EUR-Lex Access to European Union law
This document is an excerpt from the EUR-Lex website
Document 32018R1642
Commission Delegated Regulation (EU) 2018/1642 of 13 July 2018 supplementing Regulation (EU) 2016/1011 of the European Parliament and of the Council with regard to regulatory technical standards specifying further the criteria to be taken into account by competent authorities when assessing whether administrators of significant benchmarks should apply certain requirements (Text with EEA relevance.)
Regolament Delegat tal-Kummissjoni (UE) 2018/1642 tat-13 ta' Lulju 2018 li jissupplimenta r-Regolament (UE) 2016/1011 tal-Parlament Ewropew u tal-Kunsill fir-rigward ta' standards tekniċi regolatorji li jispeċifikaw aktar il-kriterji li għandhom jiġu kkunsidrati mill-awtoritajiet kompetenti meta jivvalutaw jekk l-amministraturi ta' parametri referenzjarji sinifikanti għandhomx japplikaw ċerti rekwiżiti (Test b'rilevanza għaż-ŻEE.)
Regolament Delegat tal-Kummissjoni (UE) 2018/1642 tat-13 ta' Lulju 2018 li jissupplimenta r-Regolament (UE) 2016/1011 tal-Parlament Ewropew u tal-Kunsill fir-rigward ta' standards tekniċi regolatorji li jispeċifikaw aktar il-kriterji li għandhom jiġu kkunsidrati mill-awtoritajiet kompetenti meta jivvalutaw jekk l-amministraturi ta' parametri referenzjarji sinifikanti għandhomx japplikaw ċerti rekwiżiti (Test b'rilevanza għaż-ŻEE.)
C/2018/4434
OJ L 274, 5.11.2018, p. 25–28
(BG, ES, CS, DA, DE, ET, EL, EN, FR, HR, IT, LV, LT, HU, MT, NL, PL, PT, RO, SK, SL, FI, SV)
In force
5.11.2018 |
MT |
Il-Ġurnal Uffiċjali tal-Unjoni Ewropea |
L 274/25 |
REGOLAMENT DELEGAT TAL-KUMMISSJONI (UE) 2018/1642
tat-13 ta' Lulju 2018
li jissupplimenta r-Regolament (UE) 2016/1011 tal-Parlament Ewropew u tal-Kunsill fir-rigward ta' standards tekniċi regolatorji li jispeċifikaw aktar il-kriterji li għandhom jiġu kkunsidrati mill-awtoritajiet kompetenti meta jivvalutaw jekk l-amministraturi ta' parametri referenzjarji sinifikanti għandhomx japplikaw ċerti rekwiżiti
(Test b'rilevanza għaż-ŻEE)
IL-KUMMISSJONI EWROPEA,
Wara li kkunsidrat it-Trattat dwar il-Funzjonament tal-Unjoni Ewropea,
Wara li kkunsidrat ir-Regolament (UE) 2016/1011 tal-Parlament Ewropew u tal-Kunsill tat-8 ta' Ġunju 2016 dwar l-indiċi użati bħala parametri referenzjarji fi strumenti finanzjarji u kuntratti finanzjarji jew dwar il-kejl tal-prestazzjoni ta' fondi ta' investiment u li jemenda d-Direttivi 2008/48/KE u 2014/17/UE u r-Regolament (UE) Nru 596/2014 tal-Parlament Ewropew u tal-Kunsill (1), u b'mod partikolari t-tielet subparagrafu tal-Artikolu 25(9) tiegħu,
Billi:
(1) |
L-Artikolu 25(1) tar-Regolament (UE) 2016/1011 jippermetti lill-amministratur ta' parametru referenzjarju sinifikanti li jagħżel li ma japplikax ċerti dispożizzjonijiet ta' dak ir-Regolament. Jekk l-amministratur jagħżel li ma japplikax waħda jew aktar minn dawk id-dispożizzjonijiet, l-awtorità kompetenti għandha s-setgħa li tiddeċiedi li madankollu jenħtieġ li l-amministratur japplika waħda jew aktar minnhom. L-Artikolu 25(3) ta' dan ir-Regolament jispeċifika l-kriterji li l-awtorità kompetenti għandha tieħu inkunsiderazzjoni sabiex tevalwa jekk ikunx xieraq li amministratur japplika dawk id-dispożizzjonijiet. |
