32004L0011

Id-Direttiva 2004/11/EK tal-Parlament Ewropew u tal-kunsill

tal-11 ta' Frar 2004

li temenda d-Direttiva tal-Kunsill 92/24/KEE li għandha x'taqsam ma' mezzi ta' limitazzjoni ta' veloċità jew limitazzjoni simili ta' veloċità abbord sistemi ta' ċerti kategoriji ta' vetturi bil-mutur

IL-PARLAMENT EWROPEW U L-KUNSILL TA' L-UNJONI EWROPEA,

Wara li kkunsidraw it-Trattat li jistabbilixxi l-Komunità Ewropea, u b'mod partikolari l-Artikolu 95 tiegħu,

Wara li kkunsidraw l-proposta mill-Kummissjoni,

Wara li kkunsidraw l-opinjoni tal-Kumitat Ekonomiku u Soċjali Ewropew;

Huma u jaġixxu bi qbil mal-proċedura preskritta fl-Artikolu 251 tat-Trattat [1],

Billi:

(1) Miżuri għandhom jiġu adottati għall-għan li jiġi żgurat il-funzjonament bla xkiel tas-suq intern.

(2) Id-Direttiva tal-Kunsill 92/24/KEE [2] hija waħda mid-direttivi separati skond il-proċedura ta' approvazzjoni tal-Komunità imdaħħla permezz tad-Direttiva tal-Kunsill 70/156/KEE tas-6 ta' Frar 1970 dwar l-approssimazzjoni tal-liġijiet ta' l-Istati Membri li għandhom x'jaqsmu ma' l-approvazzjoni tat-tip ta' vetturi bil-mutur u l-karrijiet tagħhom [3]. Id-dispożizzjonijiet u d-definizzjonijiet preskritti fid-Direttiva 70/156/KEE li jirrigwardjaw vetturi, sistemi ta' vetturi, komponenti u unitajiet tekniċi separati għandhom għalhekk japplikaw għal din id-Direttiva.

(3) Mezzi ta' limitazzjoni ta' veloċità għal vetturi użati għall-ġarr ta' passiġġieri u għall-ġarr ta' merkanzija li għandhom piż massimu li jaqbeż l-10 tunnellati mettriċi urew influwenza pożittiva fuq is-sigurta tat-triq u naqqsu s-severita ta' feriti fil-każ ta' inċidenti, filwaqt li naqqsu wkoll tniġġiż ta' l-arja u konsun tal-karburant.

(4) Id-Direttiva tal-Kunsill 92/6/KEE ta' l-10 ta' Frar 1992 dwar l-istallazzjoni u l-użu ta' mezzi ta' limitazzjoni ta' veloċità għal ċerti kategoriji ta' vetturi bil-mutur fil-Komunità [4] ġiet estiża għal vetturi bil-mutur iżgħar ta' kategoriji M2 u N2. Huwa għalhekk meħtieġ li jiġi emendat l-iskop tad-Direttiva 92/24/KEE li għandha x'taqsam mal-ħtiġijiet tal-kostruzzjoni ta' limitaturi ta' veloċità kif xieraq biex jiġu koperti l-istess kategoriji ta' vetturi bil-mutur.

(5) Id-Deċiżjoni 92/24/KEE għandha għalhekk tiġi emendata kif xieraq.

ADOTTAW DIN ID-DIRETTIVA:

Artikolu 1

Id-Direttiva 92/24/KEE hija hawnhekk emendata kif ġej:

1. L-Artikolu 1 għandu jiġi mibdul b'dan li ġej:

Għall-għanijiet ta' din id-Direttiva:

- "vettura"; għandha tfisser kull vettura bil-mutur ta' kategoriji M2, M3, N2 jew N3, kif definit fl-Anness II mad-Direttiva 70/156/EEC, maħsuba għall-użu fit-triq, li għandha mill-inqas erba' roti u disinn ta' veloċità massima li taqbeż il-25 km/h,

- "mezz ta' limitazzjoni ta' veloċità"; għandu jfisser strument li jillimita l-veloċità maħsub għall-użu fuq vettura fl-iskop ta' din id-Direttiva li għaliha tista' tingħata approvazzjoni tat-tip ta' unit tekniku separat fit-tifsira tad-Direttiva 70/156/KEE. Sistemi ta' limitazzjoni ta' veloċità massima ta' vetturi mibnija ġewwa fihom, inkoporati fid-disinn ta' vetturi mill-outset, għandhom jilħqu l-istess ħtiġijiet bħal mezzi ta' limitazzjoni ta' veloċità.";

2. l-ewwel sentenza tat-tielet sottoparagrafu ta' l-oġġett numru 1.1 ta' l-Anness I għandha tiġi mibdula b'dan li ġej:

"L-għan ta' din id-Direttiva huwa li tiġi limitata sa valur speċifikat il-veloċità massima fit-triq ta' vetturi li jġorru l-merkanzija ta' kategoriji N2 u N3 u ta' vetturi li jġorru l-passiġġieri ta' kategoriji M2 u M3."

