EUR-Lex Access to European Union law
This document is an excerpt from the EUR-Lex website
Document 32019D0544
Commission Implementing Decision (EU) 2019/544 of 3 April 2019 amending Implementing Decision (EU) 2018/2031 determining, for a limited period of time, that the regulatory framework applicable to central counterparties in the United Kingdom of Great Britain and Northern Ireland is equivalent, in accordance with Regulation (EU) No 648/2012 of the European Parliament and of the Council (Text with EEA relevance.)
Deċiżjoni ta' Implimentazzjoni tal-Kummissjoni (UE) 2019/544 tat-3 ta' April 2019 li temenda d-Deċiżjoni ta' Implimentazzjoni tal-Kummissjoni (UE) 2018/2031 li tiddetermina, għal perjodu ta' żmien limitat, li l-qafas regolatorju applikabbli għal kontropartijiet ċentrali fir-Renju Unit tal-Gran Brittanja u l-Irlanda ta' Fuq huwa ekwivalenti, skont ir-Regolament (UE) Nru 648/2012 tal-Parlament Ewropew u tal-Kunsill (Test b'rilevanza għaż-ŻEE.)
Deċiżjoni ta' Implimentazzjoni tal-Kummissjoni (UE) 2019/544 tat-3 ta' April 2019 li temenda d-Deċiżjoni ta' Implimentazzjoni tal-Kummissjoni (UE) 2018/2031 li tiddetermina, għal perjodu ta' żmien limitat, li l-qafas regolatorju applikabbli għal kontropartijiet ċentrali fir-Renju Unit tal-Gran Brittanja u l-Irlanda ta' Fuq huwa ekwivalenti, skont ir-Regolament (UE) Nru 648/2012 tal-Parlament Ewropew u tal-Kunsill (Test b'rilevanza għaż-ŻEE.)
C/2019/2661
OJ L 95, 4.4.2019, p. 9–10
(BG, ES, CS, DA, DE, ET, EL, EN, FR, HR, IT, LV, LT, HU, MT, NL, PL, PT, RO, SK, SL, FI, SV)
No longer in force, Date of end of validity: 01/02/2021
|
4.4.2019 |
MT |
Il-Ġurnal Uffiċjali tal-Unjoni Ewropea |
L 95/9 |
DEĊIŻJONI TA' IMPLIMENTAZZJONI TAL-KUMMISSJONI (UE) 2019/544
tat-3 ta' April 2019
li temenda d-Deċiżjoni ta' Implimentazzjoni tal-Kummissjoni (UE) 2018/2031 li tiddetermina, għal perjodu ta' żmien limitat, li l-qafas regolatorju applikabbli għal kontropartijiet ċentrali fir-Renju Unit tal-Gran Brittanja u l-Irlanda ta' Fuq huwa ekwivalenti, skont ir-Regolament (UE) Nru 648/2012 tal-Parlament Ewropew u tal-Kunsill
(Test b'rilevanza għaż-ŻEE)
IL-KUMMISSJONI EWROPEA,
Wara li kkunsidrat it-Trattat dwar il-Funzjonament tal-Unjoni Ewropea,
Wara li kkunsidrat ir-Regolament (UE) Nru 648/2012 tal-Parlament Ewropew u tal-Kunsill tal-4 ta' Lulju 2012 dwar derivati OTC, kontropartijiet ċentrali u repożitorji tad-data dwar it-tranżazzjonijiet (1), u b'mod partikolari l-Artikolu 25(6) tiegħu,
Billi:
|
(1) |
Skont l-Artikolu 2 tad-Deċiżjoni ta' Implimentazzjoni tal-Kummissjoni (UE) 2018/2031 (2), dik id-Deċiżjoni għandha tapplika mid-data li ssegwi dik li fiha t-Trattati ma jibqgħux japplikaw għal u fir-Renju Unit tal-Gran Brittanja u l-Irlanda ta' Fuq (ir-“Renju Unit”) skont l-Artikolu 50(3) tat-Trattat dwar l-Unjoni Ewropea, sakemm sa dik id-data ma jkunx daħal fis-seħħ ftehim ta' ħruġ jew ma jkunx ġie estiż il-perjodu ta' sentejn imsemmi fl-Artikolu 50(3) tat-Trattat dwar l-Unjoni Ewropea. |
