EUR-Lex Access to European Union law
This document is an excerpt from the EUR-Lex website
Document 02012R0070-20130701
Regulation (EU) No 70/2012 of the European Parliament and of the Council of 18 January 2012 on statistical returns in respect of the carriage of goods by road (recast) (Text with EEA relevance)
Consolidated text: Regolament (UE) Nru 70/2012 tal-Parlament Ewropew u tal-Kunsill tat- 18 ta’ Jannar 2012 dwar prospetti tal-istatistika rigward it-trasport ta’ merkanzija bit-triq (riformulazzjoni) (Test b’relevanza għaż-ŻEE)
Regolament (UE) Nru 70/2012 tal-Parlament Ewropew u tal-Kunsill tat- 18 ta’ Jannar 2012 dwar prospetti tal-istatistika rigward it-trasport ta’ merkanzija bit-triq (riformulazzjoni) (Test b’relevanza għaż-ŻEE)
2012R0070 — MT — 01.07.2013 — 001.003
Dan id-dokument ġie magħmul bil-ħsieb li jintuża bħala għodda ta’ dokumentazzjoni u l-istituzzjonijiet ma jassumu l-ebda responsabbiltà għall-kontenut tiegħu
|
REGOLAMENT (UE) Nru 70/2012 TAL-PARLAMENT EWROPEW U TAL-KUNSILL tat-18 ta’ Jannar 2012 dwar prospetti tal-istatistika rigward it-trasport ta’ merkanzija bit-triq (riformulazzjoni) (ĠU L 032 3.2.2012, p. 1) |
Emendat bi:
|
|
|
Il-Ġurnal Uffiċjali |
||
|
No |
page |
date |
||
|
REGOLAMENT TAL-KUNSILL (UE) Nru 517/2013 tat-13 ta’ Mejju 2013 |
L 158 |
1 |
10.6.2013 |
|
Ikkoreġut b'
REGOLAMENT (UE) Nru 70/2012 TAL-PARLAMENT EWROPEW U TAL-KUNSILL
tat-18 ta’ Jannar 2012
dwar prospetti tal-istatistika rigward it-trasport ta’ merkanzija bit-triq
(riformulazzjoni)
(Test b’relevanza għaż-ŻEE)
IL-PARLAMENT EWROPEW U L-KUNSILL TAL-UNJONI EWROPEA,
Wara li kkunsidraw it-Trattat dwar il-Funzjonament tal-Unjoni Ewropea, u b’mod partikolari l-Artikolu 338(1) tiegħu,
Wara li kkunsidraw il-proposta mill-Kummissjoni Ewropea,
Wara t-trażmissjoni tal-abbozz tal-att leġiżlattiv lill-parlamenti nazzjonali,
Filwaqt li jaġixxu skont il-proċedura leġiżlattiva ordinarja ( 1 ),
Billi:|
(1) |
Ir-Regolament tal-Kunsill (KE) Nru 1172/98 tal-25 ta’ Mejju 1998 dwar prospetti tal-istatistika rigward it-trasport ta’ merkanzija bit-triq ( 2 ) ġie emendat kemm-il darba b’mod sostanzjali. Peress li għandhom isiru iktar emendi, dak ir-Regolament għandu jiġi riformulat fl-interessi taċ-ċarezza. |
|
(2) |
Sabiex twettaq ix-xogħlijiet mogħtija lilha fil-kuntest tal-politika komuni tat-trasport, il-Kummissjoni għandu jkollha għad-dispożizzjoni tagħha data tal-istatistika komparabbli, ta’ min jorbot fuqha, sinkronizzata, regolari u komprensiva dwar l-iskala u l-iżvilupp tat-trasport tal-merkanzija bit-triq permezz ta’ vetturi rreġistrati fl-Unjoni, u dwar il-grad ta’ utilizzazzjoni tal-vetturi li jwettqu dan it-trasport. |
|
(3) |
Huwa neċessarju li jinġabru statistiki reġjonali komprensivi kemm rigward it-trasport tal-merkanzija kif ukoll rigward il-vjaġġi tal-vetturi. |
|
(4) |
