Back to EUR-Lex homepage

EUR-Lex Access to European Union law

Back to EUR-Lex homepage

This document is an excerpt from the EUR-Lex website

Use quotation marks to search for an "exact phrase". Append an asterisk (*) to a search term to find variations of it (transp*, 32019R*). Use a question mark (?) instead of a single character in your search term to find variations of it (ca?e finds case, cane, care).
Search tips
Need more search options? Use the Advanced search
You are here

Document 32020R0781

Regolament ta’ Implimentazzjoni tal-Kummissjoni (UE) 2020/781 tat-12 ta’ Ġunju 2020 li jemenda r-Regolament ta’ Implimentazzjoni (UE) 2018/545 fir-rigward tad-dati ta’ applikazzjoni u ta’ ċerti dispożizzjonijiet tranżizzjonali wara l-estensjoni tal-iskadenza tat-traspożizzjoni tad-Direttiva (UE) 2016/797 tal-Parlament Ewropew u tal-Kunsill (Test b’rilevanza għaż-ŻEE)

C/2020/3748

OJ L 188, 15.6.2020, p. 11–13 (BG, ES, CS, DA, DE, ET, EL, EN, FR, HR, IT, LV, LT, HU, MT, NL, PL, PT, RO, SK, SL, FI, SV)

In force

ELI: http://data.europa.eu/eli/reg_impl/2020/781/oj

15.6.2020   

MT

Il-Ġurnal Uffiċjali tal-Unjoni Ewropea

L 188/11

REGOLAMENT TA’ IMPLIMENTAZZJONI TAL-KUMMISSJONI (UE) 2020/781

tat-12 ta’ Ġunju 2020

li jemenda r-Regolament ta’ Implimentazzjoni (UE) 2018/545 fir-rigward tad-dati ta’ applikazzjoni u ta’ ċerti dispożizzjonijiet tranżizzjonali wara l-estensjoni tal-iskadenza tat-traspożizzjoni tad-Direttiva (UE) 2016/797 tal-Parlament Ewropew u tal-Kunsill

(Test b’rilevanza għaż-ŻEE)

IL-KUMMISSJONI EWROPEA,

Wara li kkunsidrat it-Trattat dwar il-Funzjonament tal-Unjoni Ewropea,

Wara li kkunsidrat id-Direttiva (UE) 2016/797 tal-Parlament Ewropew u tal-Kunsill tal-11 ta’ Mejju 2016 dwar tas-sistema ferrovjarja fl-Unjoni Ewropea (1), u b’mod partikolari l-Artikolu 21(9) tagħha,

Billi:

(1)

Id-Direttiva (UE) 2016/797 ġiet emendata bid-Direttiva (UE) 2020/700 (2) biex l-Istati Membri jkollhom il-possibbiltà li jestendu l-iskadenza għad-dħul fis-seħħ tal-liġijiet, tar-regolamenti u tad-dispożizzjonijiet amministrattivi nazzjonali meħtieġa għall-konformità mad-dispożizzjonijiet imsemmija fl-Artikolu 57(1) tad-Direttiva (UE) 2016/797.

(2)

Il-valutazzjoni tal-applikazzjonijiet għal awtorizzazzjoni tat-tip ta’ vettura jew għal awtorizzazzjoni ta’ vettura għat-tqegħid fis-suq skont id-Direttiva 2008/57/KE tal-Parlament Ewropew u tal-Kunsill (3), li għaliha kellhom jinħarġu l-awtorizzazzjonijiet rilevanti qabel is-16 ta’ Ġunju 2020, jaf tittardja minħabba t-tifqigħa tal-COVID-19. Għalhekk, fl-Istati Membri li nnotifikaw lill-Aġenzija u lill-Kummissjoni skont l-Artikolu 57(2) tad-Direttiva (UE) 2016/797 u meta d-Direttiva (UE) 2016/797 trid tapplika mis-16 ta’ Ġunju 2020, jenħtieġ li l-awtorità nazzjonali tas-sikurezza (“l-NSA”), wara talba tal-applikant, tkompli l-valutazzjoni wara dik id-data. L-NSA jenħtieġ tiffinalizza dik il-valutazzjoni u toħroġ l-awtorizzazzjoni qabel it-30 ta’ Ottubru 2020.

