għall-importazzjonijiet mill-produttur tal-Unjoni li ressaq l-ilment nnifsu bħala fattur li jimmina l-istatus tiegħu bħala produttur ġenwin tal-Unjoni. Din l-affermazzjoni hija indirizzata fit-Taqsima 4.1 hawn taħt.

(8)

Kif indirizzat f’aktar dettall fit-Taqsima 2.4 u 4.1 hawn taħt, il-produttur tal-Unjoni li ressaq l-ilment jista’ jikkostitwixxi l-industrija tal-Unjoni skont ir-Regolament bażiku, peress li l-produzzjoni tiegħu tal-prodott simili kienet tikkostitwixxi aktar minn 98 % tal-produzzjoni totali tal-Unjoni tal-prodott simili kif definit fil-premessi (41) u (44). Għalhekk, il-produttur tal-Unjoni jikkostitwixxi l-“industrija tal-Unjoni” skont it-tifsira tal-Artikolu 4(1) tar-Regolament bażiku għall-prodott simili definit fil-premessi msemmija hawn fuq.

(9)

Frey & Lau afferma li l-kalkoli tal-valur normali ppreżentati mill-ilmentatur ma humiex korretti peress li l-Lista ta’ Materjali teoretika użata għall-etilvanillin u għall-vanillin sintetiku jenħtieġ li ma titqiesx għall-Brażil, il-pajjiż rappreżentattiv propost mill-ilmentatur, peress li ma hemm l-ebda produzzjoni ta’ tali tipi ta’ prodotti ta’ vanillin f’dak il-pajjiż. Frey & Lau afferma wkoll li l-ilmentatur ikkalkula l-marġni tad-dumping għal żewġ prodotti li ma humiex prodotti fl-Unjoni, b’mod partikolari l-etilvanillin u l-bijovanillin, u li l-kalkolu ta’ marġni tad-dumping uniku għat-tipi kollha ta’ vanillin ma huwiex xieraq minħabba l-firxiet differenti tal-prezzijiet tal-erba’ tipi ta’ vanillin. Fl-affermazzjoni tiegħu, Frey & Lau ppropona li tintuża l-Indja bħala l-pajjiż rappreżentattiv xieraq. Huwa sostna li l-Indja tkun xierqa bħala pajjiż rappreżentattiv peress li jkollha livell simili ta’ żvilupp ekonomiku bħaċ-Ċina, il-prezzijiet tal-esportazzjoni tal-vanillin mill-Indja jkunu komparabbli ma’ dawk miċ-Ċina u jkun hemm produzzjoni tal-vanillin fl-Indja.

(10)

L-industrija tal-Unjoni wieġbet għall-kummenti ppreżentati minn Frey & Lau dwar l-ilment, u ċċarat li l-kalkoli tal-valur normali u tal-marġni tad-dumping huma f’konformità mal-Artikolu 2(6a) tar-Regolament bażiku. Dwar din il-kwistjoni, il-Kummissjoni nnotat li Frey & Lau ma ppreżentax evidenza biex jappoġġa l-allegazzjoni tiegħu li l-kalkoli tal-valur normali u tal-marġni tad-dumping mill-industrija tal-Unjoni huma żbaljati, u lanqas ma ppreżenta kalkoli riveduti. Għalhekk, l-affermazzjoni tiegħu ġiet miċħuda.

(11)

Il-Kummissjoni nnotat li l-Indja ma tagħmilx parti mill-grupp ta’ pajjiżi fl-istess livell ta’ żvilupp ekonomiku bħaċ-Ċina, skont id-definizzjoni tal-Bank Dinji. Iċ-Ċina titqies bħala pajjiż b’introjtu medju superjuri, filwaqt li l-Indja titqies bħala pajjiż b’introjtu medju inferjuri. Għalhekk, l-affermazzjoni biex l-Indja titqies bħala pajjiż rappreżentattiv ġiet miċħuda.

(12)

Fin-Notifika tal-Bidu, il-Kummissjoni ddikjarat li hija tista’ tieħu kampjun tal-partijiet interessati f’konformità mal-Artikolu 17 tar-Regolament bażiku.

(13)

Kif imsemmi fin-Notifika tal-Bidu, il-Kummissjoni għamlet disponibbli kwestjonarji għall-uniċi żewġ produtturi magħrufa tal-Unjoni, jiġifieri lill-ilmentatur u lil Ennolys. Il-kampjunar tal-produtturi tal-Unjoni ma kienx meqjus neċessarju.

(14)

Biex tiddeċiedi jekk huwiex meħtieġ il-kampjunar u, jekk dan ikun il-każ, biex tagħżel kampjun, il-Kummissjoni staqsiet lil importaturi mhux relatati sabiex jipprovdu l-informazzjoni speċifikata fin-Notifika tal-Bidu.

(15)

Żewġ importaturi mhux relatati ppreżentaw ruħhom u ppreżentaw tweġibiet għall-kwestjonarji. Wieħed minnhom biss ipprovda l-informazzjoni mitluba u qabel li jiġi inkluż fil-kampjun. Fid-dawl tal-għadd limitat ta’ tweġibiet, il-Kummissjoni qieset li l-kampjunar ma kienx meħtieġ.

(16)

Il-Kummissjoni rċeviet tweġibiet għall-kwestjonarji minn żewġ utenti li kienu wkoll importaturi, li wieħed minnhom huwa msemmi fil-premessa preċedenti. Ara t-Taqsimiet 7.2 u 7.3 hawn taħt.

(17)

Biex tiddeċiedi jekk huwiex meħtieġ il-kampjunar, u jekk dan ikun il-każ, biex tagħżel kampjun, il-Kummissjoni talbet lill-produtturi esportaturi kollha fir-RPĊ sabiex jipprovdu l-informazzjoni speċifikata fin-Notifika tal-Bidu. Barra minn hekk, il-Kummissjoni talbet lill-Missjoni tar-Repubblika tal-Poplu taċ-Ċina għall-Unjoni Ewropea sabiex tidentifika u/jew tikkuntattja lil produtturi esportaturi oħrajn, jekk hemm, li jistgħu jkunu interessati li jipparteċipaw fl-investigazzjoni.

(18)

Sitt produtturi esportaturi fil-pajjiż ikkonċernat ipprovdew l-informazzjoni mitluba u qablu li jiġu inklużi fil-kampjun. F’konformità mal-Artikolu 17(1) tar-Regolament bażiku, il-Kummissjoni għażlet kampjun abbażi tal-akbar volum rappreżentattiv ta’ esportazzjonijiet lejn l-Unjoni li seta’ jiġi investigat b’mod raġonevoli fiż-żmien disponibbli. Il-kampjun magħżul kien jikkonsisti minn żewġ produtturi esportaturi, Jiaxing Zhonghua Chemical Co., Ltd. (“Jiaxing Zhonghua”) u Jiangxi Brother Pharmaceutical Co., Ltd. (“Jiangxi Brother”). F’konformità mal-Artikolu 17(2) tar-Regolament bażiku, il-produtturi esportaturi magħrufa kollha u l-awtoritajiet tal-pajjiż ikkonċernat ġew ikkonsultati dwar l-għażla tal-kampjun. Il-Kummissjoni ma rċeviet l-ebda kumment dwar il-kampjun magħżul u għalhekk il-kampjun ġie kkonfermat fil-11 ta’ Ġunju 2024.

(19)

Matul l-investigazzjoni, il-Kummissjoni stabbiliet li Brother Holding, sid ta’ sehem maġġoritarju tal-ishma ta’ Jiangxi Brother, għandu wkoll sehem sinifikanti tal-ishma ta’ Jiaxing Zhonghua. Iż-żewġ partijiet iddikjaraw li jaġixxu b’mod indipendenti minn xulxin. Madankollu, il-Kummissjoni kkonkludiet li minħabba li parti terza tippossjedi, tikkontrolla jew iżżomm direttament jew indirettament 5 % jew aktar tal-azzjoni bid-dritt tal-vot jew l-ishma pendenti taż-żewġ produtturi esportaturi, dawn tal-aħħar iridu jitqiesu bħala relatati skont it-tifsira tal-Artikolu 127(d) tar-Regolament ta’ Implimentazzjoni tal-Kummissjoni (UE) 2015/2447 (4).

(20)

Wara d-divulgazzjoni tas-sejbiet definittivi, Jiangxi Brother ikkontesta l-konklużjoni tal-Kummissjoni li Jiangxi Brother u Jiaxing Zhonghua jenħtieġ li jiġu ttrattati bħala partijiet relatati. Huwa tenna li ż-żewġ kumpaniji joperaw b’mod indipendenti u bl-ebda mod sinifikanti ma huma konnessi f’termini ta’ sjieda, ġestjoni jew imġiba fis-suq u fil-prattika huma kompetituri diretti fis-suq tal-vanillin. Madankollu, huwa ma kkontestax il-valutazzjoni tal-Kummissjoni li parti terza direttament jew indirettament tippossjedi, tikkontrolla jew iżżomm 5 % jew aktar tal-azzjoni bid-dritt tal-vot jew l-ishma pendenti taż-żewġ produtturi esportaturi. Għalhekk, l-affermazzjoni ġiet miċħuda.

(21)

Fid-dawl tal-fatti spjegati fil-premessa (19), il-kampjun finali jikkonsisti f’żewġ entitajiet relatati.

(22)

Kif imsemmi fil-premessa (28), fl-20 ta’ Diċembru 2024, f’konformità mal-Artikolu 19a(2) tar-Regolament bażiku, il-Kummissjoni infurmat lill-partijiet interessati permezz ta’ Nota fil-Fajl bl-intenzjoni tagħha li ma timponix miżuri proviżorji. Kif spjegat fin-Nota fil-Fajl, din id-deċiżjoni kienet dovuta għall-kumplessità teknika tal-każ. Fi kliem ieħor, fid-dawl ta’ din il-kumplessità teknika, l-ammont ta’ xogħol assoċjat mal-produtturi esportaturi inklużi fil-kampjun kien diġà tali li pprekluda l-impożizzjoni ta’ miżuri proviżorji. F’dan l-isfond, il-Kummissjoni ddeċidiet li kwalunkwe eżami individwali jkun ta’ piż bla bżonn u jipperikola t-tlestija tal-investigazzjoni fil-ħin skont it-tifsira tal-Artikolu 17(3) tar-Regolament bażiku. Fid-divulgazzjoni definittiva, il-Kummissjoni spjegat li produttur esportatur wieħed mhux inkluż fil-kampjun fir-RPĊ – Xiamen Oamic Biotech Co., Ltd (“Oamic”) – kien talab eżami individwali skont l-Artikolu 17(3) tar-Regolament bażiku. Madankollu, hija ddikjarat li l-kumpanija kienet naqset milli tippreżenta tweġiba għall-kwestjonarju fi żmien l-iskadenza stabbilita mill-Kummissjoni. Fil-kummenti tiegħu dwar id-divulgazzjoni definittiva, Oamic indika li din id-dikjarazzjoni kienet fattwalment skorretta, peress li kien ippreżenta tweġiba għall-kwestjonarju. Filwaqt li l-Kummissjoni rrikonoxxiet l-iżball klerikali tagħha u l-fatt li Oamic kellu raġun, madankollu, dan ma jbiddilx il-konklużjoni li, minħabba l-kumplessità tal-każ u l-ammont ta’ xogħol li jirriżulta mill-produtturi esportaturi inklużi fil-kampjun, kwalunkwe eżami individwali kien ikun ta’ piż bla bżonn u kien jipprevjeni l-investigazzjoni milli titlesta fil-ħin. Għaldaqstant, it-talba għal eżami individwali mressqa minn Oamic ġiet miċħuda.

(23)

Il-Kummissjoni bagħtet kwestjonarji lill-produtturi magħrufa tal-Unjoni, lill-utenti u lill-produtturi esportaturi inklużi fil-kampjun. L-istess kwestjonarji kienu disponibbli online fil-jum tal-bidu.

(24)

Il-Kummissjoni bagħtet kwestjonarju dwar l-eżistenza ta’ distorsjonijiet sinifikanti fir-RPĊ skont it-tifsira tal-Artikolu 2(6a)(b) tar-Regolament bażiku lill-Gvern tar-Repubblika tal-Poplu taċ-Ċina (“GTĊ”).

(25)

Waslu tweġibiet għall-kwestjonarju mingħand il-produttur tal-Unjoni li ressaq l-ilment, żewġ utenti tal-Unjoni u l-produtturi esportaturi inklużi fil-kampjun fir-RPĊ.

(26)

Il-Kummissjoni fittxet u vverifikat l-informazzjoni kollha li qieset meħtieġa għal determinazzjoni proviżorja ta’ dumping, id-dannu li jirriżulta u l-interess tal-Unjoni. Iż-żjarat ta’ verifika skont l-Artikolu 16 tar-Regolament bażiku saru fil-bini tal-kumpaniji li ġejjin:

(27)

L-investigazzjoni tad-dumping u tad-dannu kopriet il-perjodu mill-1 ta’ Jannar 2023 sal-31 ta’ Diċembru 2023 (“il-perjodu ta’ investigazzjoni”). L-eżami tax-xejriet rilevanti għall-valutazzjoni tad-dannu kopra l-perjodu mill-1 ta’ Jannar 2020 sat-tmiem tal-perjodu ta’ investigazzjoni (“il-perjodu kkunsidrat”).

(28)

Skont l-Artikolu 7(1) tar-Regolament bażiku, id-data ta’ skadenza għall-impożizzjoni ta’ miżuri proviżorji kienet l-24 ta’ Jannar 2025. Fl-20 ta’ Diċembru 2024, f’konformità mal-Artikolu 19a(2) tar-Regolament bażiku, il-Kummissjoni informat lill-partijiet interessati bl-intenzjoni tagħha li ma timponix miżuri proviżorji.

(29)

Il-Kummissjoni kompliet tfittex u tivverifika l-informazzjoni kollha li qieset meħtieġa għas-sejbiet finali tagħha.

(30)

Meta waslet għas-sejbiet definittivi tagħha, il-Kummissjoni kkunsidrat il-kummenti ppreżentati mill-partijiet interessati.

(31)

Fit-8 ta’ April 2025, il-Kummissjoni infurmat lill-partijiet interessati kollha bil-fatti u l-kunsiderazzjonijiet essenzjali, li abbażi tagħhom kien beħsiebha timponi dazju anti-dumping definittiv fuq l-importazzjonijiet ta’ vanillin li joriġinaw mir-Repubblika tal-Poplu taċ-Ċina (“divulgazzjoni finali”). Il-partijiet kollha ngħataw perjodu li fih setgħu jikkummentaw dwar id-divulgazzjoni finali. Wara l-valutazzjoni ta’ kumment ippreżentat mill-produttur esportatur Oamic, intbagħtet divulgazzjoni supplimentari lill-partijiet kollha fis-16 ta’ April 2025 (“divulgazzjoni finali supplimentari”).

(32)

Wara d-divulgazzjoni tas-sejbiet definittivi, il-Kummissjoni rċeviet sottomissjonijiet mingħand Arethia Services Germany GmbH & Co. KG (“Arethia”), parti interessata li għadha kif ġiet irreġistrata (utent); l-utent Frey & Lau; l-ilmentatur, il-produtturi esportaturi Ċiniżi Jiangxi Brother, Oamic u Chongqing Thrive Fine Chemicals Co., Ltd. (“Thrive”); Orchidlinn Biotech Co., Ltd (“Orchidlinn”), produttur tal-prodott ikkonċernat li ma esportax lejn l-Unjoni matul il-perjodu ta’ investigazzjoni. Orchidlinn talab seduta ta’ smigħ fil-preżenza tal-Uffiċjal tas-Smigħ fil-proċedimenti tad-difiża tal-kummerċ, li saret fit-13 ta’ Mejju 2025. Barra minn hekk, saret seduta ta’ smigħ ma’ Oamic fit-23 ta’ April 2025.

(33)

Orchidlinn informa lill-Kummissjoni li kien qed iħejji talba għal rieżami ta’ esportatur ġdid biex tiġi ppreżentata ladarba jiġu imposti l-miżuri. Huwa qies li l-Kummissjoni kienet biddlet il-konklużjoni tagħha dwar il-kampjunar wara li kienet irrealizzat u kkoreġiet id-deskrizzjoni żbaljata tas-sitwazzjoni ta’ Oamic, kif spjegat fil-premessa (22). Madankollu, huwa kien tal-fehma li l-proċedura tal-kampjunar u d-determinazzjoni tal-eżami individwali jikkostitwixxu żewġ proċeduri distinti u legalment sekwenzjati, filwaqt li l-proċedura tal-kampjunar tiġi l-ewwel u s-sejbiet tal-eżami individwali jsiru sussegwentement. Huwa argumenta li bidla fit-tieni stadju, eżami individwali, ma tistax tirriżulta f’bidla fl-istadju preċedenti, li huwa l-kampjunar.

(34)

Il-Kummissjoni qablet li, fid-dawl tal-korrezzjoni li saret fir-rigward ta’ Oamic kif imsemmi fil-premessa (33), hija kienet skopriet u kkoreġiet ukoll żball klerikali fil-paragrafu preċedenti tad-dokument ta’ divulgazzjoni finali. Dak il-paragrafu kien jikkonċerna l-kampjunar u ġie sostitwit b’paragrafu li huwa rifless fil-premessa (22) ta’ dan ir-regolament. Għalhekk, il-partijiet interessati ġew infurmati bis-sħiħ dwar il-korrezzjoni fid-dokument ta’ divulgazzjoni finali supplimentari. Orchidlinn sostna li l-Kummissjoni naqset milli tiġġustifika r-raġunijiet għalfejn hija kkunsidrat li l-kampjunar ma kienx ġie abbandunat, kif kienet iddikjarat b’mod żbaljat fid-dokument maħruġ fit-8 ta’ April 2025. Madankollu, kif imsemmi fil-premessa (18) hawn fuq, matul il-proċediment, il-Kummissjoni infurmat lill-partijiet interessati li sitt produtturi esportaturi kienu ppreżentaw ruħhom fl-eżerċizzju tal-kampjunar (5) u li kienet għażlet kampjun ta’ tnejn li, fin-nuqqas ta’ kwalunkwe kumment, ftit wara kienet ikkonfermat lill-partijiet interessati (6). Fl-ebda stadju ulterjuri ma kienet irrevokat jew abbandunat dak il-kampjun. Ir-referenza għall-abbandun tal-kampjunar fid-dokument mibgħut lill-partijiet interessati fit-8 ta’ April 2025 kienet għalhekk manifestament żbaljata u l-Kummissjoni użat il-komunikazzjoni tad-dokument finali ta’ divulgazzjoni supplimentari, fis-16 ta’ April, sabiex tikkoreġi wkoll dan l-iżball klerikali.

(35)

Orchidlinn sostna wkoll li l-kampjun ma kienx rappreżentattiv, peress li t-tip ta’ prodott li huwa jipproduċi, il-vanillin naturali, ma huwa prodott minn ebda waħda mill-partijiet inklużi fil-kampjun. Fir-rigward ta’ din l-affermazzjoni, kif konkluż fl-analiżi fit-Taqsima 2.4, il-Kummissjoni kienet ikkonkludiet li l-kamp ta’ applikazzjoni tal-investigazzjoni ġie definit b’mod korrett u l-erba’ tipi ta’ prodotti, li l-vanillin naturali huwa wieħed minnhom, huma sostitwibbli u f’kompetizzjoni diretta ma’ xulxin. Il-Kummissjoni tenniet ukoll li l-kampjun kien intgħażel abbażi tal-Artikolu 17(1) tar-Regolament bażiku, jiġifieri billi jintgħażel l-akbar volum rappreżentattiv ta’ esportazzjonijiet li jista’ jiġi investigat b’mod raġonevoli fiż-żmien disponibbli. Kampjun li jirrappreżenta aktar minn 80 % tal-importazzjonijiet huwa bla dubju rappreżentattiv.

(36)

Fl-aħħar nett, Orchidlinn insista mal-Kummissjoni li, jekk il-Kummissjoni ssostni li l-kampjunar ġie applikat, xorta waħda tippermetti lill-produtturi esportaturi ġodda ta’ vanillin naturali jfittxu marġni ta’ dumping individwali permezz ta’ rieżami ta’ esportatur ġdid peress li dak it-tip ta’ prodott ma huwiex prodott mill-partijiet inklużi fil-kampjun. Il-Kummissjoni naqset milli tara xi bażi legali għal tali kors ta’ azzjoni peress li l-Artikolu 11(4) tar-Regolament bażiku, li jirregola d-determinazzjoni ta’ marġnijiet individwali ta’ dumping għal produtturi esportaturi ġodda, isemmi b’mod espliċitu li dan ma japplikax fejn ġew imposti dazji skont l-Artikolu 9(6) tar-Regolament bażiku, jiġifieri fejn ġie applikat il-kampjunar. Fi kwalunkwe każ, il-possibbiltà li jintalbu rifużjonijiet perjodikament f’konformità mal-Artikolu 11(8) tibqa’ possibbli.

(37)

Oamic sostna li n-Nota tal-Kummissjoni fil-Fajl tal-20 ta’ Diċembru msemmi fil-premessa (28) ma kinitx konformi mar-rekwiżit skont l-Artikolu 19(a)(2) peress li permezz ta’ dik in-Nota, Oamic ma kienx infurmat jekk it-talba tiegħu għal eżami individwali kinitx ġiet aċċettata jew le. Madankollu, l-Artikolu 19(a)(2) jobbliga lill-Kummissjoni tinforma lill-partijiet interessati dwar in-nuqqas ta’ impożizzjoni ta’ miżuri proviżorji f’ċertu limitu ta’ żmien, u mhux tipprovdilhom rapport interim. Barra minn hekk, kif diġà ġie ddikjarat fil-premessa (22), in-Nota semmiet li n-nuqqas ta’ impożizzjoni ta’ miżuri proviżorji kien dovut għall-kumplessità teknika tal-każ. Il-Kummissjoni finalment osservat li Oamic qatt ma kien staqsa jekk il-Kummissjoni kellhiex l-intenzjoni li tevalwa t-talba għal eżami individwali jew kien ikkuntattja lill-Kummissjoni bejn il-preżentazzjoni tat-talba tiegħu għal eżami individwali, fit-3 ta’ Lulju 2024, u l-kummenti tiegħu dwar id-divulgazzjoni finali, ippreżentati fil-11 ta’ April 2025. L-affermazzjoni ġiet miċħuda.

(38)

Oamic sostna li ż-żewġ partijiet inklużi fil-kampjun kellhom jiġu ttrattati, f’konformità mal-Artikolu 9(5) tar-Regolament bażiku, bħala entità fi grupp wieħed. Għalhekk, huwa argumenta li l-kampjunar fil-fatt ma kienx meħtieġ. Fil-fehma tiegħu, ir-rata tad-dazju medja ponderata skont id-dispożizzjoni tal-kampjunar timplika li l-marġni tad-dumping għandu jiġi kkalkulat fuq il-bażi ta’ (mill-inqas) żewġ partijiet mhux relatati, separati u indipendenti li jikkooperaw.

(39)

Fir-rigward ta’ din l-affermazzjoni, il-Kummissjoni kkonfermat li l-kampjunar kien ġie applikat, peress li sitt produtturi esportaturi kienu ppreżentaw ruħhom u l-Kummissjoni kienet għażlet l-akbar żewġ kumpaniji minnhom biex jiffurmaw il-kampjun. Il-partijiet kienu ġew infurmati wkoll b’dan u aċċettaw dik id-deċiżjoni, kif imfakkar fil-premessa (34) hawn fuq. Il-kalkoli tad-dumping u tad-dannu kienu saru u ġew ddivulgati lil kull waħda miż-żewġ partijiet individwalment, peress li l-Kummissjoni sabet li Jiangxi Brother u Jiaxing Zhonghua fil-prattika ma kinux joperaw bħala entità waħda. Dan huwa differenti minn sitwazzjonijiet fejn hemm rabtiet operazzjonali mill-qrib bejn il-partijiet relatati u l-valur normali, il-prezz tal-esportazzjoni, id-dumping u d-dannu huma għalhekk ikkalkulati billi tiġi kkombinata d-data finanzjarja rilevanti mill-kumpaniji kkonċernati u jsir biss kalkolu wieħed ta’ dumping u ta’ dannu għall-grupp. Madankollu, skont id-dispożizzjonijiet tal-Artikolu 127(d) tar-Regolament ta’ Implimentazzjoni (UE) 2015/2447, il-Kummissjoni qieset li dawn kienu relatati (ara l-premessi (19) sa (21)). Għalhekk, jenħtieġ li Jiangxi Brother u Jiaxing Zhonghua jiġu attribwiti d-dazju medju ponderat tat-tnejn li huma, u l-istess dazju medju ponderat ġie attribwit lill-partijiet li kkooperaw mhux inklużi fil-kampjun, għar-raġunijiet spjegati fil-premessa (187).

(40)

Il-kummenti mill-partijiet l-oħra msemmija fil-premessa (32) huma indirizzati fit-taqsimiet adatti f’dan ir-Regolament.

