Access to European Union law
<a href="https://eur-lex.europa.eu/content/help/eurlex-content/experimental-features.html" target="_blank">More about the experimental features corner</a>
Choose the experimental features you want to try
EUR-Lex
Access to European Union law

This document is an excerpt from the EUR-Lex website

You are here
Use quotation marks to search for an "exact phrase". Append an asterisk (*) to a search term to find variations of it (transp*, 32019R*). Use a question mark (?) instead of a single character in your search term to find variations of it (ca?e finds case, cane, care).
Search tips
Need more search options? Use the Advanced search

Document 32025R0405

Regolament Delegat tal-Kummissjoni (UE) 2025/405 tat-13 ta’ Diċembru 2024 li jemenda r-Regolament (UE) 2018/848 tal-Parlament Ewropew u tal-Kunsill fir-rigward tal-prattiki enoloġiċi

C/2024/8692

ĠU L, 2025/405, 26.2.2025, ELI: http://data.europa.eu/eli/reg_del/2025/405/oj (BG, ES, CS, DA, DE, ET, EL, EN, FR, GA, HR, IT, LV, LT, HU, MT, NL, PL, PT, RO, SK, SL, FI, SV)

Legal status of the document In force

ELI: http://data.europa.eu/eli/reg_del/2025/405/oj

European flag

Il-Ġurnal Uffiċjali
ta'l-Unjoni Ewropea

MT

Is-serje L

2025/405

26.2.2025

REGOLAMENT DELEGAT TAL-KUMMISSJONI (UE) 2025/405

tat-13 ta’ Diċembru 2024

li jemenda r-Regolament (UE) 2018/848 tal-Parlament Ewropew u tal-Kunsill fir-rigward tal-prattiki enoloġiċi

IL-KUMMISSJONI EWROPEA,

Wara li kkunsidrat it-Trattat dwar il-Funzjonament tal-Unjoni Ewropea,

Wara li kkunsidrat ir-Regolament (UE) 2018/848 tal-Parlament Ewropew u tal-Kunsill tat-30 ta’ Mejju 2018 dwar il-produzzjoni organika u t-tikkettar ta’ prodotti organiċi u li jħassar ir-Regolament tal-Kunsill (KE) Nru 834/2007 (1), u b’mod partikolari l-Artikolu 18(2) tiegħu,

Billi:

(1)

Ir-Regolament (UE) 2021/2117 tal-Parlament Ewropew u tal-Kunsill (2) emenda r-Regolament (UE) Nru 1308/2013 tal-Parlament Ewropew u tal-Kunsill (3). Fil-kuntest ta’ dik l-emenda, l-inbid dealkoħolizzat ġie miżjud mal-prodotti tas-settur tal-inbid elenkati fil-Parti XII tal-Anness I tar-Regolament (UE) Nru 1308/2013 u ġiet miżjuda Taqsima E ġdida relatata mal-proċessi tad-dealkoħolizzazzjoni mal-prattiki enoloġiċi stabbiliti fil-Parti I tal-Anness VIII ta’ dak ir-Regolament.

(2)

Peress li l-inbid dealkoħolizzat sar prodott tas-settur tal-inbid, jenħtieġ li japplikaw regoli speċifiċi dwar il-produzzjoni tas-settur tal-inbid stabbiliti fil-Parti VI tal-Anness II tar-Regolament (UE) 2018/848 għall-produzzjoni tal-inbid organiku dealkoħolizzat.

(3)

Skont ir-Regolament (UE) 2018/848, l-inbid dealkoħolizzat ma jistax jiġi prodott b’mod organiku. Skont il-Parti VI tal-Anness II tar-Regolament (UE) 2018/848, l-ebda wieħed mill-proċessi tad-dealkoħolizzazzjoni elenkati għas-settur tal-inbid fit-Taqsima E tal-Parti I tal-Anness VIII tar-Regolament (UE) Nru 1308/2013 ma huwa permess għall-produzzjoni organika. Il-punt 3.4 tal-Parti VI tal-Anness II tar-Regolament (UE) 2018/848 jiddikjara li kwalunkwe emenda li tikkonċerna l-prattiki, il-proċessi u t-trattamenti enoloġiċi previsti fir-Regolament (UE) Nru 1308/2013 tista’ tapplika għall-produzzjoni organika tal-inbid biss wara li dawk il-miżuri jkunu ġew inklużi kif permess fil-Parti VI tal-Anness II tar-Regolament (UE) 2018/848 u, jekk meħtieġ, wara evalwazzjoni f’konformità mal-Artikolu 24 tar-Regolament (UE) 2018/848.