Hu għalhekk xieraq li jiġi żgurat li l-oriġini u d-destinazzjoni reġjonali tat-trasport fl-Unjoni tkun deskritta fuq l-istess bażi tat-trasport nazzjonali, u li tiġi pprovduta rabta bejn it-trasport tal-merkanzija u l-vjaġġi tal-vetturi billi jitkejjel il-grad tal-utilizzazzjoni tal-vetturi li jwettqu dan it-trasport. |
|
(5) |
Skont il-prinċipju tas-sussidjarjetà, il-ħolqien ta’ standards tal-istatistika komuni li jippermettu l-produzzjoni ta’ informazzjoni armonizzata jista’ biss jinkiseb aħjar fil-livell tal-Unjoni, filwaqt li d-data tinġabar f’kull Stat Membru taħt l-awtorità tal-entitajiet u l-istituzzjonijiet inkarigati mill-ġbir tal-istatistiki uffiċjali. |
|
(6) |
Ir-Regolament (KE) Nru 223/2009 tal-Parlament Ewropew u tal-Kunsill tal-11 ta’ Marzu 2009 dwar l-istatistika Ewropea ( 3 ) jipprovdi qafas ta’ referenza għad-disposizzjonijiet stabbiliti minn dan ir-Regolament, b’mod partikulari dawk relatati mal-aċċess għas-sorsi tad-data amministrattivi, l-effetività tal-infiq tar-riżorsi disponibbli u l-kunfidenzjalità tal-istatistika. |
|
(7) |
Il-komunikazzjoni tad-data individwali, ladarba ssir anonima, tkun neċessarja sabiex tiġi stmata l-preċiżjoni globali tar-riżultati. |
|
(8) |
Huwa importanti li jkun żgurat li l-informazzjoni tal-istatistika tinxtered b’mod adegwat. |
|
(9) |
Fid-dawl tas-sitwazzjoni ġeografika speċifika ta’ Malta, il-vjaġġi tat-trasport bit-triq tagħha ta’ distanza qasira, in-network tat-toroq limitat tagħha u l-piż sproporzjonat li l-ġbir ta’ tali data jikkawża għall-awtoritajiet Maltin, Malta għandha tingħata deroga. |
|
(10) |
Sabiex jitqiesu l-iżviluppi ekonomiċi u tekniċi, għandha tiġi delegata lill-Kummissjoni is-setgħa li jiġu adottati atti delegati skont l-Artikolu 290 tat-Trattat dwar il-Funzjonament tal-Unjoni Ewropea fir-rigward tal-aġġornament tal-Parti 1 tal-Anness I, ħlief għal kwalunkwe modifiki għan-natura fakultattiva tal-informazzjoni mitluba, u tal-adattament tal-Annessi II sa VII. Huwa ta’ importanza partikolari li l-Kummissjoni twettaq konsultazzjonijiet xierqa matul il-ħidma preparatorja tagħha, inkluż fil-livell ta’ esperti. Il-Kummissjoni, meta tkun qed tħejji u tfassal atti delegati, għandha tiżgura trażmissjoni simultanja, fil-ħin u xierqa, tad-dokumenti rilevanti lill-Parlament Ewropew u lill-Kunsill. |
|
(11) |
Sabiex ikunu żgurati kundizzjonijiet uniformi għall-implimentazzjoni ta’ dan ir-Regolament, għandhom jingħataw setgħat ta’ implimentazzjoni lill-Kummissjoni. Dawk is-setgħat għandhom ikunu eżerċitati skont ir-Regolament (UE) Nru 182/2011 tal-Parlament Ewropew u tal-Kunsill tas-16 ta’ Frar 2011 li jistabbilixxi r-regoli u l-prinċipji ġenerali dwar il-modalitajiet ta’ kontroll mill-Istati Membri tal-eżerċizzju mill-Kummissjoni tas-setgħat ta’ implimentazzjoni ( 4 ), |
ADOTTAW DAN IR-REGOLAMENT:
Artikolu 1
Suġġett u kamp ta’ applikazzjoni
1. Kull Stat Membru għandu jiġbor statistiki għall-Unjoni dwar it-trasport ta’ merkanzija bit-triq permezz ta’ vetturi tat-triq għat-trasport tal-merkanzija li jkunu rreġistrati f’dak l-Istat Membru, u dwar il-vjaġġi li jsiru minn vetturi bħal dawn.
