(1)

Iċ-ċertifikat COVID Diġitali tal-UE introdott bir-Regolament (UE) 2021/953 tal-Parlament Ewropew u tal-Kunsill (1) fi żmien qasir sar standard globali għaċ-ċertifikati tat-tilqim, tat-testijiet u tal-fejqan u għandu 51 pajjiż terz u territorju konnessi mas-sistema lil hinn mill-Istati Membri kollha. Permezz tad-dimensjoni esterna tiegħu, iċ-Ċertifikat COVID Diġitali tal-UE wera wkoll li huwa l-aktar soluzzjoni u għodda użata b’mod wiesa’ għall-promozzjoni tal-ivvjaġġar internazzjonali sikur u tal-irkupru fuq livell globali. Barra mill-użu tiegħu fil-qasam tal-ivvjaġġar, l-użu taċ-ċertifikat COVID Diġitali tal-UE ppromwova l-kontinwità tat-tilqim transfruntier.

(2)

Iċ-ċertifikat COVID Diġitali tal-UE kien ta’ importanza kbira fis-salvagwardja tal-moviment liberu u tal-ivvjaġġar u t-teknoloġija sottostanti tiegħu tista’ tkompli sservi bħala għodda, utli biex inkunu mħejjija aħjar għal kriżijiet tas-saħħa futuri possibbli, li tippermetti liċ-ċittadini u lin-negozji jtaffu l-impatt tal-mard komunikabbli u jiżguraw livell adegwat ta’ tħejjija xierqa għall-kriżijiet tas-saħħa. Dan huwa wkoll konformi mar-rapport speċjali tal-Qorti Ewropea tal-Awdituri 01/2023 bit-titolu “Għodod li ffaċilitaw l-ivvjaġġar ġewwa l-UE matul il-pandemija tal-COVID-19 – Inizjattivi rilevanti b’impatt li jvarja bejn suċċess u użu limitat”.

(3)

Ir-Regolament (UE) 2021/953 għandu jiskadi fit-30 ta’ Ġunju 2023. Għalhekk, jenħtieġ li mill-1 ta’ Lulju 2023, il-ħruġ u l-aċċettazzjoni possibbli taċ-ċertifikati COVID-19 tat-tilqim, tat-testijiet u tal-fejqan isiru abbażi tal-kundizzjonijiet stabbiliti bil-liġijiet nazzjonali tal-Istati Membri u f’konformità magħhom. Barra minn hekk, ir-referenzi f’din ir-rakkomandazzjoni għall-atti ta’ implimentazzjoni adottati skont ir-Regolament (UE) 2021/953 qed isiru biss għall-faċilità ta’ referenza, u ma għandhomx jinftiehmu bħala li jżommu fis-seħħ dawn l-atti ta’ implimentazzjoni jew is-setgħat tal-Kummissjoni li tadotta u temenda atti ta’ implimentazzjoni skont ir-Regolament (UE) 2021/953. Kwalunkwe referenza għall-atti ta’ implimentazzjoni adottati qabel skont ir-Regolament (UE) 2021/953 għandha tinftiehem bħala referenzi statiċi għall-atti msemmija, fil-verżjoni tagħhom applikabbli fit-30 ta’ Ġunju 2023.

(4)

L-Organizzazzjoni Dinjija tas-Saħħa (WHO) ser tistabbilixxi network globali taċ-ċertifikazzjoni tas-saħħa diġitali. In-network globali taċ-ċertifikazzjoni tas-saħħa diġitali huwa mekkaniżmu li jappoġġa l-verifika taċ-ċertifikati li jinħarġu mill-parteċipanti fin-network globali taċ-ċertifikazzjoni tas-saħħa diġitali. Inizjalment, dawn iċ-ċertifikati ser jikkonċernaw liċ-ċertifikati tal-COVID-19 u jistgħu, fi stadju aktar tard, jinkludu wkoll iċ-ċertifikazzjoni ta’ dokumenti oħra, bħal rekords ta’ immunizzazzjoni ta’ rutina u ċ-Ċertifikat Internazzjonali tat-Tilqim jew Profilassi stipulati fl-Anness 6 tar-Regolamenti Internazzjonali tas-Saħħa (2005), għall-finijiet tal-ivvjaġġar internazzjonali u l-kontinwità tal-kura.

