(1)

Ir-Regolament (UE) 2016/679 jistabbilixxi r-regoli għat-trasferiment ta’ data personali mingħand il-kontrolluri jew il-proċessuri fl-Unjoni Ewropea lil pajjiżi terzi u lil organizzazzjonijiet internazzjonali sa fejn it-tali trasferimenti jkunu jaqgħu taħt il-kamp ta’ applikazzjoni tiegħu. Ir-regoli dwar it-trasferimenti internazzjonali ta’ data personali huma stabbiliti fil-Kapitolu V ta’ dan ir-Regolament, b’mod aktar speċifiku fl-Artikoli minn 44 sa 50. Il-fluss ta’ data personali lejn u mill-pajjiżi li jinsabu barra l-Unjoni Ewropea hu neċessarju għall-espansjoni tal-kooperazzjoni internazzjonali u tal-kummerċ internazzjonali, filwaqt li jiġi ggarantit li l-livell ta’ protezzjoni mogħti lid-data personali fl-Unjoni Ewropea ma jiġix imminat.

(2)

Skont l-Artikolu 45(3) tar-Regolament (UE) 2016/679, il-Kummissjoni tista’ tiddeċiedi, permezz ta’ att ta’ implimentazzjoni, li pajjiż terz, territorju jew settur speċifikat wieħed jew aktar f’pajjiż terz, jew organizzazzjoni internazzjonali, jiżguraw livell adegwat ta’ protezzjoni. Skont din il-kundizzjoni, it-trasferimenti ta’ data personali lil dak il-pajjiż terz, it-territorju, is-settur jew dik l-organizzazzjoni internazzjonali jista’ jseħħ mingħajr il-bżonn li tinkiseb xi awtorizzazzjoni ulterjuri, kif previst fl-Artikolu 45(1) u fil-premessa 103 tar-Regolament.

(3)

Kif speċifikat fl-Artikolu 45(2) tar-Regolament (UE) 2016/679, l-adozzjoni ta’ deċiżjoni ta’ adegwatezza trid tkun ibbażata fuq analiżi komprensiva tal-ordinament ġuridiku tal-pajjiż terz, kemm fir-rigward tar-regoli applikabbli għall-importaturi tad-data kif ukoll tal-limitazzjonijiet u s-salvagwardji li jikkonċernaw l-aċċess għal data personali mill-awtoritajiet pubbliċi. Il-valutazzjoni trid tiddetermina jekk il-pajjiż terz inkwistjoni jiggarantixxix livell ta’ protezzjoni “essenzjalment ekwivalenti” għal dak żgurat fl-Unjoni Ewropea (premessa 104 tar-Regolament (UE) 2016/679). Kif iċċarat mill-Qorti tal-Ġustizzja tal-Unjoni Ewropea, dan ma jeħtieġx livell identiku ta’ protezzjoni (2). B’mod partikolari, il-mezzi li bihom il-pajjiż terz inkwistjoni jkollu rikors jistgħu jvarjaw min dawk imħaddma fl-Unjoni Ewropea, dment li dawn juru li, fil-prattika, ikunu effettivi għall-iżgurar ta’ livell adegwat ta’ protezzjoni (3). Għaldaqstant, l-istandard ta’ adegwatezza ma jeħtieġx replika minn punt għal punt tar-regoli tal-Unjoni. Minflok, it-test jinsab fil-prova jekk permezz tas-sustanza tad-drittijiet dwar il-privatezza u l-implimentazzjoni, is-superviżjoni u l-infurzar effettivi tagħhom, is-sistema barranija sħiħa tfornix il-livell meħtieġ ta’ protezzjoni (4).

(4)

Il-Kummissjoni analizzat bir-reqqa l-liġi u l-prattika tal-Ġappun. Fuq il-bażi tas-sejbiet żviluppati fil-premessi minn 6 sa 175, il-Kummissjoni tikkonkludi li l-Ġappun jiżgura livell adegwat ta’ protezzjoni għal data personali trasferita lil organizzazzjonijiet li jaqgħu fil-kamp ta’ applikazzjoni tal-Att dwar il-Protezzjoni ta’ Informazzjoni Personali (5) u soġġett għall-kundizzjonijiet addizzjonali msemmija f’din id-Deċiżjoni. Dawn il-kundizzjonijiet huma stabbiliti fir-Regoli Supplimentari (Anness I) adottati mill-Kummissjoni għall-Protezzjoni ta’ Informazzjoni Personali (PPC) (6) u fir-rappreżentazzjonijiet, assigurazzjonijiet u impenji uffiċjali mill-gvern Ġappuniż lill-Kummissjoni Ewropea (Anness II).

(5)

Din id-Deċiżjoni għandha l-effett li t-trasferimenti min kontrollur jew minn proċessur fiż-Żona Ekonomika Ewropea (ŻEE) (7) lil organizzazzjonijiet bħal dawn fil-Ġappun jistgħu jseħħu mingħajr il-ħtieġa li tinkiseb xi awtorizzazzjoni oħra. Din id-Deċiżjoni ma taffettwax l-applikazzjoni diretta tar-Regolament (UE) 2016/679 għal tali organizzazzjonijiet meta jkunu ssodisfati l-kundizzjonijiet tal-Artikolu 3 tiegħu.

(6)

Is-sistema ġuridika li tirregola l-privatezza u l-protezzjoni tad-data fil-Ġappun hi stabbilita fil-Kostituzzjoni promulgata fl-1946.

(7)

L-Artikolu 13 tal-Kostituzzjoni jiddikjara:

“In-nies kollha għandhom ikunu rispettati bħala individwi. Id-dritt tagħhom għall-ħajja, għal-libertà, u għat-tfittxija tal-kuntentizza għandu, sa fejn ma jtellifx il-benessri pubbliku, ikun kunsiderazzjoni suprema fil-leġiżlazzjoni u f’affarijiet governattivi oħra.”

(8)

Fuq il-bażi ta’ dan l-Artikolu, il-Qorti Suprema Ġappuniża ċċarat id-drittijiet tal-individwi rigward il-protezzjoni ta’ informazzjoni personali. F’deċiżjoni tal-1969, hi rrikonoxxiet id-dritt għall-privatezza u għall-protezzjoni tad-data bħala dritt kostituzzjonali (8). Ta’ min jinnota li l-Qorti ddikjarat li “kull individwu għandu l-libertà li jipproteġi l-informazzjoni personali tiegħu milli tiġi żvelata lil parti terza jew milli tiġi ppubblikata mingħajr raġuni valida.” Barra minn hekk, f’deċiżjoni tas-6 ta’ Marzu 2008 (“Juki-Net”) (9), il-Qorti Suprema ddikjarat li “l-libertà taċ-ċittadini fil-ħajja privata għandha tkun protetta kontra l-eżerċizzju tal-awtorità pubblika, u din tista’ tiġi interpretata li, bħala waħda mil-libertajiet ta’ individwu fil-ħajja privata, kull individwu għandu l-libertà li jipproteġi l-informazzjoni personali tiegħu stess milli tiġi żvelata lil parti terza jew milli tiġi ppubblikata mingħajr raġuni valida.” (10)

(9)

Fit-30 ta’ Mejju 2003, il-Ġappun għadda sensiela ta’ liġijiet fil-qasam tal-protezzjoni tad-data:

(10)

Iż-żewġ atti msemmija l-aħħar (emendati fl-2016) fihom dispożizzjonijiet applikabbli għall-protezzjoni ta’ informazzjoni personali minn entitajiet tas-settur pubbliku. Il-proċessar ta’ data li jaqa’ fi ħdan il-kamp ta’ applikazzjoni ta’ dawk l-atti mhuwiex l-oġġett tal-konstatazzjoni tal-adegwatezza li tinsab f’din id-Deċiżjoni, li hi limitata għall-protezzjoni ta’ informazzjoni personali minn “Operaturi ta’ Negozji li Jimmaniġġjaw Informazzjoni Personali” (Personal Information Handling Business Operators, PIHBOs) skont it-tifsira tal-APPI.

(11)

L-APPI ġie riformat fl-aħħar snin. L-APPI emendat ġie promulgat fid-9 ta’ Settembru 2015 u daħal fis-seħħ fit-30 ta’ Mejju 2017. L-emenda introduċiet numru ta’ salvagwardji ġodda, u saħħet ukoll is-salvagwardji eżistenti, u b’hekk is-sistema Ġappuniża ta’ protezzjoni tad-data ġiet imqarrba lejn dik Ewropea. Dan jinkludi, pereżempju, sett ta’ drittijiet individwali infurzabbli jew l-istabbiliment ta’ awtorità superviżorja indipendenti (PPC) inkarigata bis-sorveljanza u bl-infurzar tal-APPI.

(12)

Minbarra l-APPI, il-proċessar ta’ informazzjoni personali li jaqa’ fil-kamp ta’ applikazzjoni ta’ din id-Deċiżjoni hu soġġett għar-regoli ta’ implimentazzjoni maħruġa fuq il-bażi tal-APPI. Dan jinkludi Emenda għall-Ordni tal-Kabinett ta’ Infurzar tal-Att dwar il-Protezzjoni ta’ Informazzjoni Personali tal-5 ta’ Ottubru 2016, u l-hekk imsejħa Regoli ta’ Infurzar għall-Att dwar il-Protezzjoni ta’ Informazzjoni Personali adottat mill-PPC (11). Iż-żewġ settijiet ta’ regoli huma legalment vinkolanti u infurzabbli u daħlu fis-seħħ fl-istess ħin bħall-APPI emendat.

(13)

Barra minn hekk, fit-28 ta’ Ottubru 2016, il-Kabinett tal-Ġappun (li jikkonsisti fil-Prim Ministru u fil-Ministri li jifformaw il-gvern tiegħu) ħareġ “Politika Bażika” li “tippromwovi b’mod komprensiv u integrat il-miżuri li jikkonċernaw il-protezzjoni ta’ informazzjoni personali”. Skont l-Artikolu 7 tal-APPI, il-“Politika Bażika” hi maħruġa fil-forma ta’ Deċiżjoni tal-Kabinett u tinkludi orjentazzjonijiet tal-politika li jikkonċernaw l-infurzar tal-APPI, immirati kemm lejn il-gvern ċentrali kif ukoll lejn il-gvernijiet lokali.

(14)

Dan l-aħħar, permezz ta’ Deċiżjoni tal-Kabinett adottata fit-12 ta’ Ġunju 2018, il-gvern Ġappuniż emenda l-“Politika Bażika”. Bl-għan li tiffaċilita t-trasferimenti internazzjonali ta’ data, din id-Deċiżjoni tal-Kabinett tiddelega lill-PPC, bħala l-awtorità kompetenti għall-amministrazzjoni u għall-implimentazzjoni tal-APPI, “is-setgħa li tieħu l-azzjoni neċessarja biex tneħħi d-differenzi bejn is-sistemi u l-operazzjonijiet bejn il-Ġappun u l-pajjiż terz ikkonċernat fuq il-bażi tal-Artikolu 6 tal-Att fid-dawl tal-iżgurar tal-immaniġġjar xieraq ta’ informazzjoni personali riċevuta mingħand it-tali pajjiż”. Id-Deċiżjoni tal-Kabinett tistipula li din tinkludi s-setgħa li tistabbilixxi protezzjonijiet imsaħħa bl-adozzjoni mill-PPC ta’ regoli aktar stretti li jissupplimentaw u jmorru lil hinn minn dawk stabbiliti fl-APPI u fl-Ordni tal-Kabinett. Skont din id-Deċiżjoni, dawn ir-regoli aktar stretti għandhom ikunu vinkolanti u eżegwibbli fuq l-operaturi ta’ negozji Ġappuniżi.

(15)

Fuq il-bażi tal-Artikolu 6 tal-APPI u ta’ dik id-Deċiżjoni tal-Kabinett, il-PPC fil-15 ta’ Ġunju 2018 adottat “Regoli Supplimentari skont l-Att dwar il-Protezzjoni ta’ Informazzjoni Personali għall-Immaniġġjar ta’ Data Personali Trasferita mill-UE fuq il-bażi ta’ Deċiżjoni ta’ Adegwatezza” (ir-“Regoli Supplimentari”) bl-għan li ssaħħaħ il-protezzjoni ta’ informazzjoni personali trasferita mill-Unjoni Ewropea lill-Ġappun fuq il-bażi tad-deċiżjoni ta’ adegwatezza preżenti. Dawn ir-Regoli Supplimentari huma legalment vinkolanti fuq l-operaturi ta’ negozji Ġappuniżi u huma eżegwibbli, kemm mill-PPC kif ukoll mill-qrati, bl-istess mod bħad-dispożizzjonijiet tal-APPI li r-Regoli jissupplimentaw b’regoli aktar stretti u/jew aktar dettaljati (12). Peress li l-operaturi tan-negozju Ġappuniżi li jkunu qegħdin jirċievu jew ikomplu jipproċessaw xi data personali mill-Unjoni Ewropea se jkunu taħt obbligu legali li jkunu konformi mar-Regoli Supplimentari, se jkun hemm bżonn li jiżguraw (eż. permezz ta’ mezzi tekniċi (“tagging”) jew organizzattivi (il-ħażna f’xi bażi ta' data dedikat)) li jkunu jistgħu jidentifikaw tali data personali matul “iċ-ċiklu ta’ ħajja” tagħhom (13). Fit-taqsimiet li ġejjin, il-kontenut ta’ kull Regola Supplimentari jiġi analizzat bħala parti mill-valutazzjoni tal-artikoli tal-APPI li tikkomplementaha.

(16)

Għall-kuntrarju ta’ dak li kien jiġri qabel l-emenda tal-2015 meta din kienet taqa’ taħt il-kompetenza ta’ diversi Ministeri Ġappuniżi f’setturi speċifiċi, l-APPI jagħti s-setgħa lill-PPC li tadotta “Linji Gwida” biex tiżgura l-implimentazzjoni xierqa u effettiva tal-azzjoni li tkun se tittieħed minn operatur ta’ negozju” skont ir-regoli tal-protezzjoni tad-data. Permezz tal-Linji Gwida tagħha, il-PPC jipprovdu interpretazzjoni awtoritattiva ta’ dawn ir-regoli, b’mod partikolari tal-APPI. Skont l-informazzjoni riċevuta mill-PPC, dawn il-Linji Gwida jifformaw parti integrali mill-qafas legali, li għandhom jinqraw mat-test tal-APPI, mal-Ordni tal-Kabinett, mar-Regoli tal-PPC u ma’ sett ta’ Mistoqsijiet u Tweġibiet (14) imħejji mill-PPC. Għalhekk, huma “vinkolanti fuq l-operaturi tan-negozju”. Meta l-Linji Gwida jiddikjaraw li operatur ta’ negozju “jrid” jew “m’għandux” jaġixxi b’xi mod speċifikat, il-PPC tqis li nuqqas ta’ konformità mad-dispożizzjonijiet rilevanti jfisser ksur tal-liġi (15).

(17)

Il-kamp ta’ applikazzjoni tal-APPI hu determinat mill-kunċetti definiti ta’ Informazzjoni Personali, ta’ Data Personali u ta’ Operatur ta’ Negozju li Jimmaniġġja Informazzjoni Personali. Fl-istess ħin, l-APPI jipprovdi għal xi eżenzjonijiet importanti mill-kamp ta’ applikazzjoni tiegħu, l-aktar importanti fosthom għal Data Personali Proċessata b’mod Anonimu u għal tipi speċifiċi ta’ proċessar minn ċerti operaturi. Filwaqt li l-APPI ma jużax it-terminu “pproċessar”, huwa jistrieħ fuq il-kunċett ekwivalenti ta’ “immaniġġjar” li, skont l-informazzjoni li waslet mingħand il-PPC tkopri “kull att li jikkonċerna d-data personali” inkluż l-akkwist, l-input, l-akkumulu, l-organizzazzjoni, il-ħażna, l-editjar jew il-proċessar, it-tiġdid, it-tħassir, l-output, l-użu jew l-għoti ta’ informazzjoni personali.

(18)

L-ewwel nett, rigward il-kamp ta’ applikazzjoni materjali tiegħu, l-APPI jagħmel distinzjoni bejn informazzjoni personali u data personali, b’uħud biss minn fost id-dispożizzjonijiet tal-Att li huma applikabbli għall-kategorija msemmija l-ewwel. Skont l-Artikolu 2(1) tal-APPI, il-kunċett ta’ “informazzjoni personali” jinkludi kull informazzjoni relatata ma’ individwu ħaj li tippermetti l-identifikazzjoni ta’ dak l-individwu. Id-definizzjoni tiddistingwi bejn żewġ kategoriji ta’ informazzjoni personali: (i) kodiċijiet ta’ identifikazzjoni individwali u (ii) informazzjoni personali oħra li fiha jkun jista’ jiġi identifikat individwu speċifiku. Il-kategorija msemmija l-aħħar tinkludi wkoll informazzjoni li waħedha ma tippermettix li ssir identifikazzjoni iżda, meta tkun “kollata lesta” ma’ informazzjoni oħra, tippermetti l-identifikazzjoni ta’ individwu speċifiku. Skont il-Linji Gwida tal-PPC (16), jekk l-informazzjoni tistax titqies bħala “kollata lesta” għandu jiġi ġġudikat fuq bażi ta’ każ b’każ, b’kunsiderazzjoni tas-sitwazzjoni propja (“kundizzjoni”) tal-operatur ta’ negozju. Dan se jkun assunt jekk it-tali kollazzjoni tkun (jew tista’ tkun) imwettqa minn operatur ta’ negozju medju (“normali”) li juża l-mezzi disponibbli għal dak l-operatur. Pereżempju, informazzjoni ma tkunx “kollata lesta” ma’ informazzjoni oħra jekk operatur ta’ negozju jkollu bżonn jagħmel sforzi mhux tas-soltu jew iwettaq atti illegali biex jikseb l-informazzjoni li trid tiġi kollata minn operatur ta’ negozju ieħor jew aktar.

(19)

Ċerti forom biss ta’ informazzjoni personali jaqgħu taħt il-kunċett ta’ “data personali” skont l-APPI. Fil-fatt, “data personali” hi definita bħala “informazzjoni personali li tikkostitwixxi bażi ta’ data ta’ informazzjoni personali”, jiġifieri “korp kollettiv ta’ informazzjoni” li jinkludi informazzjoni personali “organizzata b’mod sistematiku biex tkun tista’ titfittex informazzjoni personali partikolari permezz ta’ kompjuter” (17) jew “stabbilita b’ordni tal-kabinett bħala waħda sistematikament organizzata biex tippermetti t-tiftix faċli għal informazzjoni personali partikolari” – iżda “esklużi dawk stabbiliti b’ordni tal-kabinett bħala li ftit li xejn jinvolvu l-possibbiltà ta’ ħsara għad-drittijiet u għall-interessi ta’ individwu fid-dawl tal-metodu ta’ użu tagħhom” (18).

(20)

Din l-eċċezzjoni tkompli tiġi speċifikata fl-Artikolu 3(1) tal-Ordni tal-Kabinett, li skontha jridu jiġu ssodisfati t-tliet kundizzjonijiet kumulattivi li ġejjin: (i) il-korp kollettiv ta’ informazjoni irid ikun “maħruġ għall-iskop li jinbiegħ lil għadd kbir ta’ persuni mhux speċifikati u li l-ħruġ tiegħu ma jkunx sar bi ksur tad-dispożizzjonijiet ta’ xi liġi jew ordni bbażata fuqu”; (ii) irid ikun hemm il-possibbilta li “jinxtara f’kull ħin minn għadd kbir ta’ persuni mhux speċifikati” u (iii) id-data personali li jkun fih trid tkun “ipprovduta għall-iskop oriġinali tagħha mingħajr ma tiżdied xi informazjoni oħra marbuta ma xi individwu li jkun għadu ħaj”. Skont l-ispjegazzjonijiet li waslu mingħand il-PPC, din l-eċċezzjoni ristretta ddaħħlet bl-għan li jiġu esklużi direttorji tat-telefon jew xi għamliet simili ta’ pubblikazzjonijiet.

(21)

Għal data miġbura fil-Ġappun, din id-distinzjoni bejn “informazzjoni personali” u “data personali” hi rilevanti għaliex it-tali informazzjoni jaf mhux dejjem tkun parti minn “bażi ta’ data ta’ informazzjoni personali” (pereżempju sett ta’ data wieħed miġbur u proċessat manwalment) u, għaldaqstant, dawn id-dispożizzjonijiet tal-APPI li huma relatati mad-data personali biss ma jkunux japplikaw (19).

(22)

Għall-kuntrarju, din id-distinzjoni ma tkunx rilevanti għal data personali importata mill-Unjoni Ewropea fil-Ġappun fuq il-bażi ta’ deċiżjoni ta’ adegwatezza. Peress li tali data se tiġi normalment trasferita b’mezzi elettroniċi (meta wieħed iqis li fl-era diġitali dan huwa l-mod normali ta’ kif tiġi skambjata d-data, speċjalment meta d-distanzi jkunu kbar, bħal ma hu l-każ bejn l-UE u l-Ġappun), u b’hekk issir parti mis-sistema elettronika ta’ filing tal-importatur tad-data, tali data tal-UE se taqa’ fil-kategorija ta’ “data personali” skont l-APPI. Fil-każ eċċezzjonali li d-data personali tiġi trasferita mill-UE b’xi mezzi oħra (eż. f’forma stampata), din xorta tkun koperta mill-APPI jekk wara t-trasferiment issir parti minn “korp kollettiv ta’ informazzjoni” li jkun organizzat b’mod sistematiku sabiex jippermetti li ssir tiftixa faċli għal informazzjoni speċifika (l-Artikolu 2(4)(ii) APPI). Skont l-Artikolu 3(2) tal-Ordni tal-Kabinett, dan ikun il-każ meta l-informazzjoni tkun irranġata “skont ċerti regola” u l-bażi tad-data tkun tinkludi għodod bħal pereżempju tabella ta’ kontenut jew indiċi li jħaffef it-tiftix. Dan jikkorrispondi għad-definizzjoni ta’ “sistema ta’ filing” skont it-tifsira tal-Artikolu 2(1) tal-GDPR.

(23)

Ċerti dispożizzjonijiet tal-APPI, b’mod partikolari l-Artikoli minn 27 sa 30, li huma relatati mad-drittijiet individwali, japplikaw biss għal kategorija speċifika ta’ data personali, jiġifieri “data personali miżmuma”. Din hi definita fl-Artikolu 2(7) tal-APPI bħala data personali li mhix dik li tkun (i) “stipulata b’ordni tal-kabinett bħala waħda li aktarx tagħmel ħsara lil interessi pubbliċi jew oħra jekk tiġi żvelata l-preżenza jew l-assenza tagħha” jew tkun (ii) “se titħassar f' perjodu ta’ mhux aktar minn sena li jkun stipulat b’ordni tal-kabinett”.

(24)

Fir-rigward tal-ewwel waħda minn dawk iż-żewġ kategoriji, din hi spjegata fl-Artikolu 4 tal-Ordni tal-Kabinett u tkopri erba’ tipi ta’ eżenzjonijiet (20). Dawn l-eżenzjonijiet għandhom objettivi simili għal dawk elenkati fl-Artikolu 23(1) tar-Regolament (UE) 2016/679, b’mod partikolari l-protezzjoni tas-suġġett tad-data (“prinċipal” fit-terminoloġija tal-APPI) u l-libertà tal-oħrajn, is-sigurtà nazzjonali, is-sigurtà pubblika, l-infurzar tad-dritt kriminali jew objettivi importanti oħra ta’ interess pubbliku ġenerali. Barra minn hekk, hija tirriżulta mill-kliem tal-Artikolu 4(1)(i)-(iv) tal-Ordni tal-Kabinett, li l-applikazzjoni tiegħu dejjem tippresupponi riskju speċifiku għal wieħed mill-interessi importanti protetti (21).

