(1)

Id-Deċiżjoni tal-Kunsill Nru 940/2014/UE (2) tawtorizza lill-awtoritajiet Franċiżi japplikaw eżenzjonijiet jew tnaqqis tad-dazju tal-baħar fir-reġjuni ultraperiferiċi Franċiżi għall-prodotti elenkati fl-Anness għal dik id-Deċiżjoni li huma manifatturati lokalment f'dawk ir-reġjuni ultraperiferiċi. Id-differenzjal massimu awtorizzat hu ta’ 10, 20 jew 30 punt perċentwali, skont xi jkunu l-prodotti u d-dipartimenti extra-Ewropej ikkonċernati. Id-Deċiżjoni Nru 940/2014/UE tapplika sal-31 ta’ Diċembru 2020.

(2)

Franza tqis li l-iżvantaġġi kompetittivi li jġarrbu r-reġjuni ultraperiferiċi Franċiżi jippersistu u bagħtet talba lill-Kummissjoni fejn talbet li tinżamm sistema ta’ tassazzjoni differenzjata simili għas-sistema attwali wara l-1 ta’ Jannar 2021 sal-31 ta' Diċembru 2027.

(3)

Madankollu, l-eżami tal-listi tal-prodotti li għalihom Franza tixtieq tapplika tassazzjoni differenzjata hu proċess twil li jeħtieġ il-verifika tar-raġunijiet għat-tassazzjoni differenzjata u għall-proporzjonalità tat-taxxa għal kull prodott, sabiex jiġi żgurat li t-tassazzjoni differenzjata ma tkunx xkiel għall-integrità u għall-koerenza tal-ordinament ġuridiku tal-Unjoni, inkluż l-integrità u l-koerenza tas-suq intern u l-politiki komuni.

(4)

Il-kriżi minħabba l-pandemija tal-COVID-19 ħolqot dewmien kbir fil-ħidma tal-awtoritajiet Franċiżi biex tinġabar l-informazzjoni kollha neċessarja għal dik il-verifika. B’konsegwenza ta’ dan, sa issa dik il-ħidma għadha ma tlestietx.

(5)

In-nuqqas tal-adozzjoni ta’ proposta qabel l-1 ta’ Jannar 2021 jista’ joħloq lakuna ġuridika peress li tiġi pprojbita l-applikazzjoni ta’ kull tassazzjoni differenzjata fir-reġjuni ultraperiferiċi Franċiżi wara l-1 ta’ Jannar 2021.

(6)

Għalhekk huwa meħtieġ perijodu ulterjuri ta’ sitt xhur biex titlesta l-ħidma ta' verifika li għaddejja bħalissa u biex il-Kummissjoni tingħata biżżejjed żmien biex tippreżenta proposta bbilanċjata li tikkunsidra l-interessi varji kkonċernati.

(7)

Għalhekk, id-Deċiżjoni Nru 940/2014/UE jenħtieġ li tiġi emendata skont dan,