(1)

Il-finanzjament mill-Istat li jilħaq il-kriterji stabbiliti fl-Artikolu 107(1) tat-Trattat dwar il-Funzjonament tal-Unjoni Ewropea jikkostitwixxi għajnuna mill-Istat, u jeħtieġ li l-Kummissjoni tiġi nnotifikata bih skont l-Artikolu 108(3) tat-Trattat. Madankollu, skont l-Artikolu 109 tat-Trattat, il-Kunsill jista’ jiddetermina l-kategoriji ta’ għajnuna li huma eżentati minn dak ir-rekwiżit ta’ notifika. F’konformità mal-Artikolu 108(4) tat-Trattat, il-Kummissjoni tista’ tadotta regolamenti rigward dawk il-kategoriji ta’ għajnuna mill-Istat. Fir-Regolament (UE) 2015/1588, il-Kunsill iddeċieda, f’konformità mal-Artikolu 109 tat-Trattat, li l-għajnuna de minimis (jiġifieri għajnuna mogħtija lill-istess impriża fuq perjodu speċifiku ta’ żmien li ma jaqbiżx ċertu ammont fiss) tista’ tikkostitwixxi kategorija bħal din. Fuq dik il-bażi, l-għajnuna de minimis titqies li ma tissodisfax il-kriterji kollha stabbiliti fl-Artikolu 107(1) tat-Trattat u għalhekk mhijiex soġġetta għall-proċedura ta’ notifika.

(2)

Il-Kummissjoni, f’għadd kbir ta’ deċiżjonijiet, ikkjarifikat il-kunċett ta’ għajnuna skont it-tifsira tal-Artikolu 107(1) tat-Trattat. Il-Kummissjoni ddikjarat ukoll il-politika tagħha dwar limitu massimu de minimis li taħtu l-Artikolu 107(1) tat-Trattat jista’ jitqies li ma japplikax.

(3)

L-esperjenza tal-Kummissjoni fl-applikazzjoni tar-regoli dwar l-għajnuna mill-Istat lil impriżi li jipprovdu servizzi ta’ interess ekonomiku ġenerali skont it-tifsira tal-Artikolu 106(2) tat-Trattat uriet li l-limitu massimu li taħtu l-vantaġġi konċessi lil tali impriżi jistgħu jitqiesu li ma għandhomx impatt fuq il-kummerċ bejn l-Istati Membri jew ma joħolqux distorsjoni jew jheddu li joħolqu distorsjoni tal-kompetizzjoni, jista’, f’ċerti każi, ivarja mil-limitu massimu ġenerali de minimis stabbilit skont ir-Regolament tal-Kummissjoni (UE) 2023/2831 (2). Tabilħaqq, mill-inqas uħud minn dawn il-vantaġġi x’aktarx jikkostitwixxu kumpens għal kostijiet addizzjonali marbutin mal-forniment ta’ servizzi ta’ interess ekonomiku ġenerali. Barra minn hekk, ħafna attivitajiet li jikkwalifikaw bħala servizzi ta’ interess ekonomiku ġenerali għandhom kamp ta’ applikazzjoni territorjali limitat. Skont l-Artikolu 2(2) tar-Regolament tal-Kummissjoni (UE) Nru 360/2012 (3), jenħtieġ li l-għajnuna mogħtija lil impriżi li jipprovdu servizz ta’ interess ekonomiku ġenerali titqies li ma taffettwax il-kummerċ bejn l-Istati Membri jew li ma toħloqx distorsjoni jew thedded li toħloq distorsjoni tal-kompetizzjoni, dment li l-ammont totali riċevut ta’ għajnuna mogħtija għall-forniment ta’ servizzi ta’ interess ekonomiku ġenerali ma jeċċedix il-EUR 500 000 matul kwalunkwe perjodu ta’ 3 snin fiskali.

(4)

Fid-dawl tal-esperjenza miksuba bl-applikazzjoni tar-Regolament (UE) Nru 360/2012, huwa xieraq li r-regoli de minimis għall-għajnuna għal servizzi ta’ interess ekonomiku ġenerali jiġu aġġustati biex jirriflettu xi wħud minn dawn l-aġġustamenti li saru fir-Regolament (UE) 2023/2831 de minimis ġenerali, sabiex tiġi żgurata l-konsistenza, filwaqt li fl-istess ħin jitqiesu l-karatteristiki speċifiċi tas-servizzi ta’ interess ekonomiku ġenerali.

