Back to EUR-Lex homepage

EUR-Lex Access to European Union law

Back to EUR-Lex homepage

This document is an excerpt from the EUR-Lex website

Use quotation marks to search for an "exact phrase". Append an asterisk (*) to a search term to find variations of it (transp*, 32019R*). Use a question mark (?) instead of a single character in your search term to find variations of it (ca?e finds case, cane, care).
Search tips
Need more search options? Use the Advanced search
You are here

Document 02021R2178-20230101

Consolidated text: Regolament Delegat tal-Kummissjoni (UE) 2021/2178 tas-6 ta’ Lulju 2021 li jissupplimenta r-Regolament (UE) 2020/852 tal-Parlament Ewropew u tal-Kunsill billi jispeċifika l-kontenut u l-preżentazzjoni ta’ informazzjoni li għandha tiġi żvelata minn impriżi soġġetti għall-Artikoli 19a jew 29a tad-Direttiva 2013/34/UE dwar attivitajiet ekonomiċi ambjentalment sostenibbli, u li jispeċifika l-metodoloġija biex ikun hemm konformità ma’ dan l-obbligu ta’ żvelar (Test b’rilevanza għaż-ŻEE)Test b’relevanza għaż-ŻEE

Access initial legal act
(

In force

)

ELI: http://data.europa.eu/eli/reg_del/2021/2178/2023-01-01

02021R2178 — MT — 01.01.2023 — 001.001

Dan it-test hu maħsub purament bħala għodda ta’ dokumentazzjoni u m’għandu l-ebda effett legali. L-istituzzjonijiet tal-Unjoni m'għandhom l-ebda responsabbiltà għall-kontenut tiegħu. Il-verżjonijiet awtentiċi tal-atti rilevanti, inklużi l-preamboli tagħhom, huma dawk ippubblikati fil-Ġurnal Uffiċjali tal-Unjoni Ewropea u disponibbli f’EUR-Lex. Dawk it-testi uffiċjali huma aċċessibbli direttament permezz tal-links inkorporati f’dan id-dokument

►B

REGOLAMENT DELEGAT TAL-KUMMISSJONI (UE) 2021/2178

tas-6 ta’ Lulju 2021

li jissupplimenta r-Regolament (UE) 2020/852 tal-Parlament Ewropew u tal-Kunsill billi jispeċifika l-kontenut u l-preżentazzjoni ta’ informazzjoni li għandha tiġi żvelata minn impriżi soġġetti għall-Artikoli 19a jew 29a tad-Direttiva 2013/34/UE dwar attivitajiet ekonomiċi ambjentalment sostenibbli, u li jispeċifika l-metodoloġija biex ikun hemm konformità ma’ dan l-obbligu ta’ żvelar

(Test b’rilevanza għaż-ŻEE)

(ĠU L 443 10.12.2021, p. 9)

Emendat bi:

 

 

Il-Ġurnal Uffiċjali

  Nru

Paġna

Data

►M1

REGOLAMENT DELEGAT TAL-KUMMISSJONI (UE) 2022/1214 tad-9 ta’ Marzu 2022

  L 188

1

15.7.2022



▼B

REGOLAMENT DELEGAT TAL-KUMMISSJONI (UE) 2021/2178

tas-6 ta’ Lulju 2021

li jissupplimenta r-Regolament (UE) 2020/852 tal-Parlament Ewropew u tal-Kunsill billi jispeċifika l-kontenut u l-preżentazzjoni ta’ informazzjoni li għandha tiġi żvelata minn impriżi soġġetti għall-Artikoli 19a jew 29a tad-Direttiva 2013/34/UE dwar attivitajiet ekonomiċi ambjentalment sostenibbli, u li jispeċifika l-metodoloġija biex ikun hemm konformità ma’ dan l-obbligu ta’ żvelar

(Test b’rilevanza għaż-ŻEE)



Artikolu 1

Definizzjonijiet

Għall-fini ta’ dan ir-Regolament, japplikaw id-definizzjonijiet li ġejjin:

(1) 

“objettiv ambjentali” tfisser wieħed mill-objettivi ambjentali stabbiliti fl-Artikolu 9 tar-Regolament (UE) 2020/852;

(2) 

“Attività ekonomika allinjata mat-tassonomija” tfisser attività ekonomika li tikkonforma mar-rekwiżiti stabbiliti fl-Artikolu 3 tar-Regolament (UE) 2020/852;

(3) 

“attività ekonomika tranżitorja” tfisser attività ekonomika li tikkonforma mar-rekwiżiti stabbiliti fl-Artikolu 10(2) tar-Regolament (UE) 2020/852;

(4) 

“attività ekonomika abilitanti” tfisser attività ekonomika li tikkonforma mar-rekwiżiti stabbiliti fl-Artikolu 16 tar-Regolament (UE) 2020/852;

(5) 

“attività ekonomika eliġibbli għat-tassonomija” tfisser attività ekonomika li hija deskritta fl-atti delegati adottati skont l-Artikolu 10(3), l-Artikolu 11(3), l-Artikolu 12(2), l-Artikolu 13(2), l-Artikolu 14(2) u l-Artikolu 15(2) tar-Regolament (UE) 2020/852, irrispettivament minn jekk dik l-attività ekonomika tissodisfax il-kriterji tekniċi kollha ta’ skrinjar stabbiliti f’dawk l-atti delegati;

(6) 

“attività ekonomika mhux eliġibbli għat-tassonomija” tfisser attività ekonomika li ma hijiex deskritta fl-atti delegati adottati skont l-Artikolu 10(3), l-Artikolu 11(3), l-Artikolu 12(2), l-Artikolu 13(2), l-Artikolu 14(2) u l-Artikolu 15(2) tar-Regolament (UE) 2020/852;

(7) 

“maniġer tal-assi” tfisser impriża li hija soġġetta għall-obbligi ta’ divulgazzjoni stabbiliti fl-Artikoli 19a u 29a tad-Direttiva 2013/34/UE u li hija waħda minn dawn li ġejjin:

(a) 

AIFM kif definit fl-Artikolu 4(1)(b) tad-Direttiva 2011/61/UE tal-Parlament Ewropew u tal-Kunsill ( 1 );

(b) 

kumpanija maniġerjali kif definita fl-Artikolu 2(1)(b) tad-Direttiva 2009/65/KE tal-Parlament Ewropew u tal-Kunsill ( 2 );

(c) 

kumpanija ta’ investiment awtorizzata f’konformità mal-Artikoli 27, 28 u 29 tad-Direttiva 2009/65/KE u li ma tkunx ħatret għall-maniġment tagħha kumpanija maniġerjali awtorizzata f’konformità mal-Artikoli 6, 7 u 8 ta’ dik id-Direttiva.