2. Dan ir-Regolament m’għandux japplika għat-trasport tal-merkanzija bit-triq permezz ta’:
(a) vetturi tat-triq għat-trasport tal-merkanzja li l-piż awtorizzat jew id-dimensjonijiet tagħhom jeċċedu l-limiti normalment permessi fl-Istati Membri kkonċernati;
(b) vetturi agrikoli, vetturi militari u vetturi li jkunu tal-amministrazzjonijiet ċentrali jew pubbliċi lokali, bl-eċċezzjoni ta’ vetturi tat-triq għat-trasport tal-merkanzija li jkunu ta’ impriżi pubbliċi, u b’mod partikulari ta’ impriżi ferrovjarji.
Kull Stat Membru jista’ jeskludi mill-kamp ta’ applikazzjoni ta’ dan ir-Regolament il-vetturi tat-triq għat-trasport tal-merkanzija li l-kapaċità tat-tagħbija tagħhom jew il-piż massimu permissibbli tagħhom jkun anqas minn ċertu limitu. Dan il-limitu ma jistax jaqbeż kapaċità tat-tagħbija ta’ 3,5 tunnellata metrika jew piż massimu permissibbli ta’ 6 tunnellati metriċi fil-każ ta’ vetturi b’mutur wieħed.
3. Dan ir-Regolament m’għandux japplika għal Malta, sakemm in-numru ta’ vetturi għat-trasport tal-merkanzija bit-triq reġistrati Malta li jkunu liċenzjati li jittrasportaw il-merkanzija internazzjonalment bit-triq ma jaqbiżx l-400 vettura. Għal dak il-għan, Malta ta’ kull sena għandha tippreżenta lill-Eurostat in-numru ta’ vetturi għat-trasport tal-merkanzija bit-triq liċenzjati li jittrasportaw il-merkanzija internazzjonalment bit-triq sa mhux iktar tard mill-aħħar ta’ Marzu wara s-sena li għaliha jirrelata n-numru ta’ vetturi għat-trasport tal-merkanzija bit-triq.
Artikolu 2
Definizzjonijiet
Għall-finijiet ta’ dan ir-Regolament, għandhom japplikaw id-definizzjonijiet li ġejjin:
|
(a) |
“trasport tal-merkanzija bit-triq” : it-trasport kollu tal-merkanzija permezz ta’ vettura tat-triq għat-trasport tal-merkanzija; |
|
(b) |
“il-vettura tat-trasport bit-triq” : vettura tat-triq li tkun mgħammra b’mutur li jkun il-mezz waħdieni għall-propulsjoni tagħha, li hi normalment użata għat-trasport ta’ persuni jew ta’ merkanzija bit-triq, jew għall-ġbid, fit-triq, ta’ vetturi użati għat-trasport ta’ persuni jew merkanzija; |
|
(c) |
“vettura tat-triq għat-trasport tal-merkanzija” : vettura tat-triq iddisinjata esklużivament jew primarjament għat-trasport tal-merkanzija (trakk, karru, nofs karru); |
|
(d) |
“vettura għat-trasport tal-merkanzija bit-triq” : kwalunkwe vettura singola tat-triq għat-trasport, jew kombinazzjoni ta’ vetturi tat-triq, jiġifieri ferrovija tat-triq jew vettura artikolata iddisinjati għat-trasport tal-merkanzija; |
|
(e) |
“trakk” : vettura tat-triq riġida ddisinjata esklużivament jew primarjament għal trasport ta’ merkanzija; |
|
(f) |
