(1)

Id-Direttiva tal-Kummissjoni 2006/74/KE (2) approvat is-sustanza attiva triklopir sal-31 ta’ Mejju 2017. Id-Direttiva tal-Kummissjoni 2008/127/KE (3) approvat is-sustanzi attivi silikat tal-aluminju, l-aċidi xaħmin u ż-żjut tal-pjanti / żejt tal-kolza sal-31 ta’ Awwissu 2019.

(2)

Skont l-Artikolu 78(3) tar-Regolament (KE) Nru 1107/2009, is-sustanzi attivi inklużi fl-Anness I tad-Direttiva tal-Kunsill 91/414/KEE (4) jitqiesu li ġew approvati skont ir-Regolament (KE) Nru 1107/2009.

(3)

Ir-Regolament ta’ Implimentazzjoni tal-Kummissjoni (UE) Nru 828/2013 (5) approva s-sustanza attiva emamektin sat-30 ta’ April 2024. Ir-Regolament ta’ Implimentazzjoni tal-Kummissjoni (UE) Nru 496/2014 (6) approva s-sustanza attiva aċekinoċil sal-31 ta’ Awwissu 2024. Ir-Regolament ta’ Implimentazzjoni tal-Kummissjoni (UE) 2017/1114 (7) ġedded l-approvazzjoni tas-sustanza attiva pendimetalina sal-31 ta’ Awwissu 2024.

(4)

L-approvazzjonijiet tas-sustanzi attivi silikat tal-aluminju, l-aċidi xaħmin, iż-żjut tal-pjanti / żejt tal-kolza u triklopir, rispettivament, huma elenkati fil-Parti A tal-Anness tar-Regolament ta’ Implimentazzjoni tal-Kummissjoni (UE) Nru 540/2011 (8). L-approvazzjonijiet tas-sustanzi attivi aċekinoċil u emamektin, rispettivament, huma elenkati fil-Parti B tal-Anness tar-Regolament ta’ Implimentazzjoni tal-Kummissjoni (UE) Nru 540/2011. L-approvazzjoni tas-sustanza attiva pendimetalina hija elenkata fil-Parti E tal-Anness tar-Regolament ta’ Implimentazzjoni tal-Kummissjoni (UE) Nru 540/2011.

(5)

Ir-Regolament ta’ Implimentazzjoni tal-Kummissjoni (UE) 2020/2007 (9) jestendi l-perjodi ta’ approvazzjoni rispettivi tas-sustanzi attivi aċekinoċil, emamektin u pendimetalina sat-30 ta’ Novembru 2024.

(6)

Ir-Regolament ta’ Implimentazzjoni tal-Kummissjoni (UE) 2023/1446 (10) jestendi l-perjodi ta’ approvazzjoni rispettivi tas-sustanzi attivi silikat tal-aluminju, aċidi xaħmin, żjut tal-pjanti / żejt tal-kolza sal-15 ta’ Diċembru 2024.

(7)

Ir-Regolament ta’ Implimentazzjoni tal-Kummissjoni (UE) 2023/689 (11) jestendi l-perjodu ta’ approvazzjoni tas-sustanza attiva triklopir sal-15 ta’ Diċembru 2024.

(8)

L-applikazzjonijiet u l-fajls supplimentari għat-tiġdid tal-approvazzjonijiet ta’ kull waħda minn dawn is-sustanzi attivi ġew sottomessi, f’konformità mar-Regolament ta’ Implimentazzjoni tal-Kummissjoni (UE) 2020/1740 (12), 3 snin qabel id-data tal-iskadenza estiża tas-sustanzi attivi. Fit-23 ta’ Mejju 2023, fis-6 ta’ Diċembru 2016, fid-29 ta’ Frar 2016, fit-23 ta’ Awwissu 2022, fl-4 ta’ Ġunju 2018, fid-9 ta’ Diċembru 2015, fl-1 ta’ Frar 2022, fid-29 ta’ Settembru 2016 u fl-4 ta’ Settembru 2014 rispettivament, l-Istati Membri relaturi għall-aċekinoċil, għas-silikat tal-aluminju, għall-emamektin, għall-aċidi xaħmin C7 sa C20, għall-pendimetalina, għaż-żjut tal-pjanti / żejt tal-kolza u għat-triklopir, rispettivament infurmaw lill-Istat Membru korelatur, lill-Kummissjoni u lill-Awtorità Ewropea dwar is-Sigurtà fl-Ikel (“l-Awtorità”) li kienu vvalutaw l-ammissibbiltà, b’mod partikolari l-kompletezza u t-tempestività, ta’ kull waħda minn dawn l-applikazzjonijiet, u kkonkludew li kienu ammissibbli.