(8) 

“impriża finanzjarja” tfisser impriża li hija soġġetta għall-obbligi ta’ divulgazzjoni stabbiliti fl-Artikoli 19a u 29a tad-Direttiva 2013/34/UE u li hija maniġer tal-assi, istituzzjoni ta’ kreditu kif definita fl-Artikolu 4(1)(1) tar-Regolament (UE) Nru 575/2013 tal-Parlament Ewropew u tal-Kunsill ( 3 ), ditta tal-investiment kif definita fl-Artikolu 4(1)(2) tar-Regolament (UE) Nru 575/2013, impriża tal-assigurazzjoni kif definita fl-Artikolu 13(1) tad-Direttiva 2009/138/KE tal-Parlament Ewropew u tal-Kunsill ( 4 ), jew impriża tar-riassigurazzjoni kif definita fl-Artikolu 13(4) tad-Direttiva 2009/138/KE;

(9) 

“impriża mhux finanzjarja” tfisser impriża li hija soġġetta għall-obbligi ta’ divulgazzjoni stabbiliti fl-Artikoli 19a u 29a tad-Direttiva 2013/34/UE u li ma hijiex impriża finanzjarja kif definit fil-punt (8);

(10) 

“attività tal-assigurazzjoni jew tar-riassigurazzjoni allinjata mat-tassonomija” tfisser attività tal-assigurazzjoni jew tar-riassigurazzjoni li tikkonforma mal-kriterji stabbiliti fit-Taqsimiet 10.1. u 10.2. tal-Anness II tar-Regolament Delegat (UE) 2021/2139.

Artikolu 2

Divulgazzjonijiet minn impriżi mhux finanzjarji

1.  
L-impriżi mhux finanzjarji għandhom jiddivulgaw l-informazzjoni msemmija fl-Artikolu 8(1) u (2) tar-Regolament (UE) 2020/852 kif speċifikat fl-Anness I ta’ dan ir-Regolament.
2.  
L-informazzjoni msemmija fil-paragrafu 1 għandha tiġi ppreżentata f’forma ta’ tabella billi jintużaw il-formoli stabbiliti fl-Anness II ta’ dan ir-Regolament.

Artikolu 3

Divulgazzjonijiet mill-maniġers tal-assi

1.  
Il-maniġers tal-assi għandhom jiddivulgaw l-informazzjoni msemmija fl-Artikolu 8(1) tar-Regolament (UE) 2020/852 kif speċifikat fl-Annessi III u XI ta’ dan ir-Regolament.
2.  
L-informazzjoni msemmija fil-paragrafu 1 għandha tiġi ppreżentata f’forma ta’ tabella billi tintuża l-formola stabbilita fl-Anness IV ta’ dan ir-Regolament.

Artikolu 4

Divulgazzjonijiet minn istituzzjonijiet ta’ kreditu

1.  
L-istituzzjonijiet ta’ kreditu għandhom jiddivulgaw l-informazzjoni msemmija fl-Artikolu 8(1) tar-Regolament (UE) 2020/852 kif speċifikat fl-Annessi V u XI ta’ dan ir-Regolament.
2.  
L-informazzjoni msemmija fil-paragrafu 1 għandha tiġi ppreżentata f’forma ta’ tabella billi tintuża l-formola stabbilita fl-Anness VI ta’ dan ir-Regolament.

Artikolu 5

Divulgazzjonijiet minn ditti tal-investiment

1.  
Id-ditti tal-investiment għandhom jiddivulgaw l-informazzjoni msemmija fl-Artikolu 8(1) tar-Regolament (UE) 2020/852 kif speċifikat fl-Annessi VII u XI ta’ dan ir-Regolament.
2.  
L-informazzjoni msemmija fil-paragrafu 1 għandha tiġi ppreżentata f’forma ta’ tabella billi tintuża l-formola stabbilita fl-Anness VIII ta’ dan ir-Regolament.

Artikolu 6

Divulgazzjonijiet minn impriżi tal-assigurazzjoni u tar-riassigurazzjoni

1.  
L-assigurazzjoni u r-riassigurazzjoni għandhom jiddivulgaw l-informazzjoni msemmija fl-Artikolu 8(1) tar-Regolament (UE) 2020/852 kif speċifikat fl-Annessi IX u XI ta’ dan ir-Regolament.
2.  
L-informazzjoni msemmija fil-paragrafu 1 għandha tiġi ppreżentata f’forma ta’ tabella billi jintużaw il-formoli stabbiliti fl-Anness X ta’ dan ir-Regolament.

Artikolu 7

Regoli dwar id-divulgazzjoni komuni għall-impriżi finanzjarji kollha

1.  
L-iskoperturi għall-gvernijiet ċentrali, banek ċentrali u emittenti supranazzjonali għandhom jiġu esklużi mill-kalkolu tan-numeratur u tad-denominatur tal-indikaturi ewlenin tal-prestazzjoni tal-impriżi finanzjarji.
2.  
Id-derivattivi għandhom jiġu esklużi min-numeratur tal-indikaturi ewlenin tal-prestazzjoni.
3.  
Skoperturi għal impriżi li mhumiex obbligati jippubblikaw informazzjoni mhux finanzjarja skont l-Artikolu 19a jew 29a tad-Direttiva 2013/34/UE għandhom jiġu esklużi min-numeratur tal-indikaturi ewlenin tal-prestazzjoni tal-impriżi finanzjarji.
4.  
Mingħajr preġudizzju għall-paragrafu 1, bonds ambjentalment sostenibbli jew titoli ta’ dejn bil-għan li jiffinanzjaw attivitajiet speċifiċi identifikati li jinħarġu minn impriża destinatarja ta’ investiment għandhom jiġu inklużi fin-numeratur tal-indikaturi ewlenin tal-prestazzjoni sal-valur sħiħ tal-attivitajiet ekonomiċi allinjati mat-Tassonomija li r-rikavat minn dawk il-bonds u t-titoli ta’ dejn jiffinanzjaw, abbażi tal-informazzjoni pprovduta mill-impriża destinatarja ta’ investiment.

Skoperturi li l-għan tagħhom mhuwiex li jiffinanzjaw attivitajiet speċifiċi identifikati għandhom jiġu inklużi fin-numeratur ponderati bil-KPI tal-fatturat u bil-KPI tal-CapEx tal-emittent skont il-metodoloġija stabbilita fl-Annessi III, V, VII, u IX.

Meta destinatarja ta’ investiment tkun ħarġet bonds jew titoli ta’ dejn ambjentalment sostenibbli bil-għan li tiffinanzja attivitajiet speċifiċi identifikati, l-impriżi finanzjarji għandhom inaqqsu l-KPI tal-impriża destinatarja ta’ investiment kif xieraq biex jiġi evitat l-għadd doppju.

