EUR-Lex Access to European Union law
This document is an excerpt from the EUR-Lex website
Document 32010D0393
2010/393/: Commission Decision of 14 July 2010 terminating the anti-subsidy proceeding concerning imports of certain stainless steel fasteners and parts thereof originating in India and Malaysia
2010/393/: Deċiżjoni tal-Kummissjoni tal- 14 ta’ Lulju 2010 li ttemm il-proċedura kontra s-sussidji dwar l-importazzjonijiet ta’ ċerti qfieli tal-istainless steel u partijiet minnhom li joriġinaw fl-Indja u fil-Malasja
2010/393/: Deċiżjoni tal-Kummissjoni tal- 14 ta’ Lulju 2010 li ttemm il-proċedura kontra s-sussidji dwar l-importazzjonijiet ta’ ċerti qfieli tal-istainless steel u partijiet minnhom li joriġinaw fl-Indja u fil-Malasja
OJ L 180, 15.7.2010, p. 28–29
(BG, ES, CS, DA, DE, ET, EL, EN, FR, IT, LV, LT, HU, MT, NL, PL, PT, RO, SK, SL, FI, SV)
Special edition in Croatian: Chapter 11 Volume 111 P. 305 - 306
In force
15.7.2010 |
MT |
Il-Ġurnal Uffiċjali tal-Unjoni Ewropea |
L 180/28 |
DEĊIŻJONI TAL-KUMMISSJONI
tal-14 ta’ Lulju 2010
li ttemm il-proċedura kontra s-sussidji dwar l-importazzjonijiet ta’ ċerti qfieli tal-istainless steel u partijiet minnhom li joriġinaw fl-Indja u fil-Malasja
(2010/393/UE)
IL-KUMMISSJONI EWROPEA,
Wara li kkunsidrat it-Trattat dwar il-Funzjonament tal-Unjoni Ewropea,
Wara li kkunsidrat ir-Regolament tal-Kunsill (KE) Nru 597/2009 tal-11 ta’ Ġunju 2009 dwar il-protezzjoni kontra importazzjonijiet sussidjati minn pajjiżi li mhumiex membri tal-Komunità Ewropea (1) (“ir-Regolament bażiku”) u b’mod partikolari l-Artikolu 14 tiegħu,
Wara li kkonsultat lill-Kumitat Konsultattiv,
Billi:
A. PROĊEDURA
(1) |
Fit-30 ta’ Ġunju 2009, il-Kummissjoni Ewropea (‘il-Kummissjoni’) rċeviet ilment dwar l-allegati sussidji dannużi tal-importazzjonijiet ta’ ċerti qfieli tal-istainless steel u partijiet minnhom li joriġinaw fl-Indja u fil-Malasja (il-“pajjiżi kkonċernati”). |
(2) |
L-ilment tressaq mill-Istitut Ewropew tal-Qfieli Industrijali (“EIFI”) f’isem il-produtturi li jirrappreżentaw proporzjon kbir, f’dan il-każ ta’ aktar minn 25 %, tal-produzzjoni totali tal-Unjoni ta’ ċerti qfieli tal-istainless steel skont l-Artikoli 9(1) u 10(6) tar-Regolament bażiku. |
(3) |
L-ilment kien fih evidenza prima facie tal-eżistenza ta’ sussidji u ta’ dannu materjali li rriżulta minnhom, li tqieset biżżejjed biex tkun iġġustifikata it-tnedija ta’ proċedura kontra s-sussidji. |
(4) |
Qabel it-tnedija tal-proċedura u skont l-Artikolu 10(7) tar-Regolament bażiku, il-Kummissjoni għarrfet lill-gvernijiet tal-pajjiżi kkonċernati li kienet irċeviet ilment dokumentat kif suppost li jallega li importazzjonijiet sussidjati ta’ ċerti qfieli tal-istainless steel u partijiet minnhom li joriġinaw fil-pajjiżi kkonċernati kienu qed jikkawżaw dannu materjali lill-industrija tal-Unjoni. Il-gvernijiet tal-pajjiżi kkonċernati ġew mistiedna separatament għal konsultazzjonijiet bl-għan li tiġi ċċarata s-sitwazzjoni rigward il-kontenut tal-ilment u li wieħed jasal għal soluzzjoni miftiehma b’mod reċiproku. Matul il-konsultazzjonijiet ma setgħet tintlaħaq l-ebda soluzzjoni miftiehma b’mod reċiproku. |
