Back to EUR-Lex homepage

EUR-Lex Access to European Union law

Back to EUR-Lex homepage

This document is an excerpt from the EUR-Lex website

Use quotation marks to search for an "exact phrase". Append an asterisk (*) to a search term to find variations of it (transp*, 32019R*). Use a question mark (?) instead of a single character in your search term to find variations of it (ca?e finds case, cane, care).
Search tips
Need more search options? Use the Advanced search
You are here

Document 32019R0694

Regolament Delegat tal-Kummissjoni (UE) 2019/694 tal-15 ta' Frar 2019 li jissupplimenta r-Regolament (UE) Nru 1303/2013 tal-Parlament Ewropew u tal-Kunsill fir-rigward tal-forma ta' finanzjament li mhijiex marbuta mal-kostijiet tal-operazzjonijiet rilevanti

C/2019/1090

OJ L 118, 6.5.2019, p. 4–8 (BG, ES, CS, DA, DE, ET, EL, EN, FR, HR, IT, LV, LT, HU, MT, NL, PL, PT, RO, SK, SL, FI, SV)

Legal status of the document In force

ELI: http://data.europa.eu/eli/reg_del/2019/694/oj

6.5.2019   

MT

Il-Ġurnal Uffiċjali tal-Unjoni Ewropea

L 118/4

REGOLAMENT DELEGAT TAL-KUMMISSJONI (UE) 2019/694

tal-15 ta' Frar 2019

li jissupplimenta r-Regolament (UE) Nru 1303/2013 tal-Parlament Ewropew u tal-Kunsill fir-rigward tal-forma ta' finanzjament li mhijiex marbuta mal-kostijiet tal-operazzjonijiet rilevanti

IL-KUMMISSJONI EWROPEA,

Wara li kkunsidrat it-Trattat dwar il-Funzjonament tal-Unjoni Ewropea,

Wara li kkunsidrat ir-Regolament (UE) Nru 1303/2013 tas-17 ta' Diċembru 2013 tal-Parlament Ewropew u tal-Kunsill li jistabbilixxi dispożizzjonijiet komuni dwar il-Fond Ewropew għall-Iżvilupp Reġjonali, il-Fond Soċjali Ewropew, il-Fond ta' Koeżjoni, il-Fond Agrikolu Ewropew għall-Iżvilupp Rurali u l-Fond Marittimu u tas-Sajd Ewropew u li jistabbilixxi d-dispożizzjonijiet ġenerali dwar il-Fond Ewropew għall-Iżvilupp Reġjonali, il-Fond Soċjali Ewropew, il-Fond ta' Koeżjoni u l-Fond Ewropew għall-Affarijiet Marittimi u s-Sajd u li jħassar ir-Regolament tal-Kunsill (KE) Nru 1083/2006 (1), u b'mod partikolari l-Artikolu 67(5)(a) tiegħu,

Billi:

(1)

Il-punt (e) fl-ewwel subparagrafu tal-Artikolu 67(1) tar-Regolament (UE) Nru 1303/2013 iddaħħal mir-Regolament (UE, Euratom) 2018/1046 (2) u introduċa forma ta' finanzjament li mhuwiex marbut mal-kostijiet tal-operazzjonijiet rilevanti iżda li jkun ibbażat fuq li jiġu ssodisfati l-kundizzjonijiet (“kundizzjonijiet ta' finanzjament”) relatati mat-twettiq tal-progress fl-implimentazzjoni jew mal-kisba tal-objettivi tal-programmi.

(2)

Filwaqt li tqies l-istadju attwali tal-perjodu ta' programmar 2014-2020, ġew eżaminati oqsma tematiċi differenti li fihom tista' tintuża din il-forma ta' finanzjament b'mod effettiv u li jistgħu juru l-benefiċċji tagħha f'termini ta' simplifikazzjoni u ta' tnaqqis ta' piż amministrattiv għall-benefiċjarji u għall-awtorità ta' ġestjoni filwaqt li ma jiskattawx bidliet sinifikanti fi programmi eżistenti. Il-mizuri ta' effiċjenza fl-enerġija u l-enerġija minn sorsi rinovabbli ġew appoġġati b'mod estensiv mill-Fond Ewropew għall-Iżvilupp Reġjonali (“FEŻR”) u mill-Fond ta' Koeżjoni fl-2014-2020 u qabel perjodu baġitarji. Dawk il-miżuri jikkostitwixxu qasam ta' appoġġ li jinkludi tipi relattivament omoġenji ta' interventi (bħal miżuri ta' iżolament, bidla fis-sistema ta' tisħin jew apparat elettroniku b'effiċjenza aħjar), fejn il-benefiċjarji jew ir-reċipjenti finali tal-appoġġ fil-prattika spiss ikunu persuni fiżiċi jew SMEs.

