(1)

Ir-Regolament (KE) Nru 1831/2003 jipprevedi l-awtorizzazzjoni ta’ addittivi għall-użu fl-għalf tal-annimali u r-raġunijiet u l-proċeduri għall-għoti ta’ tali awtorizzazzjoni.

(2)

Il-benżoat tas-sodju ġie awtorizzat għal 10 snin bħala addittiv tal-għalf għall-qżieqeż miftuma bir-Regolament ta’ Implimentazzjoni tal-Kummissjoni (UE) Nru 496/2011 (2).

(3)

F’konformità mal-Artikolu 14(1) tar-Regolament (KE) Nru 1831/2003, flimkien mal-Artikolu 7 tiegħu, tressqet applikazzjoni mid-detentur tal-awtorizzazzjoni għat-tiġdid tal-awtorizzazzjoni tal-benżoat tas-sodju għall-qżieqeż miftuma u għal użu ġdid għall-qżieqeż ta’ Suidae oħra, bit-talba li dak l-addittiv jiġi kklassifikat fil-kategorija tal-addittivi “addittivi żootekniċi” u fil-grupp funzjonali “addittivi żootekniċi oħra”. Flimkien ma’ dik l-applikazzjoni ntbagħtu d-dettalji u d-dokumenti meħtieġa skont l-Artikolu 7(3) u l-Artikolu 14(2) ta’ dak ir-Regolament.

(4)

Fl-opinjoni tagħha tad-29 ta’ Settembru 2021 (3), l-Awtorità Ewropea dwar is-Sigurtà fl-Ikel (“l-Awtorità”) ikkonkludiet li, bil-kundizzjonijiet tal-użu proposti, il-benżoat tas-sodju ma għandux effett avvers fuq is-saħħa tal-qżieqeż miftuma, is-sikurezza tal-konsumaturi jew l-ambjent. Din il-konklużjoni tista’ tiġi estiża għal Suidae oħra li jkunu qed jikbru. L-Awtorità kkonkludiet li jenħtieġ li l-addittiv jitqies bħala sensitizzatur tal-ġilda u li l-formulazzjoni tat-trab tal-addittiv tirrappreżenta riskju mill-inalazzjoni. Għalhekk, il-Kummissjoni tqis li jenħtieġ li jittieħdu miżuri protettivi xierqa sabiex jiġu evitati effetti avversi fuq is-saħħa tal-bniedem, b’mod partikolari fir-rigward tal-utenti tal-addittiv. Barra minn hekk, abbażi tad-data dwar l-effikaċja evalwata qabel, l-Awtorità kkonkludiet li l-addittiv għandu l-potenzjal li jkun effikaċi fil-qżieqeż miftuma. Il-konklużjonijiet dwar l-effikaċja li tintlaħaq fil-qżieqeż miftuma jistgħu jiġu estiżi għal speċijiet oħra tas-Suidae li jkunu qed jikbru u li jkunu fl-istadju fiżjoloġiku korrispondenti. L-Awtorità ma tqisx li hemm bżonn rekwiżiti speċifiċi għas-sorveljanza ta’ wara t-tqegħid fis-suq. Ivverifikat ukoll ir-rapport dwar il-metodu ta’ analiżi tal-addittiv tal-għalf fl-għalf li ġie ppreżentat mil-Laboratorju ta’ Referenza stabbilit bir-Regolament (KE) Nru 1831/2003.

(5)

Il-valutazzjoni tal-benżoat tas-sodju turi li l-kundizzjonijiet għall-awtorizzazzjoni, kif previsti fl-Artikolu 5 tar-Regolament (KE) Nru 1831/2003, huma ssodisfati. Għalhekk, jenħtieġ li l-awtorizzazzjoni ta’ dak l-addittiv tiġġedded għall-qżieqeż miftuma u jenħtieġ li jiġi awtorizzat l-użu tiegħu għall-qżieqeż ta’ speċijiet Suidae oħra fl-istadju fiżjoloġiku korrispondenti, kif speċifikat fl-Anness ta’ dan ir-Regolament.

(6)

B’konsegwenza tat-tiġdid tal-awtorizzazzjoni tal-benżoat tas-sodju bħala addittiv tal-għalf bil-kundizzjonijiet stipulati fl-Anness ta’ dan ir-Regolament, jenħtieġ li r-Regolament ta’ Implimentazzjoni (UE) Nru 496/2011 jitħassar.

(7)

Billi l-applikazzjoni immedjata tal-modifiki tal-kundizzjonijiet tal-awtorizzazzjoni għas-sustanza kkonċernata mhijiex meħtieġa minħabba raġunijiet ta’ sikurezza, jixraq li jingħata perjodu ta’ tranżizzjoni biex il-partijiet interessati jħejju ruħhom biex jissodisfaw ir-rekwiżiti l-ġodda li jirriżultaw mit-tiġdid tal-awtorizzazzjoni.

(8)

Il-miżuri previsti f’dan ir-Regolament huma skont l-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,