(5)

Huwa wkoll xieraq li l-limitu massimu tal-għajnuna de minimis għas-servizzi ta’ interess ekonomiku ġenerali, li impriża waħda tista’ tirċievi għal kull Stat Membru matul kwalunkwe perjodu ta’ 3 snin, jiżdied għal EUR 750 000. Dak il-limitu massimu jirrifletti l-inflazzjoni li seħħet mid-dħul fis-seħħ tar-Regolament (UE) Nru 360/2012 u l-iżviluppi stmati matul il-perjodu ta’ validità ta’ dan ir-Regolament. Dan il-limitu massimu huwa meħtieġ sabiex jiżgura li kwalunkwe miżura li taqa’ fl-ambitu ta’ dan ir-Regolament tkun tista’ titqies li ma jkollha l-ebda effett fuq il-kummerċ bejn l-Istati Membri u li ma toħloqx distorsjoni jew thedded li toħloq distorsjoni tal-kompetizzjoni.

(6)

Jenħtieġ li l-għajnuna mill-Istat mogħtija minn Stat Membru titqies anke meta tkun iffinanzjata għal kollox jew parzjalment minn riżorsi li joriġinaw mill-Unjoni li jkunu taħt il-kontroll ta’ dak l-Istat Membru. Jenħtieġ li ma jkunx possibbli li miżuri ta’ għajnuna mill-Istat li jaqbżu l-limitu massimu de minimis jinqasmu f’partijiet iżgħar sabiex dawn il-partijiet jaqgħu fil-kamp ta’ applikazzjoni ta’ dan ir-Regolament.

(7)

Għall-finijiet tar-regoli dwar il-kompetizzjoni stabbiliti fit-Trattat, impriża hija kwalunkwe entità, sew jekk persuna fiżika u sew jekk ġuridika, involuta f’attività ekonomika, irrispettivament mill-istatus legali tagħha u mill-mod kif tkun iffinanzjata (4). Il-Qorti tal-Ġustizzja tal-Unjoni Ewropea ċċarat li entità li “jkollha ishma ta’ kontroll f’kumpanija” u li “teżerċita effettivament dan il-kontroll filwaqt li tipparteċipa direttament jew indirettament fl-amministrazzjoni tagħha”, trid titqies li qed tipparteċipa fl-attività ekonomika ta’ dik il-kumpanija. L-entità nnifisha għandha għalhekk titqies bħala impriża fis-sens tal-Artikolu 107(1) tat-Trattat (5). Il-Qorti tal-Ġustizzja ddeċidiet li l-entitajiet kollha li huma kkontrollati (fuq bażi legali jew de facto) mill-istess entità għandhom jitqiesu bħala impriża waħda (6).

(8)

Għal raġunijiet ta’ ċertezza legali, u biex jitnaqqas il-piż amministrattiv, jenħtieġ li dan ir-Regolament jipprovdi lista ċara u eżawrjenti ta’ kriterji biex jiġi ddeterminat meta żewġ intrapriżi jew aktar fl-istess Stat Membru jenħtieġ li jitqiesu bħala impriża waħda. Il-Kummissjoni għażlet kriterji li huma xierqa għall-finijiet ta’ dan ir-Regolament minn fost il-kriterji stabbiliti sew għad-definizzjoni ta’ “intrapriżi assoċjati” bħala parti mid-definizzjoni ta’ intrapriżi żgħar jew ta’ daqs medju (small or medium-sized enterprises, SMEs) fir-Rakkomandazzjoni tal-Kummissjoni 2003/361/KE (7) u fl-Anness I tar-Regolament tal-Kummissjoni (UE) Nru 651/2014 (8). Il-kriterji jenħtieġ li jkunu applikabbli, minħabba l-kamp ta’ applikazzjoni ta’ dan ir-Regolament, kemm għall-SMEs kif ukoll għall-impriżi l-kbar u jenħtieġ li jiggarantixxu li grupp ta’ impriżi affiljati jitqies bħala impriża waħda għall-applikazzjoni tar-regola de minimis. Madankollu, kif rikonoxxut mill-Artikolu 14 tat-Trattat, is-servizzi ta’ interess ekonomiku ġenerali għandhom post speċjali fil-valuri komuni tal-Unjoni u għandhom rwol partikolari fil-promozzjoni tal-koeżjoni soċjali u territorjali. Jenħtieġ li s-servizzi ta’ interess ekonomiku ġenerali jissodisfaw il-ħtiġijiet tal-utenti bl-aktar mod komplet possibbli u l-Istati Membri jenħtieġ li jkunu jistgħu jindirizzaw dawk il-ħtiġijiet bl-aktar mod xieraq filwaqt li titqies l-ispeċifiċità ta’ kull Stat Membru fir-rigward b’mod partikolari tal-forniment ta’ servizzi soċjali. Għal din ir-raġuni, jenħtieġ li intrapriżi li jwettqu servizzi ta’ interess ekonomiku ġenerali li ma għandhom l-ebda relazzjoni ma’ xulxin, ħlief għall-fatt li kull waħda minnhom għandha rabta diretta mal-istess korp jew korpi pubbliċi, jew mal-istess entità jew entitajiet mingħajr skop ta’ qligħ, ma jiġux trattati bħala li huma assoċjati ma’ xulxin. Għalhekk, jenħtieġ li s-sitwazzjoni speċifika ta’ intrapriżi kkontrollati mill-istess korp jew korpi pubbliċi, jew mill-istess entità jew entitajiet mingħajr skop ta’ qligħ, li fiha l-intrapriżi jista’ jkollhom setgħa ta’ deċiżjoni indipendenti, tiġi kkunsidrata.

