(1)

L-Artikolu 25(2) tad-Direttiva (UE) 2017/2397 jistipula li l-Istati Membri għandhom jirreġistraw b’mod affidabbli u mingħajr dewmien iċ-ċertifikati tal-kwalifiki, il-kotba tar-rekords tas-servizz u l-ġurnali ta’ abbord fil-bażijiet tad-data tal-Kummissjoni.

(2)

Il-Kummissjoni stabbiliet il-Bażi tad-Data Ewropea tal-Ekwipaġġ (“ECDB”) għaċ-ċertifikati tal-kwalifiki kif ukoll il-kotba tar-rekords tas-servizz u l-Bażi tad-Data Ewropea dwar il-Buq (“EHDB”) għall-ġurnali ta’ abbord għal dan l-għan u stabbiliet il-kundizzjonijiet għall-użu ta’ dawk il-bażijiet tad-data fir-Regolament Delegat (UE) 2020/473 (2).

(3)

Bid-Deċiżjoni tal-Kummissjoni (UE) 2023/1555 (3), l-Iżvizzera ngħatat aċċess għall-ECDB u għall-EHDB f’konformità mal-Artikolu 25(4) tad-Direttiva (UE) 2017/2397, peress li l-persunal Żvizzeru jinnaviga wkoll fil-passaġġi fuq l-ilma interni tal-Unjoni filwaqt li jaderixxi ma’ rekwiżiti identiċi għal dawk tad-Direttiva (UE) 2017/2397.

(4)

Il-Kummissjoni Ċentrali għan-Navigazzjoni fuq ir-Renu (“CCNR”) talbet aċċess għall-ECDB permezz tal-ittra tat-13 ta’ Ġunju 2022. Hija organizzazzjoni internazzjonali fil-qasam tan-navigazzjoni interna bbażata fuq il-Konvenzjoni Riveduta għan-Navigazzjoni fuq ir-Renu tas-17 ta’ Ottubru 1868. Il-membri tagħha huma l-Belġju, Franza, il-Ġermanja, in-Netherlands u l-Iżvizzera. Din titlob aċċess li jinqara biss f’konformità mal-Anness I, Nru 2.2 tar-Regolament Delegat (UE) 2020/473 għall-organizzazzjonijiet internazzjonali, kif iċċarat fit-talba tagħha permezz tal-ittra tas-17 ta’ Ottubru 2022.

(5)

Is-CCNR tikkoopera mal-Unjoni abbażi ta’ Ftehim Amministrattiv tal-2003 u Arranġament Amministrattiv ulterjuri tal-2013. Abbażi ta’ dak, is-CCNR tipprovdi assistenza teknika lill-Unjoni fit-twettiq ta’ osservazzjonijiet tas-suq li jinkludu analiżi tas-suq tax-xogħol tal-passaġġi fuq l-ilma interni. Is-CCNR topera wkoll bħala s-segretarjat tal-“Comité Européen pour l’Élaboration de Standards dans le Domaine de Navigation Intérieure” (“CESNI”) li jistabbilixxi standards għan-navigazzjoni interna. F’dak ir-rwol, is-CCNR tassisti lis-CESNI b’għarfien fattwali, statistika u appoġġ f’termini ta’ kontenut. Għalhekk, l-għoti tal-aċċess tas-CCNR għall-ECDB iservi skopijiet ta’ statistika u fl-istess waqt jiffaċilita l-evalwazzjoni tad-Direttiva (UE) 2017/2397 kif stabbilit fl-Artikolu 25(2) ta’ dik id-Direttiva.

(6)

Biex twettaq il-kompiti li sservi skopijiet ta’ statistika u l-evalwazzjoni tad-Direttiva (UE) 2017/2397, is-CCNR ma teħtieġx aċċess għad-data personali, iżda biss għad-data statistika aggregata. L-ECDB tipprevedi mod ta’ aċċess li jippermetti biss li wieħed jara d-data statistika aggregata, li jenħtieġ li jintuża għas-CCNR. Fl-ittra tagħha tas-17 ta’ Ottubru 2022, is-CCNR żgurat ukoll li ma għandhiex bażi tad-data korrispondenti li għaliha setgħet tagħti aċċess kif meħtieġ mill-Artikolu 25(4) tad-Direttiva (UE) 2017/2397.

(7)

Wara li vvalutat it-talba tas-CCNR, il-Kummissjoni jidhrilha li jixraq li lis-CCNR jingħatalha aċċess għall-ECDB,