5.  
Meta l-kriterji tekniċi tal-iskrinjar stabbiliti fl-atti delegati adottati skont l-Artikoli 10(3), 11(3), 12(2), 13(2), 14(2) jew 15(2) tar-Regolament (UE) 2020/852 jiġu emendati, is-self bi skop speċjali u l-istrumenti msemmija fil-paragrafu 4 miżmuma mill-impriżi finanzjarji li jiffinanzjaw l-attivitajiet jew l-assi ekonomiċi allinjati mat-Tassonomija, għandhom, fin-nuqqas ta’ allinjament tal-attivitajiet jew tal-assi ekonomiċi ffinanzjati mal-kriterji tekniċi tal-iskrinjar emendati, jiġu rrapportati bħala tali skont dan ir-Regolament sa ħames snin wara d-data ta’ applikazzjoni tal-atti delegati li jemendaw dawk il-kriterji tekniċi tal-iskrinjar.
6.  

L-impriżi finanzjarji għandhom jipprevedu diżaggregazzjoni fin-numeratur meta applikabbli u fid-denominatur tal-indikaturi ewlenin tal-prestazzjoni għal:

(a) 

skoperturi għal impriżi mhux finanzjarji u investimenti fihom;

(b) 

skoperturi għal impriżi finanzjarji u investimenti fihom;

(c) 

skoperturi għal impriżi mhux finanzjarji stabbiliti fl-Unjoni li ma humiex soġġetti għal obbligu li jippubblikaw rapport mhux finanzjarja skont l-Artikolu 19a u 29a tad-Direttiva 2013/34/UE u investimenti fihom;

(d) 

skoperturi għal impriżi finanzjarji stabbiliti fl-Unjoni li ma humiex soġġetti għal obbligu li jippubblikaw rapport mhux finanzjarju skont l-Artikolu 19a u 29a tad-Direttiva 2013/34/UE msemmi fil-paragrafu 2 u investimenti fihom;

(e) 

skoperturi għal impriżi mhux finanzjarji stabbiliti f’pajjiż terz li ma humiex soġġetti għal obbligu li jippubblikaw rapport mhux finanzjarju skont l-Artikoli 19a u 29a tad-Direttiva 2013/34/UE u investimenti fihom;

(f) 

skoperturi għal impriżi finanzjarji stabbiliti f’pajjiżi terzi li ma humiex soġġetti għal obbligu li jippubblikaw rapport mhux finanzjarju skont l-Artikolu 19a u 29a tad-Direttiva 2013/34/UE u investimenti fihom;

(g) 

skoperturi għal derivattivi u investimenti fihom;

(h) 

skoperturi u investimenti oħrajn.

7.  
L-impriżi finanzjarji jistgħu jużaw stimi għall-valutazzjoni tal-allinjament tat-tassonomija tal-iskoperturi tagħhom għall-impriżi msemmija fil-paragrafu (6), il-punti (e) u (f), meta dawk l-impriżi finanzjarji jkunu kapaċi juru konformità mal-kriterji kollha tal-Artikolu 3 tar-Regolament (UE) 2020/852, ħlief mal-kriterji stabbiliti fl-Artikolu 3, il-punt (b) ta’ dak ir-Regolament.

L-impriżi finanzjarji għandhom jifformalizzaw, jiddokumentaw u jippubblikaw il-metodoloġija li fuqha huma bbażati dawn l-istimi, inkluż l-approċċ u l-metodoloġija tar-riċerka, is-suppożizzjonijiet ewlenin u l-prinċipji ta’ prekawzjoni użati.

L-impriżi finanzjarji għandhom jiddivulgaw:

(a) 

il-proporzjon ta’ skoperturi allinjati mat-Tassonomija bbażati fuq stimi separatament mill-indikaturi tal-prestazzjoni ewlenin tagħhom divulgati skont dan ir-Regolament;

(b) 

il-miżuri meħuda u l-perjodu ta’ żmien meħtieġ biex tintwera l-konformità mal-kriterji stabbiliti fl-Artikolu 3, il-punt (b) tar-Regolament (UE) 2020/852.

Artikolu 8

Regoli komuni għad-divulgazzjoni mill-impriżi finanzjarji u mhux finanzjarji kollha

1.  
L-impriżi finanzjarji u l-impriżi mhux finanzjarji għandhom jinkludu d-divulgazzjonijiet addizzjonali kollha li jakkumpanjaw l-indikaturi ewlenin tal-prestazzjoni stabbiliti fl-Annessi I, III, V, VII, XI fl-istess partijiet tar-rapport mhux finanzjarju li jkun fihom dawk l-indikaturi jew għandhom jipprovdu kontroreferenzi għall-partijiet tar-rapport mhux finanzjarju li jkun fihom dawk l-indikaturi.
2.  
L-informazzjoni divulgata f’konformità ma’ dan ir-Regolament għandha tkopri l-perjodu ta’ rapportar annwali mis-sena kalendarja preċedenti tad-data tad-divulgazzjoni.
3.  
L-impriżi finanzjarji u l-impriżi mhux finanzjarji għandhom jipprovdu fir-rapport mhux finanzjarju l-indikaturi ewlenin tal-prestazzjoni li jkopru l-perjodu ta’ rappurtar preċedenti.

Għall-finijiet ta’ dan il-paragrafu, l-ewwel perjodu ta’ rappurtar annwali għandu jkopri s-sena 2023.

4.  
L-impriżi finanzjarji u l-impriżi mhux finanzjarji għandhom, fid-divulgazzjonijiet tagħhom, jużaw l-istess munita bħal fir-rapporti finanzjarji tagħhom.

L-impriżi finanzjarji għandhom jużaw l-aktar data reċenti disponibbli u l-indikaturi ewlenin tal-prestazzjoni tal-kontropartijiet tagħhom biex jikkalkulaw l-indikaturi ewlenin tal-prestazzjoni tagħhom stess.

5.  
L-indikaturi ewlenin tal-prestazzjoni għandhom ikopru biss l-objettivi tal-mitigazzjoni tat-tibdil fil-klima u tal-adattament sa tnax-il xahar wara d-data tal-applikazzjoni tar-regolamenti delegati li jkun fihom il-kriterji tekniċi tal-iskrinjar għall-objettivi ambjentali l-oħrajn u li jkunu ġew adottati skont l-Artikolu 12(2), l-Artikolu 13(2), l-Artikolu 14(2) u l-Artikolu 15(2) tar-Regolament (UE) 2020/852.

▼M1

6.  

L-impriżi mhux finanzjarji u l-impriżi finanzjarji għandhom jiddivulgaw l-ammont u l-proporzjon ta’:

(a) 

l-attivitajiet ekonomiċi allinjati mat-tassonomija msemmijin fit-Taqsimiet 4.26, 4.27 u 4.28 tal-Annessi I u II tar-Regolament Delegat (UE) 2021/2139 fid-denominatur u fin-numeratur tal-indikaturi tal-prestazzjoni ewlenin tagħhom;

(b) 

l-attivitajiet ekonomiċi eliġibbli għat-tassonomija, iżda mhux allinjati mat-tassonomija, imsemmijin fit-Taqsimiet 4.26, 4.27 u 4.28 tal-Annessi I u II tar-Regolament Delegat (UE) 2021/2139 fid-denominatur tal-indikaturi tal-prestazzjoni ewlenin tagħhom;

(c) 

l-attivitajiet relatati mal-enerġija nukleari mhux eliġibbli għat-tassonomija fid-denominatur tal-indikaturi tal-prestazzjoni ewlenin tagħhom.