(5)

Jenħtieġ li l-istabbiliment ta’ sistemi biex jittaffa l-impatt tal-kriżijiet tas-saħħa globali fuq l-ivvjaġġar għaċ-ċittadini u n-negozji jitqies bħala pilastru ewlieni tal-aġenda ta’ tħejjija tal-kriżi globali tas-saħħa tal-Unjoni. Il-parteċipazzjoni fin-network globali taċ-ċertifikazzjoni tas-saħħa diġitali tad-WHO tikkontribwixxi għall-allinjament globali tal-istandards taċ-ċertifikati tas-saħħa u għall-istabbiliment ta’ sistema għar-rikonoxximent taċ-ċertifikati tas-saħħa diġitali għall-ivvjaġġar internazzjonali u l-kontinwità tal-kura.

(6)

In-network globali taċ-ċertifikazzjoni tas-saħħa diġitali li qed jiġi żviluppat mid-WHO jadotta l-qafas ta’ fiduċja, il-prinċipji u t-teknoloġiji miftuħa taċ-Ċertifikat COVID Diġitali tal-UE fl-ambitu tal-istruttura tiegħu stess. Il-Kummissjoni beħsiebha tikkoopera mill-qrib mad-WHO bil-ħsieb li tiżgura li n-network globali taċ-ċertifikazzjoni tas-saħħa diġitali jkun koerenti mal-ispeċifikazzjonijiet tekniċi stabbiliti qabel fid-Deċiżjoni ta’ Implimentazzjoni tal-Kummissjoni (UE) 2021/1073 (2). Jenħtieġ li l-Istati Membri jiġu mħeġġa jikkonnettjaw man-network globali taċ-ċertifikazzjoni tas-saħħa diġitali tad-WHO mill-aktar fis possibbli u sa mhux aktar tard mill-31 ta’ Diċembru 2023. Għal tranżizzjoni bla xkiel mis-sistema taċ-Ċertifikat COVID Diġitali tal-UE għan-network globali taċ-ċertifikazzjoni tas-saħħa diġitali tad-WHO, jenħtieġ li l-Istati Membri jiġu mistiedna joħorġu ċertifikati tal-firem tad-dokumenti ġodda li jintużaw għall-ħruġ taċ-Ċertifikati COVID Diġitali tal-UE qabel l-iskadenza tar-Regolament (UE) 2021/953 biex jiżguraw il-validità teknika massima tagħhom u jirreġistrawhom fil-gateway tal-interoperabbiltà tal-qafas ta’ fiduċja stabbilit skont dak ir-Regolament (il-“Gateway tal-UE”).

(7)

Il-Kummissjoni beħsiebha tiżgura tranżizzjoni bla xkiel għall-Istati Membri biex jissieħbu fin-network globali taċ-ċertifikazzjoni tas-saħħa diġitali tad-WHO, billi żżomm il-Gateway tal-UE sal-31 ta’ Diċembru 2023 b’mod li jappoġġa l-objettivi ta’ din ir-Rakkomandazzjoni. Għal dak l-għan, il-Kummissjoni beħsiebha tiffinanzja l-Gateway tal-UE permezz tal-Programm Ewropa Diġitali stabbilit bir-Regolament (UE) 2021/694 tal-Parlament Ewropew u tal-Kunsill (3). Dan għandu jagħti biżżejjed żmien lill-Istati Membri u lill-pajjiżi terzi konnessi mal-Gateway tal-UE biex jadottaw il-proċeduri meħtieġa biex jissieħbu man-network globali taċ-ċertifikazzjoni tas-saħħa diġitali tad-WHO.

(8)

Iċ-ċittadini u r-residenti kollha tal-Unjoni li jivvjaġġaw barra mill-Unjoni jenħtieġ li jkollhom għad-dispożizzjoni tagħhom mezzi biex jagħtu prova tal-istatus tagħhom fir-rigward tal-COVID-19, kull meta dan jintalab speċifikament għall-ivvjaġġar barra mill-Unjoni. Għalhekk, ladarba jkunu konnessi man-network globali taċ-ċertifikazzjoni tas-saħħa diġitali tad-WHO, jenħtieġ li l-Istati Membri jiġu mistiedna wkoll joħorġu, fuq talba, ċertifikati kompatibbli mal-format stabbilit min-network globali taċ-ċertifikazzjoni tas-saħħa diġitali tad-WHO, abbażi tal-ispeċifikazzjonijiet tekniċi stabbiliti qabel fid-Deċiżjoni ta’ Implimentazzjoni (UE) 2021/1073, għall-finijiet tal-faċilitazzjoni tal-ivvjaġġar internazzjonali lejn pajjiżi terzi li jirrikjedu tali ċertifikati, b’mod partikolari f’każ ta’ emerġenza tas-saħħa pubblika ta’ tħassib internazzjonali. Minbarra li jiffaċilita l-ivvjaġġar internazzjonali, dan il-ħruġ ta’ ċertifikati jista’ jikkontribwixxi għall-allinjament globali tal-istandards taċ-ċertifikati tas-saħħa u għall-iżvilupp ta’ sistema għar-rikonoxximent taċ-ċertifikati tas-saħħa diġitali biex tiġi ffaċilitata l-kontinwità tal-kura.

