(1)

L-infezzjoni bil-virus tal-pesta tar-ruminanti żgħar hija marda infettiva li taffettwa lill-annimali kaprini u ovini u jista’ jkollha impatt serju fuq il-popolazzjoni tal-annimali kkonċernati u fuq il-profittabbiltà tal-biedja, u tikkawża tfixkil fil-movimenti tal-kunsinni ta’ dawk l-annimali u tal-prodotti tagħhom fl-Unjoni u fl-esportazzjonijiet lejn il-pajjiżi terzi.

(2)

F’każ ta’ tifqigħa tal-infezzjoni bil-virus tal-pesta tar-ruminanti żgħar fl-annimali kaprini jew ovini, hemm riskju serju li dik il-marda tinxtered fi stabbilimenti oħra ta’ annimali kaprini jew ovini.

(3)

Ir-Regolament Delegat tal-Kummissjoni (UE) 2020/687 (2) jissupplimenta r-regoli għall-kontroll tal-mard elenkat imsemmi fl-Artikolu 9(1), il-punti (a), (b) u (c), tar-Regolament (UE) 2016/429, u definit bħala mard tal-kategoriji A, B u C fir-Regolament ta’ Implimentazzjoni tal-Kummissjoni (UE) 2018/1882 (3). B’mod partikolari, l-Artikoli 21 u 22 tar-Regolament Delegat (UE) 2020/687 jipprevedu l-istabbiliment ta’ żona ristretta f’każ ta’ tifqigħa ta’ marda tal-kategorija A, inkluż l-infezzjoni bil-virus tal-pesta tar-ruminanti żgħar, u ċerti miżuri li għandhom jiġu applikati fiha. Barra minn hekk, l-Artikolu 21(1) ta’ dak ir-Regolament Delegat jipprevedi li ż-żona ristretta trid tkun tinkludi żona ta’ protezzjoni, żona ta’ sorveljanza, u, jekk ikun meħtieġ, żoni ristretti ulterjuri madwar iż-żoni ta’ protezzjoni u ta’ sorveljanza jew maġenbhom.

(4)

Id-Deċiżjoni ta’ Implimentazzjoni tal-Kummissjoni 2025/638 (4) ġiet adottata abbażi tar-Regolament (UE) 2016/429 u tistabbilixxi ċerti miżuri ta’ emerġenza relatati mal-infezzjoni bil-virus tal-pesta tar-ruminanti żgħar fir-Rumanija b’reazzjoni għal tifqigħa kkonfermata fil-5 ta’ Marzu 2025 fil-kontea ta’ Bihor. B’mod iktar partikolari, id-Deċiżjoni ta’ Implimentazzjoni (UE) 2025/638 tipprevedi li ż-żoni ta’ protezzjoni, iż-żoni ta’ sorveljanza u ż-żoni ristretti ulterjuri li jrid jistabbilixxi dak l-Istat Membru, f’konformità mar-Regolament Delegat (UE) 2020/687, wara t-tifqigħa ta’ dik il-marda, iridu jinkludu mqar iż-żoni elenkati fl-Anness ta’ dik id-Deċiżjoni ta’ Implimentazzjoni.

(5)

Barra minn hekk, id-Deċiżjoni ta’ Implimentazzjoni (UE) 2025/638 tistabbilixxi ż-żoni fit-territorju tar-Rumanija fejn iridu jiġu applikati miżuri ulterjuri, bħal dawk applikabbli għaż-żoni ristretti ulterjuri, kif previst fir-Regolament Delegat (UE) 2020/687, u fejn il-movimenti tal-annimali ovini u kaprini barra mill-perimetri esterni ta’ dawk iż-żoni, iridu jiġu pprojbiti, għal ċertu perjodu ta’ żmien, wara l-iskadenza tad-dati għall-miżuri previsti fiż-żoni ta’ protezzjoni u ta’ sorveljanza.

(6)

Sa mid-data tal-adozzjoni tad-Deċiżjoni ta’ Implimentazzjoni (UE) 2025/638; ir-Rumanija infurmat lill-Kummissjoni li s-sorveljanza tal-mard fil-kontea ta’ Arad ma uriet l-ebda evidenza ta’ ċirkulazzjoni tal-marda f’dik iż-żona, filwaqt li s-sitwazzjoni epidemjoloġika fil-kumplament tal-pajjiż tibqa’ inċerta u d-data tas-sorveljanza tal-mard disponibbli għadha mhix biżejjed biex issir evalwazzjoni tas-sitwazzjoni epidemjoloġika fir-rigward tal-infezzjoni bil-virus tal-pesta tar-ruminanti żgħar.

(7)

Fid-dawl tas-sitwazzjoni epidemjoloġika favorevoli fil-kontea ta’ Arad, u sabiex jiġi evitat kwalunkwe piż addizzjonali minħabba restrizzjonijiet bla bżonn tal-movimenti tal-annimali ovini u kaprini, minn dik iż-żona lejn il-bqija tar-Rumanija, jeħtieġ li din il-kontea titneħħa miż-żoni fir-Rumanija fejn jenħtieġ li japplikaw miżuri ulterjuri, bħal dawk applikabbli għal żoni ristretti ulterjuri, kif previst fir-Regolament Delegat (UE) 2020/687, u minn fejn il-movimenti tal-annimali ovini u kaprini barra mill-perimetri esterni ta’ dawk iż-żoni jenħtieġ li jiġu pprojbiti, għal ċertu perjodu ta’ żmien, wara l-iskadenza tad-dati għall-miżuri li japplikaw fiż-żoni kollha ta’ protezzjoni u ta’ sorveljanza, kif elenkati fl-Anness II tad-Deċiżjoni ta’ Implimentazzjoni 2025/638.

(8)

Barra minn hekk, fid-dawl tan-nuqqas ta’ data ta’ sorveljanza suffiċjenti, l-inċertezza kontinwa u ż-żmien stmat meħtieġ biex tiġi vvalutata s-sitwazzjoni epidemjoloġika fil-bqija tar-Rumanija, jeħtieġ li l-projbizzjoni tal-movimenti tal-annimali ovini u kaprini mit-territorju kollu tar-Rumanija tiġi estiża lejn Stati Membri oħra, sat-30 ta’ Settembru 2025.

(9)

Minħabba l-urġenza tas-sitwazzjoni epidemjoloġika fl-Unjoni fir-rigward tat-tixrid tal-infezzjoni bil-virus tal-pesta tar-ruminanti żgħar, u l-ħtieġa li l-marda ma tinxteridx mill-istabbilimenti affettwati fir-Rumanija lejn partijiet oħra ta’ dak l-Istat Membru jew lejn Stati Membri oħra, jenħtieġ li l-miżuri stabbiliti f’din id-Deċiżjoni ta’ Implimentazzjoni japplikaw malajr kemm jista’ jkun.

(10)

Il-miżuri previsti f’din id-Deċiżjoni huma f’konformità mal-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,

1.

fl-Artikolu 1, il-punt (c), id-data “id-9 ta’ Ġunju 2025” hija sostitwita bid-data “it-30 ta’ Settembru 2025”;

2.

L-Anness II huwa sostitwit bit-test stabbilit fl-Anness ta’ din id-Deċiżjoni.