7.  

L-impriżi mhux finanzjarji u l-impriżi finanzjarji għandhom jiddivulgaw l-ammont u l-proporzjon ta’:

(a) 

l-attivitajiet ekonomiċi allinjati mat-tassonomija msemmijin fit-Taqsimiet 4.29, 4.30 u 4.31 tal-Annessi I u II tar-Regolament Delegat (UE) 2021/2139 fid-denominatur u fin-numeratur tal-indikaturi tal-prestazzjoni ewlenin tagħhom;

(b) 

l-attivitajiet ekonomiċi eliġibbli għat-tassonomija, iżda mhux allinjati mat-tassonomija, imsemmijin fit-Taqsimiet 4.29, 4.30 u 4.31 tal-Annessi I u II tar-Regolament Delegat (UE) 2021/2139 fid-denominatur tal-indikaturi tal-prestazzjoni ewlenin tagħhom;

(c) 

l-attivitajiet relatati mal-gass fossili mhux eliġibbli għat-tassonomija fid-denominatur tal-indikaturi tal-prestazzjoni ewlenin tagħhom.

8.  
L-informazzjoni msemmija fil-paragrafi 6 u 7 għandha tiġi ppreżentata f’forma ta’ tabella billi jintużaw il-formoli stabbiliti fl-Anness XII ta’ dan ir-Regolament.

▼B

Artikolu 9

Rieżami

1.  

Sat-30 ta’ Ġunju 2024, il-Kummissjoni għandha tirrieżamina l-applikazzjoni ta’ dan ir-Regolament. Il-Kummissjoni għandha tivvaluta b’mod partikolari l-ħtieġa għal kwalunkwe emenda ulterjuri fir-rigward tal-inklużjoni ta’:

(a) 

skoperturi għal gvernijiet ċentrali u banek ċentrali fin-numeratur u fid-denominatur tal-indikaturi ewlenin tal-prestazzjoni tal-impriżi finanzjarji;

(b) 

skoperturi għal impriżi li ma jippubblikawx rapport mhux finanzjarju skont l-Artikoli 19a jew 29a tad-Direttiva 2013/34/UE fin-numeratur tal-indikaturi ewlenin tal-prestazzjoni tal-impriżi finanzjarji.

2.  
Ir-rieżami tal-iskoperturi tal-SMEs se jkun akkumpanjat minn valutazzjoni tal-impatt li tivvaluta l-piż amministrattiv, l-aċċess għall-finanzjament u l-impatti potenzjali fuq l-SMEs ta’ estensjoni possibbli biex tkopri l-iskoperturi tal-SMEs li mhumiex koperti minn dan ir-Regolament Delegat jew biex jipprovdu tali informazzjoni b’mod volontarju.
3.  
L-iskoperturi għal u l-investimenti f’impriżi li ma jippubblikawx informazzjoni mhux finanzjarja skont l-Artikoli 19a u 29a tad-Direttiva 2013/34/UE u l-Artikolu 8 tar-Regolament (UE) 2020/852, iżda li jipprovdu tali informazzjoni ekwivalenti b’mod volontarju, jistgħu jiġu inklużi fin-numeraturi tal-indikaturi ewlenin tal-prestazzjoni tal-impriżi finanzjarji mill-1 ta’ Jannar 2025 soġġett għall-valutazzjoni pożittiva msemmija fil-paragrafu (2).

Artikolu 10

Dħul fis-seħħ u applikazzjoni

1.  
Dan ir-Regolament għandu jidħol fis-seħħ fl-għoxrin jum wara l-pubblikazzjoni tiegħu f’Il-Ġurnal Uffiċjali tal-Unjoni Ewropea.
2.  
Mill-1 ta’ Jannar 2022 sal-31 ta’ Diċembru 2022, l-impriżi mhux finanzjarji għandhom jiddivulgaw biss il-proporzjon ta’ attivitajiet ekonomiċi eliġibbli għat-Tassonomija u mhux eleġibbli għat-Tassonomija fil-fatturat totali, fin-nefqa kapitali u operazzjonali tagħhom u l-informazzjoni kwalitattiva msemmija fit-Taqsima 1.2. tal-Anness I rilevanti għal din id-divulgazzjoni.
3.  

Mill-1 ta’ Jannar 2022 sal-31 ta’ Diċembru 2023, l-impriżi finanzjarji għandhom jiddivulgaw biss:

(a) 

il-proporzjon fl-assi totali tagħhom ta’ skoperturi għal attivitajiet ekonomiċi mhux eliġibbli għat-Tassonomija u eliġibbli għat-Tassonomija;

(b) 

il-proporzjon fl-assi totali tagħhom tal-iskoperturi msemmija fl-Artikolu 7, il-paragrafi 1 u 2;

(c) 

il-proporzjon fl-assi totali tagħhom tal-iskoperturi msemmija fl-Artikolu 7(3);

(d) 

l-informazzjoni kwalitattiva msemmija fl-Anness XI.

L-istituzzjonijiet ta’ kreditu għandhom jiddivulgaw ukoll il-proporzjon tal-portafoll tan-negozjar tagħhom u fuq talba s-self interbankarju fl-assi totali tagħhom.

L-impriżi tal-assigurazzjoni u tar-riassigurazzjoni għandhom jiddivulgaw ukoll il-proporzjon tal-attivitajiet ekonomiċi tal-assigurazzjoni mhux tal-ħajja eliġibbli għat-Tassonomija u mhux eleġibbli għat-Tassonomija.

4.  
L-indikaturi ewlenin tal-prestazzjoni tal-impriżi mhux finanzjarji, inkluż kwalunkwe informazzjoni ta’ akkumpanjament li għandha tiġi ddivulgata skont l-Annessi I u II ta’ dan ir-Regolament, għandhom jiġu divulgati mill-1 ta’ Jannar 2023.
5.  
L-indikaturi ewlenin tal-prestazzjoni tal-impriżi finanzjarji, inkluż kwalunkwe informazzjoni ta’ akkumpanjament li għandha tiġi ddivulgata skont l-Anness III, V, VII, IX, XI ta’ dan ir-Regolament, għandhom jiġu divulgati mill-1 ta’ Jannar 2024.

It-taqsimiet 1.2.3. u 1.2.4. tal-Anness V għandhom japplikaw mill-1 ta’ Jannar 2026.

Dan ir-Regolament għandu jorbot fl-intier tiegħu u japplika direttament fl-Istati Membri kollha.



