(1)

Il-pandemija tal-COVID-19 qed taffettwa b’mod sever lin-nies, lill-kumpaniji, lis-sistemi tal-kura tas-saħħa u lill-ekonomiji tal-Istati Membri. Il-Kummissjoni, fil-Komunikazzjoni tagħha tas-27 ta’ Mejju 2020 intitolata “Il-mument tal-Ewropa: Tiswija u Tħejjija għall-Ġenerazzjoni li Jmiss”, saħqet li l-likwidità u l-aċċess għal finanzjament se jkunu sfida kontinwa. Għalhekk huwa kruċjali li jiġi appoġġjat l-irkupru mix-xokk ekonomiku sever ikkawżat mill-pandemija tal-COVID-19 bl-introduzzjoni ta’ emendi mmirati għal liġi eżistenti tal-Unjoni dwar is-servizzi finanzjarji. Dawk l-emendi jiffurmaw pakkett ta’ miżuri u qed jigu adottati taħt it-tikketta “Pakkett ta’ Rkupru tas-Swieq Kapitali”.

(2)

Ir-Regolament (UE) 2017/1129 tal-Parlament Ewropew u tal-Kunsill (3) jistabbilixxi rekwiżiti għat-tfassil, l-approvazzjoni u d-distribuzzjoni tal-prospett li għandu jiġi ppubblikat meta titoli jiġu offruti lill-pubbliku jew jiġu ammessi għall-kummerċ f’suq regolat li jinstab jew li jopera fi ħdan Stat Membru. Bħala parti mill-pakkett ta’ miżuri biex l-emittenti jiġu megħjuna jirkupraw mix-xokk ekonomiku li jirriżulta mill-pandemija tal-COVID-19, huma meħtieġa emendi mmirati għar-reġim tal-prospett. Jenħtieġ li dawk l-emendi jippermettu lill-emittenti u lill-intermedjarji finanzjarji biex inaqqsu l-ispejjeż u jeħilsu r-riżorsi għall-fażi ta’ rkupru immedjatament wara l-pandemija tal-COVID-19. Dawk l-emendi jenħtieġ li jibqgħu konformi mal-objettivi ġenerali tar-Regolament (UE) 2017/1129 sabiex jitrawwem il-ġbir ta’ fondi permezz tas-swieq kapitali, jiġi żgurat livell għoli ta’ protezzjoni tal-konsumaturi u tal-investituri, tiġi xprunata l-konverġenza superviżorja fl-Istati Membri kollha u jiġi żgurat il-funzjonament xieraq tas-suq intern. Dawk l-emendi jenħtieġ li jqisu wkoll b’mod speċifiku sa liema punt il-pandemija tal-COVID-19 affettwat is-sitwazzjoni preżenti tal-emittenti u l-prospetti futuri tagħhom.

(3)

Il-kriżi tal-COVID-19 tagħmel lill-kumpaniji tal-Unjoni, b’mod partikolari l-intrapriżi żgħar u ta’ daqs medju (SMEs) u n-negozji ġodda, aktar fraġli u vulnerabbli; Fejn xieraq, sabiex jiġu ffaċilitati u diversifikati s-sorsi ta’ finanzjament għall-kumpaniji tal-Unjoni, b’enfasi partikolari fuq l-SMEs, inklużi n-negozji ġodda u l-kumpaniji b’kapitalizzazzjoni medja, it-tneħħija tal-ostakli mhux ġustifikati u piż amministrattiv eċċessiv tista’ tgħinhom jippromwovu l-kapaċità tal-kumpaniji tal-Unjoni li jaċċessaw swieq tal-ekwità, flimkien mal-promozzjoni ta’ opportunitajiet ta’ investiment aktar diversifikati, fit-tul u kompetittivi għall-investituri fil-livell tal-konsumatur u għall-investituri kbar; F’dak ir-rigward, dan ir-Regolament jenħtieġ li jkollu l-għan ukoll li jagħmilha aktar faċli għall-investituri potenzjali li jkollhom informazzjoni dwar l-opportunitajiet ta’ investiment fil-kumpaniji, peress li l-investituri potenzjali spiss ikollhom diffikultà biex jevalwaw kumpaniji ġodda u ditti żgħar b’rekord tan-negozju qasir, li hija sitwazzjoni li twassal għal inqas opportunitajiet innovattivi, speċjalment għal persuni li jibdew negozju.