(4)

F’konformità mal-proċedura prevista fl-Artikolu 24(7) tar-Regolament (UE) 2018/848, Stat Membru wieħed ippreżenta dossier lill-Istati Membri l-oħra u lill-Kummissjoni dwar l-użu tad-distillazzjoni f’vakwu għall-produzzjoni ta’ nbejjed organiċi dealkoħolizzati fid-dawl tal-awtorizzazzjoni u l-inklużjoni tiegħu fil-punt 3.3 tal-Parti VI tal-Anness II tar-Regolament (UE) 2018/848. Dak id-dossier ġie evalwat mill-Grupp ta’ Esperti għall-Parir Tekniku dwar il-Produzzjoni Organika (EGTOP) (4) u mill-Kummissjoni.

(5)

L-EGTOP irrakkomanda li jiġi emendat il-punt 3.3 tal-Parti VI tal-Anness II tar-Regolament (UE) 2018/848, li jelenka t-tekniki ta’ evaporazzjoni bil-vakwu fost il-prattiki permessi, esklużivament għall-produzzjoni tal-inbid organiku totalment dealkoħolizzat, filwaqt li jiġu ssodisfati l-limitazzjonijiet f’termini ta’ temperatura (75 °C) u ta’ pori tal-filtrazzjoni (mhux iżgħar minn 0,2 mikrometri).

(6)

Dawk it-tekniki ta’ evaporazzjoni bil-vakwu jikkorrispondu għall-proċess tad-dealkoħolizzazzjoni “evaporazzjoni parzjali bil-vakwu” u “distillazzjoni”, kemm jekk użati waħedhom kif ukoll jekk flimkien, imsemmija fil-punti (a) u (c) tat-Taqsima E tal-Parti I tal-Anness VIII tar-Regolament (UE) Nru 1308/2013.

(7)

Abbażi ta’ dan, jixraq li jiżdied l-użu tal-evaporazzjoni parzjali bil-vakwu fil-punt 3.3 tal-Parti VI tal-Anness II tar-Regolament (UE) 2018/848 sabiex jiġu awtorizzati dawk l-użi fil-produzzjoni tal-inbid organiku dealkoħolizzat dment li l-inbid prodott ikollu qawwa alkoħolika skont il-volum li ma taqbiżx iż-0,5 % vol, it-temperatura użata ma taqbiżx il-75 °C, id-daqs tal-pori għall-filtrazzjoni ma jkunx iżgħar minn 0,2 mikrometri u li d-distillazzjoni tintuża f’vakwu.

(8)

Il-parti VI tal-Anness II tar-Regolament (UE) 2018/848 tirreferi għar-Regolamenti tal-Kummissjoni (KE) Nru 606/2009 (5) u (KE) Nru 607/2009 (6). Dawk ir-Regolamenti tħassru rispettivament bir-Regolamenti Delegati tal-Kummissjoni (UE) 2019/934 (7) u (UE) 2019/33 (8). Fl-interess taċ-ċarezza, jenħtieġ li jiġu aġġornati r-referenzi legali għal dawk l-atti.

(9)

Għalhekk, jenħtieġ li r-Regolament (UE) 2018/848 jiġi emendat kif xieraq,

ADOTTAT DAN IR-REGOLAMENT:

Artikolu 1

L-Anness II tar-Regolament (UE) 2018/848 huwa emendat f’konformità mal-Anness ta’ dan ir-Regolament.

Artikolu 2

Dan ir-Regolament għandu jidħol fis-seħħ fl-għoxrin jum wara dak tal-pubblikazzjoni tiegħu f’Il-Ġurnal Uffiċjali tal-Unjoni Ewropea.

Dan ir-Regolament għandu jorbot fl-intier tiegħu u japplika direttament fl-Istati Membri kollha.

Magħmul fi Brussell, it-13 ta’ Diċembru 2024.

Għall-Kummissjoni

Il-President

Ursula VON DER LEYEN

(1)   ĠU L 150, 14.6.2018, p. 1, ELI: http://data.europa.eu/eli/reg/2018/848/oj.