ANNESS I

KPIs TA’ IMPRIŻI MHUX FINANZJARJI

1.    Il-kontenut tal-KPIs li għandhom jiġu ddivulgati mill-impriżi mhux finanzjarji

1.1.    Speċifikazzjoni tal-indikaturi ta’ prestazzjoni ewlenin (KPI)

1.1.1.    KPI relatat mal-fatturat (KPI tal-fatturat)

Il-proporzjon tal-fatturat imsemmi fl-Artikolu 8(2)(a) tar-Regolament (UE) 2020/852 għandu jiġi kkalkolat bħala l-parti tal-fatturat nett derivat minn prodotti jew servizzi, inklużi assi intanġibbli, assoċjati ma’ attivitajiet ekonomiċi allinjati mat-Tassonomija (numeratur) diviż bil-fatturat nett (denominatur) kif definit fl-Artikolu 2(5) tad-Direttiva 2013/34/UE. Il-fatturat għandu jkopri d-dħul rikonoxxut skont l-Istandard Internazzjonali tal-Kontabilità (IAS) 1, il-paragrafu 82(a) kif adottat mir-Regolament tal-Kummissjoni (KE) Nru 1126/2008 ( 5 ).

Il-KPI msemmi fl-ewwel subparagrafu għandu jeskludi min-numeratur tiegħu l-parti tal-fatturat nett derivat minn prodotti u minn servizzi assoċjati ma’ attivitajiet ekonomiċi li ġew adattati għat-tibdil fil-klima f’konformità mal-Artikolu 11(1)(a) tar-Regolament (UE) 2020/852 u f’konformità mal-Anness II tar-Regolament Delegat (UE) 2021/2139 dment li dawk l-attivitajiet:

(a) 

ikunu jikkwalifikaw bħala attivitajiet abilitanti f’konformità mal-Artikolu 11(1)(b) tar-Regolament 2020/852, jew

(b) 

ikunu huma stess allinjati mat-Tassonomija.

1.1.2.    KPI relatat man-nefqa tal-kapital (CapEx)(KPI tal-CapEx)

Il-proporzjon tal-CapEx imsemmi fl-Artikolu 8(2)(b) tar-Regolament (UE) 2020/852 għandu jiġi kkalkolat bħala n-numeratur diviż bid-denominatur kif speċifikat fil-punti 1.1.2.1. u 1.1.2.2. ta’ dan l-Anness.

1.1.2.1.   Denominatur

Id-denominatur għandu jkopri ż-żidiet mal-assi tanġibbli u intanġibbli matul is-sena finanzjarja kkunsidrata qabel id-deprezzament, l-amortizzament u kwalunkwe kejl mill-ġdid, inklużi dawk li jirriżultaw minn evalwazzjonijiet mill-ġdid u indebolimenti, għas-sena finanzjarja rilevanti u esklużi l-bidliet abbażi tal-valur ġust. Id-denominatur għandu jkopri wkoll iż-żidiet mal-assi tanġibbli u intanġibbli li jirriżultaw minn kombinamenti ta’ negozji.

Għal impriżi mhux finanzjarji li japplikaw standards internazzjonali ta’ rappurtar finanzjarju (IFRS) kif adottati mir-Regolament (KE) Nru 1126/2008, il-CapEx għandha tkopri l-kostijiet li jiġu kontabbilizzati abbażi ta’:

(a) 

IAS 16 Proprjetà, Impjanti u Tagħmir, il-paragrafi 73(e)(i) u (iii);

(b) 

IAS 38 Assi Intanġibbli, il-paragrafu 118(e)(i);

(c) 

IAS 40 Proprjetà għall-Investiment, il-paragrafi 76(a) u (b) (għall-mudell abbażi tal-valur ġust);

(d) 

IAS 40 Proprjetà għall-Investiment, il-paragrafu 79(d)(i) u (ii) (għall-mudell tal-kost);

(e) 

IAS 41 Agrikoltura, il-paragrafu 50(b) u (e);

(f) 

IFRS 16 Lokazzjonijiet, il-paragrafu 53(h).

Għal impriżi mhux finanzjarji li japplikaw prinċipji kontabilistiċi nazzjonali ġeneralment aċċettati (GAAP), il-CapEx għandha tkopri l-kostijiet kontabbilizzati skont il-GAAP applikabbli li jikkorrispondu għall-kostijiet inklużi fin-nefqa tal-kapital minn impriżi mhux finanzjarji li japplikaw l-IFRS.

Il-lokazzjonijiet li ma jwasslux għar-rikonoxximent ta’ dritt ta’ użu fuq l-assi ma għandhomx jingħaddu bħala CapEx.

1.1.2.2.   Numeratur

In-numeratur huwa daqs il-parti tan-nefqa tal-kapital inkluża fid-denominatur li hija li hija kwalunkwe minn:

(a) 

relatata ma’ assi jew ma’ proċessi li huma assoċjati ma’ attivitajiet ekonomiċi allinjati mat-Tassonomija;

(b) 

parti minn pjan biex jiġu estiżi l-attivitajiet ekonomiċi allinjati mat-Tassonomija jew biex l-attivitajiet ekonomiċi eliġibbli għat-Tassonomija jkunu jistgħu jsiru allinjati mat-Tassonomija (“pjan tal-CapEx”) skont il-kundizzjonijiet speċifikati fit-tieni subparagrafu ta’ dan il-punt 1.1.2.2.;

(c) 

relatata max-xiri ta’ output minn attivitajiet ekonomiċi allinjati mat-Tassonomija u miżuri individwali li jippermettu li l-attivitajiet fil-mira jsiru b’livell baxx ta’ karbonju jew li jwasslu għal tnaqqis ta’ gassijiet serra, b’mod partikolari l-attivitajiet elenkati fil-punti 7.3 sa 7.6 tal-Anness I tal-Att Delegat dwar il-Klima, kif ukoll attivitajiet ekonomiċi oħra elenkati fl-atti delegati adottati skont l-Artikolu 10(3), l-Artikolu 11(3), l-Artikolu 12(2), l-Artikolu 13(2), l-Artikolu 14(2) u l-Artikolu 15(2) tar-Regolament (UE) 2020/852 u dment li tali miżuri jkunu implimentati u operazzjonali fi żmien 18-il xahar.

Il-pjan CapEx imsemmi fl-ewwel paragrafu ta’ dan il-punt 1.1.2.2. għandu jissodisfa l-kundizzjonijiet li ġejjin:

(a) 

il-pjan għandu l-għan jew li jespandi l-attivitajiet ekonomiċi allinjati mat-Tassonomija tal-impriża jew li jtejjeb l-attivitajiet ekonomiċi eliġibbli għat-Tassonomija biex jagħmilhom allinjati mat-Tassonomija fi żmien ħames snin;

(b) 

il-pjan għandu jiġi ddivulgat fil-livell aggregat tal-attività ekonomika u jiġi approvat mill-korp maniġerjali ta’ impriżi mhux finanzjarji direttament jew b’delega.