Artikolu 2

1. B'effett mis-sbatax ta' Novembru 2004, l-Istati Membri ma jistgħux, għal raġunijiet li għandhom x'jaqsmu ma mezzi ta' limitazzjoni ta' veloċità jew sistemi simili:

- jirrifjutaw li jagħtu approvazzjoni tat-tip tal-KE jew approvazzjoni tat-tip nazzjonali ta' vettura, mezz ta' limitazzjoni ta' veloċità jew sistema abbord ta' limitazzjoni ta' veloċità,

- jipprojbixxu r-reġistrazzjoni, il-bejgħ jew id-dħul fis-servizz ta' vettura jew jirrifjutaw il-bejgħ jew id-dħul fis-servizz ta' mezz ta' limitazzjoni ta' veloċità jew sistema abbord ta' limitazzjoni ta' veloċità,

jekk il-vetturi, mezzi ta' limitazzjoni ta' veloċità jew sistemi abbord ta' limitazzjoni ta' veloċità jikkonformaw mad-dispożizzjonijiet tad-Direttiva 92/24/KEE.

2. B'effett mill-1 ta' Jannar 2005, l-Istati Membri għandhom, għal raġunijiet li għandhom x'jaqsmu ma' mezzi ta' limitazzjoni ta' veloċità jew sistemi abbord ta' limitazzjoni ta' veloċità, jipprojbixxu l-bejgħ, ir-reġistrazzjoni jew id-dħul fis-servizz ta' vetturi, mezzi ta' limitazzjoni ta' veloċità jew sistemi abbord ta' limitazzjoni ta' veloċità li ma jikkonformawx mad-dispożizzjonijiet tad-Direttiva 92/24/KEE.

Artikolu 3

1. L-Istati Membru għandhom jadottaw u jippubblikaw, qabel is-17 ta' Novembru 2004, il-liġijiet, ir-regolamenti u d-dispożizzjonijiet amministrativi meħtieġa sabiex jikkonformaw ma' din id-Direttiva. Għandhom jgħarrfu bihom lill-Kummissjoni fil-pront. Għandhom japplikaw dawn il-miżuri mit-18 ta' Novembru 2004.

2. Meta Stati Membri jadottaw dawn il-miżuri, għandu jkollhom riferenza għal din id-Direttiva jew għandhom ikunu akkumpanjati b'din ir-riferenza fl-okkazzjoni tal-pubblikazzjoni uffiċjali tagħhom. Il-metodi dwar kif issir din ir-riferenza għandhom jiġu preskritti mill-Istati Membri.

3. L-Istati Membri għandhom jikkomunikaw lill-Kummissjoni t-test tad-dispożizzjonijiet ewliena tal-liġi nazzjonali li jadottaw fil-qasam kopert b'din id-Direttiva.

Artikolu 4

Din id-Direttiva għandha tidħol fis-seħħ fit-tielet jum wara l-pubblikazzjoni tiegħu fil-Ġurnal Uffiċjali ta' l-Unjoni Ewropea.

Artikolu 5

Din id-Direttiva hija indirizzata lill-Istati Membri.

Magħmula fi Strassbourg, fil-11 ta' Frar 2004.

Għall-Parlament Ewropew

Il-President

P. Cox

Għall-Kunsill

Il-President

M. McDowell

[1] Opinjoni tal-Parlament Ewropew tad-9 ta' Ottubru 2003 (għadha mhix pubblikata fil-Ġurnal Uffiċjali) u d-Direttiva tal-Kunsill ta' l-20 ta' Jannar 2004.

[2] ĠU L 129, ta'-14.5.1992, p. 154.

[3] ĠU L 42, tat-23.2.1970, p. 1. Direttiva kif l-aħħar emendata bir-Regolament (KE) Nru 807/2003 (ĠU L 122, tas-16.5.2003, p. 36).

[4] ĠU L 57, tat-2.3.1992, p. 27. Direttiva kif l-aħħar emendata bid-Direttiva 2002/85/KE tal-Parlament Ewropew u tal-Kunsill (ĠU L 327, ta' l-4.12.2002, p. 8).

--------------------------------------------------