This document is an excerpt from the EUR-Lex website
Document 32024R0371
Commission Delegated Regulation (EU) 2024/371 of 23 January 2024 supplementing Directive (EU) 2020/2184 of the European Parliament and of the Council by establishing harmonised specifications for the marking of products that come into contact with water intended for human consumption
Regolament Delegat tal-Kummissjoni (UE) 2024/371 tat-23 ta’ Jannar 2024 li jissupplimenta d-Direttiva (UE) 2020/2184 tal-Parlament Ewropew u tal-Kunsill billi jistabbilixxi speċifikazzjonijiet armonizzati għall-immarkar ta’ prodotti li jiġu f’kuntatt mal-ilma maħsub għall-konsum mill-bniedem
Regolament Delegat tal-Kummissjoni (UE) 2024/371 tat-23 ta’ Jannar 2024 li jissupplimenta d-Direttiva (UE) 2020/2184 tal-Parlament Ewropew u tal-Kunsill billi jistabbilixxi speċifikazzjonijiet armonizzati għall-immarkar ta’ prodotti li jiġu f’kuntatt mal-ilma maħsub għall-konsum mill-bniedem
C/2024/242
ĠU L, 2024/371, 23.4.2024, ELI: http://data.europa.eu/eli/reg_del/2024/371/oj (BG, ES, CS, DA, DE, ET, EL, EN, FR, GA, HR, IT, LV, LT, HU, MT, NL, PL, PT, RO, SK, SL, FI, SV)
In force
|
Il-Ġurnal Uffiċjali |
MT Is-serje L |
|
2024/371 |
23.4.2024 |
REGOLAMENT DELEGAT TAL-KUMMISSJONI (UE) 2024/371
tat-23 ta’ Jannar 2024
li jissupplimenta d-Direttiva (UE) 2020/2184 tal-Parlament Ewropew u tal-Kunsill billi jistabbilixxi speċifikazzjonijiet armonizzati għall-immarkar ta’ prodotti li jiġu f’kuntatt mal-ilma maħsub għall-konsum mill-bniedem
(Test b’rilevanza għaż-ŻEE)
IL-KUMMISSJONI EWROPEA,
Wara li kkunsidrat it-Trattat dwar il-Funzjonament tal-Unjoni Ewropea,
Wara li kkunsidrat id-Direttiva (UE) 2020/2184 tal-Parlament Ewropew u tal-Kunsill tas-16 ta’ Diċembru 2020 dwar il-kwalità tal-ilma maħsub għall-konsum mill-bniedem (1), u b’mod partikolari l-Artikolu 11(11) tagħha,
Billi:
|
(1) |
L-Artikolu 11 tad-Direttiva (UE) 2020/2184 jirrikjedi li l-Istati Membri jiżguraw li ċerti materjali li jiġu f’kuntatt mal-ilma maħsub għall-konsum mill-bniedem ma jikkompromettux direttament jew indirettament il-protezzjoni tas-saħħa tal-bniedem, ma jaffettwawx b’mod negattiv il-kulur, ir-riħa jew it-togħma tal-ilma, ma jtejbux it-tkabbir mikrobjali, u ma jnixxux kontaminanti fl-ilma f’livelli li huma ogħla milli meħtieġ fid-dawl tal-għan maħsub tal-materjal. |
|
(2) |
F’konformità mal-Artikolu 11(11) tad-Direttiva (UE) 2020/2184, il-Kummissjoni għandha tadotta atti delegati biex tistabbilixxi speċifikazzjonijiet armonizzati għal immarkar li jidher sew, li jista’ jinqara b’mod ċar u li ma jitħassarx li għandu jintuża biex jindika li prodott li jiġi f’kuntatt mal-ilma maħsub għall-konsum mill-bniedem huwa konformi mal-Artikolu 11 ta’ dik id-Direttiva. Prodott li għalih tkun inħarġet dikjarazzjoni ta’ konformità tal-UE f’konformità mar-Regolament Delegat tal-Kummissjoni (UE) 2024/370 (2) għandu jkun akkumpanjat mill-immarkar stabbilit f’dan ir-Regolament. |
|
(3) |
L-ispeċifikazzjonijiet armonizzati għall-pożizzjoni u d-disinn tal-immarkar japplikaw għall-prodotti li huma maħsuba biex jintużaw f’installazzjonijiet ġodda jew, fil-każ ta’ xogħlijiet ta’ tiswija jew rikostruzzjoni, f’installazzjonijiet eżistenti għall-estrazzjoni, it-trattament, il-ħżin jew id-distribuzzjoni tal-ilma maħsub għall-konsum mill-bniedem u li huma maħsuba biex jiġu f’kuntatt ma’ tali ilma. |
|
(4) |
Sabiex ikun viżibbli biżżejjed u identifikat b’mod ċar, jenħtieġ li jiġi stabbilit daqs minimu għall-immarkar, u l-immarkar jenħtieġ li jkun jikkonsisti minn simbolu u test ta’ informazzjoni. |
ADOTTAT DAN IR-REGOLAMENT:
Artikolu 1
1. L-immarkar imsemmi fl-Artikolu 11(11) tad-Direttiva (UE) 2020/2184 (l-“immarkar”) għandu jinkludi s-simbolu riprodott fl-Anness. Is-simbolu għandu jkollu għoli ta’ mill-inqas 5 mm.