(41)

Il-prodott soġġett għal din l-investigazzjoni huwa vanillin bil-formola molekulari C8H8O3 jew C9H10O3, u b’livell ta’ purità ogħla minn 95 % skont il-piż (“il-prodott taħt investigazzjoni”). Il-prodott taħt investigazzjoni jinkludi Vanillin Sintetiku, Vanillin Naturali, Vanillin Sintetiku b’sors Bijoloġika (Bijovanillin) u Etilvanillin. In-numru ta’ reġistrazzjoni tal-Chemical Abstracts Service (in-numru tal-CAS) għall-Vanillin Sintetiku, il-Vanillin Naturali u l-Vanillin Sintetiku b’sors Bijoloġiku (Bijovanillin) huwa 121-33-5. In-numru tal-CAS għall-Etilvanillin huwa 121-32-4. Il-prodott taħt investigazzjoni ma jkoprix taħlitiet ta’ sustanzi kimiċi b’aroma differenti li fihom konċentrazzjonijiet ta’ Vanillin ta’ inqas minn 95 % skont il-piż.

(42)

Il-vanillin jintuża fis-settur tal-ikel (aroma u togħmiet) u dak kożmetiku (fwejjaħ) permezz ta’ ingredjent fir-riċetti tal-utenti.

(43)

Il-prodott li allegatament huwa oġġett ta’ dumping huwa l-prodott taħt investigazzjoni, li joriġina mir-RPĊ, li bħalissa huwa kklassifikat taħt il-kodiċijiet NM ex 2912 41 00 għall-Vanillin Sintetiku, il-Vanillin Naturali u l-Vanillin Sintetiku b’sors Bijoloġiku u ex 2912 42 00 għall-Etilvanillin (il-kodiċijiet TARIC 2912 41 00 10 u 2912 42 00 10). (“il-prodott ikkonċernat”).

(44)

L-investigazzjoni wriet li l-prodotti li ġejjin għandhom l-istess karatteristiċi fiżiċi, kimiċi u tekniċi bażiċi jew simili kif ukoll l-istess użi bażiċi:

(45)

Il-Kummissjoni ddeċidiet li dawk il-prodotti huma, għalhekk, prodotti simili skont it-tifsira tal-Artikolu 1(4) tar-Regolament bażiku.

(46)

L-utent Frey & Lau, li huwa wkoll importatur tal-prodott ikkonċernat, sostna li t-tipi ta’ vanillin deskritti fil-premessa (43) ma setgħux jiġu ttrattati bħala prodott wieħed u għalhekk ma setgħux jiġu ttrattati bħala “l-prodott ikkonċernat”. Huwa argumenta li hemm differenzi kbar bejn il-vanillin sintetiku, il-vanillin naturali, il-vanillin sintetiku b’bażi bijoloġika (“bijovanillin”) u l-etilvanillin, f’termini ta’ kwalità, prezz u intensità tat-togħma. Dawn il-prodotti jintużaw b’modi differenti u fi kwantitajiet differenti fost il-klijenti li jistgħu jużawhom ukoll biex iħejju, fost l-oħrajn, komponenti għall-manifatturi ta’ fwejjaħ u tal-ikel u taħlitiet tal-ħami.

(47)

Frey & Lau ssostanzja l-affermazzjoni tiegħu billi indika differenzi fl-obbligu ta’ dikjarazzjoni u konformità regolatorja li Frey & Lau u s-sid tal-marka downstream iridu jissodisfaw, u kwalunkwe bidla bejn it-tipi ta’ vanillin li tkun teħtieġ ammont sinifikanti ta’ ħidma regolatorja u analiżi estensiva tad-differenzi fil-profili tat-togħma u l-intensitajiet. Frey & Lau sostna li l-ilmentatur għalhekk ma setax jikkostitwixxi l-industrija tal-Unjoni skont it-tifsira tar-Regolament bażiku għal dawk it-tipi ta’ vanillin li ma mmanifatturax fl-Unjoni, peress li kien jimmanifattura biss vanillin sintetiku u vanillin naturali matul il-perjodu ta’ investigazzjoni, u vanillin naturali biss minn Mejju 2024. Konsegwentement, jenħtieġ li l-bijovanillin u l-etilvanillin jiġu esklużi mill-kamp ta’ applikazzjoni tal-investigazzjoni, kif ukoll il-vanillin sintetiku peress li l-produzzjoni tagħhom waqfet fl-Unjoni f’Mejju 2024.

(48)

Bi tweġiba għal dawn il-kummenti, l-industrija tal-Unjoni qieset li, filwaqt li jeżistu ċerti differenzi bejn l-erba’ tipi ta’ vanillin, dan ma jipprekludix li dawn jikkostitwixxu prodott uniku għall-iskopijiet ta’ investigazzjoni anti-dumping u li jaqgħu taħt kamp ta’ applikazzjoni wieħed fiha. Hija sostniet li t-tipi kollha ta’ vanillin huma magħmula mill-bniedem, jintużaw għall-istess skopijiet u għandhom l-istess karatteristiċi fiżiċi, kimiċi u tekniċi bażiċi, kif ġej:

Tabella 1

(49)

Il-Kummissjoni fakkret li d-definizzjoni tal-prodott simili fl-Artikolu 1(4) tar-Regolament bażiku hija prodott li huwa identiku, jiġifieri simili f’kull aspett għall-prodott taħt kunsiderazzjoni jew, fin-nuqqas ta’ tali prodott, prodott ieħor li, għalkemm mhux simili fl-aspetti kollha, għandu karatteristiċi li jixbhu mill-qrib lil dawk tal-prodott taħt kunsiderazzjoni.

(50)

Il-Kummissjoni qieset li l-ambitu tal-investigazzjoni huwa definit b’mod korrett, peress li t-tipi kollha ta’ vanillin huma molekuli magħmula mill-bniedem b’riħa u togħma li jixbħu l-vanilla. It-tipi kollha ta’ vanillin jintużaw b’mod simili u għall-istess skop, jiġifieri, biex jikkostitwixxu input fi fwejjaħ u riċetti tal-ikel, fost oħrajn. L-erba’ tipi ta’ prodotti huma sostitwibbli u f’kompetizzjoni diretta ma’ xulxin. Għalhekk, l-esklużjoni ta’ kwalunkwe wieħed mit-tipi ta’ vanillin x’aktarx li tirrendi miżura potenzjali ineffettiva.

(51)

Fir-rigward ta’ jekk l-industrija tal-Unjoni ssodisfatx ir-rekwiżit legali għal locus standi skont l-Artikolu 5(4) tar-Regolament bażiku, il-Kummissjoni tirreferi għall-premessi minn (189) ’il quddiem ta’ dan ir-Regolament ta’ Implimentazzjoni.

(52)

Wara d-divulgazzjoni tas-sejbiet definittivi, Frey & Lau tenna l-oppożizzjoni tiegħu kontra d-definizzjoni tal-prodott ikkonċernat. Barra minn hekk, il-produttur esportatur mhux inkluż fil-kampjun Thrive ressaq l-oppożizzjoni tiegħu kontra din id-definizzjoni.

(53)

Frey & Lau u Thrive sostnew li l-etilvanillin ma jistax jitqies bħala prodott simili għall-vanillin sintetiku. Sostnew ukoll li l-vanillin b’sors bijoloġiku u l-vanillin naturali jġorru kost tal-produzzjoni konsiderevolment ogħla, u prezz tal-bejgħ ogħla korrispondenti, mill-vanillin sintetiku, u jseħħu fi kwantitajiet ħafna iżgħar fis-suq tal-Unjoni. Għalhekk, dawn lanqas ma jistgħu jitqiesu bħala prodott simili għall-vanillin sintetiku.

(54)

Utent addizzjonali, Arethia, li sa issa la ppreżenta ruħu u lanqas ippreżenta kwestjonarju, ippreżenta xi kummenti wkoll. Huwa tenna l-fehma ta’ Frey & Lau (ara l-premessi (46) u (47)) li l-etilvanillin huwa prodott separat meta mqabbel mal-vanillin sintetiku u l-vanillin naturali.

(55)

Kif elenkat fit-Tabella fil-premessa (48) hawn fuq, il-Kummissjoni tirrikonoxxi li hemm differenzi kimiċi żgħar bejn it-tipi differenti ta’ vanillin u li ma humiex simili fl-aspetti kollha.

(56)

Madankollu, kif ġie enfasizzat iktar ’il fuq, it-tipi kollha ta’ vanillin jintużaw b’mod simili u għall-istess skop, jiġifieri, biex jikkostitwixxu input fi fwejjaħ u riċetti tal-ikel, fost oħrajn. Għal dan l-għan, l-esklużjoni ta’ tip wieħed ta’ vanillin tista’ timmina l-effettività tal-miżuri anti-dumping, peress li l-utenti downstream jistgħu jadattaw ir-riċetti u d-dożi tagħhom tat-tip ta’ vanillin li huwa eżentat mill-miżuri.

(57)

Il-Kummissjoni tirrikonoxxi li r-riskju għas-sostituzzjoni ta’ tip wieħed ta’ vanillin ma’ ieħor ma huwiex immedjat peress li l-proċess tal-utent biex jadatta r-riċetti jinvolvi ttestjar sinifikanti qabel ir-rilaxx, kif diġà enfasizzat minn Frey & Lau fil-premessa (47). Iżda peress li l-miżuri huma proposti għal perjodu ta’ ħames snin, l-effettività tal-miżuri anti-dumping trid tiġi vvalutata billi tittieħed perspettiva aktar fit-tul.

(58)

Fuq din il-bażi, il-Kummissjoni qieset li t-tipi kollha ta’ vanillin imsemmija fl-ilment u fil-premessa (42) jikkostitwixxu l-prodott simili skont it-tifsira tal-Artikolu 1(4) tar-Regolament bażiku.

(59)

Fid-dawl tal-evidenza suffiċjenti disponibbli fil-bidu tal-investigazzjoni li indikaw l-eżistenza ta’ distorsjonijiet sinifikanti skont it-tifsira tal-Artikolu 2(6a)(b) tar-Regolament bażiku fir-rigward tar-RPĊ, il-Kummissjoni qieset li kien xieraq li tibda l-investigazzjoni fir-rigward tal-produtturi esportaturi minn dan il-pajjiż b’kunsiderazzjoni tal-Artikolu 2(6a) tar-Regolament bażiku.

(60)

Konsegwentement, sabiex tiġbor id-data meħtieġa għall-applikazzjoni eventwali tal-Artikolu 2(6a) tar-Regolament bażiku, fin-Notifika tal-Bidu, il-Kummissjoni stiednet lill-produtturi esportaturi kollha fir-RPĊ jipprovdu informazzjoni dwar l-inputs użati għall-produzzjoni tal-vanillin. Sitt produtturi esportaturi ppreżentaw l-informazzjoni rilevanti.

(61)

Sabiex tikseb l-informazzjoni meqjusa neċessarja għall-investigazzjoni tagħha fir-rigward tal-allegati distorsjonijiet sinifikanti, il-Kummissjoni bagħtet kwestjonarju lill-GTĊ. Barra minn hekk, fil-punt 5.6 tan-Notifika tal-Bidu, il-Kummissjoni stiednet lill-partijiet interessati kollha jesprimu l-fehmiet tagħhom, jippreżentaw informazzjoni u jipprovdu evidenza ta’ sostenn fir-rigward tal-applikazzjoni tal-Artikolu 2(6a) tar-Regolament bażiku fi żmien 37 jum mid-data tal-pubblikazzjoni tan-Notifika tal-Bidu f’Il-Ġurnal Uffiċjali tal-Unjoni Ewropea. Ma waslet l-ebda tweġiba għall-kwestjonarju u l-ebda sottomissjoni dwar l-applikazzjoni tal-Artikolu 2(6a) tar-Regolament bażiku qabel l-iskadenza mill-GTĊ. Sussegwentement, il-Kummissjoni informat lill-GTĊ li hija kienet se tuża l-fatti disponibbli skont it-tifsira tal-Artikolu 18 tar-Regolament bażiku biex tiddetermina l-eżistenza tad-distorsjonijiet sinifikanti fir-RPĊ.

(62)

Wara l-bidu, il-Kummissjoni rċeviet kummenti dwar l-applikabbiltà tal-Artikolu 2(6a) tar-Regolament bażiku mingħand Frey & Lau, Jiangxi Brother u Thrive. Dawn il-kummenti huma indirizzati fit-Taqsima 3.2.2. hawn taħt.

(63)

Fin-Notifika tal-Bidu, il-Kummissjoni speċifikat ukoll li, fid-dawl tal-evidenza disponibbli, hija jista’ jkollha bżonn tagħżel pajjiż rappreżentattiv xieraq skont l-Artikolu 2(6a)(a) tar-Regolament bażiku bl-iskop li tiddetermina l-valur normali fuq il-bażi ta’ prezzijiet jew valuri referenzjarji mingħajr distorsjoni.

(64)

Fil-21 ta’ Ottubru 2024, il-Kummissjoni infurmat b’nota fil-fajl (“l-Ewwel Nota”) lill-partijiet interessati dwar is-sorsi rilevanti li kienet beħsiebha tuża għad-determinazzjoni tal-valur normali. F’dik in-nota, il-Kummissjoni pprovdiet lista tal-fatturi kollha tal-produzzjoni bħall-materja prima u l-inputs, il-manodopera u l-enerġija użati fil-produzzjoni tal-vanillin. Barra minn hekk, abbażi tal-kriterji li jiggwidaw l-għażla ta’ prezzijiet jew valuri referenzjarji mingħajr distorsjoni, il-Kummissjoni identifikat żewġ pajjiżi rappreżentattivi possibbli, jiġifieri l-Brażil u t-Turkija. Il-Kummissjoni rċeviet kummenti dwar l-Ewwel Nota mingħand l-ilmentatur, il-produttur esportatur inkluż fil-kampjun Jiangxi Brother u Thrive. Il-kummenti huma indirizzati fit-taqsimiet rilevanti ta’ hawn taħt.

(65)

Fit-3 ta’ Jannar 2025, il-Kummissjoni indirizzat il-kummenti li rċeviet mingħand il-partijiet interessati dwar l-Ewwel Nota permezz tat-tieni nota fil-fajl (“it-Tieni Nota”) u infurmat lill-partijiet interessati dwar is-sorsi rilevanti li kienet beħsiebha tuża għad-determinazzjoni tal-valur normali, bil-Brażil bħala l-pajjiż rappreżentattiv. Hija infurmat ukoll lill-partijiet interessati li kienet se tistabbilixxi l-kostijiet tal-bejgħ, ġenerali u amministrattivi (“SG&A”, selling, general and administrative) u l-profitti abbażi tal-informazzjoni disponibbli għall-kumpaniji Dexxos Participações S.A. u Prox do Brasil.

(66)

Il-Kummissjoni rċeviet kummenti għat-Tieni Nota mingħand l-ilmentatur u mingħand il-produtturi esportaturi Jiaxing Zhonghua u Thrive fejn jirreferu għas-sorsi użati biex jiġu stabbiliti l-kostijiet mingħajr distorsjoni fil-pajjiż rappreżentattiv. Dawn ġew indirizzati taħt l-intestaturi rispettivi tat-taqsima 3.4 hawn taħt.

(67)

Wara li analizzat il-kummenti u l-informazzjoni li rċeviet, il-Kummissjoni kkonkludiet li l-Brażil kien pajjiż rappreżentattiv xieraq li minnu jinkisbu prezzijiet u kostijiet mingħajr distorsjoni għad-determinazzjoni tal-valur normali. Ir-raġunijiet sottostanti għal dik l-għażla huma żviluppati fid-dettall fit-taqsima 3.3 hawn taħt.

(68)

Skont l-Artikolu 2(1) tar-Regolament bażiku, “[i]l-valur normali għandu normalment ikun ibbażat fuq il-prezzijiet imħallsa jew pagabbli, fil-kors ordinarju tal-kummerċ, minn klijenti indipendenti fil-pajjiż esportatur”.

(69)

Madankollu, skont l-Artikolu 2(6a)(a) tar-Regolament bażiku, “[f]il-każ li jiġi determinat […] li mhuwiex xieraq li jintużaw prezzijiet u kostijiet domestiċi fil-pajjiż esportatur minħabba l-eżistenza f’dak il-pajjiż ta’ distorsjonijiet sinifikanti fis-sens tal-punt (b), il-valur normali għandu jiġi kkalkolat esklużivament abbażi tal-kostijiet tal-produzzjoni u tal-bejgħ li jirriflettu prezzijiet jew valuri ta’ riferiment mingħajr distorsjoni”, u “għandu jinkludi ammont raġonevoli u mingħajr distorsjoni għal kostijiet amministrattivi, tal-bejgħ u ġenerali u għal profitti” (“kostijiet amministrattivi, tal-bejgħ u ġenerali” minn hawn ’il quddiem “SG&A”).

(70)

Kif spjegat aktar fid-dettall hawn taħt, f’din l-investigazzjoni l-Kummissjoni kkonkludiet li, abbażi tal-evidenza disponibbli, u fid-dawl tan-nuqqas ta’ kooperazzjoni tal-GTĊ, l-applikazzjoni tal-Artikolu 2(6a) tar-Regolament bażiku kienet iġġustifikata.

(71)

F’investigazzjonijiet reċenti rigward is-settur tas-sustanzi kimiċi (7) fir-RPĊ (8), il-Kummissjoni sabet li kien hemm distorsjonijiet sinifikanti fis-sens tal-Artikolu 2(6a)(b) tar-Regolament bażiku.

(72)

F’dawk l-investigazzjonijiet, il-Kummissjoni sabet li hemm intervent sostanzjali tal-gvern fir-RPĊ li jirriżulta f’distorsjoni tal-allokazzjoni effettiva tar-riżorsi f’konformità mal-prinċipji tas-suq (9). B’mod partikolari, il-Kummissjoni kkonkludiet li fis-settur tas-sustanzi kimiċi mhux biss għad hemm livell sostanzjali ta’ sjieda mill-GTĊ fis-sens tal-Artikolu 2(6a)(b), l-ewwel inċiż tar-Regolament bażiku (10), iżda l-GTĊ huwa wkoll f’pożizzjoni li jinterferixxi fil-prezzijiet u l-kostijiet permezz tal-preżenza tal-Istat fid-ditti fis-sens tal-Artikolu 2(6a)(b), it-tieni inċiż tar-Regolament bażiku (11). Il-Kummissjoni sabet ukoll li l-preżenza u l-intervent tal-Istat fis-swieq finanzjarji, kif ukoll fil-provvista ta’ materja prima u inputs għandhom effett distorsiv addizzjonali fuq is-suq. Tabilħaqq, b’mod ġenerali, is-sistema tal-ippjanar fir-RPĊ tirriżulta fil-konċentrazzjoni tar-riżorsi f’setturi ddeżinjati bħala strateġiċi jew inkella meqjusa bħala politikament importanti mill-GTĊ, aktar milli fl-allokazzjoni tagħhom f’konformità mal-forzi tas-suq (12). Barra minn hekk, il-Kummissjoni kkonkludiet li l-liġijiet Ċiniżi dwar il-falliment u l-proprjetà ma jaħdmux kif suppost fis-sens tal-Artikolu 2(6a)(b), ir-raba’ inċiż, tar-Regolament bażiku, u b’hekk jiġu ġġenerati distorsjonijiet b’mod partikolari meta jiġu miżmuma ħajjin ditti insolventi u meta jiġu allokati d-drittijiet għall-użu tal-art fir-RPĊ (13). Bl-istess mod, il-Kummissjoni sabet distorsjonijiet tal-kostijiet tal-pagi fis-settur tas-sustanzi kimiċi fis-sens tal-Artikolu 2(6a)(b), il-ħames inċiż tar-Regolament bażiku (14), kif ukoll distorsjonijiet fis-swieq finanzjarji fis-sens tal-Artikolu 2(6a)(b), is-sitt inċiż tar-Regolament bażiku, b’mod partikolari fir-rigward tal-aċċess għall-kapital għall-atturi korporattivi fir-RPĊ (15).

(73)

Bħal f’investigazzjonijiet preċedenti rigward is-settur tas-sustanzi kimiċi fir-RPĊ, fl-investigazzjoni preżenti l-Kummissjoni eżaminat jekk kienx xieraq jew le li jintużaw prezzijiet u kostijiet domestiċi fir-RPĊ, minħabba l-eżistenza ta’ distorsjonijiet sinifikanti skont it-tifsira tal-tal-Artikolu 2(6a), il-punt (b), tar-Regolament bażiku. Il-Kummissjoni għamlet dan fuq il-bażi tal-evidenza disponibbli fil-fajl, inkluż l-evidenza li tinsab fl-ilment, u fil-Ħidma tal-Persunal tal-Kummissjoni dwar “Significant Distortions in the Economy of the People’s Republic of China for the Purposes of Trade Defence Investigations” (16) (ir-“Rapport”), li jiddependi fuq sorsi disponibbli għall-pubbliku. Dak l-eżami mhux biss kopra l-interventi sostanzjali tal-gvern fl-ekonomija tar-RPĊ b’ mod ġenerali, iżda wkoll is-sitwazzjoni speċifika tas-suq fis-settur rilevanti, inkluż il-prodott ikkonċernat. Il-Kummissjoni kompliet tissupplimenta dawn l-elementi evidenzjarji bir-riċerka tagħha stess dwar id-diversi kriterji rilevanti biex tikkonferma l-eżistenza ta’ distorsjonijiet sinifikanti fir-RPĊ.

(74)

L-ilmentatur, b’referenza għall-intelliġenza tas-suq tiegħu stess, għar-Rapport, għall-investigazzjonijiet preċedenti tal-Kummissjoni għad-difiża tal-kummerċ u għal sorsi ta’ informazzjoni addizzjonali disponibbli għall-pubbliku (17), allega li jeżistu distorsjonijiet sinifikanti fiċ-Ċina li jinfluwenzaw il-prezz domestiku tal-prodott ikkonċernat.

(75)

B’mod aktar speċifiku, l-ilment enfasizza l-prattiki li ġejjin li jaffettwaw is-suq Ċiniż tal-prodott ikkonċernat:

(76)

Barra minn hekk, l-ilment enfasizza n-natura sistematika tad-distorsjonijiet fejn il-politiki intervenzjonisti tal-Istat jeżerċitaw influwenza deċiżiva fuq l-allokazzjoni tar-riżorsi u l-prezzijiet tagħhom, li jwasslu għal kostijiet aktar baxxi tal-materja prima u tal-produzzjoni u fl-aħħar mill-aħħar inaqqsu l-prezzijiet tal-prodotti finali, bħall-prodott ikkonċernat.

(77)

Bħala konklużjoni, l-ilment ħa l-pożizzjoni li l-prezzijiet jew il-kostijiet, inkluż il-kostijiet tal-materja prima, tal-enerġija u tal-manodopera, ma humiex ir-riżultat ta’ forzi tas-suq ħieles minħabba li huma affettwati minn intervent sostanzjali tal-gvern skont it-tifsira tal-Artikolu 2(6a)(b) tar-Regolament bażiku. Fuq din il-bażi, skont l-ilment, ma huwiex xieraq li jintużaw prezzijiet u kostijiet domestiċi sabiex jiġi stabbilit il-valur normali f’dan il-każ.

(78)

Il-Kummissjoni eżaminat jekk kienx xieraq li jintużaw prezzijiet u kostijiet domestiċi fiċ-Ċina minħabba l-eżistenza ta’ distorsjonijiet sinifikanti skont it-tifsira tal-tal-Artikolu 2(6a), il-punt (b) tar-Regolament bażiku. Dik l-analiżi kopriet l-eżami tal-interventi sostanzjali tal-gvern fl-ekonomija taċ-Ċina b’mod ġenerali, iżda wkoll is-sitwazzjoni speċifika tas-suq fis-settur rilevanti, inkluż il-prodott ikkonċernat.

(79)

Is-settur tal-prodott ikkonċernat huwa servut prinċipalment minn kumpaniji privati, bħal Jiangxi Brother (33), Kunshan Asia Aroma (34) (“Asia Aroma”) jew Thrive (35), u minn kumpaniji privati b’xi sjieda minoritarja mill-Istat bħal Jiaxing Zhonghua (36), iżda wkoll, sa ċertu punt, minn SOEs bħal Sinopec Group (37) u Sinochem Group (38), iż-żewġ intrapriżi ċentrali kkontrollati mill-Kummissjoni għas-Superviżjoni u l-Amministrazzjoni tal-Assi tal-Istat tal-Kunsill tal-Istat (SASAC, State-owned Assets Supervision and Administration Commission of the State Council), li jfornu l-monoetilenglikol, input użat għall-produzzjoni tal-aċidu gliossiliku, (39) li min-naħa tiegħu jintuża għall-produzzjoni tal-vanillin.

