Back to EUR-Lex homepage

EUR-Lex Access to European Union law

Back to EUR-Lex homepage

This document is an excerpt from the EUR-Lex website

Use quotation marks to search for an "exact phrase". Append an asterisk (*) to a search term to find variations of it (transp*, 32019R*). Use a question mark (?) instead of a single character in your search term to find variations of it (ca?e finds case, cane, care).
Search tips
Need more search options? Use the Advanced search
You are here

Document 32020L0363

Direttiva Delegata tal-Kummissjoni (UE) 2020/363 tas-17 ta’ Diċembru 2019 li temenda l-Anness II tad-Direttiva 2000/53/KE tal-Parlament Ewropew u tal-Kunsill dwar vetturi li m’għadhomx jintużaw b’rabta ma’ ċerti eżenzjonijiet għaċ-ċomb u għall-komposti taċ-ċomb fil-komponenti (Test b’rilevanza għaż-ŻEE)

C/2019/9121

OJ L 67, 5.3.2020, p. 119–121 (BG, ES, CS, DA, DE, ET, EL, EN, FR, HR, IT, LV, LT, HU, MT, NL, PL, PT, RO, SK, SL, FI, SV)

Legal status of the document In force

ELI: http://data.europa.eu/eli/dir_del/2020/363/oj

5.3.2020   

MT

Il-Ġurnal Uffiċjali tal-Unjoni Ewropea

L 67/119

DIRETTIVA DELEGATA TAL-KUMMISSJONI (UE) 2020/363

tas-17 ta’ Diċembru 2019

li temenda l-Anness II tad-Direttiva 2000/53/KE tal-Parlament Ewropew u tal-Kunsill dwar vetturi li m’għadhomx jintużaw b’rabta ma’ ċerti eżenzjonijiet għaċ-ċomb u għall-komposti taċ-ċomb fil-komponenti

(Test b’rilevanza għaż-ŻEE)

IL-KUMMISSJONI EWROPEA,

Wara li kkunsidrat it-Trattat dwar il-Funzjonament tal-Unjoni Ewropea,

Wara li kkunsidrat id-Direttiva 2000/53/KE tal-Parlament Ewropew u tal-Kunsill tat-18 ta’ Settembru 2000 dwar vetturi li m’għadhomx jintużaw (1), u b’mod partikulari l-Artikolu 4(2)(b) tagħha,

Billi:

(1)

Skont l-Artikolu 4(2)(a) tad-Direttiva 2000/53/KE, l-Istati Membri jridu jipprojbixxu l-użu taċ-ċomb, tal-merkurju, tal-kadmju u tal-kromu eżavalenti fil-materjali u fil-komponenti tal-vetturi mpoġġija fis-suq wara l-1 ta’ Lulju 2003.

(2)

L-Anness II tad-Direttiva 2000/53/KE jelenka l-materjali u l-komponenti tal-vetturi li huma eżentati mill-projbizzjoni stabbilita fl-Artikolu 4(2)(a) ta’ dik id-Direttiva. Skont l-Anness II, l-eżenzjonijiet bin-numri 8(e), 8(f)(b) u 8(g) iridu jiġu riveduti fl-2019. L-eżenzjoni bin-numru 8(j) ukoll jeħtieġ li terġa’ tiġi vvalutata fid-dawl tal-aktar informazzjoni riċenti dwar il-progress tekniku u xjentifiku.

(3)

Mill-valutazzjoni tal-eżenzjonijiet bin-numru 8(e) u 8(g) fid-dawl ta’ dik l-informazzjoni ħareġ li, bħalissa, ma hemm l-ebda alternattiva xierqa għall-użu taċ-ċomb għall-materjali u għall-komponenti li dawk l-eżenzjonijiet ikopru. Għalhekk jenħtieġ li tiġi stabbilita data għal reviżjoni ġdida ta’ dawk l-eżenzjonijiet. Madankollu, jenħtieġ li l-eżenzjoni bin-numru 8(g) tiġi speċifikata iktar u jkollha kamp ta’ applikazzjoni iktar ristrett. Sabiex l-industrija tal-karozzi tkun tista’ tadatta ruħha għal dawk il-bidliet, jenħtieġ li l-kamp ta’ applikazzjoni attwali tal-eżenzjoni bin-numru 8(g) jinżamm għall-vetturi ta’ tip approvat qabel l-1 ta’ Ottubru 2022, filwaqt li l-kamp ta’ applikazzjoni iktar ristrett ta’ dik l-eżenzjoni jibda japplika għall-vetturi ta’ tip approvat minn dik id-data ’l quddiem.

(4)

Mill-valutazzjoni tal-eżenzjoni bin-numru 8(f)(b) ħareġ li jenħtieġ li ma jiġix estiż l-użu taċ-ċomb fl-applikazzjonijiet li tkopri dik l-eżenzjoni, minħabba li hemm alternattivi għall-użu taċ-ċomb f’dawk l-applikazzjonijiet.

(5)

Mill-valutazzjoni tal-eżenzjoni bin-numru 8(j), li tagħti eżenzjoni mill-użu taċ-ċomb fl-istann għall-issaldjar tal-ħġieġ laminat, ħareġ li, għal xi applikazzjonijiet, hemm alternattivi għall-użu taċ-ċomb fl-istann għall-issaldjar tal-ħġieġ laminat. Madankollu, għal ċertu tip ta’ ħġieġ u għal ċerti applikazzjonijiet m’hemmx ċertezza li jeżistu alternattivi xierqa għall-użu taċ-ċomb dal-ħin. Għalhekk huwa xieraq li tiġi stabbilita eżenzjoni ġdida iktar limitata bin-numru 8(k) għal dak it-tip ta’ ħġieġ u għal dawk l-applikazzjonijiet.

