ANNESS

Mudell ta’ dokument għall-arranġamenti ta’ kooperazzjoni dwar l-iskambju ta’ informazzjoni bejn l-awtoritajiet kompetenti tal-Istati Membri u l-awtoritajiet superviżorji f’pajjiżi terzi u l-infurzar tal-obbligi li jirriżultaw mir-Regolament (UE) 2023/1114 f’pajjiżi terzi

1.   Introduzzjoni

Deskrizzjoni tal-bażi legali ta’ kull awtorità firmatarja għall-iskambju ta’ informazzjoni sabiex tkun tista’ twettaq id-dmirijiet tagħha f’konformità mal-liġijiet u r-regolamenti tagħha relatati mas-swieq fil-kriptoassi.

Dikjarazzjoni li skont il-liġijiet u r-regolamenti li jikkostitwixxu l-bażi legali għall-iskambju ta’ informazzjoni, l-awtoritajiet firmatarji għandhom jipprovdu lil xulxin assistenza mutwa u reċiproka f’konformità mal-arranġamenti ta’ kooperazzjoni.

Dikjarazzjoni li d-dispożizzjonijiet tal-arranġamenti ta’ kooperazzjoni mhumiex maħsuba biex joħolqu obbligi legalment vinkolanti jew jieħdu post il-liġi domestika.

2.   Definizzjonijiet

Lista xierqa ta’ definizzjonijiet li jkopru t-termini użati fl-arranġamenti ta’ kooperazzjoni.

3.   Tip ta’ assistenza li għandha tingħata

Deskrizzjoni tat-tip ta’ assistenza li għandha tingħata f’konformità mal-Artikolu 94 tar-Regolament (UE) 2023/1114 bħal:

(a)	il-kisba ta’ informazzjoni miżmuma fil-fajls tal-awtorità li ssirilha t-talba;

(b)	il-kisba ta’ dikjarazzjonijiet jew informazzjoni minn kwalunkwe persuna;

(c)	il-kisba ta’ dokumenti minn persuni jew entitajiet inkluż permezz tat-twettiq ta’ spezzjonijiet fuq il-post;

(d)

il-kisba ta’ rekords tad-data dwar it-traffiku, sa fejn ikun permess mil-liġi nazzjonali u, fejn applikabbli, bl-assistenza tal-awtorità ġudizzjarja xierqa skont l-implimentazzjoni tal-Artikolu 94(3), punt (e), tar-Regolament (UE) 2023/1114 jew kwalunkwe setgħa ekwivalenti skont il-liġijiet tal-pajjiż terz rilevanti;

(e)	il-kisba jew l-assistenza fil-kisba tal-iffriżar jew is-sekwestru ta’ assi f’konformità mal-Artikolu 94(3), punt (f), tar-Regolament (UE) 2023/1114 jew kwalunkwe setgħa ekwivalenti skont il-liġijiet tal-pajjiż terz rilevanti;

(f)

il-kisba jew l-assistenza fil-kisba ta’ waqfien temporanju ta’ kwalunkwe prattika jew kondotta li titqies li tmur kontra l-liġijiet u r-regolamenti relatati mas-swieq fil-kriptoassi f’konformità mal-Artikolu 94(1), punt (v), tar-Regolament (UE) 2023/1114 jew kwalunkwe setgħa ekwivalenti skont il-liġijiet tal-pajjiż terz rilevanti;

4.   Dispożizzjonijiet ġenerali - ċaħda ta’ assistenza

Lista ta’ każijiet li fihom it-talbiet għal kooperazzjoni jistgħu jiġu miċħuda mill-awtoritajiet kompetenti għandha tinkludi:

(a)	it-talba ma ssirx f’konformità mal-arranġamenti ta’ kooperazzjoni;

(b)	it-talba tkun teħtieġ li l-awtorità li ssirilha t-talba taġixxi b’mod li tikser il-liġi domestika;

(c)	il-komunikazzjoni tal-informazzjoni rilevanti tista’ taffettwa ħażin is-sigurtà tal-ġuriżdizzjoni indirizzata, b’mod partikolari l-ġlieda kontra t-terroriżmu jew reati serji oħra;

(d)	il-konformità mat-talba tista’ taffettwa ħażin l-investigazzjoni proprja, bħal investigazzjoni kriminali, mill-awtorità li ssirilha t-talba jew mill-attivitajiet ta’ infurzar tagħha

(e)	il-proċedimenti ġudizzjarji jkunu diġà nbdew fir-rigward tal-istess azzjonijiet u kontra l-istess persuni quddiem l-awtoritajiet rilevanti tal-ġuriżdizzjoni indirizzata;

(f)

tkun diġà ngħatat sentenza finali fir-rigward tal-istess persuni għall-istess azzjonijiet fil-ġuriżdizzjoni indirizzata, sakemm l-awtorità rikjedenti ma tkunx tista’ turi li l-għajnuna jew is-sanzjonijiet mitluba fi kwalunkwe proċediment mibdi mill-awtorità rikjedenti ma jkunux tal-istess natura jew jikkostitwixxu dupplikazzjoni ta’ kwalunkwe għajnuna jew sanzjoni miksuba fil-ġuriżdizzjoni tal-awtorità li ssirilha t-talba.