(9)

Jenħtieġ li l-Istati Membri joħorġu tali ċertifikati f’format diġitali jew stampat, jew fit-tnejn li huma. Jenħtieġ li d-detenturi prospettivi jkollhom id-dritt li jirċievu ċ-ċertifikati fil-format tal-għażla tagħhom. Jenħtieġ li l-informazzjoni li tinsab fiċ-ċertifikati tintwera wkoll f’forma li tinqara mill-bniedem u li tkun ipprovduta, tal-anqas, bil-lingwa jew bil-lingwi uffiċjali tal-Istat Membru emittenti u bl-Ingliż.

(10)

Jenħtieġ li l-adozzjoni taċ-Ċertifikat COVID Diġitali tal-UE min-network globali taċ-ċertifikazzjoni tas-saħħa diġitali tad-WHO tippermetti lill-pajjiżi terzi li għad għandhom fis-seħħ rekwiżiti relatati mal-COVID-19 bħala kundizzjonijiet għad-dħul fit-territorji tagħhom, u li huma konnessi mal-“Gateway tal-UE”, jaċċettaw u jivverifikaw ċertifikati maħruġa kemm qabel kif ukoll ċertifikati maħruġa wara l-1 ta’ Lulju 2023.

(11)

Mill-perspettiva tal-vjaġġaturi lejn l-Unjoni, ladarba jkunu konnessi man-network globali taċ-ċertifikazzjoni tas-saħħa diġitali tad-WHO, sabiex jiġi żgurat li t-tħassib dwar is-saħħa pubblika relatat mal-pandemija tal-COVID-19 ikun jista’ jiġi indirizzat b’mod adegwat, l-Istati Membri jingħataw il-parir li jżommu l-kapaċità li jaċċettaw u jivverifikaw iċ-ċertifikati maħruġa minn pajjiżi terzi skont in-network globali taċ-ċertifikazzjoni tas-saħħa diġitali tad-WHO li jkomplu jissodisfaw l-istandards għoljin, li ġew stabbiliti skont ir-Regolament (UE) 2021/953. Meta l-Istati Membri jirrikjedu prova tat-tilqim, tat-testijiet jew tal-irkupru mill-COVID-19 sabiex ineħħu r-restrizzjonijiet fuq l-ivvjaġġar lejn l-Unjoni, jenħtieġ li jaċċettaw ċertifikati tal-COVID-19 li jkunu konformi teknikament man-network globali taċ-ċertifikazzjoni tas-saħħa diġitali tad-WHO.

(12)

Fil-konklużjonijiet tiegħu tad-9 ta’ Diċembru 2022, dwar it-tilqim bħala waħda mill-aktar għodod effettivi għall-prevenzjoni tal-mard u t-titjib tas-saħħa pubblika, il-Kunsill appella lill-Kummissjoni biex “tesplora l-valur miżjud ta’ verżjoni diġitali taċ-ċertifikati tat-tilqim, filwaqt li tqis l-esperjenzi ta’ infrastrutturi diġitali Ewropej u għodod eżistenti oħra, bħaċ-Ċertifikat Internazzjonali tat-Tilqim jew Profilassi”. Żviluppi simili huma ppjanati mid-WHO billi biħsiebha tkompli tiżviluppa n-network globali taċ-ċertifikazzjoni tas-saħħa diġitali tagħha, sabiex, pereżempju, tappoġġa d-diġitalizzazzjoni taċ-Ċertifikat Internazzjonali tat-Tilqim u Profilassi, jew taċ-ċertifikati tat-tilqim għall-immunizzazzjoni ta’ rutina. Għalhekk, l-Istati Membri huma mistiedna jipparteċipaw b’mod attiv fl-isforz biex in-network jiġi żviluppat aktar, kif ukoll joħorġu, jaċċettaw u jivverifikaw tipi oħra ta’ ċertifikati tat-tilqim jew data dwar is-saħħa, skont ma jkun rilevanti.