(5) |
Il-Kummissjoni, wara li kkonsultat lill-Kumitat Konsultattiv, permezz ta’ avviż ippubblikat f’Il-Ġurnal Uffiċjali tal-Unjoni Ewropea (2), nediet proċedura kontra s-sussidji dwar l-importazzjonijiet fl-Unjoni ta’ ċerti qfieli tal-istainless steel u partijiet minnhom li joriġinaw fil-pajjiżi kkonċernati, li bħalissa huma klassifikati fi ħdan il-kodiċi NM 7318 12 10, 7318 14 10, 7318 15 30, 7318 15 51, 7318 15 61 u 7318 15 70. |
(6) |
Fl-istess jum, il-Kummissjoni nediet proċedura antidumping dwar l-importazzjonijiet fl-Unjoni ta’ ċerti qfieli tal-istainless steel u partijiet minnhom li joriġinaw fil-pajjiżi kkonċernati (3). |
(7) |
Il-Kummissjoni bagħtet kwestjonarji lill-industrija tal-Unjoni u lil kull assoċjazzjoni magħrufa ta’ produtturi fl-Unjoni, lill-esportaturi/produtturi fil-pajjiżi kkonċernati, lil kull assoċjazzjoni ta’ esportaturi/produtturi, lill-imporaturi, lil kull assoċjazzjoni magħrufa ta’ importaturi, u lill-awtoritajiet tal-pajjiżi kkonċernati. Il-partijiet interessati ngħataw l-opportunità li jippreżentaw il-fehmiet tagħhom bil-miktub u li jitolbu smigħ fil-limitu taż-żmien stabbilit fl-avviż tat-tnedija. |
B. IRTIRAR TAL-ILMENT U TMIEM TAL-PROĊEDURA
(8) |
Permezz tal-ittra tagħha tal-1 ta’ April 2010 lill-Kummissjoni, l-EIFI irtira formalment l-ilment tiegħu. |
(9) |
Skont l-Artikolu 14(1) tar-Regolament bażiku, il-proċediment jista’ jintemm meta jiġi rtirat l-ilment, sakemm tali tmiem ma jmurx kontra l-interess tal-Unjoni. |
(10) |
Il-Kummissjoni qieset li l-proċedura attwali għandha tintemm billi l-investigazzjoni ma żvelat l-ebda fatt li juri li tali tmiem ma jkunx fl-interess tal-Unjoni. Il-partijiet interessati ġew mgħarrfa b’dan u ngħataw l-opportunità li jikkummentaw. Ma tressaq l-ebda kumment li jindika li tali tmiem ma jkunx fl-interess tal-Unjoni. |
(11) |
Għaldaqstant, il-Kummissjoni tikkonkludi li l-proċedura kontra s-sussidji dwar l-importazzjonijiet fl-Unjoni ta’ ċerti qfieli tal-istainless steel u partijiet minnhom li joriġinaw fil-pajjiżi kkonċernati għandha tintemm, |
ADOTTAT DIN ID-DEĊIŻJONI:
Artikolu 1
Il-proċedura kontra s-sussidji dwar l-importazzjonijiet ta’ ċerti qfieli tal-istainless steel u partijiet minnhom li joriġinaw fl-Indja u fil-Malasja, li bħalissa huma kklassifikati fil-kodiċi NM 7318 12 10, 7318 14 10, 7318 15 30, 7318 15 51, 7318 15 61 u 7318 15 70, b’dan qiegħda tintemm.
Artikolu 2
Din id-Deċiżjoni għandha tidħol fis-seħħ l-għada tal-jum tal-pubblikazzjoni tagħha f’Il-Ġurnal Uffiċjali tal-Unjoni Ewropea.
Magħmul fi Brussell, l-14 ta’ Lulju 2010.
Għall-Kummissjoni
Il-President
José Manuel BARROSO
(1) ĠU L 188, 18.7.2009, p. 93.
(2) ĠU C 190, 13.8.2009, p. 32.
(3) ĠU C 190, 13.8.2009, p. 27.