(25)

It-tieni kategorija ġiet speċifikata ulterjorment fl-Artikolu 5 tal-Ordni tal-Kabinett. Moqri flimkien mal-Artikolu 2(7) tal-APPI, dan jeżenta mill-kamp ta’ applikazzjoni tal-kunċett ta’ data personali miżmuma, u b’hekk mid-drittijiet individwali skont l-APPI, dik id-data personali li “tkun se titħassar” fi ħdan perjodu ta’ sitt xhur. Il-PPC spjegat li din l-eżenzjoni għandha l-għan li tinċentiva lill-operaturi ta’ negozji biex iżommu u jipproċessaw data għall-iqsar perjodu possibbli. Madankollu, dan ikun ifisser li s-suġġetti tad-data tal-UE ma jkunux jistgħu jibbenefikaw minn drittijiet importanti għal ebda raġuni oħra ħlief id-durata taż-żamma tad-data tagħhom mill-operatur ta’ negozju kkonċernat.

(26)

Biex tiġi indirizzata din is-sitwazzjoni, ir-Regola Supplimentari (2) teħtieġ li data personali trasferita mill-Unjoni Ewropea “tiġi mmaniġġjata bħala data personali miżmuma skont it-tifsira tal-Artikolu 2, paragrafu 7 tal-Att, indipendentement mill-perjodu li fih tkun se titħassar”. B’hekk, il-perjodu ta’ żamma mhu se jkollu ebda effett fuq id-drittijiet mogħtija lis-suġġetti tad-data tal-UE.

(27)

Ir-rekwiżiti applikabbli għal informazzjoni personali proċessata b’mod anonimu, kif definita fl-Artikolu 2(9) tal-APPI, huma stipulati fit-Taqsima 2 tal-Kapitolu 4 tal-Att (“Dmirijiet ta’ Operatur ta’ Negozju Li Jimmaniġġja Informazzjoni Proċessata b’mod Anonimu”). Għall-kuntrarju, it-tali informazzjoni mhix regolata mid-dispożizzjonijiet tat-Taqsima 1 tal-Kapitolu IV tal-APPI li tinkludi l-artikoli li jistipulaw is-salvagwardji u d-drittijiet ta’ protezzjoni tad-data li japplikaw għall-proċessar ta’ data personali skont dan l-Att. Konsegwentement, filwaqt li “informazzjoni personali proċessata b’mod anonimu” mhix soġġetta għal regoli “standard” dwar il-protezzjoni tad-data (dawk speċifikati fit-Taqsima 1 tal-Kapitolu IV u fl-Artikolu 42 tal-APPI), din ma taqax fil-kamp ta’ applikazzjoni tal-APPI, b’mod partikolari l-Artikoli minn 36 sa 39.

(28)

Skont l-Artikolu 2(9) tal-APPI, “informazzjoni personali proċessata b’mod anonimu” hi informazzjoni relatata ma’ individwu li tkun ġiet “prodotta mill-proċessar ta’ informazzjoni personali” permezz tal-miżuri stipulati fl-APPI (l-Artikolu 36(1)) u speċifikati fir-regoli tal-PPC (l-Artikolu 19), bir-riżultat li jkun sar impossibbli li jiġi identifikat individwu jew li tiġi restawrata l-informazzjoni personali.

(29)

Minn dawn id-dispożizzjonijiet, kif ikkonfermat ukoll mill-PPC, jirriżulta li l-proċessar tal-“anonimizzazzjoni” ta’ informazzjoni personali mhux bilfors irid ikun teknikament irriversibbli. Skont l-Artikolu 36(2) tal-APPI, l-operaturi ta’ negozji li jimmaniġġjaw “informazzjoni personali proċessata b’mod anonimu” huma sempliċiment meħtieġa jipprevjenu r-riidentifikazzjoni billi jieħdu miżuri li jiżguraw is-sigurtà tad-“deskrizzjonijiet eċċ. u kodiċijiet ta’ identifikazzjoni individwali mħassra mill-informazzjoni personali użata għall-produzzjoni tal-informazzjoni proċessata b’mod anonimu, u informazzjoni relatata ma’ metodu ta’ proċessar imwettaq”.

(30)

Peress li “informazzjoni personali proċessata b’mod anonimu”, kif definita mill-APPI, tinkludi data li għaliha l-identifikazzjoni mill-ġdid tal-individwi tibqa’ possibbli, dan jista' jfisser li data personali trasferita mill-Unjoni Ewropea tista’ titlef parti mill-protezzjonijiet disponibbli permezz ta’ proċess li, skont ir-Regolament (UE) (UE) 2016/679, ikun meqjus bħala forma ta’ “psewdonimizzazzjoni” minflok “anonimizzazzjoni” (u b’hekk ma jbiddilx in-natura tagħha bħala data personali).

(31)

Biex tiġi indirizzata din is-sitwazzjoni, ir-Regoli Supplimentari jipprovdu għal rekwiżiti addizzjonali applikabbli biss għal data personali trasferita mill-Unjoni Ewropea skont din id-Deċiżjoni. Skont ir-Regola (5) tar-Regoli Supplimentari, it-tali informazzjoni personali għandha titqies “informazzjoni personali proċessata b’mod unanimu” skont it-tifsira tal-APPI biss “jekk l-operatur ta’ negozju li jimmaniġġja informazzjoni personali jieħu miżuri li jagħmlu d-deidentifikazzjoni tal-individwu irriversibbli għal kull min ikun, inkluż billi titħassar l-informazzjoni relatata mal-metodu ta’ proċessar eċċ.”. Din tal-aħħar ġiet speċifikata fir-Regoli Supplimentari bħala informazzjoni relatata ma’ deskrizzjonijiet u ma’ kodiċijiet ta’ identifikazzjoni individwali li tħassru minn informazzjoni personali użata għall-produzzjoni ta’ “informazzjoni personali proċessata b’mod anonimu”, kif ukoll informazzjoni relatata ma’ metodu ta’ pproċessar applikat filwaqt li jitħassru dawn id-deskrizzjonijiet u l-kodiċijiet ta’ identifikazzjoni individwali. F’termini oħra, ir-Regoli Supplimentari jeħtieġu li l-operatur ta’ negozju li jipproduċi informazzjoni personali proċessata b’mod anonimu jeqred iċ-“ċavetta” li tippermetti l-identifikazzjoni mill-ġdid tad-data. Dan ifisser li data personali li toriġina mill-Unjoni Ewropea taqa’ taħt id-dispożizzjonijiet tal-APPI rigward “informazzjoni personali proċessata b’mod anonimu” biss f’każijiet meta din tkun meqjusa wkoll bħala informazzjoni anonima skont ir-Regolament (UE) 2016/679 (22).

(32)

Rigward il-kamp ta’ applikazzjoni personali tiegħu, l-APPI japplika biss għall-PIHBOs. PIHBO hu definit fl-Artikolu 2(5) tal-APPI bħala “persuna li tipprovdi bażi ta’ data ta’ informazzjoni personali eċċ. għall-użu fin-negozju”, bl-esklużjoni tal-gvern u tal-aġenziji amministrattivi, kemm f’livell ċentrali kif ukoll f’livell lokali.

(33)

Skont il-Linji Gwida tal-PPC, “negozju” tfisser kwalunkwe “mġiba bl-iskop li titwettaq, għal ċertu għan, irrilevanti jekk hux bi skop ta’ profitt jew le, b’mod ripetut u kontinwu, attività soċjalment rikonoxxuta”. Organizzazzjonijiet mingħajr personalità ġuridika (bħal assoċjazzjonijiet de facto) jew individwi jitqiesu bħala PIHBO jekk huma jipprovdu (jużaw) bażi ta’ data ta’ informazzjoni personali eċċ. għan-negozju tagħhom (23). Għaldaqstant, il-kunċett ta’ “negozju” skont l-APPI hu wiesa’ ħafna peress li jinkludi mhux biss attivitajiet bi skop ta’ profitt iżda anki dawk mingħajr skop ta’ qligħ minn kull xorta ta’ organizzazzjoni u ta’ individwu. Barra minn hekk, “użu fin-negozju” tkopri wkoll informazzjoni personali li ma tintużax fir-relazzjonijiet kummerċjali (esterni) tal-operatur, iżda internament, pereżempju l-proċessar ta’ data tal-impjegati.

(34)

Rigward il-benefiċjarji tal-protezzjonijiet stabbiliti fl-APPI, l-Att ma jagħmel ebda distinzjoni fuq il-bażi tan-nazzjonalità, tar-residenza jew tal-lokalizzazzjoni ta’ individwu. L-istess japplika għall-possibbiltajiet tal-individwi li jfittxu rimedju, mill-PPC jew inkella mill-qrati.

(35)

Skont l-APPI, ma ssir ebda distinzjoni speċifika bejn l-obbligi imposti fuq il-kontrolluri u l-proċessuri. In-nuqqas ta’ din id-distinzjoni ma jaffettwax il-livell ta’ protezzjoni għaliex il-PIHBOs kollha huma soġġetti għad-dispożizzjonijiet kollha tal-Att. PIHBO li jafda l-proċessar ta’ data personali lil xi fiduċjarju (l-ekwivalenti ta’ proċessur taħt il-GDPR) jibqa’ suġġett għall-obbligi taħt l-APPI u tar-Regoli Supplimentari għar-rigward tad-data li jkun ġie fdat biha. Barra minn dan, skont l-Artikolu 22 tal-APPI, huwa marbut li “jeżerċita s-superviżjoni neċessarja u xierqa” fuq il-fiduċjarju. Min-naħa l-oħra, kif ikkonfermat il-PPC, il-fiduċjarju huwa nnifsu jkun marbut bl-obbligi kollha fl-APPI u fir-Regoli Supplimentari.

(36)

L-Artikolu 76 tal-APPI jeskludi ċerti tipi ta’ proċessar ta’ data mill-applikazzjoni tal-Kapitolu IV tal-Att, li fih id-dispożizzjonijiet ċentrali dwar il-protezzjoni tad-data (il-prinċipji bażiċi, l-obbligi tal-operaturi ta’ negozji, id-drittijiet individwali, is-superviżjoni mill-PPC). Il-proċessar kopert mill-esklużjoni settorjali fl-Artikolu 76 ukoll hu eżentat mis-setgħat ta’ infurzar tal-PPC, skont l-Artikolu 43(2) tal-APPI (24).

(37)

Il-kategoriji rilevanti għall-esklużjoni settorjali fl-Artikolu 76 tal-APPI huma definiti bl-użu ta’ kriterju doppju bbażat fuq it-tip ta’ PIHBO li jipproċessa l-informazzjoni personali u l-iskop tal-proċessar. B’mod aktar speċifiku, l-esklużjoni tapplika għal: (i) istituzzjonijiet tax-xandir, pubblikaturi tal-gazzetti, aġenziji tal-komunikazzjoni jew organizzazzjonijiet oħra tal-istampa (inkluż kull individwu li jwettaq attivitajiet tal-istampa bħala n-negozju tiegħu) sa fejn dawn jipproċessaw informazzjoni personali għall-finijiet tal-istampa; (ii) il-persuni attivi fil-kitba professjonali, sa fejn din tkun tinvolvi informazzjoni personali; (iii) universitajiet u kull organizzazzjoni oħra jew grupp ieħor iffokati fuq studji akkademiċi, jew kull persuna li tappartjeni għal organizzazzjoni bħal din, sa fejn dawn jipproċessaw informazzjoni personali għall-fini tal-istudji akkademiċi; (iv) korpi reliġjużi sa fejn dawn jipproċessaw informazzjoni personali għall-finijiet ta’ attività reliġjuża (inklużi l-attivitajiet relatati kollha); u (v) korpi politiċi sa fejn dawn jipproċessaw informazzjoni personali għall-finijiet ta’ attività politika tagħhom (inklużi l-attivitajiet relatati kollha). Il-proċessar ta’ informazzjoni personali għal wieħed mill-iskopijiet elenkati fl-Artikolu 76 minn tipi oħra ta’ PIHBOs kif ukoll il-proċessar ta’ informazzjoni personali minn wieħed mill-PIHBOs għal skopijiet oħra, pereżempju fil-kuntest ta’ impjieg, jibqgħu koperti mid-dispożizzjonijiet tal-Kapitolu IV.

(38)

Biex jiġi żgurat livell adegwat ta’ protezzjoni ta’ data personali trasferita mill-Unjoni Ewropea lill-operaturi ta’ negozji fil-Ġappun, il-proċessar ta’ informazzjoni personali li taqa’ fil-kamp ta’ applikazzjoni tal-Kapitolu IV tal-APPI biss – jiġifieri minn PIHBO sa fejn is-sitwazzjoni ta’ proċessar ma tikkorrispondix għal waħda mill-eżenzjonijiet settorjali – jenħtieġ li jkun kopert minn din id-Deċiżjoni. Il-kamp ta’ applikazzjoni tiegħu għandu jiġi allinjat ma’ dak tal-APPI. Skont l-informazzjoni li ngħatat mill-PPC, meta PIHBO kopert b’din id-Deċiżjoni jimmodifika sussegwentement l-iskop ta’ użu (sa fejn dan ikun permissibbli) u mbagħad ikun kopert b’wieħed mill-esklużjonijiet settorjali fl-Artikolu 76 tal-APPI, dan jista’ jkun ikkunsidrat bħala trasferiment internazzjonali (meta jitqies li, fit-tali każijiet, il-proċessar tal-informazzjoni personali ma jibqax ikun kopert mill-Kapitolu IV tal-APPI u b’hekk ikun jaqa’ barra mill-ambitu tal-applikazzjoni tal-APPI). L-istess ikun japplika fil-każ li xi PIHBO jipprovdi informazzjoni personali lil xi entità koperta mill-Artikolu 76 tal-APPI għall-użu għal xi wieħed mill-iskopijiet ta’ pproċessar indikat f’dik id-dispożizzjoni. Fir-rigward tad-data personali trasferita mill-Unjoni Ewropea, dan ikun għalhekk jikkostitwixxi trasferiment ulterjuri suġġett għas-salvagwardji relevanti (notevolment dawk speċifikati fl-Artikolu 24 tal-APPI u fir-Regola Supplimentari (4)). Meta PIHBO jkollu joqgħod fuq il-kunsens tas-suġġett tad-data (25), huwa jkun irid jipprovdilu l-informazzjoni neċessarja kollha, inkluż li l-informazzjoni personali ma tibqax protetta mill-APPI.

(39)

Id-data personali għandha tiġi proċessata għal skop speċifiku u sussegwentement għandha tintuża biss sa fejn dan ma jkunx inkompatibbli mal-iskop tal-proċessar. Dan il-prinċipju ta’ protezzjoni tad-data hu ggarantit mill-Artikoli 15 u 16 tal-APPI.

(40)

L-APPI jibbaża fuq il-prinċipju li operatur ta’ negozju jrid jispeċifika l-iskop tal-użu “bl-aktar mod espliċitu possibbli” (Artikolu 15(1)) u mbagħad ikun marbut mit-tali skop meta jipproċessa d-data.

(41)

F’dak ir-rigward, l-Artikolu 15(2) tal-APPI jipprevedi li l-iskop inizjali ma jridx jitbiddel mill-PIHBO “lil hinn mill-ambitu rikonoxxut bħala raġonevolment rilevanti għall-iskop ta’ użu qabel il-modifika”, interpretat fil-Linji Gwida tal-PPC bħala dak li jikkorrispondi għal dak li jista’ jkun antiċipat b’mod oġġettiv mis-suġġett tad-data fuq il-bażi tal-“konvenzjonijiet soċjali normali” (26).

(42)

Barra minn hekk, skont l-Artikolu 16(1) tal-APPI, il-PIHBOs huma pprojbiti milli jimmaniġġjaw informazzjoni personali lil hinn mill-“ambitu neċessarju biex jilħqu skop ta’ użu” speċifikat fl-Artikolu 15 mingħajr ma jiksbu minn qabel il-kunsens ta’ suġġett tad-data, sakemm ma tkunx tapplika waħda mid-derogi fl-Artikolu 16(3) (27).

(43)

F’dak li għandu x’jaqsam ma’ informazzjoni personali miksuba mingħand operatur ta’ negozju ieħor, il-PIHBO, fil-prinċipju tiegħu, ikun ħieles li jistabbilixxi skop ta’ użu ġdid (28). Biex jiġi żgurat li, f’każ ta’ trasferiment mill-Unjoni Ewropea, riċevitur bħal dan ikun marbut bl-iskop li għalih tkun ġiet trasferita d-data, ir-Regola Supplimentari (3) teħtieġ li, f’każijiet “li fihom [PIHBO] jirċievi data personali mill-UE fuq il-bażi ta’ deċiżjoni ta’ adegwatezza” jew tali operatur “jirċievi mingħand [PIHBO] ieħor data personali li qabel kienet ġiet trasferita mill-UE fuq il-bażi ta’ deċiżjoni ta’ adegwatezza” (kondiviżjoni ulterjuri), ir-riċevitur irid “jispeċifika l-iskop tal-użu tat-tali data personali fl-ambitu tal-iskop tal-użu li għalih tkun ġiet riċevuta oriġinarjament jew sussegwentement id-data”. Fi kliem ieħor, ir-regola tiżgura li f’kuntest ta’ trasferiment, l-iskop speċifikat skont ir-Regolament (UE) 2016/679 ikompli jiddetermina l-proċessar, u li tibdil f’dak l-iskop fi kwalunkwe stadju tal-katina ta’ proċessar fil-Ġappun ikun jeħtieġ il-kunsens tas-suġġett tad-data tal-UE. Filwaqt li dan il-kunsens jitlob mill-PIHBO li tikkuntattja lis-suġġett tad-data, meta dan ma jkunx possibbli il-konsegwenza hija sempliċement li l-iskop oriġinali jkollu jinżamm.

(44)

Il-protezzjoni addizzjonali msemmija fil-premessa 43 hi saħansitra aktar rilevanti peress li hu permezz tal-prinċipju ta’ limitazzjoni tal-iskop li s-sistema Ġappuniża tiżgura wkoll li d-data personali tiġi proċessata b’mod legali u ġust.

(45)

Skont l-APPI, meta PIHBO jiġbor informazzjoni personali, dan ikun meħtieġ jispeċifika l-iskop tal-użu tal-informazzjoni personali b’mod dettaljat (29) u jinforma lis-suġġett tad-data minnufih (jew jiżvela lill-pubbliku) dwar dan l-iskop tal-użu (30). Barra minn hekk, l-Artikolu 17 tal-APPI jistabbilixxi li PIHBO m’għandux jikseb informazzjoni personali b’ingann jew b’mezzi inadatti oħra. Rigward ċerti kategoriji ta’ data bħal informazzjoni personali meħtieġa għal kura speċjali, il-kisba tagħha teħtieġ il-kunsens tas-suġġett tad-data (Artikolu 17(2) tal-APPI).

(46)

Sussegwentement, kif spjegat fil-premessi 41 u 42, il-PIHBO hu pprojbit milli jipproċessa l-informazzjoni personali għal skopijiet oħra, ħlief meta s-suġġett tad-data jagħti l-kunsens tiegħu għat-tali proċessar jew meta tkun tapplika waħda mid-derogi skont l-Artikolu 16(3) tal-APPI.

(47)

Finalment, f’dak li għandu x’jaqsam mal-provista ulterjuri ta’ informazzjoni personali lil parti terza (31), l-Artikolu 23(1) tal-APPI jillimita t-tali żvelar għal każijiet speċifiċi, bil-kunsens minn qabel tas-suġġett tad-data bħala r-regola ġenerali (32). L-Artikolu 23(2), (3) u (4) tal-APPI jipprevedi eċċezzjonijiet mir-rekwiżit biex jinkiseb kunsens. Madankollu, dawn l-eċċezzjonijiet ikunu applikabbli biss għal data mhux sensittiva u jeħtieġu li l-operatur ta’ negozju jinforma minn qabel lill-individwi kkonċernati dwar l-intenzjoni li jiżvela l-informazzjoni personali tagħhom lil parti terza u l-possibbiltà li joġġezzjonaw għal kwalunkwe żvelar ulterjuri (33).

(48)

Rigward trasferimenti mill-Unjoni Ewropea, id-data personali bilfors li l-ewwel tkun inġabret u ġiet proċessata fl-UE f’konformità mar-Regolament (UE) 2016/679. Dan dejjem se jinvolvi, minn naħa, il-ġbir u l-proċessar, inkluż għat-trasferiment mill-Unjoni Ewropea lill-Ġappun, fuq il-bażi ta’ waħda mill-motivazzjonijiet legali elenkati fl-Artikolu 6(1) tar-Regolament u, min-naħa l-oħra, il-ġbir għal skop speċifikat, espliċitu u leġittimu kif ukoll il-projbizzjoni ta’ proċessar ulterjuri, inkluż permezz ta’ trasferiment, b’mod li jkun inkompatibbli ma’ dan l-iskop kif stabbilit fl-Artikoli 5(1)(b) u 6(4) tar-Regolament.

(49)

Wara t-trasferiment, skont ir-Regola Supplimentari (3), il-PIHBO li jirċievi d-data jkollu “jikkonferma” l-iskop(ijiet) speċifiku/speċifiċi sottostanti għat-trasferiment (jiġifieri l-iskop speċifikat skont ir-Regolament (UE) 2016/679) u jipproċessa ulterjorment dik id-data f’konformità mat-tali skop(ijiet) (34). Dan ifisser mhux biss li l-akkwirent inizjali tat-tali data personali fil-Ġappun iżda wkoll kwalunkwe riċevitur futur ta’ din id-data (inkluż fiduċjarju) jkunu marbuta bl-iskop(ijiet) speċifikat(i) fir-Regolament.

(50)

Barra minn hekk, f’każ li l-PIHBO jkun jixtieq ibiddel l-iskop kif speċifikat qabel skont ir-Regolament (UE) 2016/679, bis-saħħa tal-Artikolu 16(1) tal-APPI, dan ikollu jikseb, fil-prinċipju, il-kunsens tas-suġġett tad-data. Mingħajr dan il-kunsens, kwalunkwe proċessar tad-data li jmur lil hinn mill-ambitu neċessarju għall-kisba ta’ dan l-iskop ta’ użu jkun jikkostitwixxi ksur tal-Artikolu 16(1) li jkun eżegwibbli mill-PPC u mill-qrati.

(51)

Għalhekk, peress li skont ir-Regolament (UE) 2016/679 trasferiment jeħtieġ bażi ġuridika valida u skop speċifiku, li huma riflessi fl-iskop ta’ użu “kkonfermat” skont l-APPI, it-taħlita tad-dispożizzjonijiet rilevanti tal-APPI u tar-Regola Supplimentari (3) tiżgura l-legalità ssoktata tal-proċessar ta’ data tal-UE fil-Ġappun.

(52)

Id-data għandha tkun preċiża u, fejn meħtieġ, tinżamm aġġornata. Din għandha tkun ukoll adegwata, rilevanti u mhux eċċessiva b’rabta mal-iskopijiet li għalihom tiġi proċessata.