“żiemel” : vettura tat-triq għat-trasport iddisinjata esklużivament jew primarjament biex tiġbed vetturi oħra tat-triq li ma jkunux misjuqa minn mutur (prinċipalment nofs karrijiet); |
|
(g) |
“karru” : vettura tat-triq għat-trasport tal-merkanzija ddisinjata biex tinġibed minn vettura tat-trasport bit-triq; |
|
(h) |
“nofs karru” : vettura tat-triq għat-trasport tal-merkanzija mingħajr fus fuq quddiem iddisinjata b’dan il-mod biex parti mill-vettura u parti sostanzjali tal-piż mgħobbi tagħha tistrieħ fuq iż-żiemel; |
|
(i) |
“vettura artikolata” : żiemel imqabbad ma’ nofs karru; |
|
(j) |
“tren tat-triq” : vettura tat-triq għat-trasport tal-merkanzija imqabbda ma’ karru jew vettura artikolata b’karru ieħor imqabbad magħha; |
|
(k) |
“irreġistrat” : l-istat ta’ meta vettura titniżżel f’reġistru ta’ vetturi tat-triq għat-trasport, miżmum minn entità uffiċjali fi Stat Membru, sew jekk ir-reġistrazzjoni tkun akkumpanjata mill-ħruġ tal-pjanċa tar-reġistrazzjoni sew jekk le. Fil-każ ta’ trasport permezz ta’ kombinazzjoni ta’ vetturi tat-triq għat-trasport, jiġifieri tren tat-triq jew vettura artikolata, fejn il-vettura tat-triq għat-trasport tal-merkanzija u l-karru jew nofs karru jkunu rreġistrati f’pajjiżi differenti, il-vettura sħiħa għandha titqies bħala li tkun irreġistrata fil-pajjiż fejn il-vettura tat-triq għat-trasport tal-merkanzija tkun irreġistrata; |
|
(l) |
“il-kapaċità għat-tagħbija” : il-piż massimu tal-merkanzija ddikjarat permessibbli mill-awtorità kompetenti tal-pajjiż tar-reġistrazzjoni tal-vettura. Meta l-vettura għat-trasport tal-merkanzija bit-triq tkun tren tat-triq magħmula minn trakk bil-karru, il-kapaċità tat-tagħbija tat-tren tat-triq tkun it-total tal-kapaċità tat-tagħbija tat-trakk u tal-karru; |
|
(m) |
“il-piż massimu permissibbli” : il-piż totali tal-vettura (jew il-kombinazzjoni tal-vetturi) meta din tkun wieqfa u lesta għat-triq u l-piż tat-tagħbija iddikjarat permissibbli mill-awtorità kompetenti tal-pajjiż tar-reġistrazzjoni tal-vettura; |
|
(n) |
“Eurostat” : id-dipartiment tal-Kummissjoni responsabbli għat-twettiq tax-xogħlijiet li jaqgħu fuq il-Kummissjoni fis-settur tal-produzzjoni tal-istatistiki tal-Unjoni. |
Artikolu 3
Ġbir tad-data
1. L-Istati Membri għandhom jiġbru data tal-istatistika li jkollha x’taqsam mas-setturi li ġejjin:
(a) il-vetturi;
(b) il-vjaġġ;
(c) il-merkanzija.
2. Il-varjabbli fl-istatistiki ta’ kull żona, id-definizzjoni tagħhom u l-livelli fil-klassifikazzjoni użata għall-analiżi statistika jidhru fl-Annessi I sa VII.
3. Meta jkun qed jiġi deċiż il-metodu li għandu jiġi użat għall-ġbir tad-data tal-istatistika, l-Istati Membri għandhom jieqfu milli jwettqu kwalunkwe formalità fuq il-fruntieri ta’ bejn l-Istati Membri.