(3)

Fir-rigward tal-Istati Membri li nnotifikaw lill-Aġenzija tal-Unjoni Ewropea għall-Ferroviji (“l-Aġenzija”) u lill-Kummissjoni li beħsiebhom jestendu l-perjodu tat-traspożizzjoni tad-Direttiva (UE) 2016/797 skont l-Artikolu 57(2a) tagħha, jenħtieġ li l-applikazzjoni ta’ ċerti dispożizzjonijiet tar-Regolament ta’ Implimentazzjoni tal-Kummissjoni (UE) 2018/545 (4) tiġi posposta u tapplika mill-31 ta’ Ottubru 2020. Jenħtieġ jiġu adattati wkoll id-dispożizzjonijiet tranżizzjonali stabbiliti fir-Regolament ta’ Implimentazzjoni (UE) 2018/545.

(4)

L-applikanti setgħu jagħmlu l-applikazzjonijiet skont ir-Regolament ta’ Implimentazzjoni (UE) 2018/545 fid-dawl tal-iskadenza tal-applikazzjoni attwali. Għall-finijiet tad-Direttiva 2008/57/KE u anki tad-Direttiva (UE) 2016/797, il-vetturi jridu jikkonformaw mal-ispeċifikazzjonijiet tekniċi tal-interoperabbiltà u mar-regoli nazzjonali rilevanti u jissodisfaw ir-rekwiżiti essenzjali. L-applikazzjonijiet li jsiru skont ir-Regolament ta’ Implimentazzjoni (UE) 2018/545 jenħtieġ ikunu jinkludu l-evidenza kollha meħtieġa għat-tqegħid fis-servizz tal-vetturi skont id-Direttiva 2008/57/KE jew għat-tqegħid fis-suq ta’ vetturi skont id-Direttiva (UE) 2016/797. Għalhekk, l-applikanti jenħtieġ jitħallew jissottomettu, lill-awtoritajiet nazzjonali tas-sikurezza fl-Istati Membri li nnotifikaw lill-Aġenzija u lill-Kummissjoni skont l-Artikolu 57(2a) tad-Direttiva (UE) 2016/797, l-applikazzjonijiet li jelenkaw l-evidenza skont ir-Regolament ta’ Implimentazzjoni tal-Kummissjoni (UE) 2018/545. L-awtoritajiet nazzjonali tas-sikurezza jenħtieġ jaċċettaw dawk l-applikazzjonijiet mingħajr ma jeżiġu applikazzjoni riveduta.

(5)

Għalhekk, ir-Regolament ta’ Implimentazzjoni (UE) 2018/545 jenħtieġ jiġi emendat skont dan.

(6)

Il-miżuri previsti f’dan ir-Regolament huma skont l-opinjoni tal-Kumitat imsemmi fl-Artikolu 51(1) tad-Direttiva (UE) 2016/797.

(7)

Biex ikun żgurat li l-miżuri previsti f’dan ir-Regolament ikunu effettivi, dan ir-Regolament jenħtieġ jidħol fis-seħħ fil-jum ta’ wara dak tal-pubblikazzjoni tiegħu f’Il-Ġurnal Uffiċjali tal-Unjoni Ewropea,

ADOTTAT DAN IR-REGOLAMENT:

Artikolu 1

Ir-Regolament ta’ Implimentazzjoni (UE) 2018/545 huwa emendat kif ġej:

(1)

Fl-Artikolu 2, il-paragrafu 17 huwa sostitwit b’dan li ġej:

“(17)

‘data rilevanti’ tfisser is-16 ta’ Ġunju 2019 fir-rigward ta’ dawk l-Istati Membri li nnotifikaw lill-Aġenzija u l-Kummissjoni skont l-Artikolu 57(2) tad-Direttiva (UE) 2016/797 li estendew il-perjodu tat-traspożizzjoni ta’ dik id-Direttiva. Din tfisser is-16 ta’ Ġunju 2020 fir-rigward ta’ dawk l-Istati Membri li nnotifikaw lill-Aġenzija u lill-Kummissjoni skont l-Artikolu 57(2) tad-Direttiva (UE) 2016/797 li estendew il-perjodu tat-traspożizzjoni ta’ dik id-Direttiva u dawk li ma nnotifikawx lill-Aġenzija u lill-Kummissjoni skont l-Artikolu 57(2a) tad-Direttiva (UE) 2016/797. Din tfisser il-31 ta’ Ottubru 2020 fir-rigward ta’ dawk l-Istati Membri li nnotifikaw lill-Aġenzija u l-Kummissjoni skont l-Artikolu 57(2a) tad-Direttiva (UE) 2016/797 li estendew ulterjorment il-perjodu tat-traspożizzjoni ta’ dik id-Direttiva.”;

