(1)

L-aġenti għat-titjib tal-ikel jirreferu għall-addittivi tal-ikel, għall-enzimi tal-ikel u għall-aromatizzanti tal-ikel, li huma sustanzi li jiġu miżjuda intenzjonalment mal-ikel għal skop teknoloġiku jew organolettiku. L-użu tal-aġenti għat-titjib tal-ikel huwa soġġett għal proċedura ta’ awtorizzazzjoni komuni tal-Unjoni, stabbilita fir-Regolament (KE) Nru 1331/2008 tal-Parlament Ewropew u tal-Kunsill (2).

(2)

Skont ir-Regolament (UE) 2017/625, għandhom jitwettqu kontrolli uffiċjali għall-verifika tal-konformità mar-regoli fil-qasam tal-ikel u tas-sikurezza tal-ikel.

(3)

Ir-Rakkomandazzjoni tal-Kummissjoni (UE) 2023/965 (3) fiha rekwiżiti dwar il-monitoraġġ tal-konsum tal-addittivi tal-ikel u tal-aromatizzanti tal-ikel awtorizzati f’konformità mar-Regolamenti (KE) Nru 1333/2008 (4) u (KE) Nru 1334/2008 (5) tal-Parlament Ewropew u tal-Kunsill, jiġifieri dwar il-ġbir ta’ data dwar il-preżenza u l-okkorrenza ta’ addittivi tal-ikel u ta’ aromatizzanti tal-ikel fl-ikel.

(4)

Skont l-Artikolu 92 tar-Regolament (UE) 2017/625, għandu jiġi stabbilit laboratorju ta’ referenza tal-Unjoni Ewropea meta jkun hemm ħtieġa rikonoxxuta li jiġu promossi prattiki uniformi fir-rigward tal-iżvilupp jew l-użu tal-metodi ta’ analiżi, ta’ ttestjar jew ta’ dijanjożi mwettqa mil-laboratorji uffiċjali maħtura f’konformità mal-Artikolu 37(1) ta’ dak ir-Regolament. Dan huwa l-każ fejn l-effettività tal-kontrolli uffiċjali tiddependi fuq il-kwalità, l-uniformità u l-affidabbiltà ta’ dawk il-metodi u r-riżultati.

(5)

L-istabbiliment ta’ laboratorju ta’ referenza fil-qasam tal-aġenti għat-titjib tal-ikel huwa meħtieġ biex fl-Unjoni jkunu jistgħu jitwettqu kontrolli uffiċjali b’mod effettiv. B’mod partikolari, l-istabbiliment ta’ laboratorju ta’ referenza huwa meħtieġ sabiex jiġi żgurat ċertu livell ta’ armonizzazzjoni fir-rigward tal-kriterji tat-teħid ta’ kampjuni u tal-metodi analitiċi użati għall-ġbir ta’ data dwar l-addittivi tal-ikel u l-aromatizzanti tal-ikel, u biex jingħata appoġġ lil-laboratorji uffiċjali fil-qasam tal-enzimi tal-ikel.

(6)

Għalhekk, jenħtieġ li dan ir-Regolament jistabbilixxi laboratorju ta’ referenza tal-Unjoni Ewropea għall-aġenti għat-titjib tal-ikel,