Meta l-kriterji tekniċi tal-iskrinjar rilevanti jiġu emendati qabel it-tlestija tal-pjan CapEx, l-impriżi mhux finanzjarji għandhom jew jaġġornaw il-pjan fi żmien sentejn biex jiżguraw li l-attivitajiet ekonomiċi msemmija fil-punt (a) ikunu allinjati mal-kriterji tekniċi tal-iskrinjar emendati mat-tlestija tal-pjan jew jiddikjaraw mill-ġdid in-numeratur tal-KPI CapEx. L-aġġornament tal-pjan għandu jerġa’ jibda l-perjodu msemmi fil-punt (a). Il-perjodu msemmi fil-punt (a) tat-tieni paragrafu ta’ dan il-punt 1.1.2.2. jista’ jaqbeż il-ħames snin biss meta perjodu itwal ikun iġġustifikat oġġettivament minn karatteristiċi speċifiċi tal-attività ekonomika u t-titjib ikkonċernat, b’massimu ta’ 10 snin. Dik il-ġustifikazzjoni għandha tidher fil-pjan CapEx innifsu u fl-informazzjoni kuntestwali dettaljata taħt il-punt 1.2.3. ta’ dan l-Anness.

Meta l-pjan CapEx jonqos milli jissodisfa l-kundizzjonijiet imsemmija fit-tieni paragrafu ta’ dan il-punt 1.1.2.2., il-KPI ppubblikat preċedentement relatat man-nefqa kapitali għandu jiġi ddikjarat mill-ġdid.

In-numeratur għandu jkun fih ukoll il-parti tal-KapEx għall-adattament tal-attivitajiet ekonomiċi għat-tibdil fil-klima skont l-Anness II ta’ dan l-Att Delegat dwar il-Klima. In-numeratur għandu jipprevedi diżaggregazzjoni għall-parti tal-CapEx allokata għal kontribuzzjoni sostanzjali għall-adattament għat-tibdil fil-klima.

1.1.3.    KPI relatat man-nefqa operattiva (OpEx) (KPI tal-OpEx)

Il-proporzjon ta’ OpEx imsemmi fl-Artikolu 8(2), il-punt (b), tar-Regolament (UE) 2020/852 għandu jiġi kkalkulat bħala n-numeratur diviż bid-denominatur kif speċifikat fil-punti 1.1.3.1. u 1.1.3.2. ta’ dan l-Anness.

1.1.3.1.   Denominatur

Id-denominatur għandu jkopri l-kostijiet diretti mhux kapitalizzati relatati mar-riċerka u l-iżvilupp, il-miżuri ta’ rinnovazzjoni tal-bini, il-lokazzjoni għal żmien qasir, il-manutenzjoni u t-tiswija, u kwalunkwe nefqa diretta oħra relatata mas-servizzjar ta’ kuljum tal-assi ta’ proprjetà, impjanti u tagħmir mill-impriża jew il-parti terza li lilha jiġu esternalizzati l-attivitajiet li huma meħtieġa biex jiġi żgurat il-funzjonament kontinwu u effettiv ta’ tali assi.

Impriżi mhux finanzjarji li japplikaw il-GAAP nazzjonali u li mhumiex jikkapitalizzaw assi bid-dritt tal-użu għandhom jinkludu l-kostijiet tal-lokazzjoni fl-OpEx flimkien mal-kostijiet elenkati fl-ewwel subparagrafu tal-punt 1.1.3.1. ta’ dan l-Anness.

1.1.3.2.   Numeratur

In-numeratur huwa daqs il-parti tan-nefqa operattiva inkluża fid-denominatur li hija kwalunkwe waħda minn dawn li ġejjin:

(a) 

relatata ma’ assi jew proċessi assoċjati ma’ attivitajiet ekonomiċi allinjati mat-Tassonomija, inkluż taħriġ u ħtiġijiet oħra ta’ adattament tar-riżorsi umani, u kostijiet diretti mhux kapitalizzati li jirrappreżentaw ir-riċerka u l-iżvilupp;

(b) 

parti mill-pjan CapEx biex jespandi l-attivitajiet ekonomiċi allinjati mat-Tassonomija jew jippermetti li attivitajiet ekonomiċi eliġibbli għat-Tassonomija jsiru allinjati mat-Tassonomija f’perjodu ta’ żmien definit minn qabel kif stabbilit fit-tieni paragrafu ta’ dan il-punt 1.1.3.2;

(c) 

relatata max-xiri ta’ output minn attivitajiet ekonomiċi allinjati mat-Tassonomija u ma’ miżuri individwali li jippermettu li l-attivitajiet fil-mira jsiru b’livell baxx ta’ karbonju jew li jwasslu għal tnaqqis fil-gassijiet serra kif ukoll miżuri individwali ta’ rinnovazzjoni tal-bini kif identifikati fl-atti delegati adottati skont l-Artikolu 10(3), l-Artikolu 11(3), l-Artikolu 12(2), l-Artikolu 13(2), l-Artikolu 14(2) jew l-Artikolu 15(2) tar-Regolament (UE) 2020/852 u dment li tali miżuri jkunu implimentati u operazzjonali fi żmien 18-il xahar.

Il-pjan CapEx imsemmi fl-ewwel paragrafu ta’ dan il-punt 1.1.3.2 għandu jissodisfa l-kundizzjonijiet speċifikati fil-punt 1.1.2.2. ta’ dan l-Anness.

Il-kostijiet tar-riċerka u l-iżvilupp li diġà tqiesu fil-KPI tal-CapEx ma għandhomx jitqiesu bħala OpEx.

In-numeratur għandu jinkludi wkoll il-parti tal-OpEx għall-adattament tal-attivitajiet ekonomiċi għat-tibdil fil-klima skont l-Anness II tal-Att Delegat dwar il-Klima. In-numeratur għandu jipprevedi diżaggregazzjoni għall-parti tal-OpEx allokata għal kontribut sostanzjali għall-adattament għat-tibdil fil-klima.

Meta n-nefqa operattiva ma tkunx materjali għall-mudell kummerċjali tal-impriżi mhux finanzjarji, dawk l-impriżi għandhom:

(a) 

ikunu eżentati mill-kalkolu tan-numeratur tal-KPI OPEX f’konformità mal-punt 1.1.3.2 u jiddivulgaw dak in-numeratur bħala ugwali għal żero;

(b) 

jiddivulgaw il-valur totali tad-denominatur OpEx ikkalkulat f’konformità mal-punt 1.1.3.1;

(c) 

jispjegaw in-nuqqas ta’ materjalità tan-nefqa operattiva fil-mudell kummerċjali tagħhom.

1.2.    Speċifikazzjoni tad-divulgazzjonijiet li jakkumpanjaw il-KPIs ta’ impriżi mhux finanzjarji

L-impriżi mhux finanzjarji għandhom jiddivulgaw l-informazzjoni li ġejja li takkumpanja l-KPIs rilevanti.

1.2.1.    Politika tal-kontabilità

L-impriżi mhux finanzjarji għandhom jispjegaw:

(a) 

kif il-fatturat, in-nefqa tal-kapital u n-nefqa operattiva ġew iddeterminati u allokati għan-numeratur;

(b) 

il-bażi li fuqha ġew ikkalkulati l-fatturat, in-nefqa tal-kapital u n-nefqa operattiva, inkluż kwalunkwe valutazzjoni fl-allokazzjoni tad-dħul jew tal-infiq għal attivitajiet ekonomiċi differenti.