(3)

Riżultat ta' dan, ikun xieraq li jiġu stabbiliti modalitajiet dettaljati għal kundizzjonijiet ta' finanzjament għal miżuri ta' effiċjenza fl-enerġija u għall-applikazzjoni tagħhom fil-qafas legali eżistenti, inkluż il-metodoloġija biex jiġi ddeterminat l-ammont li jikkorrisondi mal-kundizzjonijiet ta' finanzjament applikabbli u mal-arranġamenti għall-operazzjoni soġġetta għal rimborż abbażi ta' kundizzjonijiet ta' finanzjament. Jenħtieġ li l-metodoloġija dettaljata tiddetermina r-rabta bejn l-ammont u s-sodisfazzjon tal-kundizzjonijiet ta' finanzjament finali, u jenħtieġ ukoll li l-ammont ikun indipendenti mill-kost tal-attivitajiet fi ħdan l-operazzjoni li se jikkontribwixxu għall-kundizzjonijiet ta' finanzjament finali.

(4)

B'mod partikolari, sabiex jiġi żgurat li l-metodu ta' kalkolu użat għall-finijiet tat-twaqqif tal-ammont relatat mal-kundizzjonijiet ta' finanzjament iqis b'mod xieraq il-preżunzjonijiet raġonevoli bbażati fuq tendenzi prevedibbli fl-iżvilupp teknoloġiku u bidliet relatati fl-ispejjeż ta' investiment għal tipi differenti ta' intervenzjonijiet li jikkontribwixxu għas-sodisfazzjon ġenerali tal-kundizzjonijiet ta' finanzjament, il-perjodu ta' referenza applikat jenħtieġ li jirrigwarda l-aħħar snin fejn id-data hija disponibbli għal investimenti simili.

(5)

Jenħtieġ li jiġi speċifikat kif jiġu implimentati dispożizzjonijiet eżistenti dwar applikazzjonijiet għall-pagament f'dan il-kuntest skont l-Artikolu 131(1), it-tieni subparagrafu, tar-Regolament (UE) Nru 1303/2013.

(6)

Barra minn hekk, jenħtieġ li jiġi mfakkar li r-rekwiżiti speċifiċi marbuta ma' verifiki tal-ġestjoni u ma' awditi għal operazzjonijiet soġġetti għar-rimborż abbażi tal-kundizzjonijiet ta' finanzjament huma stabbiliti fir-Regolament (UE) Nru 1303/2013, speċjalment fl-Artikolu 67(1) u fl-Artikolu 125(4)(a) tiegħu. Jenħtieġ li dawn ikunu riflessi fid-dispożizzjonijiet dwar l-istabbiliment ta' dawn it-tipi ta' operazzjonijiet kif speċifikat fil-punt 4 tal-Anness. B'mod partikolari, il-verifiki u l-awditi ma għandhomx iseħħu fil-livell tal-investimenti individwali minħabba li huwa l-benefiċjarju li jirrapporta li jkunu ġew issosfati l-kundizzjonijiet ta' finanzjament lill-awtorità ta' ġestjoni. Barra minn hekk, id-dokumenti ta' appoġġ li jirrigwardaw in-nefqa sottostanti la għandhom ikunu soġġetti għal awditu, lanqas għal verifiki ta' ġestjoni minħabba li l-ammonti marbuta mal-operazzjoni huma definiti minn qabel.

(7)

Il-miżuri previsti f'dan ir-Regolament ġew soġġetti għal konsultazzjoni ta' esperti nominati minn kull Stat Membru skont il-prinċipji stabbiliti fil-Ftehim Interistituzzjonali dwar it-Tfassil Aħjar tal-Liġijiet (3), skont l-Artikolu 149(3)(a) tar-Regolament (UE) Nru 1303/2013.

