(1)

Skont l-Artikolu 56(1) tar-Regolament (UE) 2023/1114, il-kriterji stabbiliti fl-Artikolu 43(1) ta’ dan ir-Regolament għall-klassifikazzjoni tat-tokens irreferenzjati ma’ assi bħala tokens irreferenzjati ma’ assi sinifikanti għandhom japplikaw ukoll għall-klassifikazzjoni tat-tokens tal-flus elettroniċi bħala tokens tal-flus elettroniċi sinifikanti. Għalhekk, huwa meħtieġ li jiġu speċifikati aktar il-kriterji msemmija fl-Artikolu 43(1), il-punti (e) u (f), tar-Regolament (UE) 2023/1114 anki fir-rigward tat-tokens tal-flus elettroniċi.

(2)

Sabiex l-Awtorità Bankarja Ewropea (EBA) tkun tista’ tiddetermina jekk l-attivitajiet tal-emittent tat-token irreferenzjat mal-assi jew tat-token tal-flus elettroniċi ikunux sinifikanti fuq skala internazzjonali barra mill-Unjoni, u jekk it-tokens irreferenzjati ma’ assi jew it-tokens tal-flus elettroniċi jew l-emittenti tagħhom għandhomx jitqiesu bħala interkonnessi mas-sistema finanzjarja, huwa meħtieġ li ssir distinzjoni bejn l-indikaturi ewlenin u dawk anċillari għal tali determinazzjoni. Jenħtieġ li l-indikaturi ewlenin ikopru l-aktar elementi rilevanti tat-tokens irreferenzjati ma’ assi sinifikanti jew tat-tokens tal-flus elettroniċi sinifikanti. Jenħtieġ li l-indikaturi anċillari jiġu vvalutati meta l-valutazzjoni tal-indikaturi ewlenin mill-EBA ma tippermettix lill-EBA tiddetermina b’mod konklużiv li l-kriterji msemmija fl-Artikolu 43(1), il-punti (e) u (f), tar-Regolament (UE) 2023/1114 ikunu ġew issodisfati. L-eżitu tal-valutazzjoni tas-sinifikat jenħtieġ li jkun soġġett għal valutazzjoni olistika taż-żewġ tipi ta’ indikaturi.

(3)

Fir-rigward tal-valutazzjoni tal-kriterju tas-sinifikat tal-attivitajiet tal-emittent fuq skala internazzjonali barra mill-Unjoni, inkluż l-użu tat-token irreferenzjat ma’ assi jew tat-token tal-flus elettronċi għal pagamenti u rimessi, kif imsemmi fl-Artikolu 43(1), il-punt (e), tar-Regolament (UE) 2023/1114, jenħtieġ li l-EBA tuża indikaturi ewlenin marbuta ma’ attivitajiet transfruntiera bejn l-Unjoni u pajjiżi terzi, mad-daqs tat-token ikkonċernat u mal-attivitajiet tal-emittent fil-livell globali.

(4)

It-tranżazzjonijiet transfruntiera, b’mod partikolari dawk li huma assoċjati ma’ użi bħala mezz ta’ skambju, huma t-tranżazzjonijiet bid-dimensjoni internazzjonali li huma l-aktar probabbli li joħolqu riskji għall-istabbiltà finanzjarja, it-trażmissjoni tal-politika monetarja u s-sovranità monetarja tal-Unjoni. Dawk it-tranżazzjonijiet jirriflettu wkoll l-attività internazzjonali ta’ emittent ta’ token irreferenzjat ma’ assi jew ta’ token tal-flus elettroniċi fuq skala internazzjonali barra mill-Unjoni fir-rigward tal-użi tagħhom għal pagamenti u rimessi. Għalhekk, jenħtieġ li l-EBA tikkunsidra l-indikaturi tas-sinifikat tas-sehem mis-suq tal-valur tat-tranżazzjonijiet transfruntiera f’token irreferenzjat ma’ assi jew token tal-flus elettroniċi lejn u mill-Unjoni u s-sinifikat tas-sehem mis-suq stmat tal-valur ta’ tali tranżazzjonijiet li huma assoċjati mal-użi ta’ tali tokens bħala mezz ta’ skambju. Jenħtieġ li l-indikatur tas-sinifikat tas-sehem mis-suq tal-valur tat-tranżazzjonijiet transfruntiera f’token irreferenzjat ma’ assi jew token tal-flus elettroniċi, ikompli jinqasam f’żewġ subindikaturi separati marbuta ma’ tranżazzjonijiet li jidħlu u tranżazzjonijiet li joħorġu, billi l-effetti ta’ kull tip ta’ tranżazzjoni fuq l-istabbiltà finanzjarja u s-sovranità monetarja jistgħu jkunu differenti.