(4)

L-istituzzjonijiet ta’ kreditu kienu attivi fl-isforz biex jappoġġjaw kumpaniji li kienu jeħtieġu finanzjament u huma mistennija li jkunu pilastru fundamentali tal-irkupru. Ir-Regolament (UE) 2017/1129 jintitola lill-istituzzjonijiet ta’ kreditu għal eżenzjoni mill-obbligu li jippubblikaw prospett f’każ ta’ offerta jew ammissjoni għall-kummerċ f’suq regolat ta’ ċerti titoli mingħajr ekwità maħruġa b’mod kontinwu jew ripetut sa ammont aggregat ta’ EUR 75 miljun fuq perjodu ta’ 12-il xahar. Jenħtieġ li dak il-livell limitu tal-eżenzjoni jiżdied għal perjodu limitat ta’ żmien sabiex jitrawwem il-ġbir ta’ fondi għall-istituzzjonijiet ta’ kreditu u jingħataw naqra nifs biex jappoġġjaw lill-klijenti tagħhom fl-ekonomija reali. Peress li l-applikazzjoni ta’ dak il-limitu ta’ eżenzjoni hija limitata għall-fażi ta’ rkupru, jenħtieġ li din tkun disponibbli għal perjodu ta’ żmien limitat, li jintemm fil-31 ta’ Diċembru 2022.

(5)

Sabiex l-impatt ekonomiku sever tal-pandemija tal-COVID-19 jiġi indirizzat malajr, huwa importanti li jiġu introdotti miżuri li jiffaċilitaw l-investimenti fl-ekonomija reali, jippermettu rikapitalizzazzjoni rapida tal-kumpaniji fl-Unjoni u jippermettu lill-emittenti li jisfruttaw is-swieq pubbliċi fi stadju bikri fil-proċess ta’ rkupru. Sabiex jinkisbu dawk l-objettivi, huwa xieraq li jinħoloq prospett ġdid f’forma qasira li għandu jkun magħruf bħala Prospett ta’ Rkupru tal-UE li, filwaqt li jindirizza wkoll il-kwistjonijiet ekonomiċi u finanzjarji mqajma speċifikament mill-pandemija tal-COVID-19, ikun faċli li jiġi prodott għall-emittenti, ikun faċli li jinftiehem mill-investituri, b’mod partikolari l-investituri fil-livell tal-konsumatur, li jkunu jridu jiffinanzjawhom u li jkun faċli li jiġi skrutinizzat u approvat għall-awtoritajiet kompetenti. Il-Prospett ta’ Rkupru tal-UE jenħtieġ li jitqies primarjament bħala faċilitatur tar-rikapitalizzazzjoni, b’monitoraġġ bir-reqqa mill-awtoritajiet kompetenti biex jiżguraw li r-rekwiżiti ta’ informazzjoni għall-investituri jiġu sodisfati. Huwa importanti li l-emendi għar-Regolament (UE) 2017/1129 li jinsabu f’dan ir-Regolament ma jintużawx biex jissostitwixxu r-rieżami skedat tar-Regolament (UE) 2017/1129, u l-emendar possibbli tiegħu, li jkunu jeħtieġu li jiġu akkumpanjati minn valutazzjoni tal-impatt sħiħa. F’dak ir-rigward, ma jkunx xieraq li jiżdiedu elementi addizzjonali mar-reġimi ta’ divulgazzjoni li mhumiex diġà meħtieġa skont dak ir-Regolament jew ir-Regolament Delegat tal-Kummissjoni (UE) 2019/980 (4), bl-eċċezzjoni ta’ informazzjoni relatata mal-impatt tal-pandemija tal-COVID-19. Tali elementi jenħtieġ li jiġu introdotti biss fil-każ ta’ proposta leġiżlattiva mill-Kummissjoni abbażi tar-rieżami tagħha tar-Regolament (UE) 2017/1129, kif previst fl-Artikolu 48 ta’ dak ir-Regolament.

