(1)

Ir-Regolament (UE) Nru 910/2014 jirrikjedi li l-Kartieri Ewropej tal-Identità Diġitali (il-“kartieri”) u l-mezzi ta’ identifikazzjoni elettronika notifikati jkunu disponibbli bħala għażla għall-awtentikazzjoni biex jinkiseb aċċess għas-servizzi pubbliċi transfruntiera online pprovduti mill-Istati Membri. F’każijiet ta’ awtentikazzjoni transfruntiera bħal dawn, ir-rekords li jkun fihom informazzjoni li tappartjeni għall-utent tal-kartiera jew għall-utent ta’ mezzi ta’ identifikazzjoni elettronika notifikati xi drabi jkunu diġà disponibbli għall-parti dipendenti permezz tar-reġistru tal-parti dipendenti stess jew ta’ reġistru estern, u spiss fil-forma ta’ kont tal-utent. F’dawn il-każijiet, ċerta informazzjoni li tappartjeni għall-utent, miksuba mill-kartieri jew mill-mezzi ta’ identifikazzjoni elettronika notifikati, tista’ titqabbel minn dik il-parti dipendenti jew inkella f’isimha. Pereżempju, dan jista’ jinkiseb bl-użu ta’ soluzzjoni ċentralizzata operata minn korp tas-settur pubbliku, abbażi tal-informazzjoni li tkun diġà nżammet minn dik il-parti dipendenti jew minn reġistru li fuqu tiddependi l-parti dipendenti, b’mod indikattiv, reġistru tal-popolazzjoni jew bażi tad-data b’informazzjoni dwar il-kontijiet tal-utenti.

(2)

Il-Kummissjoni tivvaluta b’mod regolari t-teknoloġiji, il-prattiki, l-istandards u l-ispeċifikazzjonijiet tekniċi ġodda. Biex ikun żgurat l-ogħla livell ta’ armonizzazzjoni fost l-Istati Membri għall-iżvilupp u għaċ-ċertifikazzjoni tal-kartieri, l-ispeċifikazzjonijiet tekniċi stabbiliti f’dan ir-Regolament jiddependu fuq il-ħidma mwettqa skont ir-Rakkomandazzjoni tal-Kummissjoni (UE) 2021/946 (2) u b’mod partikolari l-Arkitettura u l-Qafas ta’ Referenza li huma parti minnu. F’konformità mal-premessa 75 tar-Regolament (UE) 2024/1183 tal-Parlament Ewropew u tal-Kunsill (3), il-Kummissjoni jenħtieġ li tirrieżamina u, jekk ikun meħtieġ, taġġorna dan ir-Regolament biex iżżommu konformi mal-iżviluppi globali, mal-Arkitettura u mal-Qafas ta’ Referenza, u biex issegwi l-aħjar prattiki fis-suq intern.

(3)

Sabiex jiġi żgurat li l-proċess tat-tqabbil tal-identità jiffunzjona b’mod affidabbli fl-Istati Membri kollha, l-Istati Membri li jaġixxu bħala partijiet dipendenti, jenħtieġ li jwettqu t-tqabbil inizjali tal-identità meta persuna fiżika titlob għall-ewwel darba li tingħata aċċess għal servizz operat mill-parti dipendenti, abbażi jew tas-sett minimu tad-data kif stabbilit fir-Regolament ta’ Implimentazzjoni tal-Kummissjoni (UE) 2015/1501 (4) jew tas-sett tad-data tal-identifikazzjoni tal-persuna stabbilit fir-Regolament ta’ Implimentazzjoni tal-Kummissjoni (UE) 2024/2977 (5). Filwaqt li dan ir-Regolament jiffoka fuq l-Istati Membri li jaġixxu bħala partijiet dipendenti, ir-Regolament (UE) Nru 910/2014 iħalli f’idejn l-Istati Membri biex jiddeċiedu jekk is-sistema tat-tqabbil tal-identità hijiex disponibbli wkoll għall-partijiet dipendenti privati. Meta l-Istati Membri jipprevedu t-tqabbil tal-identità għall-partijiet dipendenti li mhumiex il-korpi tas-settur pubbliku, jenħtieġ li kemm jista’ jkun japplikaw il-mekkaniżmi u l-proċeduri stabbiliti f’dan ir-Regolament.

(4)

Għall-fini tat-tqabbil transfruntier tal-identità meta jintużaw il-kartieri, l-informazzjoni użata għat-tqabbil inekwivoku tal-identità jenħtieġ li tkun l-identifikaturi obbligatorji tad-data tas-sett tad-data tal-identifikazzjoni tal-persuna kif stabbilit fit-Taqsima 1 tal-Anness tar-Regolament ta’ Implimentazzjoni (UE) 2024/2977, flimkien ma’ kwalunkwe data fakultattiva meħtieġa biex jiġi żgurat li s-sett tad-data tal-identifikazzjoni tal-persuna jkun uniku.