Għall-fatturat u n-nefqa kapitali, l-impriżi mhux finanzjarji għandhom jinkludu referenzi għall-partiti relatati fir-rapporti mhux finanzjarji;

Meta l-applikazzjoni ta’ kwalunkwe kalkolu tkun inbidlet mill-perjodu ta’ rapportar preċedenti, l-impriżi mhux finanzjarji għandhom jispjegaw għaliex dawk il-bidliet jirriżultaw f’informazzjoni aktar affidabbli u rilevanti u jipprovdu għal ċifri komparattivi ddikjarati mill-ġdid.

L-impriżi mhux finanzjarji għandhom jiddivulgaw kwalunkwe bidla materjali li tkun seħħet matul il-perjodu ta’ rapportar fir-rigward tal-implimentazzjoni tal-pjanijiet CapEx kif iddivulgat skont il-punt u 1.1.2 ta’ dan l-Anness. L-impriżi mhux finanzjarji għandhom jiddivulgaw dan li ġej kollu:

(a) 

il-bidliet materjali li seħħew fil-pjan CapEx u r-raġunijiet għal dawk il-bidliet;

(b) 

l-impatt ta’ tali bidliet fuq il-potenzjal li l-attivitajiet ekonomiċi tal-impriża jsiru allinjati mat-Tassonomija u fuq il-perjodu ta’ żmien li fih din il-bidla hija mistennija li sseħħ;

(c) 

id-dikjarazzjoni mill-ġdid tal-KPI tal-CapEx u tal-OpEx għal kull sena ta’ rappurtar li tkun għaddiet koperta mill-pjan kull meta l-bidliet fil-pjan kellhom impatt fuq dawk il-KPIs.

1.2.2.    Valutazzjoni tal-konformità mar-Regolament (UE) 2020/852

1.2.2.1.   Informazzjoni dwar il-valutazzjoni tal-konformità mar-Regolament (UE) 2020/852:

L-impriżi mhux finanzjarji għandhom:

(a) 

jiddeskrivu n-natura tal-attivitajiet ekonomiċi tagħhom eliġibbli għat-Tassonomija u allinjati mat-Tassonomija, billi jirreferu għall-atti delegati adottati skont l-Artikolu 10(3), l-Artikolu 11(3), l-Artikolu 12(2), l-Artikolu 13(2), l-Artikolu 14(2) u l-Artikolu 15(2) tar-Regolament (UE) 2020/852;

(b) 

jispjegaw kif ivvalutaw il-konformità mal-kriterji stabbiliti fl-Artikolu 3 tar-Regolament (UE) 2020/852 u l-kriterji tekniċi tal-iskrinjar assoċjati inklużi fl-atti delegati msemmija fil-punt (a);

(c) 

jispjegaw kif evitaw kwalunkwe għadd doppju fl-allokazzjoni fin-numeratur tal-KPIs tal-fatturat, tal-CapEx, u tal-OpEx fl-attivitajiet ekonomiċi kollha.

1.2.2.2.   Kontribuzzjoni għal objettivi multipli

Meta attività ekonomika tikkontribwixxi għal diversi objettivi ambjentali, l-impriżi mhux finanzjarji għandhom:

(a) 

juru konformità mal-kriterji stabbiliti fl-Artikolu 3 tar-Regolament (UE) 2020/852, b’mod partikolari mal-kriterji tekniċi tal-iskrinjar fir-rigward ta’ diversi objettivi ambjentali;

(b) 

jiddivulgaw il-fatturat, il-CapEx u l-OpEx minn dik l-attività bħala li jikkontribwixxu għal diversi objettivi ambjentali;

(c) 

jgħoddu darba biss il-fatturat minn dik l-attività fin-numeratur tal-KPIs fil-punt 1.1 ta’ dan l-Anness biex jiġi evitat l-għadd doppju.

1.2.2.3.   Diżaggregazzjoni tal-KPIs

Meta l-KPIs għal attività ekonomika jridu jiġu diżaggregati, b’mod partikolari meta l-faċilitajiet tal-produzzjoni jintużaw b’mod integrat, l-impriżi mhux finanzjarji għandhom jiżguraw li:

(a) 

kwalunkwe diżaggregazzjoni tkun ibbażata fuq kriterji li huma xierqa għall-proċess tal-produzzjoni li qed jiġi implimentat u tkun tirrifletti l-ispeċifiċitajiet tekniċi ta’ dak il-proċess;

(b) 

tingħata informazzjoni xierqa li takkumpanja l-KPIs dwar il-bażi ta’ tali diżaggregazzjoni.

1.2.3.    Informazzjoni kuntestwali

L-impriżi mhux finanzjarji għandhom jispjegaw iċ-ċifri ta’ kull KPI u r-raġunijiet għal kwalunkwe bidla f’dawk iċ-ċifri fil-perjodu ta’ rappurtar.

L-impriżi mhux finanzjarji jistgħu jiddivulgaw KPIs addizzjonali bbażati fuq il-fatturat, Capex, Opex) li jinkludu investimenti f’ekwità kontabilizzati f’impriżi konġunti, skont l-IFRS 11 jew IAS28, fuq bażi prorata li tikkorrispondi għas-sehem tagħhom fl-ekwità tal-impriża konġunta.

1.2.3.1.   Informazzjoni kuntestwali dwar il-KPI tal-fatturat

L-impriżi mhux finanzjarji għandhom jipprovdu dan li ġej kollu:

(a) 

tqassim kwantitattiv tan-numeratur sabiex jintwerew l-ixprunaturi ewlenin tal-bidla fil-fatturat KPI matul il-perjodu tar-rapportar, bħal dħul minn kuntratti mal-klijenti, dħul minn lokazzjoni, jew sorsi oħra ta’ introjtu;

(b) 

informazzjoni dwar l-ammonti relatati mal-attivitajiet allinjati mat-Tassonomija li jwettqu l-impriżi mhux finanzjarji għall-konsum intern proprju;

(c) 

spjegazzjoni kwalitattiva tal-elementi ewlenin ta’ bidla fil-KPI tal-fatturat matul il-perjodu ta’ rappurtar.

L-impriżi mhux finanzjarji li ħarġu bonds jew titoli ta’ dejn ambjentalment sostenibbli bil-għan li jiffinanzjaw attivitajiet speċifiċi identifikati allinjati mat-Tassonomija għandhom jiddivulgaw ukoll il-fatturat KPI aġġustat biex jiġi evitat l-għadd doppju.