4. Il-Kummissjoni għandha tingħata s-setgħa tadotta, meta jkun hemm bżonn, atti delegati skont l-Artikolu 8 dwar l-aġġornar tal-Parti 1 tal-Anness I, unikament biex jitqiesu l-iżviluppi ekonomiċi u tekniċi, ħlief għal kwalunkwe modifika għan-natura fakultattiva tal-informazzjoni meħtieġa.
Il-Kummissjoni għandha tingħata s-setgħa wkoll li tadotta, meta jkun hemm bżonn, atti delegati skont l-Artikolu 8 dwar l-adattazzjoni tal-Anness II sa VII biex jitqiesu l-iżviluppi ekonomiċi u tekniċi.
Meta tkun qed teżerċita s-setgħa tagħha skont dan il-paragrafu, il-Kummissjoni għandha tiżgura li kwalunkwe att delegat adottat ma jimponix piżijiet amministrattivi addizzjonali sinifikanti fuq l-Istati Membri u fuq dawk li jwieġbu.
Artikolu 4
Preċiżjoni tar-riżultati tal-istatistika
L-Istati Membri għandhom jiżguraw li l-metodi tagħhom għall-ġbir u l-ipproċessar tad-data tal-istatistika huma mfassla biex jiżguraw li r-riżultati tal-istatistika trażmessi skont dan ir-Regolament ikunu preċiżi biżżejjed sabiex il-Kummissjoni tkun tista’ jkollha għad-dispożizzjoni tagħha data tal-istatistika kumparabbli, affidabbli, sinkronizzata, regolari u komprensiva, filwaqt li jitqiesu l-karatteristiċi strutturali tat-trasport bit-triq fl-Istati Membri.
Għall-finijiet tal-ewwel paragrafu, il-Kummissjoni għandha, permezz tal-atti ta’ implimentazzjoni, tadotta regoli tekniċi dettaljati dwar il-preċiżjoni tad-data tal-istatistika meħtieġa. Dawk l-atti ta’ implimentazzjoni għandhom jiġu adottati b’konformità mal-proċedura ta’ eżami msemmija fl-Artikolu 9(2).
Artikolu 5
Trażmissjoni tar-riżultati tal-istatistika lill-Eurostat
1. L-Istati Membri għandhom jittrażmettu lill-Eurostat kull tliet xhur id-data individwali verifikata kif suppost li tikkorrispondi mal-varjabbli imsemmija fl-Artikolu 3 u elenkati fl-Anness I, mingħajr l-indikazzjoni tal-isem, l-indirizz jew in-numru tar-reġistrazzjoni.
Trażmissjoni bħal din għandha, fejn ikun xieraq, tinkludi d-data statistika li jkollha x’taqsam ma’ termini trimensili preċedenti li għalihom id-data trażmessa kienet proviżorja.
2. Il-Kummissjoni għandha, permezz ta’ atti ta’ implimentazzjoni, tadotta l-arranġamenti għat-trażmissjoni tad-data msemmija fil-paragrafu 1, inklużi, fejn xieraq, l-iskedi tal-istatistika bbażati fuq dik id-data. Dawk l-atti ta’ implimentazzjoni għandhom jiġu adottati skont il-proċedura ta’ eżami msemmija fl-Artikolu 9(2).
3. It-trażmissjoni tad-data kif imsemmija fil-paragrafu 1 għandha sseħħ fi żmien ħames xhur mit-tmiem ta’ kull perjodu trimensili ta’ osservazzjoni.
L-ewwel trażmissjoni għandha tkopri l-ewwel tliet xhur tal-1999.
Artikolu 6
Disseminazzjoni tar-riżultati tal-istatistika
Ir-riżultati tal-istatistika fir-rigward tat-trasport ta’ merkanzija bit-triq għandhom jiġu disseminati mhux iktar tard minn 12-il xahar wara li jispiċċa l-perjodu li jirrelataw għalihom ir-riżultati.