(5)

Għall-fini tat-tqabbil transfruntier tal-identità meta jintużaw il-mezzi ta’ identifikazzjoni elettronika notifikati, l-informazzjoni użata għat-tqabbil inekwivoku tal-identità jenħtieġ li tkun l-attributi obbligatorji tas-sett minimu tad-data għal persuna fiżika kif stabbilit fit-Taqsima 1 tal-Anness tar-Regolament ta’ Implimentazzjoni (UE) 2015/1501. Ir-referenza għall-attributi obbligatorji tas-sett minimu tad-data għal persuna fiżika jenħtieġ li tinftiehem fil-kuntest tar-Regolament ta’ Implimentazzjoni (UE) 2015/1501, li jiddeskrivi attribut bħala komponent tas-sett minimu tad-data tal-identifikazzjoni tal-persuna, għall-kuntrarju tad-definizzjoni tal-attributi stabbilita fl-Artikolu 3, il-punt (43), tar-Regolament (UE) Nru 910/2014 kif emendat bir-Regolament (UE) 2024/1183.

(6)

Minħabba d-dipendenza fuq informazzjoni diġà eżistenti użata mill-parti dipendenti biex jiġi żgurat tqabbil inekwivoku tal-identità, il-proċess tat-tqabbil tal-identità jista’ ma jkunx ta’ suċċess fil-każijiet kollha. Sabiex jiġi pprovdut grad xieraq ta’ flessibbiltà għall-partijiet dipendenti, l-Istati Membri jistgħu jistabbilixxu proċessi komplementari li jiksbu livell ekwivalenti ta’ fiduċja fl-eżitu tal-proċess tat-tqabbil tal-identità.

(7)

Meta l-proċess tat-tqabbil tal-identità jitqies li kien ta’ suċċess skont id-dispożizzjonijiet ta’ dan ir-Regolament, il-parti dipendenti jew il-parti li taġixxi f’isimha, jew reġistru li fuqu jiddependu l-partijiet dipendenti jew is-sistema ċentralizzata jenħtieġ li jiżguraw li l-utent jiġi infurmat dwar ir-reġistrazzjoni b’suċċess, inkluż billi jintwera l-isem jew il-psewdonimu tal-utent u, meta jkun xieraq, fost l-oħrajn, dwar l-għażliet disponibbli għall-ħżin tar-riżultat tal-proċess tat-tqabbil tal-identità. Dawk l-għażliet jistgħu jinkludu l-ħżin ta’ assoċjazzjoni f’reġistru operat mill-parti dipendenti u/jew f’reġistru li fuqu tiddependi l-parti dipendenti u/jew il-ħruġ ta’ attestazzjoni elettronika ddedikata tal-attributi li jkun fihom assoċjazzjoni li tista’ terġa’ tintuża fil-futur u/jew bl-użu ta’ għażliet alternattivi pprovduti mill-parti dipendenti jew mill-parti li taġixxi f’isem il-parti dipendenti. Meta jkun applikabbli, jenħtieġ li l-utent ikun jista’ jagħżel bejn l-għażliet u jkollu ż-żmien taż-żamma taħt il-kontroll tiegħu biex jiġi żgurat li l-utenti jkunu jistgħu jerġgħu jużaw il-proċessi kompluti tat-tqabbil tal-identità fil-futur.

(8)

Sabiex jissaħħu t-trasparenza u l-kontroll tal-utent, meta l-utent ma jkunx jista’ jitqabbel b’suċċess, l-utent jenħtieġ li jingħata raġunijiet ċari għaliex it-tqabbil ma kienx ta’ suċċess. Barra minn hekk, jenħtieġ li l-utent jiġi infurmat dwar kwalunkwe pass potenzjali li jmiss. Dik l-informazzjoni jenħtieġ li tinkludi l-informazzjoni li tkun intużat fil-proċess tat-tqabbil tal-identità u kwalunkwe diskrepanza li tkun instabet, filwaqt li tipprovdi spjegazzjonijiet u struzzjonijiet ċari lill-utenti dwar rimedji possibbli u proċessi komplementari.

(9)

Sabiex il-mekkaniżmi xierqa ta’ rikors jsiru disponibbli kull meta jsir it-tqabbil tal-identità, il-partijiet dipendenti jew il-partijiet li jaġixxu f’isimhom jew ir-reġistri li fuqhom jiddependu l-partijiet dipendenti jenħtieġ li jżommu reġistri xierqa dwar il-proċess tat-tqabbil tal-identità, l-informazzjoni użata għat-tqabbil u kwalunkwe dokumentazzjoni ta’ sostenn oħra pprovduta mill-persuna fiżika kif ukoll l-eżitu tal-proċess tat-tqabbil tal-identità. Dawn ir-reġistri jenħtieġ li jinżammu għal minimu ta’ 6 xhur u massimu ta’ 12-il xahar biex ikunu jistgħu jiġu rreġistrati u pproċessati l-ilmenti mill-utenti. Iż-żmien taż-żamma jista’ jiġi estiż jekk ikun meħtieġ mid-dritt tal-Unjoni jew dak nazzjonali.