(2)  Ir-Regolament (UE) 2021/2117 tal-Parlament Ewropew u tal-Kunsill tat-2 ta’ Diċembru 2021 li jemenda r-Regolamenti (UE) Nru 1308/2013 li jistabbilixxi organizzazzjoni komuni tas-swieq fi prodotti agrikoli, (UE) Nru 1151/2012 dwar skemi tal-kwalità għal prodotti agrikoli u oġġetti tal-ikel, (UE) Nru 251/2014 dwar id-definizzjoni, id-deskrizzjoni, il-preżentazzjoni, it-tikkettar u l-protezzjoni tal-indikazzjonijiet ġeografiċi tal-prodotti tal-inbid aromatizzat u (UE) Nru 228/2013 li jistabbilixxi miżuri speċifiċi għall-agrikoltura fir-reġjuni ultraperiferiċi tal-Unjoni (ĠU L 435, 6.12.2021, p. 262, ELI: http://data.europa.eu/eli/reg/2021/2117/oj).

(3)  Ir-Regolament (UE) Nru 1308/2013 tal-Parlament Ewropew u tal-Kunsill tas-17 ta’ Diċembru 2013 li jistabbilixxi organizzazzjoni komuni tas-swieq fi prodotti agrikoli u li jħassar ir-Regolamenti tal-Kunsill (KEE) Nru 922/72, (KEE) Nru 234/79, (KE) Nru 1037/2001 u (KE) Nru 1234/2007 (ĠU L 347, 20.12.2013, p. 671, ELI: http://data.europa.eu/eli/reg/2013/1308/oj).

(4)  EGTOP final report on Wine II: https://agriculture.ec.europa.eu/farming/organic-farming/co-operation-and-expert-advice/egtop-reports_en.

(5)  Ir-Regolament tal-Kummissjoni (KE) Nru 606/2009 tal-10 ta’ Lulju 2009 li jistabbilixxi regoli ddettaljati għall-implimentazzjoni tar-Regolament tal-Kunsill (KE) Nru 479/2008 fir-rigward tal-kategoriji tal-prodotti tad-dwieli, il-prattiċi enoloġiċi u r-restrizzjonijiet applikabbli (ĠU L 193, 24.7.2009, p. 1, ELI: http://data.europa.eu/eli/reg/2009/606/oj).

(6)  Ir-Regolament tal-Kummissjoni (KE) Nru 607/2009 tal-14 ta’ Lulju 2009 li jistabbilixxi ċerti regoli dettaljati għall-implimentazzjoni tar-Regolament tal-Kunsill (KE) Nru 479/2008 fir-rigward tad-denominazzjonijiet tal-oriġini u l-indikazzjonijiet ġeografiċi protetti, termini tradizzjonali, it-tikkettar u l-preżentazzjoni ta’ ċerti prodotti fis-settur tal-inbid (ĠU L 193, 24.7.2009, p. 60, ELI: http://data.europa.eu/eli/reg/2009/607/oj).

(7)  Ir-Regolament Delegat tal-Kummissjoni (UE) 2019/934 tat-12 ta’ Marzu 2019 li jissupplimenta r-Regolament (UE) Nru 1308/2013 tal-Parlament Ewropew u tal-Kunsill f’dak li jirrigwarda ż-żoni ta’ vitikultura li fihom tista’ tiżdied il-qawwa alkoħolika, il-prattiki enoloġiċi awtorizzati u r-restrizzjonijiet applikabbli għall-produzzjoni u l-konservazzjoni tal-prodotti tad-dielja, il-persentaġġ minimu tal-alkoħol għall-prodotti sekondarji u r-rimi tagħhom, u l-pubblikazzjoni tal-fajls tal-OIV (ĠU L 149, 7.6.2019, p. 1, ELI: http://data.europa.eu/eli/reg_del/2019/934/oj).

(8)  Ir-Regolament Delegat tal-Kummissjoni (UE) 2019/33 tas-17 ta’ Ottubru 2018 li jissupplimenta r-Regolament (UE) Nru 1308/2013 tal-Parlament Ewropew u tal-Kunsill fir-rigward tal-applikazzjonijiet għall-protezzjoni ta’ denominazzjonijiet ta’ oriġini, indikazzjonijiet ġeografiċi u termini tradizzjonali fis-settur tal-inbid, il-proċedura ta’ oġġezzjoni, ir-restrizzjonijiet tal-użu, l-emendi għall-ispeċifikazzjonijiet tal-prodott, it-tħassir tal-protezzjoni, u t-tikkettar u l-preżentazzjoni (ĠU L 9, 11.1.2019, p. 2, ELI: http://data.europa.eu/eli/reg_del/2019/33/oj).