(80)

Barra minn hekk, l-investigazzjoni sabet li l-assoċjazzjoni nazzjonali tal-industrija li tirrappreżenta l-produtturi ta’ prodotti kimiċi u petrokimiċi, bħall-prodott ikkonċernat, iċ-China Petroleum and Chemical Industry Federation (“CPCIF”), stabbiliet kumitat speċjali dwar sustanzi kimiċi ta’ speċjalità ta’ livell għoli (40) bħall-vanillin. Is-CPCIF taderixxi mat-tmexxija ġenerali tas-CCP, twettaq attivitajiet tal-Partit, u tipprovdi l-kundizzjonijiet meħtieġa għall-attivitajiet tal-organizzazzjonijiet tal-Partit (41). Barra minn hekk, “l-awtorità ta’ reġistrazzjoni u ta’ ġestjoni tal-Assoċjazzjoni hija l-Ministeru għall-Affarijiet Ċivili” (42) u l-kundizzjonijiet biex wieħed ikun eliġibbli bħala rappreżentant tas-CPCIF jinkludu “l-aderenza mat-tmexxija tas-CCP, l-appoġġ għas-soċjaliżmu b’karatteristiċi Ċiniżi, l-implimentazzjoni b’mod riżolut tal-linja, il-prinċipji u l-politiki tal-Partit, u l-pussess ta’ kwalitajiet politiċi tajbin” (43).

(81)

Dispożizzjonijiet simili jinsabu wkoll fl-Istatut taċ-China Food Additives and Ingredients Association (“CFAA”) (44). Il-Fergħa tal-Partit tas-CFAA (45) hija mistennija wkoll li “ttejjeb kontinwament il-kapaċitajiet ta’ riċerka, […] issaħħaħ il-ħidma tal-bini tal-partit tal-assoċjazzjonijiet tal-industrija u timplimenta bis-sħiħ ir-rekwiżiti ġenerali għall-bini tal-Partit fl-era l-ġdida” (46). Is-CFAA waqqfet ukoll kumitat speċjali dwar it-togħmiet tal-ikel u l-fwejjaħ li jkopru l-vanillin (47).

(82)

L-investigazzjoni kkonfermat li Sinopec Group u Sinochem Group huma t-tnejn membri tas-CPCIF (48).

(83)

Barra minn hekk, fil-livell provinċjali, Jiangxi Food Additives and Ingredients Association spjegat fis-sit web tagħha li l-Assoċjazzjoni “trid tkun taħt it-tmexxija tal-Partit, tieħu l-valuri soċjalisti bħala r-rwol ewlieni” (49). L-investigazzjoni kkonfermat li Jiangxi Brother, li jinsab f’Jiangxi, huwa membru tal-assoċjazzjoni (50).

(84)

Kemm l-intrapriżi pubbliċi kif ukoll dawk privati fis-settur tas-sustanzi kimiċi huma soġġetti għal superviżjoni ta’ politika u gwida. L-aktar dokumenti reċenti ta’ politika Ċiniżi reċenti rigward is-settur tas-sustanzi kimiċi jikkonfermaw l-importanza kontinwa li l-GTĊ jattribwixxi lis-settur, inkluża l-intenzjoni li jintervjeni fis-settur sabiex isawru f’konformità mal-politiki tal-gvern.

(85)

Dan jintwera mill-14-il FYP dwar l-Iżvilupp Ekonomiku u Soċjali u l-Perspettivi għall-2035 (“l-14-il FYP), li skontu l-GTĊ beħsiebu “[j]ittrasforma u jaġġorna l-industriji tradizzjonali, jippromwovi l-ottimizzazzjoni tat-tqassim u l-aġġustament strutturali tal-industriji tal-materja prima [u] jaċċellera t-trasformazzjoni u t-titjib ta’ industriji ewlenin bħas-sustanzi kimiċi u l-produzzjoni tal-karti” (51).

(86)

Barra minn hekk, l-14-il FYP dwar l-Iżvilupp tal-Industrija tal-Materja Prima jirrikjedi li “l-industriji ewlenin bħall-petrokimiċi, l-industrija tas-sustanzi kimiċi u l-azzar għandhom jiffukaw fuq l-għanijiet u l-kompiti tal-pjan” (52).

(87)

Barra minn hekk, l-Opinjoni Gwida dwar il-Promozzjoni tal-Iżvilupp ta’ Kwalità Għolja tal-Industriji tal-Petrokimiċi u s-Sustanzi Kimiċi matul l-14-il FYP (“l-Opinjoni Gwida”) tistipula li l-GTĊ se “[j]ippromwovi l-aġġustament tal-istruttura industrijali: isaħħaħ il-miżuri speċifiċi u jirregola xjentifikament l-iskala tal-industrija” u “jiżviluppa b’mod vigoruż materjali kimiċi ġodda u sustanzi kimiċi fini” (53).

(88)

Fir-rigward tal-fatt li l-GTĊ huwa f’pożizzjoni li jinterferixxi fil-prezzijiet u fil-kostijiet permezz tal-preżenza tal-Istat fid-ditti fis-sens tal-Artikolu 2(6a)(b), it-tieni inċiż tar-Regolament bażiku, minħabba n-nuqqas ta’ kooperazzjoni mill-produtturi esportaturi, kien impossibbli li tiġi stabbilita b’mod sistematiku l-eżistenza ta’ konnessjonijiet personali bejn il-produtturi tal-prodott ikkonċernat u s-CCP. Madankollu, minħabba li l-prodott ikkonċernat jirrappreżenta sottosettur tas-settur tas-sustanzi kimiċi, l-informazzjoni stabbilita fl-investigazzjonijiet reċenti dwar is-settur tas-sustanzi kimiċi, kif indikat fil-premessa (72), hija rilevanti wkoll għall-prodott ikkonċernat.

(89)

Barra minn hekk, l-investigazzjoni sabet li l-membri tas-CCP ta’ Jiaxing Zhonghua għandhom “jistudjaw u jimplimentaw bil-ħerqa l-ispirtu tad-19-il Kungress Nazzjonali tal-Partit Komunista taċ-Ċina, biex jipparteċipaw b’mod attiv fl-aspetti kollha tal-produzzjoni u l-operat tal-kumpanija” (54).

(90)

Barra minn hekk, il-president u l-maniġer ġenerali ta’ Thrive ngħata t-titlu ta’ “Intraprenditur Privat Eċċellenti ta’ Chongqing” mill-Kumitat Muniċipali ta’ Chongqing tal-Partit Komunista Ċiniż u l-Gvern tal-Poplu Muniċipali ta’ Chongqing bħala rikonoxximent għall-“aderenza tiegħu mal-gwida Thought on Socialism with Chinese Characteristics for a New Era ta’ Xi Jinping (55).

(91)

Barra minn hekk, fir-rigward tal-fornituri tal-input, il-president tal-bord tad-diretturi ta’ Sinochem Group iservi bħala s-segretarju tal-kumitat tal-Partit u diversi membri tal-bord tad-diretturi jservu bħala viċi segretarji tal-kumitat tal-Partit (56). Barra minn hekk, Sinochem Group jippreżenta lilu nnifsu bħala kumpanija li “taderixxi mal-gwida Thought on Socialism with Chinese Characteristics for a New Era ta’ Xi Jinping, issaħħaħ b’mod effettiv it-tmexxija ġenerali tal-Partit fuq l-intrapriża, tapprofondixxi l-bini tal-Partit, [u] tagħti sehem sħiħ lir-rwol tal-organizzazzjonijiet tal-Partit fil-livelli kollha” (57).

(92)

B’mod simili, il-President tal-bord tad-diretturi ta’ Sinopec Group huwa s-segretarju tal-kumitat tal-Partit u diversi membri tal-bord iservu bħala viċi segretarji tal-kumitat tal-Partit (58). Sinopec Group iddikjara li beħsiebu “jiffoka fuq il-missjoni l-ġdida u l-kompiti l-ġodda tal-kumpanija fuq il-vjaġġ il-ġdid, imexxi ’l quddiem l-ispirtu awtorivoluzzjonarju tal-partit, isaħħaħ it-tmexxija tal-partit u l-bini tal-partit b’mod komprensiv u integrat, u jippromwovi b’mod sistematiku governanza komprensiva u stretta tal-partit, sabiex jipprovdi garanzija b’saħħitha biex jinkiteb kapitolu ġdid tal-industrija tal-petrokimiċi moderna taċ-Ċina” (59).

(93)

Barra minn hekk, fis-settur tal-prodott ikkonċernat hemm fis-seħħ politiki li jiddiskriminaw favur il-produtturi domestiċi jew li b’xi mod ieħor jinfluwenzaw is-suq fis-sens tal-Artikolu 2(6a)(b), it-tielet inċiż, tar-Regolament bażiku. L-investigazzjoni identifikat dokumenti li juru li l-industrija tibbenefika minn gwida u intervent governattivi fis-settur tas-sustanzi kimiċi, minħabba li l-prodott ikkonċernat jirrappreżenta wieħed mis-sottosetturi tiegħu.

(94)

L-industrija tas-sustanzi kimiċi tibqa’ titqies bħala industrija ewlenija mill-GTĊ (60). Dan huwa kkonfermat fil-bosta pjanijiet, direttivi u dokumenti oħra ffukati fuq is-sustanzi kimiċi, li jinħarġu fil-livell nazzjonali, reġjonali u muniċipali. Skont l-14-il FYP, il-GTĊ immarka lill-industrija tas-sustanzi kimiċi għall-ottimizzazzjoni u l-aġġornament (61).

(95)

B’mod simili, l-14-il FYP dwar l-Iżvilupp tal-Industrija tal-Materja Prima jistipula li l-GTĊ se “[j]ippromwovi l-iżvilupp standardizzat tar-raggruppamenti. Jifformula l-kundizzjonijiet għall-identifikazzjoni tal-parks kimiċi, jiggwida lill-gvernijiet lokali biex jidentifikaw għadd ta’ parks kimiċi, u jiggwida r-raggruppament u l-iżvilupp standardizzat tal-intrapriżi kimiċi. […] Jippromwovi l-kostruzzjoni ta’ bażijiet nazzjonali ġodda ta’ dimostrazzjoni tal-industrija tal-industrijalizzazzjoni fil-qasam tal-materja prima, jippromwovi t-trasformazzjoni u t-titjib tal-agglomerazzjonijiet industrijali f’raggruppamenti. […] [J]oħloq għadd ta’ raggruppamenti tal-industrija tas-sustanzi kimiċi, tal-petrokimiċi […] u tal-materjali ġodda. Jottimizza l-istruttura organizzazzjonali: Jagħmel lill-intrapriżi ewlenin akbar u aktar b’saħħithom. […] [J]appoġġa lill-intrapriżi biex jaċċelleraw fużjonijiet u riorganizzazzjonijiet transreġjonali u ta’ sjieda reċiproka, iżidu l-konċentrazzjoni industrijali, u jwettqu operazzjonijiet internazzjonali. Fis-setturi tas-sustanzi kimiċi, tal-petrokimiċi, tal-azzar, tal-metalli mhux ferrużi, tal-materjali tal-bini u ta’ industriji oħra, jikkultiva grupp ta’ intrapriżi ewlenin fil-katina industrijali b’dominanza ekoloġika u kompetittività ewlenija” (62).

(96)

Barra minn hekk, fil-livell provinċjali, is-settur tas-sustanzi kimiċi huwa identifikat ukoll bħala settur li għandu jiġi promoss, bħal pereżempju fil-Muniċipalità ta’ Jiaxing, fejn jinsab Jiaxing Zhonghua. L-“Implementation Opinion on Chemical and New Material Industry Cluster Cultivation and Development” tal-Uffiċċju Muniċipali tal-Ekonomija u t-Teknoloġija tal-Informazzjoni ta’ Jiaxing tirrikjedi li “[s]al-2025, il-proporzjon ta’ prodotti ta’ materjali kimiċi ġodda ta’ livell għoli fil-belt tagħna se jiżdied ħafna, materjali kimiċi ġodda avvanzati u sustanzi kimiċi fini ta’ livell għoli se jiżviluppaw malajr […] u l-kapaċità żejda se tiġi solvuta b’mod effettiv. […] [Il-Muniċipalità] se tistinka biex taqbeż RMB 300 biljun fil-valur tal-output totali ta’ intrapriżi ta’ materjali kimiċi ġodda akbar mid-daqs deżinjat sal-2025, tiżgura li jkun hemm 3 intrapriżi b’valur tal-output ta’ RMB 10 biljun, 5 intrapriżi b’valur tal-output ta’ RMB 5 biljun jew aktar, u 20 intrapriża b’valur tal-output ta’ RMB 1 biljun jew aktar”. Għal dan l-għan, il-Muniċipalità ta’ Jiaxing beħsiebha “[t]implimenta politiki ta’ appoġġ nazzjonali u provinċjali rilevanti, [u] [ż]żid l-appoġġ għat-trasformazzjoni teknoloġika tal-industrija l-ġdida tal-materjali kimiċi.” (63)

(97)

B’mod aktar speċifiku, is-sottosettur tal-addittiv tal-ikel huwa identifikat ukoll fil-livell provinċjali bħal f’Chongqing, fejn jinsab Jiangxi Brother. L-14-il FYP tal-Gvern tal-Poplu tal-Muniċipalità ta’ Chongqing dwar l-Iżvilupp ta’ Kwalità Għolja tal-Industrija tal-Manifattura jirrikjedi li “jiġu introdotti u kkultivati b’mod attiv intrapriżi tal-produzzjoni tal-addittivi tal-ikel” (64).

(98)

Il-prodott ikkonċernat huwa affettwat ukoll mid-distorsjonijiet tal-kostijiet tal-pagi fis-sens tal-Artikolu 2(6a)(b), il-ħames inċiż tar-Regolament bażiku, kif imsemmi wkoll hawn fuq fil-premessa (72). Dawk id-distorsjonijiet jaffettwaw lis-settur kemm direttament (meta jipproduċi l-prodott ikkonċernat jew l-inputs ewlenin), kif ukoll indirettament (meta jaċċessa l-inputs minn kumpaniji soġġetti għall-istess sistema tax-xogħol fir-RPĊ) (65).

(99)

Barra minn hekk, ma ġiet ippreżentata l-ebda evidenza f’din l-investigazzjoni li turi li s-settur tal-prodott ikkonċernat ma huwiex affettwat mill-intervent tal-gvern fis-sistema finanzjarja fis-sens tal-Artikolu 2(6a)(b), is-sitt inċiż, tar-Regolament bażiku.

(100)

Fl-aħħar nett, il-Kummissjoni tfakkar li sabiex jiġi prodott il-prodott ikkonċernat, huma meħtieġa għadd ta’ inputs. Meta l-produtturi tal-prodott ikkonċernat jixtru/jikkuntrattaw dawn l-inputs, il-prezzijiet li jħallsu (u li jiġu rreġistrati bħala l-kostijiet tagħhom) huma esposti b’mod ċar għall-istess distorsjonijiet sistemiċi msemmija qabel. Pereżempju, il-fornituri tal-inputs jimpjegaw manodopera li hija soġġetta għad-distorsjonijiet. Huma jistgħu jissellfu flus li jkunu soġġetti għad-distorsjonijiet fis-settur finanzjarju/fl-allokazzjoni tal-kapital. Barra minn hekk, huma soġġetti għas-sistema ta’ ppjanar li tapplika fil-livelli kollha tal-gvern u tas-setturi.

(101)

B’konsegwenza ta’ dan, mhux biss il-prezzijiet tal-bejgħ domestiku tal-prodott ikkonċernat ma jkunux xierqa għall-użu skont it-tifsira tal-Artikolu 2(6a)(a) tar-Regolament bażiku, iżda l-kostijiet tal-inputs kollha (inklużi l-materja prima, l-enerġija, l-art, il-finanzjament, il-manodopera, eċċ.) jiġu wkoll affettwati minħabba li l-formazzjoni tal-prezzijiet tagħhom tkun affettwata minn intervent sostanzjali tal-gvern, kif deskritt fil-Partijiet I u II tar-Rapport. Tabilħaqq, l-interventi tal-gvern deskritti fir-rigward tal-allokazzjoni tal-kapital, tal-art, tal-manodopera, tal-enerġija u tal-materja prima huma preżenti fir-RPĊ kollha. Dan ifisser, pereżempju, li input li minnu nnifsu ġie prodott fir-RPĊ permezz ta’ kombinament ta’ firxa ta’ fatturi ta’ produzzjoni jiġi espost għal distorsjonijiet sinifikanti. L-istess japplika għall-input tal-input u l-bqija.

(102)

Fil-qosor, l-evidenza disponibbli wriet li l-prezzijiet jew il-kostijiet tal-prodott ikkonċernat, inkluż il-kostijiet tal-materja prima, tal-enerġija u tal-manodopera, ma humiex ir-riżultat ta’ forzi tas-suq ħieles minħabba li huma affettwati minn intervent sostanzjali tal-gvern skont it-tifsira tal-Artikolu 2(6a)(b) tar-Regolament bażiku, kif muri mill-impatt reali jew potenzjali ta’ wieħed jew aktar mill-elementi rilevanti elenkati fih.

(103)

Mal-bidu, Jiangxi Brother talab lill-Kummissjoni tirrifjuta l-affermazzjoni tal-Ilmentatur dwar l-allegati distorsjonijiet sinifikanti u ħeġġeġ lill-Kummissjoni taċċetta l-prezzijiet u l-kostijiet domestiċi rrapportati mill-esportaturi Ċiniżi li kkooperaw. Madankollu, hija ma ssostanzjatx l-affermazzjoni li għalhekk ġiet miċħuda.

(104)

Frey & Lau kkontesta wkoll l-applikazzjoni tal-Artikolu 2(6a) tar-Regolament bażiku. Huwa sostna li l-ebda distorsjoni skont it-tifsira tal-Artikolu 2(6a) tar-Regolament bażiku ma tista’ tkun preżenti, peress li l-prezz tas-suq varjabbli f’dawn l-aħħar snin flimkien mal-kapaċitajiet żejda eżistenti fir-RPĊ juri n-nuqqas ta’ intervent mill-Istat u juri l-eżistenza ta’ prezzijiet mingħajr distorsjoni tal-prodott taħt investigazzjoni, peress li inkella, il-prezzijiet kienu jinżammu kostanti jew baxxi. Il-Kummissjoni qieset li prezzijiet stabbli ma humiex konsegwenza neċessarja ta’ distorsjoni skont it-tifsira tal-Artikolu 2(6a) tar-Regolament bażiku. Bl-istess mod, il-prezzijiet varjabbli ma jurux nuqqas ta’ tali distorsjonijiet. Għalhekk, l-argumenti mressqa minn Frey & Lau ma wrewx in-nuqqas ta’ distorsjoni tal-prezzijiet jew ta’ intervent mill-Istat. L-affermazzjoni ġiet għalhekk miċħuda.

(105)

Bi tweġiba għall-Ewwel Nota tal-Kummissjoni, Thrive argumenta li tqabbil tal-prezzijiet domestiċi għall-fatturi tal-produzzjoni għall-vanillin sintetiku u l-etilvanillin - b’mod partikolari l-enerġija, il-materja prima ewlenija, u l-manodopera - mal-prezzijiet fil-pajjiżi rappreżentattivi eżaminati mill-Kummissjoni, ma jindikax il-preżenza ta’ distorsjonijiet tas-suq fiċ-Ċina. Il-Kummissjoni nnotat li Thrive la afferma li għalhekk jenħtieġ li l-Artikolu 2(6a) ma jiġix applikat, u lanqas ma ssostanzja għaliex din l-analiżi tal-prezzijiet tkun tfisser li l-Artikolu 2(6a) ma jistax jiġi applikat. Fi kwalunkwe każ, il-Kummissjoni qieset li l-analiżi tal-prezzijiet ipprovduta minn Thrive ma kinitx kompluta, peress li kienet tikkonsisti biss f’għadd limitat ta’ fatturi ta’ produzzjoni.

(106)

Mad-divulgazzjoni definittiva, Thrive ippreżenta, fit-8 ta’ April 2025, sett addizzjonali ta’ kummenti li jindikaw l-allegati ineżattezzi jew nuqqas ta’ ftehim fl-ilment jew fl-argumentazzjoni tal-Kummissjoni dwar l-eżistenza ta’ distorsjonijiet sinifikanti li ġejjin: (i) il-kapaċità tal-produzzjoni approvata tal-kumpanija ma tikkorrispondix mal-livelli indikati mill-ilmentatur (ara l-premessa (75)); (ii) Jiaxing Zhonghua ma waqqafx sit ta’ produzzjoni ġdid, kif indikat mill-ilmentatur, iżda kumpanija ġdida; barra minn hekk, il-kapaċitajiet ta’ produzzjoni tal-produtturi Ċiniżi indikati mill-ilmentatur ma humiex korretti (ara l-premessa (75)); (iii) l-iżvilupp tas-suq Ċiniż, ikkaratterizzat mill-inabbiltà tas-suq li jassorbi l-volumi tal-produzzjoni tal-prodott taħt investigazzjoni, kif deskritt mill-ilmentatur (ara l-premessa (75)), ma jikkorrispondix għall-perċezzjoni ta’ Thrive tal-iżvilupp tas-suq; (iv) il-fatt li l-maniġer ġenerali ta’ Thrive ngħata t-titolu ta’ Imprenditur Privat Eċċellenti ta’ Chongqing (ara l-premessa (90)) kien dovut għall-kontribuzzjoni ta’ Thrive għall-introjtu mit-taxxa u r-responsabbiltà soċjali tal-kumpanija, u l-premju ma għandu x’jaqsam xejn mal-pożizzjoni politika tal-maniġer ġenerali; fi kwalunkwe każ, il-maniġer ġenerali ta’ Thrive ma huwiex membru tas-CCP; (v) Jiangxi Brother ma jinsabx f’Chongqing u għalhekk ma huwiex soġġett għall-14-il FYP ta’ Chongqing dwar l-Iżvilupp ta’ Kwalità Għolja tal-Industrija tal-Manifattura (ara l-premessa (97)); (vi) fir-rigward tas-sottosettur tal-addittivi tal-ikel li qed jiġi identifikat fil-livell provinċjali għall-appoġġ tal-gvern (ara l-premessa (97)), filwaqt li l-etil vanillin u l-vanillin jitqiesu bħala addittivi tal-ikel, l-industrija kimika tal-aroma sintetika ma tissemmiex fl-FYP ikkwotata mill-Kummissjoni u, konsegwentement, Thrive ma jgawdix minn appoġġ governattiv jew minn trattament speċjali permezz ta’ politiki.

(107)

Il-Kummissjoni ħadet nota tal-kummenti ta’ Thrive u indikat li: (i) irrispettivament mill-preċiżjoni tal-kapaċità tal-produzzjoni indikata mill-ilmentatur, il-livelli tal-kapaċità tal-produzzjoni pprovduti minn Thrive jikkonfermaw l-argument tal-ilmentatur dwar iż-żieda qawwija fil-kapaċità tal-produzzjoni fiċ-Ċina tal-prodott ikkonċernat, bil-kapaċità tal-produzzjoni indikata minn Thrive saħansitra ogħla mill-kapaċità msemmija mill-ilmentatur; (ii) Thrive sempliċement sostna li l-kapaċitajiet ta’ produzzjoni ta’ produtturi Ċiniżi oħra, indikati mill-ilmentatur, ma humiex korretti, mingħajr ma pprovda l-ebda data li fil-fatt tixħet dubju fuq is-sottomissjoni tal-ilmentatur; (iii) b’ mod simili, ir-rimarka ta’ Thrive dwar id-dinamika tas-suq tal-prodott ikkonċernat ma kinitx sostanzjata minn xi data jew spjegazzjoni addizzjonali u għalhekk il-Kummissjoni ma rat l-ebda raġuni biex tiddubita l-informazzjoni pprovduta mill-ilmentatur; (iv) il-Kummissjoni ma ddikjaratx li l-maniġer ġenerali ta’ Thrive kien se jkun membru tas-CCP, u lanqas ma għamlet xi dikjarazzjoni dwar il-persważjonijiet politiċi tal-maniġer; il-Kummissjoni sempliċement osservat li t-titolu kien ingħata mill-Kumitat Muniċipali tas-CCP ta’ Chongqing u mill-Gvern tal-Poplu Muniċipali ta’ Chongqing u li l-adeżjoni tal-maniġer mal-gwida “Thought on Socialism with Chinese Characteristics for a New Era” ta’ Xi Jinping tqieset rilevanti mill-awtoritajiet rispettivi fl-għoti tat-titolu. Barra minn hekk, l-investigazzjoni wriet li l-maniġer ġenerali ta’ Thrive jippromwovi l-ħidma tal-bini tas-CCP fil-kumpanija u “għandu fiduċja li jekk Thrive jkun jista’ jikkombina u jintegra l-kunċetti u l-prattiki tas-CCP, Thrive se jkun jista’ wkoll jilħaq żvilupp tajjeb ħafna u jikseb kompetittività globali (66)”; (v) fir-rigward tar-referenza għal Chongqing bħala muniċipalità fejn jinsab Jiangxi Brother, dan huwa żball klerikali min-naħa tal-Kummissjoni, il-premessa (97) kellha tirreferi għal Thrive, li jinsab f’Chongqing; filwaqt li għalhekk jista’ jiġi aċċettat li Jiangxi Brother ma huwiex soġġett għall-politiki industrijali ta’ Chongqing imsemmija fil-premessa (97), huwa jibqa’ soġġett għall-interferenza governattiva tal-awtoritajiet ta’ Jiangxi (ara l-premessa (83)), kif ukoll għad-distorsjonijiet fil-pajjiż kollu kif deskritt fil-premessi (83)–(102); b’mod korrispondenti, il-politiki Chongqing huma rilevanti għall-produtturi lokali tal-vanillin, bħal Thrive; (vi) irrispettivament minn jekk Thrive jibbenefikax speċifikament mill-mandat tal-gvern biex jikkultiva intrapriżi tal-produzzjoni tal-addittivi tal-ikel f’Chongqing minħabba l-appoġġ għall-politiki li qed jiġi dirett lejn kumpaniji li jipproduċu addittiv tal-ikel iżda mhux lejn produtturi ta’ aromi sintetiċi, il-Kummissjoni spjegat hawn fuq (ara b’mod partikolari t-taqsimiet minn 2.1 sa 2.4) għaliex it-tipi kollha ta’ vanillin jikkostitwixxu prodott simili; għalhekk, ir-referenza fil-premessa (97) għall-14-il FYP ta’ Chongqing dwar l-Iżvilupp ta’ Kwalità Għolja tal-Industrija tal-Manifattura tibqa’ kompletament rilevanti għall-iskop tal-identifikazzjoni tal-interventi tal-gvern skont it-tifsira tal-Artikolu 2(6a), il-punt (b) tar-Regolament bażiku. Konsegwentement, il-kummenti ta’ Thrive ma setgħux ibiddlu d-determinazzjonijiet tal-Kummissjoni dwar l-eżistenza ta’ distorsjonijiet sinifikanti fis-settur tal-prodott ikkonċernat.