(8)

Sabiex jiġi żgurat li l-awtoritajiet maħtura jkunu jistgħu jużaw effettivament id-dispożizzjonijiet il-ġodda li japplikaw mit-2 ta' Awwissu 2018 skont l-Artikolu 282 tar-Regolament (UE, Euratom) 2018/1046, dan ir-Regolament għandu jidħol fis-seħħ fil-jum wara dak tal-pubblikazzjoni tiegħu f'Il-Ġurnal Uffiċjali tal-Unjoni Ewropea,

ADOTTAT DAN IR-REGOLAMENT:

Artikolu 1

Is-suġġett u l-kamp ta' applikazzjoni

1.   Dan ir-Regolament jistabbilixxi modalitajiet dettaljati għall-kundizzjonijiet ta' finanzjament li jistgħu jintużaw għar-rimborż tan-nefqa mill-awtorità ta' ġestjoni lill-benefiċjarji taħt finanzjament li mhuwiex marbut mal-kostijiet tal-operazzjonijiet rilevanti msemmija fil-punt (e) tal-ewwel subparagrafu tal-Artikolu 67(1) tar-Regolament (UE) Nru 1303/2013 u għall-applikazzjoni tagħhom.

2.   L-oqsma tan-nefqa li jistgħu jkunu suġġetti għal finanzjament li mhuwiex marbut mal-kostijiet għandhom ikunu l-miżuri ta' effiċjenza fl-enerġija u l-enerġija minn sorsi rinovabbli kif dettaljat fl-Anness.

Artikolu 2

Definizzjonijiet

Għall-finijiet ta' dan ir-Regolament, japplikaw id-definizzjonijiet li ġejjin:

(1)

“kundizzjonijiet ta' finanzjament” tfisser il-kundizzjonijiet li għandhom jiġu ssodisfati għar-rimborż tan-nefqa taħt finanzjament li mhijiex marbuta ma' kostijiet, li jikkonsistu f'serje ta' kundizzjonijiet ta' finanzjament intermedji u finali li ttieħdu biex jikkontribwixxu lejn li jiġi ssodisfat objettiv predefinit;

(2)

“operazzjoni soġġetta għal rimborż abbażi tal-kundizzjonijiet ta' finanzjament” tfisser operazzjoni unika skont it-tifsira tal-Artikolu 2(9) tar-Regolament (UE) Nru 1303/2013, li tikkonsisti mill-kompiti kollha li ġew implimentati biex jiġu ssodisfati l-kundizzjonijiet ta' finanzjament intermedji u finali.

Artikolu 3

Modalitajiet għall-kundizzjonijiet ta' finanzjament u l-applikazzjoni tagħhom

1.   Il-kundizzjonijiet ta' finanzjament finali għandhom jiġu determinati skont l-Anness.

2.   Il-modalitajiet għall-applikazzjoni tal-kundizzjonijiet ta' finanzjament fir-rigward tal-metodoloġija għall-istabbiliment tal-ammont predefinit tan-nefqa li se jiġi rimborżat u s-sottomissjoni tal-informazzjoni lill-Kummissjoni għat-twaqqif tal-operazzjoni soġġetta għar-rimborż abbażi tal-kundizzjonijiet ta' finanzjament għandhom jiġu ddeterminati skont l-Anness.

Artikolu 4

Elementi għal applikazzjonijiet għall-pagament

1.   Il-kostijiet ikkalkolati fuq il-bażi applikabbli li għandhom jiġu inklużi f'applikazzjoni għall-pagament skont l-Artikolu 131(2) tar-Regolament (UE) Nru 1303/2013 għandhom ikunu l-ammont predefinit li jikkorrispondi għal kull kundizzjoni ta' finanzjament issodisfata. Dak l-ammont għandu jiġi inkluż fl-applikazzjonijiet għall-pagament flimkien mar-referenza tal-operazzjoni kkonċernata, skont il-mudell għal applikazzjonijiet għall-pagament stipulat fir-Regolament ta' Implimentazzjoni tal-Kummissjoni (UE) Nru 1011/2014 (4).

2.   In-nefqa totali eliġibbli għal operazzjoni soġġetta għar-rimborż abbażi tal-kundizzjonijiet ta' finanzjament ma għandhiex taqbeż ammont predefinit tan-nefqa li jikkorrispondi għall-kundizzjoni ta' finanzjament finali kkalkolat fuq il-bażi tal-metodoloġiji stipulati fl-Anness.