(2) |
Il-kriterji li awtorità kompetenti hija meħtieġa tieħu inkunsiderazzjoni għandhom iqisu n-natura tad-dispożizzjonijiet taħt ir-Regolament (UE) 2016/1011 li l-amministraturi tal-parametri referenzjarji sinifikanti jkunu jistgħu jagħżlu li ma japplikawx. L-amministraturi ta' parametri referenzjarji sinifikanti jistgħu jagħżlu li ma japplikawx ċerti dispożizzjonijiet li jeħtieġu li dawn jistabbilixxu miżuri organizzattivi biex inaqqsu r-riskju ta' kunflitti ta' interess li jirriżultaw mill-involviment tal-impjegati tagħhom fil-forniment ta' parametru referenzjarju. Meta jqisu l-kriterji speċifikati fil-punti (a), (c) u (i) tal-Artikolu 25(3) ta' dak ir-Regolament, għalhekk, jenħtieġ li l-awtoritajiet kompetenti iqisu wkoll jekk mezzi oħra adegwati jkunux fis-seħħ biex jipproteġu l-integrità tal-parametru referenzjarju, minflok il-miżuri organizzattivi li huma meħtieġa minn dawk id-dispożizzjonijiet. |
(3) |
Meta jqisu l-kriterji speċifikati fl-Artikolu 25(3) tar-Regolament (UE) 2016/1011, l-awtoritajiet kompetenti għandhom jikkunsidraw ukoll l-impatt tal-parametru referenzjarju fuq suq speċifiku wieħed jew aktar, l-ekonomija b'mod aktar ġenerali u l-importanza tal-parametru referenzjarju biex tiġi żgurata l-istabbiltà finanzjarja. Għal dan il-għan, jenħtieġ li l-awtoritajiet kompetenti jużaw l-informazzjoni li tinsab fid-dominju pubbliku jew li tkun tpoġġiet għad-dispożizzjoni tagħhom permezz ta' żvelar mill-amministratur jew b'xi mod ieħor. |
(4) |
Meta jqisu l-kriterju speċifikat fil-punt (f) tal-Artikolu 25(3) tar-Regolament (UE) 2016/1011, jenħtieġ li l-awtoritajiet kompetenti jikkunsidraw ukoll jekk l-amministratur għandux mezzi tekniċi alternattivi adegwati u mekkaniżmi ta' kontroll biex iżomm il-kontinwità tal-forniment tal-parametru referenzjarju u s-saħħa tiegħu, b'kont meħud tan-natura tad-dispożizzjonijiet li l-amministratur jagħżel li ma japplikax. |
(5) |
Jenħtieġ li l-amministraturi jingħataw żmien biżżejjed biex jippreparaw l-applikazzjonijiet u biex jiżguraw konformità mar-rekwiżiti ta' dan ir-Regolament. Jenħtieġ li dan ir-Regolament għalhekk jibda japplika xahrejn wara li jidħol fis-seħħ. |
(6) |
Dan ir-Regolament huwa bbażat fuq l-abbozz tal-istandards tekniċi regolatorji ppreżentat mill-Awtorità Ewropea tat-Titoli u s-Swieq (ESMA) lill-Kummissjoni. |
(7) |
L-ESMA għamlet konsultazzjonijiet pubbliċi miftuħa dwar l-abbozz tal-istandards tekniċi regolatorji li fuqhom huwa bbażat dan ir-Regolament, analizzat il-kostijiet u l-benefiċċji potenzjali relatati u talbet l-opinjoni tal-Grupp tal-Partijiet Interessati tat-Titoli u s-Swieq stabbilit bl-Artikolu 37 tar-Regolament (UE) Nru 1095/2010 tal-Parlament Ewropew u tal-Kunsill (2), |
ADOTTAT DAN IR-REGOLAMENT:
Artikolu 1
Il-vulnerabbiltà tal-parametri referenzjarji għall-manipulazzjoni
Il-kriterji ulterjuri li għandhom jiġu kkunsidrati mill-awtorità kompetenti skont l-Artikolu 25(3) tar-Regolament (UE) 2016/1011 meta tkun qed tqis il-vulnerabbiltà tal-parametri referenzjarji għall-manipulazzjoni għandhom jinkludu mill-inqas dan li ġej:
(a) |
jekk il-parametru referenzjarju jkunx ibbażat fuq data tat-tranżazzjonijiet; |
(b) |
jekk il-kontributuri jkunux entitajiet taħt superviżjoni; |
(c) |
jekk japplikawx miżuri li jżidu r-robustezza tad-data tal-input; |
(d) |
jekk l-istruttura organizzattiva tal-amministratur tnaqqasx l-inċentivi għall-manipulazzjoni; |
(e) |
jekk l-amministratur ikollux interess finanzjarju fi strumenti finanzjarji, kuntratti finanzjarji jew fondi ta' investiment li jirreferenzjaw il-parametru referenzjarju; |
(f) |
jekk hemmx każijiet ippruvati ta' manipulazzjoni tal-istess parametru referenzjarju jew parametru referenzjarju b'metodoloġija simili fornut minn amministratur ta' daqs u struttura organizzattiva simili. |
Artikolu 2
Natura tad-data tal-input
Il-kriterji ulterjuri li għandhom jiġu kkunsidrati mill-awtorità kompetenti skont l-Artikolu 25(3) tar-Regolament (UE) 2016/1011meta tkun qed titqies in-natura tad-data tal-input għandhom tal-inqas jinkludu dan li ġej:
(a) |
f'każijiet fejn id-data tal-input hija data dwar it-tranżazzjonijiet, jekk l-amministratur huwiex parteċipant fis-suq jew fir-realtà ekonomika li l-parametru referenzjarju huwa maħsub biex ikejjel; |
(b) |
f'każijiet id-data tal-input tiġi pprovduta minn kontributuri, jekk il-kontributuri għandhomx interess finanzjarju fi strumenti finanzjarji jew f'kuntratti finanzjarji li jirreferenzjaw il-parametru referenzjarju jew jistgħux jagħmlu qligħ mill-prestazzjoni ta' fond ta' investiment li huwa mkejjel mill-parametru referenzjarju; |
(c) |
f'każijiet meta d-data tal-input tkun ġejja minn boroż jew sistemi ta' negozjar li jinsabu f'pajjiż terz, jekk japplikax qafas regolatorju u superviżorju għal dawk il-boroż jew sistemi ta' negozjar li jżomm l-integrità tad-data tal-input; |
(d) |
f'każijiet meta d-data tal-input tikkonsisti fi kwotazzjonijiet, jekk il-kwotazzjonijiet humiex impenjati jew indikattivi u jekk japplikawx mekkaniżmi ta' kontroll adegwati għalihom. |
Artikolu 3
Livell ta' kunflitti ta' interess
Il-kriterji ulterjuri li għandhom jiġu kkunsidrati mill-awtorità kompetenti skont l-Artikolu 25(3) tar-Regolament (UE) 2016/1011, meta tkun qed tqis il-livell ta' kunflitti ta' interess għandhom mill-inqas jinkludu dan li ġej:
(a) |
jekk l-amministratur ikollux interess finanzjarju fi strumenti finanzjarji jew kuntratti finanzjarji li jirreferenzjaw il-parametru referenzjarju jew jistax jagħmel qligħ mill-prestazzjoni ta' fond ta' investiment li huwa mkejjel mill-parametru referenzjarju; |
(b) |
f'każijiet meta l-parametru referenzjarju jkun ibbażat fuq kontribuzzjonijiet ta' data tal-input, jekk ir-relazzjoni tal-amministratur mal-kontributuri hijiex irregolata minn mekkaniżmi ta' kontroll adegwati; |
(c) |
jekk l-amministratur ikollux kontrolli jew miżuri oħra fis-seħħ li jtaffu l-kunflitti potenzjali ta' interess effettivament. |
Artikolu 4
Il-grad ta' diskrezzjoni tal-amministratur
Aktar kriterji li għandhom jiġu kkunsidrati mill-awtorità kompetenti skont l-Artikolu 25(3) tar-Regolament (UE) 2016/1011meta tkun qed tqis il-grad ta' diskrezzjoni tal-amministratur għandhom jinkludu mill-inqas dan li ġej:
(a) |
f'każijiet fejn il-metodoloġija tal-parametru referenzjarju tippermetti għal ġudizzju espert mill-amministratur, jekk l-użu tal-ġudizzju jew l-eżerċizzju tad-diskrezzjoni huwiex trasparenti biżżejjed; |
(b) |
f'każijiet meta l-parametru referenzjarju jkun ibbażat fuq stimi, l-effettività tal-miżuri ta' kontroll intern li l-amministratur għandu fis-seħħ. |
Artikolu 5
L-impatt tal-parametru referenzjarju fuq is-swieq
Aktar kriterji li għandhom jiġu kkunsidrati mill-awtorità kompetenti skont l-Artikolu 25(3) tar-Regolament (UE) 2016/1011 meta tkun qed tqis l-impatt tal-parametru referenzjarju fuq is-swieq għandhom jinkludu mill-inqas dan li ġej:
(a) |
f'każijiet fejn il-parametru referenzjarju għandu rilevanza partikolari għal suq jew swieq speċifiċi, jekk in-nuqqas ta' affidabbiltà tal-parametru referenzjarju jkollhiex effett ta' tfixkil fuq it-tħaddim ta' dak is-suq jew dawk is-swieq u jekk hemmx sostituti adegwati għal dak il-parametru referenzjarju; |
(b) |
f'każijiet meta l-parametru referenzjarju jikkwalifika bħala parametru referenzjarju sinifikanti bis-saħħa tal-punt (b) tal-Artikolu 24(1) tar-Regolament (UE) 2016/1011, u meta l-informazzjoni tkun magħrufa mill-awtorità kompetenti, kwalunkwe relazzjoni kwantitattiva rilevanti ta' strumenti finanzjarji, kuntratti finanzjarji jew fondi ta' investiment li jirreferenzjaw il-parametru referenzjarju għall-valur totali tal-istrumenti rispettivi fi Stat Membru. |
Artikolu 6
In-natura, l-iskala u l-kumplessità tal-forniment tal-parametru referenzjarju
Aktar kriterji li għandhom jiġu kkunsidrati mill-awtorità kompetenti skont l-Artikolu 25(3) tar-Regolament (UE) 2016/1011, b'kont meħud tan-natura, l-iskala u l-kumplessità tal-forniment tal-parametru referenzjarju għandhom jinkludu tal-anqas dan li ġej:
(a) |
il-grad sa fejn id-data tal-input hija bbażata fuq kontribuzzjonijiet, jekk id-data tal-input hijiex data tat-tranżazzjonijiet u kif dan il-livell huwa rifless fil-mekkaniżmi ta' kontroll li l-amministratur ikollu fis-seħħ; |
(b) |
l-ammont ta' data tal-input li tiġi pproċessata u l-għadd ta' sorsi ta' data; |
(c) |
jekk l-amministratur ikollux biżżejjed mezzi tekniċi sabiex jipproċessa d-data tal-input kontinwament u b'mod robust; |
(d) |
jekk il-metodoloġija tagħtix lok għal riskji operazzjonali fl-ipproċessar tad-data tal-input; |
(e) |
il-punt sa fejn l-amministratur jiddependi fuq il-kontributuri għad-determinazzjoni tal-parametru referenzjarju. |
Artikolu 7
L-importanza tal-parametru referenzjarju għall-istabbiltà finanzjarja
Il-kriterji ulterjuri li għandhom jiġu kkunsidrati mill-awtorità kompetenti skont l-Artikolu 25(3) tar-Regolament (UE) 2016/1011meta tqis l-importanza tal-parametru referenzjarju għall-istabbiltà finanzjarja għandhom jinkludu mill-inqas valutazzjoni tar-relazzjoni bejn il-valur totali tal-istrumenti finanzjarji, tal-kuntratti finanzjarji u tal-fondi ta' investiment li jirreferenzjaw il-parametru referenzjarju u l-valur tal-assi totali tas-settur finanzjarju u tas-settur bankarju fi Stat Membru, fejn dik l-informazzjoni tkun magħrufa mill-awtorità kompetenti.