(2)

l-Artikolu 55 huwa emendat kif ġej:

(a)

jiddaħħal il-paragrafu 4a li ġej:

“4a.   Minkejja l-paragrafi 1 sa 4, f’dawk l-Istati Membri li nnotifikaw lill-Aġenzija u lill-Kummissjoni skont l-Artikolu 57(2) tad-Direttiva (UE) 2016/797 u meta d-Direttiva (UE) 2016/797 għandha tapplika mis-16 ta’ Ġunju 2020, l-NSA għandha, wara talba tal-applikant, tkompli l-valutazzjoni tal-applikazzjonijiet għal awtorizzazzjoni tat-tip ta’ vettura jew għal awtorizzazzjoni ta’ vettura għat-tqegħid fis-suq skont id-Direttiva 2008/57/KE, wara s-16 ta’ Ġunju 2020, diment li din toħroġ l-awtorizzazzjoni tat-tip tal-vettura u/jew l-awtorizzazzjoni tal-vettura qabel it-30 ta’ Ottubru 2020.

Meta NSA tagħraf li mhux se tkun tista’ toħroġ awtorizzazzjoni tat-tip ta’ vettura u/jew awtorizzazzjoni ta’ vettura qabel it-30 ta’ Ottubru 2020, din għandha tinforma lill-applikant u lill-Aġenzija minnufih u għandhom japplikaw il-paragrafi 2 sa 4.”;

(b)

jiddaħħal il-paragrafu 5a li ġej:

“5a.   Awtorizzazzjoni ta’ vettura u/jew awtorizzazzjoni tat-tip ta’ vettura maħruġa mill-Aġenzija bejn is-16 ta’ Ġunju 2020 u t-30 ta’ Ottubru 2020 għandha teskludi n-netwerk jew in-netwerks fi kwalunkwe Stat Membru li nnotifika lill-Aġenzija u lill-Kummissjoni skont l-Artikolu 57(2a) tad-Direttiva (UE) 2016/797. L-NSAs tal-Istati Membri li għamlu din in-notifika għandhom:

(a)

jittrattaw awtorizzazzjoni tat-tip ta’ vettura maħruġa mill-Aġenzija bħala ekwivalenti għall-awtorizzazzjonijiet tat-tip ta’ vettura maħruġin skont l-Artikolu 26 tad-Direttiva 2008/57/KE, u japplikaw il-paragrafu 3 tal-Artikolu 26 tad-Direttiva 2008/57/KE fir-rigward ta’ din it-tip ta’ vettura;

(b)

jaċċettaw awtorizzazzjoni ta’ vettura maħruġa mill-Aġenzija bħala ekwivalenti għall-ewwel awtorizzazzjoni maħruġa skont l-Artikolu 22 jew l-Artikolu 24 tad-Direttiva 2008/57/KE, u joħorġu awtorizzazzjoni addizzjonali skont l-Artikolu 23 jew l-Artikolu 25 tad-Direttiva 2008/57/KE.”;

(c)

il-paragrafu 6 huwa sostitwit b’dan li ġej:

“6.   Fil-każijiet imsemmija fil-punt (a) tal-paragrafu 2 u fil-paragrafi 5 u 5a, l-NSA għandha tikkopera u tikkoordina mal-Aġenzija biex issir valutazzjoni tal-elementi stabbiliti fil-punt (a) tal-Artikolu 21(5) tad-Direttiva (UE) 2016/797.”;

(d)

jiżdied il-paragrafu 7a li ġej:

“7a.   Il-vaguni tal-merkanzija konformi mal-paragrafu 7.1.2 tal-Anness tar-Regolament (UE) Nru 321/2013 tad-WAG TSI u b’awtorizzazzjoni ta’ vettura għat-tqegħid fis-suq għandhom jiġu ttrattati bejn is-16 ta’ Ġunju 2020 u t-30 ta’ Ottubru 2020 bħala vetturi b’awtorizzazzjoni għat-tqegħid fis-servizz għall-fini tad-Direttiva 2008/57/KE mill-Istati Membri li nnotifikaw lill-Aġenzija u lill-Kummissjoni skont l-Artikolu 57(2a) tad-Direttiva (UE) 2016/797.”;