(6)

Huwa importanti li l-informazzjoni għall-investituri fil-livell tal-konsumatur u d-dokumenti bl-informazzjoni ewlenija jiġu allinjati fi prodotti u liġijiet finanzjarji differenti, u li jiġu żgurati għażla u komparabbiltà sħaħ tal-investiment fl-Unjoni. Barra minn hekk, jenħtieġ li l-protezzjoni tal-konsumaturi u tal-investituri fil-livell tal-konsumatur tiġi kkunsidrata fir-rieżami previst tar-Regolament (UE)2017/1129 biex jiġu żgurati dokumenti ta’ informazzjoni armonizzati, sempliċi u faċli li jinftiehmu għall-investituri kollha fil-livell tal-konsumatur.

(7)

L-informazzjoni dwar kwistjonijiet ambjentali, soċjali u ta’ governanza (ESG) mill-kumpaniji qiegħda ssir dejjem aktar rilevanti għall-investituri sabiex jitkejjel l-impatt fuq is-sostenibbiltà tal-investimenti tagħhom u jiġu integrati l-kunsiderazzjonijiet tas-sostenibbiltà fil-proċessi ta’ teħid ta’ deċiżjonijiet tagħhom ta’ investiment u ta’ ġestjoni tar-riskji. B’riżultat ta’ dan, il-kumpaniji jiffaċċjaw pressjoni dejjem akbar biex iwieġbu għat-talbiet kemm mill-investituri kif ukoll mill-istituzzjonijiet ta’ kreditu dwar il-kwistjonijiet tal-ESG u huma meħtieġa jikkonformaw ma’ standards multipli għad-divulgazzjonijiet tal-ESG, li spiss ikunu frammentati u inkonsistenti. Għalhekk, għall-fini li ttejjeb id-divulgazzjoni mill-kumpaniji ta’ informazzjoni relatata mas-sostenibbiltà u li tarmonizza r-rekwiżiti għal tali divulgazzjoni pprovduta fir-Regolament (UE) 2017/1129, filwaqt li tqis ukoll liġijiet oħra tal-Unjoni dwar is-servizzi finanzjarji, il-Kummissjoni jenħtieġ li, fil-kuntest tar-rieżami tar-Regolament (UE) 2017/1129, tivvaluta jekk ikunx xieraq li tintegra informazzjoni relatata mas-sostenibbiltà fir-Regolament (UE) 2017/1129 u tivvaluta jekk ikunx xieraq li tagħmel proposta leġiżlattiva sabiex tiżgura koerenza mal-objettivi ta’ sostenibbiltà u l-komparabbiltà tal-informazzjoni relatata mas-sostenibbiltà fil-liġijiet kollha tal-Unjoni dwar is-servizzi finanzjarji.

(8)

Il-kumpaniji li kellhom kontinwament ishma ammessi għan-negozjar f’suq regolat jew innegozjati f’suq tat-tkabbir tal-SMEs għal mill-inqas l-aħħar 18-il xahar qabel l-offerta tal-ishma jew l-ammissjoni għall-kummerċ, kellhom jikkonformaw mar-rekwiżiti ta’ divulgazzjoni perjodika u kontinwa skont ir-Regolament (UE) Nru 596/2014 tal-Parlament Ewropew u tal-Kunsill (5), id-Direttiva 2004/109/KE tal-Parlament Ewropew u tal-Kunsill (6) jew, għall-emittenti fi swieq tat-tkabbir tal-SMEs, skont ir-Regolament Delegat tal-Kummissjoni (UE) 2017/565 (7). Għaldaqstant, il-biċċa l-kbira tal-kontenut meħtieġ ta’ prospett diġà se jkun disponibbli pubblikament u l-investituri se jkunu qed jinnegozjaw abbażi ta’ dik l-informazzjoni. Għalhekk, jenħtieġ li l-Prospett ta’ Rkupru tal-UE jintuża biss għal ħruġ sekondarju ta’ ishma. Il-Prospett ta’ Rkupru tal-UE jenħtieġ li jiffaċilita l-finanzjament mill-bejgħ ta’ ishma u b’hekk jippermetti lill-kumpaniji li jirrikapitalizzaw malajr. Il-Prospett ta’ Rkupru tal-UE jenħtieġ li ma jippermettix lill-emittenti li jiċċaqilqu minn suq tat-tkabbir tal-SMEs għal suq regolat. Barra minn hekk, jenħtieġ li l-Prospett ta’ Rkupru tal-UE jiffoka biss fuq informazzjoni essenzjali li tgħin lill-investituri jieħdu deċiżjonijiet informati ta’ investiment. Madankollu, jekk ikun applikabbli, l-emittenti jew l-offerenti jenħtieġ li jindirizzaw kif il-pandemija tal-COVID-19 affettwat l-attivitajiet kummerċjali tal-emittenti kif ukoll l-impatt futur antiċipat tal-pandemija fuq l-attivitajiet kummerċjali tal-emittenti, jekk ikun hemm.

