(1)

L-attivitajiet tal-avjazzjoni huma inklużi fis-sistema għall-iskambju ta’ kwoti ta’ emissjonijiet ta’ gassijiet serra ġewwa l-Unjoni (“EU ETS”) stabbilita bid-Direttiva 2003/87/KE.

(2)

Id-Direttiva (UE) 2023/958 tal-Parlament Ewropew u tal-Kunsill (2) emendat id-Direttiva 2003/87/KE biex timplimenta b’mod xieraq l-Iskema ta’ Kumpens u Tnaqqis tal-Karbonju għall-Avjazzjoni Internazzjonali (“CORSIA”, Carbon Offsetting and Reduction Scheme for International Aviation) tal-Organizzazzjoni tal-Avjazzjoni Ċivili Internazzjonali (“ICAO”, International Civil Aviation Organization).

(3)

Skont l-Artikolu 25a(3) tad-Direttiva 2003/87/KE, il-Kummissjoni għandha tadotta lista ta’ Stati, għajr il-pajjiżi taż-ŻEE, l-Iżvizzera u r-Renju Unit, li huma kkunsidrati li qed japplikaw il-CORSIA għall-finijiet tad-Direttiva 2003/87/KE, b’linja bażi tal-2019 għall-2021 sal-2023. Il-Parlament Ewropew u l-Kunsill eskludew lill-pajjiżi taż-ŻEE, lill-Iżvizzera u lir-Renju Unit minn tali lista ta’ Stati minħabba li r-rotot bejn dawk il-pajjiżi jaqgħu fil-kamp ta’ applikazzjoni tal-iskemi rispettivi għall-iskambju ta’ kwoti tal-emissjonijiet.

(4)

Fir-rigward tal-2023, l-inklużjoni ta’ Stat fil-lista ta’ Stati meqjusa li qed japplikaw il-CORSIA għall-finijiet tad-Direttiva 2003/87/KE hija bbażata fuq in-notifika mill-Istat li għandu l-intenzjoni li japplika l-CORSIA għall-emissjonijiet fl-2023, b’tali notifika ssir lis-Segretarjat tal-ICAO. Is-Segretarjat tal-ICAO jippubblika lista annwali ta’ Stati li jkunu għamlu tali notifika. Biex tirrifletti l-bidliet f’dawn il-listi ppubblikati annwalment, il-Kummissjoni għandha tadotta kull sena lista ta’ Stati, għajr il-pajjiżi taż-ŻEE, l-Iżvizzera u r-Renju Unit, li jitqiesu li qed japplikaw il-CORSIA għall-finijiet tad-Direttiva 2003/87/KE.

(5)

Il-lista ta’ Stati meqjusa li qed japplikaw il-CORSIA ppubblikata mis-Segretarjat tal-ICAO għall-2023 tinkludi lil San Marino u Monaco. Madankollu, jenħtieġ li San Marino u Monaco ma jiġux inklużi fl-Anness ta’ dan ir-Regolament peress li ma għandhom l-ebda ajruport u ma kienet qed issir l-ebda titjira fl-2023 li tinvolvi rotot li għalihom qed tiġi applikata l-CORSIA għall-finijiet tad-Direttiva 2003/87/KE.

(6)

Il-lista tal-Istati fl-Anness għandha tintuża mill-operaturi tal-inġenji tal-ajru meta jirrapportaw l-emissjonijiet għall-2023. Biex tiġi żgurata l-applikazzjoni f’waqtha ta’ din il-lista qabel l-iskadenza tar-rapportar ta’ dawk l-emissjonijiet, jenħtieġ li d-dħul fis-seħħ ta’ dan ir-Regolament ikun fit-tielet jum wara dak tal-pubblikazzjoni tiegħu.

(7)

Il-miżuri previsti f’dan ir-Regolament huma skont l-opinjoni tal-Kumitat dwar it-Tibdil fil-Klima,