(9)

Jenħtieġ li dan ir-Regolament ikun japplika biss għal għajnuna mogħtija għall-forniment ta’ servizz ta’ interess ekonomiku ġenerali. Għalhekk jenħtieġ li l-impriża benefiċjarja tingħata bil-miktub jew f’forma elettronika l-inkarigu tas-servizz ta’ interess ekonomiku ġenerali li għalih tkun qed tingħata l-għajnuna. Filwaqt li l-att ta’ inkarigu jenħtieġ li jinforma lill-impriża bis-servizz ta’ interess ekonomiku ġenerali li fir-rigward tiegħu tingħata l-għajnuna, dan mhux neċessarjament irid ikun fih l-informazzjoni dettaljata kollha kif stipulata fl-Artikolu 4 tad-Deċiżjoni tal-Kummissjoni 2012/21/UE (9).

(10)

Fid-dawl tar-regoli speċjali li japplikaw għas-setturi tal-produzzjoni primarja (b’mod partikolari l-produzzjoni primarja tal-prodotti agrikoli, u l-produzzjoni primarja tal-prodotti tas-sajd u tal-akkwakultura), tal-fatt li l-impriżi f’dawn is-setturi huma rarament inkarigati b’servizzi ta’ interess ekonomiku ġenerali, u tar-riskju li l-ammonti ta’ għajnuna taħt il-limitu massimu stabbilit f’dan ir-Regolament, jistgħu madankollu jissodisfaw il-kriterji tal-Artikolu 107(1) tat-Trattat, jenħtieġ li dan ir-Regolament ma japplikax għal dawn is-setturi.

(11)

Meta jitqies ix-xebh bejn l-ipproċessar u l-kummerċjalizzazzjoni ta’ prodotti agrikoli, u ta’ prodotti mhux agrikoli, jenħtieġ li dan ir-Regolament japplika għall-ipproċessar u l-kummerċjalizzazzjoni ta’ prodotti agrikoli, jekk jiġu ssodisfati ċerti kundizzjonijiet. Jenħtieġ li l-attivitajiet fl-azjendi agrikoli meħtieġa għat-tħejjija ta’ prodott għall-ewwel bejgħ (pereżempju l-ħsad; il-qtugħ u d-dris taċ-ċereali; jew l-ippakkjar tal-bajd) jew l-ewwel bejgħ lir-rivendituri jew lill-proċessuri, ma jitqisux bħala pproċessar u kummerċjalizzazzjoni f’dan ir-rigward u għalhekk jenħtieġ li dan ir-Regolament ma japplikax għal dawk l-attivitajiet.

(12)

Bl-istess mod, meta titqies in-natura tal-attivitajiet fl-ipproċessar u l-kummerċjalizzazzjoni tal-prodotti tas-sajd u tal-akkwakultura, u s-similaritajiet bejn dawn l-attivitajiet u attivitajiet oħra ta’ pproċessar u kummerċjalizzazzjoni, jenħtieġ li dan ir-Regolament japplika għall-impriżi attivi fl-ipproċessar u l-kummerċjalizzazzjoni tal-prodotti tas-sajd u tal-akkwakultura, dment li jiġu ssodisfati ċerti kundizzjonijiet. Jenħtieġ li la l-attivitajiet li jsiru fl-azjendi agrikoli jew abbord meħtieġa għat-tħejjija ta’ annimal jew pjanta għall-ewwel bejgħ (inkluż it-tqattigħ, l-iffilittjar jew l-iffriżar), u lanqas l-ewwel bejgħ lil rivendituri jew proċessuri ma jitqiesu bħala pproċessar jew kummerċjalizzazzjoni f’dan ir-rigward u għalhekk jenħtieġ li dan ir-Regolament ma japplikax għal dawk l-attivitajiet.

(13)

Il-Qorti tal-Ġustizzja tal-Unjoni Ewropea iddeterminat li, ladarba l-Unjoni tkun illeġiżlat favur it-twaqqif ta’ organizzazzjoni komuni tas-suq f’settur partikolari tal-agrikoltura, l-Istati Membri huma obbligati li jastjenu milli jieħdu kwalunkwe miżura li tista’ ddgħajjifha jew toħloq eċċezzjonijiet għaliha (10). Għal din ir-raġuni, jenħtieġ li dan ir-Regolament ma japplikax għall-għajnuna għall-ammonti ffissati fuq il-bażi tal-prezz jew tal-kwantità tal-prodotti mixtrija jew imqiegħda fis-suq fis-settur agrikolu. Jenħtieġ li lanqas ma jkun japplika għal għajnuna marbuta ma’ obbligu li l-għajnuna tinqasam ma’ produtturi agrikoli primarji. Dawn il-prinċipji japplikaw ukoll għas-settur tas-sajd u tal-akkwakultura.