Il-Kummissjoni għandha, permezz ta’ atti ta’ implimentazzjoni, tadotta regoli dwar id-disseminazzjoni tar-riżultati tal-istatistika dwar it-trasport ta’ merkanzija bit-triq, inklużi l-istruttura u l-kontenut tar-riżultati li għandhom jiġu disseminati. Dawk l-atti ta’ implimentazzjoni għandhom jiġu adottati skont il-proċedura ta’ eżami msemmija fl-Artikolu 9(2).
Artikolu 7
Rapporti
1. L-Istati Membri għandhom jgħaddu lill-Eurostat, fid-data jew qabel id-data li fiha l-informazzjoni tal-ewwel tliet xhur tiġi mgħoddija, rapport dwar il-metodi użati għall-ġbir tad-data statistika.
L-Istati Membri għandhom ukoll jgħaddu lill-Eurostat id-dettalji ta’ kwalunkwe tibdil sostanzjali fil-metodi użati għall-ġbir tad-data statistika.
2. L-Istati Membri għandhom jipprovdu lill-Eurostat bl-informazzjoni ta’ kull sena dwar id-daqs tal-kampjuni, ir-rati ta’ dawk li ma weġbux u, fil-forma ta’ żball normali jew intervalli tal-kunfidenza, kemm ikunu ta’ min jorbot fuqhom ir-riżultati tal-istatistika ewlenin.
3. Sal-31 ta’ Diċembru 2014 u kull tliet snin wara dan, il-Kummissjoni għandha tippreżenta rapport dwar l-implimentazzjoni ta’ dan ir-Regolament lill-Parlament Ewropew u lill-Kunsill. Dak ir-rapport għandu jevalwa b’mod partikolari l-kwalità tad-data statistika trażmessa, il-metodi għall-ġbir tad-data kif ukoll il-piżijiet amministrattivi fuq l-Istati Membri u fuq min iwieġeb. Ir-rapport, jekk dan ikun xieraq, għandu jkun akkumpanjat minn proposti biex tiġi modifikata l-lista tal-varjabbli, u jittieħed kont tas-sejbiet ta’ proġetti relatati, b’mod partikolari dawk dwar l-emissjonijiet tat-tniġġis tal-arja ikkawżati mit-trasport tal-merkanizja bit-triq.
Artikolu 8
Eżerċizzju tad-delega
1. Is-setgħa ta’ adozzjoni tal-atti delegati tingħata lill-Kummissjoni suġġett għall-kondizzjonijiet stipulati f’dan l-Artikolu.
2. Is-setgħa ta’ adozzjoni tal-atti delegati msemmija fl-Artikolu 3(4) għandha tingħata lill-Kummissjoni għal perjodu ta’ ħames snin mit-23 ta’ Frar 2012. Il-Kummissoni għandha tfassal rapport dwar is-setgħat delegati sa mhux aktar tard minn disa’ xhur qabel it-tmiem tal-perjodu ta’ ħames snin. Id-delegazzjoni tas-setgħa għandha tiġi taċitament estiża għal perjodi ta’ tul identiku, ħlief jekk il-Parlament Ewropew jew il-Kunsill jopponu tali estensjoni mhux aktar tard minn tliet xhur qabel tmiem kull perjodu.
3. Id-delega tas-setgħa msemmija fl-Artikolu 3(4), tista’ tkun revokata fi kwalunkwe ħin mill-Parlament Ewropew jew mill-Kunsill. Deċiżjoni ta’ revoka għandha ttemm id-delega tas-setgħat speċifikati f’dik id-deċiżjoni. Din tidħol fis-seħħ fil-jum wara l-pubblikazzjoni tad-deċiżjoni f’Il-Ġurnal Uffiċjali tal-Unjoni Ewropea jew f’data sussegwenti li tkun speċifikata fiha. Din ma taffettwax il-validità tal-atti delegati li huma diġà fis-seħħ.