(5)

Sabiex tkopri l-aspett mhux transfruntier tas-sinifikat tal-attivitajiet tal-emittent fuq skala internazzjonali, jenħtieġ li l-EBA tqis ukoll l-indikaturi ewlenin dwar il-kapitalizzazzjoni tas-suq globali ta’ token irreferenzjat ma’ assi jew ta’ token tal-flus elettroniċi, u dwar il-kapitalizzazzjoni tas-suq globali tat-tokens irreferenzjati ma’ assi u tat-tokens tal-flus elettroniċi kollha maħruġa mill-emittent. Jenħtieġ li l-kapitalizzazzjoni tas-suq fuq skala internazzjonali ta’ token tinftiehem li tinkludi l-istess token maħruġ barra mill-Unjoni sabiex issir distinzjoni bejn dik il-kapitalizzazzjoni u l-kapitalizzazzjoni tas-suq imsemmija fl-Artikolu 43(1), il-punt (b), tar-Regolament (UE) 2023/1114.

(6)

Fir-rigward tal-valutazzjoni tal-kriterju tas-sinifikat tal-interkonnettività tat-tokens irreferenzjati ma’ assi jew tat-tokens tal-flus elettroniċi jew tal-emittenti tagħhom mas-sistema finanzjarja, kif imsemmi fl-Artikolu 43(1), il-punt (f), tar-Regolament (UE) 2023/1114, jenħtieġ li l-indikaturi jkopru l-interkonnettività diretta u indiretta bejn it-tokens u l-emittenti tagħhom u s-sistema finanzjarja. Kemm interkonnettività diretta kif ukoll indiretta jistgħu jirriżultaw f’effetti ta’ kontaġju fiż-żewġ direzzjonijiet, jiġifieri mill-emittenti tat-tokens irreferenzjati ma’ assi u tat-tokens tal-flus elettroniċi għas-sistema finanzjarja tradizzjonali u viċi versa. Għal dak l-għan, huwa meħtieġ li jiġu stabbiliti l-indikaturi ewlenin kemm tas-sinifikat tas-sehem tal-assi ta’ riżerva li mhux depożiti li huma strumenti finanzjarji maħruġa minn istituzzjonijiet finanzjarji kif ukoll is-sinifikat tas-sehem tal-parteċipazzjonijiet tal-assi tal-emittent meta mqabbel mal-provvista totali ta’ strumenti finanzjarji speċifiċi. Barra minn hekk, jenħtieġ li jiġu stabbiliti l-indikaturi anċillari li ġejjin: l-istruttura tas-sjieda tal-emittent ta’ token irreferenzjat ma’ assi jew token tal-flus elettroniċi, il-konċentrazzjoni tal-kustodja tal-assi ta’ riżerva tal-emittent u s-sovrappożizzjoni tal-portafoll tal-assi ta’ riżerva tal-emittent mal-assi ta’ riżerva ta’ emittenti ta’ tokens irreferenzjati ma’ assi oħrajn u tokens tal-flus elettroniċi oħrajn.

(7)

Il-valutazzjoni tas-sinifikat tas-sehem tal-assi ta’ riżerva li mhux depożiti li huma strumenti finanzjarji maħruġa minn istituzzjonijiet finanzjarji hija kruċjali fil-valutazzjoni tal-interkonnettività tal-emittent mas-sistema finanzjarja. Dan l-indikatur ewlieni jenħtieġ li jkejjel l-interkonnessjonijiet diretti mas-settur finanzjarju permezz tar-riżerva ta’ assi tal-emittent. Diffikultà fl-istituzzjonijiet finanzjarji li l-istrumenti finanzjarji tagħhom huma inklużi fl-assi ta’ riżerva tista’ taffettwa l-valur tal-assi ta’ riżerva li jsostnu l-pretensjonijiet tad-detenturi tat-token fuq l-emittent biex jifdi t-token. Meta tivvaluta dak l-indikatur, jenħtieġ li l-EBA tqis is-subindikaturi tas-sehem ta’ assi ta’ riżerva li mhux depożiti li huma strumenti finanzjarji, is-sehem ta’ assi ta’ riżerva li mhux depożiti li huma derivattivi fil-każ ta’ tokens irreferenzjati ma’ assi jew bonds koperti fil-każ ta’ tokens tal-flus elettroniċi. Is-sehem ta’ assi ta’ riżerva li mhux depożiti li huma derivattivi u s-sehem ta’ bonds koperti huma meħtieġa bħala subindikaturi peress li, minn naħa, il-kontropartijiet tad-derivattivi jistgħu jkunu istituzzjonijiet ta’ kreditu u għalhekk sejħa għall-marġni fuqhom jista’ jkollha effetti sinifikanti fuq is-sistema finanzjarja, u, min-naħa l-oħra, bejgħ bl-għaġla ta’ bonds koperti mill-emittent jista’ jkollu impatt negattiv fuq il-likwidità tal-istituzzjonijiet ta’ kreditu.

