(1)

Skont l-Artikolu 2 tar-Regolament (UE) 2015/478, Franza infurmat lill-Kummissjoni li jidher li x-xejriet fl-importazzjonijiet tal-etanol rinnovabbli użat bħala karburant jeħtieġu sorveljanza. B’mod partikolari, Franza talbet li tiġi introdotta sorveljanza retrospettiva.

(2)

Skont l-Artikolu 10 tar-Regolament (UE) 2015/478, sorveljanza tista’ tkun introdotta meta x-xejra fl-importazzjonijiet ta’ prodott thedded li tikkawża dannu lill-produtturi tal-Unjoni, u meta l-interessi tal-Unjoni jkunu hekk jeħtieġu. L-Artikolu 7 tar-Regolament (UE) 2015/755 jippermetti l-possibbiltà li tiġi introdotta sorveljanza meta l-interessi tal-Unjoni hekk jeħtieġu. Is-sorveljanza retrospettiva tista’ tiġi introdotta skont iż-żewġ Regolamenti, rispettivament skont l-Artikolu 10(1)(a) u l-Artikolu 7(1)(a).

(3)

Abbażi tal-informazzjoni ppreżentata minn Franza, l-importazzjonijiet fl-Unjoni tal-etanol rinnovabbli użat bħala karburant żdiedu b’512 % bejn l-2017 u l-2019, minn 87,6 elf tunnellata għal 536,2 elf tunnellata. Barra minn hekk, matul l-2019, il-prezzijiet tal-importazzjonijiet tal-etanol rinnovabbli użat bħala karburant mis-sitt sorsi ewlenin tal-importazzjoni waqqgħu l-prezz tal-produtturi tal-Unjoni b’medja ta’ 15 %.

(4)

Huwa kkalkulat li bejn l-2017 u l-2019 l-etanol rinnovabbli użat bħala karburant fl-UE żdied b’10 %, minn 3,9 miljun tunnellata għal 4,3 miljun tunnellata. Fl-istess perjodu, madankollu, il-produzzjoni dinjija tal-etanol rinnovabbli użat bħala karburant għaddiet minn 80,6 miljun tunnellata għal 87,5 miljun tunnellata. Minħabba d-daqs tal-produzzjoni dinjija meta mqabbel mal-konsum totali fl-UE, huwa kkunsidrat li anki disturbi minuri fis-suq globali tal-etanol rinnovabbli użat bħala karburant jista’ jkollhom impatti serji ħafna fuq l-offerta fis-suq tal-UE, kemm f’termini ta’ kwantitajiet kif ukoll ta’ prezzijiet.

(5)

Barra minn hekk, madwar 84 % tal-produzzjoni dinjija totali ta’ etanol rinnovabbli użat bħala karburant (aktar minn 70 miljun tunnellata) hija kkonċentrata fl-Istati Uniti (54 %) u fil-Brażil (30 %). Dawn iż-żewġ pajjiżi għandhom kapaċità ta’ produzzjoni tant kbira li anki eċċess limitat fil-produzzjoni annwali tagħhom jista’ jirriżulta fi provvista żejda fis-suq dinji, b’konsegwenzi potenzjalment negattivi għal swieq ferm iżgħar bħall-UE. L-importazzjonijiet mill-Istati Uniti fl-UE żdiedu b’mod kostanti matul l-aħħar tliet snin, u l-importazzjonijiet mill-Brażil żdiedu sew fl-ewwel xhur tal-2020.

(6)

Ta’ min ifakkar ukoll li f’dawn l-aħħar ħames snin diġà ġiet osservata sitwazzjoni ta’ kapaċità żejda żgħira fis-suq tal-Istati Uniti, li wasslet biex għadd ta’ pajjiżi (eż. il-Brażil, iċ-Ċina, il-Perù, il-Kolombja) jadottaw jew jerġgħu jintroduċu miżuri biex jillimitaw il-livell ta’ importazzjonijiet tal-etanol rinnovabbli użat bħala karburant mill-Istati Uniti. Ovvjament, il-kwantitajiet li qabel kienu esportati mill-Istati Uniti lejn dawk is-swieq issa jistgħu jiġu diretti mill-ġdid lejn swieq oħra bħal pereżempju s-suq tal-UE. Barra minn hekk, ta’ min ifakkar li l-miżuri antidumping tal-UE dwar l-etanol rinnovabbli użat bħala karburant tħassru f’Mejju 2019.

(7)

Billi f’dawn l-aħħar snin l-importazzjonijiet żdiedu, is-sehem mis-suq tal-industrija tal-Unjoni naqas. F’dawn l-aħħar xhur id-domanda tal-UE kkrollat u s-sitwazzjoni ekonomika tal-industrija tal-Unjoni marret għall-agħar. Ladarba s-suq jirkupra, wieħed jista’ jistenna li l-istokkijiet eżistenti mhux użati fil-pajjiżi produtturi ewlenin barra mill-UE jiġu esportati b’mod massiv lejn l-UE, u b’hekk l-industrija tal-UE ma tkunx tista’ tirkupra. Barra minn hekk, ma jistax jiġi eskluż li fi sforz biex isostnu l-attivitajiet ta’ produzzjoni xi gvernijiet jistgħu jintroduċu sussidji jew forom oħra ta’ sostenn favur l-industrija tal-etanol tagħhom. Xi proġetti ta’ sostenn diġà qed jiġu diskussi fl-Istati Uniti.

(8)

Abbażi tax-xejriet riċenti fl-importazzjonijiet tal-etanol rinnovabbli użat bħala karburant u tal-kapaċità eċċessiva attwali, l-effetti dannużi għall-produtturi tal-Unjoni jistgħu għalhekk jiżviluppaw malajr fil-futur qrib.

(9)

Għalhekk, l-interess tal-Unjoni jeżiġi li l-importazzjonijiet ta’ prodotti tal-etanol rinnovabbli użat bħala karburant ikunu soġġetti għal sorveljanza retrospettiva tal-Unjoni sabiex tingħata statistika uffiċjali, qabel tingħata l-istatistika uffiċjali dwar l-importazzjonijiet, biex tkun tista’ ssir analiżi rapida tax-xejriet fl-importazzjonijiet mill-pajjiżi terzi kollha. Hemm bżonn ta’ data kummerċjali rapida u antiċipata biex tiġi ttrattata l-vulnerabbiltà tas-suq tal-UE tal-etanol rinnovabbli użat bħala karburant fil-konfront tal-bidliet għall-għarrieda fis-swieq dinjija.

(10)

Peress li l-etanol użat bħala karburant jista’ jiġi kklassifikat f’diversi intestaturi tan-NM li jinkludu prodotti oħra, jenħtieġ li jinħolqu kodiċijiet TARIC speċifiċi sabiex tiġi ggarantita sorveljanza adegwata limitata biss għall-prodott rilevanti. L-ambitu tas-sorveljanza retrospettiva għandu jinkludi l-prodotti elenkati fl-Anness.

(11)

Jenħtieġ li s-sistema ta’ sorveljanza tiġi introdotta għal perjodu ta’ sena, li jitqies biżżejjed biex isir monitoraġġ tal-iżvilupp tal-importazzjonijiet matul l-irkupru tas-suq, sakemm tintlaħaq sitwazzjoni ta’ stabbiltà.