(14)

Jenħtieġ li dan ir-Regolament ma japplikax għal għajnuna għall-esportazzjoni jew għal għajnuna soġġetta għall-użu ta’ oġġetti jew servizzi domestiċi bi preferenza fuq dawk importati. B’mod partikolari, jenħtieġ li ma japplikax għal għajnuna li tiffinanzja l-istabbiliment u t-tħaddim ta’ network tad-distribuzzjoni fi Stati Membri oħrajn jew f’pajjiżi terzi. Il-Qorti tal-Ġustizzja tal-Unjoni Ewropea ddeċidiet li r-Regolament tal-Kummissjoni (KE) Nru 1998/2006 (11)“ma jeskludix kull għajnuna li jista’ jkollha impatt fuq l-esportazzjonijiet, iżda biss dik li għandha bħala għan dirett, mill-forma stess li hija tieħu, li ssostni l-bejgħ fi Stat ieħor” u li “għajnuna għall-investiment, sakemm din ma tkunx, f’xi forma jew oħra, determinata, fil-prinċipju u fl-ammont tagħha, mill-kwantità tal-prodotti esportati, ma taqax taħt l-“għajnuna lill-attivitajiet relatati mal-esportazzjoni” fis-sens tal-Artikolu 1(1), il-punt (d) tar-Regolament (KE) Nru 1998/2006 u għalhekk ma taqax fil-kamp ta’ applikazzjoni ta’ din id-dispożizzjoni, anki jekk l-investimenti hekk sostnuti jippermettu l-iżvilupp ta’ prodotti maħsuba għall-esportazzjoni” (12). L-għajnuna għall-kostijiet tal-parteċipazzjoni f’fieri kummerċjali jew għall-kostijiet tal-istudji jew tas-servizzi ta’ konsulenza meħtieġa għat-tnedija ta’ prodott ġdid jew eżistenti f’suq ġdid fi Stat Membru ieħor jew f’pajjiż terz b’mod ġenerali ma tikkostitwix għajnuna għall-esportazzjoni.

(15)

Jenħtieġ li l-perjodu ta’ 3 snin li jrid jitqies għall-finijiet ta’ dan ir-Regolament jiġi vvalutat fuq bażi kontinwa. Għal kull għotja ġdida ta’ għajnuna de minimis, jeħtieġ li jitqies l-ammont totali ta’ għajnuna de minimis mogħtija fit-3 snin preċedenti.

(16)

Meta impriża tkun attiva f’wieħed mis-setturi esklużi mill-kamp ta’ applikazzjoni ta’ dan ir-Regolament u tkun attiva wkoll f’setturi oħra jew ikollha attivitajiet oħrajn, jenħtieġ li dan ir-Regolament ikun japplika għal dawk is-setturi jew l-attivitajiet oħrajn sakemm l-Istat Membru kkonċernat jiggarantixxi, billi jistrieħ fuq mezzi xierqa bħas-separazzjoni tal-attivitajiet jew is-separazzjoni tal-kontijiet, li l-attivitajiet fis-setturi esklużi ma jibbenefikawx mill-għajnuna de minimis. Jenħtieġ li japplika l-istess prinċipju meta impriża tkun attiva f’setturi li għalihom japplikaw limiti massimi de minimis aktar baxxi. Jekk impriża ma tkunx tista’ tiżgura li l-attivitajiet fis-setturi li għalihom japplikaw limiti massimi de minimis aktar baxxi jibbenefikaw biss minn għajnuna de minimis sa dawk il-limiti massimi l-aktar baxxi, jenħtieġ li l-limitu massimu l-aktar baxx japplika għall-attivitajiet kollha tal-impriża.

(17)

Jenħtieġ li jiġu stipulati regoli li jiżguraw li ma jkunx possibbli li jiġu evitati l-intensitajiet massimi tal-għajnuna stabbiliti f’regolamenti rilevanti dwar l-għajnuna mill-Istat jew f’deċiżjonijiet tal-Kummissjoni. Jenħtieġ li jiġu stabbiliti wkoll regoli ċari dwar il-kumulazzjoni.

(18)

Dan ir-Regolament ma jeskludix il-possibbiltà li miżura tista’ ma titqiesx bħala għajnuna mill-Istat skont it-tifsira tal-Artikolu 107(1) tat-Trattat għal raġunijiet oħra għajr dawk stabbiliti f’dan ir-Regolament, bħal pereżempju, meta l-miżura tikkonforma mal-prinċipju tal-operatur f’ekonomija tas-suq jew ma tinvolvix trasferiment ta’ riżorsi tal-Istat. B’mod partikolari, il-finanzjament tal-Unjoni ġestit ċentralment mill-Kummissjoni li mhuwiex direttament jew indirettament taħt il-kontroll tal-Istat Membru ma jikkostitwix għajnuna mill-Istat u jenħtieġ li ma jitqiesx meta jiġi ddeterminat jekk il-limitu massimu stipulat f’dan ir-Regolament jinqabiżx.