(53)

Dawn il-prinċipji huma żgurati fil-liġi tal-Ġappun permezz tal-Artikolu 16(1) tal-APPI, li jipprojbixxi l-immaniġġjar ta’ informazzjoni personali lil hinn mill-“ambitu neċessarju biex jintlaħaq skop ta’ użu”. Kif spjegat mill-PPC, dan ma jeskludix biss l-użu ta’ data li mhix adegwata u l-użu eċċessiv ta’ data (lil hinn minn dak li jkun neċessarju għall-kisba tal-iskop ta’ użu), iżda jinvolvi wkoll il-projbizzjoni ta’ mmaniġġjar ta’ data mhux rilevanti għall-kisba tal-iskop ta’ użu.

(54)

Rigward l-obbligu biex id-data tinżamm preċiża u aġġornata, l-Artikolu 19 tal-APPI jeħtieġ li l-PIHBO “jistinka biex iżomm id-data personali preċiża u aġġornata fi ħdan l-ambitu neċessarju biex jilħaq skop ta’ użu”. Din id-dispożizzjoni għandha tinqara flimkien mal-Artikolu 16(1) tal-APPI: skont l-ispjegazzjonijiet riċevuti mill-PPC, jekk PIHBO jonqos milli jissodisfa l-istandards stipulati dwar il-preċiżjoni, il-proċessar tal-informazzjoni personali mhux se jitqies li jkun qed jilħaq l-iskop ta’ użu u, b’hekk, l-immaniġġjar tagħha jsir illegali skont l-Artikolu 16(1).

(55)

Fil-prinċipju d-data għandha tinżamm għal mhux aktar minn kemm ikun meħtieġ għall-finijiet li għalihom tiġi proċessata d-data personali.

(56)

Skont l-Artikolu 19 tal-APPI, il-PIHBOs huma meħtieġa “jistinkaw […] biex iħassru d-data personali mingħajr dewmien meta t-tali użu jsir inutli”. Din id-dispożizzjoni jeħtieġ li tinqara wkoll flimkien mal-Artikolu 16(1) tal-APPI li jipprojbixxi l-immaniġġjar ta’ informazzjoni personali lil hinn mill-“ambitu neċessarju biex jintlaħaq skop ta’ użu”. Ladarba jintlaħaq l-iskop tal-użu, il-proċessar ta’ informazzjoni personali ma jistax jibqa’ jitqies neċessarju u, b’hekk, ma jistax ikompli (sakemm il-PIHBO ma jiksibx il-kunsens mingħand is-suġġett tad-data biex jagħmel dan).

(57)

Id-data personali għandha tiġi proċessata b’mod li jiżgura s-sigurtà tagħha, inkluża protezzjoni kontra proċessar mhux awtorizzat jew illegali u kontra telf, qerda jew ħsara aċċidentali. Għal dak l-għan, l-operaturi ta’ negozji għandhom jieħdu miżuri tekniċi jew organizzazzjonali xierqa biex jipproteġu d-data personali mit-theddidiet possibbli. Dawn il-miżuri għandhom jiġu vvalutati b’kunsiderazzjoni tal-ogħla livell ta’ żvilupp tekniku u tal-ispejjeż relatati.

(58)

Dan il-prinċipju hu implimentat fil-liġi tal-Ġappun mill-Artikolu 20 tal-APPI, li jipprevedi li PIHBO “għandu jieħu azzjoni neċessarja u xierqa għall-kontroll tas-sigurtà tad-data personali inkluża l-prevenzjoni ta’ kxif, ta’ telf jew ta’ tħassir tad-data personali mmaniġġjata tiegħu.” Il-Linji Gwida tal-PPC jispjegaw il-miżuri li jridu jittieħdu, inklużi l-metodi għall-istabbiliment ta’ politiki bażiċi, ta’ regoli dwar l-immaniġġjar tad-data u diversi “azzjonijiet ta’ kontroll” (rigward is-sikurezza organizzazzjonali kif ukoll is-sigurtà umana, fiżika u teknoloġika) (35). Barra minn hekk, il-Linji Gwida tal-PPC u Avviż dedikat (Appendiċi 8 dwar il-“Kontenut tal-miżuri ta’ ġestjoni tas-sikurezza li jridu jittieħdu”) ippubblikati mill-PPC jipprovdu aktar dettalji dwar il-miżuri li jikkonċernaw inċidenti tas-sigurtà li jinvolvu, pereżempju, il-kxif ta’ informazzjoni personali, bħala parti mill-miżuri għall-ġestjoni tas-sigurtà li jridu jittieħdu mill-PIHBOs (36).

(59)

Barra minn hekk, kull meta l-informazzjoni personali tkun ġestita minn impjegati jew minn subkuntratturi, trid tiġi żgurata “superviżjoni neċessarja u xierqa” skont l-Artikoli 20 u 21 tal-APPI għall-finijiet ta’ kontroll tas-sigurtà. Finalment, skont l-Artikolu 83 tal-APPI, kxif intenzjonat jew serq ta’ informazzjoni personali huwa kastigabbli b’sanzjoni sa sena priġunerija.

(60)

Is-suġġetti tad-data għandhom ikunu informati dwar il-karatteristiċi ewlenin tal-proċessar ta’ data personali tagħhom.

(61)

L-Artikolu 18(1) tal-APPI jeħtieġ li l-PIHBO jagħmel l-informazzjoni dwar l-iskop tal-użu tal-informazzjoni personali miksuba disponibbli għas-suġġett tad-data, ħlief għal “każijiet li fihom skop ta’ użu jkun ġie żvelat minn qabel lill-pubbliku”. L-istess obbligu japplika f’każ ta’ tibdil permissibbli fl-iskop (Artikolu 18(3)). Dan jiżgura wkoll li s-suġġett tad-data jkun informat bil-fatt li tkun inġabret id-data tiegħu. Għad li l-APPI ġeneralment ma jkunx jeħtieġ li l-PIHBO jinforma lis-suġġett tad-data dwar ir-riċevituri mistennija tal-informazzjoni personali fl-istadju tal-ġbir, it-tali informazzjoni hi kundizzjoni neċessarja għal kwalunkwe żvelar sussegwenti ta’ informazzjoni lil parti terza (riċevitur) fuq il-bażi tal-Artikolu 23(2), u b’hekk fejn dan isir mingħajr il-kunsens minn qabel tas-suġġett tad-data.

(62)

Rigward “data personali miżmuma”, l-Artikolu 27 tal-APPI jipprovdi li l-PIHBO għandu jinforma lis-suġġett tad-data dwar l-identità tiegħu (dettalji tal-kuntatt), l-iskop tal-użu u l-proċeduri għat-tweġib għal talba rigward id-drittijiet individwali tas-suġġett tad-data skont l-Artikoli 28, 29 u 30 tal-APPI.

(63)

Bħal kif stipulat fir-Regoli Supplimentari, data personali trasferita mill-Unjoni Ewropea titqies “data personali miżmuma” irrispettivament mill-perjodu ta’ żamma tagħha (sakemm ma tkunx koperta minn eżenzjonijiet), u dejjem se tkun soġġetta għar-rekwiżiti ta’ trasparenza skont iż-żewġ dispożizzjonijiet imsemmija aktar ’il fuq.

(64)

Kemm ir-rekwiżiti tal-Artikolu 18 kif ukoll l-obbligu ta’ informar dwar l-iskop tal-użu skont l-Artikolu 27 tal-APPI huma soġġetti għall-istess sett ta’ eċċezzjonijiet, fil-parti l-kbira msejsa fuq il- kunsiderazzjonijiet tal-interess pubbliku u tal-protezzjoni tad-drittijiet u tal-interessi tas-suġġett tad-data, tal-partijiet terzi u tal-kontrollur (37). Skont l-interpretazzjoni żviluppata fil-Linji Gwida tal-PPC, dawk l-eċċezzjonijiet japplikaw f’sitwazzjonijiet speċifiċi ħafna bħal meta l-informazzjoni dwar l-iskop tal-użu jkollha riskju li xxekkel il-miżuri leġittimi meħuda mill-operatur ta’ negozju għall-protezzjoni ta’ ċerti interessi (pereżempju l-ġlieda kontra l-frodi, l-ispjunaġġ industrijali, is-sabutaġġ).

(65)

Jenħtieġ li jeżistu salvagwardji speċifiċi fejn ikunu qed jiġu proċessati “kategoriji speċjali” ta’ data.

(66)

“Informazzjoni personali meħtieġa għal kura speċjali” hi definita fl-Artikolu 2(3) tal-APPI. Din id-dispożizzjoni tirreferi għal “informazzjoni personali li tinkludi r-razza, it-twemmin, l-istatus soċjali, l-istorja medika, ir-rekord kriminali, il-fatt ta’ xi dannu mġarrab minħabba att kriminali, jew xi deskrizzjoni oħra, eċċ. tal-prinċipal, li tkun stabbilita minn Ordni tal-Kabinett bħala dawk li l-ġestjoni tagħhom tkun tirrekjedi attenzjoni partikolari sabiex ma tiġix ikkawżata diskriminazzjoni inġusta, preġudizzju jew xi żvantaġġ ieħor lill-prinċipal.” Dawn il-kategoriji jikkorrispondu għal parti kbira mil-lista ta’ data sensittiva skont l-Artikoli 9 u 10 tar-Regolament (UE) 2016/679. B’mod partikolari, “l-istorja medika” tikkorrispondi għal data dwar is-saħħa, filwaqt li “r-rekord kriminali u l-fatti ta’ tiġrib ta’ dannu minn reat” huma sostanzjalment l-istess bħall-kategoriji msemmija fl-Artikolu 10 tar-Regolament (UE) 2016/679. Il-kategoriji msemmija fl-Artikolu 2(3) tal-APPI huma soġġetti għal interpretazzjoni ulterjuri fl-Ordni tal-Kabinet u fil-Linji Gwida tal-PPC. Skont it-Taqsima 2.3 punt (8) tal-Linji Gwida tal-PPC, is-subkategoriji tal-“istorja medika” spjegati fl-Artikolu 2(ii) u (iii) tal-Ordni tal-Kabinett huma interpretati bħala li jkopru data ġenetika u bijometrika. Barra minn hekk, filwaqt li l-lista ma tinkludix espressament it-termini “oriġini etnika” u “opinjoni politika”, din tinkludi referenzi għal “razza” u “twemmin”. Kif spjegat fit-Taqsima 2.3, il-punti (1) u (2), tal-Linji Gwida tal-PPC, ir-referenza għal “razza” tkopri “rabtiet etniċi jew rabtiet ma’ ċerta parti tad-dinja”, filwaqt li “twemmin” hi mifhuma li tinkludi kemm fehmiet reliġjużi kif ukoll politiċi.

(67)

Hekk kif inhu ċar mit-test tad-dispożizzjoni, din mhix lista magħluqa peress li kategoriji oħra ta’ data jistgħu jiżdiedu dment li l-proċessar tagħhom joħloq riskju ta’ “diskriminazzjoni inġusta, preġudizzju jew żvantaġġi oħra għall-prinċipal”.

(68)

Filwaqt li l-kunċett ta’ data“sensittiva” hu minnu nnifsu idea soċjali peress li hu minsuġ fi tradizzjonijiet kulturali u legali, f’kunsiderazzjonijiet morali, f’għażliet ta’ politika, eċċ. ta’ soċjetà partikolari, fid-dawl tal-importanza li jiġu żgurati salvagwardji adegwati għal data sensittiva meta tiġi trasferita lil operaturi ta’ negozji fil-Ġappun, il-Kummissjoni kisbet il-fatt li l-protezzjonijiet speċjali mogħtija lil “informazzjoni personali meħtieġa għal kura speċjali” skont il-liġi Ġappuniża jkunu estiżi għall-kategoriji kollha rikonoxxuti bħala “data sensittiva” fir-Regolament (UE) 2016/679. Għal dan l-għan, ir-Regola Supplimentari (1) tipprevedi li data trasferita mill-Unjoni Ewropea rigward il-ħajja sesswali, l-orjentazzjoni sesswali jew is-sħubija fi trade union ta’ individwu għandha tiġi proċessata mill-PIHBOs “bl-istess mod bħal informazzjoni personali meħtieġa għal kura speċjali skont it-tifsira tal-Artikolu 2, il-paragrafu 3 tal-[APPI]”.

(69)

Rigward is-salvagwardji sostantivi addizzjonali li japplikaw għal informazzjoni personali meħtieġa għal kura speċjali, skont l-Artikolu 17(2) tal-APPI, il-PIHBOs mhumiex permessi jiksbu t-tali tip ta’ data mingħajr il-kunsens minn qabel tal-individwu kkonċernat, soġġetti biss għall-eċċezzjonijiet limitati (38). Barra minn hekk, din il-kategorija ta’ informazzjoni personali hi eskluża mill-possibbiltà ta’ żvelar minn parti terza fuq il-bażi tal-proċedura prevista fl-Artikolu 23(2) tal-APPI (li tippermetti t-trażmissjoni ta’ data lil partijiet terzi mingħajr il-kunsens preċedenti tal-individwu kkonċernat).

(70)

Skont il-prinċipju ta’ responsabbiltà, l-entitajiet li jipproċessaw data huma meħtieġa jimplimentaw miżuri tekniċi u organizzazzjonali xierqa biex jikkonformaw b’mod effettiv mal-obbligi tagħhom ta’ protezzjoni tad-data u jkunu kapaċi juru t-tali konformità, b’mod partikolari lill-awtorità superviżorja kompetenti.

(71)

Kif intqal fin-nota f’qiegħ il-paġna 34 (il-premessa 49), il-PIHBOs huma meħtieġa, skont l-Artikolu 26(1) tal-APPI jivverifikaw l-identità ta’ parti terza li tipprovdilhom data personali u ċ-“ċirkustanzi” li fihom it-tali data nkisbet mingħand il-parti terza (f’każ ta’ data personali koperta minn din id-Deċiżjoni, skont l-APPI u r-Regola Supplimentari (3) dawk iċ-ċirkustanzi għandhom jinkludu l-fatt li d-data tkun toriġina mill-Unjoni Ewropea kif ukoll l-iskop tat-trażmissjoni oriġinali tad-data). Fost l-oħrajn, din il-miżura għandha l-għan li tiżgura l-legalità tal-proċessar tad-datatul il-katina tal-PIHBOs li jimmaniġġjaw id-data personali. Barra minn hekk, skont l-Artikolu 26(3) tal-APPI, il-PIHBOs huma meħtieġa jżommu rekord tad-data tar-riċevuta u l-informazzjoni (obbligatorja) riċevuta mill-parti terza skont il-paragrafu 1, kif ukoll l-isem tal-individwu kkonċernat (is-suġġett tad-data), il-kategoriji ta’ data proċessata u, sa fejn rilevanti, il-fatt li s-suġġett tad-data jkun ta l-kunsens tiegħu għall-qsim tad-data personali tiegħu. Kif speċifikat fl-Artikolu 18 tar-Regoli tal-PPC, dawn ir-rekords iridu jinżammu għal perjodu ta’ mill-inqas sena sa tliet snin, skont iċ-ċirkustanzi. Fl-eżerċizzju tal-kompiti tagħha, il-PPC tista’ titlob is-sottomissjoni tat-tali rekords (39).

(72)

Il-PIHBOs iridu jindirizzaw minnufih u kif xieraq ilmenti ta’ individwi kkonċernati dwar il-proċessar tal-informazzjoni personali tagħhom. Biex jiffaċilitaw l-immaniġġjar tal-ilmenti, dawn għandhom jistabbilixxu “sistema għall-kisba ta’ [dan] l-iskop”, li jimplika li dawn għandhom jimplimentaw proċeduri xierqa fi ħdan l-organizzazzjoni tagħhom (pereżempju jassenjaw responsabblitajiet jew jipprovdu punt ta’ kuntatt).

(73)

Finalment, l-APPI joħloq qafas għall-parteċipazzjoni tal-organizzazzjonijiet industrijali settorjali fl-iżgurar ta’ livell għoli ta’ konformità (ara l-Kapitolu IV, it-Taqsima 4). Ir-rwol tat-tali organizzazzjonijiet akkreditati tal-informazzjoni personali (40) hu li jippromwovu l-protezzjoni ta’ informazzjoni personali billi jsostnu lin-negozji permezz tal-għarfien espert tagħhom, iżda li jikkontribwixxu wkoll għall-implimentazzjoni tas-salvagwardji, b’mod partikolari bl-immaniġġjar tal-ilmenti individwali u bl-assistenza għas-sejbien ta’ soluzzjoni għal kunflitti relatati. Għal dan l-għan, dawn jistgħu jitolbu lill-PIHBOs parteċipanti, jekk ikun xieraq, biex jadottaw il-miżuri neċessarji (41). Barra minn hekk, f’każ ta’ ksur ta’ data jew ta’ inċidenti tas-sigurtà oħra, il-PIHBOs fil-prinċipju għandhom jinformaw lill-PPC kif ukoll lis-suġġett tad-data (jew lill-pubbliku) u jieħdu l-azzjoni neċessarja, inklużi miżuri biex jimminimizzaw kull ħsara u jipprevjenu kull rikorrenza ta’ inċidenti simili (42). Filwaqt li dawk huma skemi volontarji, fl-10 ta’ Awwissu 2017 il-PPC kien elenka 44 organizzazzjoni, bl-akbar waħda, iċ-Ċentru tal-Ġappun għall-Proċessar u għall-Iżvilupp ta’ Informazzjoni (JIPDEC), li waħedha fiha 15 436 operatur ta’ negozju parteċipanti (43). L-iskemi akkreditati jinkludu assoċjazzjonijiet settorjali bħal, pereżempju, l-Assoċjazzjoni tal-Ġappun għan-Negozjanti tat-Titoli, l-Assoċjazzjoni tal-Ġappun tal-Iskejjel tas-Sewqan tal-Karozzi jew l-Assoċjazzjoni tas-Sensara taż-Żwiġijiet (44).

(74)

L-organizzazzjonijiet akkreditati tal-protezzjoni tal-informazzjoni personali jissottomettu rapporti annwali dwar l-operazzjonijiet tagħhom. Skont il-“Ħarsa Ġenerali lejn l-Istatus ta’ Implimentazzjoni [ta’]l-APPI f’FY 2015” ippubblikata mill-PPC, l-organizzazzjonijiet akkreditati ta’ protezzjoni tal-informazzjoni personali rċevew total ta’ 442 ilment, talbu 123 spjegazzjoni mingħand l-operaturi ta’ negozji taħt il-ġurisdizzjoni tagħhom, talbu dokumenti mingħand dawn l-operaturi f’41 każ, taw 181 ordni u għamlu 2 rakkomandazzjonijiet (45).

(75)

Il-livell ta’ protezzjoni mogħtija għal data personali trasferita mill-Unjoni Ewropea lil operaturi ta’ negozji fil-Ġappun ma jistax ikun imxekkel mit-trasferiment ulterjuri tat-tali data lil riċevituri f’pajjiż terz barra mill-Ġappun. Tali “trasferimenti ulterjuri” li, mill-perspettiva tal-operatur ta’ negozju Ġappuniż jikkostitwixxu trasferimenti internazzjonali mill-Ġappun, għandhom jitħallew isiru biss meta r-riċevitur ulterjuri barra mill-Ġappun hu stess ikun soġġett għal regoli li jiżguraw livell simili ta’ protezzjoni bħal dak garantit fi ħdan l-ordinament ġuridiku tal-Ġappun.

(76)

L-ewwel protezzjoni hi mnaqqxa fl-Artikolu 24 tal-APPI li b’mod ġenerali jipprojbixxi t-trasferiment ta’ data personali lil parti terza barra mit-territorju tal-Ġappun mingħajr il-kunsens minn qabel tal-individwu kkonċernat. Ir-Regola Supplimentari (4) tiżgura li fil-każ ta’ trasferimenti ta’ data mill-Unjoni Ewropea, it-tali kunsens irid ikun partikolarment informat sew peress li jkun jeħtieġ li l-individwu kkonċernat jiġi “pprovdut b’informazzjoni dwar iċ-ċirkustanzi tat-trasferiment neċessarju biex il-prinċipal jieħu deċiżjoni dwar il-kunsens tiegħu”. Abbażi ta’ dan, is-suġġett tad-data għandu jiġi infurmat dwar il-fatt li d-data tkun se tiġi ttrasferita barra mill-pajjiż (barra mill-ambitu tal-applikazzjoni tal-APPI) u dwar il-pajjiż speċifiku ta’ destinazzjoni. Dan se jippermettilu jevalwa r-riskju tal-privatezza involut fit-trasferiment. Barra minn hekk, kif wieħed jista’ jobsor meta jħares lejn l-Artikolu 23 tal-APPI (ara l-premessa 47), l-informazzjoni pprovduta lill-prinċipal jenħtieġ li tkun tkopri l-entrati obbligatorji taħt il-paragrafu 2 tiegħu, jiġifieri l-kategoriji ta’ data personali pprovduti lil xi parti terza u l-metodu ta' divulgazzjoni.

(77)

L-Artikolu 24 tal-APPI, applikat flimkien mal-Artikolu 11-2 tar-Regoli tal-PPC, jipprovdi diversi eċċezzjonijiet għal din ir-regola bbażata fuq il-kunsens. Barra minn hekk, skont l-Artikolu 24, l-istess derogi bħal dawk applikabbli skont l-Artikolu 23(1) tal-APPI japplikaw ukoll għal trasferimenti internazzjonali ta’ data (46).

(78)

Biex tiġi żgurata kontinwità fil-protezzjoni f’każ ta’ data personali trasferita mill-Unjoni Ewropea lejn il-Ġappun skont din id-Deċiżjoni, ir-Regola Supplimentari (4) issaħħaħ il-livell ta’ protezzjoni għat-trasferimenti ulterjuri tat-tali data mill-PIHBO lil riċevitur f’pajjiż terz. Din tagħmel dan billi tillimita u ssawwar qafas għall-bażijiet għat-trasferimenti internazzjonali li jistgħu jintużaw mill-PIHBO bħala alternattiva għal kunsens. B’mod aktar speċifiku, u mingħajr ħsara għad-derogi stabbiliti fl-Artikolu 23(1) tal-APPI, data personali trasferita skont din id-Deċiżjoni tista’ tkun soġġetta għal trasferimenti (ulterjuri) mingħajr kunsens f’żewġ każijiet biss: (i) meta d-data tintbagħat f’pajjiż terz li jkun ġie rikonoxxut mill-PPC skont l-Artikolu 24 tal-APPI bħala wieħed li jipprovdi livell ekwivalenti ta’ protezzjoni għal dak garantit fil-Ġappun (47); jew (ii) meta l-PIHBO u l-parti terza riċevitriċi jkunu implimentaw miżuri flimkien li jipprovdu livell ta’ protezzjoni ekwivalenti għall-APPI, moqri flimkien mar-Regoli Supplimentari, permezz ta’ kuntratt, ta’ forom oħra ta’ ftehimiet vinkolanti jew ta’ arranġamenti vinkolanti fi ħdan grupp korporattiv. It-tieni kategorija tikkorrispondi għall-istrumenti użati skont ir-Regolament (UE) 2016/679 biex tiżgura salvagwardji xierqa (b’mod partikolari, klawżoli kuntrattwali u regoli korporattivi vinkolanti). Barra minn hekk, kif konfermat mill-PPC, anki f’dawk il-każijiet, it-trasferiment jibqa’ suġġett għar-regoli ġenerali applikabbli għal kwalunkwe provvediment ta’ data personali lil pajjiż terz taħt l-APPI (jiġifieri l-obbligu li jinkiseb kunsens skont l-Artikolu 23(1) jew, alternattivament, l-obbligu ta’ informazzjoni bil-possibbiltà ta’ nonparteċipazzjoni skont l-Artikolu 23(2) tal-APPI). F’każ li s-suġġett tad-data ma jkunx jista’ jintlaħaq b’talba għal kunsens jew biex jipprovdi l-informazzjoni minn qabel meħtieġa skont l-Artikolu 23(2) tal-APPI, it-trasferiment ma jistax iseħħ.