(e)

jiżdied paragrafu 8 ġdid:

“8.   Bejn is-16 ta’ Ġunju 2020 u t-30 ta’ Ottubru 2020, fl-Istati Membri li nnotifikaw lill-Aġenzija u lill-Kummissjoni skont l-Artikolu 57(2a) tad-Direttiva (UE) 2016/797, l-applikanti għal awtorizzazzjoni għat-tqegħid fis-servizz ta’ vettura jew ta’ awtorizzazzjoni tat-tip għall-finijiet tad-Direttiva 2008/57/KE jistgħu jissottomettu fajl lill-awtorità nazzjonali tas-sikurezza, li jkun jikkonċerna vettura jew tip ta’ vettura, imfassal skont l-Artikoli 29(1) u 30(1) u skont l-Anness I.

L-applikazzjonijiet għal awtorizzazzjoni għat-tqegħid fis-servizz ta’ vettura jew ta’ awtorizzazzjoni tat-tip skont dan ir-Regolament għandhom jiġu aċċettati mill-NSA għall-finijiet tad-Direttiva 2008/57/KE.”

(3)

fl-Artikolu 56, it-tieni subparagrafu huwa sostitwit b’dan li ġej:

“Dan għandu japplika mis-16 ta’ Ġunju 2019 fl-Istati Membri li ma nnotifikawx lill-Aġenzija u lill-Kummissjoni skont l-Artikolu 57(2) tad-Direttiva (UE) 2016/797.

Għandu japplika mis-16 ta’ Ġunju 2020 fl-Istati Membri li nnotifikaw lill-Aġenzija u lill-Kummissjoni skont l-Artikolu 57(2) tad-Direttiva (UE) 2016/797 u f’dawk li ma nnotifikawx lill-Aġenzija u lill-Kummissjoni skont l-Artikolu 57(2a) tad-Direttiva (UE) 2016/797.

L-Artikoli 55(5a) u 55(7a) għandhom japplikaw mis-16 ta’ Ġunju 2020 fl-Istati Membri kollha.

L-Artikolu 55(8) għandu japplika mis-16 ta’ Ġunju 2020 fl-Istati Membri li nnotifikaw lill-Aġenzija u lill-Kummissjoni skont l-Artikolu 57(2a) tad-Direttiva (UE) 2016/797.

Dan ir-Regolament għandu japplika fl-Istati Membri kollha mill-31 ta’ Ottubru 2020.”.

Artikolu 2

Dan ir-Regolament għandu jidħol fis-seħħ fil-jum wara dak tal-pubblikazzjoni tiegħu f’Il-Ġurnal Uffiċjali tal-Unjoni Ewropea.

Dan ir-Regolament għandu jorbot fl-intier tiegħu u japplika direttament fl-Istati Membri kollha.

Magħmul fi Brussell, it-12 ta’ Ġunju 2020.

Għall-Kummissjoni

Il-President

Ursula VON DER LEYEN

(1)  ĠU L 138, 26.5.2016, p. 44.

(2)  Id-Direttiva (UE) 2020/700 tal-Parlament Ewropew u tal-Kunsill tal-25 ta’ Mejju 2020 li temenda d-Direttivi (UE) 2016/797 u (UE) 2016/798, fir-rigward tal-estensjoni tal-perjodi tat-traspożizzjoni tagħhom (ĠU L 165, 27.5.2020, p. 27).

(3)  Id-Direttiva 2008/57/KE tal-Parlament Ewropew u tal-Kunsill tas-17 ta’ Ġunju 2008 dwar l-interoperabilità tas-sistema ferrovjarja fil-Komunità (ĠU L 191, 18.7.2008, p. 1).

(4)  Ir-Regolament ta’ Implimentazzjoni tal-Kummissjoni (UE) 2018/545 tal-4 ta’ April 2018 li jistabbilixxi l-arranġamenti prattiċi għall-awtorizzazzjoni ta’ vetturi ferrovjarji u għall-proċess tal-awtorizzazzjoni tat-tip ta’ vetturi ferrovjarji skont id-Direttiva (UE) 2016/797 tal-Parlament Ewropew u tal-Kunsill (ĠU L 90, 6.4.2018, p. 66).

Top