(19)

Dan ir-Regolament ma jinkludix is-sitwazzjonijiet kollha fejn miżura jista’ ma jkollha l-ebda effett fuq il-kummerċ bejn l-Istati Membri u ma tistax toħloq distorsjoni jew thedded li toħloq distorsjoni tal-kompetizzjoni. Jista’ jkun hemm sitwazzjonijiet fejn benefiċjarju jforni oġġetti jew servizzi lil żona limitata (pereżempju f’reġjun insulari jew reġjun ultraperiferiku) fi Stat Membru u dak il-benefiċjarju huwa improbabbli li jattira klijenti minn Stati Membri oħra, u li ma jistax jiġi previst li l-miżura jkollha aktar minn effett marġinali fuq il-kundizzjonijiet ta’ investimenti jew stabbiliment transfruntier. Jenħtieġ li tali miżuri jiġu vvalutati fuq bażi ta’ każ b’każ.

(20)

Jenħtieġ li dan ir-Regolament ma jaffettwax l-applikazzjoni tar-Regolament (UE) 2023/2831 għal impriżi li jipprovdu servizzi ta’ interess ekonomiku ġenerali. Jenħtieġ li l-Istati Membri jibqgħu liberi li jibbażaw jew fuq dan ir-Regolament jew fuq ir-Regolament (UE) 2023/2831 fir-rigward tal-għajnuna mogħtija għall-forniment ta’ servizzi ta’ interess ekonomiku ġenerali.

(21)

Fis-sentenza tagħha Altmark (13), il-Qorti tal-Ġustizzja identifikat għadd ta’ kundizzjonijiet li jridu jiġu ssodisfati sabiex il-kumpens għall-forniment ta’ servizz ta’ interess ekonomiku ġenerali ma jkunx jikkostitwixxi għajnuna mill-Istat. Dawn il-kundizzjonijiet jiżguraw li l-kumpens limitat għall-kostijiet netti mġarrba minn impriżi effiċjenti għall-forniment ta’ servizz ta’ interess ekonomiku ġenerali ma jkunux jikkostitwixxu għajnuna mill-Istat skont it-tifsira tal-Artikolu 107(1) tat-Trattat. Jekk dawn il-kundizzjonijiet ma jiġux rispettati, il-kumpens ikun jikkostitwixxi għajnuna mill-Istat li tista’ tiġi ddikjarata kompatibbli abbażi tar-regoli tal-Unjoni applikabbli. Sabiex jiġi evitat li dan ir-Regolament jiġi applikat għaċ-ċirkomvenzjoni tal-kundizzjonijiet identifikati fis-Sentenza Altmark, u sabiex tiġi evitata li għajnuna de minimis mogħtija skont dan ir-Regolament taffettwa l-kummerċ minħabba l-akkumulazzjoni tagħha ma’ kumpens ieħor għall-istess servizz ta’ interess ekonomiku ġenerali, jenħtieġ li għajnuna de minimis skont dan ir-Regolament ma tkunx akkumulata ma’ xi kumpens ieħor fir-rigward tal-istess servizz, irrispettivament minn jekk din tkunx tikkostitwixxi għajnuna mill-Istat skont is-Sentenza Altmark jew għajnuna mill-Istat kompatibbli skont id-Deċiżjoni 2012/21/UE jew skont il-Komunikazzjoni tal-Kummissjoni - Qafas tal-Unjoni Ewropea għal għajnuna mill-Istat fil-forma ta’ kumpens tas-servizz pubbliku (14).

(22)

Għall-finijiet ta’ trasparenza, trattament ugwali u monitoraġġ effettiv, dan ir-Regolament jenħtieġ li japplika biss għall-għajnuna de minimis li għaliha huwa possibbli li jiġi kkalkulat l-ekwivalenti preċiż tal-għotja gross ex ante mingħajr il-ħtieġa li titwettaq valutazzjoni tar-riskju (“għajnuna de minimis trasparenti”). Kalkolu preċiż bħal dan jista’, pereżempju, isir għal għotjiet, sussidji fuq ir-rata tal-imgħax, eżenzjonijiet mit-taxxa limitati jew strumenti oħrajn li jipprevedu limitu li jassigura li l-limitu massimu rilevanti ma jinqabiżx. Il-previżjoni ta’ massimu tfisser li, sakemm l-ammont preċiż tal-għajnuna ma jkunx magħruf, l-Istat Membru jrid jassumi li l-ammont huwa ugwali għall-massimu biex jiżgura li diversi miżuri ta’ għajnuna flimkien ma jaqbżux il-limitu massimu stabbilit f’dan ir-Regolament u li jiġu applikati r-regoli dwar l-akkumulazzjoni.