(79)

Għaldaqstant, barra mill-każijiet li fihom il-PPC issib li l-pajjiż terz inkwistjoni jiżgura livell ta’ protezzjoni ekwivalenti għal dak garantit mill-APPI (48), ir-rekwiżiti stabbiliti fir-Regola Supplimentari (4) jeskludu l-użu ta’ strumenti ta’ trasferiment li ma joħolqux relazzjoni vinkolanti bejn l-esportatur tad-data Ġappuniż u l-importatur tad-data tal-pajjiż terz u li ma jiggarantixxux il-livell meħtieġ ta’ protezzjoni. Dan ikun il-każ, pereżempju, tas-Sistema tar-Regoli tal-APEC dwar il-Privatezza Transfruntiera (CBPR), li l-Ġappun hi ekonomija parteċipanti fiha (49), peress li f’dik is-sistema l-protezzjonijiet ma jirriżultawx minn arranġament li jorbot lill-esportatur u lill-importatur fil-kuntest tar-relazzjoni bilaterali tagħhom u jidher ċar li huma ta’ livell inferjuri għal dak garantit mit-taħlita tal-APPI u tar-Regoli Supplimentari (50).

(80)

Finalment, salvagwardja oħra f’każ ta’ trasferimenti (ulterjuri) issegwi mill-Artikoli 20 u 22 tal-APPI. Skont dawn id-dispożizzjonijiet, meta operatur ta’ pajjiż terz (importatur tad-data) jaġixxi f’isem il-PIHBO (esportatur tad-data), jiġifieri (sub)proċessur, dan tal-aħħar irid jiżgura s-superviżjoni fuq dak imsemmi l-ewwel rigward is-sigurta tal-proċessar tad-data.

(81)

Bħal-liġi tal-UE dwar il-protezzjoni tad-data, l-APPI tagħti lill-individwi numru ta’ drittijiet infurzabbli. Dan jinkludi d-dritt ta’ aċċess (“żvelar”), ta’ rettifika u ta’ tħassir kif ukoll id-dritt ta’ oġġezzjoni (“waqfien tal-użu”).

(82)

L-ewwel, skont l-Artikolu 28(1) u (2) tal-APPI, suġġett tad-data għandu dritt li jitlob mingħand PIHBO “l-iżvelar tad-data personali miżmuma li tista’ tidentifikah” u, malli jirċievi t-tali talba, il-PIHBO “għandu […] jiżvela d-data personali miżmuma” lis-suġġett tad-data. L-Artikoli 29 (dritt għal korrezzjoni) u 30 (dritt għal waqfien tal-użu) għandhom l-istess struttura bħall-Artikolu 28.

(83)

L-Artikolu 9 tal-Ordni tal-Kabinett jispeċifika li l-iżvelar ta’ informazzjoni personali, kif imsemmija fl-Artikolu 28(2) tal-APPI, għandu jsir bil-miktub, sakemm il-PIHBO u s-suġġett tad-data ma jkunux qablu mod ieħor.

(84)

Dawn id-drittijiet huma soġġetti għal tliet tipi ta’ restrizzjonijiet, relatati mad-drittijiet u mal-interessi tal-individwu stess jew tal-partijiet terzi (51), ma’ xkiel serju fl-operazzjonijiet tan-negozju ta’ PIHBO (52) kif ukoll ma' każijiet li fihom l-iżvelar ikun jikser liġijiet jew regolamenti oħra (53). Is-sitwazzjonijiet li fihom ikunu japplikaw dawn ir-restrizzjonijiet huma simili għal uħud mill-eċċezzjonijiet applikabbli skont l-Artikolu 23(1) tar-Regolament (UE) 2016/679, li jippermetti għal restrizzjonijiet tad-drittijiet tal-individwi għal raġunijiet relatati mal-“protezzjoni tas-suġġett tad-data jew tad-drittijiet u tal-libertajiet ta’ oħrajn” jew “objettivi importanti oħra ta’ interess pubbliku ġenerali”. Għad li l-kategorija ta’ każijiet li fihom l-iżvelar ikun jikser “liġijiet jew regolamenti oħra” tista’ tidher wiesgħa, il-liġijiet u r-regolamenti li jipprovdu għal limitazzjonijiet f’dan ir-rigward iridu jirrispettaw id-dritt kostituzzjonali għall-privatezza u jistgħu jimponu restrizzjonijiet biss sa fejn l-eżerċizzju ta’ dan id-dritt ikun “ta’ xkiel għall-benessri pubbliku” (54). Dan jeħtieġ sejbien ta’ bilanċ bejn l-interessi inkwistjoni.

(85)

Skont l-Artikolu 28(3) tal-APPI, jekk id-data mitluba ma tkunx teżisti, jew meta l-PIHBO kkonċernat jiddeċiedi li ma jagħtix aċċess għad-data miżmuma, dan ikun meħtieġ jinforma lill-individwu mingħajr dewmien.

(86)

It-tieni, skont l-Artikolu 29(1) u (2) tal-APPI, suġġett tad-data għandu dritt li jitlob il-korrezzjoni, iż-żieda jew it-tħassir tad-data personali miżmuma tiegħu f'każ li fih id-data ma tkunx preċiża. Mar-riċevuta ta’ talba bħal din, il-PIHBO “għandu […] jwettaq investigazzjoni neċessarja” u, fuq il-bażi tar-riżultati tat-tali investigazzjoni, “jagħmel korrezzjoni eċċ. tal-kontenut tad-data miżmuma”.

(87)

It-tielet, skont l-Artikolu 30(1) u (2) tal-APPI, suġġett tad-data għandu dritt li jitlob lil PIHBO biex ma jkomplix juża l-informazzjoni personali, jew iħassar it-tali informazzjoni, meta tkun immaniġġjata b’mod li jikser l-Artikolu 16 (rigward il-limitazzjoni tal-iskop) jew tkun inkisbet mhux kif suppost bi ksur tal-Artikolu 17 tal-APPI (rigward il-kisba b’qerq, b’mezzi inadatti oħra jew fil-każ ta’ data sensittiva mingħajr kunsens). Bl-istess mod, skont l-Artikolu 30(3) u (4) tal-APPI, l-individwu għandu dritt li jitlob mingħand il-PIHBO l-waqfien tal-provvista tal-informazzjoni lil parti terza meta din tkun tikser id-dispożizzjonijiet tal-Artikolu 23(1) jew tal-Artikolu 24 tal-APPI (rigward il-provvista lil parti terza, inklużi trasferimenti internazzjonali).

(88)

Meta t-talba tkun imsejsa fuq raġuni valida, il-PIHBO mingħajr dewmien għandu jwaqqaf l-użu tad-data, jew il-provvista lil parti terza, sa fejn ikun hemm bżonn biex jirrimedja l-ksur jew, jekk każ ikun kopert minn eċċezzjoni (b’mod partikolari jekk il-waqfien tal-użu jkun jikkawża spejjeż partikolarment għoljin) (55), jimplimenta l-miżuri alternattivi neċessarji biex jipproteġi d-drittijiet u l-interessi tal-individwu kkonċernat.

(89)

B’differenza mid-dritt tal-UE, l-APPI u r-regoli substatutorji rilevanti ma fihomx dispożizzjonijiet legali li jindirizzaw b’mod speċifiku l-possibbiltà ta’ kontestazzjoni tal-proċessar għal skopijiet ta’ kummerċjalizzazzjoni diretta. Madankollu, skont din id-Deċiżjoni, proċessar bħal dan iseħħ fil-kuntest ta’ trasferiment ta’ data personali li kienet inġabret qabel fl-Unjoni Ewropea. Skont l-Artikolu 21(2) tar-Regolament (UE) 2016/679, is-suġġett tad-data dejjem għandu jkollu l-possibbiltà li jopponi trasferiment tad-data għall-fini ta’ proċessar għal kummerċjalizzazzjoni diretta. Barra minn hekk, kif spjegat fil-premessa 43, skont ir-Regola Suplimentari (3), PIHBO hu meħtieġ jipproċessa d-data riċevuta skont id-Deċiżjoni għall-istess skop li għalih id-data tkun ġiet trasferita mill-Unjoni Ewropea, sakemm is-suġġett tad-data ma jagħtix kunsens għat-tibdil fl-iskop tal-użu. Għaldaqstant, jekk it-trasferiment ikun sar għal kwalunkwe skop ieħor għajr kummerċjalizzazzjoni diretta, PIHBO fil-Ġappun ikun projbit milli jipproċessa d-data għall-fini ta’ kummerċjalizzazzjoni diretta mingħajr il-kunsens tas-suġġett tad-data tal-UE.

(90)

Fil-każijiet kollha msemmija fl-Artikoli 28 u 29 tal-APPI, il-PIHBO hu meħtieġ jinnotifika lill-individwu dwar l-eżitu tat-talba tiegħu mingħajr dewmien u, barra minn hekk, irid jispjega kwalunkwe rifjut (parzjali) ibbażat fuq l-eċċezzjonijiet statutorji pprovduti fl-Artikoli minn 27 sa 30 (Artikolu 31 tal-APPI).

(91)

Rigward il-kundizzjonijiet biex issir talba, l-Artikolu 32 tal-APPI (flimkien mal-Ordni tal-Kabinett) jippermetti lill-PIHBO jiddetermina proċeduri raġonevoli, inkluż f’termini tal-informazzjoni meħtieġa biex tiġi identifikata d-data personali miżmuma. Madankollu, skont il-paragrafu 4 ta’ dan l-Artikolu, il-PIHBOs ma għandhomx jimponu “piż eċċessiv fuq prinċipal”. F’ċerti każijiet, il-PIHBOs jistgħu wkoll jimponu tariffi dment li l-ammont tagħhom jibqa’ “fi ħdan l-ambitu meqjus raġonevoli b’rabta mal-ispejjeż propji” (Artikolu 33 tal-APPI).

(92)

Finalment, l-individwu jista’ joġġezzjona għall-provvista tal-informazzjoni personali tiegħu lil parti terza skont l-Artikolu 23(2) tal-APPI, jew jirrifjuta l-kunsens skont l-Artikolu 23(1) (u b’hekk jipprevjeni l-iżvelar f’każ li ma jkun hemm ebda bażi ġuridika oħra disponibbli). Bl-istess mod, l-individwu jista’ jwaqqaf il-proċessar tad-data għal skop differenti billi jirrifjuta milli jipprovdi kunsens skont l-Artikolu 16(1) tal-APPI.

(93)

B’differenza mid-dritt tal-UE, l-APPI u r-regoli substatutorji rilevanti ma fihomx dispożizzjonijiet ġenerali li jindirizzaw il-kwistjoni ta’ deċiżjonijiet li jaffettwaw lis-suġġett tad-data u huma bbażati biss fuq il-proċessar awtomatizzat ta’ data personali. Madankollu, il-kwistjoni hija indirizzata f’ċerti regoli settorjali applikabbli fil-Ġappun li huma partikolarment rilevanti għal dan it-tip ta’ proċessar. Dan jinkludi setturi li fihom il-kumpaniji jkollhom probabbiltà kbira li jirrikorru għall-proċessar awtomatizzat ta’ data personali biex jieħdu deċiżjonijiet li jaffettwaw lil individwi (eż. is-settur finanzjarju). Pereżempju, il-“Linji Gwida Komprensivi għas-Superviżjoni fuq Banek Kbar”, kif riveduti f’Ġunju 2017, jeħtieġu li l-individwu kkonċernat jiġi pprovdut bi spjegazzjonijiet speċifiċi dwar ir-raġunijiet għar-rifjut ta’ talba ta’ konklużjoni ta’ ftehim ta’ self. B’hekk, dawk ir-regoli joffru protezzjonijiet fin-numru aktarx pjuttost limitat ta’ każijiet li fihom jittieħdu deċiżjonijiet awtomatizzati mill-operatur ta’ negozju Ġappuniż “importatur” stess (minflok mill-kontrollur tad-data“esportatur” tal-UE).

(94)

Fi kwalunkwe każ, rigward data personali li nġabret fl-Unjoni Ewropea, kull deċiżjoni bbażata fuq proċessar awtomatizzat tipikament tittieħed mill-kontrollur tad-data fl-Unjoni (li għandu relazzjoni diretta mas-suġġett tad-data kkonċernat) u hija għalhekk soġġetta għar-Regolament (UE) 2016/679 (56). Dan jinkludi xenarji ta’ trasferiment li fihom il-proċessar jitwettaq minn operatur ta’ negozju barrani (eż. Ġappuniż) li jaġixxi bħala aġent (proċessur) f’isem il-kontrollur tal-UE (jew subproċessur li jaġixxi f’isem il-proċessur tal-UE, li jkun irċieva d-data mingħand kontrollur tal-UE li jkun ġabarha) li abbażi ta’ dan imbagħad jieħu d-deċiżjoni. Għaldaqstant, hu improbabbli li n-nuqqas ta’ regoli speċifiċi dwar it-teħid ta’ deċiżjonijiet awtomatizzati fl-APPI jaffettwaw il-livell ta’ protezzjoni tad-data personali trasferita skont din id-deċiżjoni.

(95)

Biex jiġi żgurat li jiġi garantit livell adegwat ta’ protezzjoni tad-data fil-prattika wkoll, għandu jkun hemm fis-seħħ awtorità superviżorja indipendenti inkarigata bis-setgħat li tissorvelja u teżegwixxi l-konformità mar-regoli dwar il-protezzjoni tad-data. Din l-awtorità għandha taġixxi b’indipendenza u b’imparzjalità assoluta meta twettaq dmirijietha u teżerċita s-setgħat tagħha.

(96)

Fil-Ġappun, l-awtorità inkarigata mill-monitoraġġ u mill-infurzar tal-APPI hi l-PPC. Hi msawra minn President u minn tmien Kummissarji maħtura mill-Prim Ministru bil-kunsens taż-żewġ Kmamar tad-Diet. Il-mandat tal-President u ta’ kull wieħed mill-Kummissarju hu twil ħames snin, bil-possibbiltà ta’ ħatra mill-ġdid (Artikolu 64 tal-APPI). Il-Kummissarji jistgħu jitkeċċew biss għal kawża ġusta f’sett limitat ta’ ċirkustanzi eċċezzjonali (57) u ma jistgħux ikunu involuti b’mod attiv f’attivitajiet politiċi. Barra minn dan, skont l-APPI, Kummissarji full-time għandhom jastjenu minn kull attivita b’rimunerazzjoni oħra, jew minn kull attività ta’ negozju. Il-Kummissarji kollha huma wkoll suġġetti għal regoli interni li ma jħalluhomx jipparteċipaw f’deliberazzjonijiet fil-każ ta’ xi kunflitt ta’ interess li jista’ jinqala’. Il-PPC hi assistita minn Segretarjat, immexxi minn Segretarju Ġenerali, li twaqqaf bl-għan li jwettaq il-kompiti assenjati lill-PPC (Artikolu 70 tal-APPI). Kemm il-Kummissarji kif ukoll l-uffiċjali kollha fis-Segretarjat huma marbuta b’regoli stretti ta’ segretezza (Artikoli 72, 82 tal-APPI).

(97)

Is-setgħat tal-PPC, li hi teżerċita b’indipendenza sħiħa (58), huma primarjament previsti fl-Artikoli 40, 41 u 42 tal-APPI. Skont l-Artikolu 40, il-PPC tista’ titlob lill-PIHBOs jirrapportaw jew jissottomettu dokumenti dwar l-operazzjonijiet ta’ proċessar u tista’ twettaq spezzjonijiet ukoll, kemm fuq il-post kif ukoll tal-kotba jew ta’ dokumenti oħra. Sa fejn ikun hemm bżonn biex tinfurza l-APPI, il-PPC tista’ tipprovdi wkoll gwida jew pariri lill-PIHBOs rigward l-immaniġġjar ta’ informazzjoni personali. Il-PPC diġà għamlet użu minn din is-setgħa skont l-Artikolu 41 PPI billi indirizzat il-gwida għal Facebook, wara r-revelazzjonijiet Facebook/Cambridge Analytica.

(98)

L-aktar ħaġa importanti hi li l-PPC għandha s-setgħa li – filwaqt li taġixxi fuq ilment jew fuq inizjattiva tagħha stess – toħroġ rakkomandazzjonijiet u ordnijiet biex tinforza l-APPI u regoli vinkolanti oħra (inklużi r-Regoli Supplimentari) fil-każijiet individwali. Dawn is-setgħat huma stabbiliti fl-Artikolu 42 tal-APPI. Filwaqt li l-paragrafi 1 u 2 tiegħu jipprovdu għal mekkaniżmu b’żewġ stadji li fihom il-PPC tista’ toħroġ ordni (biss) wara rakkomandazzjoni minn qabel, il-paragrafu 3 jippermetti għall-adozzjoni diretta ta’ ordni f’każijiet ta’ urġenza.

(99)

Għad li mhux id-dispożizzjonijiet kollha tal-Kapitolu IV, it-Taqsima 1 tal-APPI huma elenkati fl-Artikolu 42(1) – li jiddetermina wkoll il-kamp ta’ applikazzjoni tal-Artikolu 42(2) – dan jista’ jkun spjegat mill-fatt li wħud minn dawn id-dispożizzjonijiet ma jikkonċernawx obbligi tal-PIHBO (59) u li l-protezzjonijiet essenzjali kollha diġà jingħataw minn dispożizzjonijiet oħra li huma inklużi f’dik il-lista. Pereżempju, għad li l-Artikolu 15 (li jeħtieġ li l-PIHBO jistabbilixxi l-iskop ta’ użu u jipproċessa l-informazzjoni personali rilevanti b’mod esklużiv fi ħdan l-ambitu tiegħu) ma jissemmiex, nuqqas ta’ osservazzjoni ta’ dan ir-rekwiżit jista’ jkun bażi għal rakkomandazzjoni msejsa fuq ksur tal-Artikolu 16(1) (projbizzjoni tal-PIHBO milli jipproċessa informazzjoni personali lil hinn minn dik li tkun neċessarja biex jintlaħaq l-iskop ta’ użu, sakemm ma jiksibx il-kunsens tas-suġġett tad-data) (60). Dispożizzjoni oħra mhux elenkata fl-Artikolu 42(1) hi l-Artikolu 19 tal-APPI dwar il-preċiżjoni u ż-żamma tad-data. In-nuqqas ta’ konformità ma’ din id-dispożizzjoni jista’ jiġi infurzat jew bħala ksur tal-Artikolu 16(1) jew fuq il-bażi ta’ ksur tal-Artikolu 29(2), jekk l-individwu kkonċernat jitlob il-korrezzjoni jew it-tħassir ta’ data żbaljata jew eċċessiva u l-PIHBO jirrifjuta milli jissodisfa t-talba. Rigward id-drittijiet tas-suġġett tad-data skont l-Artikoli 28(1), 29(1) u 30(1), is-sorveljanza mill-PPC hi żgurata billi tingħata setgħat ta’ infurzar fir-rigward tal-obbligi korrispondenti tal-PIHBO stabbiliti f’dawk l-Artikoli.

(100)

Skont l-Artikolu 42(1) tal-APPI, il-PPC, jekk tirrikonoxxi li jkun hemm “bżonn ta’ protezzjoni tad-drittijiet u tal-interessi ta’ individwu f’każijiet li fihom [PIHBO] jkun kiser” dispożizzjonijiet speċifiċi tal-APPI, tista’ toħroġ rakkomandazzjoni biex “tissospendi l-att ta’ ksur jew tieħu azzjoni neċessarja oħra biex tirrettifika l-ksur”. Rakkomandazzjoni bħal din ma tkunx vinkolanti, iżda twitti t-triq għal ordni vinkolanti skont l-Artikolu 42(2) tal-APPI. Fuq il-bażi ta’ din id-dispożizzjoni, jekk ir-rakkomandazzjoni ma tiġix segwita “mingħajr raġuni leġittima” u l-PPC “tagħraf li jkun imminenti t-twettiq ta’ ksur serju tad-drittijiet u tal-interessi ta’ individwu”, din tista’ tordna lill-PIHBO jieħu azzjoni f’konformità mar-rakkomandazzjoni.

(101)

Ir-Regoli Supplimentari jkomplu jiċċaraw u jsaħħu s-setgħat ta’ infurzar tal-PPC. B’mod aktar speċifiku, f’każijiet li jinvolvu data importata mill-Unjoni Ewropea, il-PPC dejjem se tqis nuqqas min-naħa ta’ PIHBO milli jieħu azzjoni skont rakkomandazzjoni maħruġa mill-APPI skont l-Artikolu 42(1), mingħajr raġuni leġittima, bħala ksur serju ta’ natura imminenti tad-drittijiet u tal-interessi ta’ individwu skont it-tifsira tal-Artikolu 42(2), u għalhekk bħala ksur li jiġġustifika l-ħruġ ta’ ordni vinkolanti. Barra minn hekk, bħala “raġuni leġittima” għan-nuqqas ta’ konformità ma’ rakkomandazzjoni, il-PPC taċċetta biss “avveniment ta’ natura straordinarja [li tipprevjeni l-konformità] barra mill-kontroll tal-[PIHBO] li ma jistax ikun previst b’mod raġonevoli (pereżempju diżastri naturali)” jew każijiet li fihom il-ħtieġa li tittieħed azzjoni rigward rakkomandazzjoni “ma tibqax għaliex il-[PIHBO] ikun ħa azzjoni alternattiva li tirrimedja l-ksur bis-sħiħ”.

(102)

In-nuqqas ta’ konformità ma’ ordni tal-PPC jitqies li hu reat kriminali skont l-Artikolu 84 tal-APPI u PIHBO misjub ħati jista’ jiġi sentenzjat għal priġunerija b’xogħol sa sitt xhur jew b’multa sa 300 000 yen. Barra minn hekk, skont l-Artikolu 85(i) tal-APPI, nuqqas ta’ kooperazzjoni mal-PPC jew xkiel għall-investigazzjoni tagħha hu punibbli b’multa li tasal sa 300 000 yen. Dawn is-sanzjonijiet kriminali japplikaw flimkien ma' dawk li jistgħu jiġu imposti għal ksur sostanzjali tal-APPI (ara l-premessa 108).

(103)

Biex jiżgura protezzjoni adegwata u b’mod partikolari l-infurzar tad-drittijiet individwali, is-suġġett tad-data għandu jiġi pprovdut b’rimedju amministrattiv u ġudizzjarju effettiv, inkluż kumpens għad-danni.