Meta s-simbolu tad-daqs minimu ma jkunx jista’ jitwaħħal fuq il-prodott, dan għandu jitwaħħal mal-imballaġġ u mad-dokumentazzjoni.
Is-simbolu għandu jkun ta’ tip li ma jitħassarx u għandu jitwaħħal b’mod viżibbli ma’ superfiċe waħda jew aktar tal-prodott, fuq kwalunkwe dokument tekniku u amministrattiv li jakkumpanja l-prodott (id-“dokumentazzjoni”) u fuq l-imballaġġ tal-prodott.
2. L-immarkar fuq id-dokumentazzjoni u fuq l-imballaġġ tal-prodott għandu jinkludi wkoll it-test ta’ informazzjoni li ġej:
“TAJJEB GĦALL-ILMA TAX-XORB”.
3. It-test ta’ informazzjoni msemmi fil-paragrafu 2 għandu jkun viżibbli b’mod ċar u għandu jitqiegħed taħt is-simbolu, f’ittri kbar bit-tipa Helvetica Bold, b’daqs minimu tat-tipa ta’ 5 mm.
It-test ta’ informazzjoni li jitwaħħal mad-dokumentazzjoni għandu jinkiteb bil-lingwi uffiċjali tal-Istat Membru fejn il-prodott jiġi introdott fis-suq, sakemm dak l-Istat Membru ma jipprevedix mod ieħor.
It-test ta’ informazzjoni li jitwaħħal fuq l-imballaġġ għandu jinkiteb b’mill-inqas waħda mil-lingwi uffiċjali tal-Istat Membru fejn il-prodott jiġi introdott fis-suq.
Apparti l-lingwi meħtieġa minn dan il-paragrafu, jistgħu jintużaw lingwi addizzjonali għat-test ta’ informazzjoni, dment li tingħata l-istess informazzjoni fil-lingwi kollha użati.
Meta t-test ta’ informazzjoni jiġi tradott lejn lingwa oħra għajr il-lingwi meħtieġa msemmija f’dan il-paragrafu, it-test tradott għandu jitqiegħed taħt it-test ta’ informazzjoni f’dawk il-lingwi meħtieġa.
4. Il-kulur u l-preżentazzjoni tal-immarkar għandhom ikunu tali mod li s-simbolu jispikka b’mod ċar.
5. Jista’ jitwaħħal tikkettar ieħor mal-prodott, mad-dokumentazzjoni u mal-imballaġġ dment li dan ma jtellifx il-viżibbiltà, il-leġġibbiltà u t-tifsira tal-immarkar.
6. L-elementi kollha tal-immarkar għandhom jitqiegħdu qrib it-tikkettar l-ieħor fuq il-prodott, fuq id-dokumentazzjoni u fuq l-imballaġġ.
Artikolu 2
Dħul fis-seħħ
Dan ir-Regolament għandu jidħol fis-seħħ fl-għoxrin jum wara dak tal-pubblikazzjoni tiegħu f’Il-Ġurnal Uffiċjali tal-Unjoni Ewropea.
Għandu japplika mill-31 ta’ Diċembru 2026.
Dan ir-Regolament għandu jorbot fl-intier tiegħu u japplika direttament fl-Istati Membri kollha.
Magħmul fi Brussell, it-23 ta’ Jannar 2024.
Għall-Kummissjoni
Il-President
Ursula VON DER LEYEN
(1) ĠU L 435, 23.12.2020, p. 1.
(2) Ir-Regolament Delegat tal-Kummissjoni (UE) 2024/370 tat-23 ta’ Jannar 2024 li jissupplimenta d-Direttiva (UE) 2020/2184 tal-Parlament Ewropew u tal-Kunsill billi jistabbilixxi proċeduri ta’ valutazzjoni tal-konformità għal prodotti li jiġu f’kuntatt mal-ilma maħsub għall-konsum mill-bniedem u r-regoli għall-ħatra ta’ korpi ta’ valutazzjoni tal-konformità involuti f’dawk il-proċeduri (ĠU L, 2024/370, 23.4.2024, ELI: http://data.europa.eu/eli/reg_del/2024/370/oj).
ANNESS
SIMBOLU
ELI: http://data.europa.eu/eli/reg_del/2024/371/oj
ISSN 1977-074X (electronic edition)