EUR-Lex Access to European Union law

Back to EUR-Lex homepage

This document is an excerpt from the EUR-Lex website

Document 32017D1532

Deċiżjoni ta' Implimentazzjoni tal-Kummissjoni (UE) 2017/1532 tas-7 ta' Settembru 2017 li tindirizza l-mistoqsijiet dwar il-valutazzjoni komparattiva tar-rodentiċidi antikoagulanti skont l-Artikolu 23(5) tar-Regolament (UE) Nru 528/2012 tal-Parlament Ewropew u tal-Kunsill (Test b'rilevanza għaż-ŻEE. )

C/2017/6027

OJ L 232, 8.9.2017, p. 11–16 (BG, ES, CS, DA, DE, ET, EL, EN, FR, HR, IT, LV, LT, HU, MT, NL, PL, PT, RO, SK, SL, FI, SV)

Legal status of the document In force

ELI: http://data.europa.eu/eli/dec_impl/2017/1532/oj

8.9.2017   

MT

Il-Ġurnal Uffiċjali tal-Unjoni Ewropea

L 232/11


DEĊIŻJONI TA' IMPLIMENTAZZJONI TAL-KUMMISSJONI (UE) 2017/1532

tas-7 ta' Settembru 2017

li tindirizza l-mistoqsijiet dwar il-valutazzjoni komparattiva tar-rodentiċidi antikoagulanti skont l-Artikolu 23(5) tar-Regolament (UE) Nru 528/2012 tal-Parlament Ewropew u tal-Kunsill

(Test b'rilevanza għaż-ŻEE)

IL-KUMMISSJONI EWROPEA,

Wara li kkunsidrat it-Trattat dwar il-Funzjonament tal-Unjoni Ewropea,

Wara li kkunsidrat ir-Regolament (UE) Nru 528/2012 tal-Parlament Ewropew u tal-Kunsill tat-22 ta' Mejju 2012 dwar it-tqegħid fis-suq u l-użu tal-prodotti bijoċidali (1), u b'mod partikolari l-ewwel subparagrafu tal-Artikolu 23(5) tiegħu,

Billi:

(1)

Matul is-60 laqgħa tar-rappreżentanti tal-Awtoritajiet Kompetenti tal-Istati Membri għall-implimentazzjoni tar-Regolament (UE) Nru 528/2012 li saret bejn l-20 u l-21 ta' Mejju 2015, l-Istati Membri kollha ressqu għadd ta' mistoqsijiet lill-Kummissjoni li jridu jiġu indirizzati fil-livell tal-Unjoni fil-kuntest tal-valutazzjoni komparattiva li trid titwettaq mat-tiġdid tal-prodotti bijoċidali rodentiċidi antikoagulanti (“rodentiċidi antikoagulanti”).

(2)

Il-mistoqsijiet imressqa kienu dawn li ġejjin: (a) Id-diversità kimika tas-sustanzi attivi fir-rodentiċidi awtorizzati fl-Unjoni hija adegwata biex timinimizza l-okkorrenza tar-reżistenza fl-organiżmi ta' ħsara fil-mira?; (b) Għall-użi differenti speċifikati fl-applikazzjonijiet għat-tiġdid, jeżistu prodotti bijoċidali alternattivi awtorizzati jew mezzi ta' kontroll mhux kimiċi u metodi ta' prevenzjoni?; (c) Dawn l-alternattivi għandhom riskju ġenerali ħafna aktar baxx għas-saħħa tal-bniedem, għas-saħħa tal-annimali u għall-ambjent?; (d) Dawn l-alternattivi huma effettivi biżżejjed?; (e) Dawn l-alternattivi ma għandhom l-ebda żvantaġġ prattiku u ekonomiku sinifikanti?

(3)

It-tweġibiet għal dawn il-mistoqsijiet huma rilevanti għal kull awtorità kompetenti riċeventi sabiex tiddeċiedi jekk ġewx issodisfati l-kriterji tal-Artikolu 23(3)(a) u (b) tar-Regolament (UE) Nru 528/2012, u b'konsegwenza ta' dan, jekk għandhiex tipprojbixxi jew tillimita t-tqegħid fis-suq jew l-użu tar-rodentiċidi antikoagulanti.

