(1)

Ir-Regolament ta’ Delega tal-Kummissjoni (UE) Nru 1062/2014 (2) jistabbilixxi lista ta’ sustanzi attivi eżistenti li jridu jiġu evalwati biex possibbilment jiġu approvati għall-użu fil-prodotti bijoċidali. Dik il-lista tinkludi l-(RS)-3-Allil-2-metil-4-ossoċiklopent-2-enil-(1R,3R;1R,3S)-2,2-dimetil-3-(2-metilprop-1-enil)-ċiklopropankarbossilat (taħlita ta’ 4 isomeri 1R trans, 1R: 1R trans, 1S: 1R cis, 1R: 1R cis, 1S 4:4:1:1) (‘d-Alletrina) (Nru CAS: 231937-89-6).

(2)

Id-d-Alletrina ġiet evalwata għall-użu fi prodotti bijoċidali tat-tip ta’ prodott 18, (insettiċidi, akariċidi u prodotti għall-kontroll ta’ artropodi oħra), kif deskritt fl-Anness V tar-Regolament (UE) Nru 528/2012.

(3)

Il-Ġermanja nħatret bħala l-Istat Membru relatur u l-awtorità kompetenti tal-evalwazzjoni tagħha ressqet ir-rapport tal-valutazzjoni flimkien mal-konklużjonijiet tagħha lill-Aġenzija Ewropea għas-Sustanzi Kimiċi (“l-Aġenzija”) fil-11 ta’ Jannar 2017. Wara l-preżentazzjoni tar-rapport tal-valutazzjoni, saru diskussjonijiet f’laqgħat tekniċi organizzati mill-Aġenzija.

(4)

F’konformità mal-Artikolu 75(1), il-punt (a), tar-Regolament (UE) Nru 528/2012, il-Kumitat dwar il-Prodotti Bijoċidali jħejji l-opinjoni tal-Aġenzija rigward l-applikazzjonijiet għall-approvazzjoni tas-sustanzi attivi. F’konformita mal-Artikolu 7(2) tar-Regolament ta’ Delega (UE) Nru 1062/2014, il-Kumitat dwar il-Prodotti Bijoċidali adotta l-opinjoni tal-Aġenzija fit-12 ta’ Ottubru 2021 (3), filwaqt li qies il-konklużjonijiet tal-awtorità kompetenti tal-evalwazzjoni.

(5)

Skont l-opinjoni tal-Aġenzija, il-prodotti bijoċidali tat-tip ta’ prodott 18 li fihom id-d-Alletrina ma jistgħux ikunu mistennija li jissodisfaw il-kriterji stabbiliti fil-punti (b)(iii) u (iv) tal-Artikolu 19(1) tar-Regolament (UE) Nru 528/2012.

(6)

Fl-opinjoni tagħha, l-Aġenzija nnotat li l-ispeċifikazzjonijiet ta’ referenza proposti, stabbiliti abbażi tad-data pprovduta minn wieħed mill-applikanti, mhumiex konformi mal-kompożizzjoni tal-materjal li ntuża għall-ittestjar biex tiġi ġġenerata d-data tossikoloġika pprovduta mill-applikanti. B’riżultat ta’ dan, abbażi tad-data pprovduta fl-applikazzjonijiet, ma setax jiġi stabbilit jekk il-prodotti bijoċidali rappreżentattivi setgħux jissodisfaw il-kriterji msemmija fl-Artikolu 19(1), il-punt (b) tar-Regolament (UE) Nru 528/2012.

(7)

Skont l-opinjoni tal-Aġenzija, abbażi tad-data tossikoloġika disponibbli, ġie identifikat riskju inaċċettabbli għall-pubbliku ġenerali minħabba l-esponiment sekondarju għall-fotometaboliti ġenotossiċi ffurmati wara l-applikazzjoni tal-prodotti rappreżentattivi.

(8)

Barra minn hekk, skont l-opinjoni tal-Aġenzija, ġie identifikat riskju inaċċettabbli għall-ambjent għall-kompartiment akkwatiku (l-ilma tal-wiċċ u s-sediment) u għall-ħamrija.

(9)

Bħala konklużjoni, ma seta’ jiġi identifikat l-ebda użu sikur meta jitqiesu r-riskji għas-saħħa tal-bniedem u għall-ambjent għal kull wieħed mill-prodotti bijoċidali rappreżentattivi sottomessi fl-applikazzjonijiet.

(10)

Għalhekk, il-kundizzjonijiet għall-approvazzjoni tad-d-Alletrina stabbiliti fl-Artikolu 4(1) tar-Regolament (UE) Nru 528/2012 ma ġewx issodisfati.

(11)

Filwaqt li titqies l-opinjoni tal-Aġenzija, mhuwiex xieraq li d-d-Alletrina tiġi approvata għall-użu fil-prodotti bijoċidali tat-tip ta’ prodott 18.

(12)

Il-miżuri previsti f’din id-Deċiżjoni huma skont l-opinjoni tal-Kumitat Permanenti dwar il-Prodotti Bijoċidali,