(1)

Skont l-evidenza mressqa wara l-adozzjoni tar-Regolament (KE) Nru 244/2009, il-limitu ffissat fit-Tabella 5 tar-Regolament fir-rigward tar-radjazzjoni ultravjola tat-tip UVC ma jistax jintlaħaq mill-bozoz tat-tungstenu-aloġenu mingħajr it-tieni għeluq (envelope) tal-bozza (speċjalment il-bozoz tal-aloġenu b’vultaġġ tal-mains b’fissaġġ tat-tip G9 u R7, kif ukoll il-bozoz tal-aloġenu b’vultaġġ baxx ħafna). Dan iwassal sabiex dawn il-bozoz ma jibqgħux jitħallew jiċċirkolaw fis-suq domestiku mill-1 ta’ Settembru 2009.

(2)

It-tneħħija tal-bozoz b’fissaġġ tat-tip G9 u R7 titqies biss fuq perjodu itwal ta’ żmien, minħabba li dawn jintużaw ħafna u bħalissa ma hemm xejn disponibbli li jista’ jieħu posthom u li jista’ jitwaħħal fil-lampi ddisinnjati għal dawn il-bozoz. Il-premessa 21 tar-Regolament (KE) Nru 244/2009 tgħid li r-rekwiżiti li jinsabu f’din il-miżura jippermettu li l-bozoz tal-aloġeni bis-sokit G9 u R7 jibqgħu jiċċirkolaw fis-suq għal perjodu limitat ta’ żmien. Ma hemmx indikazzjoni fir-Regolament tat-tul tal-perjodu ta’ żmien, madankollu ma kienx hemm il-ħsieb li dawn il-bozoz ma jibqgħux jitħallew jiċċirkolaw mill-1 ta’ Settembru 2009 minħabba r-radjazzjoni UVC, fil-każ li jirrispettaw ir-rekwiżiti l-oħrajn tar-Regolament.

(3)

L-Artikolu 15 tad-Direttiva 2005/32/KE jitlob li r-rekwiżiti tal-ekodisinn mgħandhomx jaffettwaw il-funzjonalità mill-perspettiva tal-utent, mgħandhomx jinvolvu spejjeż eċċessivi, mgħandhomx ikollhom impatt negattiv sinifikanti fuq il-kompetittività tal-industrija, u għandhom ikunu stabbiliti filwaqt li titqies il-leġiżlazzjoni rilevanti tal-Komunità.

(4)

Huwa importanti li jiġi żgurat li l-lampi li jitqiegħu fis-suq tal-UE huma sikuri għall-użu. Id-Direttiva 2006/95/KE tal-Parlament Ewropew u tal-Kunsill tat-12 ta’ Diċembru 2006 dwar l-armonizzazzjoni tal-liġijiet tal-Istati Membri li għandhom x’jaqsmu mat-tagħmir elettriku ddisinjat għall-użu fi ħdan ċerti limiti tal-voltaġġ (3) (id-Direttiva tal-Vultaġġ Baxx) tirregola r-radjazzjoni tat-tagħmir elettriku ddisinjat għall-użu b’rata ta’ vultaġġ bejn il-50 u l-1 000 V għall-kurrent alternanti u bejn il-75 u l-1 500 V għall-kurrent dirett. Il-limiti tar-radjazzjoni UV huma ffissati f’normi armonizzati relatati kemm għall-bozoz tat-tungstenu-aloġenu b’vultaġġ tal-mains kif ukoll għal dawk b’vultaġġ baxx ħafna (pereżempju 12 V u 24 V), imma mhux għall-bozoz floroxxenti kumpatti. B’mod iktar bażiku, id-Direttiva Nru 2001/95/KE tal-Parlament Ewropew u tal-Kunsill tat-3 ta’ Diċembru 2001 dwar is-sigurtà ġenerali tal-prodotti (4) jeħtieġ li l-prodotti li jitqiegħdu fis-suq huma sikuri.

(5)

Huwa meħtieġ li tkun żgurata koerenza bejn ir-Regolament (KE) Nru 244/2009 u l-leġiżlazzjoni Komunitarja li taffettwa r-radjazzjoni tal-UV tal-bozoz tad-dar li ma jitfgħux id-dawl f’direzzjoni waħda biss. Ir-Regolament (KE) Nru 244/2009 għandu għalhekk jiġi emendat skont dan.

(6)

Il-miżuri pprovduti f’dan ir-Regolament huma skont l-opinjoni tal-Kumitat stabbilit bl-Artikolu 19(1) tad-Direttiva 2005/32/KE,