(9)

Sabiex ikun għodda effiċjenti għall-emittenti, jenħtieġ li l-Prospett ta’ Rkupru tal-UE jkun dokument wieħed ta’ daqs limitat, jippermetti l-inkorporazzjoni b’referenza, u jibbenefika mill-passaport għal offerti pan-Ewropej ta’ ishma lill-pubbliku jew ammissjonijiet għall-kummerċ f’suq regolat.

(10)

Jenħtieġ li l-Prospett ta’ Rkupru tal-UE jinkludi sommarju qasir bħala sors utli ta’ informazzjoni għall-investituri, b’mod partikolari l-investituri fil-livell tal-konsumatur. Jenħtieġ li dak is-sommarju jiġi stipulat fil-bidu tal-Prospett ta’ Rkupru tal-UE u jiffoka fuq informazzjoni ewlenija li tippermetti lill-investituri jiddeċiedu liema offerti lill-pubbliku u ammissjonijiet għall-kummerċ ta’ ishma għandhom jeżaminaw aktar u li wara jirrieżaminaw il-Prospett sħiħ ta’ Rkupru tal-UE sabiex jieħdu d-deċiżjoni tagħhom. L-informazzjoni ewlenija jenħtieġ li tinkludi informazzjoni li tkopri b’mod speċifiku l-impatt fuq in-negozji u finanzjarju„ jekk ikun hemm, tal-COVID-19, kif ukoll l-impatt futur antiċipat tagħha, jekk ikun hemm. Il-Prospett ta’ Rkupru tal-UE jenħtieġ li jiżgura l-protezzjoni tal-investituri fil-livell tal-konsumatur billi jaderixxi mad-dispożizzjonijiet rilevanti tar-Regolament (UE) 2017/1129, filwaqt li jevita piż amministrattiv eċċessiv. F’dan ir-rigward, huwa essenzjali li s-sommarju ma jnaqqasx il-protezzjoni tal-investituri u lanqas ma jagħtihom impressjoni qarrieqa. L-emittenti jew l-offerenti jenħtieġ, għalhekk, li jiżguraw livell għoli ta’ diliġenza fl-abbozzar tas-sommarju.

(11)

Peress li l-Prospett ta’ Rkupru tal-UE se jipprovdi ammont sinifikament inqas ta’ informazzjoni minn prospett simplifikat skont ir-reġim simplifikat ta’ divulgazzjoni għall-ħruġ sekondarju, jenħtieġ li ma jkunx possibbli li l-emittenti jużawh għal ħruġ dilwittiv ħafna ta’ ishma b’impatt sinifikanti fuq l-istruttura tal-kapital, il-prospetti u s-sitwazzjoni finanzjarja tal-emittent. Għalhekk, l-użu tal-Prospett ta’ Rkupru tal-UE jenħtieġ li jkun limitat għal offerti li jikkonsistu f’mhux aktar minn 150 % tal-kapital pendenti. Jenħtieġ li kriterji speċifiċi għall-kalkolu ta’ tali limitu jkunu stabbiliti f’dan ir-Regolament.

