15.7.2017   

MT

Il-Ġurnal Uffiċjali tal-Unjoni Ewropea

L 184/1

(1)

L-Anness II tar-Regolament (KE) Nru 1333/2008 jistabbilixxi lista tal-Unjoni ta' addittivi tal-ikel approvati biex jintużaw fl-ikel u l-kundizzjonijiet tal-użu tagħhom.

(2)

Il-lista tal-Unjoni tal-addittivi tal-ikel tista' tiġi aġġornata skont il-proċedura komuni msemmija fl-Artikolu 3(1) tar-Regolament (KE) Nru 1331/2008 tal-Parlament Ewropew u tal-Kunsill (2), fuq inizjattiva tal-Kummissjoni jew wara li ssir applikazzjoni.

(3)

Fil-15 ta' Ottubru 2015 ġiet ippreżentata applikazzjoni għall-awtorizzazzjoni tal-użu tal-karbonat tal-potassju (E 501) fuq frott u ħxejjex imqaxxra, imqatta' u mqatta' bċejjeċ bċejjeċ, u din tqiegħdet għad-dispożizzjoni tal-Istati Membri skont l-Artikolu 4 tar-Regolament (KE) Nru 1331/2008.

(4)

Attivitajiet enzimatiċi waqt il-preparazzjoni tal-frott u l-ħxejjex friski mqatta' jistgħu jwasslu għal telf fil-kwalità tal-prodotti, bħall-fatt li dawn isiru kannella u li jitilfu l-istruttura tagħhom, u għal ħela tal-ikel. L-aċidu askorbiku (E 300) jista' jintuża biex jiġi evitat li jsiru kannella. Madankollu, l-aċidu askorbiku għandu t-tendenza li jkisser it-tessut taċ-ċelloli, li jwassal biex il-frott u l-ħxejjex jirtabu u jitilfu l-kulur tagħhom wara ftit jiem. L-użu tal-karbonat tal-potassju (E 501) jippermetti protezzjoni iktar effiċjenti biex dawn ma jsirux kannella, minħabba li jaħdem bħala stabbilizzatur u regolatur tal-aċidità u jnaqqas il-ħsara fit-tessut ikkawżat mill-aċidu askorbiku.

(5)

Il-Kumitat Xjentifiku dwar l-Ikel stabbilixxa livell tal-ADI (id-Doża Aċċettabbli ta' Kuljum) għall-grupp bħala “mhux speċifikat” għall-karbonati (3), li jimplika li dawn ma jippreżentawx periklu għas-saħħa meta jintużaw fil-livelli meħtieġa biex jintlaħaq l-effett teknoloġiku mixtieq.

(6)

Skont l-Artikolu 3(2) tar-Regolament (KE) Nru 1331/2008, il-Kummissjoni għandha tfittex l-opinjoni tal-Awtorità Ewropea dwar is-Sigurtà fl-Ikel (“l-Awtorità”) sabiex taġġorna l-lista tal-Unjoni tal-addittivi tal-ikel stipulata fl-Anness II tar-Regolament (KE) Nru 1333/2008, ħlief meta l-aġġornament inkwistjoni ma jkunx mistenni jħalli effett fuq is-saħħa tal-bniedem. Peress li l-awtorizzazzjoni tal-użu tal-karbonat tal-potassju (E501) bħala stabbilizzatur u regolatur tal-aċidità fuq il-frott u l-ħxejjex imqaxxra, imqatta' u mqatta' bċejjeċ bċejjeċ tikkostitwixxi aġġornament ta' dik il-lista li mhux mistenni jħalli effett fuq is-saħħa tal-bniedem, l-opinjoni tal-Awtorità mhix meħtieġa.

(7)

Għaldaqstant, huwa xieraq li jiġi awtorizzat l-użu fi quantum satis tal-karbonat tal-potassju (E 501) bħala stabbilizzatur u regolatur tal-aċidità fil-kategorija tal-ikel 04.1.2 “Frott u ħxejjex imqaxxra, imqatta' u mqatta' bċejjeċ bċejjeċ” fl-Anness II tar-Regolament (KE) Nru 1333/2008. Sabiex jiġi żgurat li l-konsumatur ikun infurmat b'dan it-trattament, l-użu tal-karbonat tal-potassju (E 501) għandu jkun limitat għall-frott u l-ħxejjex ippakkjati minn qabel, refriġerati u mhux ipproċessati, li jkunu lesti għall-konsum u għall-patata mqaxxra, ippakkjata minn qabel u mhux ipproċessata.

(8)

Għaldaqstant, jenħtieġ li l-Anness II tar-Regolament (KE) Nru 1333/2008 jiġi emendat skont dan.

(9)

Il-miżuri previsti f'dan ir-Regolament huma skont l-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,