(104)

Qabel jew minflok ma jfittex rimedju amministrattiv jew ġudizzjarju, individwu jista’ jiddeċiedi li jippreżenta lment dwar il-proċessar tad-data personali tiegħu lill-kontrollur innifsu. Fuq il-bażi tal-Artikolu 35 tal-APPI, il-PIHBOs għandhom jieħdu impenn li jindirizzaw it-tali lmenti “kif xieraq u minnufih” u jistabbilixxu sistemi interni għall-immaniġġjar tal-ilmenti biex jilħqu dan l-objettiv. Barra minn dan, skont l-Artikolu 61(ii) tal-APPI, il-PPC huwa responsabbli għall-“medjazzjoni neċessarja meta jidħol ilment u għall-kooperazzjoni offruta lil xi operatur ta’ negozju li jiġġestixxi l-ilment”, li fiż-żewġ każijiet tinkludi lmenti ppreżentati minn barranin. F’dan ir-rigward, il-leġiżlatur Ġappuniż inkariga wkoll lill-gvern ċentrali bil-kompitu li jieħu “azzjoni neċessarja” biex jippermetti u jiffaċilita r-riżoluzzjoni tal-ilmenti mill-PIHBOs (Artikolu 9), filwaqt li l-gvernijiet lokali għandhom jieħdu impenn biex jiżguraw medjazzjoni fit-tali każijiet (Artikolu 13). F’dak ir-rigward, l-individwi jistgħu jippreżentaw ilment ma’ wieħed minn aktar minn 1,700 ċentru tal-konsumatur stabbiliti minn gvernijiet lokali fuq il-bażi tal-Att dwar is-Sikurezza tal-Konsumatur (61), minbarra l-possibbiltà li jippreżentaw ilment maċ-Ċentru Nazzjonali tal-Ġappun għall-Affarijiet tal-Konsumatur. Ilmenti bħal dawn jistgħu jinfetħu wkoll fir-rigward ta’ ksur tal-APPI. Skont l-Artikolu 19 tal-Att Bażiku dwar il-Konsumatur (62), il-gvernijiet lokali għandhom jieħdu impenn li jwettqu medjazzjoni fir-rigward tal-ilmenti u jipprovdu l-għarfien espert neċessarju lill-partijiet. Dawk il-mekkaniżmi għas-soluzzjoni tat-tilwim jidhru kemxejn effettivi, b’rata ta’ soluzzjoni ta’ 91,2 % rigward aktar minn 75 000 każ ta’ lment fl-2015.

(105)

Il-ksur tad-dispożizzjonijiet tal-APPI mill-PIHBO jista’ jwassal għal azzjonijiet ċivili kif ukoll proċeduri kriminali u sanzjonijiet. L-ewwel nett, jekk individwu jqis li nkisrulu drittijietu skont l-Artikoli 28, 29 u 30 tal-APPI, dan jista’ jfittex rimedju b’mandat ta’ inibizzjoni billi jitlob lill-qorti tordna lil PIHBO jissodisfa t-talba tiegħu skont waħda minn dawn id-dispożizzjonijiet, jiġifieri li jiżvela d-data personali miżmuma (Artikolu 28), jirrettifika d-data personali miżmuma li tkun żbaljata (Artikolu 29) jew li jwaqqaf il-proċessar illegali jew il-provvista lil parti terza (Artikolu 30). Azzjoni bħal din tista’ tinfetaħ mingħajr il-bżonn li wieħed jibbaża fuq l-Artikolu 709 tal-Kodiċi Ċivili (63) jew inkella l-liġi dwar id-delitti (64). B’mod partikolari, dan ifisser li l-individwu ma jkollux bżonn jagħti prova ta’ kwalunkwe dannu.

(106)

It-tieni, fil-każ li fih ksur allegat ma jikkonċernax drittijiet individwali skont l-Artikoli 28, 29 u 30 iżda l-prinċipji jew l-obbligi ġenerali dwar il-protezzjoni tad-data tal-PIHBO, l-individwu kkonċernat jista’ jiftaħ kawża ċivili kontra l-operatur ta’ negozju fuq il-bażi tad-dispożizzjonijiet dwar id-delitti tal-Kodiċi Ċivili tal-Ġappun, speċjalment l-Artikolu 709. Filwaqt li skont l-Artikolu 709, minbarra tort (intenzjoni jew negliġenza), kawża teħtieġ il-wiri ta’ dannu, skont l-Artikolu 710 tal-Kodiċi Ċivili t-tali dannu jista’ jkun kemm materjali kif ukoll immaterjali. Ma tiġi imposta l-ebda restrizzjoni fuq l-ammont ta’ kumpens.

(107)

Rigward ir-rimedji disponibbli, l-Artikolu 709 tal-Kodiċi Ċivili tal-Ġappun jirreferi għal kumpens monetarju. Madankollu, il-ġurisprudenza Ġappuniża interpretat dan l-artikolu bħala li jagħti wkoll il-possibbiltà li tinkiseb inibizzjoni (65). Għaldaqstant, jekk is-suġġett tad-data jiftaħ kawża skont l-Artikolu 709 tal-Kodiċi Ċivili u jasserixxi li ġarrab dannu għad-drittijiet jew għall-interessi tiegħu minħabba ksur ta’ dispożizzjoni tal-APPI mill-konvenut, dik l-asserzjoni tista’ tinkludi, minbarra kumpens għad-danni, talba għal rimedju b’mandat ta’ inibizzjoni, li jkollu b’mod partikolari l-għan li jwaqqaf kwalunkwe proċessar illegali.

(108)

It-tielet, minbarra r-rimedji (dwar id-delitti) tal-liġi ċivili, suġġett tad-data jista’ jippreżenta lment ma’ prosekutur pubbliku jew uffiċjali tal-pulizija ġudizzjarja fir-rigward tal-ksur tal-APPI li jista’ jwassal għal sanzjonijiet kriminali. Il-Kapitolu VII tal-APPI fih numru ta’ dispożizzjonijiet penali. L-aktar waħda importanti (Artikolu 84) hi relatata man-nuqqas ta’ konformità mill-PIHBO mal-ordnijiet tal-PPC skont l-Artikolu 42(2) u (3). Jekk operatur ta’ negozju jonqos milli jikkonforma ma’ ordni maħruġa mill-PPC, il-President tal-PPC (kif ukoll kwalunkwe uffiċjal tal-gvern) (66) jista’ jgħaddi l-każ lill-prosekutur pubbliku jew uffiċjal tal-pulizija ġudizzjarja u b’dak il-mod iniedi l-ftuħ ta’ proċedura kriminali. Il-piena għall-ksur ta’ ordni tal-PPC hi priġunerija b’xogħol sa sitt xhur jew multa li tasal sa 300,000 yen. Dispożizzjonijiet oħra tal-APPI li jipprovdu għal sanzjonijiet fil-każ ta’ ksur tal-APPI li jaffettwaw id-drittijiet u l-interessi tas-suġġetti tad-data jinkludu l-Artikolu 83 tal-APPI (rigward il-“provvista jew l-użu bil-ħabi” ta’ bażi ta’ data ta’ informazzjoni personali “għall-fini ta’ tiftix ta’ […] profitti illegali”) u l-Artikolu 88(i) tal-APPI (rigward in-nuqqas minn parti terza milli tinforma kif suppost lill-PIHBO meta dan tal-aħħar jirċievi data personali skont l-Artikolu 26(1) tal-APPI, b’mod partikolari dwar id-dettalji tal-kisba proprja minn qabel tat-tali data mill-parti terza). Il-pieni applikabbli għat-tali ksur tal-APPI huma, rispettivament, sa sena priġunerija b’ordni ta’ xogħol jew multa sa 500 000 yen (f’każ tal-Artikolu 83) jew multa amministrattiva sa 100 000 yen (f’każ tal-Artikolu 88(i)). Filwaqt li t-theddida ta’ sanzjoni kriminali x’aktarx li diġà jkollha effett qawwi ta’ deterrent fuq il-ġestjoni tan-negozju li jidderieġi l-operazzjoni ta’ pproċessar tal-PIHBO kif ukoll fuq l-individwi li jkunu qegħdin jipproċessaw id-data, l-Artikolu 87 tal-APPI jiċċara li meta rappreżentant, impjegat jew xi ħaddiem ieħor ta’ xi korp korporattiv ikun wettaq ksur skont l-Artikolu 83 sa 85 tal-APPI, “l-attur għandu jiġi kkastigat u tiġi imposta multa stabbilita fl-Artikoli rispettivi fuq il-korp korporat imsemmi”. F’dan il-każ, is-sanzjonijiet jistgħu jiġu imposti kemm fuq l-impjegat kif ukoll fuq il-kumpanija sal-ammont massimu sħiħ.

(109)

Finalment, l-individwi jistgħu jfittxu wkoll rimedju kontra l-azzjonijiet jew l-inazzjonijiet tal-PPC. F’dan ir-rigward, id-dritt tal-Ġappun jipprovdi diversi toroq għal rimedju amministrattiv u ġudizzjarju.

(110)

Meta individwu ma jkunx sodisfatt b’azzjoni mwettqa mill-PPC, hu/(hi) jista’/(tista’) jippreżenta/tippreżenta appell amministrattiv skont l-Att dwar ir-Rieżami tal-Ilmenti Amministrattivi (67). Għall-kuntrarju, meta individwu jqis li l-PPC missha aġixxiet iżda naqset milli tagħmel dan, individwu jista’ jitlob lill-PPC skont l-Artikolu 36-3 ta’ dak l-Att biex tagħmel disponibbli jew tipprovdi gwida amministrattiva jekk hu jqis li “ma tkunx ingħatat jew ġiet imposta dispożizzjoni jew gwida amministrattiva għall-korrezzjoni tal-ksur”.

(111)

Fir-rigward tar-rimedju ġudizzjarju, skont l-Att dwar il-Litigazzjoni f’Każijiet Amministrattivi, individwu li ma jkunx sodisfatt b’dispożizzjoni amministrattiva magħmula mill-PPC jista’ jippreżenta kawża mandamus (68) filwaqt li jitlob lill-Qorti tordna lill-PPC tieħu azzjoni ulterjuri (69). F’ċerti każijiet, il-qorti tista’ wkoll toħroġ ordni provviżorja ta’ mandamus, biex tipprevjeni dannu irriversibbli (70). Barra minn hekk, skont l-istess Att, individwu jista’ jfittex revoka ta’ deċiżjoni tal-PPC (71).

(112)

Finalment, individwu jista’ jippreżenta wkoll kawża għal kumpens mill-Istat kontra l-PPC skont l-Artikolu 1(1) tal-Att dwar ir-Rimedju Statali f’każ li hu jkun ġarrab danni minħabba l-fatt li ordna maħruġa mill-PPC għal operatur ta’ negozju kienet illegali jew il-PPC ma eżerċitatx l-awtorità tagħha.

(113)

Il-Kummissjoni vvalutat ukoll il-limitazzjonijiet u s-salvagwardji, inklużi s-sorveljanza u l-mekkaniżmi ta’ rimedju individwali disponibbli fid-dritt tal-Ġappun rigward il-ġbir u l-użu sussegwenti ta’ data personali trasferita lil operaturi ta’ negozji fil-Ġappun minn awtoritajiet pubbliċi għal interess pubbliku, b’mod partikolari għall-finijiet ta’ infurzar tal-liġi kriminali u tas-sigurtà nazzjonali (“aċċess mill-gvern”). F’dan ir-rigward, il-gvern Ġappuniż ipprovda lill-Kummissjoni b’rappreżentazzjonijiet, b’aċċertamenti u b’impenji uffiċjali ffirmati fl-ogħla livell ministerjali u tal-aġenziji li jinsabu fl-Anness II għal din id-Deċiżjoni.

(114)

Bħala eżerċizzju tal-awtorità pubblika, aċċess mill-gvern fil-Ġappun irid isir bir-rispett sħiħ tal-liġi (il-prinċipju ta’ legalità). F’dan ir-rigward, il-Kostituzzjoni tal-Ġappun fiha dispożizzjonijiet li jillimitaw u joħolqu qafas għall-ġbir ta’ data personali mill-awtoritajiet pubbliċi. Kif diġà ntqal rigward il-proċessar minn operaturi ta’ negozji, filwaqt li bbażat lilha nfisha fuq l-Artikolu 13 tal-Kostituzzjoni li fost l-oħrajn jipproteġi d-dritt għal-libertà, il-Qorti rrikonoxxiet id-dritt għall-privatezza u għall-protezzjoni tad-data (72). Aspett importanti ta’ dan id-dritt hu l-libertà li l-informazzjoni personali ta’ individwu ma tiġix żvelata lil parti terza mingħajr permess (73). Dan jimplika dritt għall-protezzjoni effettiva ta’ data personali kontra abbuż u (b’mod partikolari) aċċess illegali. Protezzjoni addizzjonali hi żgurata mill-Artikolu 35 tal-Kostituzzjoni dwar id-dritt tal-persuni kollha li jkunu siguri ġewwa djarhom, fid-dokumenti u fl-effetti personali tagħhom, u dan jeħtieġ li l-awtoritajiet pubbliċi jiksbu mandat mill-qorti maħruġ għal “kawża ġusta” (74) f’kull każ ta’ “tiftixiet u qabdiet”. Fis-sentenza tagħha tal-15 ta’ Marzu 2017 (kawża GPS), il-Qorti Suprema ċċarat li dan ir-rekwiżit ta’ mandat japplika kull meta l-gvern jinvadi (“jidħol”) fl-isfera privata b’mod li jrażżan ir-rieda tal-individwu u b’hekk permezz ta’ “investigazzjoni obbligatorja”. Imħallef jista’ joħroġ mandat bħal dan biss fuq il-bażi ta’ suspett konkret ta’ reati, jiġifieri meta jiġi pprovdut b’evidenza dokumentarja li fuq il-bażi tagħha l-persuna kkonċernata mill-investigazzjoni tkun tista’ titqies li wettqet reat kriminali (75). Konsegwentement, l-awtoritajiet Ġappuniżi m’għandhom ebda awtorità legali biex jiġbru informazzjoni personali b’mezzi obbligatorji f’sitwazzonijiet li fihom ma jkun għadu seħħ ebda ksur tal-liġi (76), pereżempju biex jipprevjenu reat jew theddida oħra għas-sigurtà (bħal fil-każ ta’ investigazzjonijiet fuq il-bażi tas-sigurtà nazzjonali).

(115)

Bir-riżerva tal-prinċipju tal-liġi, kwalunkwe ġbir ta’ data bħala parti minn investigazzjoni koerċittiva jrid ikun awtorizzat b’mod speċifiku mil-liġi (kif rifless, pereżempju, fl-Artikolu 197(1) tal-Kodiċi tal-Proċedura Kriminali (“CCP”) rigward il-ġbir obbligatorju ta’ informazzjoni għall-finijiet ta’ investigazzjoni kriminali). Dan ir-rekwiżit japplika wkoll għall-aċċess għal informazzjoni elettronika.

(116)

Hu importanti li jingħad li l-Artikolu 21(2) tal-Kostituzzjoni jiggarantixxi s-segretezza tal-mezzi ta’ komunikazzjoni kollha, b’limitazzjonijiet biss permessi mil-leġiżlazzjoni fuq il-bażi ta’ interess pubbliku. L-Artikolu 4 tal-Att dwar in-Negozju tat-Telekomunikazzjoni, li skontu s-segretezza tal-komunikazzjonijiet ġestiti minn operatur tat-telekomunikazzjoni m’għandhiex tinkiser, jimplimenta dan ir-rekwiżit ta’ kunfidenzjalità fil-livell tal-liġi statutorja. Dan ġie interpretat li jipprojbixxi l-iżvelar ta’ informazzjoni tal-komunikazzjonijiet, sakemm ma jingħatax il-kunsens tal-utenti jew jekk dan ikun ibbażat fuq waħda mill-eżenzjonijiet espliċiti mir-responsabbiltà kriminali skont il-Kodiċi Penali (77).

(117)

Il-Kostituzzjoni tiggarantixxi wkoll id-dritt ta’ aċċess għall-qrati (Artikolu 32) u d-dritt ta’ teħid ta’ passi legali kontra l-Istat għal rimedju fil-każ li fih individwu jkun ġarrab dannu permezz tal-att illegali ta’ uffiċjal pubbliku (Artikolu 17).

(118)

Rigward b’mod speċifiku d-dritt għall-protezzjoni tad-data, il-Kapitolu III, it-Taqsimiet 1, 2 u 3 tal-APPI jistabbilixxi prinċipji ġenerali li jkopru s-setturi kollha, inkluż is-settur pubbliku. B’mod partikolari, l-Artikolu 3 tal-APPI jipprevedi li l-informazzjoni personali kollha trid tkun ġestita skont il-prinċipju tar-rispett għall-personalità tal-individwi. Ladarba l-informazzjoni personali, inkluża dik bħala parti minn rekords elettroniċi, tkun inġabret (“inkisbet”) mill-awtoritajiet pubbliċi (78), l-immaniġġjar tagħha jkun regolat mill-Att dwar il-Protezzjoni ta’ Informazzjoni Personali miżmuma minn Organi Amministrattivi (“APPIHAO”) (79). Fil-prinċipju (80), dan jinkludi wkoll il-proċessar ta’ informazzjoni personali għall-finijiet ta’ infurzar tad-dritt kriminali jew tas-sigurtà nazzjonali. Fost l-oħrajn, l-APPIHAO jipprovdi li l-awtoritajiet pubbliċi: (i) jistgħu jżommu informazzjoni personali biss sa fejn dan ikun neċessarju għat-twettiq ta’ dmirijiethom; (ii) m’għandhomx jużaw it-tali informazzjoni għal skop “inġust” jew jiżvelawha lil persuna terza mingħajr ġustifikazzjoni; (iii) għandhom jispeċifikaw l-iskop u ma jbiddlux dak l-iskop lil hinn minn dak li jista’ jitqies raġonevolment rilevanti għall-fini oriġinali (limitazzjoni tal-iskop); (iv) fil-prinċipju m’għandhomx jużaw jew jipprovdu lil persuna terza bl-informazzjoni personali miżmuma għal skopijiet oħra u, jekk iqisu li dan ikun neċessarju, għandhom jimponu restrizzjonijiet fuq l-iskop jew fuq il-metodu ta’ użu minn partijiet terzi; (v) għandhom jieħdu impenn li jiżguraw il-korrettezza tal-informazzjoni (kwalità tad-data); (vi) għandhom jieħdu l-miżuri neċessarji għall-immaniġġjar xieraq tal-informazzjoni u biex jipprevjenu kxif, telf jew ħsara (sigurtà tad-data); u (vii) għandhom jieħdu impenn li jipproċessaw kif xieraq u minnufih kull ilment rigward il-proċessar tal-informazzjoni (81).

(119)

Id-dritt tal-Ġappun fih numru ta’ limitazzjonijiet dwar l-aċċess u l-użu ta’ data personali għall-finijiet ta’ infurzar tad-dritt kriminali kif ukoll mekkaniżmu ta’ sorveljanza u ta’ rimedju li jipprovdu salvagwardji suffiċjenti biex dik id-data tkun protetta b’mod effettiv kontra interferenza illegali u r-riskju ta’ abbuż.

(120)

Fil-qafas legali tal-Ġappun, il-ġbir ta’ informazzjoni elettronika għall-finijiet ta’ infurzar tad-dritt krimnali hu permissibbli fuq il-bażi ta’ mandat (ġbir obbligatorju) jew fuq talba għal żvelar volontarju.

(121)

Kif indikat fil-premessa 115, kwalunkwe ġbir ta’ data bħala parti minn investigazzjoni koerċittiva jrid ikun awtorizzat b’mod speċifiku mil-liġi u jista’ jsir biss fuq il-bażi ta’ mandat tal-qorti “maħruġ għal kawża ġusta” (Artikolu 35 tal-Kostituzzjoni). Rigward l-investigazzjoni ta’ reati kriminali, dan ir-rekwiżit hu rifless fid-dispożizzjonijiet tal-Kodiċi tal-Proċedura Kriminali (“CCP”). Skont l-Artikolu 197(1) tas-CCP, il-miżuri obbligatorji “m’għandhomx jiġu applikati sakemm ma jkunux ġew stabbiliti dispożizzjonijiet speċjali f’dan il-Kodiċi”. Fir-rigward tal-ġbir ta’ informazzjoni elettronika, l-uniċi bażijiet ġuridiċi rilevanti (82) f’dan ir-rigward huma l-Artikolu 218 tas-CCP (tiftix u qbid) u l-Artikolu 222-2 tas-CCP, li skont dan il-miżuri obbligatorji għall-interċettazzjoni ta’ komunikazzjonijiet elettroniċi mingħajr il-kunsens ta’ xi waħda mill-partijiet għandha ssir fuq il-bażi ta’ atti oħra, jiġifieri l-Att dwar l-Interċettazzjonijiet Telefoniċi għal Investigazzjoni Kriminali (“l-Att dwar l-Interċettazzjonijiet Telefoniċi”). Fiż-żewġ każijiet japplika r-rekwiżit tal-mandat.

(122)

B’mod aktar speċifiku, skont l-Artikolu 218(1) tas-CCP, prosekutur pubbliku, uffiċjal assistent ta’ prosekutur pubbliku jew uffiċjal tal-pulizija ġudizzjarja jista’, jekk ikun hemm bżonn li jsir hekk għall-investigazzjoni ta’ reat, iwettaq tiftix jew qbid (inkluż jordna rekords) wara l-ħruġ ta’ mandat minn qabel minn imħallef (83). Fost l-oħrajn, mandat bħal dan għandu jkun fih isem il-persuna suspettata jew akkużata, l-akkuża (84), ir-rekords elettromanjetiċi li jridu jinqabdu u l-“post jew oġġetti” li jridu jiġi spezzjonati (Artikolu 219(1) tas-CCP).

(123)

Fir-rigward tal-interċettazzjoni tal-komunikazzjonijiet, l-Artikolu 3 tal-Att dwar l-Interċettazzjonijiet Telefoniċi jawtorizza t-tali miżuri biss fil-kuntest ta’ rekwiżiti stretti. B’mod partikolari, l-awtoritajiet pubbliċi jridu jiksbu mandat minn qabel mill-qorti li jista’ jinħareġ biss għall-investigazzjoni ta’ reati serji speċifiċi (elenkati fl-Anness għall-Att) (85) u meta jkun “estremament diffiċli li jiġi identifikat il-kriminal jew li jiġu ċċarati s-sitwazzjonijiet/id-dettalji tat-twettiq b’xi mod ieħor” (86). Skont l-Artikolu 5 tal-Att dwar l-Interċettazzjonijiet Telefoniċi, il-warrant jinħareġ għal perjodu limitat ta’ żmien u kundizzjonijiet addizzjonali jistgħu jiġu imposti mill-imħallef. Barra minn hekk, l-Att dwar l-Interċettazzjonijiet Telefoniċi jipprovdi għadd ta’ garanziji ulterjuri, bħal pereżempju l-attendenza meħtieġa ta’ xhieda (l-Artikoli 12, 20), il-projbizzjoni li jiġu interċettatti l-komunikazzjonijiet ta’ ċerti gruppi privileġġjati (eż. tobba, avukati) (l-Artikolu 15), l-obbligu li jiġu terminati l-interċettazzjonijiet telefoniċi jekk ma jkunx iġġustifikat, anki fi żmien il-perjodu ta’ validità tal-warrant (l-Artikolu 18), jew ir-rekwiżit ġenerali li jiġi notifikat l-individwu kkonċernat u jiġi permess aċċess għar-rekords fi żmien tletin jum wara li jkunu ġew terminati l-interċettazzjonijiet telefoniċi (l-Artikoli 23, 24).