(108)

Fid-dawl ta’ dan ta’ hawn fuq, il-Kummissjoni kkonkludiet li ma huwiex xieraq li jintużaw prezzijiet u kostijiet domestiċi biex jiġi stabbilit il-valur normali f’dan il-każ. Konsegwentement, il-Kummissjoni pproċediet biex taħdem il-valur normali esklużivament abbażi tal-kostijiet tal-produzzjoni u tal-bejgħ li jirriflettu prezzijiet jew valuri referenzjarji mingħajr distorsjoni, jiġifieri, f’dan il-każ, abbażi tal-kostijiet korrispondenti tal-produzzjoni u l-bejgħ f’pajjiż rappreżentattiv xieraq, f’konformità mal-Artikolu 2(6a)(a) tar-Regolament bażiku, kif deskritt fit-taqsima li ġejja.

(109)

L-għażla tal-pajjiż rappreżentattiv kienet ibbażata fuq il-kriterji li ġejjin skont l-Artikolu 2(6a) tar-Regolament bażiku:

(110)

Kif spjegat fil-premessi (64) sa (67), il-Kummissjoni ħarġet żewġ noti fil-fajl dwar is-sorsi għad-determinazzjoni tal-valur normali: l-Ewwel Nota fil-21 ta’ Ottubru 2024 u t-Tieni Nota fit-3 ta’ Jannar 2025. Dawn in-noti ddeskrivew il-fatti u l-evidenza sottostanti għall-kriterji rilevanti, u indirizzaw il-kummenti li waslu mill-partijiet dwar dawn l-elementi u dwar is-sorsi rilevanti. Fit-Tieni Nota, il-Kummissjoni infurmat lill-partijiet interessati bl-intenzjoni tagħha li tqis lill-Brażil bħala pajjiż rappreżentattiv xieraq f’dan il-każ, jekk l-eżistenza tad-distorsjonijiet sinifikanti skont l-Artikolu 2(6a) tar-Regolament bażiku tiġi kkonfermata.

(111)

Fl-Ewwel Nota, il-Kummissjoni nnotat li l-prodott taħt investigazzjoni ma huwa prodott fl-ebda pajjiż bl-istess livell ta’ żvilupp ekonomiku bħaċ-Ċina. Imbagħad, fin-nuqqas ta’ prodott fl-istess kategorija ġenerali u/jew settur bħall-vanillin kif deskritt fil-punt 3.3.3 hawn taħt, il-Kummissjoni identifikat lill-Brażil, lill-Indoneżja, lill-Messiku u lit-Turkija bħala pajjiżi fejn il-produzzjoni ta’ prodotti taħt l-istess kodiċi NACE (68) tal-prodott taħt investigazzjoni kienet magħrufa li sseħħ u b’livell simili ta’ żvilupp ekonomiku bħar-RPĊ skont il-Bank Dinji, jiġifieri kollha huma kklassifikati mill-Bank Dinji bħala pajjiżi “b’introjtu medju superjuri” fuq bażi tal-introjtu nazzjonali gross.

(112)

Waslu kummenti mingħand Thrive. Huwa sostna li l-pajjiżi magħżula ma humiex adattati minħabba l-kostijiet għoljin tat-trasport minħabba n-nuqqas ta’ disponibbiltà ta’ materja prima bażika fil-livell lokali. Il-kostijiet tat-trasport ta’ dik il-materja prima lejn dawn il-pajjiżi jammontaw għal 50 %–100 % ta’ dawn il-kostijiet tal-prodotti jew saħansitra jaqbżu dawn il-kostijiet. Thrive sostna wkoll li l-kumplessità tas-sistema ta’ tassazzjoni fil-Brażil iżżid bla bżonn il-kost tal-produzzjoni tal-vanillin, u tkompli tiskwalifikaha. Thrive issuġġerixxa li l-Istati Uniti tal-Amerka, iċ-Ċina, l-Indja u l-Ewropa biss għandhom il-prerekwiżiti għall-produzzjoni ta’ prodotti sintetiċi u tal-etilvanillin.

(113)

Madankollu, il-pajjiżi msemmija hawn fuq inkluż l-Istati Membri tal-UE, minbarra ċ-Ċina nnifisha li, ovvjament, ma setgħetx titqies, ma għandhomx livell simili ta’ żvilupp ekonomiku bħar-RPĊ skont il-Bank Dinji. Kif spjegat fl-Ewwel Nota, il-Kummissjoni ma setgħet tidentifika l-ebda pajjiż fl-istess livell ta’ żvilupp ekonomiku bħaċ-Ċina fejn jiġi prodott il-vanillin, u għalhekk iffokat l-analiżi tagħha fuq pajjiżi fejn jiġu prodotti prodotti bl-istess kodiċi NACE tal-prodott taħt investigazzjoni. Il-Kummissjoni nnotat li l-preżenza ta’ materja prima fil-pajjiż rappreżentattiv ma hijiex kriterju li għandu jiġi kkunsidrat, u li l-affermazzjoni li s-sistema ta’ tassazzjoni fil-Brażil tkun fattur ewlieni għaż-żieda fil-kost ma kienet akkumpanjata minn l-ebda evidenza sottostanti. Thrive naqas ukoll milli jispjega għaliex jenħtieġ li jintgħażel pajjiż li ma huwiex pajjiż “b’introjtu medju superjuri”. Għalhekk, il-Kummissjoni ċaħdet l-affermazzjonijiet ta’ Thrive.

(114)

Fl-Ewwel Nota, il-Kummissjoni spjegat li, minkejja riċerka estensiva, hija ma setgħetx tidentifika l-produzzjoni tal-prodott taħt investigazzjoni jew ta’ prodott fl-istess kategorija ġenerali u/jew settur bħall-vanillin f’pajjiżi b’livell simili ta’ żvilupp ekonomiku bħar-RPĊ, flimkien ma’ data finanzjarja disponibbli faċilment għall-produtturi kkonċernati, kif spjegat fil-premessa (118). Għalhekk, il-Kummissjoni kienet indikat li kienet se twessa’ l-ambitu tar-riċerka tagħha għal prodotti taħt l-istess kodiċi NACE bħall-prodott taħt investigazzjoni, jiġifieri l-manifattura ta’ sustanzi kimiċi organiċi, sabiex tistabbilixxi pajjiż rappreżentattiv xieraq għall-applikazzjoni tal-Artikolu 2(6a) tar-Regolament bażiku u identifikat lill-Brażil, lill-Indoneżja, lill-Messiku u lit-Turkija bħala tali pajjiżi.

(115)

L-ebda parti interessata ma ppreżentat kummenti dwar l-intenzjoni tal-Kummissjoni li tuża kumpaniji attivi fil-produzzjoni ta’ prodotti li jaqgħu taħt l-istess kodiċi NACE tal-prodott taħt investigazzjoni. L-ebda parti interessata ma ħarġet bi proposta għal prodott alternattiv.

(116)

Fl-Ewwel Nota, il-Kummissjoni indikat li għall-pajjiżi identifikati bħala pajjiżi fejn qed jiġu prodotti prodotti bl-istess kodiċi NACE bħall-prodott taħt investigazzjoni, jiġifieri l-Brażil, l-Indoneżja, il-Messiku u t-Turkija, hija tkompli tfittex data finanzjarja affidabbli disponibbli faċilment mill-produtturi attivi fis-settur bl-istess kodiċi NACE tal-prodott taħt investigazzjoni.

(117)

Fir-rigward tal-Indoneżja, il-Kummissjoni analizzat l-importazzjonijiet tal-fatturi ewlenin tal-produzzjoni. Għal erba’ mit-tmien fatturi ewlenin tal-produzzjoni li flimkien jirrappreżentaw bejn 33 % u 52 % tal-kost totali tal-manifattura tal-vanillin, kien hemm volumi għoljin ta’ importazzjonijiet (43 %, 53 %, 80 % u 90 %) mir-RPĊ. Barra minn hekk, tliet fatturi ewlenin oħra tal-produzzjoni huma importati miċ-Ċina f’volumi materjali, li jvarjaw minn 6 % sa 11 %. Barra minn hekk, il-Kummissjoni sabet li l-Indoneżja timporta l-faħam għall-istim mir-Russja bi prezzijiet distorti. Fid-dawl ta’ dawn l-osservazzjonijiet, il-Kummissjoni qieset li l-fatturi ewlenin tal-produzzjoni importati fl-Indoneżja huma affettwati minn distorsjonijiet fil-prezzijiet. Għalhekk, il-Kummissjoni qieset li l-Indoneżja ma setgħetx titqies bħala pajjiż rappreżentattiv xieraq.

(118)

Fir-rigward tal-Messiku, fl-Ewwel Nota, il-Kummissjoni fittxet kumpaniji attivi fil-produzzjoni ta’ vanillin naturali b’dikjarazzjonijiet finanzjarji disponibbli faċilment u ma setgħu jiġu identifikati l-ebda tali produtturi. B’riżultat ta’ dan, il-Kummissjoni kkonkludiet li l-Messiku ma setax jitqies bħala pajjiż rappreżentattiv xieraq għal din l-investigazzjoni.

(119)

Fl-ewwel Nota, il-Kummissjoni nnotat li kienet sabet data finanzjarja disponibbli faċilment relatata ma’ żewġ kumpaniji Brażiljani, Dexxos Participações S.A. u Prox do Brasil, u ma’ seba’ kumpaniji Torok (69) li jimmanifatturaw prodotti kimiċi bażiċi organiċi oħra.

(120)

Fil-kummenti tiegħu għall-Ewwel Nota, Thrive kkummenta li ma qisx lill-kumpaniji Brażiljani u Torok identifikati mill-Kummissjoni bħala komparabbli mal-industrija tiegħu. Il-Kummissjoni ċċarat li minħabba n-nuqqas ta’ produzzjoni ta’ prodott fl-istess kategorija ġenerali u/jew settur bħall-vanillin fil-pajjiżi li jistgħu jitqiesu bħala pajjiżi rappreżentattivi xierqa potenzjali, hija kienet estendiet il-kamp ta’ applikazzjoni tar-riċerka tagħha għal prodotti taħt l-istess kodiċi NACE bħall-prodott taħt investigazzjoni. Thrive ma ppreżenta l-ebda evidenza li tali approċċ ikun żbaljat, u lanqas ma ssostanzja għaliex dawn il-kumpaniji ma kinux se jkunu xierqa. Għalhekk, il-Kummissjoni ċaħdet l-affermazzjoni.

(121)

Jiangxi Brother ikkummenta li ż-żewġ produtturi Brażiljani jimmanifatturaw prodotti li huma differenti mit-togħma u l-fwieħa jew is-sustanzi kimiċi tal-aroma u għalhekk jenħtieġ li ma jintużawx għall-kalkolu tal-valur normali. Fir-rigward tal-manifatturi Torok, Jiangxi Brother sostna li l-kumpanija Mercan Kimya għandha dikjarazzjonijiet finanzjarji disponibbli għall-pubbliku li jipprovdu dettalji finanzjarji aħjar mis-sitt kumpaniji l-oħra, b’mod partikolari l-kostijiet SG&A huma divulgati b’mod espliċitu. B’appoġġ għal din l-affermazzjoni, Jiangxi Brother irrefera għall-Kawża tal-Qorti Ġenerali T-762/20 Sinopec Chongqing SVW Chemical et vs Il-Kummissjoni (70), li tistipula li jenħtieġ li l-kostijiet SG&A ta’ kumpanija fil-pajjiż rappreżentattiv imġarrba lil hinn mil-livell EXW ma jitqisux fil-kostruzzjoni tal-valur normali skont l-applikazzjoni tal-Artikolu 2(6a) tar-Regolament bażiku. Skont Jiangxi Brother, jenħtieġ li d-data finanzjarja li ma tiddivulgax tali livell ta’ dettalji ma titqiesx minħabba li ma tippermettix l-esklużjoni tal-kostijiet SG&A. Barra minn hekk, Jiangxi Brother innota wkoll li t-Turkija tidher li għandha l-aktar perċentwal baxx ta’ importazzjonijiet miċ-Ċina u minn pajjiżi mhux tad-WTO, u fuq din il-bażi ssuġġerixxa li t-Turkija tkun l-aktar pajjiż rappreżentattiv xieraq.

(122)

Fit-Tieni Nota, il-Kummissjoni indirizzat l-affermazzjonijiet ta’ hawn fuq. B’mod partikolari, il-Kummissjoni nnotat li Jiangxi Brother ma kienx ikkontesta l-użu tad-data finanzjarja tal-kumpanija bil-kodiċi NACE, fejn jappartjenu ż-żewġ manifatturi Brażiljani. Barra minn hekk, il-Kummissjoni sabet li l-fatt li xi wħud mill-prodotti tagħhom ma humiex simili għas-sustanzi kimiċi tal-aroma użati fis-settur tat-togħma jew tal-fwieħa – il-kategorija aktar speċifika li jappartjeni għaliha l-prodott investigat – ma jikkostitwix kunsiderazzjoni rilevanti għall-valutazzjoni tal-Kummissjoni. Ta’ min jinnota li kważi dejjem huwa l-każ li l-kumpaniji meqjusa xierqa fil-kuntest tal-Artikolu 2(6a)(a) tar-Regolament bażiku qed jipproduċu diversi prodotti. Il-Kummissjoni ċċarat ukoll li huwa wkoll komuni ħafna li l-livell ta’ dettall ta’ data finanzjarja disponibbli faċilment ta’ kumpaniji xierqa fil-pajjiż rappreżentattiv normalment ma jippermettix analiżi aktar granulari tal-SG&A u l-profitt fil-livell ta’ prodotti individwali.

(123)

Fir-rigward tal-affermazzjoni minn Jiangxi Brother dwar id-dettalji disponibbli fid-data finanzjarja tal-manifatturi Torok, il-Kummissjoni spjegat li, filwaqt li qablet li l-livell ta’ dettall disponibbli fid-dikjarazzjonijiet finanzjarji huwa fattur rilevanti, dan ma jikkostitwix kriterju suffiċjenti biex tiġi eskluża d-data finanzjarja disponibbli minn kumpaniji oħra. Barra minn hekk, kif spjegat fil-premessa (125), it-Turkija ġiet eskluża minħabba distorsjonijiet fil-prezzijiet ta’ wieħed mill-FOPs ewlenin. Għar-raġunijiet ippreżentati hawn fuq, il-Kummissjoni ċaħdet l-affermazzjonijiet ta’ Jiangxi Brother rigward ċerta data finanzjarja.

(124)

Fir-rigward tal-affermazzjoni ta’ Jiangxi Brother li t-Turkija jkollha sehem aktar baxx ta’ importazzjonijiet mir-RPĊ jew minn kwalunkwe wieħed mill-pajjiżi elenkati fl-Anness I tar-Regolament (UE) 2015/755 tal-Parlament Ewropew u tal-Kunsill (71) tal-fatturi ewlenin tal-produzzjoni mill-Brażil, fl-Ewwel Nota, il-Kummissjoni qieset li ż-żewġ pajjiżi jistgħu jintużaw bħala pajjiż rappreżentattiv xieraq peress li tali volumi ta’ importazzjoni kienu b’mod ġenerali relattivament limitati għal kull wieħed minn dawn il-pajjiżi.

(125)

Wara li analizzat il-kummenti għall-Ewwel Nota, il-Kummissjoni kompliet tanalizza d-data dwar l-importazzjoni tal-fatturi tal-produzzjoni fil-Brażil u fit-Turkija. Il-Kummissjoni sabet li kien hemm distorsjoni kbira fl-importazzjonijiet tal-fenol lejn it-Turkija, wieħed mill-aktar FOPs importanti (72). B’mod partikolari, hija sabet li t-Turkija timporta volumi kbar ta’ fenol mir-Russja (40 % matul il-perjodu ta’ investigazzjoni), filwaqt li l-importazzjonijiet ta’ din il-materja prima mir-Russja bħalissa jinsabu taħt sanzjonijiet tal-UE (73). L-evoluzzjoni ’l isfel tal-prezzijiet tal-importazzjonijiet mir-Russja wara l-impożizzjoni tas-sanzjonijiet tal-UE u ż-żieda fil-volumi ta’ fenol mir-Russja lejn it-Turkija tissuġġerixxi li hemm distorsjoni preżenti. Abbażi ta’ dan, il-Kummissjoni ċaħdet l-affermazzjoni ta’ Jiangxi Brother li t-Turkija tkun aktar xierqa mill-Brażil bħala pajjiż rappreżentattiv.

(126)

Analiżi ulterjuri tad-data dwar l-importazzjoni tal-fatturi tal-produzzjoni fil-Brażil uriet li l-importazzjonijiet fil-Brażil miċ-Ċina u l-pajjiżi elenkati fl-Anness I tar-Regolament (UE) 2015/755 ma kellhomx impatt fuq id-determinazzjoni tal-prezz tal-fatturi tal-produzzjoni, bl-eċċezzjoni tal-aċidu gliossiliku. Fir-rigward tal-aċidu gliossiliku, il-Kummissjoni ma użatx il-prezzijiet tal-importazzjoni lejn il-Brażil bħala parametru referenzjarju għar-raġunijiet spjegati fil-premessa (141) hawn taħt.

(127)

Il-Kummissjoni sabet li ma kien hemm l-ebda importazzjoni miċ-Ċina fil-Brażil ta’ metanol, aċidu sulfuriku, etil vanillin mhux raffinata u etanol. Il-Kummissjoni stabbiliet għall-inputs li ġejjin li kien hemm importazzjonijiet miċ-Ċina u, fejn rilevanti, importazzjonijiet mill-pajjiżi elenkati fl-Anness I tar-Regolament (UE) 2015/755:

(128)

Għall-inputs kollha ta’ hawn fuq, il-Kummissjoni kkonkludiet li l-prezzijiet tal-importazzjoni fil-Brażil mill-pajjiżi l-oħra kollha ma kinux distorti peress li ma kinux konformi mal-prezzijiet tal-importazzjonijiet mir-RPĊ jew mill-pajjiżi elenkati fl-Anness I tar-Regolament (UE) 2015/755. Għall-fatturi l-oħra kollha tal-produzzjoni, inkluż l-aċidu gliossiliku, il-Kummissjoni ma użatx il-prezzijiet tal-importazzjoni fil-Brażil bħala parametru referenzjarju, kif spjegat kif xieraq fil-premessa (141).

(129)

Il-partijiet interessati ġew infurmati b’dan fit-Tieni Nota. F’dik in-Nota, il-Kummissjoni infurmat ukoll lill-partijiet li kienet irrevediet il-lista ta’ fatturi ta’ produzzjoni, peress li kienet stabbiliet li żewġ fatturi ta’ produzzjoni fil-fatt ma ntużawx mill-produtturi esportaturi inklużi fil-kampjun.

(130)

Fid-dawl tal-kunsiderazzjonijiet ta’ hawn fuq, b’mod partikolari d-distorsjoni fir-rigward tal-importazzjonijiet tal-fenol fit-Turkija filwaqt li ma teżisti l-ebda distorsjoni bħal din fil-Brażil, u fid-dawl tal-kwantitajiet ġenerali tal-importazzjonijiet fiż-żewġ pajjiżi kkunsidrati, il-Kummissjoni infurmat lill-partijiet interessati fit-Tieni Nota li kellha l-ħsieb li tuża lill-Brażil bħala pajjiż rappreżentattiv u lill-kumpaniji Dexxos Participações S.A. u Prox do Brasil, f’konformità mal-Artikolu 2(6a)(a), l-ewwel inċiż, tar-Regolament bażiku sabiex tikseb prezzijiet jew valuri referenzjarji mingħajr distorsjoni għall-kalkolu tal-valur normali.

(131)

Il-partijiet interessati ġew mistiedna jikkummentaw dwar l-adegwatezza tal-Brażil bħala pajjiż rappreżentattiv u ta’ Dexxos Participações S.A. u Prox do Brasil bħala produtturi fil-pajjiż rappreżentattiv.

(132)

L-ilmentatur qabel mal-proposta tal-Kummissjoni. Jiangxi Brother ma ppreżentax kummenti dwar l-adegwatezza tal-Brażil bħala pajjiż rappreżentattiv, madankollu ppreżenta kummenti dwar ċerta data finanzjarja ta’ wieħed miż-żewġ produtturi identifikati mill-Kummissjoni, kif irrapportat fil-premessa (165) hawn taħt. Il-Kummissjoni indirizzat dawn il-kummenti fl-istess premessa.

(133)

Wara li ġie stabbilit li l-Brażil kien l-uniku pajjiż rappreżentattiv xieraq, abbażi tal-elementi kollha msemmija hawn fuq, ma kienx hemm bżonn li titwettaq valutazzjoni tal-livell ta’ protezzjoni soċjali u ambjentali f’konformità mal-aħħar sentenza tal-Artikolu 2(6a)(a), l-ewwel inċiż tar-Regolament bażiku.

(134)

Fid-dawl tal-analiżi ta’ hawn fuq, il-Brażil issodisfa l-kriterji stabbiliti fl-Artikolu 2(6a)(a), l-ewwel inċiż, tar-Regolament bażiku sabiex jitqies bħala pajjiż rappreżentattiv xieraq.

(135)

Fl-Ewwel Nota, il-Kummissjoni elenkat il-fatturi ta’ produzzjoni, bħall-materjali, l-enerġija u l-manodopera użati fil-produzzjoni tal-prodott taħt investigazzjoni mill-produtturi esportaturi u stiednet lill-partijiet interessati jikkummentaw u jipproponu informazzjoni disponibbli faċilment għall-pubbliku dwar il-valuri mingħajr distorsjoni għal kull wieħed mill-fatturi ta’ produzzjoni msemmija f’dik in-nota.

(136)

Sussegwentement, fit-Tieni Nota, il-Kummissjoni ddikjarat li, sabiex taħdem il-valur normali f’konformità mal-Artikolu 2(6a)(a) tar-Regolament bażiku, hija kienet se tuża l-GTA (74) u l-parametri referenzjarji internazzjonali mingħajr distorsjoni (75) biex tistabbilixxi l-kost mingħajr distorsjoni tal-materja prima. Barra minn hekk, il-Kummissjoni ddikjarat li kienet se tuża l-istatistika ppubblikata mill-Instituto Brasileiro de Geografia e Estatística (IBGE) biex tistabbilixxi l-kostijiet mingħajr distorsjoni tal-manodopera (76) u l-istatistika ppubblikata mill-Ministeru tal-Minjieri u tal-Enerġija tal-Brażil għall-elettriku (77).

(137)

Meta titqies l-informazzjoni kollha ppreżentata mill-partijiet interessati u miġbura matul iż-żjarat ta’ verifika, il-fatturi ta’ produzzjoni li ġejjin u s-sorsi tagħhom ġew identifikati sabiex jiġi ddeterminat il-valur normali f’konformità mal-Artikolu 2(6a)(a) tar-Regolament bażiku:

Tabella 2

Fatturi tal-produzzjoni tal-vanillin

(138)

Il-Kummissjoni inkludiet valur għall-kostijiet ġenerali tal-manifattura sabiex tkopri l-kostijiet mhux inklużi fil-fatturi ta’ produzzjoni msemmija aktar ’il fuq. Sabiex tistabbilixxi dan l-ammont, il-Kummissjoni użat il-perċentwal tal-kostijiet ġenerali tal-manifattura fuq il-kostijiet tal-manifattura effettivament imġarrba mill-produtturi esportaturi. Il-metodoloġija hija spjegata kif xieraq fit-Taqsima 3.4.8.