(6)

L-eżenzjoni bin-numru 8(j) tapplika biss għall-vetturi ta’ tip approvat qabel l-1 ta’ Jannar 2020. Sabiex jiġi żgurat li l-użu taċ-ċomb ikompli jiġi eżentat għal dak it-tip ta’ ħġieġ u għal dawk l-applikazzjonijiet li għalihom m’hemmx ċertezza li jeżistu alternattivi xierqa għall-użu taċ-ċomb dal-ħin, jeħtieġ li l-eżenzjoni l-ġdida bin-numru 8(k) tibda tapplika malajr kemm jista’ jkun. Għalhekk jenħtieġ li din id-Direttiva tidħol fis-seħħ b’urġenza.

(7)

Għalhekk jenħtieġ li d-Direttiva 2000/53/KE tiġi emendata kif xieraq,

ADOTTAT DIN ID-DIRETTIVA:

Artikolu 1

L-Anness II tad-Direttiva 2000/53/KE huwa emendat kif stabbilit fl-Anness ta’ din id-Direttiva.

Artikolu 2

1.   L-Istati Membri għandhom jadottaw u jippubblikaw, sa mhux iktar tard mill-5 ta’ April 2020, il-liġijiet, ir-regolamenti u d-dispożizzjonijiet amministrattivi neċessarji sabiex jikkonformaw ma’ din id-Direttiva. Huma għandhom jikkomunikaw minnufih it-test ta’ dawk id-dispożizzjonijiet lill-Kummissjoni.

Meta l-Istati Membri jadottaw dawk id-dispożizzjonijiet, fihom għandu jkun hemm referenza għal din id-Direttiva jew għandhom ikunu akkumpanjati minn dik ir-referenza meta ssir il-pubblikazzjoni uffiċjali tagħhom. Huma l-Istati Membri li għandhom jiddeċiedu kif issir dik ir-referenza.

2.   L-Istati Membri għandhom jikkomunikaw lill-Kummissjoni t-test tad-dispożizzjonijiet prinċipali tad-dritt nazzjonali li jadottaw fil-qasam kopert minn din id-Direttiva.

Artikolu 3

Din id-Direttiva għandha tidħol fis-seħħ l-għada tal-jum tal-pubblikazzjoni tagħha f’Il-Ġurnal Uffiċjali tal-Unjoni Ewropea.

Artikolu 4

Din id-Direttiva hija indirizzata lill-Istati Membri.

Magħmul fi Brussell, is-17 ta’ Diċembru 2019.

Għall-Kummissjoni

Il-President

Ursula VON DER LEYEN

(1)  ĠU L 269, 21.10.2000, p. 34.

ANNESS

L-Anness II tad-Direttiva 2000/53/KE huwa emendat kif ġej:

(1)

l-entrata bin-numru 8(e) hija sostitwita b’dan li ġej:

“8(e). Ċomb fl-istann tat-tip li jiddewweb f’temperaturi għoljin (jiġifieri l-ligi b’bażi ta’ ċomb li jkun fihom 85 % jew aktar tal-piż f’ċomb)

(2)

X”

(2)

l-entrata bin-numru 8(f)(b) hija sostitwita b’dan li ġej:

“8(f)(b). Ċomb fis-sistemi ta’ konnetturi tal-pinnijiet konformi apparti minn f’dawk il-punti fejn jitqabbdu l-konnetturi tal-faxx tal-wajers tal-vettura

Vetturi b’approvazzjoni tat-tip maħruġa qabel l-1 ta’ Jannar 2024 u l-ispare parts għal dawn il-vetturi

X”

(3)

l-entrata bin-numru 8(g) hija sostitwita b’dan li ġej:

“8(g)(i). Ċomb fl-istann li jikkompleta konnessjoni elettrika vijabbli bejn id-damma tas-semikonduttur u carrier ġewwa ċirkwit integrat ta’ pakketti flip chip

Vetturi b’approvazzjoni tat-tip maħruġa qabel l-1 ta’ Ottubru 2022 u l-ispare parts għal dawn il-vetturi

X”

“8(g)(ii). Ċomb fl-istann li jikkompleta konnessjoni elettrika vijabbli bejn id-damma tas-semikonduttur u carrier ġewwa ċirkwit integrat ta’ pakketti flip chip meta dik il-konnessjoni elettrika tkun tikkonsisti f’xi waħda minn dawn li ġejjin:

(i)

nodu tat-teknoloġija semikonduttura ta’ 90 nm jew iktar;

(ii)

damma unika ta’ 300 mm2 jew iktar f’xi nodu tat-teknoloġija semikonduttura;

(iii)

pakketti ta’ dammi stivati b’dammi ta’ 300 mm2 jew iktar, jew interposers tas-silikon ta’ 300 mm2 jew iktar.

(2)

Valida għall-vetturi b’approvazzjoni tat-tip maħruġa mill-1 ta’ Ottubru 2022 ’il quddiem u għall-ispare parts għal dawn il-vetturi

X”

(4)

tiddaħħal l-entrata li ġejja bin-numru 8(k):

“8(k). L-issaldjar tal-applikazzjonijiet tat-tisħin b’kurrent tas-sħana ta’ 0,5 A jew iktar għal kull ġonta tal-issaldjar fuq il-ħġieġ uniku tal-ħġieġ laminat li ma jaqbiżx ħxuna tal-ħajt ta’ 2,1 mm. Din l-eżenzjoni ma tkoprix l-issaldjar tal-kuntatti inkorporati fil-polimeru intermedju

Vetturi b’approvazzjoni tat-tip maħruġa qabel l-1 ta’ Jannar 2024 u l-ispare parts għal dawn il-vetturi

X(4)”
Top