(4)

Skont l-Artikolu 75(1)(g) tar-Regolament (UE) Nru 528/2012, il-Kummissjoni talbet lill-Aġenzija Ewropea għas-Sustanzi Kimiċi (“l-Aġenzija”) biex tagħti opinjoni li tindirizza l-mistoqsijiet għall-użi differenti li jistgħu jkunu awtorizzati fir-rodentiċidi antikoagulanti skont il-kundizzjonijiet u l-miżuri ta' mitigazzjoni tar-riskju msemmija fl-opinjonijiet (2) adottati mill-Kumitat dwar il-Prodotti Bijoċidali tal-Aġenzija waqt is-16-il laqgħa għat-tiġdid tal-approvazzjonijiet tas-sustanza attiva.

(5)

Fit-2 ta' Marzu 2017, il-Kumitat dwar il-Prodotti Bijoċidali tal-Aġenzija adotta l-opinjoni tal-Aġenzija (3).

(6)

Skont dik l-opinjoni, fin-nuqqas ta' rodentiċidi antikoagulanti, l-użu ta' prodotti bijoċidali rodentiċidi li fihom sustanzi attivi oħra, iwassal għal diversità kimika inadegwata biex tiġi minimizzata l-okkorrenza tar-reżistenza fl-organiżmi ta' ħsara fil-mira. Dawn il-prodotti wrew ukoll xi żvantaġġi prattiċi u ekonomiċi sinifikanti għall-użi rilevanti.

(7)

L-opinjoni qieset ukoll għadd ta' metodi ta' kontroll mhux kimiċi jew ta' prevenzjoni (“alternattivi mhux kimiċi”), li jistgħu jipprovdu effikaċja biżżejjed, f'ċerti ċirkostanzi, kemm jekk jintużaw waħedhom kif ukoll jekk ikunu kkombinati. Madankollu, m'hemmx biżżejjed evidenza xjentifika li turi li dawk l-alternattivi mhux kimiċi huma effettivi biżżejjed skont il-kriterji stabbiliti fil-gwida maqbula tal-Unjoni (4) bil-għan li tipprojbixxi jew tillimita l-użi awtorizzati tar-rodenċtiċi antikoagulanti.

(8)

Minkejja dan, il-Kummissjoni tinnota li r-rakkomandazzjoni fl-opinjoni li l-użu tal-alternattivi mhux kimiċi hija parti fundamentali tal-ġestjoni tal-organiżmu ta' ħsara għall-kontroll tar-rodituri u tal-użu xieraq tar-rodentiċidi antikoagulanti skont l-Artikolu 17(5) tar-Regolament (UE) Nru 528/2012.

(9)

Il-miżuri previsti f'din id-Deċiżjoni huma skont l-opinjoni tal-Kumitat Permanenti dwar il-Prodotti Bijoċidali,

ADOTTAT DIN ID-DEĊIŻJONI:

Artikolu 1

Għall-finijiet tal-Artikolu 23(3) tar-Regolament (UE) Nru 528/2012, l-awtoritajiet kompetenti riċeventi tal-Istati Membri għandhom iqisu l-informazzjoni li tindirizza dawn il-mistoqsijiet indirizzati lill-Kummissjoni dwar il-valutazzjoni komparattiva tal-prodotti bijoċidali rodentiċidi antikoagulanti mogħtija fl-Anness.

Artikolu 2

Din id-Deċiżjoni għandha tidħol fis-seħħ fl-għoxrin jum wara dak tal-pubblikazzjoni tagħha f'Il-Ġurnal Uffiċjali tal-Unjoni Ewropea.

Magħmul fi Brussell, is-7 ta' Settembru 2017.

Għall-Kummissjoni

Il-President

Jean-Claude JUNCKER


(1)  ĠU L 167, 27.6.2012, p. 1.

(2)  https://echa.europa.eu/mt/regulations/biocidal-products-regulation/approval-of-active-substances/bpc-opinions-on-active-substance-approval

(3)  Opinjoni ECHA/BPC/145/2017, disponibbli fuq is-sit web: https://echa.europa.eu/documents/10162/21680461/bpc_opinion_comparative-assessment_ar_en.pdf/bf81f0a5-3e95-6b7d-d601-37db9bb16fa5

(4)  Nota ta' gwida teknika dwar il-Valutazzjoni komparattiva tal-prodotti bijoċidali, disponibbli fuq is-sit web: https://circabc.europa.eu/w/browse/d309607f-f75b-46e7-acc4-1653cadcaf7e


ANNESS

Informazzjoni li tindirizza l-mistoqsijiet magħmula mill-Istati Membri lill-Kummissjoni dwar il-valutazzjoni komparattiva tal-prodotti bijoċidali rodentiċidi antikoagulanti.

