15.12.2012   

MT

Il-Ġurnal Uffiċjali tal-Unjoni Ewropea

L 347/38

(1)

Il-Ftehim Interim li jistabbilixxi qafas għal Ftehim ta’ Sħubija Ekonomika bejn l-Istati tal-Afrika tal-Lvant u tan-Nofsinhar, fuq naħa, u l-Komunità Ewropea u l-Istati Membri tagħha, fuq in-naħa l-oħra (1) (‘l-FSE interim’) japplika b’mod proviżorju sa mill-14 ta’ Mejju 2012 bejn l-Unjoni u r-Repubblika tal-Madagaskar, ir-Repubblika ta’ Mawrizju, ir-Repubblika tas-Seychelles u r-Repubblika taż-Żimbabwe.

(2)

Il-Protokoll 1 ta’ mal-FSE interim, li jikkonċerna d-definizzjoni tal-kunċett ta’ “prodotti oriġinarji” u metodi ta’ kooperazzjoni amministrattiva, fih ir-regoli ta’ oriġini għall-importazjoni fl-Unjoni ta’ prodotti li joriġinaw fl-Istati tal-ALN.

(3)

Skont l-Artikolu 42(8) tal-Protokoll 1 ta’ mal-FSE interim, jingħataw awtomatikament derogi minn dawn ir-regoli ta’ oriġini fi ħdan kwota annwali ta’ 8 000 tunellata ta’ tonn taż-żejt u ta’ 2 000 tunnellata flettijiet tat-tonn.

(4)

Sabiex il-kwota disponibbli tkun tista’ tinuża b’mod effettiv u bis-sħiħ, il-Mawrizju, is-Seychelles u l-Madagaskar talbu deroga li tkopri l-kwantitajiet annwali ta’ 8 000 tunnellata ta’ tonn taż-żejt u ta’ 2 000 tunnellata ta’ flettijiet tat-tonn importat fl-Unjoni mill-1 ta’ Jannar 2013 sal-31 ta’ Diċembru 2022.

(5)

Peress li l-kwantitajiet mitluba jaqgħu fi ħdan il-kwota annwali li tingħata awtomatikament kif tintalab mill-Istati tal-ALN, il-Kumitat dwar il-Kooperazzjoni Doganali għandu jalloka l-kwota globali lill-Istati tal-ALN. Għaldaqstant, għandha tingħata deroga lill-Istati tal-ALN għar-rigward ta’ tonn taż-żejt u ta’ flett tat-tonn għall-kwantitajiet mitluba.

(6)

Ir-referenza fl-Artikolu 42(8) tal-Protokoll 1 għall-FSE interim għal “tonn taż-żejt” għandu jinftiehem bħala li jkopri t-tonn ippriservat fiż-żejt veġetali jew b’modi oħra. Għal dawk it-tip ta’ tonn, l-Anness I għar-Regolament tal-Kunsill (KEE) Nru 2658/87 tat-23 ta' Lulju 1987 dwar in-nomenklatura tat-tariffa u l-istatistika u dwar it-Tariffa Doganali Komuni ta’ Dwana (2) (‘in-Nomenklatura Magħquda’) jirreferi għat-terminu “ippriservat”. It-terminu “tonn ippriservat” ikopri tonn taż-żejt iżda wkoll tonn ippakkajat mingħajr arja f’boroż tal-plastik jew kontenituri oħra. Huwa għalhekk xieraq li jintuża t-terminu “tonn ippriservat”.

(7)

Fl-interess taċ-ċarezza, huwa adatt li jiġi stipulat b’mod espliċitu li l-uniċi materjali mhux ta’ oriġini li jistgħu jintużaw fil-manifattura ta’ tonn ippriservat u ta’ flettijiet tat-tonn taħt il-kodiċi NM 1604 14 16 għandhom ikunu tonn ta’ taħt l-Intestaturi HS 0302 jew 0303, sabiex it-tonn ippriservat u l-flettijiet tat-tonn jibbenefikaw mid-deroga.

(8)

Ir-Regolament tal-Kummissjoni (KEE) Nru 2454/93 tat-2 ta’ Lulju 1993 li jiffissa d-dispożizzjonijiet għall-implementazzjoni tar-Regolament tal-Kunsill (KEE) Nru 2913/92 li jistabbilixxi l-Kodiċi Doganali Komunitarju (3), jistabbilixxi r-regoli għall-immaniġġjar tal-kwoti tariffarji. Sabiex tkun żgurata ġestjoni effiċjenti mwettqa b’kooperazzjoni mill-qrib bejn l-awtoritajiet tal-Istati tal-ALN, l-awtoritajiet doganali tal-Unjoni u tal-Kummissjoni, dawk ir-regoli għandhom japplikaw mutatis mutandis għall-kwantitajiet importati skont id-deroga mogħtija b’din id-Deċiżjoni.

(9)

Id-deroga għandha tingħata għal perjodu ta’ ħames snin kif previst fl-Artikolu 42(10) il-punt (a) tal-Protokoll 1 ta’ mal-FSE.

(10)

Sabiex ikun possibbli li ssir sorveljanza effiċjenti tal-operat tad-deroga, l-awtoritajiet tal-Istati tal-ALN għandhom jgħaddu regolarment lill-Kummissjoni d-dettalji taċ-ċertifikati ta’ moviment EUR. 1 li jkunu nħarġu.