(1)

Ir-Regolament (UE) 2015/2283 jipprevedi li l-ikel il-ġdid awtorizzat u inkluż fil-lista tal-Unjoni tal-ikel ġdid biss jista’ jiġi introdott fis-suq fl-Unjoni.

(2)

Skont l-Artikolu 8 tar-Regolament (UE) 2015/2283, ir-Regolament ta’ Implimentazzjoni tal-Kummissjoni (UE) 2017/2470 (2) stabbilixxa lista tal-Unjoni tal-ikel ġdid.

(3)

Il-lista tal-Unjoni stabbilita fl-Anness tar-Regolament ta’ Implimentazzjoni (UE) 2017/2470 tinkludi l-proteini parzjalment idrolizzati mir-residwi tax-xgħir (Hordeum vulgare) u tar-ross (Oryza sativa) bħala ikel ġdid awtorizzat.

(4)

Ir-Regolament ta’ Implimentazzjoni tal-Kummissjoni (UE) 2023/2851 (3) awtorizza l-introduzzjoni fis-suq tal-proteini parzjalment idrolizzati mir-residwi tax-xgħir (Hordeum vulgare) u tar-ross (Oryza sativa) bħala ikel ġdid għall-użu f’għadd ta’ ikel differenti għall-popolazzjoni ġenerali.

(5)

Fis-6 ta’ Frar 2024, il-kumpanija Evergrain LLC (“l-applikant”) ressqet applikazzjoni lill-Kummissjoni f’konformità mal-Artikolu 10(1) tar-Regolament (UE) 2015/2283 għal bidla fir-rekwiżiti speċifiċi tat-tikkettar tal-ikel ġdid “Proteini parzjalment idrolizzati mir-residwi tax-xgħir u tar-ross”. L-applikant talab li jinbidlu r-rekwiżiti speċifiċi tat-tikkettar, b’mod partikolari d-deżinjazzjoni tal-ikel ġdid għal “Proteini idrolizzati mix-xgħir u mir-ross”.

(6)

Ir-rekwiżit oriġinali tat-tikkettar kien jirreferi għal “Proteini parzjalment idrolizzati mir-residwi tax-xgħir u r-ross”. L-applikant iqis li l-bidla tad-deżinjazzjoni hija meħtieġa minħabba li l-kelma “parzjalment” mhijiex terminu definit sew, b’mod partikolari għall-konsumatur medju, li ma jkunx jaf sa liema punt il-proteini jkunu idrolizzati, speċjalment meta mqabbla ma’ proteini oħra tal-pjanti. L-applikant jindika wkoll li l-kelma “residwi” ma tintużax għal proteini ġodda awtorizzati oħra li jiġu pproċessati b’mod simili, u għalhekk iqis li dan jista’ joħloq konfużjoni jekk din tintuża għal dan l-ikel ġdid. Barra minn hekk, l-applikant jindika wkoll li meta tiġi pproċessata l-materja prima tax-xgħir u tar-ross, l-ewwel pass ikun li jitneħħa l-lamtu u dan huwa l-istess bħall-proċess użat għal kwalunkwe proteina tal-pjanti oħra.

(7)

Il-Kummissjoni tqis li l-aġġornament mitlub tal-lista tal-Unjoni dwar il-bidla fir-rekwiżiti speċifiċi tat-tikkettar, partikolarment id-deżinjazzjoni tal-ikel ġdid “Proteini parzjalment idrolizzati mir-residwi tax-xgħir u tar-ross” kif proposta mill-applikant, mhuwiex mistenni li jkollu effett fuq is-saħħa tal-bniedem u li mhijiex meħtieġa evalwazzjoni tas-sikurezza mill-Awtorità Ewropea dwar is-Sigurtà fl-Ikel f’konformità mal-Artikolu 10(3) tar-Regolament (UE) 2015/2283. Abbażi tal-ġustifikazzjoni pprovduta mill-applikant, il-Kummissjoni hija tal-fehma li l-kelma “residwi” tista’ titħalla barra mid-deżinjazzjoni tal-ikel ġdid għal skopijiet ta’ tikkettar. Madankollu, il-Kummissjoni ma taqbilx mat-tneħħija tal-kelma “parzjalment” mid-denominazzjoni tal-ikel ġdid. F’konformità mar-regoli dwar it-tikkettar, b’mod partikolari l-Artikolu 10(2), il-punt (g), tar-Regolament (UE) 2015/2283, jenħtieġ li r-rekwiżiti speċifiċi tat-tikkettar ma jqarrqux bil-konsumatur. Barra minn hekk, skont l-Artikolu 7 tar-Regolament (UE) Nru 1169/2011 tal-Parlament Ewropew u tal-Kunsill (4), jenħtieġ li l-informazzjoni dwar l-ikel ma tqarraqx bin-nies, b’mod partikolari fir-rigward tal-karatteristiċi tal-ikel u, fost affarijiet oħra, il-proprjetajiet u l-kompożizzjoni tiegħu. Filwaqt li jitqies li l-grad ta’ idroliżi tal-ikel ġdid huwa ta’ 1-7 %, il-Kummissjoni tqis li jenħtieġ li l-kelma “parzjalment” tinżamm fid-denominazzjoni tal-ikel ġdid. Barra minn hekk, jekk l-applikant jixtieq jinforma aktar lill-konsumatur dwar il-grad tal-idroliżi, jista’ jindika din l-informazzjoni b’mod volontarju fuq it-tikketta tal-prodott f’konformità mal-Artikolu 36 tar-Regolament (UE) Nru 1169/2011. Għalhekk, id-deżinjazzjoni tal-ikel il-ġdid fuq it-tikkettar tal-oġġetti tal-ikel li fihom minn dan l-ikel jenħtieġ li tkun “Proteini parzjalment idrolizzati mix-xgħir u mir-ross”.

(8)

L-informazzjoni pprovduta fl-applikazzjoni tagħti biżżejjed raġunijiet biex jiġi stabbilit li l-bidliet fir-rekwiżiti speċifiċi tat-tikkettar tal-ikel ġdid huma f’konformità mal-kundizzjonijiet tal-Artikolu 12 tar-Regolament (UE) 2015/2283 u jenħtieġ li jiġu approvati.

(9)

Għalhekk, l-Anness tar-Regolament ta’ Implimentazzjoni (UE) 2017/2470 jenħtieġ li jiġi emendat skont dan.

(10)

Il-miżuri previsti f’dan ir-Regolament huma skont l-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,