(12)

Sabiex tinġabar data li tappoġġja l-valutazzjoni tar-reġim tal-Prospett ta’ Rkupru tal-UE, jenħtieġ li l-Prospett ta’ Rkupru tal-UE jiġi inkluż fil-mekkaniżmu ta’ ħżin imsemmi fl-Artikolu 21(6) tar-Regolament (UE) 2017/1129. Sabiex jiġi limitat il-piż amministrattiv għat-tibdil ta’ dak il-mekkaniżmu ta’ ħżin, il-Prospett ta’ Rkupru tal-UE jenħtieġ li jkun jista’ juża l-istess data bħal dik definita għall-prospett ta’ ħruġ ta’ titoli sekondarju stabbilit fl-Artikolu 14 tar-Regolament (UE) 2017/1129, dment li ż-żewġ tipi ta’ prospetti jibqgħu differenzjati b’mod ċar.

(13)

Jenħtieġ li l-Prospett ta’ Rkupru tal-UE jikkumplimenta l-forom l-oħra ta’ prospetti stipulati fir-Regolament (UE) 2017/1129 fid-dawl tal- speċifiċitajiet ta’ tipi differenti ta’ titoli, emittenti, offerti u ammissjonijiet. Għalhekk, sakemm ma jiġix iddikjarat espliċitament mod ieħor, ir-referenzi kollha għat-terminu “prospett” skont ir-Regolament (UE) 2017/1129 għandhom jinftiehmu li jirreferu għall-forom kollha differenti ta’ prospetti, inkluż il-Prospett ta’ Rkupru tal-UE stabbilit f’dan ir-Regolament.

(14)

Ir-Regolament (UE) 2017/1129 jirrikjedi li l-intermedjarji finanzjarji jinfurmaw lill-investituri bil-possibbiltà tal-pubblikazzjoni ta’ suppliment u, f’ċerti ċirkostanzi, li jikkuntattjaw lill-investituri fl-istess jum li jiġi ppubblikat suppliment. L-iskadenza sa meta l-investituri jeħtiġilhom jiġu kkuntattjati, kif ukoll l-ambitu tal-investituri li għandhom jiġu kkuntattjati jistgħu jqajmu xi diffikultajiet għall-intermedjarji finanzjarji. Sabiex tingħata għajnuna u jiġu liberati riżorsi għall-intermedjarji finanzjarji filwaqt li jinżamm livell għoli ta’ protezzjoni għall-investitur, jenħtieġ li jiġi stabbilit reġim aktar proporzjonat. B’mod partikolari, jenħtieġ li jiġi kkjarifikat li l-intermedjarji finanzjarji jenħtieġ li jikkuntattjaw l-investituri li jixtru jew li jissottoskrivu titoli sa mhux aktar tard mit-tmiem il-perjodu tal-offerta inizjali. Il-perjodu tal-offerta inizjali jenħtieġ li jinftiehem li jirreferi għal perjodu ta’ żmien li matulu t-titoli jiġu offruti lill-pubbliku mill-emittent jew mill-offerent kif preskritt fil-prospett u jeskludi perjodi sussegwenti li matulu t-titoli jerġgħu jinbigħu fis-suq. Il-perjodu tal-offerta inizjali jenħtieġ li jinkludi kemm il-ħruġ primarju kif ukoll dak sekondarju tat-titoli. Jenħtieġ li tali reġim jispeċifika liema investituri jenħtieġ li jiġu kkuntattjati mill-intermedjarji finanzjarji meta jiġi ppubblikat suppliment u jenħtieġ li tiġi estiża l-iskadenza biex jiġu kkuntattjati dawk l-investituri. Irrispettivament mir-reġim il-ġdid previst f’dan ir-Regolament, id-dispożizzjonijiet eżistenti tar-Regolament (UE) 2017/1129, li jiżguraw li s-suppliment huwa aċċessibbli għall-investituri kollha billi tiġi rikjesta pubblikazzjoni tas-suppliment fuq sit web disponibbli għall-pubbliku, jenħtieġ li jibqgħu japplikaw.