(8)

L-indikatur ewlieni dwar is-sinifikat tas-sehem tat-tokens irreferenzjati ma’ assi jew tal-parteċipazzjonijiet tal-assi tal-emittent tat-tokens tal-flus elettroniċi meta mqabbel mal-provvista totali tal-istrumenti finanzjarji speċifiċi, inklużi l-unitajiet ta’ impriża għall-investiment kollettiv f’titoli trasferibbli u f’bonds sovrani, jenħtieġ li jkopri l-interkonnessjonijiet indiretti bejn, minn naħa, l-emittenti tat-tokens irreferenzjati ma’ assi u tat-tokens tal-flus elettroniċi u, min-naħa l-oħra, is-sistema finanzjarja. Tali konnessjonijiet indiretti jistgħu jaffettwaw is-sistema finanzjarja tradizzjonali, b’mod partikolari meta l-emittent ta’ token irreferenzjat ma’ assi jew ta’ token tal-flus elettroniċi jkun kostrett li jbigħ bl-irħis il-parteċipazzjonijiet tal-assi tiegħu minħabba diffikultà finanzjarja. Dan il-bejgħ ta’ emerġenza jista’ jnaqqas il-valur ta’ dawk l-assi u jaffettwa lill-istituzzjonijiet finanzjarji indirettament permezz ta’ tnaqqis fil-valur tal-assi li jkollhom dawk l-istituzzjonijiet finanzjarji.

(9)

L-emittenti tat-tokens irreferenzjati ma’ assi jew tat-tokens tal-flus elettroniċi jistgħu jkunu interkonnessi wkoll mas-sistema finanzjarja permezz tal-istruttura tas-sjieda. Dan l-indikatur anċillari jenħtieġ li jipprovdi stampa sħiħa tal-effetti potenzjali li diffikultà finanzjarja jista’ jkollha fis-sistema finanzjarja, mhux biss minn perspettiva purament ta’ riskju għall-istabbiltà finanzjarja iżda wkoll b’rabta mar-riskji għar-reputazzjoni. Diffikultà finanzjarja jew avvenimenti kritiċi fl-emittent ta’ token irreferenzjat ma’ assi jew token tal-flus elettroniċi jistgħu, bir-rabta tagħhom mal-emittent permezz tal-istruttura tas-sjieda, ikollhom effett sinifikanti f’istituzzjonijiet li jmexxu attivitajiet finanzjarji oħra. Meta tivvaluta dak l-indikatur, l-EBA jenħtieġ li tiffoka fuq jekk l-emittent għandux sjieda mifruxa jew ikkonċentrata, jekk persuni fiżiċi jew ġuridiċi b’parteċipazzjonijiet kwalifikanti humiex istituzzjonijiet finanzjarji jew le u l-kumplessità tal-istruttura tas-sjieda.

(10)

Jista’ jinħoloq kanal addizzjonali ta’ interkonnettività bejn, minn naħa, l-emittent ta’ token irreferenzjat ma’ assi jew ta’ token tal-flus elettroniċi, u, min-naħa l-oħra, is-sistema finanzjarja, permezz tal-konċentrazzjoni ta’ assi ta’ riżerva f’għadd żgħir ta’ istituzzjonijiet finanzjarji. Aktar ma tkun għolja d-diversifikazzjoni tal-assi ta’ riżerva tal-emittent, aktar ikunu baxxi l-effetti potenzjali ta’ kontaġju u r-riskji għall-istabbiltà finanzjarja tal-emittent. Għalhekk, l-allokazzjoni ta’ assi ta’ riżerva f’għadd baxx ta’ istituzzjonijiet finanzjarji jew fi grad ikkonċentrat ħafna hija indikazzjoni ta’ interkonnettività ogħla mas-sistema finanzjarja. Minħabba r-rilevanza speċifika tal-interkonnettività li tista’ tirriżulta mill-konċentrazzjoni tad-depożiti fl-istituzzjonijiet ta’ kreditu, huwa xieraq li jiġu stabbiliti żewġ subindikaturi taħt l-indikatur anċillari tal-konċentrazzjoni tal-assi ta’ riżerva tal-emittent fl-istituzzjonijiet finanzjarji. Jenħtieġ li sottoindikatur wieħed ikopri il-konċentrazzjoni ta’ assi ta’ riżerva f’istituzzjonijiet finanzjarji, filwaqt li sottoindikatur ieħor ikopri biss id-depożiti f’istituzzjonijiet ta’ kreditu.

(11)

Jenħtieġ li jinqabdu l-mekkaniżmi ta’ kontaġju li jistgħu jirriżultaw minn każijiet meta jkun hemm emittenti differenti ta’ tokens irreferenzjati ma’ assi jew tokens tal-flus elettroniċi li jżommu assi simili. Sitwazzjoni bħal din, bħala konsegwenza, tista’ toħloq diffikultà finanzjarja minħabba l-bejgħ ta’ emerġenza ta’ emittent wieħed li jista’ jkollu effetti negattivi fuq emittenti oħra. Jenħtieġ għalhekk li jiġi stabbilit indikatur anċillari tas-sovrappożizzjoni tal-portafoll tal-assi ta’ riżerva tal-emittent mal-assi ta’ riżerva ta’ emittenti oħra,

(1)

“istituzzjoni finanzjarja” tfisser kwalunkwe waħda minn dawn li ġejjin:

(2)

“perjodu rilevanti” tfisser il-perjodu msemmi fl-Artikolu 43(2), il-punt (a), tar-Regolament (UE) 2023/1114, jew il-perjodu msemmi fl-Artikolu 43(2), il-punt (b), tal-istess Regolament.