Artikolu 5

Dħul fis-seħħ

Dan ir-Regolament għandu jidħol fis-seħħ fil-jum wara dak tal-pubblikazzjoni tiegħu f'Il-Ġurnal Uffiċjali tal-Unjoni Ewropea.

Dan ir-Regolament għandu jorbot fl-intier tiegħu u japplika direttament fl-Istati Membri kollha.

Magħmul fi Brussell, il-15 ta' Frar 2019.

Għall-Kummissjoni

Il-President

Jean-Claude JUNCKER

(1)  ĠU L 347, 20.12.2013, p. 320.

(2)  Ir-Regolament (UE, Euratom) 2018/1046 tal-Parlament Ewropew u tal-Kunsill tat-18 ta' Lulju 2018 dwar ir-regoli finanzjarji applikabbli għall-baġit ġenerali tal-Unjoni, li jemenda r-Regolamenti (UE) Nru 1296/2013, (UE) Nru 1301/2013, (UE) Nru 1303/2013, (UE) Nru 1304/2013, (UE) Nru 1309/2013, (UE) Nru 1316/2013, (UE) Nru 223/2014, (UE) Nru 283/2014, u d-Deċiżjoni Nru 541/2014/UE u li jħassar ir-Regolament (UE, Euratom) Nru 966/2012 (ĠU L 193, 30.7.2018, p. 1).

(3)  Il-Ftehim Interistituzzjonali bejn il-Parlament Ewropew, il-Kunsill tal-Unjoni Ewropea u l-Kummissjoni Ewropea tat-13 ta' April 2016 dwar it-Tfassil Aħjar tal-Liġijiet (ĠU L 123, 12.5.2016, p. 1).

(4)  Ir-Regolament ta' Implimentazzjoni tal-Kummissjoni (UE) Nru 1011/2014 tat- 22 ta' Settembru 2014 li jistabbilixxi regoli dettaljati għall-implimentazzjoni tar-Regolament (UE) Nru 1303/2013 tal-Parlament Ewropew u tal-Kunsill fir-rigward tal-mudelli għall-preżentazzjoni ta' ċerta informazzjoni lill-Kummissjoni u r-regoli dettaljati rigward l-iskambji ta' informazzjoni bejn il-benefiċjarji u l-awtoritajiet ta' ġestjoni, l-awtoritajiet ta' ċertifikazzjoni, l-awtoritajiet ta' verifika u l-korpi intermedji (ĠU L 286, 30.9.2014, p. 1).

ANNESS

Modalitajiet li jikkonċernaw il-kundizzjonijiet ta' finanzjament u l-applikazzjoni tagħhom għal miżuri effiċjenti fl-enerġija u enerġija minn sorsi rinnovabbli

1.   Kamp ta' applikazzjoni

Dan l-Anness għandu japplika għal investimenti fl-effiċjenza fl-enerġija u enerġija minn sorsi rinovabbli taħt l-objettiv tematiku 4 tal-FEŻR u tal-Fond ta' Koeżjoni.

2.   Kundizzjoni ta' finanzjament finali

(1)

 Il-kundizzjoni ta' finanzjament finali għal miżuri ta' effiċjenza fl-enerġija u għal enerġija minn sorsi rinovabbli għandhom jiġu espressi f'iffrankar tal-enerġija f'kWh/sena jew tunnellati ta' emissjonijiet ta' CO2 kif deskritt fl-indikaturi tal-output komuni fl-Anness I tar-Regolament (UE) Nru 1301/2013.

(2)

 L-iffrankar tal-enerġija f'kWh/sena jew it-tnaqqis fl-emissjonijiet tas-CO2 għandhom jiġu definiti fuq il-bażi ta' wieħed mill-metodi ta' kalkolu definiti fl-Anness V(1)(a), (b) jew (c) tad-Direttiva 2012/27/UE (1).