(124)

Għall-miżuri obbligatorji kollha bbażati fuq warrant, jista’ jsir biss eżami bħal dan “skont kif ikun neċessarju biex jintlaħaq l-objettiv tiegħu”, jiġifieri meta l-objettivi mfittxija bl-investigazzjoni ma jkunux jistgħu jintlaħqu b’mod ieħor (l-Artikolu 197(1) CCP). Għad li l-kriterji għad-determinazzjoni tan-neċessità mhumiex speċifikati ulterjorment fil-liġi statutorja, il-Qorti Suprema tal-Ġappun iddikjarat li l-imħallef li joħroġ mandat għandu jagħmel valutazzjoni ġenerali filwaqt li b’mod partikolari jqis (i) il-gravità tar-reat u kif twettaq; (ii) il-valur u l-importanza tal-materjali il jridu jinqabdu bħala evidenza; (iii) il-probabbiltà (ir-riskju) li l-evidenza tista’ tinħeba jew tinqered; u (iv) kemm il-qbid jista’ jikkawża ħsara lill-individwu kkonċernat (87).

(125)

Fi ħdan il-limiti tal-kompetenza tagħhom, l-awtoritajiet pubbliċi jistgħu jiġbru wkoll informazzjoni elettronika fuq il-bażi ta’ talbiet għal żvelar volontarju. Dan jirreferi għal forma mhux obbligatorja ta’ kooperazzjoni li fiha l-konformità mat-talba ma tkunx tista tiġi infurzata (88), u b’hekk l-awtoritajiet pubbliċi jkunu meħlusa mid-dmir li jiksbu mandat tal-qorti.

(126)

Sa fejn tali talba tkun immirata lejn operatur ta’ negozju u tikkonċerna informazzjoni personali, l-operatur ta’ negozju jrid jikkonforma mar-rekwiżiti tal-APPI. Skont l-Artikolu 23(1) tal-APPI, l-operaturi ta’ negozji jistgħu jiżvelaw informazzjoni personali lil partijiet terzi mingħajr il-kunsens tal-individwu kkonċernat f’ċerti każijiet biss, inkluż meta l-iżvelar ikun “ibbażat fuq il-liġijiet u r-regolamenti” (89). Fil-qasam tal-infurzar tad-dritt kriminali, il-bażi ġuridika għat-tali talbiet hi pprovduta mill-Artikolu 197(2) tas-CCP, li skont dan “organizzazzjonijiet privati jistgħu jintalbu jirrapportaw dwar kwistjonijiet neċessarji relatati mal-investigazzjoni.” Peress li “formola ta’ inkjesta” bħal din hi permessibbli biss bħala parti minn investigazzjoni kriminali, din dejjem tippresupponi suspett konkret ta’ reat li jkun diġà sar (90). Barra minn hekk, peress li t-tali investigazzjonijiet ġeneralment jitwettqu mill-Pulizija tal-Prefatturi, japplikaw il-limitazzjonijiet skont l-Artikolu 2(2) tal-Liġi dwar il-Pulizija (91). Skont dik id-dispożizzjoni, l-attivitajiet tal-pulizija huma “strettament limitati” għall-issodisfar tar-responsabbiltajiet u tad-dmirijiet tagħhom (jiġifieri l-prevenzjoni, it-trażżin u l-investigazzjoni ta’ reati). Barra minn hekk, meta twettaq dmirijietha, il-pulizija għandha taġixxi b’mod imparzjali, mingħajr preġudizzju u ġustament u qatt m’għandha tabbuża mis-setgħat tagħha “b’mod li jxekkel id-drittijiet u l-libertajiet ta’ individwu garantiti mill-Kostituzzjoni tal-Ġappun” (li jinkludu, kif indikat, id-dritt għall-privatezza u għall-protezzjoni tad-data) (92).

(127)

B’mod speċifiku fir-rigward tal-Artikolu 197(2) tas-CCP, l-Aġenzija Nazzjonali tal-Pulizija (“NPA”) – bħala l-awtorità federali inkarigata, fost l-oħrajn, minn kull materja li tikkonċerna l-pulizija kriminali – ħarġet struzzjonijiet lill-Pulizija tal-Prefattura (93) fuq “l-użu xieraq tad-domandi bil-miktub f’materji investigattivi”. Skont din in-Notifika, it-talbiet iridu jsiru bl-użu ta’ formola prestabbilita (“Formola Nru 49” jew l-hekk imsejħa “formola ta’ inkjesta”) (94), rigward rekords “li jikkonċernaw investigazzjoni speċifika” u l-informazzjoni mitluba trid tkun “neċessarja għal [dik] l-investigazzjoni”. F’kull każ, l-investigatur kap għandu “jeżamina bis-sħiħ il-ħtieġa, il-kontenut, eċċ. tad-domanda individwali” u jrid jirċievi approvazzjoni interna mingħand uffiċjal ta’ grad għoli.

(128)

Barra minn hekk, f’żewġ sentenzi mill-1969 u mill-2008 (95), il-Qorti Suprema tal-Ġappun stipulat limitazzjonijiet fir-rigward ta’ miżuri mhux obbligatorji li jxekklu d-dritt għall-privatezza (96). B’mod partikolari, il-qorti qieset li tali miżuri jridu jkunu “raġjonevoli” u jżommu ma “limiti ġeneralment permissibbli”, jiġifieri jridu jkunu neċessarji għall-investigazzjoni ta’ xi suspettat ta’ reat (il-ġbir ta’ evidenza) u mwettqa permezz ta’ “metodi approprjati għall-kisba tal-iskop tal-investigazzjoni.” (97) Is-sentenzi juru li dan jimplika li jrid ikun hemm test tal-proporzjonalità, fil-kunsiderazzjoni taċ-ċirkostanzi kollha tal-każ (eż. il-livell ta’ interferenza mad-dritt għall-privatezza, inkluż l-istennija tal-privatezza, is-serjetà tar-reat kriminali, il-probabbiltà li tinkiseb evidenza utli, l-importanza ta’ dik l-evidenza, mezzi alternattivi possibbli ta’ investigazzjoni, eċċ) (98).

(129)

Apparti dawn il-limitazzjonijiet għall-eżerċizzju tal-awtorità pubblika, l-operaturi tan-negozji nnifishom huma mistennija li jivverifikaw (“jikkonfermaw”) in-neċessità u “r-razzjonalità” tad-dispożizzjoni lil parti terza (99). Dan jinkludi l-kwistjoni ta’ jekk humiex imrażżna mil-liġi milli jikkooperaw. Obbligi legali f’kunflitt bħal dawn jistgħu jsegwu b’mod partikolari minn obbligi ta’ kunfidenzjalità bħall-Artikolu 134 tal-Kodiċi Penali (rigward ir-relazzjoni bejn tabib, avukat, qassis, eċċ. u l-klijent tiegħu). Barra minn hekk, “kwalunkwe persuna involuta fin-negozju tat-telekomunikazzjoni, matul il-mandat tagħha, għandha żżomm is-sigrieti ta’ oħrajn li tkun saret taf bihom fir-rigward ta’ komunikazzjonijiet li jiġu mmaniġġjati mill-operatur tat-telekomunikazzjoni” (Artikolu 4(2) tal-Att dwar in-Negozji tat-Telekomunikazzjoni). Dan l-obbligu hu sostnut mis-sanzjoni stipulata fl-Artikolu 179 tal-Att dwar in-Negozji tat-Telekomunikazzjoni, li skont dan kwalunkwe persuna li tkun kisret is-segretezza tal-komunikazzjonijiet li jkunu mmaniġġjati minn operatur tat-telekomunikazzjoni għandha tkun ħatja ta’ reat kriminali u teħel sa sentejn priġunerija b’ordni ta’ xogħol, jew teħel multa ta’ mhux aktar minn miljun yen (100). Filwaqt li dan ir-rekwiżit mhuwiex assolut u b’mod partikolari jippermetti għal miżuri li jiksru s-segretezza tal-komunikazzjonijiet li jikkostitwixxu “atti ġustifikabbli” skont it-tifsira tal-Artikolu 35 tal-Kodiċi Penali (101), din l-eċċezzjoni ma tkoprix ir-rispons għal talbiet mhux obbligatorji mill-awtoritajiet pubbliċi għall-iżvelar ta’ informazzjoni elettronika skont l-Artikolu 197(2) tas-CCP.

(130)

Mal-ġbir mill-awtoritajiet pubbliċi tal-Ġappun, l-informazzjoni personali taqa’ taħt il-kamp ta’ applikazzjoni tal-APPIHAO. Dak l-Att jirregola l-immaniġġjar (proċessar) tal-“informazzjoni personali miżmuma”, u għal dan jimponi numru ta’ limitazzjonijiet u ta’ salvagwardji (ara l-premessa 118) (102). Barra minn hekk, il-fatt li Organu Amministrattiv jista’ jżomm informazzjoni personali “biss meta ż-żamma tkun neċessarja għat-twettiq tal-kompiti taħt il-ġurisdizzjoni tiegħu previsti mil-liġijiet u mir-regolamenti” (Artikolu 3(1) tal-APPIHAO) jimponi restrizzjonijiet ukoll – tal-anqas b’mod indirett – fuq il-ġbir inizjali.

(131)

Fil-Ġappun, il-ġbir ta’ informazzjoni elettronika fil-qasam tal-infurzar tad-dritt kriminali jaqa’ qabel xejn (103) taħt ir-responsabbiltajiet tal-Pulizija tal-Prefattura (104), li f’dan ir-rigward hi soġġetta għal diversi saffi ta’ sorveljanza.

(132)

L-ewwel nett, fil-każijiet kollha li fihom tinġabar informazzjoni elettronika b’mezzi obbligatorji (tiftix u qbid), il-pulizija trid tikseb mandat tal-qorti minn qabel (ara l-premessa 121). Għaldaqstant, f’dawk il-każijiet il-ġbir se jiġi verifikat ex ante minn imħallef, fuq il-bażi ta’ standard strett ta’ “kawża ġusta”.

(133)

Filwaqt li ma ssir ebda verifika ex ante minn imħallef fil-każ ta’ talbiet għal żvelar volontarju, l-operaturi ta’ negozji li lilhom jiġu indirizzati dawn it-talbiet jistgħu joġġezzjonaw għalihom mingħajr ma jirriskjaw konsegwenzi negattivi (u se jkollhom iqisu l-impatt ta’ kwalunkwe żvelar fuq il-privatezza). Barra minn hekk, skont l-Artikolu 192(1) tas-CCP, l-uffiċjali tal-pulizija dejjem għandhom jikkooperaw u jikkoordinaw l-azzjonijiet tagħhom mal-prosekutur pubbliku (u l-Kummissjoni tas-Sikurezza Pubblika tal-Prefattura) (105). Min-naħa tiegħu, il-prosekutur pubbliku jista’ jagħti l-istruzzjonijiet neċessarji ġenerali li jistabbilixxu standards għal investigazzjoni ġusta u/jew joħorġu ordnijiet speċifiċi fir-rigward ta’ investigazzjoni individwali (Artikolu 193 tas-CCP). Meta t-tali struzzjonijiet u/jew ordnijiet ma jiġux segwiti, il-prosekuzzjoni tista’ tiftaħ kawża għal azzjoni dixxiplinari (Artikolu 194 tas-CCP). B’hekk, il-Pulizija tal-Prefatturi tista’ topera taħt is-superviżjoni tal-prosekutur pubbliku.

(134)

It-tieni, skont l-Artikolu 62 tal-Kostituzzjoni, kull Kamra tal-parlament tal-Ġappun (id-Diet) tista’ tagħmel investigazzjonijiet relatati mal-gvern, inkluż fir-rigward tal-legalità tal-informazzjoni miġbura mill-pulizija. Għal dak l-għan, hi tista’ titlob il-preżenza u t-testimonjanza ta’ xhieda, u/jew il-produzzjoni ta’ rekords. Dawk is-setgħat ta’ inkjesta huma speċifikati ulterjorment fil-Liġi dwar id-Diet, b’mod partikolari l-Kapitolu XII. B’mod partikolari, l-Artikolu 104 tal-Liġi dwar id-Diet jipprovdi li l-Kabinett, l-aġenziji pubbliċi u partijiet oħra tal-gvern “iridu jikkonformaw mat-talbiet ta’ Kamra jew ta’ kwalunkwe wieħed mill-Kumitati tagħha għall-produzzjoni tar-rapporti u tar-rekords neċessarji għall-kunsiderazzjoni ta’ investigazzjoni.” Ir-rifjut tal-konformità jkun permess biss jekk il-gvern jipprovdi raġuni plawżibbli meqjusa aċċettabbli mid-Diet, jew mal-ħruġ ta’ dikjarazzjoni formali li l-produzzjoni tar-rapporti jew tar-rekords tkun “ta’ ħsara gravi għall-interess nazzjonali” (106). Barra minn hekk, il-membri tad-Diet jistgħu jagħmlu mistoqsijiet bil-miktub lill-Kabinett (Artikoli 74, 75 tal-Liġi dwar id-Diet), u fl-imgħoddi t-tali “domandi bil-miktub” indirizzaw ukoll l-immaniġġjar tal-informazzjoni personali mill-amministrazzjoni (107). Ir-rwol tad-Diet fis-superviżjoni tal-eżekuttiv hu sostnut minn obbligi ta’ rapportar, pereżempju skont l-Artikolu 29 tal-Att dwar l-Interċettazzjonijiet Telefoniċi.

(135)

It-tielet, anki fi ħdan il-fergħa eżekuttiva l-Pulizija tal-Prefatturi hi soġġetta għal sorveljanza indipendenti. Dik tinkludi b’mod partikolari l-Kummissjonijiet tas-Sikurezza Pubblika tal-Prefatturi mwaqqfa fil-livell tal-prefatturi biex jiġu żgurati l-amministrazzjoni demokratika u n-newtralità politika tal-pulizija (108). Dawn il-kummissjonijiet huma msawra minn membri maħtura mill-Gvernatur tal-Prefattura bil-kunsens tal-Assemblea tal-Prefattura (minn fost iċ-ċittadini b’ebda pożizzjoni ta’ impjegati taċ-ċivil fil-pulizija fil-ħames snin preċedenti) u jkollhom mandat sigur (b’mod partikolari, is-sensja tista’ tingħata biss għal kawża ġusta) (109). Skont l-informazzjoni li daħlet, huma ma humiex suġġett għal struzzjonijiet, u b’hekk jistgħu jitqiesu bħala għal kollox indipendenti (110). Fir-rigward tal-kompiti u tas-setgħat tal-Kummissjonijiet tas-Sikurezza Pubblika tal-Prefatturi skont l-Artikolu 38(3) meħud flimkien mal-Artikoli 2 u 36(2) tal-Liġi tal-Pulizija, huma responsabbli mill-“protezzjoni tad-drittijiet u l-liberta ta’ kull individwu”. Għal dan il-għan, huma għandhom is-setgħa li “jissorveljaw” (111) l-attivitajiet investigatorji kollha tal-Pulizija tal-Prefettura, inkluż il-ġbir tad-data personali. Notevolment, il-kummissjonijiet “jistgħu jagħtu direzzjoni lill-pulizija tal-prefettura b’mod dettaljat jew f’xi każ individwali speċifiku ta’ spezzjoni ta’ mġiba ħażina tal-persunal tal-pulizija, jekk ikun hemm bżonn.” (112) Meta l-Kap tal-Pulizija tal-Prefattura (113) jirċievi direzzjoni bħal din jew hu stess isir jaf b’każ eventwali ta’ mġiba ħażina (inkluż il-ksur ta’ liġijiet jew nuqqas ieħor fid-dmirijiet), dan minnufih irid jispezzjona l-każ u jirrapporta r-riżultat tal-ispezzjoni lill-Kummissjoni tas-Sikurezza Pubblika tal-Prefattura (Artikolu 56(3) tal-Att dwar il-Pulizija). Meta din tal-aħħar tqis li dan ikun neċessarju, hi tista’ tagħżel ukoll wieħed mill-membri tagħha biex jirrieżamina l-istatus tal-implimentazzjoni. Il-proċess ikompli sakemm il-Kummissjoni tas-Sikurezza Pubblika tal-Prefatturi tkun sodisfatta li l-inċident ġie indirizzat kif xieraq.

(136)

Barra minn hekk, fir-rigward tal-applikazzjoni korretta tal-APPIHAO, il-ministru kompetenti (jew aġent kap (eż. l-Ministru tal-Ġustizzja għall-Pulizija) għandu l-awtorità ta’ infurzar, soġġett għas-superviżjoni mill-Ministeru tal-Affarijiet Interni u tal-Komunikazzjonijiet (MIC). Skont l-Artikolu 49 tal-APPIHAO, l-MIC “jista’ jiġbor rapporti dwar l-istatus tal-infurzar ta’ dan l-Att” mingħand il-kapijiet tal-Organi Amministrattivi (Ministru). Dik il-funzjoni ta’ sorveljanza hi sostnuta wkoll mill-kontribut tal-51 “ċentru ta’ informazzjoni komprensiva” tal-MIC (wieħed f’kull Prefattura madwar il-Ġappun) li ta’ kull sena jimmaniġġjaw eluf ta’ domandi mingħand individwi (114) (li, min-naħa tagħhom, jistgħu jikxfu ksur possibbli tal-liġi). Meta jqis li din tkun neċessarja għall-iżgurar tal-konformità mal-Att, l-MIC jista’ jitlob is-sottomissjoni ta’ spjegazzjonijiet u ta’ materjali, u joħroġ opinjonijiet, rigward l-immaniġġjar ta’ informazzjoni personali mill-Organu Amministrattiv ikkonċernat (Artikoli 50, 51 tal-APPIHAO).

(137)

Minbarra s-sorveljanza ex officio, l-individwi għandhom ukoll diversi possibbiltajiet biex jiksbu rimedju individwali, kemm permezz ta’ awtoritajiet indipendenti (bħall-Kummissjoni tas-Sikurezza Pubblika tal-Prefettura jew il-PPC) kif ukoll permezz tal-qrati tal-Ġappun.

(138)

L-ewwel nett, rigward l-informazzjoni personali miġbura mill-Organi Amministrattivi, dawn tal-aħħar huma obbligati “jieħdu impenn li jipproċessaw kif xieraq u b’rapidità kwalunkwe lment” rigward il-proċessar sussegwenti tagħha (Artikolu 48 tal-APPIHAO). Filwaqt li l-Kapitolu IV tal-APPIHAO dwar id-drittijiet individwali mhuwiex applikabbli fir-rigward ta’ informazzjoni personali reġistrata f’“dokumenti relatati ma’ proċessi u ma’ oġġetti maqbuda” (Artikolu 53-2(2) tas-CCP) – li tkopri informazzjoni personali miġbura bħala parti minn investigazzjonijiet kriminali – l-individwi jistgħu jressqu lment biex jinvokaw il-prinċipji ġenerali ta’ protezzjoni tad-data bħal pereżempju l-obbligu li jżommu biss informazzjoni personali “meta ż-żamma tkun neċessarja għat-twettiq ta’ [funzjonijiet ta’ infurzar tal-liġi]” (Artikolu 3(1) tal-APPIHAO).

(139)

Barra minn hekk, l-Artikolu 79 tal-Liġi dwar il-Pulizija jiggarantixxi li individwi li jkunu mħassba rigward l-“eżekuzzjoni tad-dmirijiet” mill-persunal tal-pulizija jkollhom id-dritt li jippreżentaw ilment mal-Kummissjoni tas-Sikurezza Pubblika tal-Prefattura indipendenti (kompetenti). Il-Kummissjoni timmaniġġja “b’lealtà” t-tali lmenti skont il-liġijiet u l-ordinanzi lokali u għandha tinnotifika l-ilmentatur bil-miktub dwar ir-riżultati. Fuq il-bażi tal-awtorità tagħha li tissorvelja u “tidderieġi” l-Pulizija tal-Prefatturi fir-rigward ta’ “mġiba ħażina tal-persunal” (Artikoli 38(3), 43-2(1) tal-Liġi dwar il-Pulizija), din tista’ titlob lill-Pulizija tal-Prefatturi tinvestiga l-fatti, tieħu miżuri xierqa fuq il-bażi tal-eżitu ta’ din l-investigazzjoni u tirrapporta dwar ir-riżultati. Jekk hi tqis li l-investigazzjoni mwettqa mill-Pulizija ma kinitx adegwata, il-Kummissjoni tista’ tipprovdi wkoll struzzjonijiet dwar l-immaniġġjar tal-ilment.

(140)

Biex tiffaċilita l-immaniġġjar tal-ilmenti, l-NPA ħarġet “Avviż” lill-Pulizija u lill-Kummissjonijiet tas-Sikurezza Pubblika tal-Prefattura dwar l-immaniġġjar kif suppost tal-ilmenti rigward l-eżekuzzjoni tad-dmirijiet mill-uffiċjali tal-pulizija. F’dan id-dokument, l-NPA tistipula standards għall-interpretazzjoni u għall-implimentazzjoni tal-Artikolu 79 tal-Liġi dwar il-Pulizija. Fost l-oħrajn, hi teħtieġ li l-Pulizija tal-Prefatturi tistabbilixxi “sistema għall-immaniġġjar tal-ilmenti” u timmaniġġja u tirrapporta l-ilmenti kollha lill-Kummissjoni tas-Sikurezza Pubblika tal-Prefattura kompetenti “minnufih”. L-Avviż jiddefinixxi lmenti bħala pretensjonijiet li jfittxu korrezzjoni “għal kwalunkwe żvantaġġ speċifiku li jkun ġie kkawżat riżultat ta’ imġiba illegali jew mhux xierqa” (115) jew “nuqqas li tittieħed l-azzjoni meħtieġa, minn uffiċjal tal-pulizija fl-eżekuzzjoni tad-dmirijiet tiegħu/tagħha” (116), kif ukoll kwalunkwe “lmentar/skuntentizza dwar il-mod ta’ eżekuzzjoni tal-obbligu minn uffiċjali tal-pulizija”. L-iskop materjali ta’ lment, għalhekk, huwa definit b’mod wiesa’, filwaqt li jkopri kwalunkwe pretensjoni ta’ ġbir illegali ta’ data, u l-ilmentatur m’għandux għalfejn juri xi ħsara mġarrba b'riżultat tal-azzjonijiet ta’ uffiċjal tal-pulizija. Huwa importanti li jiġi nnutat li n-Notifika tistipula li l-barranin (fost oħrajn) għandhom jingħataw l-assistenza meta jkun qiegħed jitfassal ilment. Wara lment, il-Kummissjonijiet tas-Sikurezza Pubblika tal-Prefattura huma obbligati jiżguraw li l-Pulizija tal-Prefatturi teżamina l-fatti, timplimenta miżuri “skont ir-riżultat tal-eżami” u tirrapporta dwar ir-riżultati. Meta l-Kummissjoni tqis li l-eżami ma jkunx suffiċjenti, din għandha toħroġ struzzjoni dwar l-immaniġġjar tal-ilment, li l-Pulizija tal-Prefatturi hi meħtieġa ssegwi. Fuq il-bażi tar-rapporti riċevuti u tal-miżuri meħuda, il-Kummissjoni tinnotifika lill-individwi filwaqt li tindika, fost l-oħrajn, il-miżuri meħuda għall-indirizzar tal-ilment. L-Avviż tal-NPA jisħaq li l-ilmenti għandhom jiġu ġestiti “b’mod sinċier” u li r-riżultat għandu jiġi notifikat “fi ħdan l-ambitu ta’ żmien […] meqjus xieraq fid-dawl tan-normi soċjali u tas-sens komun.”