(15)

Peress li r-reġim tal-Prospett ta’ Rkupru tal-UE huwa limitat għall-fażi ta’ rkupru, jenħtieġ li dak ir-reġim jiskadi fil-31 ta’ Diċembru 2022. Sabiex tiġi żgurata l-kontinwità tal-Prospetti ta’ Rkupru tal-UE, jenħtieġ li dawk il-Prospetti ta’ Rkupru tal-UE li ġew approvati qabel l-iskadenza tar-reġim tal-Prospett ta’ Rkupru tal-UE jibbenefikaw minn dispożizzjoni ta’ anterjorità.

(16)

Sal-21 ta’ Lulju 2022, il-Kummissjoni għandha tippreżenta rapport lill-Parlament Ewropew u lill-Kunsill dwar l-applikazzjoni tar-Regolament (UE) 2017/1129, akkumpanjat fejn meħtieġ bi proposta leġiżlattiva. Jenħtieġ li dak ir-rapport jivvaluta, inter alia, jekk ir-reġim ta’ divulgazzjoni għal Prospetti ta’ Rkupru tal-UE huwiex adegwat biex jintlaħqu l-objettivi segwiti minn dan ir-Regolament. Dik il-valutazzjoni jenħtieġ li tindirizza l-kwistjoni jekk il-Prospett ta’ Rkupru tal-UE jilħaqx bilanċ xieraq bejn il-protezzjoni tal-investitur u t-tnaqqis tal-piż amministrattiv.

(17)

Id-Direttiva 2004/109/KE tirrikjedi lill-emittenti li t-titoli tagħhom jiġu ammessi għall-kummerċ f’suq regolat li jinsab jew jopera fi Stat Membru biex iħejju u jiddivulgaw ir-rapporti finanzjarji annwali tagħhom f’format elettroniku uniku għar-rapportar b’bidu mis-snin finanzjarji li jibdew fl-1 ta’ Jannar 2020 jew wara. Dak il-format elettroniku uniku għar-rapportar huwa speċifikat fir-Regolament Delegat tal-Kummissjoni (UE) 2019/815 (8). Peress li t-tħejjija tar-rapporti finanzjarji annwali bl-użu tal-format elettroniku uniku għar-rapportar tirrikjedi l-allokazzjoni ta’ riżorsi umani u finanzjarji addizzjonali, b’mod partikolari matul l-ewwel sena ta’ tħejjija, u b’kunsiderazzjoni tal-limitazzjonijiet fuq ir-riżorsi tal-emittenti minħabba l-pandemija tal-COVID-19, Stat Membru jenħtieġ li jkunu jista’ jipposponi b’sena l-applikazzjoni tar-rekwiżit tat-tħejjija u d-divulgazzjoni tar-rapporti finanzjarji annwali bl-użu tal-format ta’ rapportar elettroniku uniku. Sabiex jeżerċita dik l-għażla, Stat Membru jenħtieġ li jinnotifika lill-Kummissjoni bl-intenzjoni tiegħu li jippermetti tali posponiment u l-intenzjoni tiegħu jenħtieġ li tiġi debitament ġustifikata.

(18)

Minħabba li l-objettivi ta’ dan ir-Regolament, jiġifieri li jiġu introdotti miżuri li jiffaċilitaw l-investimenti fl-ekonomija reali, jippermettu rikapitalizzazzjoni rapida tal-kumpaniji fl-Unjoni u jippermettu lill-emittenti li jisfruttaw is-swieq pubbliċi fi stadju bikri fil-proċess ta’ rkupru, ma jistgħux jinkisbu b’mod suffiċjenti mill-Istati Membri iżda pjuttost, minħabba l-iskala u l-effetti tagħhom, jistgħu jinkisbu aħjar fil-livell tal-Unjoni, l-Unjoni tista’ tadotta miżuri, f’konformità mal-prinċipju tas-sussidjarjetà kif stabbilit fl-Artikolu 5 tat-Trattat dwar l-Unjoni Ewropea. F’konformità mal-prinċipju ta’ proporzjonalità, kif stabbilit f’dak l-Artikolu, dan ir-Regolament ma jmurx lil hinn minn dak li huwa meħtieġ sabiex jinkisbu dawk l-objettivi.

(19)

Jenħtieġ għalhekk li r-Regolament (UE) 2017/1129 u d-Direttiva 2004/109/KE jiġu emendati skont dan,