(10)

Sabiex jiġi evitat li l-utenti tal-kartieri ma jkollhomx għalfejn iwettqu l-proċess tat-tqabbil tal-identità ripetutament, l-Istati Membri jistgħu jirrikjedu li s-sistemi tat-tqabbil tal-identità jkunu kapaċi joħorġu attestazzjoni elettronika tal-attributi b’rabta bejn l-utent tal-kartiera u reġistru li fih dak l-utent ikun irreġistrat bħala utent magħruf. B’mod alternattiv, l-Istati Membri jistgħu jaħżnu assoċjazzjoni bħala referenza għal reġistru li jkun aċċessibbli għall-parti dipendenti jew miżuri oħra ta’ assistenza.

(11)

Sabiex jiġi żgurat li l-kartieri li għandhom jiġu pprovduti f’konformità mar-rekwiżiti tal-Artikolu 5a(1) tar-Regolament (UE) Nru 910/2014, u l-iskemi ta’ identifikazzjoni elettronika notifikati jibbenefikaw mill-vantaġġi li jkollhom sistemi operazzjonali tat-tqabbil tal-identità, jeħtieġ li tiġi stabbilita skadenza itwal għall-applikazzjoni tad-dispożizzjonijiet rispettivi ta’ dan ir-Regolament. Fir-rigward tal-kartieri, kull Stat Membru jenħtieġ li jipprovdi mill-inqas kartiera waħda fi żmien 24 xahar mid-data tad-dħul fis-seħħ tal-atti ta’ implimentazzjoni msemmija fl-Artikoli 5a(23) u 5c(6) tar-Regolament (UE) Nru 910/2014. Għalhekk, l-applikazzjoni tad-dispożizzjonijiet rilevanti ta’ dan ir-Regolament dwar it-tqabbil tal-identità abbażi tal-kartieri jenħtieġ li tikkoinċidi mal-perjodu ta’ żmien ta’ hawn fuq. Fir-rigward tal-iskemi ta’ identifikazzjoni elettroniċi notifikati, jenħtieġ li jingħata biżżejjed żmien biex jiġu sostitwiti l-funzjonalitajiet għat-tqabbil tal-identità.

(12)

Peress li l-użu tal-kartiera għandu jkun volontarju, l-Istati Membri jenħtieġ li jipprovdu metodi alternattivi għall-utenti biex jiksbu aċċess għas-servizzi li jipprovdu meta jaġixxu bħala partijiet dipendenti.

(13)

Meta wieħed jipprova jawtentika f’servizz elettroniku, ir-reġistrazzjoni ġdida ta’ utent tista’ ssir bla xkiel, u għalhekk għall-utent tista’ tidher, viżwalment u teknikament, bħallikieku ilu juża s-servizz elettroniku u qed jerġa’ jidħol bħas-soltu. Għal dik ir-raġuni, jenħtieġ li reġistrazzjoni ġdida ta’ utent għal servizz elettroniku, għall-fini ta’ dan ir-Regolament, titqies bħala ekwivalenti għal proċess tat-tqabbil tal-identità b’suċċess.

(14)

L-Istati Membri jenħtieġ li jiżguraw li l-proċess tat-tqabbil tal-identità jiffunzjona mingħajr xkiel u li l-utent ma jesperjenzax diversi bidliet waqt is-sessjoni u passi ripetittivi anke jekk il-proċess tat-tqabbil tal-identità inizjalment ma jkunx ta’ suċċess u jitwettqu proċessi komplementari.

(15)

L-Istati Membri għandhom il-libertà li jfasslu l-interfaċċi tal-utenti u n-notifiki tagħhom b’mod li jaqbel mal-kuntest nazzjonali tagħhom, filwaqt li jqisu l-ispirtu tar-rekwiżiti li jinsabu f’dan ir-Regolament.

(16)

Ir-Regolament (UE) 2016/679 tal-Parlament Ewropew u tal-Kunsill (6) u, meta rilevanti, id-Direttiva 2002/58/KE tal-Parlament Ewropew u tal-Kunsill (7) japplikaw għall-attivitajiet tal-ipproċessar tad-data personali skont dan ir-Regolament.

(17)

Il-Kontrollur Ewropew għall-Protezzjoni tad-Data ġie kkonsultat f’konformità mal-Artikolu 42(1) tar-Regolament (UE) 2018/1725 tal-Parlament Ewropew u tal-Kunsill (8) u ta l-opinjoni tiegħu fil-31 ta’ Jannar 2025.

(18)

Il-miżuri previsti f’dan ir-Regolament huma f’konformità mal-opinjoni tal-kumitat stabbilit bl-Artikolu 48 tar-Regolament (UE) Nru 910/2014,