Artikolu 8
Il-valur ta' strumenti finanzjarji, kuntratti finanzjarji u fondi ta' investiment li jirreferenzjaw il-parametru referenzjarju
Il-kriterji ulterjuri li għandhom jiġu kkunsidrati mill-awtorità kompetenti skont l-Artikolu 25(3) tar-Regolament (UE) 2016/1011 meta tkun qed il-valur ta' strumenti finanzjarji, ta' kuntratti finanzjarji jew ta' fondi ta' investiment li jirreferenzjaw il-parametru referenzjarji għandhom jinkludu mill-inqas dan li ġej:
(a) |
il-valur totali tal-istrumenti finanzjarji, tal-kuntratti finanzjarji u tal-fondi ta' investiment li jirreferenzjaw il-parametru referenzjarju fuq il-bażi tal-firxiet kollha ta' maturitajiet jew perjodi ta' maturità tal-parametru referenzjarju, meta dawn ikunu magħrufa mill-awtorità kompetenti; |
(b) |
jekk l-użu ta' parametru referenzjarju huwiex ikkonċentrat f'kategoriji individwali ta' strument finanzjarju, kuntratt finanzjarju jew fond ta' investiment; |
(c) |
f'każijiet meta l-parametru referenzjarju jkun parametru referenzjarju sinifikanti skont il-punt (a) tal-Artikolu 24(1) tar-Regolament (UE) 2016/1011, u fejn ikun magħruf mill-awtorità kompetenti, kemm hu qrib il-valur totali tal-istrumenti finanzjarji, tal-kuntratti finanzjarji u tal-fondi ta' investiment li jirreferenzjaw il-parametru referenzjarji għal-livelli limitu msemmija fl-Artikolu 20(1)(a) u (c) (i) ta' dak ir-Regolament. |
Artikolu 9
Id-daqs, il-forma ta' organizzazzjoni jew l-istruttura tal-amministratur
Il-kriterji ulterjuri li għandhom jiġu kkunsidrati mill-awtorità kompetenti skont l-Artikolu 25(3) tar-Regolament (UE) 2016/1011meta tkun qed tqis id-daqs, il-forma ta' organizzazzjoni jew l-istruttura tal-amministratur għandhom jinkludu mill-inqas dan li ġej:
(a) |
f'każijiet fejn il-forniment ta' parametri referenzjarji mhuwiex l-attività kummerċjali prinċipali tal-amministratur, jekk il-forniment ta' parametru referenzjarju huwiex separat mil-lat organizzattiv jew jekk mezzi oħra xierqa humiex fis-seħħ biex jiġu evitati kunflitti ta' interess; |
(b) |
meta amministratur ikun parti minn grupp u entità waħda jew aktar fi ħdan il-grupp ikunu utenti reali jew potenzjali tal-parametru referenzjarju, jekk l-amministratur ikunx qed jaġixxi b'mod indipendenti u jekk l-amministratur ikollux mezzi oħra xierqa biex jiġu evitati l-kunflitti ta' interess. |
Artikolu 10
Dħul fis-seħħ
Dan ir-Regolament għandu jidħol fis-seħħ fl-għoxrin jum wara dak tal-pubblikazzjoni tiegħu f'Il-Ġurnal Uffiċjali tal-Unjoni Ewropea.
Għandu japplika mill-25 ta' Jannar 2019.
Dan ir-Regolament għandu jorbot fl-intier tiegħu u japplika direttament fl-Istati Membri kollha.
Magħmul fi Brussell, it-13 ta' Lulju 2018.
Għall-Kummissjoni
Il-President
Jean-Claude JUNCKER
(1) ĠU L 171, 29.6.2016, p. 1.
(2) Ir-Regolament (UE) Nru 1095/2010 tal-Parlament Ewropew u tal-Kunsill tal-24 ta' Novembru 2010 li jistabbilixxi Awtorità Superviżorja Ewropea (Awtorità Ewropea tat-Titoli u s-Swieq) u li jemenda d-Deċiżjoni Nru 716/2009/KE u jħassar id-Deċiżjoni tal-Kummissjoni 2009/77/KE (ĠU L 331, 15.12.2010, p. 84).