(141)

It-tieni, peress li r-rimedju naturalment se jkollu jitfittex barra l-pajjiż f'sistema barranija u f’lingwa barranija, biex jiġi ffaċilitat ir-rimedju għal individwi tal-UE li d-data personali tagħhom tiġi trasferita lil operaturi ta’ negozji fil-Ġappun u mbagħad aċċessata mill-awtoritajiet pubbliċi, il-gvern tal-Ġappun uża s-setgħat tiegħu biex joħloq mekkaniżmu speċifiku, amministrat u sorveljat mill-PPC, għall-immaniġġjar u għas-sejbien ta’ soluzzjoni ta’ lmenti f’dan il-qasam. Dak il-mekkaniżmu jibni fuq l-obbligu ta’ kooperazzjoni impost fuq l-awtoritajiet pubbliċi tal-Ġappun skont l-APPI u r-rwol speċjali tal-PPC fir-rigward tat-trasferimenti internazzjonali ta’ data minn pajjiżi terzi skont l-Artikolu 6 tal-APPI u l-Politika Bażika (kif stabbilita mill-gvern Ġappuniż permezz tal-Ordni tal-Kabinett). Id-dettalji ta’ dan il-mekkaniżmu huma stabbiliti b’rappreżentazzjonijiet uffiċjali, b’aċċertamenti u b’impenji rċevuti mill-gvern Ġappuniż u mehmuża ma’ din id-Deċiżjoni bħala l-Anness II. Il-mekkaniżmu mhuwiex soġġetti għal xi rekwiżit pendenti u huwa miftuħa għal kull individwu, indipendentement minn jekk huwiex suspettat jew akkużat minn reat kriminali.

(142)

Skont il-mekkaniżmu, individwu li jissuspetta li d-data tiegħu trasferita mill-Unjoni Ewropea nġabret jew intużat mill-awtoritajiet pubbliċi fil-Ġappun (inklużi dawk responsabbli għall-infurzar tad-dritt kriminali) bi ksur tar-regoli applikabbli jista’ jissottometti lment lill-PPC (b’mod individwali jew permezz tal-awtorità tiegħu tal-protezzjoni tad-data skont it-tifsira tal-Artikolu 51 tal-GDPR). Il-PPC se tkun obbligata timmaniġġja l-ilment u l-ewwel nett tinforma lill-awtoritajiet pubbliċi kompetenti, inkluż lill-korpi ta’ sorveljanza rilevanti, dwar dan. Dawn l-awtoritajiet huma meħtieġa jikkooperaw mal-PPC “inkluż billi jipprovdu l-informazzjoni neċessarja u l-materjal rilevanti, biex il-PPC tkun tista’ tevalwa jekk il-ġbir jew l-użu sussegwenti ta’ informazzjoni personali seħħx f’konformità mar-regoli applikabbli.” (117) Dan l-obbligu, derivat mill-Artikolu 80 tal-APPI (li jobbliga lill-awtoritajiet pubbliċi Ġappuniżi jikkooperaw mal-PPC), japplika b’mod ġenerali u għalhekk jestendi għar-rieżami ta’ kwalunkwe miżuri investigatorji meħuda minn tali awtoritajiet, li barra minn hekk impenjaw ruħhom għal tali kooperazzjoni permezz ta’ aċċertamenti bil-miktub mill-ministri kompetenti u mill-kapijiet ta’ aġenzija, kif rifless fl-Anness II.

(143)

Jekk l-evalwazzjoni turi li seħħ ksur tar-regoli applikabbli, “il-kooperazzjoni mill-awtoritajiet pubbliċi kkonċernati mal-PPC tinkludi l-obbligu ta’ rimedju tal-ksur”, li fil-każ ta’ ġbir illegali ta’ informazzjoni personali jkopri t-tħassir tat-tali data. Ta’ min jgħid li dan l-obbligu jitwettaq taħt is-superviżjoni tal-PPC li “tikkonferma, qabel ma tikkonkludi l-evalwazzjoni, li l-ksur ikun ġie rimedjat bis-sħiħ.”

(144)

Ladarba tiġi konkluża l-evalwazzjoni, il-PPC għandha tinnotifika lill-individwu, fi ħdan perjodu ta’ żmien raġonevoli, dwar l-eżitu tal-evalwazzjoni, inkluża kwalunkwe azzjoni korrettiva meħuda fejn applikabbli. Fl-istess ħin, il-PPC għandha tinforma lill-individwu dwar il-possibbiltà li jfittex konferma tal-eżitu mingħand l-awtorità pubblika kompetenti u dwar l-identità tal-awtorità li lilha għandha ssir talba għall-konferma. Il-possibbiltà li tiġi riċevuta konferma bħal din, inklużi r-raġunijiet li huma fil-bażi tad-deċiżjoni tal-awtorità kompetenti, tista’ tkun ta’ assistenza għall-individwu fit-teħid ta’ kwalunwke pass ulterjuri, inklużi fit-tiftix ta’ rimedju ġudizzjarju. Informazzjoni dettaljata dwar l-eżitu tal-evalwazzjoni tista’ tkun ristretta dment li jkun hemm motivazzjonijiet raġonevoli biex jiġi kkunsidrat li l-komunikazzjoni tat-tali informazzjoni aktarx li tirrappreżenta riskju għall-investigazzjoni kurrenti.

(145)

It-tielet, individwu li ma jaqbilx ma’ deċiżjoni dwar qbid (mandat) (118) rigward id-data personali tiegħu minn imħallef, jew mal-miżuri mill-pulizija jew mill-prosekuzzjoni li jeżaminaw tali deċiżjoni, jista’ jippreżenta talba biex dik id-deċiżjoni jew it-tali miżuri jitħassru jew jiġu modifikati (Artikoli 429(1), 430(1), (2) tas-CCP), l-Artikolu 26 tal-Att dwar l-Interċezzjonijiet Telefoniċi) (119). Fil-każ li fih il-qorti tar-rieżami tqis li l-mandat stess jew l-eżekuzzjoni tiegħu (“proċedura għall-qbid”) ikunu illegali, din tilqa’ t-talba u tordna li jitroddu lura l-oġġetti maqbuda (120).

(146)

Ir-raba’, bħala forma aktar indiretta ta’ kontroll ġudizzjarju, individwu li jqis li l-ġbir tal-informazzjoni personali tiegħu bħala parti minn investigazzjoni kriminali kien illegali jista’ jinvoka din l-illegalità matul il-proċess kriminali tiegħu. Jekk il-qorti taqbel, dan iwassal għall-esklużjoni tal-evidenza bħala inammissibbli.

(147)

Finalment, skont l-Artikolu 1(1) tal-Att dwar ir-Rimedju Statali, qorti tista’ tagħti kumpens meta uffiċjal pubbliku li jeżerċita l-awtorità pubblika tal-Istat, matul dmirijietu, ikun għamel ħsara b’mod illegali u b’tort (b’mod intenzjonat jew b’negliġenza) lill-individwu kkonċernat. Skont l-Artikolu 4 tal-Att dwar ir-Rimedju Statali, ir-responsabbiltà tal-Istat għad-danni hi bbażata fuq id-dispożizzjonijiet tal-Kodiċi Ċivili. F’dan ir-rigward, l-Artikolu 710 tal-Kodiċi Ċivili jistipula li r-responsabbiltà tkopri wkoll danni li ma jkunux dawk imwettqa fuq proprjetà, u b’hekk anki d-danni morali (pereżempju fil-forma ta’ “tbatija mentali”). Dan jinkludi każijiet li fihom il-privatezza ta’ individwu tkun ġiet invaduta minn sorveljanza illegali u/jew mill-ġbir ta’ informazzjoni personali tiegħu (eż. l-eżekuzzjoni illegali ta’ mandat) (121).

(148)

Minbarra kumpens monetarju, l-individwi f’ċerti kundizzjonijiet jistgħu jiksbu wkoll rimedju b’mandat ta’ inibizzjoni (eż. it-tħassir ta’ data personali miġbura mill-awtoritajiet pubbliċi) fuq il-bażi tad-drittijiet tal-privatezza tagħhom skont l-Artikolu 13 tal-Kostituzzjoni (122).

(149)

Fir-rigward ta’ dawk il-metodi kollha ta’ rimedju, il-mekkaniżmu għas-soluzzjoni tat-tilwim maħluq mill-gvern Ġappuniż jipprovdi li individwu li xorta jibqa’ mhux sodisfatt bl-eżitu tal-proċedura jista’ jikkuntattja lill-PPC “li għandha tinforma lill-individwu bid-diversi possibbiltajiet u bil-proċeduri dettaljati biex jikser rimedju skont il-liġijiet u r-regolamenti tal-Ġappun.” Barra minn hekk, il-PPC “se tipprovdi lill-individwu b’appoġġ, inklużi konsulenza u assistenza biex jieħu kwalunkwe azzjoni ulterjuri kontra l-korp amministrattiv jew ġudizzjarju rilevanti.”

(150)

Dan jinkludi l-użu tad-drittijiet proċedurali skont il-Kodiċi tal-Proċedura Kriminali. Pereżempju, “[meta] l-evalwazzjoni ssib li individwu hu suspettat f’każ kriminali, il-PPC tinforma lill-individwu dwar dak il-fatt” (123) kif ukoll dwar il-possibbiltà skont l-Artikolu 259 tas-CCP li jitlob lill-prosekuzzjoni biex jiġi notifikat ladarba din tal-aħħar tiddeċiedi li ma tiftaħx proċedimenti kriminali. Barra dan, jekk l-evalwazzjoni ssib li nfetaħ każ li jinvolvi l-informazzjoni personali tal-individwu u li l-każ hu konkluż, il-PPC tinforma lill-individwu li r-rekord tal-każ jista’ jiġi spezzjonat skont l-Artikolu 53 tas-CCP (u l-Artikolu 4 tal-Att dwar ir-Rekords Finali tal-Każ Kriminali). Il-kisba tal-aċċess għar-rekord tal-każ tiegħu hi importanti għaliex se tgħin lill-individwu jifhem aħjar l-investigazzjoni mwettqa kontrih u b'hekk iħejji kawża eventwali l-qorti (eż. talba għad-danni) f’każ li hu jqis li d-data tiegħu nġabret jew intużat b’mod illegali.

(151)

Skont l-awtoritajiet tal-Ġappun, m’hemm ebda liġi fil-Ġappun li tippermetti talbiet obbligatorji għal informazzjoni jew “interċettazzjoni telefonika amministrattiva” barra minn investigazzjonijiet kriminali. B’hekk, għal raġunijiet ta’ sigurtà nazzjonali, l-informazzjoni tista’ tinkiseb biss minn sors ta’ informazzjoni li jista’ jiġi aċċessat liberament minn kulħadd jew bi żvelar volontarju. L-operaturi ta’ negozji li jirċievu talba għal kooperazzjoni volontarja (fil-forma ta’ żvelar ta’ informazzjoni elettronika) m’huma taħt l-ebda obbligu legali li jipprovdu informazzjoni bħal din (124).

(152)

Barra minn hekk, skont l-informazzjoni riċevuta, erbgħa biss mill-entitajiet governattivi huma mogħtija s-setgħa li jiġbru informazzjoni elettronika miżmuma minn operaturi ta’ negozji Ġappuniżi fuq il-bażi tas-sigurtà nazzjonali, jiġifieri: (i) l-Uffiċċju tal-Intelliġenza u tar-Riċerka tal-Kabinett (CIRO); (ii) il-Ministeru tad-Difiża (“MOD”); (iii) il-pulizija (kemm l-Aġenzija Nazzjonali tal-Pulizija (NPA) (125) kif ukoll il-Pulizija tal-Prefetturi); u (iv) l-Aġenzija tal-Intelliġenza tas-Sigurtà Pubblika (“PSIA”). Madankollu, is-CIRO qatt ma jiġbor informazzjoni direttament mingħand l-operaturi ta’ negozji, lanqas permezz ta’ interċettazzjoni tal-komunikazzjoniijet. Meta tiċievi informazzjoni minn awtoritajiet oħra tal-gvern sabiex tipprovdi analiżi lill-Kabinett, dawn l-awtoritajiet l-oħra min-naħa tagħhom għandhom jikkonformaw mal-liġi, inklużi mal-limitazzjonijiet u s-salvagwardji analizzati f’din id-Deċiżjoni. B’hekk, l-attivitajiet tiegħu mhumiex rilevanti f’kuntest ta’ trasferiment.

(153)

Skont l-informazzjoni riċevuta, l-MOD jiġbor informazzjoni (elettronika) fuq il-bażi tal-Att dwar l-Istabbiliment tal-MOD. Skont l-Artikolu 3 tiegħu, il-missjoni tal-MOD hi li jimmaniġġja u jopera l-forzi militari u “jwettaq dawn il-kompiti relatati ma’ dawn biex jiżgura l-paċi u l-indipendenza nazzjonali, u s-sikurezza tal-pajjiż.” L-Artikolu 4(4) jipprovdi li l-MOD għandu jkollu ġurisdizzjoni fuq id-“difiża u l-għassa”, fuq l-azzjonijiet li jridu jittieħdu mill-Forzi tal-Awtodifiża kif ukoll fuq l-iskjerament tal-forzi militari, inkluż il-ġbir tal-informazzjoni neċessarja għat-twettiq ta’ dawn il-kompiti. Għandu awtorità biss biex jiġbor informazzjoni (elettronika) minn operaturi tan-negozju permezz tal-kooperazzjoni volontarja.

(154)

Rigward il-Pulizija tal-Prefatturi, ir-responsabbiltajiet u d-dmirijiet tagħha jinkludu ż-“żamma tas-sikurezza u tal-ordni pubbliċi” (Artikolu 35(2) flimkien mal-Artikolu 2(1) tal-Liġi dwar il-Pulizija). Fi ħdan dan l-ambitu tal-ġurisdizzjoni, il-pulizija tista’ tiġbor informazzjoni, iżda biss fuq bażi volontarja mingħajr saħħa legali. Barra minn hekk, l-attivitajiet tal-pulizija għandhom ikunu “strettament limitati” għal dak li jkun neċessarju biex twettaq id-dmirijiet tagħha. Barra minn hekk, din għandha taġixxi b’mod “imparzjali, mhux partiġġan, mhux preġudikat u ġust” u qatt ma tabbuża mis-setgħat tagħha “b’xi mod li jxekkel id-drittijiet u l-libertajiet ta’ individwu garantiti fil-Kostituzzjoni tal-Ġappun” (Artikolu 2 tal-Liġi dwar il-Pulizija).

(155)

Finalment, il-PSIA tista’ twettaq investigazzjonijiet taħt l-Att dwar il-Prevenzjoni ta’ Attivitajiet Sovversivi (“SAPA”) u l-Att dwar il-Kontroll tal-Organizzazzjonijiet Li Wettqu Atti ta’ Omiċidju Volontarju Indiskriminat tal-Massa (“ACO”) fejn it-tali investigazzjonijiet ikunu neċessarji biex titħejja l-adozzjoni ta’ miżuri ta’ kontroll kontra ċerti organizzazzjonijiet (126). Skont iż-żewġ Atti, fuq talba tad-Direttur Ġenerali tal-PSIA, il-Kummissjoni dwar l-Eżami tas-Sigurtà Pubblika tista’ toħroġ ċerti “dispożizzjonijiet” (sorveljanza/projbizzjonijiet fil-każ tal-ACO (127), xoljiment/projbizzjonijiet fil-każ tal-SAPA (128)) u f’dan il-kuntest il-PSIA/il-Pulizija tista’ twettaq investigazzjonijiet (129). Skont l-informazzjoni riċevuta, dawn l-investigazzjonijiet dejjem isiru fuq bażi volontarja, u dan ifisser li l-PSIA ma tistax iġġiegħel lil sid ta’ informazzjoni personali biex jipprovdi t-tali informazzjoni (130). Kull darba, il-kontrolli u l-investigazzjonijiet għandhom isiru biss sal-minimu neċessarju biex jintlaħaq l-iskop ta’ kontroll u fl-ebda ċirkustanza m’għandhom jitwettqu biex jiġu ristretti “b’mod irraġonevoli” d-drittijiet u l-libertajiet garantiti mill-Kostituzzjoni tal-Ġappun (Artikolu 3(1) tal-SAPA/ACO). Barra minn hekk, skont l-Artikolu 3(2) tal-SAPA/ACO, il-PSIA fl-ebda ċirkustanza ma tista’ tabbuża mit-tali kontrolli, jew inkella mill-investigazzjonijiet imwettqa biex tħejji t-tali kontrolli. Jekk Uffiċjal tal-Intelliġenza tas-Sigurtà Pubblika jkun abbuża mill-awtorità tiegħu skont l-Att rispettiv billi jġiegħel lil persuna tagħmel xi ħaġa li l-persuna mhix meħtieġa tagħmel, jew billi jinterferixxi mal-eżerċizzju tad-drittijiet ta’ persuna, dan jista’ jkun soġġett għal sanzjonijiet kriminali skont l-Artikolu 45 SAPA jew l-Artikolu 42, ACO. Finalment, iż-żewġ Atti jippreskrivu b’mod espliċitu li d-dispożizzjonijiet tagħhom, inklużi s-setgħat mogħtija fihom, “fl-ebda ċirkustanza m’għandhom ikunu soġġetti għal interpretazzjoni espanduta” (Artikolu 2 tal-SAPA/ACO).

(156)

Fil-każijiet kollha ta’ aċċess tal-gvern fuq il-bażi tas-sigurtà nazzjonali deskritti f’din it-taqsima, japplikaw il-limitazzjonijiet stipulati mill-Qorti Suprema tal-Ġappun għal investigazzjonijiet volontarji, u dan ifisser li l-ġbir ta’ informazzjoni “elettronika” jrid ikun konformi mal-prinċipji tan-neċessità u tal-proporzjonalità (“metodu xieraq”) (131). Kif ikkonfermat espliċitament mill-awtoritajiet Ġappuniżi, “il-ġbir u l-proċessar ta’ informazzjoni jseħħ biss sa fejn ikun meħtieġ għall-prestazzjoni ta’ dmirijiet speċifiċi tal-awtorità pubblika kompetenti kif ukoll fuq il-bażi ta’ theddid speċifiku”. Għalhekk, “dan jeskludi l-ġbir tal-massa u indiskriminat jew l-aċċess għal informazzjoni personali għal raġunijiet ta’ sigurtà nazzjonali” (132).

(157)

Barra minn hekk, ladarba tinġabar, kwalunkwe informazzjoni personali miżmuma minn awtoritajiet pubbliċi għall-finijiet ta’ sigurtà nazzjonali taqa’ taħt il-protezzjonijiet tal-APPIHAO u b'hekk tibbenefika minnhom f’dak li għandu x’jaqsam mal-ħżin, mal-użu u mal-iżvelar sussegwenti tagħha (ara l-premessa (118)).

(158)

Il-ġbir ta’ informazzjoni personali għall-finijiet tas-sigurtà nazzjonali hu soġġett għal diversi saffi ta’ sorveljanza mit-tliet fergħat tal-gvern.

(159)

L-ewwel, id-Diet tal-Ġappun, permezz tal-kumitati speċjalizzati tiegħu, jista’ jeżamina l-legalità tal-investigazzjonijiet fuq il-bażi tas-setgħat tiegħu ta’ skrutinju parlamentari (Artikolu 62 tal-Kostituzzjoni, Artikolu 104 tal-Liġi dwar id-Diet; ara l-premessa 134). Din il-funzjoni ta’ sorveljanza hi sostnuta mill-obbligi ta’ rapportar speċifiċi dwar l-attivitajiet imwettqa skont uħud mill-bażijiet ġuridiċi msemmija aktar ’il fuq (133)

(160)

It-tieni, jeżistu diversi mekkaniżmi ta’ sorveljanza fi ħdan il-fergħa eżekuttiva.

(161)

Rigward l-MOD, is-sorveljanza hi eżerċitata mill-Uffiċċju Ġenerali tal-Ispettur tal-Konformità Legali (IGO) (134) li twaqqaf fuq il-bażi tal-Artikolu 29 tal-Att dwar l-Istabbiliment tal-MOD bħala uffiċċju fi ħdan l-MOD taħt is-superviżjoni tal-Ministeru tad-Difiża (għand min jirrapporta) iżda indipendenti mid-dipartimenti operazzjonali tal-MOD. L-IGO għandu l-kompitu ta’ żgurar tal-konformità mal-liġijiet u mar-regolamenti kif ukoll l-eżekuzzjoni xierqa tad-dmirijiet mill-uffiċjali tal-MOD. Fost is-setgħat tiegħu hemm l-awtorità li jwettaq l-hekk imsejħa “Spezzjonijiet tad-Difiża”, kemm f’intervalli regolari (“Spezzjonijiet Regolari tad-Difiża”) u f’każijiet individwali (“Spezzjonijiet Speċjali tad-Difiża”), li fl-imgħoddi koprew ukoll l-immaniġġjar xieraq ta’ informazzjoni personali (135). Fil-kuntest tat-tali spezzjonijiet, l-IGO jista’ jidħol f’siti (uffiċċji) u jitlob is-sottomissjoni ta’ dokumenti jew ta’ informazzjoni, inklużi l-ispjegazzjonijiet mid-Deputat Viċi Ministru tal-MOD. L-ispezzjoni tiġi konkluża permezz ta’ rapport lill-Ministru tad-Difiża li jistabbilixxi s-sejbiet u l-miżuri għat-titjib (li l-implimentazzjoni tiegħu mill-ġdid tista’ tiġi verifikata permezz ta’ spezzjonijiet ulterjuri). Min-naħa tiegħu, ir-rapport jifforma l-bażi għall-istruzzjonijiet mill-Ministru tad-Difiża biex jiġu implimentati l-miżuri neċessarji għall-indirizzar tas-sitwazzjoni; id-Deputat Viċi Ministru hu inkarigat bit-twettiq tat-tali miżuri u jrid jirrapporta dwar is-segwitu.

(162)

Rigward il-Pulizija tal-Prefatturi, is-sorveljanza hi żgurata mill-Kummissjonijiet indipendenti tas-Sikurezza Pubblika tal-Prefatturi, kif spjegat fil-premessa 135 fir-rigward tal-infurzar tad-dritt kriminali.

(163)

Finalment, kif indikat, il-PSIA tista’ twettaq biss investigazzjonijiet sa fejn dawn ikunu neċessarji fir-rigward tal-adozzjoni ta’ dispożizzjoni dwar il-projbizzjoni, ix-xoljiment jew is-sorveljanza skont l-SAPA/ACO, u għal dawn id-dispożizzjonijiet il-Kummissjoni tal-Eżaminazzjoni tas-Sigurtà Pubblika indipendenti (136) teżerċita sorveljanza ex ante. Barra minn hekk, spezzjonijiet regolari/perjodiċi (li jħarsu lejn l-operazzjonijiet tal-PSIA b’mod komprensiv) (137) u spezzjonijiet interni speċjali (138) dwar l-attivitajiet tad-dipartimenti/tal-uffiċċji individwali eċċ. jitwettqu minn spetturi maħtura apposta u jistgħu jsarrfu fi struzzjonijiet għall-kapijiet tad-dipartimenti rilevanti eċċ. biex jieħdu miżuri korrettivi jew ta’ titjib.

(164)

Dawn il-mekkaniżmi ta’ sorveljanza, li huma msaħħa ulterjorment permezz tal-possibbiltà li l-individwi jiskattaw l-intervent tal-PPC bħala awtorità superviżorja indipendenti (ara aktar ’il quddiem fit-taqsima 168), jipprovdu garanziji adegwati kontra r-riskju ta’ abbuż mill-awtoritajiet Ġappuniżi mis-setgħat tagħhom fil-qasam tas-sigurtà nazzjonali, u kontra kwalunkwe ġbir illegali ta’ informazzjoni elettronika.