|
(2) |
Fit-22 ta' Marzu 2019, il-Kunsill Ewropew adotta d-Deċiżjoni (UE) 2019/476 (3) li testendi l-perjodu skont l-Artikolu 50(3) tat-Trattat dwar l-Unjoni Ewropea bi qbil mar-Renju Unit. Għaldaqstant, it-tieni kundizzjoni għall-applikazzjoni tad-Deċiżjoni ta' Implimentazzjoni (UE) 2018/2031, jiġifieri li l-perjodu ta' sentejn imsemmi fl-Artikolu 50(3) tat-Trattat dwar l-Unjoni Ewropea ma ġiex estiż, mhux se tiġi ssodisfata. |
|
(3) |
Madankollu, ir-raġunijiet tad-Deċiżjoni ta' Implimentazzjoni (UE) 2018/2031 jibqgħu, irrispettivament minn kwalunkwe estensjoni tal-perjodu msemmi fl-Artikolu 50(3) tat-Trattat dwar l-Unjoni Ewropea. B'mod partikolari, fil-każ ta' ħruġ mingħajr ftehim wara l-perjodu estiż, ir-riskji potenzjali jippersistu fir-rigward tal-istabbiltà finanzjarja tal-Unjoni u tal-Istati Membri tagħha. Għalhekk, id-Deċiżjoni ta' Implimentazzjoni (UE) 2018/2031 jenħtieġ li tapplika jekk ir-Renju Unit joħroġ mill-Unjoni mingħajr ftehim. |
|
(4) |
Għalhekk, id-Deċiżjoni ta' Implimentazzjoni (UE) 2018/2031 jenħtieġ li tiġi emendata skont dan. |
|
(5) |
Din id-Deċiżjoni jenħtieġ li tidħol fis-seħħ bħala kwistjoni ta' urġenza biex jiġi żgurat li tapplika fil-każ li r-Renju Unit joħroġ mill-Unjoni mingħajr ftehim ta' ħruġ wara l-iskadenza tal-perjodu msemmi fl-Artikolu 50(3) tat-Trattat dwar l-Unjoni Ewropea kif estiż mill-Kunsill Ewropew fit-22 ta' Marzu 2019. |
|
(6) |
Il-miżuri stipulati f'din id-Deċiżjoni huma konformi mal-opinjoni tal-Kumitat Ewropew tat-Titoli, |
ADOTTAT DIN ID-DEĊIŻJONI:
Artikolu 1
Fl-Artikolu 2 tad-Deċiżjoni ta' Implimentazzjoni (UE) 2018/2031, it-tielet paragrafu jinbidel b'dan li ġej:
“Madankollu, din id-Deċiżjoni ma għandhiex tapplika jekk sad-data msemmija fit-tieni paragrafu ta' dan l-Artikolu jkun daħal fis-seħħ ftehim li jkun ġie konkluż mar-Renju Unit tal-Gran Brittanja u l-Irlanda ta' fuq skont l-Artikolu 50(2) tat-Trattat dwar l-Unjoni Ewropea”.
Artikolu 2
Din id-Deċiżjoni għandha tidħol fis-seħħ l-għada tal-jum tal-pubblikazzjoni tagħha f'Il-Ġurnal Uffiċjali tal-Unjoni Ewropea.
Magħmul fi Brussell, it-3 ta' April 2019.
Għall-Kummissjoni
Il-President
Jean-Claude JUNCKER
(1) ĠU L 201, 27.7.2012, p. 1.
(2) Id-Deċiżjoni ta' Implimentazzjoni tal-Kummissjoni (UE) 2018/2031 tad-19 ta' Diċembru 2018 li tiddetermina, għal perjodu ta' żmien limitat, li l-qafas regolatorju applikabbli għal kontropartijiet ċentrali fir-Renju Unit tal-Gran Brittanja u l-Irlanda ta' Fuq huwa ekwivalenti, skont ir-Regolament (UE) Nru 648/2012 tal-Parlament Ewropew u tal-Kunsill (ĠU L 325, 20.12.2018, p. 50).
(3) Id-Deċiżjoni tal-Kunsill Ewropew (UE) 2019/476 meħuda bi qbil mar-Renju Unit, tat-22 ta' Marzu 2019 li testendi l-perijodu taħt l-Artikolu 50(3) TUE (ĠU L 80 I, 22.3.2019, p. 1).