(23)

Għall-finijiet ta’ trasparenza, trattament ugwali u l-applikazzjoni korretta tal-limitu massimu de minimis, jenħtieġ li l-Istati Membri kollha japplikaw l-istess metodu ta’ kalkolu għall-kalkolu tal-ammont totali ta’ għajnuna mogħtija. Biex jiġi ffaċilitat il-kalkolu, jenħtieġ li l-ammonti tal-għajnuniet mogħtija mhux fil-forma ta’ għotja fi flus kontanti jkunu kkonvertiti fl-ekwivalenti tagħhom ta’ għotja gross. Il-kalkolu tal-ekwivalenti ta’ għotja gross għal tipi trasparenti ta’ għajnuna, għajr għotjiet, jew ta’ għajnuna pagabbli f’għadd ta’ pagamenti, jeħtieġ l-użu tar-rati tal-imgħax tas-suq li jkunu qed jintużaw fil-mument li tkun ingħatat dik l-għajnuna. Sabiex tiġi ffaċilitata applikazzjoni uniformi, trasparenti u sempliċi tar-regoli dwar l-għajnuna mill-Istat, jenħtieġ li r-rati tas-suq applikabbli għall-finijiet ta’ dan ir-Regolament ikunu r-rati ta’ referenza stabbiliti f’konformità mal-Komunikazzjoni tal-Kummissjoni dwar ir-reviżjoni tal-metodu li jistabbilixxi r-rati ta’ referenza u ta’ skont (15).

(24)

Jenħtieġ li l-għajnuna fil-forma ta’ self, inkluża l-għajnuna għall-finanzjament ta’ riskju de minimis li tieħu forma ta’ self, titqies bħala għajnuna de minimis trasparenti jekk l-ekwivalenti ta’ għotja gross ikun ġie kkalkulat fuq il-bażi tar-rati tal-imgħax tas-suq prevalenti fil-mument li tkun ingħatat l-għajnuna. Sabiex jiġi ssimplifikat it-trattament ta’ self żgħir għal durata qasira, huwa meħtieġ li tiġi stabbilita regola ċara li tkun faċli biex tiġi applikata u li tqis kemm l-ammont tas-self kif ukoll id-durata tiegħu. Self li huwa garantit b’kollateral li jkopri mill-inqas 50 % tas-self u li ma jaqbiżx EUR 3 750 000 u durata ta’ 5 snin jew EUR 1 875 000 u durata ta’ 10 snin jista’ jitqies li għandu ekwivalenti ta’ għotja gross li ma taqbiżx il-limitu massimu de minimis. Dan huwa bbażat fuq l-esperjenza tal-Kummissjoni u minħabba l-inflazzjoni li seħħet mid-dħul fis-seħħ tar-Regolament (UE) Nru 360/2012 u l-iżvilupp stmat tal-inflazzjoni matul il-perjodu ta’ applikazzjoni ta’ dan ir-Regolament. Minħabba d-diffikultajiet fid-determinazzjoni tal-ekwivalenti ta’ għotja gross ta’ għajnuna mogħtija lil impriżi li jistgħu ma jkunux jistgħu jħallsu lura s-self (pereżempju, peress li impriża tkun soġġetta għal proċeduri kollettivi ta’ insolvenza jew peress li din tissodisfa kriterji skont il-liġi nazzjonali tagħha li titqiegħed fi proċeduri kollettivi ta’ insolvenza b’talba tal-kredituri tagħha) jenħtieġ li din ir-regola ma tapplikax għal tali impriżi.

(25)

Jenħtieġ li l-għajnuna inkluża f’injezzjonijiet ta’ kapital ma titqiesx bħala għajnuna de minimis trasparenti, ħlief jekk l-ammont totali tal-injezzjoni pubblika ma jaqbiżx il-limitu massimu de minimis. Jenħtieġ li l-għajnuna li tikkonsisti f’miżuri ta’ finanzjament tar-riskju li jieħdu l-forma ta’ investimenti ta’ ekwità jew kważi ekwità, kif imsemmi fil-linji gwida dwar il-finanzjament tar-riskju (16), ma titqiesx bħala għajnuna de minimis trasparenti ħlief meta l-miżura kkonċernata tipprovdi kapital li ma jaqbiżx il-limitu massimu de minimis.