(165)

Fir-rigward tar-rimedju individwali, rigward ll-informazzjoni personali miġbura u b’hekk “miżmuma” mill-Organi Amministrattivi, dawn tal-aħħar huma obbligati “jieħdu impenn li jipproċessaw kif xieraq u b’rapidità kwalunkwe lment” rigward proċessar bħal dan (Artikolu 48 tal-APPIHAO).

(166)

Barra minn hekk, għall-kuntrarju ta’ investigazzjonijiet kriminali, individwi (inklużi ċittadini barranin li jgħixu barra l-pajjiż) fil-prinċipju għandhom dritt għal żvelar (139), għal korrezzjoni (inkluż tħassir) u għal sospensjoni tal-użu/tal-provvista skont l-APPIHAO. Minkejja dan, il-kap tal-Organu Amministrattiv jista’ jirrifjuta l-iżvelar fir-rigward ta’ informazzjoni “li għaliha jkun hemm motivazzjonijiet raġonevoli […] biex jitqies li l-iżvelar aktarx li jikkawża ħsara għas-sigurtà nazzjonali” (Artikolu 14(iv) tal-APPIHAO) u jista’ jagħmel dan ukoll bla ma jiżvela l-eżistenza tat-tali informazzjoni (Artikolu 17 tal-APPIHAO). Bl-istess mod, filwaqt li individwu jista’ jitlob sospensjoni tal-użu jew tħassir skont l-Artikolu 36(1)(i) tal-APPIHAO fil-każ li fih l-Organu Amministrattiv ikun kiseb l-informazzjoni b’mod illegali jew iżommha/jużaha lil hinn milli jkun hemm bżonn biex jilħaq l-iskop speċifikat, l-awtorità tista’ tirrifjuta t-talba jekk issib li s-sospensjoni tal-użu “aktarx li xxekkel l-eżekuzzjoni xierqa tal-kompiti relatati mal-Iskop tal-Użu tal-Informazzjoni Personali Miżmuma minħabba n-natura tat-tali kompiti” (Artikolu 38 tal-APPIHAO). Xorta waħda, meta jkun possibbli li jiġu separati u esklużi faċilment partijiet li jkunu soġġetti għal eċċezzjoni, l-Organi Amministrattivi huma meħtieġa jagħtu tal-anqas żvelar parzjali (ara pereżempju l-Artikolu 15(1) tal-APPIHAO) (140).

(167)

Fi kwalunkwe każ, l-Organu Amministrattiv irid jieħu deċiżjoni bil-miktub fi ħdan ċertu perjodu (30 jum, li skont ċerti kundizzjonijiet jista’ jiġi estiż bi 30 jum addizzjonali). Jekk it-talba tiġi rifjutata, jew tintlaqa’ biss f’parti minnha, jew jekk l-individwu għal raġunijiet oħra jikkunsidra li l-imġiba tal-Organu Amministrattiv hija “illegali jew inġusta”, l-individwu jista’ jitlob rieżami amminstrattiv abbażi tal-Att dwar ir-Rieżami tal-Ilmenti Amministrattivi (141). Fit-tali każ, il-kap tal-Organu Amministrattiv li jiddeċiedi dwar l-appell għandu jikkonsulta l-Iżvelar tal-Informazzjoni u Bord ta’ Rieżami tal-Protezzjoni tal-Informazzjoni Personali (l-Artikolu 42, 43, APPIHAO), bord speċjalizzat, indipendenti li l-membri tiegħu huma maħtura mill-Prim Ministru bil-kunsens taż-żewġ Kmamar tad-Diet. Skont l-informazzjoni riċevuta, il-Bord tar-Rieżami jista’ jwettaq eżaminazzjoni (142) u f’dan ir-rigward jitlob lill-Organu Amministrattiv jipprovdi l-informazzjoni personali miżmuma, inkluż kwalunkwe kontenut klassifikat, kif ukoll informazzjoni u dokumenti ulterjuri. Filwaqt li r-rapport finali li jintbagħat lill-ilmentatur kif ukoll lill-Organu Amministrattiv u jiġi ppubblikat mhuwiex legalment vinkolanti, kważi f’kull każ jingħata segwitu (143). Barra minn hekk, l-individwu jkollu l-possibbiltà li jikkontesta d-deċiżjoni ta’ appell fil-qorti fuq il-bażi tal-Att dwar il-Litigazzjoni f’Każijiet Amministrattivi. Dan iwitti t-triq għall-kontroll ġudizzjarju tal-użu tal-eċċezzjoni(jiet) tas-sigurtà nazzjonali, inkluż jekk tali eċċezzjoni tkunx ġiet abbużata jew tkunx għada ġustifikata.

(168)

Biex jiffaċilita l-eżerċizzju tad-drittijiet imsemmija hawn fuq skont l-APPIHAO, l-MIC stabbilixxa 51 “ċentru ta’ informazzjoni komprensiva” li jipprovdu informazzjoni konsolidata fuq dawk id-drittijiet, il-proċeduri applikabbli biex issir talba u l-metodi possibbli għar-rimedju (144). Rigward l-Organi Amministrattivi, dawn huma meħtieġa jipprovdu “informazzjoni li tikkontribwixxi għall-ispeċifikar tal-Informazzjoni Personali Miżmuma għandhom” (145) u jieħdu “miżuri adegwati oħra b’kunsiderazzjoni tal-konvenjenza tal-persuna li jkun biħsiebha tagħmel it-talba” (Artikolu 47(1) tal-APPIHAO).

(169)

Bħal fil-każ ta’ investigazzjonijiet fil-qasam tal-infurzar tad-dritt kriminali, anki fil-qasam tas-sigurtà nazzjonali l-individwi jijstgħu jiksbu rimedju individwali billi jikkuntattjaw lill-PPC direttament. Dan jiskatta l-proċedura speċifika ta’ soluzzjoni ta’ tilwim li l-gvern Ġappnuż ħoloq għall-individwi mill-UE li d-data personali tagħhom tiġi trasferita skont din id-Deċiżjoni (ara l-ispjegazzjonijiet dettaljati fil-premessi 141 sa 144, 149).

(170)

Barra minn hekk, l-individwi jistħu jfittxu rimedju fil-forma ta’ kawża għad-danni skont l-Att dwar ir-Rimedju Statali, li jkopri wkoll id-danni morali u f’ċerti kundizzjonijiet it-tħassir tad-data miġbura (ara l-premessa 147).

(171)

Il-Kummissjoni tqis li l-APPI, kif komplimentat mir-Regoli Supplimentari li jinsabu fl-Anness I, flimkien mar-rappreżentazzjonijiet, mal-assigurazzjonijiet u mal-impenji uffiċjali li jinsabu fl-Anness II, jiżguraw livell ta’ protezzjoni għal data personali ttrasferita mill-Unjoni Ewropea li essenzjalment hu ekwivalenti għal dak garantit mir-Regolament (UE) (UE) 2016/679.

(172)

Barra minn hekk, il-Kummissjoni tqis li, fis-sħuħija tagħhom, il-mekkaniżmi ta’ sorveljanza u l-metodi ta’ rimedji fil-liġi tal-Ġappun jippermettu biex ksur mill-PIHBOs riċevituri jiġi identifikat u penalizzat fil-prattika u joffru rimedji legali biex is-suġġett tad-data jikseb aċċess għal data personali relatata miegħu u, eventwalment, ir-rettifika jew it-tħassir tat-tali data.

(173)

Finalment, fuq il-bażi tal-informazzjoni disponibbli dwar l-ordinament ġuridiku tal-Ġappun, inklużi r-rappreżentazzjonijiet, l-aċċertamenti u l-impenji mill-gvern tal-Ġappun li jinsabu fl-Anness II, il-Kummissjoni tqis li kwalunkwe interferenza mad-drittijiet fundamentali tal-individwi li d-data personali tagħhom tiġi trasferita mill-Unjoni Ewropea lill-Ġappun mill-awtoritajiet pubbliċi tal-Ġappun għall-finijiet ta’ interess pubbliku, b’mod partikolari għall-finijiet ta’ infurzar tad-dritt kriminali u tas-sigurtà nazzjonali, se tkun limitata għal dik li tkun strettament neċessarja biex jintlaħaq l-objettiv leġittimu inkwistjoni, u li teżisti protezzjoni legali effettiva kontra t-tali interferenza.

(174)

Għaldaqstant, fid-dawl tas-sejbiet ta’ din id-Deċiżjoni, il-Kummissjoni tqis li l-Ġappun jiżgura livell adegwat ta’ protezzjoni għad-data personali trasferita mill-Unjoni Ewropea lill-PIHBOs fil-Ġappun li jkunu soġġetti għall-APPI, ħlief f’dawk il-każijiet li fihom ir-riċevitur ikun jaqa’ fi ħdan waħda mill-kategoriji elenkati fl-Artikolu 76(1) tal-APPI u l-iskopijiet jew parti mit-tali skopijiet ta’ proċessar ikunu jikkorrispondu għal wieħed mill-iskopijiet stipulati f’dik id-dispożizzjoni.

(175)

Fuq din il-bażi, il-Kummissjoni tikkonkludi li l-istandard ta’ adegwatezza tal-Artikolu 45 tar-Regolament (UE) 2016/679, interpretat fid-dawl tal-Karta tad-Drittijiet Fundamentali tal-Unjoni Ewropea, b’mod partikolari fis-sentenza Schrems (146), hu milħuq.

(176)

Skont il-ġurisprdenza tal-Qorti tal-Ġustizzja (147), u kif rikonoxxut fl-Artikolu 45(4) tar-Regolament (UE) 2016/679, il-Kummissjoni għandha tissorvelja kontinwament l-iżviluppi rilevanti fil-pajjiż terz wara l-adozzjoni ta’ deċiżjoni ta’ adegwatezza, biex tivvaluta jekk il-Ġappun għadux jiżgura livell essenzjalment ekwivalenti ta’ protezzjoni. It-tali verifika hi meħtieġa, fi kwalunkwe każ, meta l-Kummissjoni tirċievi informazzjoni li twassal għal dubju ġustifikat f’dak ir-rigward.

(177)

Għaldaqstant, il-Kummissjoni għandha tissorvelja fuq bażi kontinwa s-sitwazzjoni rigward il-qafas legali u l-prattika proprja għall-proċessar ta’ data personali kif valutati f’din id-Deċiżjoni, inkluża l-konformità mill-awtoritajiet Ġappuniżi mar-rappreżentazzjonijiet, mal-aċċertamenti u mal-impenji li jinsabu fl-Anness II. Biex jiffaċilitaw dan il-proċess, l-awtoritajiet Ġappuniżi huma mistennija jinformaw lill-Kummissjoni dwar żviluppi materjali rilevanti għal din id-Deċiżjoni, kemm rigward il-proċessar ta’ data personali mill-operaturi ta’ negozji kif ukoll il-limitazzjonijiet u s-salvagwardji applikabbli għall-aċċess għal data personali mill-awtoritajiet pubbliċi. Jenħtieġ li dan ikun jinkludi kull deċiżjoni adottata mill-PPC skont l-Artikolu 24 tal-APPI ta’ għarfien għal pajjiż terz bħala wieħed li jipprovdi livell ekwivalenti ta’ protezzjoni għal dak garantit fil-Ġappun

(178)

Barra minn hekk, biex il-Kummissjoni tkun tista’ twettaq il-funzjoni ta’ monitoraġġ tagħha b’mod effettiv, l-Istati Membri għandhom jinformaw lill-Kummissjoni dwar kwalunkwe azzjoni rilevanti meħuda mill-awtoritajiet nazzjonali għall-protezzjoni tad-data (“DPAs”), b’mod partikolari rigward domandi jew ilmenti minn suġġetti tad-data tal-UE rigward it-trasferiment ta’ data personali mill-Unjoni Ewropea lil operaturi ta’ negozji fil-Ġappun. Il-Kummissjoni għandha tiġi informata wkoll dwar kwalunkwe indikazzjoni li l-azzjonijiet tal-awtoritajiet pubbliċi tal-Ġappun responsabbli għall-prevenzjoni, għall-investigazzjoni, għad-detezzjoni jew għall-prosekuzzjoni ta’ reati kriminali, jew għas-sigurtà nazzjonali, inkluż kwalunkwe korp ta’ sorveljanza, ma jiżgurawx il-livell meħtieġ ta’ protezzjoni.

(179)

L-Istati Membri u l-organi tagħhom huma obbligati jieħdu l-miżuri neċessarji biex jikkonformaw mal-atti tal-istituzzjonijiet tal-Unjoni, peress li dawn tal-aħħar huma preżunti li huma legali u għaldaqstant jipproduċu effetti legali sakemm jiġu rtirati, jitħassru f’kawża għat-tħassir jew jiġu ddikjarati invalidi wara referenza għal sentenza preliminari jew għal eċċezzjoni ta’ illegalità. Konsegwentement, deċiżjoni ta’ adegwatezza tal-Kummissjoni adottata skont l-Artikolu 45(3) tar-Regolament (UE) 2016/679 hi vinkolanti fuq il-korpi kollha tal-Istati Membri li hi indirizzata lilhom, inklużi l-awtoritajiet superviżorji indipendenti tagħhom. Fl-istess ħin, kif spjegat fis-sentenza Schrems mill-Qorti tal-Ġustizzja fis-sentenza Schrems (148) u rikonoxxut fl-Artikolu 58(5) tar-Regolament, meta DPA tkun irċiviet domandi, inkluż dwar ilment, li jixħet dubju fuq il-kompatibbiltà ta’ deċiżjoni ta’ adegwatezza tal-Kummissjoni mad-drittijiet fundamentali tal-individwu għall-privatezza u għall-protezzjoni tad-data, id-dritt nazzjonali jrid jipprovdiha b’rimedju legali biex tressaq dawk l-oġġezzjonijiet quddiem qorti nazzjonali li, f’każ ta’ dubji, trid tissospendi l-proċedimenti u tagħmel talba għal deċiżjoni preliminari lill-Qorti tal-Ġustizzja (149).

(180)

Fl-applikazzjoni tal-Artikolu 45(3) tar-Regolament (UE) 2016/679 (150), u fid-dawl tal-fatt li l-livell ta’ protezzjoni mogħti mill-ordinament ġuridiku tal-Ġappun jista’ jkun soġġett għal tibdil, il-Kummissjoni, wara l-adozzjoni ta’ din id-Deċiżjoni, għandha tivverifika b’mod perjodiku jekk il-konstatazzjonijiet relatati mal-adegwatezza tal-livell ta’ protezzjoni żgurat mill-Ġappun ikunux għadhom fattwalment u legalment ġustifikati.

(181)

Għal dan l-għan, din id-Deċiżjoni għandha tkun soġġetta għall-ewwel rieżami fi żmien sentejn wara li tidħol fis-seħħ. Wara l-ewwel rieżami, u skont l-eżitu tagħha, il-Kummissjoni se tiddeċiedi f’konsultazzjoni mill-qrib mal-kumitat stabbilit skont l-Artikolu 93(1) tal-GDPR jekk iċ-ċiklu ta’ sentejn għandux jinżamm. Fi kwalunkwe każ, ir-rieżamijeit sussegwenti għandhom iseħħu tal-anqas kull erba’ snin (151). Ir-rieżami għandu jkopri l-aspetti kollha tal-funzjonament ta’ din id-Deċiżjoni, u b’mod partikolari l-applikazzjoni tar-Regoli Supplimentari (b’attenzjoni speċjali għall-protezzjonijiet mogħtija f’każ ta’ trasferimenti ulterjuri), l-applikazzjoni tar-regoli dwar il-kunsens, inkluż fil-każ ta’ ħruġ, l-effikaċja tal-eżerċitar tad-drittijiet individwali, kif ukoll il-limitazzjonijiet u s-salvagwardji rigward l-aċċess mill-gvern, inkluż il-mekkaniżmu ta’ rimedju kif stipulat fl-Anness II għal din id-Deċiżjoni. Jenħtieġ ukoll li jkopri l-effikaċja tas-sorveljanza u tal-infurzar, fir-rigward tar-regoli applikabbli kemm għal PIHBOs u fil-qasam tal-infurzar tal-liġi kriminali u tas-sigurtà nazzjonali.

(182)

Biex tagħmel ir-rieżami, il-Kummissjoni għandha tiltaqa’ mal-PPC, akkumpanjata, fejn xieraq, minn awtoritajiet Ġappuniżi oħra responsabbli għall-aċċess mill-gvern, inklużi l-korpi ta’ sorveljanza rilevanti. Il-parteċipazzjoni f’din il-laqgħa għandha tkun miftuħa għar-rappreżentanti tal-membri tal-Bord Ewropew għall-Protezzjoni tad-Data (EDPB). Fil-qafas tar-Rieżami Konġunt, il-Kummissjoni għandha titlob lill-PPC tipprovdi informazzjoni komprensiva dwar l-aspetti kollha rilevanti għall-konstatazzjoni ta’ adegwatezza, inkluż dwar il-limitazzjonijiet u s-salvagwardji li jikkonċernaw l-aċċess (152). Il-Kummissjoni għandha tfittex ukoll spjegazzjonijiet dwar kwalunkwe informazzjoni rilevanti għal din id-Deċiżjoni li tkun irċiviet, inklużi rapporti pubbliċi mill-awtoritajiet Ġappuniżi jew minn partijiet ikkonċernati oħra fil-Ġappun, mill-EDPB, mid-DPAs individwali, mill-gruppi tas-soċjetà ċivili, mir-rapporti fl-istampa, jew minn kwalunkwe sors ieħor disponibbli ta’ informazzjoni.

(183)

Fuq il-bażi tar-Rieżami Konġunt, il-Kummissjoni għandha tħejji rapport pubbliku li għandu jiġi sottomess lill-Parlament Ewropew u lill-Kunsill.

(184)

Meta, fuq il-bażi tal-verifiki regolari u ad hoc jew kwalunkwe informazzjoni oħra disponibbli, il-Kummissjoni tikkonkludi li l-livell ta’ protezzjoni mogħti mill-ordinament ġuridiku tal-Ġappun ma jistax jibqa’ meqjus bħala wieħed essenzjalment ekwivalenti għal dak fl-Unjoni Ewropea, din għandha tinforma lill-awtoritajiet Ġappuniżi kompetenti dwar dan u titlob li jittieħdu miżuri xierqa fi ħdan perjodu ta’ żmien raġonevoli speċifikat. Dan jinkludi r-regoli applikabbli kemm għall-operaturi ta’ negozji kif ukoll għall-awtoritajiet pubbliċi tal-Ġappun responsabbli għall-infurzar tad-dritt kriminali jew għas-sigurtà nazzjonali. Pereżempju, tali proċedura tiskatta f’każijiet fejn it-trasferimenti ulterjuri, inkluż abbażi ta’ deċiżjonijiet adottat mill-PPC taħt l-Artikolu 24 tal-APPI li jirrikonoxxu xi pajjiż terz bħala li jipprovdi livell ekwivalenti ta’ protezzjoni għal dak iggarantit fil-Ġappun, ma jibqgħux isiru taħt salvagwardji li jiżguraw il-kontinwità tal-protezzjoni skont it-tifsira tal-Artikolu 44 tal-GDPR.

(185)

Jekk, wara l-perjodu ta’ żmien speċifikat, l-awtoritajiet Ġappuniżi kompetenti jonqsu milli juru b’mod sodisfaċenti li din id-Deċiżjoni għadha bbażata fuq livell adegwat ta’ protezzjoni, il-Kummissjoni, b’applikazzjoni tal-Artikolu 45(5) tar-Regolament (UE) 2016/679, għandha tniedi l-proċedura li twassal għas-sospensjoni parzjali jew sħiħa jew għat-tħassir ta’ din id-Deċiżjoni. Inkella, il-Kummissjoni għandha tibda l-proċedura li temenda din id-Deċiżjoni, b’mod partikolari billi tissottoponi trasferimenti tad-data għal kundizzjonijiet addizzjonali jew billi tillimita l-ambitu tas-sejba ta’ adegwatezza biss għat-trasferimenti ta’ data li għalihom il-kontinwità tal-protezzjoni skont it-tifsira tal-Artikolu 44 tal-GDPR hija żgurata.

(186)

B’mod partikolari, il-Kummissjoni għandha tiftaħ il-proċedura għas-sospensjoni jew għat-tħassir fil-każ ta’ indikazzjoinjiet li r-Regoli Supplimentari li jinsabu fl-Anness I ma jiġux rispettati mill-operaturi ta’ negozji li jirċievu data personali skont din id-Deċiżjoni u/jew ma jkunux infurzat b’mod effettiv, jew li l-awtoritajiet Ġappuniżi jonqsu milli jikkonformaw mar-rappreżentazzjonijiet, mal-aċċertamenti u mal-impenji li jinsabu fl-Anness II għal din id-Deċiżjoni.

(187)

Il-Kummissjoni għandha tikkunsidra wkoll li tiftaħ il-proċedura li twassal għall-emenda, għas-sospensjoni jew għat-tħassir ta’ din id-Deċiżjoni jekk, fil-kuntest tar-Rieżami Konġunt jew xi każ ieħor, l-awtoritajiet Ġappuniżi kompetenti jonqsu milli jipprovdu l-informazzjoni jew il-kjarifiki neċessarji għall-valutazzjoni tal-livell ta’ protezzjoni mogħtija lil data personali trasferita mill-Unjoni Ewropea lill-Ġappun jew il-konformità ma’ din id-Deċiżjoni. F’dan ir-rigward, il-Kummissjoni għandha tieħu f’kunsiderazzjoni kemm l-informazzjoni rilevanti tista’ tinkiseb minn sorsi oħra.

(188)

Fuq il-bażi ta’ raġunijiet ġustifikati kif xieraq ta’ emerġenza, bħal riskju ta’ ksur serju tad-drittijiet tas-suġġetti tad-data, il-Kummissjoni għandha tikkunsidra li tadotta deċiżjoni li tissospendi jew tħassar din id-Deċiżjoni li għandha tapplika minnufih, skont l-Artikolu 93(3) tar-Regolament (UE) 2016/679 flimkien mal-Artikolu 8 tar-Regolament (UE) Nru 182/2011 tal-Parlament Ewropew u tal-Kunsill (153).

(189)

Il-Bord Ewropew għall-Protezzjoni tad-Data ippubblika l-opinjoni tiegħu (154), li ttieħdet inkunsiderazzjoni fit-tħejjija ta’ din id-Deċiżjoni.

(190)

Il-Parlament Ewropew adotta riżoluzzjoni dwar strateġija għall-kummerċ diġitali li tistieden lill-Kummissjoni tipprijoritizza u tħaffef l-adozzjoni tad-deċiżjonijiet ta’ adegwatezza ma’ sħab kummerċjali importanti skont il-kundizzjonijiet stabbiliti fir-Regolament (UE) 2016/679 bħala mekkaniżmu importanti għas-salvagwardja tat-trasferiment ta’ data personali mill-Unjoni Ewropea (155). Il-Parlament Ewropew adotta wkoll riżoluzzjoni dwar l-adegwatezza tal-protezzjoni tad-data personali mogħtija mill-Ġappun (156).

(191)

Il-miżuri previsti f'din id-Deċiżjoni huma skont l-opinjoni tal-Kumitat stabbilit skont l-Artikolu 93(1) tal-GDPR.