Għall-finijiet ta' dawn il-mistoqsijiet, l-użi speċifikati msemmija fl-Artikolu 23(3)(a) tar-Regolament (UE) Nru 528/2012 huma elenkati fit-Tabella 1.

Tabella 1

L-użi speċifikati għar-rodentiċidi antikoagulanti

Numru tal-użu

Organiżmi fil-mira

Qasam tal-użu

Kategoriji tal-utenti

Metodu ta' applikazzjoni

#1

Mus musculus (ġrieden tal-imramma)

(Jistgħu jiżdiedu organiżmi oħra fil-mira)

Intern

Pubbliku inġenerali

Lixka lesta biex tintuża fi stazzjonijiet tal-lixkar issiġillati sew.

#2

Rattus norvegicus (far tal-kampanja)

Rattus rattus (far iswed)

Intern

Pubbliku inġenerali

Lixka lesta biex tintuża fi stazzjonijiet tal-lixkar issiġillati sew.

#3

Rattus norvegicus (far tal-kampanja)

Rattus rattus (far iswed)

(Organiżmi oħra fil-mira — ħlief ġrieden tal-imramma — jistgħu jiżdiedu (eż. firien (gerriema))

Estern, madwar il-bini

Pubbliku inġenerali

Lixka lesta biex tintuża fi stazzjonijiet tal-lixkar issiġillati sew.

#4

Mus musculus (ġrieden tal-imramma)

(Jistgħu jiżdiedu organiżmi oħra fil-mira)

Intern

Professjonisti

Lixka lesta biex tintuża fi stazzjonijiet tal-lixkar issiġillati sew.

#5

Rattus norvegicus (far tal-kampanja)

Rattus rattus (far iswed)

Intern

Professjonisti

Lixka lesta biex tintuża fi stazzjonijiet tal-lixkar issiġillati sew.

#6

Mus musculus (ġrieden tal-imramma)

Rattus norvegicus (far tal-kampanja)

Rattus rattus (far iswed)

Estern, madwar il-bini

Professjonisti

Lixka lesta biex tintuża fi stazzjonijiet tal-lixkar issiġillati sew.

#7

Mus musculus (ġrieden tal-imramma)

Rattus norvegicus (far tal-kampanja)

Rattus rattus (far iswed)

Intern

Professjonisti mħarrġa

Lixka lesta biex tintuża jew formulazzjonijiet ta' kuntatt lesti biex jintużaw

#8

Mus musculus (ġrieden tal-imramma)

Rattus norvegicus (far tal-kampanja)

Rattus rattus (far iswed)

Estern, madwar il-bini

Professjonisti mħarrġa

Lixka lesta biex tintuża

#9

Rattus norvegicus (far tal-kampanja)

Rattus rattus (far iswed)

Estern, fil-mifuħ

Estern, fil-miżbliet

Professjonisti mħarrġa

Lixka lesta biex tintuża

#10

Rattus norvegicus (far tal-kampanja)

Fid-drenaġġ

Professjonisti mħarrġa

Lixka lesta biex tintuża

Mistoqsija (a): Id-diversità kimika tas-sustanzi attivi fir-rodentiċidi awtorizzati fl-UE hija adegwata biex timinimizza l-okkorrenza tar-reżistenza fl-organiżmi ta' ħsara fil-mira?

Hemm ħames sustanzi attivi approvati fil-prodotti bijoċidali għall-prodotti tat-tip 14 b'mod ta' azzjoni differenti minn dak tar-rodentiċidi antikoagulanti (l-alfakloralożju, il-fosfidu tal-aluminju li jirrilaxxa l-fosfina, id-diossidu tal-karbonju, ċjanur tal-idroġenu u t-trab taċ-ċifċiegħa tal-qamħirrum).