(139)

L-ammonti tagħhom ittieħdu mit-tweġibiet għall-kwestjonarju tal-produtturi esportaturi. L-ammont il-ġdid għall-kostijiet ġenerali tal-manifattura ġie espress bħala perċentwal tal-kostijiet tal-manifattura rrapportati u ġie applikat għall-kostijiet tal-manifattura kkalkulati mill-ġdid.

(140)

Sabiex jiġi stabbilit il-prezz mingħajr distorsjoni tal-materja prima kif ikkonsenjata sal-fabbrika ta’ produttur tal-pajjiż, il-Kummissjoni użat bħala bażi l-prezz medju ponderat tal-importazzjoni lejn il-Brażil kif irrapportat fil-GTA li miegħu żdiedu d-dazji tal-importazzjoni u l-kostijiet tat-trasport. Il-prezz tal-importazzjoni fil-pajjiż rappreżentattiv ġie ddeterminat bħala medja ponderata tal-prezzijiet medji tal-bejgħ tal-importazzjonijiet mill-pajjiżi terzi kollha minbarra r-RPĊ u l-pajjiżi terzi elenkati fl-Anness 1 tar-Regolament (UE) 2015/755. Il-kwantitajiet li fadal tqiesu bħala rappreżentattivi. Il-Kummissjoni ddeċidiet li teskludi l-importazzjonijiet mir-RPĊ lejn il-pajjiż rappreżentattiv peress li fit-Taqsima 3.2 ikkonkludiet li ma huwiex xieraq li jintużaw prezzijiet u kostijiet domestiċi fir-RPĊ minħabba l-eżistenza ta’ distorsjonijiet sinifikanti skont l-Artikolu 2(6a)(b) tar-Regolament bażiku. Minħabba li ma hemm l-ebda evidenza li turi li l-istess distorsjonijiet ma jaffettwawx bl-istess mod il-prodotti maħsubin għall-esportazzjoni, il-Kummissjoni qieset li l-istess distorsjonijiet affettwaw il-prezzijiet tal-esportazzjoni.

(141)

Għall-aċidu gliossiliku, il-gwajakolu/il-gwetol, it-toluwen, is-sulfat tar-ram u l-perossidu tal-idroġenu, id-data tal-importazzjoni tal-GTA għall-Brażil ma tqisitx xierqa, minħabba n-nuqqas ta’ importazzjonijiet sinifikanti u/jew l-inklużjoni ta’ diversi tikketti tal-prodott fl-istess prodott tal-GTA. Għal dik il-materja prima, il-Kummissjoni identifikat bħala l-aħjar alternattiva prezz internazzjonali mingħajr distorsjoni skont id-disponibbiltà tad-data għal kull wieħed minn dawn l-FOPs. Għat-toluwen, is-sulfat tar-ram u l-perossidu tal-idroġenu, il-Kummissjoni nnotat li l-Brażil huwa esportatur nett ta’ kwantitajiet sinifikanti (78) bi prezz raġonevoli. Għal dawn it-tliet materji prima, il-Kummissjoni stabbiliet il-prezzijiet internazzjonali bbażati fuq il-prezzijiet frank abbord miksuba mid-data tal-esportazzjoni Brażiljana tal-GTA lis-sħab kummerċjali kollha.

(142)

Għall-aċidu gliossiliku, il-kodiċi ta’ oġġetti 2918 30 00 użat fil-Brażil għall-importazzjoni tal-prodott jinkludi taħlita ta’ prodotti multipli (jiġifieri d-deskrizzjoni tariffarja fil-GTA: “aċidi karbossiliċi b’funzjoni ta’ aldeid jew ta’ keton iżda mingħajr funzjoni oħra ta’ ossiġenu, l-anidridi, l-aloġenuri, il-perossidi, il-perossiaċidi u d-derivattivi aloġenati, sulfonati, nitrati jew nitrosati tagħhom”) u l-Kummissjoni ma kinitx f’pożizzjoni li tgħaddi l-istatistika dwar l-importazzjonijiet tal-GTA. Il-Kummissjoni sabet li, tali prodott huwa prodott biss fi Franza u fir-RPĊ u sabiex jiġi limitat ir-riskju li jintgħażel prezz referenzjarju mhux korrett, hija użat l-istatistika dwar l-esportazzjonijiet tal-GTA minn Franza lejn il-pajjiżi kollha (minbarra ċ-Ċina u l-pajjiżi mhux tad-WTO). Għall-gwajakolu/gwetol, li għandhom kummerċ limitat globalment, inkluż esportazzjonijiet/importazzjonijiet minn/lejn il-Brażil, il-Kummissjoni stabbiliet il-parametru referenzjarju abbażi tal-importazzjonijiet mill-pajjiżi kollha (minbarra ċ-Ċina u pajjiżi mhux tad-WTO).

(143)

Fil-kummenti tagħha għat-Tieni Nota, Jiaxing Zhonghua kkontesta id-data tal-GTA proposta mill-Kummissjoni għall-gwajakolu/gwetol, bl-argument li l-prodotti koperti mill-estrazzjoni kienu jinkludu prodotti oħra bħat-triklosan, l-ewġenol, l-isoewġenol, l-eter-fenoli, l-eter-alkoħol fenoli oħra u d-derivattivi aloġenati tagħhom. Il-kumpanija sostniet li din il-metodoloġija ma kinitx preċiża għall-valutazzjoni tal-gwajakolu jew tal-gwetol. Il-Kummissjoni analizzat l-affermazzjoni u qieset li l-kwistjoni tista’ tiġi indirizzata billi titnaqqas l-għażla tal-materja prima billi jiġu identifikati, permezz tad-deskrizzjoni tal-linja tariffarja, it-tranżazzjonijiet biss bl-isem tal-gwajakolu (u/jew tal-gwetol) irrapportat. Il-Kummissjoni qieset li l-approċċ rivedut jindirizza l-affermazzjoni tal-kumpanija.

(144)

Fil-kummenti tiegħu għat-Tieni Nota, Jiaxing Zhonghua afferma wkoll li jenħtieġ li l-Kummissjoni, fil-kalkolu tal-valur normali tagħha, ma tużax prezz referenzjarju għall-gwajakolu/gwetol, iżda tibda l-kalkolu tal-valur normali f’livell tal-FOP aktar upstream bl-użu tal-informazzjoni pprovduta mill-fornitur relatat. B’appoġġ għall-affermazzjoni tiegħu, Jiaxing Zhonghua ppreżenta tabella konsolidata ġdida tas-COP (79). Il-Kummissjoni ċaħdet l-affermazzjoni għal tliet raġunijiet: (i) Jiaxing Zhonghua ppreżenta t-tabella konsolidata tas-COP b’appoġġ għall-affermazzjoni tiegħu fi stadju eċċessivament tard tal-proċediment, li jagħmilha impossibbli għall-Kummissjoni li tivverifika b’mod raġonevoli l-akkuratezza tagħha; (ii) il-Kummissjoni sabet li t-tabella konsolidata tal-COP ma kinitx akkurata (jiġifieri l-kostijiet ġenerali mġarrba mill-fornitur relatat għall-manifattura tal-gwajakolu/gwetol mill-katekol kienu neqsin); (iii) il-Kummissjoni sabet ukoll li s-suġġeriment li l-katekol ma jiġix ivvalutat fuq il-bażi ta’ prezz internazzjonali iżda billi jintuża l-istess prezz tal-fenol, li huwa l-materja prima użata għall-produzzjoni tal-gwajakolu/gwetol, bħala wieħed mhux sostanzjat u mingħajr mertu, u li l-kumpanija naqset milli tipprovdi evidenza li tiġġustifika n-nuqqas ta’ kwalunkwe aġġustament ’il fuq fil-prezz biex jitqies l-ipproċessar tal-fenol f’katekol.

(145)

Jiaxing Zhonghua u Jiangxi Brother ippreżentaw kummenti dwar it-Tieni Nota fir-rigward tal-valur mingħajr distorsjoni tal-aċidu gliossiliku. Jiaxing Zhonghua sostna li l-kodiċi HTS 2918 30 00 qed ikopri basket ta’ diversi prodotti u għalhekk ma jirriflettix b’mod akkurat il-prezz internazzjonali tal-aċidu gliossiliku. Għal din ir-raġuni, huwa sostna li l-Kummissjoni jenħtieġ li tikseb il-parametru referenzjarju tal-aċidu gliossiliku minn sorsi oħra bħal data pprovduta minn Procurement Resource (80). Jiangxi Brother sostna li jenħtieġ li l-metodoloġija tal-Kummissjoni tittejjeb aktar. B’mod partikolari, huwa spjega li l-aċidu gliossiliku jintuża kemm fl-industriji tal-vanillin kif ukoll f’dawk farmaċewtiċi, b’varjazzjonijiet fil-purità u fil-konċentrazzjoni mfassla għar-rekwiżiti speċifiċi ta’ kull applikazzjoni. Il-livell ta’ purità u l-konċentrazzjoni għandhom impatt sinifikanti fuq il-prezz finali u għalhekk huma fatturi kruċjali li jenħtieġ li jitqiesu. Jiangxi Brother spjega li Franza (fejn jinsab l-uniku produttur tal-UE) tesporta kwantità kbira ta’ aċidu gliossiliku lejn diversi pajjiżi u fost dawk il-pajjiżi, għadd limitat biss ta’ pajjiżi jipproduċu l-vanillin. Jiangxi Brother issuġġerixxa li jenħtieġ li l-Kummissjoni tirfina l-metodoloġija tagħha billi tuża biss l-esportazzjonijiet Franċiżi lejn l-Istati Uniti, peress li f’termini ta’ volumi dawn l-esportazzjonijiet huma rappreżentattivi u hemm produttur tal-vanillin fl-Istati Uniti, filwaqt li dan ma huwiex il-każ f’pajjiżi oħra. Il-prezzijiet tal-aċidu gliossiliku mibjugħ fis-suq tal-Istati Uniti għalhekk ikunu aktar rappreżentattivi għall-prezzijiet tal-aċidu gliossiliku użat fil-produzzjoni tal-vanillin mill-prezzijiet tal-aċidu gliossiliku lil pajjiżi li ma jipproduċux vanillin. Barra minn hekk, Jiangxi Brother sostna wkoll li jenħtieġ li l-Kummissjoni taġġusta l-prezzijiet tal-Eurostat biex jirriflettu d-differenzi fil-prezzijiet li jirriżultaw mid-differenzi fil-purità.

(146)

Il-Kummissjoni analizzat l-affermazzjoni ta’ Jiangxi Brother għad-determinazzjoni tal-prezz tal-aċidu gliossiliku abbażi tal-esportazzjoni ta’ Franza lejn l-Istati Uniti tal-Amerka. L-ewwel nett, l-affermazzjoni ma kienet issostanzjata bl-ebda evidenza li l-prezz tal-aċidu gliossiliku użat għall-produzzjoni tal-vanillin huwa differenti minn dak użat għal skopijiet oħra bħall-farmaċewtiċi. It-tieni, l-istatistika disponibbli lanqas ma ppermettiet li ssir distinzjoni bejn l-aċidu gliossiliku użat għall-vanillin minn kwalunkwe użu ieħor. It-tielet, filwaqt li l-produzzjoni tal-vanillin hija tabilħaqq preżenti fl-Istati Uniti, l-ebda element ippreżentat mill-produttur esportatur jew disponibbli fil-fajl ma ssuġġerixxa li, minħabba d-daqs enormi tas-suq tal-Istati Uniti għall-użu tal-aċidu gliossiliku, l-istatistika tal-esportazzjoni lejn l-Istati Uniti tkun tirrifletti aħjar l-aċidu gliossiliku użat għall-vanillin milli l-esportazzjonijiet totali minn Franza lejn il-pajjiżi l-oħra kollha. Għalhekk, il-Kummissjoni ċaħdet l-affermazzjoni ta’ Jiangxi Brother.

(147)

Il-Kummissjoni ċaħdet ukoll it-talba ta’ Jiaxing Zhonghua biex jintuża sors alternattiv, bħall-Procurement Resource, minflok il-GTA biex jiġi ddeterminat il-parametru referenzjarju. Id-data pprovduta minn Jiaxing Zhonghua mill-Procurement Resource ma ġietx approvata għall-użu f’termini ta’ drittijiet tal-awtur u għalhekk ma setgħetx tiġi divulgata fil-fajl miftuħ.

(148)

Wara d-divulgazzjoni tas-sejbiet definittivi, Jiangxi Brother tenna l-affermazzjoni tiegħu li jenħtieġ li l-Kummissjoni tistabbilixxi l-valur referenzjarju tal-prezz għall-aċidu gliossiliku abbażi biss tal-esportazzjonijiet minn Franza lejn l-Istati Uniti tal-Amerka. Jiangxi Brother argumenta li huwa aktar probabbli li l-esportazzjonijiet Franċiżi lejn pajjiżi oħra jkunu destinati għall-produzzjoni fl-industrija farmaċewtika. Barra minn hekk, Jiangxi Brother sostna li jenħtieġ li l-Kummissjoni tuża l-prezzijiet tal-esportazzjoni tal-Eurostat fil-livell tal-kodiċi b’10 ċifri, li għalih għandha aċċess, peress li dan ikun aktar preċiż u b’hekk jagħti prezz tal-aċidu gliossiliku aktar akkurat.

(149)

Il-Kummissjoni, kif spjegat hawn fuq fil-premessa (146), affermat mill-ġdid il-pożizzjoni tagħha u ċaħdet l-affermazzjoni minħabba n-nuqqas ta’ evidenza pprovduta minn Jiangxi Brother. Jiangxi Brother naqas milli juri li l-esportazzjonijiet minn Franza lejn pajjiżi oħra huma primarjament maħsuba għall-produzzjoni fl-industrija farmaċewtika, għall-kuntrarju tal-esportazzjoni lejn l-Istati Uniti li huma maħsuba għall-industriji tas-sustanzi kimiċi. Barra minn hekk, fir-rigward tat-tieni affermazzjoni, il-Kummissjoni nnotat li l-kodiċi TARIC b’10 ċifri huwa disponibbli biss għall-importazzjonijiet lejn l-UE, filwaqt li d-data statistika kollha għall-esportazzjonijiet tal-UE lejn pajjiżi terzi tinġabar fil-livell NM bi 8 ċifri (81).

(150)

Jiangxi Brother ippreżenta wkoll kummenti dwar it-Tieni Nota fir-rigward tas-soda kawstika. Huwa enfasizza li l-purità hija element importanti f’termini ta’ dan il-prodott, u sab il-parametru referenzjarju identifikat mill-Kummissjoni ferm ogħla mill-prezz tax-xiri tiegħu ta’ din il-materja prima. Jiangxi Brother issuġġerixxa lill-Kummissjoni biex tivverifika l-purità rrapportata fid-data tal-importazzjoni tal-GTA u biex tivvaluta jekk il-prezz relatat jistax ikun marbut mal-livell ta’ purità.

(151)

Il-Kummissjoni nnotat, l-ewwel nett, li l-prezz tax-xiri li Jiangxi Brother ħallas fis-suq domestiku tiegħu huwa irrilevanti, fid-dawl tal-eżistenza stabbilita ta’ distorsjonijiet sinifikanti f’konformità mal-Artikolu 2(6a)(b) tar-Regolament bażiku. Il-Kummissjoni nnotat ukoll li l-affermazzjoni ma kinitx sostanzjata, u Jiangxi Brother lanqas ma pprovda metodu għal aġġustament possibbli. Għalhekk, l-affermazzjoni ġiet miċħuda.

(152)

Il-Kummissjoni esprimiet il-kost tat-trasport imġarrab mill-produttur esportatur li kkoopera għall-provvista tal-materja prima bħala perċentwal tal-kost attwali ta’ tali materja prima u mbagħad applikat l-istess perċentwal għall-kost mingħajr distorsjoni tal-istess materja prima sabiex jinkiseb il-kost mingħajr distorsjoni tat-trasport. Il-Kummissjoni qieset li, fil-kuntest ta’ din l-investigazzjoni, il-proporzjon bejn il-materja prima tal-produtturi esportaturi u l-kostijiet tat-trasport irrapportati jista’ jintuża b’mod raġonevoli bħala indikazzjoni biex jiġu stmati l-kostijiet tat-trasport mingħajr distorsjoni tal-materja prima meta tiġi kkonsenjata lill-fabbrika tal-kumpanija.

(153)

Fit-Tieni Nota, il-Kummissjoni infurmat ukoll lill-partijiet interessati li minħabba l-għadd kbir ta’ fatturi ta’ produzzjoni użati mill-produtturi esportaturi inklużi fil-kampjun li pprovdew informazzjoni kompluta, anke għall-materjali awżiljarji (82), u l-piż negliġibbli ta’ xi wħud minn dawn il-materjali fil-kost totali tal-produzzjoni, il-materjali awżiljarji kollha identifikati ġew raggruppati taħt “materjal konsumabbli”. Barra minn hekk, il-Kummissjoni infurmat li kienet se tikkalkula l-perċentwal tal-materjal konsumabbli fuq il-kost totali tal-materja prima u tapplika dan il-perċentwal għall-kost ikkalkulat mill-ġdid tal-materja prima meta tuża l-parametri referenzjarji mingħajr distorsjoni stabbiliti fil-pajjiż rappreżentattiv xieraq.

(154)

L-IBGE jippubblika informazzjoni dettaljata dwar il-pagi f’setturi ekonomiċi differenti fil-Brażil. Il-Kummissjoni użat l-aħħar statistika disponibbli li tkopri l-2022 għall-kost lavorattiv medju fis-Settur tal-manifattura ta’ sustanzi kimiċi organiċi skont il-Klassifikazzjoni Brażiljana CNAE 2.0 (83). Il-valuri ġew indiċjati aktar għall-inflazzjoni bl-użu tal-indiċi tal-kost lavorattiv ippubblikat mill-“Istitut Brażiljan tal-Ġeografija u l-Istatistika” (84) biex jirriflettu l-kostijiet fil-perjodu ta’ investigazzjoni.

(155)

Jiangxi Brother sostna li r-rata fis-siegħa kkalkulata mill-Kummissjoni hija għolja wisq meta mqabbla mar-rata fis-siegħa f’każ ieħor ta’ dumping (85). Barra minn hekk, Jiangxi Brother sostna li jenħtieġ li l-Kummissjoni tivverifika aktar jekk ir-rata fis-siegħa tinkludix xi taxxi u imposti addizzjonali.

(156)

Il-Kummissjoni fakkret, l-ewwel nett, li kull każ għandu jiġi vvalutat fuq il-merti tiegħu stess. It-tieni, Jiangxi Brother ma kkontestax il-metodoloġija applikata mill-Kummissjoni u lanqas ma identifika żbalji metodoloġiċi. It-tielet, filwaqt li f’każijiet preċedenti ta’ dumping, bħall-każ ikkwotat minn Jiangxi Brother, il-Kummissjoni użat l-istatistika tal-ILO biex tikkalkula r-rata fis-siegħa tax-xogħol, hija tbiegħdet minnha minħabba li l-istatistika tal-ILO ma tiddistingwix is-salarju abbażi ta’ kategoriji speċifiċi ta’ negozju u minħabba li ma hemm l-ebda distinzjoni bbażata fuq id-daqs tal-kumpaniji. Għalhekk, il-Kummissjoni qieset l-istatistika tal-IBGE bħala aktar preċiża. Għar-raġunijiet spjegati fil-premessa ta’ hawn fuq, l-affermazzjoni ta’ Jiangxi Brother rigward il-kost lavorattiv hija miċħuda. Fir-rigward tat-tieni parti tal-affermazzjoni, il-Kummissjoni tikkonferma li r-rata fis-siegħa kkalkulata tinkludi biss imposti soċjali, indennizzi u benefiċċji tax-xogħol u mhux taxxi u imposti addizzjonali.

(157)

Il-prezz tal-elettriku għall-utenti industrijali fil-Brażil huwa ppubblikat mill-Gvern tal-Brażil fil-Monthly Energy Bulletin (86). Il-Kummissjoni użat id-data dwar il-prezzijiet tal-elettriku industrijali fil-medda tal-konsum korrispondenti f’CNY/MWh kif ippubblikata għall-perjodu ta’ investigazzjoni.

(158)

Kif spjegat fl-Ewwel Nota, il-Kummissjoni sabet li kwantitajiet sinifikanti ta’ faħam importat fil-Brażil huma mir-Russja, li bħalissa tinsab taħt sanzjonijiet tal-UE (87). Il-Kummissjoni sabet li l-importazzjonijiet tal-faħam mir-Russja żdiedu bi 52 % fl-2022, is-sena li fiha ġew imposti s-sanzjonijiet, u l-importazzjonijiet tal-faħam mir-Russja baqgħu f’livelli għoljin komparabbli minn hemm ’il quddiem, li jirrappreżentaw 39 % tal-importazzjonijiet fil-perjodu ta’ investigazzjoni. Il-Kummissjoni osservat ukoll tnaqqis qawwi fil-prezz tal-importazzjoni tal-faħam mir-Russja matul il-perjodu ta’ investigazzjoni b’29 % meta mqabbel mas-sena preċedenti u sabet li t-tnaqqis fil-prezz tal-importazzjonijiet Russi wassal għal tnaqqis fil-prezzijiet tal-importazzjonijiet tal-faħam minn pajjiżi oħra għal livelli baxxi simili. Fid-dawl ta’ dan ta’ hawn fuq, il-Kummissjoni qieset il-prezzijiet tal-faħam importat fil-Brażil bħala distorti.

(159)

Fir-rigward tal-faħam, ir-Russja għandha t-tieni l-akbar riżervi tal-faħam fid-dinja u ilha tespandi l-produzzjoni tagħha għal dawn l-aħħar għaxar snin minħabba l-esportazzjonijiet dejjem jikbru (88). Flimkien mas-sanzjonijiet, din iċ-ċirkostanza naqqset il-prezz tal-esportazzjonijiet Russi u l-importazzjonijiet Torok tal-faħam Russu żdiedu b’mod sinifikanti f’dawn l-aħħar snin (89).

(160)

Jiangxi Brother ikkummenta dwar l-Ewwel Nota billi sostna li l-Kummissjoni jenħtieġ li tuża bħala parametru referenzjarju l-prezz tal-esportazzjoni Awstraljan tal-faħam miksub mill-Prezz ta’ Prodotti Bażiċi tal-Bank Dinji (90), filwaqt li għamel referenza għal investigazzjoni preċedenti (91) fejn il-Kummissjoni kienet applikat l-istess approċċ. Il-Kummissjoni vvalutat l-affermazzjoni ta’ Jiangxi Brother. Hija sabet li l-parametru referenzjarju propost kien raġonevoli u konsistenti mal-metodoloġija applikata f’każijiet oħra. Għalhekk, il-Kummissjoni aċċettat l-affermazzjoni ta’ Jiangxi Brother u ddeċidiet li tuża l-prezz tal-faħam Awstraljan ippubblikat mill-Bank Dinji bħala prezz referenzjarju.

(161)

Fit-tieni Nota, il-Kummissjoni indikat li kellha l-ħsieb tikkalkula l-prezz tal-istim fil-Brażil bl-użu tal-metodoloġija ssuġġerita mid-Dipartiment għall-Enerġija tal-Istati Uniti (92). Din il-metodoloġija tipprovdi kost għall-istim ibbażat fuq l-input tas-sħana meħtieġ biex jiġi prodott. Għal dan l-għan, il-Kummissjoni użat l-istim bħala l-input tas-sħana u użat il-prezz tal-faħam ikkalkulat kif spjegat fil-premessa preċedenti.

(162)

Skont l-Artikolu 2(6a)(a) tar-Regolament bażiku, “il-valur normali maħdum għandu jinkludi ammont raġonevoli u mingħajr distorsjoni għal kostijiet amministrattivi, tal-bejgħ u ġenerali u għal profitti”.

(163)

Il-kostijiet ġenerali tal-manifattura mġarrba minn kull produttur esportatur inkluż fil-kampjun ġew espressi bħala sehem tal-kostijiet tal-manifattura effettivament imġarrba mill-produttur esportatur. Dan il-perċentwal intuża biex jiġi ddeterminat il-valur mingħajr distorsjoni tal-kostijiet ġenerali tal-manifattura.

(164)

Kif propost fit-Tieni Nota, biex jiġi stabbilit ammont mingħajr distorsjoni u raġonevoli għall-kostijiet SG&A u għall-profitt, il-Kummissjoni bbażat fuq id-data finanzjarja għas-sena 2023 mill-kumpaniji Brażiljani Dexxos Participações S.A. u Prox do Brasil, kif estratta minn Orbis u mis-siti web tal-kumpanija, meta disponibbli. Fir-rigward tal-kalkolu SG&A ta’ Dexxos Participações S.A., fit-Tieni Nota l-Kummissjoni kienet identifikat il-kostijiet tat-trasport marbuta mal-bejgħ li kienu ġew irrapportati skont il-kost totali tal-oġġetti mibjugħa (“COGS”, cost of goods sold) tal-kumpanija, u naqqset sehem rappreżentattiv ta’ dawn il-kostijiet tat-trasport mis-COGS fil-kalkolu tal-SG&A mill-fabbrika.