3.   Metodoloġija biex jiġi stabbilit l-ammont li jikkorrispondi mal-kundizzjoni ta' finanzjament finali

(1)

 Għall-applikazzjoni tal-kundizzjoni ta' finanzjment finali, l-ammont ta' nefqa eliġibbli li jikkorrispondi mal-kundizzjoni ta' finanzjament finali għandu jkun stabbilit minn metodu ta' kalkolu ġust, ekwitabbli u verifikabbli bbażat fuq wieħed minn dawn li ġejjin:

(a)

data statistika, informazzjoni oġġettiva oħra jew opinjoni esperta;

(b)

data storika verifikata relatata mal-miżuri ta' effiċjenza fl-enerġija u enerġija minn skemi ta' sorsi rinovabbli.

(2)

 Il-metodu ta' kalkolu għandu jqis l-assunzjonijiet raġonevoli rigward it-tendenzi u l-bidliet teknoloġiċi li huma probabbli, li jista' jkollhom implikazzjonijiet fuq il-kostijiet tal-investimenti ppjanati li jikkontribwixxu għas-sodisfazzjon tal-kundizzjoni ta' finanzjament finali matul l-iskeda ta' żmien prevista għall-implimentazzjoni tal-operazzjoni.

4.   Twaqqif ta' operazzjonijiet soġġetti għal rimborż abbażi tal-kundizzjonijiet ta' finanzjament

Għall-applikazzjoni tal-kundizzjonijiet ta' finanzjament, għandu japplika dan li ġej:

(a)

L-operazzjoni soġġetta għal rimborż ibbażata fuq il-kundizzjonijiet ta' finanzjament hija relatata mat-twettiq tal-progress fl-implimentazzjoni jew il-kisba ta' objettivi tal-programm;

(b)

il-benefiċjarju tal-operazzjoni soġġetta għal rimborż abbażi ta' kundizzjonijiet ta' finanzjament hija l-awtorità ta' ġestjoni jew korp intermedju bl-arranġamenti meħtieġa li jiżguraw is-separazzjoni tal-funzjonijiet f'konformità mal-Artikolu 125(7) tar-Regolament (UE) Nru 1303/2013;

(c)

l-operazzjoni soġġetta għal rimborż abbażi ta' kundizzjonijiet ta' finanzjament hija implimentata fuq il-bażi ta' skeda ta' żmien prevista għat-tlestija tal-kundizzjonijiet ta' finanzjament finali intermedji jew finali;

(d)

l-operazzjoni soġġetta għal rimborż ibbażata fuq il-kundizzjonijiet ta' finanzjament titlesta jew tiġi implimentata bis-sħiħ qabel it-tmiem tal-perjodu ta' eliġibbiltà stipulat fl-Artikolu 65(2) tar-Regolament (UE) Nru 1303/2013;

(e)

meta jiġu determinati l-kundizzjonijiet ta' finanzjament intermedji, l-ammonti korrispondenti ta' nefqa huma stipulati minn qabel;

(f)

il-mekkaniżmu biex ikejjel u jimmonitorja l-progress lejn is-sodisfazzjoni tal-kundizzjonijiet ta' finanzjament jippermetti l-verifika li tkun ġiet issodisfata kull kundizzjoni ta' finanzjament;

(g)

l-operazzjoni soġġetta għal rimborż abbażi ta' kundizzjonijiet ta' finanzjament hija eskluża mill-popolazzjoni msemmija fl-Artikolu 28(3) tar-Regolament Delegat (UE) Nru 480/2014 għall-finijiet ta' kampjun ta' operazzjonijiet imsemmi fl-Artikolu 127(1) tar-Regolament (UE) Nru 1303/2013.

5.   Il-preżentazzjoni tar-referenzi lill-Kummissjoni

L-Istati Membri għandhom jippreżentaw informazzjoni lill-Kummissjoni dwar l-elementi stipulati fil-punti 2, 3 u 4 li jiddeskrivu kif l-operazzjoni soġġetta għal rimborż ibbażat fuq kundizzjonijiet ta' finanzjament għandha tiffunzjona qabel il-bidu tal-implimentazzjoni tagħha.

(1)  Id-Direttiva 2012/27/UE tal-Parlament Ewropew u tal-Kunsill tal-25 ta' Ottubru 2012 dwar l-effiċjenza fl-enerġija, li temenda d-Direttivi 2009/125/KE u 2010/30/UE u tħassar id-Direttiva 2004/8/KE u 2006/32/KE (ĠU L 315, 14.11.2012, p. 1).

Top