L-assistenza ma għandhiex tiġi miċħuda għar-raġuni li t-tip ta’ kondotta taħt investigazzjoni ma tikkostitwixxix ksur tal-liġijiet u r-regolamenti relatati mas-swieq fil-kriptoassi tal-ġuriżdizzjoni tal-awtorità li tirċievi t-talba.

5.   Kif jintbagħtu u jiġu pproċessati t-talbiet għall-assistenza

Deskrizzjoni tal-proċedura biex jintbagħtu u jiġu pproċessati t-talbiet għall-assistenza.

6.   Użu permessibbli tal-informazzjoni

Deskrizzjoni tar-regoli dwar l-użu permissibbli tal-informazzjoni f’konformità mal-Artikolu 107(5) tar-Regolament (UE) 2023/1114 u li l-informazzjoni pprovduta għandha tkun intiża għat-twettiq tal-kompiti tal-awtorità rikjedenti biex tiżgura l-konformità u l-infurzar tal-liġijiet u r-regolamenti relatati mas-swieq fil-kriptoassi. L-informazzjoni skambjata għandha tintuża biss għall-finijiet stabbiliti fit-talba għall-assistenza.

Jekk awtorità rikjedenti jkollha l-intenzjoni li tuża l-informazzjoni pprovduta skont l-arranġamenti ta’ kooperazzjoni għal kwalunkwe għan ieħor għajr dak iddikjarat f’din it-taqsima, hija għandha tikseb il-kunsens minn qabel tal-awtorità li ssirilha t-talba.

7.   Ipproċessar ta’ data personali

Indikazzjoni li l-ipproċessar ta’ data personali għandu jitwettaq f’konformità sħiħa mar-Regolament (UE) 2016/679.

8.   Restrizzjonijiet tal-kunfidenzjalità

Deskrizzjoni tar-regoli dwar il-kunfidenzjalità ta’ kwalunkwe informazzjoni żvelata, riċevuta, skambjata jew trażmessa. Id-deskrizzjoni għandha tinkludi dawn li ġejjin:

(a)

l-informazzjoni kollha skambjata bejn l-awtoritajiet firmatarji skont l-arranġamenti ta’ kooperazzjoni li tikkonċerna n-negozji jew il-kundizzjonijiet operazzjonali jew affarijiet ekonomiċi jew personali oħra għandha titqies bħala kunfidenzjali u għandha tkun soġġetta għar-rekwiżiti tas-segretezza professjonali, għajr fejn l-awtorità li ssirilha t-talba tiddikjara, fil-ħin tat-trażmissjoni tal-informazzjoni, li tista’ tiġi żvelata l-informazzjoni, jew fejn tali żvelar ikun meħtieġ għal proċedimenti legali;

(b)

l-obbligu tas-segretezza professjonali japplika għall-persuni fiżiċi jew ġuridiċi kollha li jaħdmu jew li ħadmu għall-awtoritajiet firmatarji. l-informazzjoni koperta mis-segretezza professjonali ma tistax tiġi żvelata lil xi persuna fiżika jew ġuridika jew lil xi awtorità oħra għajr bis-saħħa tad-dispożizzjonijiet stabbiliti mid-dritt tal-Unjoni jew mil-liġi nazzjonali, jew bis-saħħa tad-dispożizzjonijiet stabbiliti fil-liġijiet tal-pajjiż terz rilevanti tal-anqas ekwivalenti għal tali dispożizzjonijiet.

L-informazzjoni skambjata ma għandhiex tiġi żvelata lil xi awtorità jew entità oħra għajr bil-qbil minn qabel tal-awtorità firmatarja li ipprovdietha.

9.   Dispożizzjonijiet ġenerali — identifikazzjoni ta’ punt ta’ kuntatt

Biex tiġi ffaċilitata l-kooperazzjoni skont l-arranġamenti, id-deżinjazzjoni ta’ punti ta’ kuntatt mill-awtoritajiet firmatarji.

10.   Dispożizzjonijiet ġenerali — klawsola ta’ reviżjoni

Reviżjoni perjodika mill-awtoritajiet firmatarji tal-funzjonament u l-effettività tal-arranġamenti ta’ kooperazzjoni bil-ħsieb li jitwessa’ jew jinbidel il-kamp ta’ applikazzjoni jew it-tħaddim tal-arranġamenti, fejn meħtieġ.

11.   Dispożizzjonijiet oħra — Mixellanji