1.2.3.2.   Informazzjoni kuntestwali dwar il-KPI tal-CapEx

L-impriżi mhux finanzjarji għandhom jipprovdu diżaggregazzjoni kwantitattiva fil-livell aggregat tal-attività ekonomika tal-ammonti inklużi fin-numeratur u fl-ispjegazzjoni kwalitattiva tal-elementi ewlenin tal-bidla fil-KPI CapEx matul il-perjodu tar-rapportar. Tali diżaggregazzjoni għandha tiddivulga dan kollu li ġej:

(a) 

aggregazzjoni ta’ żidiet fil-proprjetà, l-impjanti u t-tagħmir, fl-assi intanġibbli ġġenerati internament, inkluż f’kombinament ta’ negozji jew akkwistati, fil-proprjetajiet ta’ investiment akkwistati jew rikonoxxuti fl-ammont riportat u, fejn applikabbli, għall-assi kapitalizzati bid-dritt tal-użu;

(b) 

aggregazzjoni taż-żidiet relatati mal-akkwiżizzjonijiet permezz ta’ kombinamenti ta’ negozji;

(c) 

aggregazzjoni tal-ispejjeż imġarrba b’rabta mal-attivitajiet ekonomiċi allinjati mat-Tassonomija u mal-ispejjeż imġarrba bħala parti minn pjan CapEx imsemmi fil-punt 1.1.2. ta’ dan l-Anness.

L-impriżi mhux finanzjarji għandhom jiddivulgaw l-informazzjoni ewlenija dwar kull wieħed mill-pjanijiet CapEx tagħhom imsemmija fil-punt 1.1.2. ta’ dan l-Anness, inklużi dawn kollha li ġejjin:

(a) 

l-objettivi ambjentali segwiti;

(b) 

l-attivitajiet ekonomiċi kkonċernati;

(c) 

l-attivitajiet ta’ riċerka, żvilupp u innovazzjoni kkonċernati, fejn rilevanti;

(d) 

il-perjodu ta’ żmien li matulu kull attività ekonomika allinjata mat-Tassonomija hija mistennija li tiġi estiża jew fejn kull attività ekonomika hija mistennija li ssir allinjata mat-Tassonomija, inkluż, meta l-perjodu li fih l-attività ekonomika hija mistennija li ssir allinjata mat-Tassonomija jaqbeż il-ħames snin, ġustifikazzjoni oġġettiva ta’ tali perjodu itwal, ibbażata fuq il-karatteristiċi speċifiċi tal-attività ekonomika u t-titjib ikkonċernat;

(e) 

l-ispiża kapitali totali li mistennija tiġġarrab matul il-perjodu tar-rapportar u matul il-perjodu ta’ żmien tal-pjanijiet CapEx.

Impriża mhux finanzjarja li ħarġet bonds jew titoli ta’ dejn ambjentalment sostenibbli bl-għan li tiffinanzja attivitajiet speċifiċi identifikati allinjati mat-Tassonomija għandha tiddivulga wkoll il-KPI CapEx aġġustat għan-nefqa kapitali allinjata mat-Tassonomija ffinanzjata minn tali bonds jew titoli ta’ dejn.

1.2.3.3.   Informazzjoni kuntestwali dwar il-KPI tal-OpEx

L-impriżi mhux finanzjarji għandhom jipprovdu dan li ġej kollu:

(a) 

diżaggregazzjoni kwantitattiva tan-numeratur (in-nefqa operattiva ddeterminata skont il-punt 1.1.3.2 ta’ dan l-Anness) biex jintwerew l-elementi ewlenin tal-bidla fl-OpEx KPI matul il-perjodu tar-rapportar;

(b) 

spjegazzjoni kwalitattiva tal-elementi ewlenin tal-bidla fl-OpEx KPI matul il-perjodu ta’ rapportar;

(c) 

spjegazzjoni tal-infiq l-ieħor relatat mas-servizzjar minn jum għal jum ta’ entrati ta’ impjanti u tagħmir ta’ proprjetà li huma inklużi fil-kalkolu tal-OpEx kemm għan-numeratur kif ukoll għad-denominatur.

Meta OpEx tkun parti minn pjan CapEx kif imsemmi fil-punti 1.1.2.2. u 1.1.3.2. ta’ dan l-Anness, l-impriżi mhux finanzjarji għandhom jiddivulgaw l-informazzjoni ewlenija dwar kull wieħed mill-pjanijiet CapEx tagħhom f’konformità mar-rekwiżiti tal-punt 1.2.3.2. ta’ dan l-Anness.

2.    metodoloġija għar-rappurtar tal-KPIs li għandha tiġi ddivulgata minn impriżi mhux finanzjarji

Ir-rekwiżiti li ġejjin għandhom japplikaw għad-divulgazzjonijiet skont l-Artikolu 8(2) tar-Regolament (UE) 2020/852:

(a) 

l-impriżi mhux finanzjarji għandhom jidentifikaw kull attività ekonomika, inkluż subsett ta’ attivitajiet ekonomiċi tranżizzjonali u abilitanti;

(b) 

l-impriżi mhux finanzjarji għandhom jiddivulgaw il-KPIs għal kull attività ekonomika u l-KPIs totali għall-attivitajiet ekonomiċi kollha fil-livell tal-impriża jew tal-grupp rilevanti;

(c) 

l-impriżi mhux finanzjarji għandhom jiddivulgaw il-KPIs stabbiliti fil-punti 1.1.1, 1.1.2. u 1.1.3. ta’ dan l-Anness għal kull objettiv ambjentali u l-KPIs totali għall-objettivi ambjentali kollha fil-livell tal-impriża jew tal-grupp fl-objettivi ambjentali kollha filwaqt li jiġi evitat l-għadd doppju;

(d) 

l-impriżi mhux finanzjarji għandhom jidentifikaw il-proporzjon tal-attivitajiet ekonomiċi allinjati mat-Tassonomija u l-proporzjon tal-attivitajiet ekonomiċi eliġibbli għat-Tassonomija li ma jissodisfawx il-kriterji tekniċi tal-iskrinjar. Fi ħdan attività ekonomika eliġibbli għat-Tassonomija, l-impriżi mhux finanzjarji għandhom jidentifikaw il-proporzjon ta’ dik l-attività li hija allinjata mat-Tassonomija;

(e) 

l-impriżi mhux finanzjarji għandhom jidentifikaw l-attivitajiet ekonomiċi mhux eliġibbli tat-Tassonomija u jiddivulgaw il-proporzjon fid-denominatur tal-fatturat KPI ta’ dawk l-attivitajiet ekonomiċi fil-livell tal-impriża jew tal-grupp;

(f) 

Il-KPIs għandhom jiġu pprovduti fil-livell tal-impriża individwali fejn dik l-impriża tħejji biss rapporti mhux finanzjarji individwali jew fil-livell tal-grupp fejn l-impriża tħejji rapporti mhux finanzjarji konsolidati



ANNESS II

Formoli għall-KPIs ta’ impriżi mhux finanzjarji

Formola: Il-proporzjon tal-fatturat minn prodotti jew servizzi assoċjati ma’ attivitajiet ekonomiċi allinjati mat-Tassonomija - divulgazzjoni li tkopri s-sena N

image