(165)

Bi tweġiba għat-Tieni Nota, Jiangxi Brother talab kjarifika fir-rigward tal-kalkolu tal-SG&A, peress li ssuspetta li l-kalkolu tal-Kummissjoni, kif deskritt hawn fuq, irriżulta f’ammont ta’ COGS iddikjarat b’mod insuffiċjenti u, konsegwentement, rata SG&A iddikjarata b’mod eċċessiv.

(166)

Il-Kummissjoni vvalutat l-affermazzjoni. Hija rrikonoxxiet li fid-dikjarazzjonijiet finanzjarji taż-żewġ kumpaniji Brażiljani ma kienx possibbli li jiġi identifikat jekk l-ammont tal-kostijiet tat-trasport u l-kostijiet relatati ġewx irrapportati taħt il-kostijiet tal-COGS jew tal-SG&A. Konsegwentement, mingħajr din il-biċċa informazzjoni, il-Kummissjoni sabet li ma kinitx f’pożizzjoni li tirrevedi l-kostijiet SG&A jew l-ammont tal-COGS sabiex tikkalkula l-valuri rispettivi fil-livell mill-fabbrika. Għalhekk, il-Kummissjoni rrevediet il-kalkoli tagħha tar-rata SG&A, limitata għal Dexxos Participações S.A., billi aċċettat l-affermazzjoni ta’ Jiangxi Brother li l-kostijiet tal-merkanzija, tal-kummissjoni u tar-royalties jenħtieġ li ma jitnaqqsux mill-COGS.

(167)

Il-kostijiet u l-profitt tal-SG&A mingħajr distorsjoni ġew iddeterminati bħala perċentwal tal-kostijiet tal-oġġetti mibjugħa bir-rati ta’ 6,76 % u 14,22 % rispettivament. Il-Kummissjoni qieset li dawk il-livelli kienu raġonevoli, skont it-tifsira tal-Artikolu 2(6a)(a), l-aħħar subparagrafu, tar-Regolament bażiku, għal-livell ta’ kummerċ mill-fabbrika.

(168)

Abbażi ta’ dan ta’ hawn fuq, il-Kummissjoni ħadmet il-valur normali għal kull tip ta’ prodott fuq bażi ta’ kif joħroġ mill-fabbrika, f’konformità mal-Artikolu 2(6a)(a) tar-Regolament bażiku.

(169)

L-ewwel nett, il-Kummissjoni stabbiliet il-kostijiet tal-manifattura mingħajr distorsjoni. Il-Kummissjoni mmultiplikat il-kwantità tal-konsum reali vverifikata tal-fatturi individwali tal-produzzjoni tal-produtturi esportaturi li kkooperaw bil-kostijiet ta’ unità mingħajr distorsjoni ta’ dawk il-fatturi tal-produzzjoni osservati fil-pajjiż rappreżentattiv, kif deskritt fit-Taqsima 3.4.

(170)

It-tieni, il-porzjon tal-kost mingħajr distorsjoni tal-manifattura li jirrifletti l-valur mingħajr distorsjoni tal-materjal konsumabbli ġie stabbilit billi l-valur mingħajr distorsjoni tal-materja prima ddeterminat kif deskritt fil-premessa (169) ġie mmultiplikat bil-perċentwal ta’ materjal konsumabbli ddeterminat kif deskritt fil-premessa (153).

(171)

It-tielet, il-Kummissjoni stabbiliet il-valur mingħajr distorsjoni tal-kostijiet ġenerali tal-manifattura billi mmultiplikat il-valur mingħajr distorsjoni tal-kost tal-manifattura bil-perċentwal tal-kostijiet ġenerali tal-manifattura ddeterminat kif deskritt fil-premessa (163).

(172)

Billi żiedet il-valur mingħajr distorsjoni tal-kostijiet ġenerali tal-manifattura mal-valur mingħajr distorsjoni tal-kost tal-manifattura, il-Kummissjoni stabbiliet il-kost tal-produzzjoni mingħajr distorsjoni.

(173)

Fl-aħħar nett, il-Kummissjoni stabbiliet l-ammonti mingħajr distorsjoni għall-SG&A u għall-profitt billi mmultiplikat il-valur mingħajr distorsjoni tal-kost tal-produzzjoni bir-rati tal-S&GA u tal-profitt iddeterminati kif spjegat fil-premessi (164) sa (167). L-ammonti mingħajr distorsjoni għall-SG&A u għall-profitt, li tqiesu mill-Kummissjoni bħala raġonevoli għal-livell ta’ kummerċ mill-fabbrika, żdiedu mal-kost tal-produzzjoni mingħajr distorsjoni.

(174)

Abbażi ta’ dan, il-Kummissjoni ħadmet il-valur normali għal kull tip ta’ prodott fuq bażi ta’ kif joħroġ mill-fabbrika f’konformità mal-Artikolu 2(6a)(a) tar-Regolament bażiku.

(175)

Il-produtturi esportaturi inklużi fil-kampjun esportaw lejn l-Unjoni jew direttament lil klijenti indipendenti jew permezz ta’ kumpaniji relatati li jinsabu barra mill-Unjoni.

(176)

Fil-każ ta’ bejgħ dirett, il-prezz tal-esportazzjoni kien il-prezz effetivament imħallas jew li kellu jitħallas għall-prodott ikkonċernat meta nbiegħ għall-esportazzjoni lejn l-Unjoni, skont l-Artikolu 2(8) tar-Regolament bażiku.

(177)

Għal bejgħ indirett, il-prezz tal-esportazzjoni ġie stabbilit abbażi tal-prezz li bih il-prodott importat reġa’ nbiegħ għall-ewwel darba lil klijenti indipendenti fl-Unjoni, skont l-Artikolu 2(9) tar-Regolament bażiku. Ġurisprudenza stabbilita tiċċara li, l-aġġustamenti skont l-Artikolu 2(9) tar-Regolament bażiku jinkludu l-kostijiet imġarrba minn entità li tinsab barra mill-Unjoni Ewropea, dment li tali entità tidher li hija assoċjata mal-importatur jew mal-esportatur u li l-kostijiet inkwistjoni normalment jiġġarrbu minn importatur (93). F’dan il-kuntest, il-ġurisprudenza tqabbel dawn il-kostijiet ma’ dawk relatati mal-attivitajiet ta’ bejgħ imwettqa mis-sussidjarji peress li jnaqqsu l-ammont riċevut mill-produttur esportatur, sa fejn tipikament jiġġarrbu mill-importatur (94). Kif innotat mill-Qorti tal-Ġustizzja, dan l-approċċ huwa konformi mal-objettiv tal-Artikolu 2(9) tar-Regolament bażiku. Skont il-Qorti, dan l-għan ma jintlaħaqx jekk produttur esportatur ikun jista’ sempliċement jistruttura l-bejgħ tiegħu b’mod li jiżgura l-involviment, qabel l-importazzjoni tal-prodott ikkonċernat fl-Unjoni, ta’ intermedjarju assoċjat miegħu li jassumi r-responsabbiltà għall-kostijiet normalment imġarrba minn importatur, b’tali mod li jżid il-prezz tal-esportazzjoni effettivament imħallas mill-importatur (95).

(178)

Fid-dawl ta’ dan ta’ hawn fuq, il-Kummissjoni nnotat li n-negozjanti relatati mal-produtturi esportaturi li jinsabu f’pajjiżi terzi kienu qed iwettqu funzjonijiet simili għal dawk tal-importaturi. Il-kostijiet assoċjati ma’ dawn il-funzjonijiet normalment jiġġarrbu minn importatur relatat u għalhekk huwa ġġustifikat aġġustament skont l-Artikolu 2(9) tar-Regolament bażiku għal dawn il-kostijiet (kostijiet SG&A) u profitt nominali.

(179)

Il-kostijiet SG&A kienu bbażati fuq id-data pprovduta mill-parti relatata. Fir-rigward tal-aġġustament għall-profitt, meta jitqies li importatur indipendenti wieħed biss ikkoopera matul l-investigazzjoni u għal raġuni ta’ kunfidenzjalità ma setax jiġi ddivulgat il-marġni ta’ profitt tiegħu, il-Kummissjoni qagħdet fuq il-profitt realizzat minn importaturi mhux relatati involuti fil-kummerċ ta’ prodotti kimiċi f’investigazzjoni preċedenti. Għalhekk, il-livell ta’ profitt ta’ 6,89 % misjub fl-alkoħols tal-polivinil (96) tqies raġonevoli, peress li ġie realizzat minn importaturi mhux relatati fis-settur industrijali kimiku.

(180)

L-Artikolu 2(10) tar-Regolament bażiku jirrikjedi li l-Kummissjoni tagħmel paragun ġust bejn il-valur normali u l-prezz tal-esportazzjoni fl-istess livell ta’ kummerċ u tagħmel konċessjoni għad-differenzi fil-fatturi li jaffettwaw il-prezzijiet u l-komparabbiltà tal-prezzijiet. Fil-każ preżenti, il-Kummissjoni għażlet li tqabbel il-valur normali u l-prezz tal-esportazzjoni tal-produtturi esportaturi inklużi fil-kampjun fil-livell tal-kummerċ mill-fabbrika. Kif spjegat aktar hawn taħt, fejn xieraq, il-valur normali u l-prezz tal-esportazzjoni ġew aġġustati sabiex: (i) jiġu nnettjati lura għal-livell ta’ kummerċ mill-fabbrika; u (ii) jagħmlu konċessjonijiet għal differenzi fil-fatturi li ġew sostnuti, u murija, li jaffettwaw il-prezzijiet u l-komparabbiltà tal-prezzijiet.

(181)

Kif spjegat fil-premessa (174), il-valur normali ġie stabbilit fil-livell ta’ kummerċ mill-fabbrika bl-użu tal-kostijiet tal-produzzjoni flimkien mal-ammonti tal-kostijiet SG&A u tal-profitt, li tqiesu bħala raġonevoli għal dak il-livell ta’ kummerċ. Għalhekk, ma kien meħtieġ l-ebda aġġustament biex il-valur normali jinnettja lura għal-livell mill-fabbrika.

(182)

Għalhekk, il-Kummissjoni ma sabet l-ebda raġuni biex tagħmel xi konċessjonijiet għall-valur normali, u lanqas ma ntalbu tali konċessjonijiet minn xi wieħed mill-produtturi esportaturi inklużi fil-kampjun.

(183)

Sabiex il-prezz tal-esportazzjoni jiġi nnettjat lura għal-livell ta’ kummerċ mill-fabbrika, saru aġġustamenti minħabba l-ispejjeż tal-immaniġġjar, tat-tagħbija u anċillari, il-merkanzija fil-pajjiż ikkonċernat, il-merkanzija bil-baħar, l-assigurazzjoni fuq il-baħar, id-dazju doganali, imposti oħra fuq l-importazzjoni u l-merkanzija fl-Unjoni.

(184)

Saru konċessjonijiet għall-fatturi li ġejjin li jaffettwaw il-prezzijiet u l-komparabbiltà tal-prezzijiet: il-kost tal-kreditu u t-tariffi bankarji.

(185)

Għall-produtturi esportaturi inklużi fil-kampjun, il-Kummissjoni qabblet il-valur normali medju ponderat ta’ kull tip ta’ prodott simili mal-prezz tal-esportazzjoni medju ponderat tat-tip korrispondenti tal-prodott ikkonċernat, f’konformità mal-Artikolu 2(11) u (12) tar-Regolament bażiku.

(186)

Il-Kummissjoni, fid-dawl tal-evidenza miġbura matul iż-żjarat ta’ verifika, qieset liż-żewġ produtturi esportaturi inklużi fil-kampjun bħala kumpaniji relatati f’konformità mal-Artikolu 2(1) tar-Regolament bażiku. Għalhekk, il-Kummissjoni kkalkolat medja ponderata tal-marġnijiet tad-dumping stabbiliti għal kull wieħed minnhom u għamlet liż-żewġ entitajiet soġġetti għall-marġni tad-dumping uniku kkalkolat b’dan il-mod.

(187)

Għall-produtturi esportaturi li kkooperaw li ma humiex inklużi fil-kampjun, il-Kummissjoni kkalkulat il-marġni tad-dumping medju ponderat, f’konformità mal-Artikolu 9(6) tar-Regolament bażiku. Għaldaqstant, dak il-marġni ġie stabbilit abbażi tal-marġnijiet tal-produtturi esportaturi inklużi fil-kampjun. Billi l-kumpaniji li kkooperaw koprew l-importazzjonijiet kważi kollha mill-pajjiż ikkonċernat, il-Kummissjoni qieset li kien xieraq li d-dazju ddeterminat għall-produtturi esportaturi inklużi fil-kampjun japplika għall-produtturi esportaturi kollha mill-pajjiż ikkonċernat.

(188)

Fuq din il-bażi, il-marġnijiet tad-dumping medji ponderati definittivi espressi bħala perċentwal tal-prezz CIF fil-fruntiera tal-Unjoni, bid-dazju mhux imħallas, huma kif ġej:

(189)

Il-prodott simili kien manifatturat minn żewġ produtturi fl-Unjoni matul il-perjodu ta’ investigazzjoni. Wieħed minnhom, Syensqo, l-ilmentatur, kien jirrappreżenta 98 % tal-produzzjoni totali tal-Unjoni, u kien jikkostitwixxi l-“industrija tal-Unjoni” skont it-tifsira tal-Artikolu 4(1) tar-Regolament bażiku.

(190)

Peress li d-data relatata mal-valutazzjoni tad-dannu kienet derivata minn produttur wieħed biss tal-Unjoni, iċ-ċifri għall-analiżi tad-dannu jingħataw f’firxiet għal raġunijiet ta’ kunfidenzjalità. Madankollu, l-indiċijiet huma bbażati fuq data reali u mhux fuq il-firxiet.

(191)

Il-produzzjoni totali tal-Unjoni matul il-perjodu ta’ investigazzjoni kienet fil-firxa ta’ 1 500 u 1 900 tunnellata. Il-Kummissjoni stabbiliet iċ-ċifra attwali abbażi ta’ verifika tat-tweġiba għall-kwestjonarju tal-uniku produttur tal-Unjoni li kkoopera, jiġifieri Syensqo.

(192)

L-utent Frey & Lau, li huwa wkoll importatur, sostna li l-ilmentatur ma kellux pożizzjoni suffiċjenti skont l-Artikolu 4(1) tar-Regolament bażiku, peress li għalaq il-produzzjoni tiegħu tal-vanillin sintetiku u l-produzzjoni li jifdal tal-vanillin naturali kienet tikkostitwixxi volumi limitati ħafna. Barra minn hekk, Frey & Lau rrefera wkoll għar-relazzjoni ta’ Syensqo ma’ produttur esportatur Ċiniż - Solvay Zhenjiang Chemicals Co., Ltd - bħala raġuni għaliex ma ssodisfatx ir-rekwiżit ta’ produttur ġenwin tal-Unjoni skont it-tifsira tar-Regolament bażiku.

(193)

L-ilmentatur fakkar li d-deċiżjoni tiegħu li jagħlaq temporanjament il-manifattura tiegħu ta’ vanillin sintetiku kienet direttament relatata mal-kompetizzjoni fil-prezzijiet minn importazzjonijiet oġġett ta’ dumping mir-RPĊ. Barra minn hekk, is-sospensjoni temporanja ta’ dan il-proċess ta’ manifattura saret wara tmiem il-perjodu ta’ investigazzjoni, u peress li hija azzjoni temporanja b’reazzjoni għall-kompetizzjoni fil-prezzijiet, jenħtieġ li l-produzzjoni tagħha matul il-perjodu ta’ investigazzjoni tiġi inkluża fil-kalkolu tal-pożizzjoni skont l-Artikolu 5(4) tar-Regolament bażiku.

(194)

L-ilmentatur fakkar li r-Regolament bażiku jistabbilixxi livell limitu biex ilment jitqies li jkun sar mill-industrija tal-Unjoni, jew f’isimha. Dan ikun il-każ jekk l-ilment ikun appoġġat minn dawk il-produtturi tal-Unjoni li l-produzzjoni kollettiva tagħhom tirrappreżenta aktar minn 50 % tal-produzzjoni totali tal-prodott simili li jsir minn dak il-proprozjon tal-industrija tal-Unjoni li jesprimi appoġġ għal, jew oppożizzjoni kontra, l-ilment. Minħabba li l-produzzjoni tal-ilmentatur kienet tirrappreżenta 98 % tal-produzzjoni tal-Unjoni matul il-perjodu ta’ investigazzjoni, l-ilmentatur ikkwalifika biex jikkostitwixxi l-industrija tal-Unjoni skont ir-Regolament bażiku.

(195)

Fir-rigward tas-sjieda komuni tiegħu ma’ produttur esportatur Ċiniż, l-ilmentatur sostna li din ir-relazzjoni ma influwenzatx il-mudell kummerċjali fit-tul tiegħu fl-Unjoni, li kien ġie muri mid-deċiżjoni tiegħu li jippreżenta l-proċediment anti-dumping kontra r-RPĊ, li jkopri wkoll l-entità relatata tiegħu stess.

(196)

Il-Kummissjoni tqis li l-ilmentatur kien jikkostitwixxi l-“industrija tal-Unjoni” skont it-tifsira tar-Regolament bażiku peress li l-produzzjoni tiegħu tal-vanillin kienet tikkostitwixxi 98 % tal-produzzjoni totali tal-Unjoni tal-prodott simili fl-Unjoni. Filwaqt li l-Industrija tal-Unjoni tabilħaqq għalqet xi operazzjonijiet ta’ produzzjoni, dan seħħ wara t-tmiem tal-perjodu ta’ investigazzjoni u kienet azzjoni temporanja b’reazzjoni għas-sitwazzjoni prevalenti tas-suq u ma għandux ikollha impatt fuq il-pożizzjoni tagħha f’dan il-proċediment.

(197)

Il-Kummissjoni tqis li s-sempliċi fatt li parti mill-industrija tal-Unjoni għandha relazzjoni ekonomika ma’ produttur esportatur Ċiniż per se ma jiskwalifikax produttur tal-Unjoni biex jiġi ttrattat bħala tali skont ir-Regolament bażiku. Il-produttur esportatur Ċiniż relatat mal-industrija tal-Unjoni forna biss kwantitajiet limitati tal-prodott ikkonċernat lis-suq tal-Unjoni, li jista’ jitqies bħala att temporanju sabiex iżomm il-klijenti tiegħu fl-Unjoni mingħajr effetti ekonomiċi ulterjuri.

(198)

Għall-kuntrarju tal-affermazzjoni ta’ Frey & Lau li l-istampa tad-dannu ppreżentata fl-ilment hija żbaljata, minħabba li l-Kummissjoni tqis it-tipi kollha ta’ vanillin bħala prodott simili (ara l-premessa (49)), l-industrija tal-Unjoni hija definita b’mod korrett bħala li tinkludi l-ilmentatur u konsegwentement, l-analiżi tad-dannu li għandha titwettaq f’din l-investigazzjoni tinvolvi wkoll valutazzjoni tas-sitwazzjoni tal-ilmentatur.

(199)

Il-Kummissjoni stabbiliet il-konsum tal-Unjoni abbażi ta’: (i) il-bejgħ ivverifikat tal-industrija tal-Unjoni; u (ii) l-importazzjonijiet kollha minn pajjiżi terzi lejn l-Unjoni.

(200)

Il-konsum tal-Unjoni żviluppa kif ġej:

Tabella 3

Konsum tal-Unjoni (tunnellati)

(201)

Filwaqt li l-konsum tal-UE kien stabbli matul l-ewwel sentejn tal-perjodu kkunsidrat, dan kien volatili matul l-2022 u l-perjodu ta’ investigazzjoni.Il-katina tal-provvista ta’ ħafna oġġetti ġiet imfixkla minħabba nuqqas ta’ forza tax-xogħol f’ħafna pajjiżi esportaturi (bħal fil-pajjiż ikkonċernat) u aggravata minn nuqqas ta’ possibbiltajiet ta’ tbaħħir u avvenimenti mhux mistennija bħall-imblukkar fil-Kanal ta’ Suez (li wassal għal żieda fil-prezzijiet tat-tbaħħir) u aktar tard mill-gwerra ta’ aggressjoni Russa kontra l-Ukrajna (li rriżultat f’żidiet fil-prezzijiet tal-enerġija b’mod partikolari fl-Unjoni). (97)

(202)

Id-domanda tal-Unjoni fil-livell tal-utenti żdiedet fl-2022, iżda mbagħad treġġgħet lura matul il-perjodu ta’ investigazzjoni, li rriżulta fi tnaqqis ta’ 23 % bejn l-2022 u l-perjodu ta’ investigazzjoni.

(203)

Kif spjegat fil-premessa (43), il-prodott ikkonċernat jaqa’ taħt żewġ kodiċijiet NM separati:

(204)

Is-sehem mis-suq tal-esportazzjonijiet Ċiniżi lejn l-Unjoni ġie stabbilit billi tqabblu l-volumi tal-esportazzjoni mal-konsum tas-suq tal-Unjoni (ara t-Tabella 3 hawn fuq).

(205)

L-importazzjonijiet lejn l-Unjoni mill-pajjiż ikkonċernat żviluppaw kif ġej:

Tabella 4

Volum tal-importazzjoni u s-sehem mis-suq

(206)

It-Tabella 4 turi li matul il-perjodu kkunsidrat l-importazzjonijiet mir-RPĊ żdiedu f’termini assoluti b’34 %. F’termini ta’ sehem mis-suq, l-importazzjonijiet mir-RPĊ żdiedu minn 42 % għal 65 % matul il-perjodu kkunsidrat, jew b’madwar seba’ punti perċentwali fis-sena.

(207)

Il-Kummissjoni stabbiliet il-prezzijiet tal-importazzjonijiet abbażi tad-data dwar l-importazzjoni mill-Eurostat. It-twaqqigħ tal-prezz tal-importazzjonijiet ġie stabbilit abbażi tat-tweġibiet ivverifikati għall-kwestjonarju tal-produtturi esportaturi inklużi fil-kampjun fir-RPĊ.

(208)

Il-prezz medju tal-importazzjonijiet lejn l-Unjoni mill-pajjiż ikkonċernat żviluppa kif ġej:

Tabella 5

Prezzijiet tal-importazzjoni (EUR/tunnellata)

(209)

Filwaqt li l-prezzijiet kienu stabbli matul l-ewwel sentejn tal-perjodu kkunsidrat, din l-istabbiltà fil-prezzijiet ġiet sostitwita b’perjodu ta’ volatilità għolja matul l-2022 u l-2023, fejn kien hemm żieda f’daqqa fil-prezzijiet fl-2022, li matulha l-prezzijiet żdiedu b’40 % meta mqabbla mas-sena ta’ qabel.

(210)

Din ix-xejra treġġgħet lura matul il-perjodu ta’ investigazzjoni, meta l-prezzijiet naqsu kważi bin-nofs meta mqabbla mal-2022, bil-prezzijiet matul il-perjodu ta’ investigazzjoni kienu 27 % inqas milli kienu fl-2020.

(211)

Il-Kummissjoni ddeterminat it-twaqqigħ tal-prezz matul il-perjodu ta’ investigazzjoni billi qabblet:

(212)

It-tqabbil tal-prezzijiet sar fuq bażi ta’ tip b’tip għat-tranżazzjonijiet fl-istess livell ta’ kummerċ, bl-aġġustament dovut meta neċessarju, u wara tnaqqis tar-ribassi u tal-iskontijiet.

(213)

Ir-riżultat tat-tqabbil ġie espress bħala perċentwal tal-fatturat teoretiku tal-produttur magħruf tal-Unjoni matul il-perjodu ta’ investigazzjoni. Dan wera marġni ta’ twaqqigħ tal-prezz medju ponderat ta’ bejn 45 % u 55 % mill-importazzjonijiet mill-pajjiż ikkonċernat fis-suq tal-Unjoni. Instab twaqqigħ tal-prezz għall-volumi importati kollha tal-kumpaniji inklużi fil-kampjun.

(214)

F’konformità mal-Artikolu 3(5) tar-Regolament bażiku, l-eżami tal-impatt tal-importazzjonijiet oġġett ta’ dumping fuq l-industrija tal-Unjoni kien jinkludi valutazzjoni tal-indikaturi ekonomiċi kollha li għandhom effett fuq l-istat tal-industrija tal-Unjoni matul il-perjodu kkunsidrat.

(215)

Sabiex tiddetermina d-dannu, il-Kummissjoni għamlet distinzjoni bejn l-indikaturi tad-dannu makroekonomiċi u dawk mikroekonomiċi. Il-Kummissjoni evalwat l-indikaturi makroekonomiċi u mikroekonomiċi abbażi tad-data li tinsab fl-ilment u t-tweġiba għall-kwestjonarju tal-uniku produttur tal-Unjoni li kkoopera (l-ilmentatur). Peress li l-ilmentatur jirrappreżenta 98 % tal-produzzjoni totali tal-Unjoni u l-produttur l-ieħor tal-Unjoni huwa żgħir, iż-żewġ settijiet ta’ data nstabu li kienu rappreżentattivi tas-sitwazzjoni ekonomika tal-industrija tal-Unjoni.