(9)

Fir-rigward tat-tiġdid tal-approvazzjonijiet tas-sustanzi attivi aċekinoċil, emamektin, l-aċidi xaħmin C7 sa C20 u pendimetalina, rispettivament, l-Awtorità teħtieġ żmien addizzjonali biex tikkonkludi l-valutazzjoni tar-riskju mwettqa għal dawn is-sustanzi, inkluż, meta jkun xieraq, konsultazzjoni pubblika u konsultazzjoni tal-esperti. Huwa meħtieġ iktar żmien biex il-Kummissjoni tadotta d-deċiżjoni li tirriżulta dwar il-ġestjoni tar-riskju.

(10)

Għas-sustanzi attivi silikat tal-aluminju, żjut tal-pjanti / żejt tal-kolza u triklopir, l-Awtorità ssottomettiet il-konklużjoni tagħha lill-applikant, lill-Istati Membri u lill-Kummissjoni. Il-Kummissjoni ppreżentat rapport tat-tiġdid u abbozz ta’ Regolament dwar it-tiġdid tal-approvazzjonijiet ta’ dawn is-sustanzi attivi lill-Kumitat Permanenti dwar il-Pjanti, l-Annimali, l-Ikel u l-Għalf.

(11)

Peress li x’aktarx li l-ebda deċiżjoni dwar it-tiġdid tal-approvazzjoni ta’ dawn is-sustanzi attivi mhi se tkun tista’ tittieħed qabel l-iskadenza tal-perjodi ta’ approvazzjoni rispettivi tagħhom fil-15 ta’ Novembru 2024, fit-30 ta’ Novembru 2024 u fil-15 ta’ Diċembru 2024, u minħabba li r-raġunijiet għad-dewmien fil-proċeduri tat-tiġdid mhumiex fil-kontroll tal-applikanti rispettivi, jenħtieġ li l-perjodi ta’ approvazzjoni ta’ dawk is-sustanzi attivi jiġu estiżi sabiex ikunu jistgħu jitlestew il-valutazzjonijiet meħtieġa u sabiex jiġu ffinalizzati l-proċeduri rispettivi dwar it-tiġdid tal-approvazzjoni.

(12)

Billi l-Awtorità teħtieġ żmien addizzjonali biex tasal għal konklużjoni dwar il-valutazzjoni tar-riskju tas-sustanzi attivi aċekinoċil, emamektin u l-aċidi xaħmin C7 sa C20, jenħtieġ li d-durata tal-estensjoni tal-perjodu ta’ approvazzjoni għal dawn is-sustanzi attivi tiġi stabbilita għal 23 xahar u ġimagħtejn. Għas-sustanza attiva pendimetalina, huma meħtieġa xahrejn addizzjonali biex tiġi ffinalizzata l-konsultazzjoni pubblika skont l-Artikolu 12 tar-Regolament ta’ Implimentazzjoni tal-Kummissjoni (UE) 2020/1740, għaldaqstant jenħtieġ li l-estensjoni tal-perjodu ta’ approvazzjoni għal din is-sustanza attiva tiġi stabbilita għal 25 xahar u ġimagħtejn.

(13)

Fir-rigward tas-sustanzi attivi silikat tal-aluminju, żjut tal-pjanti / żejt tal-kolza u triklopir, l-għoti ta’ opinjoni tal-Kumitat Permanenti dwar il-Pjanti, l-Annimali, l-Ikel u l-Għalf għadu pendenti, u fid-dawl taż-żmien meħtieġ biex titwettaq kull proċedura tat-tiġdid, jenħtieġ li d-durata tal-estensjoni tal-perjodi ta’ approvazzjoni għal dawk is-sustanzi attivi jiġi stabbilit għal 15-il xahar u ġimagħtejn u għalhekk jenħtieġ li r-Regolament ta’ Implimentazzjoni (UE) Nru 540/2011 jiġi emendat kif xieraq.

(14)

F’każ li l-Kummissjoni tadotta Regolament li jipprevedi li l-approvazzjoni ta’ sustanza attiva msemmija fl-Anness ta’ dan ir-Regolament ma tiġġeddidx, il-Kummissjoni tiffissa d-data tal-iskadenza fid-data tad-dħul fis-seħħ ta’ dak ir-Regolament jew fl-istess data kif kienet qabel l-adozzjoni ta’ dan ir-Regolament, skont liema data tiġi l-aħħar. F’każ li l-Kummissjoni tadotta Regolament li jipprevedi t-tiġdid tal-approvazzjoni ta’ sustanza attiva msemmija fl-Anness ta’ dan ir-Regolament, il-Kummissjoni tistabbilixxi l-eqreb data ta’ applikazzjoni possibbli kif ikun xieraq skont iċ-ċirkostanzi.

(15)

Il-miżuri previsti f’dan ir-Regolament huma f’konformità mal-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,