(26)

Jenħtieġ li l-għajnuna li tikkonsisti f’garanziji, inkluża l-għajnuna ta’ finanzjament ta’ riskju de minimis li tieħu l-forma ta’ garanziji, titqies bħala trasparenti jekk l-ekwivalenti ta’ għotja gross ikun ġie kkalkulat fuq il-bażi ta’ safe-harbour premiums stabbiliti f’avviż tal-Kummissjoni għat-tip ta’ impriża kkonċernata (17). Jenħtieġ li dan ir-Regolament jistabbilixxi regoli ċari li jqisu kemm l-ammont tas-self sottostanti kif ukoll id-durata tal-garanzija. L-istabbiliment ta’ regoli ċari mistenni li jgħin biex jissimplifika t-trattament ta’ garanziji ta’ durata qasira li jiżguraw sa 80 % ta’ self relattivament żgħir, fejn it-telf jiġi sostnut proporzjonalment u bl-istess mod mis-sellief u mill-garanti, u l-irkupri netti ġġenerati mill-irkupru tas-self mit-titoli mogħtija mill-mutwatarju jnaqqsu proporzjonalment it-telf imġarrab mis-sellief u mill-garanti. Jenħtieġ li dawn ir-regoli ma jkunux japplikaw għal garanziji fuq tranżazzjonijiet sottostanti li ma jkunux self, bħal garanziji fuq tranżazzjonijiet ta’ ekwità. Abbażi tal-esperjenza tal-Kummissjoni u minħabba l-inflazzjoni li seħħet mid-dħul fis-seħħ tar-Regolament (UE) Nru 360/2012 u l-iżvilupp stmat tal-inflazzjoni matul il-perjodu ta’ validità ta’ dan ir-Regolament, il-garanzija jenħtieġ li titqies li għandha ekwivalenti ta’ għotja gross li ma taqbiżx il-limitu massimu de minimis fejn (i) il-garanzija ma taqbiżx it-80 % tas-self sottostanti; (ii) l-ammont garantit ma jaqbiżx il-EUR 5 625 000; u (iii) id-durata tal-garanzija ma taqbiżx il-5 snin. L-istess japplika meta (i) il-garanzija ma taqbiżx it-80 % tas-self sottostanti; (ii) l-ammont garantit ma jaqbiżx iż-EUR 2 813 036; u (iii) id-durata tal-garanzija ma taqbiżx l-10 snin.

(27)

Barra minn hekk, l-Istati Membri jistgħu jużaw metodoloġija biex jiġi kkalkulat l-ekwivalenti ta’ għotja gross tal-garanziji, li tkun ġiet notifikata lill-Kummissjoni skont Regolament ieħor tal-Kummissjoni fil-qasam tal-għajnuna mill-Istat applikabbli f’dak iż-żmien u li tkun ġiet aċċettata mill-Kummissjoni bħala konformi mal-Avviż ta’ Garanzija (18), jew kull avviż suċċessiv. L-Istati Membri jistgħu jagħmlu dan biss jekk il-metodoloġija aċċettata tiffoka b’mod espliċitu fuq it-tip ta’ garanzija u t-tip ta’ tranżazzjoni sottostanti inkwistjoni bħala parti mill-applikazzjoni ta’ dan ir-Regolament.

(28)

Wara li ssir notifika minn Stat Membru, jenħtieġ li l-Kummissjoni teżamina jekk miżura li ma tikkonsistix f’għotja, self, garanzija, injezzjoni ta’ kapital, miżura ta’ finanzjament ta’ riskju li tieħu l-forma ta’ investiment ta’ ekwità jew kważi ekwità, eżenzjonijiet limitati mit-taxxa jew strumenti oħra li jipprevedu limitu, twassalx għal ekwivalenti ta’ għotja gross li ma taqbiżx il-limitu massimu de minimis u tistax għalhekk tidħol fil-kamp ta’ applikazzjoni ta’ dan ir-Regolament.

(29)

Il-Kummissjoni għandha d-dmir li tiżgura li r-regoli dwar l-għajnuna mill-Istat jiġu rrispettati u li jkunu f’konformità mal-prinċipju ta’ kooperazzjoni leali stabbilit fl-Artikolu 4(3) tat-Trattat dwar l-Unjoni Ewropea. Jenħtieġ li l-Istati Membri jiffaċilitaw it-twettiq ta’ dan il-kompitu billi jkollhom fis-seħħ l-għodod meħtieġa biex jiżguraw li l-ammont totali ta’ għajnuna de minimis mogħtija lil impriża waħda għall-forniment ta’ servizzi ta’ interess ekonomiku ġenerali skont ir-regola de minimis ma jaqbiżx il-limitu massimu ġenerali permissibbli. Jenħtieġ li l-Istati Membri jimmonitorjaw l-għajnuna mogħtija biex jiżguraw li l-limitu massimu stipulat f’dan ir-Regolament ma jinqabiżx u li jkun hemm konformità mar-regoli tal-akkumulazzjoni. Sabiex jikkonformaw ma’ dan l-obbligu, jenħtieġ li l-Istati Membri jipprovdu informazzjoni kompluta dwar l-għajnuna de minimis mogħtija f’reġistru ċentrali fil-livell tal-Unjoni jew dak nazzjonali, mhux aktar tard mill-1 ta’ Jannar 2026, u jivverifikaw li kull għotja ġdida ta’ għajnuna ma taqbiżx il-limitu massimu stipulat f’dan ir-Regolament. Ir-reġistru ċentrali se jgħin biex jonqos il-piż amministrattiv fuq l-impriżi. L-impriżi ma jibqgħux meħtieġa, skont dan ir-Regolament, li jżommu kont ta’ kwalunkwe għajnuna de minimis oħra riċevuta, u jiddikjarawha, ladarba r-reġistru ċentrali jkun fih data għal perjodu ta’ 3 snin. Għall-finijiet ta’ dan ir-Regolament, il-kontroll tal-konformità mal-limitu massimu stabbilit f’dan ir-Regolament għandu, fil-prinċipju, ikun ibbażat fuq l-informazzjoni inkluża fir-reġistru ċentrali.