(13)

Matul perjodu tranżitzzjonali sal-31 ta’ Diċembru 2023, u sabiex tiġi żgurata tranżizzjoni bla xkiel għan-network globali taċ-ċertifikazzjoni tas-saħħa diġitali tad-WHO, l-Istati Membri li għadhom ma kkonnettjawx man-network globali taċ-ċertifikazzjoni tas-saħħa diġitali tad-WHO huma mħeġġa biex, fuq talba, b’mod partikolari f’każ ta’ emerġenza tas-saħħa pubblika ddikjarata ta’ tħassib internazzjonali, joħorġu, f’konformità mad-dritt nazzjonali, ċertifikati COVID-19 tat-tilqim, tat-testijiet u tal-fejqan fil-format kompatibbli mal-ispeċifikazzjonijiet tekniċi stabbiliti qabel fid-Deċiżjoni ta’ Implimentazzjoni (UE) 2021/1073, dment li bażi legali għall-ħruġ ta’ tali ċertifikati tkun stabbilita fid-dritt nazzjonali tagħhom. Barra minn hekk, matul dan il-perjodu tranżizzjonali, meta l-Istati Membri jirrikjedu prova taċ-ċertifikati COVID-19 sabiex ir-restrizzjonijiet ma jiġux applikati fuq l-ivvjaġġar lejn l-Unjoni, huma mħeġġa jaċċettaw provi tat-tilqim, tal-fejqan jew tal-ittestjar fir-rigward tal-COVID-19 li qabel kienu koperti minn att ta’ implimentazzjoni adottat skont l-Artikolu 3(10) jew l-Artikolu 8(2) tar-Regolamenti (UE) 2021/953, f’konformità mal-approċċ stabbilit fir-Rakkomandazzjoni tal-Kunsill (UE) 2022/2548 (4).

(14)

Matul l-istess perjodu, l-Istati Membri li għadhom ma kkonnettjawx man-network globali taċ-ċertifikazzjoni tas-saħħa diġitali tad-WHO huma wkoll imħeġġa li jibqgħu konnessi wkoll mal-Gateway tal-UE, sakemm tali gateway ikun qed jinżamm mill-Kummissjoni. Il-parir għal dawk l-Istati Membri li diġà kkonnettjaw man-network globali taċ-ċertifikazzjoni tas-saħħa diġitali tad-WHO huwa li jissinkronizzaw l-informazzjoni li jtellgħu fin-network globali taċ-ċertifikazzjoni tas-saħħa diġitali tad-WHO mal-Gateway tal-UE.

(15)

L-Istati Membri huma mħeġġa jagħtu effett lil din ir-Rakkomandazzjoni mill-1 ta’ Lulju 2023, li huwa l-jum wara l-iskadenza tar-Regolament (UE) 2021/953, sabiex jiġi evitat kwalunkwe tfixkil possibbli, speċjalment fir-rigward tal-ivvjaġġar internazzjonali lejn pajjiżi terzi li għadhom jeħtieġu ċertifikati tal-COVID. B’mod speċifiku fir-rigward tal-ħruġ ta’ ċertifikat tal-firem tad-dokumenti ġdid t, l-Istati Membri jistgħu joħorġu tali ċertifikat biss waqt li r-Regolament (UE) 2021/953 ikun għadu fis-seħħ. Għalhekk huma mistiedna jagħtu lil dan iċ-ċertifikat il-validità teknika massima possibbli u jirreġistrawh fil-Gateway tal-UE qabel l-iskadenza tar-Regolament (UE) 2021/953 fit-30 ta’ Ġunju 2023.

(16)

Ir-Regolament (UE) 2016/679 tal-Parlament Ewropew u tal-Kunsill (5) japplika għall-ipproċessar tad-data personali mwettaq fl-implimentazzjoni ta’ din ir-Rakkomandazzjoni. Għalhekk, jenħtieġ li l-Istati Membri jiżguraw f’kull ħin li jkun hemm konformità mad-dispożizzjonijiet rilevanti tad-dritt tal-Unjoni dwar id-data personali u b’mod partikolari li jkun hemm konformità mal-prinċipju tal-legalità stabbilit fir-Regolament (UE) 2016/679.