Skont l-opinjoni, ir-rekwiżit minimu fil-gwida maqbula tal-Unjoni li jkun hemm tliet alternattivi differenti b'modi differenti ta' azzjoni ma jintlaħaqx għal kwalunkwe wieħed mill-użi speċifikati elenkati fit-Tabella 1. Għalhekk, fin-nuqqas tar-rodentiċidi antikoagulanti, il-kundizzjoni fl-Artikolu 23(3)(b) tar-Regolament (UE) Nru 528/2012 li d-diversità kimika tas-sustanzi attivi hija adegwata biex biex timinimizza l-okkorrenza tar-reżistenza fl-organiżmi ta' ħsara fil-mira ma ġietx issodisfata.

Mistoqsija (b): Għall-użi differenti speċifikati fl-applikazzjonijiet għat-tiġdid, jeżistu prodotti bijoċidali alternattivi awtorizzati jew mezzi ta' kontroll mhux kimiċi u metodi ta' prevenzjoni?

It-tabelli 2 u 3 jagħtu ħarsa ġenerali tal-alternattivi meqjusa fl-opinjoni sabiex tiġi indirizzata din il-mistoqsija.

Tabella 2

Ħarsa ġenerali tal-prodotti bijoċidali alternattivi awtorizzati għall-użi speċifikati tar-rodentiċidi antikoagulanti

 

Numru tal-użu kif deskritt fit-Tabella 1

Sustanza attiva fil-prodotti bijoċidali alternattivi

Tip ta' applikazzjoni

#1

#2

#3

#4

#5

#6

#7

#8

#9

#10

Alfakloralożju

Lixka

iva

 

 

iva

 

 

Għall-ġrieden biss

 

 

 

Fosfid tal-aluminju li jirrilaxxa l-fosfina

Fumigant

 

 

 

 

 

 

 

Għar-R. norvegicus biss

Għar-R. norvegicus biss

 

Diossidu tal-karbonju

Kannestru għal apparat tal-qbid

 

 

 

 

 

 

Għall-ġrieden biss

 

 

 

Il-prodotti bijoċidali alternattivi awtorizzati ma jkoprux l-użi kollha speċifikati għar-rodentiċidi antikoagulanti (ara t-Tabella 2). Għal uħud mill-użi (numru tal-użu #2, #3, #5, #6 u #10), mhuwa disponibbli l-ebda prodott bijoċidali alternattiv awtorizzat. Għall-użu #7, hemm prodotti bijoċidali alternattivi awtorizzati għall-ġrieden biss, u għall-użi #8 u #9 hemm prodotti bijoċidali alternattivi awtorizzati għall-firien biss (R. norvegicus).

Tabella 3

Ħarsa ġenerali tal-alternattivi mhux kimiċi identifikati għall-użi speċifikati tar-rodentiċidi antikoagulanti

Alternattiv mhux kimiku rrappurtat

Mod ta' azzjoni

Użi potenzjalment koperti

Trattamenti kurattiv

Nases tar-rodituri elettriċi

Nases b'kurrent elettriku li joqtol ir-rodituri li jidħlu fin-nassa.

1, 2, 3, 4, 5, 6, 7, 8, 9, 10

Pannelli bil-kolla

Ir-rodituri jeħlu bil-kolla, iżda l-qtil irid isir separatament.

1, 4, 6, 7, 8

Nases mekkaniċi (nases bil-molol jew nases break-back)

Nases b'piż mekkaniku li joqtlu r-roditur malli jidħol fihom.

1, 2, 3, 4, 5, 6, 7, 8, 9, 10

Sparar

Sparar tar-rodituri.

6, 8, 9

Trattamenti preventivi

Modifikazzjoni tal-ħabitat

Prevenzjoni mill-istabbiliment ta' popolazzjonijiet tar-rodituri billi tiġi limitata l-provvista ta' ikel/ilma/kenn

1,2, 3, 4, 5, 6, 7, 8, 9

Protezzjoni kontra r-rodituri

Jiġi evitat l-aċċess tar-rodituri għall-binijiet billi jiġu imblukkati r-rotot ta' dħul.

1, 2, 4, 5, 7

Ultra-sound

Ir-rodituri jitwaqqfu b'output ultrasoniku ta' 70-140 dB.

1, 2, 3, 4, 5, 6, 7, 8, 9

Mistoqsija (c) Dawn l-alternattivi għandhom riskju ġenerali ħafna aktar baxx għas-saħħa tal-bniedem, għas-saħħa tal-annimali u għall-ambjent?