(30)

Kull Stat Membru jista’ jistabbilixxi reġistru ċentrali nazzjonali. Ir-reġistri ċentrali nazzjonali eżistenti li jissodisfaw ir-rekwiżiti stabbiliti f’dan ir-Regolament jistgħu jibqgħu jintużaw. Il-Kummissjoni se tistabbilixxi reġistru ċentrali fil-livell tal-Unjoni, li jista’ jintuża mill-Istati Membri mill-1 ta’ Jannar 2026.

(31)

Meta jitqies li l-piż amministrattiv u l-ostakli regolatorji jikkostitwixxu problema għall-maġġoranza tal-SMEs u li l-Kummissjoni timmira li tnaqqas b’25 % il-piż li jirriżulta mir-rekwiżiti ta’ rapportar (19), jenħtieġ li kwalunkwe reġistru ċentrali jiġi stabbilit b’tali mod li jitnaqqas il-piż amministrattiv. Prattiki amministrattivi tajbin, bħal dawk stabbiliti fir-Regolament dwar il-Gateway Diġitali Unika (20), jistgħu jintużaw bħala referenza għall-istabbiliment u t-tħaddim tar-reġistru ċentrali fil-livell tal-Unjoni u tar-reġistri ċentrali nazzjonali.

(32)

Ir-regoli dwar it-trasparenza għandhom l-għan li jiżguraw konformità aħjar, responsabbiltà akbar, evalwazzjoni bejn il-pari u fl-aħħar mill-aħħar infiq pubbliku aktar effikaċi. Il-pubblikazzjoni, f’reġistru ċentrali, tal-isem tal-benefiċjarju tal-għajnuna sservi l-interess leġittimu ta’ trasparenza biex il-pubbliku jingħata informazzjoni dwar l-użu tal-fondi tal-Istati Membri. Ma tinterferix bla bżonn mad-dritt tal-benefiċjarji għall-protezzjoni tad-data personali tagħhom sakemm il-pubblikazzjoni fir-reġistru ċentrali tad-data personali tikkonforma mar-regoli tal-Unjoni dwar il-protezzjoni tad-data (21). L-Istati Membri jenħtieġ li jkollhom l-għażla li jippsewdonimizzaw entrati speċifiċi meta jkun meħtieġ biex jikkonformaw mar-regoli tal-Unjoni dwar il-protezzjoni tad-data.

(33)

Dan ir-Regolament jenħtieġ li jistabbilixxi sett ta’ kundizzjonijiet li skonthom kwalunkwe miżura fil-kamp ta’ applikazzjoni ta’ dan ir-Regolament tista’ titqies li ma għandha l-ebda effett fuq il-kummerċ bejn l-Istati Membri u li ma toħloqx distorsjoni jew thedded li toħloq distorsjoni tal-kompetizzjoni. Għal din ir-raġuni, jenħtieġ li dan ir-Regolament japplika wkoll għall-għajnuna mogħtija qabel id-dħul fis-seħħ tiegħu jekk il-kundizzjonijiet kollha stabbiliti fih jiġu ssodisfati. Bl-istess mod, jenħtieġ li l-appoġġ li kien konformi mal-kriterji tar-Regolament (UE) Nru 360/2012 mogħti bejn id-29 ta’ April 2012 u l-31 ta’ Diċembru 2023 jitqies bħala eżentat min-notifika skont l-Artikolu 108(3) tat-Trattat.

(34)

Wara li tiġi kkunsidrata l-frekwenza li biha huwa ġeneralment meħtieġ li tiġi riveduta l-politika dwar l-għajnuna mill-Istat, jenħtieġ li l-perjodu ta’ applikazzjoni ta’ dan ir-Regolament ikun limitat. Dan ir-Regolament jissostitwixxi r-Regolament (UE) Nru 360/2012 hekk kif jiskadi.

(35)

Jekk il-perjodu tal-applikazzjoni ta’ dan ir-Regolament jiskadi mingħajr ma jkun ġie estiż, jenħtieġ li l-Istati Membri jkollhom perjodu ta’ aġġustament ta’ 6 xhur għall-għajnuna de minimis koperta minn dan ir-Regolament.