ANNESS

Il-Parti VI tal-Anness II tar-Regolament (UE) 2018/848 hija emendata kif ġej:

(1)

it-Taqsima 1.2. hija sostitwita b’dan li ġej:

“1.2.

 Għandhom japplikaw ir-Regolamenti Delegati tal-Kummissjoni (UE) 2019/934* u (UE) 2019/33**, ħlief kif espliċitament previst mod ieħor f’din il-Parti.

*

 Ir-Regolament Delegat tal-Kummissjoni (UE) 2019/934 tat-12 ta’ Marzu 2019 li jissupplimenta r-Regolament (UE) Nru 1308/2013 tal-Parlament Ewropew u tal-Kunsill f’dak li jirrigwarda ż-żoni ta’ vitikultura li fihom tista’ tiżdied il-qawwa alkoħolika, il-prattiki enoloġiċi awtorizzati u r-restrizzjonijiet applikabbli għall-produzzjoni u l-konservazzjoni tal-prodotti tad-dielja, il-persentaġġ minimu tal-alkoħol għall-prodotti sekondarji u r-rimi tagħhom, u l-pubblikazzjoni tal-fajls tal-OIV, (ĠU L 149, 7.6.2019, p. 1, ELI: http://data.europa.eu/eli/reg_del/2019/934/oj).

**

 Ir-Regolament Delegat tal-Kummissjoni (UE) 2019/33 tas-17 ta’ Ottubru 2018 li jissupplimenta r-Regolament (UE) Nru 1308/2013 tal-Parlament Ewropew u tal-Kunsill fir-rigward tal-applikazzjonijiet għall-protezzjoni ta’ denominazzjonijiet ta’ oriġini, indikazzjonijiet ġeografiċi u termini tradizzjonali fis-settur tal-inbid, il-proċedura ta’ oġġezzjoni, ir-restrizzjonijiet tal-użu, l-emendi għall-ispeċifikazzjonijiet tal-prodott, it-tħassir tal-protezzjoni, u t-tikkettar u l-preżentazzjoni (ĠU L 9, 11.1.2019, p. 2, ELI: http://data.europa.eu/eli/reg_del/2019/33/oj).”;

(2)

it-Taqsima 2.2. hija sostitwita b’dan li ġej:

“2.2.

 Il-prodotti u s-sustanzi awtorizzati f’konformità mal-Artikolu 24 għall-użu fil-produzzjoni organika biss jistgħu jintużaw għall-fabbrikazzjoni ta’ prodotti tas-settur tal-inbid, inkluż waqt il-prattiki enoloġiċi, il-proċessi u t-trattamenti, soġġett għall-kundizzjonijiet u r-restrizzjonijiet stabbiliti fir-Regolament (UE) Nru 1308/2013 u r-Regolament Delegat (UE) 2019/934, u b’mod partikolari fil-Parti A tal-Anness I tar-Regolament imsemmi l-aħħar.”;

(3)

it-Taqsima 3.1. hija sostitwita b’dan li ġej:

“3.1.

 Mingħajr preġudizzju għat-Taqsimiet 1 u 2 ta’ din il-Parti u għal projbizzjonijiet u restrizzjonijiet speċifiċi previsti fit-Taqsimiet 3.2., 3.3. u 3.4., għandhom ikunu permessi biss il-prattiki, il-proċessi u t-trattamenti enoloġiċi, inkluż ir-restrizzjonijiet previsti fl-Artikolu 80 u l-Artikolu 83(2) tar-Regolament (UE) Nru 1308/2013, fl-Artikoli 3, l-Artikoli 5 sa 9 u l-Artikoli 11 sa 13 tar-Regolament Delegat (UE) 2019/934, u fl-Annessi ta’ dawk ir-Regolamenti użati qabel l-1 ta’ Awwissu 2010.”;

(4)

fit-Taqsima 3.2., il-punti (b), (c), (d) u (e) huma sostitwiti b’dan li ġej:

“(b)

l-eliminazzjoni tad-diossidu tal-kubrit permezz ta’ proċessi fiżiċi kif imsemmi fl-entrata 5 tat-Tabella 1 tal-Parti A tal-Anness I tar-Regolament Delegat (UE) 2019/934;

(c)

trattament bl-elettrodijaliżi biex tiġi żgurata l-istabbilizzazzjoni tartarika tal-inbid kif imsemmi fl-entrata 10 tat-Tabella 1 tal-Parti A tal-Anness I tar-Regolament Delegat (UE) 2019/934;

(d)

korrezzjoni tal-kontenut tal-alkoħol fl-inbid kif imsemmi fl-entrata 12 tat-Tabella 1 tal-Parti A tal-Anness I tar-Regolament Delegat (UE) 2019/934;

(e)

trattament bi skambjaturi tal-katjoni għall-istabbilizzazzjoni tartarika tal-inbid kif imsemmi fl-entrata 13 tat-Tabella 1 tal-Parti A tal-Anness I tar-Regolament Delegat (UE) 2019/934.”;

(5)

it-Taqsima 3.3. hija sostitwita b’dan li ġej:

“3.3.

 L-użu tal-prattiki, il-proċessi u t-trattamenti enoloġiċi li ġejjin huwa permess bil-kundizzjonijiet li ġejjin:

(a)

trattamenti bis-sħana kif imsemmi fl-entrata 2 tat-Tabella 1 tal-Parti A tal-Anness I tar-Regolament Delegat (UE) 2019/934, dment li t-temperatura ma taqbiżx il-75 °C;

(b)

ċentrifugazzjoni u filtrazzjoni b’aġent filtranti inert jew mingħajru kif imsemmi fl-entrata 3 tat-Tabella 1 tal-Parti A tal-Anness I tar-Regolament Delegat (UE) 2019/934, dment li d-daqs tal-pori ma jkunx iżgħar minn 0,2 mikrometri;

(c)

evaporazzjoni parzjali bil-vakwu kif imsemmi fil-punt (a) tat-Taqsima E tal-Parti I tal-Anness VIII tar-Regolament (UE) Nru 1308/2013, kemm jekk użata waħedha kif ukoll jekk flimkien mad-distillazzjoni kif imsemmi fil-punt (d) ta’ din it-Taqsima, dment li l-evaporazzjoni parzjali bil-vakwu tintuża biss għall-produzzjoni tal-inbid dealkoħolizzat b’qawwa alkoħolika skont il-volum li ma taqbiżx iż-0,5 % vol, u li t-temperatura użata ma taqbiżx il-75 °C u li d-daqs tal-pori għall-filtrazzjoni ma jkunx iżgħar minn 0,2 mikrometri;

(d)

distillazzjoni kif imsemmija fil-punt (c) tat-Taqsima E tal-Parti I tal-Anness VIII tar-Regolament (UE) Nru 1308/2013, kemm jekk użata waħedha kif ukoll jekk flimkien mal-evaporazzjoni parzjali bil-vakwu kif imsemmi fil-punt (c) ta’ din it-Taqsima, dment li d-distillazzjoni tintuża biss għall-produzzjoni tal-inbid dealkoħolizzat b’qawwa alkoħolika skont il-volum li ma taqbiżx iż-0,5 % vol. u li tintuża f’vakwu u li t-temperatura użata ma taqbiżx il-75 °C u li d-daqs tal-pori għall-filtrazzjoni ma jkunx iżgħar minn 0,2 mikrometri.”;

(6)

it-Taqsima 3.4. hija sostitwita b’dan li ġej:

“3.4.

 Kull emenda introdotta wara l-1 ta’ Awwissu 2010, li tikkonċerna l-prattiki, il-proċessi u t-trattamenti enoloġiċi previsti fir-Regolament (UE) Nru 1308/2013 jew fir-Regolament Delegat (UE) 2019/934 tista’ tapplika għall-produzzjoni organika tal-inbid biss wara li dawk il-miżuri jkunu ġew inklużi kif permess f’din it-Taqsima u, jekk meħtieġ, wara evalwazzjoni f’konformità mal-Artikolu 24 ta’ dan ir-Regolament.”.

ELI: http://data.europa.eu/eli/reg_del/2025/405/oj

ISSN 1977-074X (electronic edition)

Top