(216)

Kif imsemmi fil-premessa (190), filwaqt li ċ-ċifri attwali huma f’firxiet, l-indiċijiet huma bbażati fuq iċ-ċifri reali.

(217)

L-indikaturi makroekonomiċi huma: il-produzzjoni, il-kapaċità tal-produzzjoni, l-użu tal-kapaċità, il-volum tal-bejgħ, is-sehem mis-suq, it-tkabbir, l-impjiegi, il-produttività, id-daqs tal-marġni tad-dumping u l-irkupru minn dumping tal-passat.

(218)

L-indikaturi mikroekonomiċi huma: il-prezzijiet medji tal-bejgħ, il-kost ta’ unità, il-kostijiet lavorattivi, l-inventarji, il-profittabbiltà, il-fluss tal-flus, l-investimenti, ir-redditu fuq l-investimenti, u l-kapaċità li jiġi ġġenerat il-kapital.

(219)

Il-produzzjoni totali tal-Unjoni, il-kapaċità tal-produzzjoni u l-użu tal-kapaċità żviluppaw kif ġej matul il-perjodu kkunsidrat:

Tabella 6

Produzzjoni, kapaċità tal-produzzjoni u l-użu tal-kapaċità

(220)

Il-produzzjoni totali tinkludi l-volumi ta’ produzzjoni kemm tal-Vanillin Sintetiku kif ukoll tal-Vanillin Naturali, li kull wieħed minnhom għandu linji ta’ produzzjoni separati.

(221)

F’konformità mal-konsum tal-Unjoni (ara t-Tabella 3 hawn fuq), il-volumi tal-produzzjoni tal-industrija tal-Unjoni kienu stabbli matul l-ewwel sentejn tal-perjodu kkunsidrat.

(222)

Fl-2022, minkejja ż-żieda fil-konsum tal-UE, żieda fil-kost tal-produzzjoni (kif spjegat fil-premessa (239) hawn taħt) ġiegħlet lill-industrija tal-Unjoni tnaqqas il-volumi tal-produzzjoni sabiex iżżomm livell ta’ prezzijiet sostenibbli.

(223)

Fl-2023, meta l-konsum tal-UE naqas, u l-prezzijiet tal-importazzjoni mir-RPĊ naqsu bin-nofs (ara t-Tabella 5 hawn fuq), l-industrija tal-Unjoni kienet imġiegħla tnaqqas saħansitra aktar mill-produzzjoni; il-volumi tal-produzzjoni matul il-perjodu ta’ investigazzjoni kienu jirrappreżentaw biss 39 % ta’ dawk fl-2020 u fl-2021.

(224)

Il-kapaċità tal-produzzjoni kienet stabbli matul il-perjodu kkunsidrat. Il-kapaċità kemxejn ogħla fl-2022 u fl-2023 hija dovuta għal perjodi iqsar ta’ manutenzjoni regolari ppjanata.

(225)

Ir-rata tal-użu tal-kapaċità tal-produzzjoni tirrifletti l-iżvilupp tal-produzzjoni. Filwaqt li r-rata ta’ utilizzazzjoni kienet sodisfaċenti matul l-2020 u l-2021, matul it-tnaqqis fil-volumi tal-produzzjoni kif imsemmi hawn fuq, ir-rata ta’ utilizzazzjoni tat-tagħmir tal-produzzjoni naqset għal livell baxx ħafna, livell li ma huwiex finanzjarjament sostenibbli fit-tul.

(226)

Il-volum tal-bejgħ u s-sehem mis-suq tal-industrija tal-Unjoni żviluppaw kif ġej matul il-perjodu kkunsidrat:

Tabella 7

Volum tal-bejgħ u sehem mis-suq

(227)

B’riflessjoni tal-evoluzzjoni tal-Konsum tal-UE (ara t-Tabella 3), il-volumi tal-bejgħ fis-suq tal-Unjoni nżammu stabbli matul l-ewwel sentejn tal-perjodu kkunsidrat.

(228)

Wara t-tfixkil fil-katina tal-provvista msemmi fil-premessa (201) li fost l-oħrajn żied il-kost ta’ ċerta materja prima u l-enerġija għall-industrija tal-Unjoni, kif imsemmi fil-premessa (222), l-industrija tal-Unjoni kellha tagħżel ordnijiet abbażi ta’ dak li kien finanzjarjament sostenibbli. Għalhekk, il-volumi tal-bejgħ naqsu b’6 % bejn l-2021 u l-2022.

(229)

Meta l-interruzzjoni fil-katina tal-provvista ntemmet fl-2023, ix-xejra nqalbet u l-prezzijiet tal-importazzjonijiet mir-RPĊ fis-suq naqsu drastikament (ara t-Tabella 5 hawn fuq). L-industrija tal-Unjoni kellha tnaqqas saħansitra aktar mill-volumi tal-bejgħ peress li l-livell tal-prezz prevalenti ma kienx ikopri l-kost sħiħ tal-manifattura. Għalhekk, il-volumi tal-bejgħ matul il-perjodu ta’ investigazzjoni naqsu b’aktar minn nofs meta mqabbla mal-volumi mibjugħa matul l-2020 u l-2021.

(230)

L-industrija tal-Unjoni ġarrbet tkabbir negattiv matul il-perjodu kkunsidrat. Filwaqt li s-sitwazzjoni kienet stabbli fl-2020 u fl-2021, dan inbidel fl-2022, sena fejn filwaqt li l-volumi tal-bejgħ komplew jonqsu, iż-żidiet fil-prezzijiet ikkumpensaw għall-volumi mitlufa u l-fatturat totali żdied.

(231)

Fil-perjodu ta’ investigazzjoni, hekk kif il-prezzijiet tal-importazzjonijiet Ċiniżi naqsu bin-nofs, l-industrija tal-Unjoni ma setgħetx tkompli tikkompeti u tilfet volumi sinifikanti ta’ bejgħ u b’hekk, dħul mill-bejgħ.

(232)

L-impjiegi u l-produttività żviluppaw kif ġej matul il-perjodu kkunsidrat:

Tabella 8

Impjiegi u produttività

(233)

Matul il-perjodu kkunsidrat, l-impjiegi fl-Unjoni żdiedu b’6 %. Minkejja volumi ta’ produzzjoni aktar baxxi matul l-2022 u l-perjodu ta’ investigazzjoni, l-ilmentatur ma bediex assenza bil-permess jew keċċa l-persunal imħarreġ u kkwalifikat ħafna, bit-tama li s-sitwazzjoni tas-suq tinnormalizza u li jkunu jistgħu jerġgħu jibdew volumi ogħla ta’ produzzjoni.

(234)

Mill-premessa preċedenti u mill-premessa (222) jirriżulta li l-produttività naqset b’mod sinifikanti matul il-perjodu kkunsidrat, peress li l-persunal intuża għall-manutenzjoni u kompiti mistennija oħra filwaqt li l-volumi tal-produzzjoni naqsu.

(235)

Il-marġnijiet kollha tad-dumping kienu ferm ogħla mil-livell de minimis. L-impatt tad-daqs tal-marġnijiet reali tad-dumping fuq l-industrija tal-Unjoni kien sostanzjali, b’kunsiderazzjoni tal-volum u l-prezzijiet tal-importazzjonijiet mill-pajjiż ikkonċernat.

(236)

Din hija l-ewwel investigazzjoni anti-dumping dwar il-prodott ikkonċernat. Għaldaqstant, ma kienx hemm data disponibbli biex jiġu vvalutati l-effetti ta’ dumping possibbli fil-passat.

(237)

Il-prezzijiet medji ponderati tal-bejgħ ta’ unità tal-produttur tal-Unjoni lil klijenti mhux relatati fl-Unjoni żviluppaw matul il-perjodu kkunsidrat kif ġej:

Tabella 9

Prezzijiet tal-bejgħ fl-Unjoni

(238)

Il-prezzijiet medji tal-bejgħ tal-industrija tal-Unjoni fis-suq tal-Unjoni kienu pjuttost stabbli bejn l-2020 u l-2021 u żdiedu mill-2022 ’il quddiem inkluż il-perjodu ta’ investigazzjoni. Il-prezzijiet tal-bejgħ medji ogħla parzjalment irriflettew iż-żieda fid-domanda fis-suq Ewropew fl-2022 (ara l-premessa (201)), iżda parzjalment ukoll biex ikopru ż-żieda fil-kostijiet tal-produzzjoni.

(239)

Filwaqt li jirrifletti ż-żieda fil-kostijiet tal-enerġija, fost l-oħrajn, u l-kostijiet fissi ogħla għal kull unità minħabba rata aktar baxxa tal-użu tal-kapaċità tal-produzzjoni, il-kost medju tal-produzzjoni żdied b’44 % matul il-perjodu kkunsidrat.

(240)

Ta’ min jinnota li l-porzjon tal-kostijiet fissi tal-manifattura (kostijiet ġenerali tal-manifattura) mill-kostijiet totali tal-manifattura huwa pjuttost żgħir, bejn 9 % u 15 % tal-kost ta’ unità tal-produzzjoni matul il-perjodu ta’ investigazzjoni.

(241)

Barra minn hekk, l-industrija tal-Unjoni ġarrbet ukoll kostijiet assoċjati mal-interruzzjoni tal-proċess tal-produzzjoni, kostijiet inqas effiċjenti tal-produzzjoni/ta’ start-up, minħabba l-volumi aktar baxxi tal-produzzjoni. Dawn ammontaw għal bejn 5 % u 10 % tal-kost ta’ unità tal-produzzjoni matul il-perjodu ta’ investigazzjoni.

(242)

Għalhekk, il-volumi aktar baxxi tal-produzzjoni fl-2022 u fl-2023, inkluż l-interruzzjonijiet fil-produzzjoni u l-kostijiet fissi ogħla (il-kostijiet ġenerali tal-manifattura u l-SG&A), kellhom impatt fuq il-kost ta’ unità tal-produzzjoni b’madwar 15 % – 25 %.

(243)

Il-kostijiet lavorattivi tal-industrija tal-Unjoni żviluppaw kif ġej matul il-perjodu kkunsidrat:

Tabella 10

Kostijiet lavorattivi medji għal kull impjegat

(244)

Matul il-perjodu kkunsidrat, u minbarra l-2022, il-kost lavorattiv medju għal kull impjegat kien pjuttost stabbli, bi tnaqqis żgħir fil-perjodu ta’ investigazzjoni. Iż-żieda fis-salarju li seħħet fl-2022 kienet riżultat tal-bonusijiet dovuti mħallsa għal ċertu persunal pertinenti għall-prestazzjoni finanzjarja tas-snin preċedenti.

(245)

Il-livelli tal-istokks tal-ilmentatur żviluppaw kif ġej matul il-perjodu kkunsidrat:

Tabella 11

Inventarji

(246)

Il-livell tal-istokks żdied matul il-perjodu kkunsidrat b’77 % f’termini assoluti, prinċipalment fl-2022 u fl-2023 meta seħħet il-volatilità tas-suq.

(247)

Fir-rigward tal-produzzjoni, il-livell tal-istokks żdied mill-2022 ’il quddiem. Bħala perċentwal tal-volumi tal-produzzjoni, il-livell tal-istokks żdied minn 13 % – 17 % fl-2022 għal 47 % għal 57 % fl-2023. Fil-fatt, fl-2023, il-livell tal-istokks kien jirrappreżenta madwar nofs il-volumi tal-produzzjoni matul is-sena.

(248)

Ir-raġuni għal din iż-żieda fl-istokks fir-rigward tal-produzzjoni hija doppja.

(249)

Minħabba l-aspettattiva ta’ volumi ta’ produzzjoni mnaqqsa (is-sospensjoni temporanja tal-linja tal-produzzjoni tal-vanillin sintetiku minn Mejju 2024, kif imsemmi fil-premessa (193), li kienet ippjanata u kkomunikata ferm qabel dak ix-xahar), u sabiex jiġi evitat nuqqas ta’ vanillin sintetiku għall-klijenti tiegħu, l-ilmentatur beda jibni stokks sabiex ikun jista’ jaqdi wkoll kontinwament lill-klijenti tiegħu b’vanillin sintetiku.

(250)

Iż-żieda fl-istokk fir-rigward tal-produzzjoni hija dovuta wkoll għal-livelli ħafna aktar baxxi ta’ produzzjoni tal-vanillin sintetiku.

(251)

Il-profittabbiltà, il-fluss tal-flus, l-investimenti u r-redditu fuq l-investimenti tal-ilmentatur żviluppaw kif ġej matul il-perjodu kkunsidrat:

Tabella 12

Profittabbiltà, fluss tal-flus, investimenti u redditu fuq l-investimenti

(252)

Il-profittabbiltà fuq il-bejgħ tal-Unjoni żdiedet matul l-ewwel tliet snin tal-perjodu kkunsidrat. Matul l-2020 u l-2021, kif innotat fit-Tabella 9, il-prezzijiet medji tal-bejgħ kienu stabbli, filwaqt li l-kost ta’ unità tal-produzzjoni kien qed jonqos.

(253)

Din is-sitwazzjoni nbidlet fl-2022, meta żdiedu kemm il-prezzijiet medji tal-bejgħ tal-Unjoni kif ukoll il-kost ta’ unità tal-produzzjoni. Fil-perjodu ta’ investigazzjoni, kien hemm żieda fil-kompetizzjoni fil-prezzijiet. Il-prezzijiet tal-importazzjonijiet Ċiniżi naqsu b’mod sinifikanti filwaqt li l-kost ta’ unità tal-produzzjoni tal-industrija tal-Unjoni żdied fuq bażi annwali, u dan irriżulta f’telf konsiderevoli għall-industrija tal-Unjoni.

(254)

It-telf kien sa ċertu punt ikkawżat minn volumi ta’ produzzjoni aktar baxxi, li rriżulta f’kost ta’ unità ogħla (kif innotat fil-premessi (239) sa (242), il-porzjon tal-kostijiet fissi mill-kost unitarju totali huwa limitat għal bejn 10 %–20 %). Madankollu, il-fattur ewlieni li kkawża t-telf kien kompetizzjoni ħarxa fil-prezzijiet mill-importazzjonijiet oġġett ta’ dumping. Matul il-perjodu ta’ investigazzjoni, l-industrija tal-Unjoni biegħet il-prodott investigat bi prezz iktar baxx mill-kost tal-produzzjoni tagħha sabiex tevita li titlef saħansitra aktar sehem mis-suq.

(255)

L-evoluzzjoni tal-fluss tal-flus tirrifletti l-evoluzzjoni tal-profitt matul il-perjodu kkunsidrat, bi fluss tal-flus negattiv matul il-perjodu ta’ investigazzjoni.

(256)

Ir-redditu fuq l-investimenti (assi fissi) jirrifletti wkoll l-iżvilupp tal-profittabbiltà, b’redditu negattiv ċar fuq l-investimenti fil-perjodu ta’ investigazzjoni.

(257)

Il-kapaċità tal-ilmentatur li jiġġenera l-kapital ma ġietx imfixkla serjament, peress li jifforma parti minn grupp kbir ta’ kumpaniji u l-aċċess għall-finanzi huwa ġestit fil-livell tal-grupp.

(258)

L-industrija tal-Unjoni kellha prestazzjoni tajba ħafna fil-bidu tal-perjodu kkunsidrat, bl-indikaturi tad-dannu ġeneralment f’livelli tajbin u fuq xejra ’l fuq matul l-2020 u l-2021.

(259)

Madankollu, l-2022 rat bidla f’daqqa tas-sitwazzjoni fis-suq għall-industrija tal-Unjoni, b’żieda f’daqqa kemm fil-prezzijiet tal-bejgħ prevalenti kif ukoll fil-kost ta’ unità tal-produzzjoni.

(260)

Din ix-xejra treġġgħet lura fl-2023, meta l-utenti kellhom bżonn inaqqsu l-istokks tagħhom sabiex ma jorbtux il-kapital tagħhom fil-materja prima, u meta l-produtturi esportaturi Ċiniżi komplew il-penetrazzjoni tagħhom fis-suq tal-Unjoni aċċellerat b’kompetizzjoni saħansitra aktar aggressiva fil-prezzijiet. Il-prezzijiet tal-importazzjonijiet miċ-Ċina fl-2023 kienu nofs dawk tas-sena preċedenti.

(261)

Peress li l-kost ta’ unità tal-produzzjoni ġie xprunat ’il fuq mill-kost għoli tal-materja prima u tal-enerġija, fl-2023, l-industrija tal-Unjoni kellha tiffoka fuq dawk l-ordnijiet fejn il-prezzijiet tal-bejgħ tal-anqas koprew, sa ċertu punt, il-kost ta’ unità tal-produzzjoni. Iżda dawn il-volumi kienu ferm ’il bogħod milli jkunu biżżejjed u l-industrija tal-Unjoni kellha tnaqqas b’mod sinifikanti l-produzzjoni.

(262)

Fl-aħħar nett, is-sehem mis-suq tal-industrija tal-Unjoni kien naqas bi 52 %, minn [27 % – 30 %] għal [12 % – 15 %], filwaqt li s-sehem mis-suq tal-importazzjonijiet mir-RPĊ żdied minn 42 % għal 65 %.

(263)

Fil-qosor, il-prezzijiet tal-importazzjoni Ċiniżi estremament aggressivi fil-perjodu ta’ investigazzjoni, ferm inqas kemm mill-kost ta’ unità tal-produzzjoni tal-industrija tal-Unjoni kif ukoll mill-prezzijiet medji tal-bejgħ ġiegħlu lill-industrija tal-Unjoni tnaqqas il-produzzjoni u tnaqqas il-bejgħ tagħha fis-suq tal-Unjoni, li jirriżulta f’telf sinifikanti ta’ [– 15 % sa – 18 %] matul il-perjodu ta’ investigazzjoni.

(264)

Abbażi ta’ dak li ntqal hawn fuq, il-Kummissjoni kkonkludiet li l-industrija tal-Unjoni ġarrbet dannu materjali skont it-tifsira tal-Artikolu 3(5) tar-Regolament bażiku.

(265)

F’konformità mal-Artikolu 3(6) tar-Regolament bażiku, il-Kummissjoni eżaminat jekk l-importazzjonijiet oġġett ta’ dumping mill-pajjiż ikkonċernat ikkawżawx dannu materjali lill-industrija tal-Unjoni. F’konformità mal-Artikolu 3(7) tar-Regolament bażiku, il-Kummissjoni eżaminat ukoll jekk fatturi magħrufin oħra setgħux fl-istess ħin ikkawżaw dannu lill-industrija tal-Unjoni. Il-Kummissjoni żgurat li kull dannu possibbli kkawżat minn fatturi oħra apparti l-importazzjonijiet oġġett ta’ dumping mill-pajjiż ikkonċernat ma kienx attribwit għall-importazzjonijiet oġġett ta’ dumping. Dawn il-fatturi huma: importazzjonijiet minn pajjiżi terzi oħra, il-prestazzjoni tal-esportazzjoni tal-industrija tal-Unjoni, il-konsum tal-Unjoni u fatturi oħra relatati mal-kostijiet u l-importazzjonijiet mir-RPĊ mill-industrija tal-Unjoni.

(266)

Kif stabbilit fil-premessa (206), il-volum tal-importazzjoni tal-prodott ikkonċernat mir-RPĊ żdied b’34 % matul il-perjodu kkunsidrat, u b’hekk żied is-sehem mis-suq Ċiniż fis-suq tal-Unjoni bi 23 punt perċentwali minn 42 % għal 65 %. Matul l-istess perjodu, kif stabbilit fil-premessa (226), l-industrija tal-Unjoni rat il-volum tal-bejgħ tagħha jonqos b’aktar minn 50 % u s-sehem mis-suq tagħha jonqos minn [25 % – 30 %] għal [10 % – 15 %]. Dan seħħ f’kuntest fejn il-konsum tal-Unjoni kien volatili u naqas b’mod ġenerali b’14 % matul il-perjodu kkunsidrat.

(267)

Ta’ min jinnota li l-perjodu ta’ qabel il-perjodu ta’ investigazzjoni, jiġifieri 2020 – 2022, l-industrija tal-Unjoni żiedet il-profitt tagħha b’mod parallel ma’ żieda fil-volumi tal-importazzjoni mir-RPĊ. Tabilħaqq, l-industrija tal-Unjoni tilfet kemm il-volumi tal-bejgħ kif ukoll l-ishma mis-suq matul dan il-perjodu. Ir-raġuni għaliex l-industrija tal-Unjoni kienet għadha kapaċi tiġġenera profitt kienet dovuta għaż-żieda fil-prezzijiet tas-suq sal-2022.

(268)

Matul il-perjodu ta’ investigazzjoni, meta l-prezzijiet tas-suq naqsu f’daqqa, minħabba l-imġiba tad-dumping mill-produtturi esportaturi Ċiniżi, is-sitwazzjoni tal-industrija tal-Unjoni ddeterjorat malajr.

(269)

Kif muri fit-Taqsima 4.3.2 ta’ hawn fuq, għall-perjodu ta’ investigazzjoni, billi tqabblu l-prezzijiet medji tal-bejgħ tal-industrija tal-Unjoni fit-Tabella 9 mal-prezzijiet tal-importazzjonijiet Ċiniżi mill-Eurostat fit-Tabella 5, l-importazzjonijiet Ċiniżi kienu qed iwaqqgħu b’mod sinifikanti l-prezzijiet tal-industrija tal-Unjoni. Tabilħaqq, matul il-perjodu ta’ investigazzjoni, il-prezz medju tal-importazzjoni miċ-Ċina kien inqas minn nofs dak tal-industrija tal-Unjoni, meta l-industrija tal-Unjoni kellha tnaqqas il-produzzjoni b’mod sinifikanti minħabba tnaqqis fil-volumi tal-bejgħ.

(270)

Għalhekk, il-Kummissjoni kkonkludiet li żieda sinifikanti fl-importazzjonijiet oġġett ta’ dumping mir-RPĊ bi prezzijiet li kienu qed iwaqqgħu b’mod sinifikanti l-prezzijiet tal-Unjoni, ikkawżat dannu materjali lill-industrija tal-Unjoni.

(271)

Il-Kummissjoni eżaminat ukoll jekk fatturi magħrufa oħra, individwalment jew kollettivament, setgħux inaqqsu r-rabta kawżali stabbilita bejn l-importazzjonijiet oġġett ta’ dumping u d-dannu materjali li nstab li jeżisti sal-punt li tali rabta ma tibqax ġenwina u sostanzjali.

(272)

Il-volum ta’ importazzjonijiet minn pajjiżi terzi oħra żviluppa kif ġej matul il-perjodu kkunsidrat:

Tabella 13

Importazzjonijiet minn pajjiżi terzi

(273)

Kif stabbilit fil-premessa (206), il-volumi ta’ importazzjoni tal-prodott ikkonċernat mir-RPĊ żdiedu b’34 % matul il-perjodu kkunsidrat. B’mod parallel, il-volumi tal-importazzjonijiet mill-Istati Uniti naqsu b’27 %, u naqsu għal sehem mis-suq ta’ [13 % sa 15 %] matul il-perjodu ta’ investigazzjoni, filwaqt li l-importazzjonijiet min-Norveġja naqsu bi 42 %, u naqsu għal sehem mis-suq ta’ [3 % sa 5 %] matul il-perjodu ta’ investigazzjoni. Il-volumi minn pajjiżi terzi oħra kienu marġinali.

(274)

Filwaqt li l-prezzijiet medji tal-importazzjoni tal-vanillin li joriġinaw min-Norveġja (it-Tabella 13) jaqbżu b’mod kostanti l-prezz medju tal-bejgħ tal-industrija tal-Unjoni (it-Tabella 9), il-prezz medju tal-importazzjoni mill-Istati Uniti kien madwar 30 % taħt il-prezz medju tal-bejgħ tal-industrija tal-Unjoni matul il-perjodu kkunsidrat.

(275)

Ta’ min jinnota li l-biċċa l-kbira, jekk mhux kollha, tal-volumi tal-importazzjonijiet mill-Istati Uniti ġejjin minn produttur esportatur li huwa relatat mal-ilmentatur, u li l-esportazzjonijiet tiegħu lejn l-Unjoni, filwaqt li jaqgħu fid-deskrizzjoni tal-prodott ikkonċernat, jikkomplementaw it-tip tal-prodott simili manifatturat fl-Unjoni, u jinbiegħ mill-ġdid mill-industrija tal-Unjoni kemm fis-suq tal-Unjoni kif ukoll fis-swieq tal-esportazzjoni tagħha. It-tip ta’ vanillin importat mill-Istati Uniti fl-Unjoni li jikkomplementa l-produzzjoni tal-industrija tal-Unjoni jirrappreżenta bejn 85 % u 95 % tal-importazzjonijiet kollha mill-Istati Uniti mill-industrija tal-Unjoni.