Skont il-gwida maqbula tal-Unjoni, din il-mistoqsija jenħtieġ li tiġi indirizzata biss jekk l-alternattivi meqjusa jkunu effettivi biżżejjed u ma jippreżentaw l-ebda żvantaġġ ieħor sinifikanti ekonomiku jew prattiku (ara t-taqsimiet li jindirizzaw il-Mistoqsijiet (d) u (e)).

Abbażi tal-konklużjonijiet milħuqa għall-mistoqsijiet (a), (b), (d) u (e), l-opinjoni qieset li ma kienx hemm bżonn li tiġi indirizzata l-Mistoqsija (c).

Mistoqsija (d): Dawn l-alternattivi huma effettivi biżżejjed?

Il-prodotti bijoċidali awtorizzati identifikati skont il-Mistoqsija (b) jinkludu s-sustanzi attivi li ġew approvati u għalhekk jitqiesu effettivi għall-użi speċifikati. Peress li l-fatt li jkunu effettivi biżżejjed hija kriterju għall-għoti tal-awtorizzazzjoni fl-Artikolu 19(1)(b)(i) tar-Regolament (UE) Nru 528/2012, dawk il-prodotti jitqiesu li huma effettivi biżżejjed.

Fir-rigward tal-alternattivi mhux kimiċi identifikati skont il-Mistoqsija (b), skont l-opinjoni, kull alternattiva, waħedha jew flimkien ma' alternattivi oħra, tista' tipprovdi effikaċja biżżejjed f'ċerti ċirkostanzi, għalkemm forsi tkun limitata. Madankollu, m'hemmx biżżejjed evidenza xjentifika li turi li kwalunkwe waħda mill-alternattivi mhux kimiċi riveduti hija effettiva biżżejjed skont il-gwida maqbula tal-Unjoni (jiġifieri li tipprovdi livelli simili ta' protezzjoni jew ta' kontroll tal-popolazzjonijiet tar-rodituri skont il-kundizzjonijiet tal-art) biex tiċħad il-ħtieġa tar-rodentiċidi antikoagulanti għall-użi speċifikati. Peress li ma ġietx issodisfata l-kundizzjoni tal-alternattiva effettiva biżżejjed skont l-Artikolu 23(3)(a) tar-Regolament (UE) Nru 528/2012, ma saret l-ebda investigazzjoni ulterjuri għall-alternattivi mhux kimiċi identifikati.

Mistoqsija (e): Dawn l-alternattivi ma għandhom l-ebda żvantaġġ prattiku u ekonomiku sinifikanti?

Skont il-gwida maqbula tal-Unjoni, il-valutazzjoni tal-iżvantaġġi prattiċi u ekonomiċi għandha ssir ma' dawk tal-alternattivi li jissodisfaw il-kriterji ta' eliġibbiltà. Għalhekk, għall-finijiet ta' din il-mistoqsija ġew ivvalutati biss il-prodotti bijoċidali awtorizzati identifikati fit-Tabella 2.

Skont l-opinjoni, l-użu tal-fosfid tal-aluminju li jirrilaxxa l-fosfina u tad-diossidu tal-karbonju jwassal għal żvantaġġi prattiċi jew ekonomiċi sinifikanti meta mqabbla mar-rodentiċidi antikoagulanti, peress li l-kontroll tal-organiżmi fil-mira kieku jinvolvi sforzi kbar ħafna u/jew kost sproporzjonat. Għalhekk, il-kundizzjoni li ma jiġi ppreżentat l-ebda żvantaġġ ieħor sinifikanti ekonomiku jew prattiku fl-Artikolu 23(3)(a) tar-Regolament (UE) Nru 528/2012 ma ġietx issodisfata għall-prodotti bijoċidali awtorizzati msemmija hawn fuq.

Fir-rigward tal-prodotti alfakloralożju, l-effikaċja tagħhom li tiddependi mit-temperatura kieku tikkomprometti l-użu ta' din l-alternattiva f'postijiet fejn it-temperatura ma tistax tiġi kkontrollata, u b'hekk tirriżulta fi żvantaġġ prattiku għall-użu f'ambjenti sħan. Barra minn hekk, meta titqies in-nuqqas ta' diversità kimika (ara t-taqsima li tindirizza l-Mistoqsija (a)), mhuwiex rakkomandat li ssir is-sostituzzjoni jew li jiġi limitat l-użu tar-rodentiċidi antikoagulanti b'din is-sustanza biss biex tiġi mminimizzata l-okkorrenza tar-reżistenza.


Top