(276)

Għalhekk, il-prezz medju aktar baxx tal-kwantitajiet importati mill-Istati Uniti jirrifletti l-kost aktar baxx tal-manifattura tal-etilvanillin meta mqabbel mat-tip ta’ vanillin li huwa manifatturat fl-Unjoni (vanillin naturali u vanillin sintetiku).

(277)

Il-prezzijiet tal-importazzjonijiet minn pajjiżi terzi oħra ġejjin minn kwantitajiet baxxi ħafna. Il-kwantitajiet baxxi jfissru li l-impatt tagħhom kien marġinali.

(278)

Għall-importazzjonijiet minn pajjiżi terzi, il-Kummissjoni kkonkludiet li minbarra l-fatt li dawn l-importazzjonijiet ma sarux bi prezzijiet aktar baxxi mill-prezzijiet tal-industrija tal-Unjoni (li huwa l-każ għall-importazzjonijiet min-Norveġja) jew ikkomplementaw l-offerta tal-industrija tal-Unjoni lill-klijenti Ewropej tagħha (li huwa l-każ għall-importazzjonijiet mill-Istati Uniti), dawn l-importazzjonijiet xorta saru bi prezzijiet ferm ogħla minn dawk tal-importazzjonijiet mir-RPĊ. Għalhekk, dawn ma kisrux ir-rabta kawżali bejn l-importazzjonijiet oġġett ta’ dumping u d-dannu mġarrab mill-industrija tal-Unjoni.

(279)

Il-volum tal-esportazzjonijiet tal-industrija tal-Unjoni lil klijenti mhux relatati żviluppa kif ġej matul il-perjodu kkunsidrat:

Tabella 14

Prestazzjoni tal-esportazzjoni tal-produtturi tal-Unjoni inklużi fil-kampjun

(280)

Il-volum tal-esportazzjoni tal-industrija tal-Unjoni naqas b’mod konsiderevoli matul il-perjodu kkunsidrat, b’64 %. It-telf tal-ishma tas-suq fis-swieq tal-esportazzjoni kien prinċipalment dovut għall-kompetizzjoni mill-esportazzjonijiet li joriġinaw mir-RPĊ.

(281)

It-telf tal-volum tal-bejgħ għall-esportazzjoni kellu effett negattiv fuq il-volum tal-produzzjoni u l-użu tal-kapaċità tal-produttur tal-Unjoni, u b’hekk ikkontribwixxa għal żieda fil-kostijiet fissi tiegħu għal kull unità prodotta.

(282)

Għalhekk, il-Kummissjoni kkonkludiet li l-prestazzjoni tal-esportazzjoni tal-industrija tal-Unjoni, filwaqt li kienet ikkontribwiet għad-dannu mġarrab mill-industrija tal-Unjoni, ma kisritx ir-rabta kawżali bejn l-importazzjonijiet oġġett ta’ dumping mill-pajjiż ikkonċernat u d-dannu materjali li nstab.

(283)

Kif spjegat fit-taqsima 4.2 hawn fuq, il-konsum tal-vanillin naqas matul il-perjodu ta’ investigazzjoni.

(284)

Barra minn hekk, minħabba l-volatilità matul l-2022 u l-2023, hemm inċertezza kbira sa liema punt it-tnaqqis fil-konsum (jiġifieri l-bejgħ lill-utenti) jirrifletti tnaqqis fl-użu attwali tal-vanillin.

(285)

Bħala konklużjoni, ma jistax jiġi eskluż li tnaqqis fil-konsum, jiġifieri l-bejgħ tal-vanillin lill-utenti fl-Unjoni, kellu impatt negattiv fuq il-prestazzjoni finanzjarja tal-industrija tal-Unjoni. Madankollu, minħabba ż-żieda fis-sehem mis-suq tal-importazzjonijiet Ċiniżi bi prezzijiet oġġett ta’ dumping, il-Kummissjoni tqis li t-tnaqqis fil-konsum tal-Unjoni ma jnaqqasx ir-rabta kawżali bejn l-importazzjonijiet oġġett ta’ dumping mill-pajjiż ikkonċernat u d-dannu materjali li nstab.

(286)

Fir-rigward tal-kost tal-produzzjoni, kif innotat fil-premessa (239), il-kost ta’ unità żdied b’25 % matul il-perjodu kkunsidrat. Il-Kummissjoni eżaminat jekk din iż-żieda setax kellha xi impatt fuq id-dannu materjali mġarrab mill-ilmentatur. Minkejja ż-żieda fil-kostijiet tal-enerġija (prinċipalment il-gass) wara l-aggressjoni Russa kontra l-Ukrajna, l-industrija tal-Unjoni ma tħallietx tirrifletti l-kostijiet tagħha fid-dawl taż-żieda fl-importazzjonijiet oġġett ta’ dumping sinifikanti fil-perjodu ta’ investigazzjoni.

(287)

Fir-rigward tal-kostijiet fissi kif innotat fit-taqsima 4.4.3.1, meta l-volumi tal-produzzjoni naqsu, il-kostijiet fissi għal kull unità prodotta żdiedu. Il-Kummissjoni eżaminat jekk l-evoluzzjoni tal-kostijiet fissi għal kull unità prodotta setax kellha xi impatt fuq id-dannu materjali mġarrab mill-ilmentatur. Il-konklużjoni hija li ż-żieda relattiva fil-kostijiet fissi bħala sehem tal-kostijiet ta’ unità tal-produzzjoni hija dovuta għall-volumi aktar baxxi tal-produzzjoni, li jistgħu jiġu attribwiti għal volumi ta’ bejgħ aktar baxxi kkawżati minn kompetizzjoni inġusta mal-importazzjonijiet oġġett ta’ dumping u mhux minn żieda assoluta (98) tal-kostijiet fissi nfushom. Għalhekk, iż-żieda relattiva tal-kostijiet fissi ma tnaqqasx ir-rabta kawżali bejn l-importazzjonijiet oġġett ta’ dumping mill-pajjiż ikkonċernat u d-dannu materjali li nstab.

(288)

Iffaċċjata b’kompetizzjoni ħarxa fil-prezzijiet mill-produtturi esportaturi Ċiniżi, l-industrija tal-Unjoni kellha tirrikorri għax-xiri ta’ kwantitajiet ta’ vanillin mill-kumpanija relatata tagħha fir-RPĊ.

Tabella 15

Importazzjonijiet tal-vanillin mill-industrija tal-Unjoni

(289)

Minn dan ta’ hawn fuq jirriżulta li l-volumi tal-importazzjonijiet mill-produttur esportatur relatat fir-RPĊ żdiedu bi 52 % matul il-perjodu kkunsidrat, li jirrifletti, minn naħa waħda, l-impenn tal-industrija tal-Unjoni li tbigħ il-vanillin lill-klijenti tagħha, iżda min-naħa l-oħra, l-inabbiltà li tkopri l-kost ta’ unità tal-produzzjoni fis-sit tal-manifattura Ewropew tagħha matul perjodu meta l-prezz tal-importazzjonijiet oġġett ta’ dumping tnaqqas bin-nofs (ara l-premessa (208)).

(290)

F’termini ta’ sehem tal-importazzjonijiet totali mir-RPĊ, filwaqt li l-volumi żdiedu f’termini assoluti, is-sehem tal-importazzjonijiet li għalihom l-industrija tal-Unjoni kienet responsabbli baqa’ bejn 7 % u 14 % matul il-perjodu kkunsidrat.

(291)

Dawn l-importazzjonijiet, sa ċertu punt, ikkontribwew għad-dannu mġarrab mill-industrija tal-Unjoni billi kkontribwew għall-iżvilupp negattiv fil-prezzijiet innotat matul il-perjodu ta’ investigazzjoni. Madankollu, dawn l-importazzjonijiet ma jnaqqsux ir-rabta kawżali bejn l-importazzjonijiet oġġett ta’ dumping minn produtturi esportaturi mhux relatati, li kienu responsabbli għal 86 % sa 93 % tal-volumi totali tal-importazzjoni, u d-dannu materjali mġarrab mill-industrija tal-Unjoni, kif stabbilit mill-investigazzjoni.

(292)

Kif stabbilit hawn fuq fil-premessi (259) sa (264), wara sitwazzjoni stabbli tas-suq fl-2020 u fl-2021, l-industrija tal-Unjoni ffaċċjat sitwazzjoni tas-suq differenti fl-2022.

(293)

Kif spjegat fil-premessa (201), kien hemm żieda fid-domanda wara l-pandemija tal-COVID-19, li wasslet għal żieda fil-prezzijiet tal-bejgħ fl-Unjoni. Għalhekk, l-industrija tal-Unjoni tista’ żżomm il-marġnijiet ta’ profitt tagħha anki jekk il-kostijiet tal-enerġija żdiedu b’mod parallel. Is-sitwazzjoni tas-suq ġibdet ukoll volumi sinifikanti ta’ importazzjonijiet miċ-Ċina.

(294)

Din ix-xejra treġġgħet kompletament lura matul il-perjodu ta’ investigazzjoni, meta l-importazzjonijiet miċ-Ċina ssodisfaw din is-sitwazzjoni l-ġdida tas-suq billi naqqsu b’mod aggressiv il-prezzijiet tal-bejgħ, b’madwar 50 %.

(295)

L-industrija tal-Unjoni ma setgħetx issegwi l-imġiba aggressiva tal-prezzijiet u kellha tnaqqas il-volumi tal-produzzjoni tagħha u, sa ċertu punt, bdiet timporta volumi akbar mill-kumpanija relatata tagħha fir-RPĊ sabiex tiddefendi lilha nnifisha.

(296)

L-industrija tal-Unjoni kienet qed tiffaċċja wkoll imġiba aggressiva fil-prezzijiet fis-swieq tal-esportazzjoni tagħha, bil-volumi tal-esportazzjoni mitlufa lill-produtturi esportaturi Ċiniżi.

(297)

Il-Kummissjoni ddistingwiet u sseparat l-effetti tal-fatturi kollha magħrufin fuq is-sitwazzjoni tal-industrija tal-Unjoni mill-effetti dannużi tal-importazzjonijiet oġġett ta’ dumping. Madankollu, l-effett ta’ dawn il-fatturi fuq is-sitwazzjoni ekonomika tal-industrija tal-Unjoni matul il-perjodu ta’ investigazzjoni kien limitat.

(298)

Abbażi ta’ dan ta’ hawn fuq, il-Kummissjoni kkonkludiet li l-importazzjonijiet oġġett ta’ dumping mill-pajjiż ikkonċernat ikkawżaw dannu materjali lill-industrija tal-Unjoni u li l-fatturi l-oħrajn, ikkunsidrati individwalment jew b’mod kollettiv, ma naqqsux ir-rabta kawżali bejn l-importazzjonijiet oġġett ta’ dumping u d-dannu materjali. Id-dannu jikkonsisti b’mod partikolari fi tnaqqis fil-volumi tal-produzzjoni u tal-bejgħ, fil-profitti, fis-sehem mis-suq, fir-redditu fuq l-investimenti u fl-użu tal-kapaċità.

(299)

Biex tiddetermina l-livell tal-miżuri, skont l-Artikolu 9(4), it-tieni subparagrafu tar-Regolament bażiku, il-Kummissjoni eżaminat jekk dazju aktar baxx mill-marġni tad-dumping ikunx biżżejjed biex ineħħi d-dannu kkawżat mill-importazzjonijiet oġġett ta’ dumping lill-industrija tal-Unjoni.

(300)

Id-dannu jitneħħa jekk l-industrija tal-Unjoni tkun tista’ tikseb profitt fil-mira billi tbigħ bi prezz fil-mira fis-sens tal-Artikoli 7(2c) u 7(2d) tar-Regolament bażiku.

(301)

F’konformità mal-Artikolu 7(2c) tar-Regolament bażiku, sabiex tistabbilixxi l-profitt fil-mira, il-Kummissjoni qieset il-fatturi li ġejjin: il-livell ta’ profittabbiltà qabel iż-żieda fl-importazzjonijiet mir-RPĊ, il-livell ta’ profittabbiltà meħtieġ biex ikopri l-kostijiet u l-investimenti kollha, ir-riċerka u l-iżvilupp (“R&Ż”) u l-innovazzjoni (“IRI”, Investments, Research & Development and Innovation), u l-livell ta’ profittabbiltà li għandu jkun mistenni f’kundizzjonijiet normali ta’ kompetizzjoni. Jenħtieġ li tali marġni ta’ profitt ma jkunx anqas minn 6 %.

(302)

Bħala l-ewwel pass, il-Kummissjoni stabbiliet profitt bażiku li jkopri l-kostijiet sħaħ f’kundizzjonijiet normali ta’ kompetizzjoni. Fin-nuqqas ta’ data li turi profitt ogħla miksub f’kundizzjonijiet normali ta’ kompetizzjoni, f’dan l-istadju l-Kummissjoni użat profitt fil-mira ta’ 6 % kif previst fl-Artikolu 7(2c) tar-Regolament bażiku. Dan jikkostitwixxi approċċ konservattiv meta mqabbel mal-profitti miksuba mill-ilmentatur fl-2021 u fl-2022, li madankollu, kienu affettwati mill-irkupru ta’ wara l-COVID-19.

(303)

L-industrija tal-Unjoni pprovdiet evidenza li l-livell tagħha ta’ investimenti, riċerka u żvilupp u innovazzjoni (“IRI”) matul il-perjodu kkunsidrat kienu jkunu ogħla f’kundizzjonijiet normali ta’ kompetizzjoni. Biex tirrifletti dan fil-profitt fil-mira, il-Kummissjoni kkalkolat id-differenza bejn il-kostijiet tal-IRI f’kundizzjonijiet normali ta’ kompetizzjoni kif ipprovduti mill-industrija tal-Unjoni u vverifikati mill-Kummissjoni mal-kostijiet reali tal-IRI matul il-perjodu kkunsidrat. Differenza bħal din, espressa bħala perċentwal tal-fatturat, kienet ta’ 1,2 %.

(304)

Tali perċentwal ta’ 1,2 % żdied mal-marġni tal-profitt bażiku ta’ 6,0 % imsemmi fil-premessa (302), li wassal għal profitt fil-mira ta’ 7,2 %.

(305)

F’konformità mal-Artikolu 7(2d) tar-Regolament bażiku, bħala pass finali, il-Kummissjoni vvalutat il-kostijiet futuri li jirriżultaw mill-Ftehimiet Ambjentali Multilaterali, u l-protokolli tagħhom, li l-Unjoni hija parti minnhom, u tal-Konvenzjonijiet tal-ILO elenkati fl-Anness Ia tar-Regolament bażiku li l-industrija tal-Unjoni se ġġarrab matul il-perjodu tal-applikazzjoni tal-miżura skont l-Artikolu 11(2) tar-Regolament bażiku. Fin-nuqqas ta’ evidenza disponibbli, ma ġew miżjuda l-ebda kostijiet futuri addizzjonali.

(306)

Fuq din il-bażi, il-Kummissjoni kkalkolat prezz medju ponderat mhux dannuż fil-firxa ta’ EUR 20 200 – 22 200 għal kull tunnellata għall-prodott simili tal-industrija tal-Unjoni billi applikat il-marġni ta’ profitt fil-mira msemmi hawn fuq (ara l-premessa (304)) għall-kost tal-produzzjoni tal-ilmentatur kif muri fit-Tabella 9 u mbagħad żiedet l-aġġustamenti skont l-Artikolu 7(2d) tar-Regolament bażiku.

(307)

Il-Kummissjoni mbagħad iddeterminat il-livell tal-marġni tad-dannu fuq il-bażi ta’ tqabbil tal-prezz medju ponderat tal-importazzjoni tal-produtturi esportaturi fir-RPĊ li kkooperaw inklużi fil-kampjun, kif stabbilit għall-kalkoli tat-twaqqigħ tal-prezz, mal-prezz medju ponderat mhux dannuż tal-prodott simili mibjugħ mill-produttur tal-Unjoni fis-suq tal-Unjoni matul il-perjodu ta’ investigazzjoni.

(308)

Il-marġni tad-dannu għall-“produtturi esportaturi li kkooperaw mhux inklużi fil-kampjun” u għall-“kumpaniji l-oħrajn kollha” huwa definit bl-istess mod bħall-marġni tad-dumping għal dawn il-kumpaniji (ara t-taqsima 3.8).

(309)

Wara l-valutazzjoni ta’ hawn fuq, jenħtieġ li d-dazji anti-dumping definittivi jiġu stabbiliti fil-livell tal-marġni tad-dannu f’konformità mal-Artikolu 9(4), it-tieni subparagrafu tar-Regolament bażiku.

(310)

Il-Kummissjoni eżaminat jekk setgħetx tikkonkludi b’mod ċar li ma kienx fl-interess tal-Unjoni li tadotta miżuri f’dan il-każ, minkejja d-determinazzjoni ta’ dumping dannuż, f’konformità mal-Artikolu 21 tar-Regolament bażiku.

(311)

Id-determinazzjoni tal-interess tal-Unjoni kienet ibbażata fuq apprezzament tal-interessi varji kollha involuti, inkluż dawk tal-industrija tal-Unjoni, tal-importaturi, u tal-utenti.

(312)

L-investigazzjoni wriet li l-industrija tal-Unjoni qed issofri dannu materjali kkawżat mill-importazzjonijiet oġġett ta’ dumping mill-pajjiż ikkonċernat. Dawn l-importazzjonijiet waqqgħu b’mod sinifikanti l-prezzijiet tal-produttur tal-Unjoni, u kkawżaw telf sinifikanti tas-sehem mis-suq u tal-profitti lejn tmiem il-perjodu kkunsidrat, u matul il-perjodu ta’ investigazzjoni, kif spjegat fil-premessi (214) sa (298) hawn fuq.

(313)

L-impożizzjoni ta’ miżuri x’aktarx tipprevjeni żieda ulterjuri fl-importazzjonijiet mir-RPĊ bi prezzijiet oġġett ta’ dumping baxxi ħafna. Mingħajr miżuri, il-produtturi esportaturi Ċiniżi se jkomplu jwettqu dumping tal-prodott ikkonċernat fis-suq tal-Unjoni li jipprevjeni lill-industrija tal-Unjoni milli terġa’ tibda l-produzzjoni sħiħa, milli tbigħ bi prezz adegwat u milli tiġġenera profitt suffiċjenti u b’hekk tikkawża aktar dannu materjali lill-industrija tal-Unjoni.

(314)

Għalhekk ġie konkluż li l-impożizzjoni ta’ miżuri fuq l-importazzjonijiet tal-vanillin mir-RPĊ tkun fl-interess tal-industrija tal-Unjoni.

(315)

Il-Kummissjoni ma rċeviet l-ebda tweġiba għall-kwestjonarju mingħand l-ebda importatur tal-Unjoni li n-negozju tiegħu huwa biss li jimporta u jbigħ mill-ġdid il-prodott ikkonċernat.

(316)

Għalhekk, il-Kummissjoni kkonkludiet li huwa improbabbli li l-impożizzjoni ta’ dazji anti-dumping fuq vanillin li joriġina mir-RPĊ se jkollha effett negattiv fuq is-sitwazzjoni ta’ importaturi u negozjanti mhux relatati fl-Unjoni.

(317)

Żewġ utenti li huma wkoll importaturi ppreżentaw ruħhom fl-investigazzjoni u pprovdew tweġibiet għall-kwestjonarju. Wieħed minnhom minn hemm ’il quddiem irrifjuta li jippermetti verifika tat-tweġiba għall-kwestjonarju, u l-Kummissjoni bagħtet ittra ta’ nuqqas ta’ kooperazzjoni skont l-Artikolu 18 tar-Regolament bażiku.

(318)

L-uniku utent tal-Unjoni li kkoopera bis-sħiħ, inkluż li ppermetta lill-Kummissjoni twettaq verifika tat-tweġiba tiegħu għall-kwestjonarju, iddikjara li kien kontra l-impożizzjoni ta’ dazji fuq l-importazzjonijiet Ċiniżi tal-vanillin, peress li qies li tali dazji jimminaw il-kapaċità tiegħu li jikseb materja prima minn diversi oriġini, meta jitqies li l-ilmentatur kien l-uniku produttur tal-Unjoni ta’ ċerti tipi tal-prodott simili.

(319)

Għal dan l-utent, il-kost tal-vanillin kien materjali għal dawk il-prodotti finali li kienu jinkludu l-vanillin bħala input. Fl-istess ħin, il-bejgħ ta’ dawn il-prodotti ġġenera kontribuzzjoni pożittiva għar-riżultat finanzjarju globali tal-kumpanija.

(320)

Madankollu, dan l-utent irrikonoxxa l-ħtieġa li produttur tal-Unjoni jikseb profitt sostenibbli fuq il-bejgħ tiegħu fl-Unjoni.

(321)

Għalhekk, il-miżuri li jistabbilixxu mill-ġdid kundizzjonijiet ekwi fis-suq tal-Unjoni ma jmorrux kontra l-interess tal-utenti tal-Unjoni, peress li jissalvagwardjaw il-provvista tal-vanillin minn diversi sorsi inkluż mill-Unjoni, u ma jippermettux sitwazzjoni monopolistika tal-vanillin importat.

(322)

Fid-dawl ta’ dan ta’ hawn fuq, huwa konkluż li l-impożizzjoni ta’ xi miżuri anti-dumping x’aktarx li ma taffettwax serjament is-sitwazzjoni tal-utenti.

(323)

Wara d-divulgazzjoni tas-sejbiet definittivi, Frey & Lau u l-parti interessata l-ġdida, Arethia (ara l-premessa (54)), enfasizzaw l-impatt qawwi li kwalunkwe miżura antidumping jista’ jkollha fuq l-industrija downstream, inkluż fuq tagħhom.

(324)

F’dan il-kuntest, il-Kummissjoni nnotat li la Frey & Lau u lanqas Arethia ma ppreżentaw kwestjonarji, li jippermettu lill-Kummissjoni tkejjel l-impatt li kwalunkwe miżura jkollha fuqhom. Għalhekk, il-Kummissjoni setgħet tkejjel biss l-impatt fil-livell tal-industrija downstream abbażi tal-informazzjoni pprovduta mill-utent li kkoopera bis-sħiħ (ara l-premessa (318)). Dan l-utent ma pprovdiex kummenti dwar id-divulgazzjoni definittiva u fuq din il-bażi, il-Kummissjoni qieset li l-konklużjoni misluta fil-premessa (322) baqgħet valida.

(325)

Abbażi ta’ dan ta’ hawn fuq, il-Kummissjoni kkonkludiet li ma kienx hemm raġunijiet konvinċenti li ma kienx fl-interess tal-Unjoni li timponi miżuri definittivi fuq l-importazzjonijiet ta’ vanillin li joriġinaw mill-pajjiż ikkonċernat.

(326)

Fid-dawl tal-konklużjonijiet milħuqa fir-rigward tad-dumping, tad-dannu, tal-kawżalità, tal-livell tal-miżuri u tal-interess tal-Unjoni, u f’konformità mal-Artikolu 9(4) tar-Regolament bażiku, jenħtieġ li jiġu imposti miżuri anti-dumping definittivi sabiex ma jiġix ikkawżat dannu ulterjuri lill-industrija tal-Unjoni mill-importazzjonijiet oġġett ta’ dumping tal-prodott ikkonċernat.

(327)

Abbażi ta’ dan ta’ hawn fuq, jenħtieġ li r-rata tad-dazju anti-dumping definittiv, espressa skont il-prezz CIF fil-fruntiera tal-Unjoni, bid-dazju doganali mhux imħallas, tiġi stabbilita fil-livell ta’ 131,1 %.

(328)

Kif imsemmi fil-premessa (3), il-Kummissjoni għamlet l-importazzjonijiet tal-prodott investigat soġġetti għal reġistrazzjoni.

(329)

Billi l-miżuri provviżorji ma ġewx imposti f’dan il-proċediment, il-kundizzjonijiet kif stabbiliti fl-Artikolu 10(4) tar-Regolament bażiku għall-applikazzjoni retroattiva tad-dazju anti-dumping definittiv ma ntlaħqux.

(330)

Fid-dawl tal-Artikolu 109 tar-Regolament (UE,Euratom) 2024/2509 tal-Parlament Ewropew u tal-Kunsill (99), meta ammont ikun irid jiġi rimborżat b’segwitu għal sentenza tal-Qorti tal-Ġustizzja tal-Unjoni Ewropea, jenħtieġ li l-imgħax li jrid jitħallas ikun ir-rata applikata mill-Bank Ċentrali Ewropew għall-operazzjonijiet ta’ rifinanzjament ewlenin tiegħu, kif ippubblikata fis-serje C ta’ Il-Ġurnal Uffiċjali tal-Unjoni Ewropea, fl-ewwel jum kalendarju ta’ kull xahar.

(331)

Il-miżuri previsti f’dan ir-Regolament huma f’konformità mal-opinjoni tal-Kumitat stabbilit permezz tal-Artikolu 15(1) tar-Regolament bażiku,