4. Hekk kif tadotta att delegat, il-Kummissjoni għandha tinnotifika fl-istess ħin lill-Parlament Ewropew u lill-Kunsill.
5. Kull att delegat adottat skont l-Artikolu 3(4) għandu jidħol fis-seħħ biss jekk il-Parlament Ewropew jew il-Kunsill ma jkunux esprimew oġġezzjoni fi żmien xahrejn min-notifika tal-imsemmi att lill-Parlament Ewropew u lill-Kunsill jew jekk, qabel ma jagħlaq dan iż-żmien, il-Parlament Ewropew u l-Kunsill informaw it-tnejn li huma lill-Kummissjoni li mhumiex se joġġezzjonaw. Dak il-perjodu għandu jiġi estiż b’xahrejn fuq l-inizjattiva tal-Parlament Ewropew jew tal-Kunsill.
Artikolu 9
Proċedura fil-kumitat
1. Il-Kummissjoni għandha tkun assistita mill-Kumitat tas-Sistema Ewropea tal-Istatistika stabbilit mir-Regolament (KE) Nru 223/2009. Dak il-kumitat għandu jkun kumitat fis-sens tar-Regolament (UE) Nru 182/2011.
2. Meta ssir referenza għal dan il-paragrafu, għandu japplika l-Artikolu 5 tar-Regolament (UE) Nru 182/2011.
Artikolu 10
Tħassir
Ir-Regolament (KE) Nru 1172/98 huwa mħassar.
Referenzi għar-Regolament imħassar għandhom jinftiehmu bħala referenzi għal dan ir-Regolament u għandhom jinqraw skont it-tabella ta’ korrelazzjoni fl-Anness IX.
Artikolu 11
Dħul fis-seħħ
Dan ir-Regolament għandu jidħol fis-seħħ fl-għoxrin jum wara dak tal-pubblikazzjoni tiegħu f’Il-Ġurnal Uffiċjali tal-Unjoni Ewropea.
Dan ir-Regolament għandu jorbot fl-intier tiegħu u japplika direttament fl-Istati Membri kollha.
ANNESSI
|
Anness I |
IL-LISTA TAL-VARJABBLI U APPENDIĊI METODOLOĠIKA |
|
Anness II |
IL-KLASSIFIKAZZJONI TAL-KONFIGURAZZJONIJIET TAL-FUS |
|
Anness III |
IL-KLASSIFIKAZZJONI TAT-TIPI TA' VJAĠĠI |
|
Anness IV |
IL-KLASSIFIKAZZJONI TAL-MERKANZIJA |
|
Anness V |
IL-KLASSIFIKAZZJONI TA' KATEGORIJI TA' MERKANZIJA PERIKOLUŻA |
|
Anness VI |
IL-KLASSIFIKAZZJONI TAT-TIPI TAL-MERKANZIJA |
|
Anness VII |
IL-KODIFIKA TAL-POSTIJIET FEJN ISSIR IT-TAGĦBIJA U L-ĦATT TAL-PAJJIŻI U R-REĠJUNI |
|
Anness VIII |
REGOLAMENT IMĦASSAR FLIMKIEN MA' LISTA TAL-EMENDI SUĊĊESSIVI TIEGĦU |
|
Anness IX |
TABELLA TA' KORRELAZZJONI |
ANNESS I
Parti 1
LISTA TA' VARJABBLI
A1. il-varjabbli li għandhom x'jaqsmu mal-vettura;
A2. il-varjabbli li għandhom x'jaqsmu mal-vjaġġ;
A3. il-varjabbli li għandhom x'jaqsmu mal-merkanzija (fl-operazzjoni bażika tat-trasport).
A1. IL-VARJABBLI RELATATI MAL-VETTURA
Skont id-definizzjoni mogħtija fl-Artikolu 2, punt (d), vettura għat-trasport tal-merkanzija bit-triq għandha tkun kwalunkwe vettura singola għat-trasport bit-triq, jew kombinazzjoni ta’ vetturi tat-triq, jiġifieri tren tat-triq jew vettura artikulata iddisinjati għat-trasport tal-merkanzija.
Il-varjabbli li għandhom x'jaqsmu mal-vettura li għandhom jingħataw huma dawn li ġejjin:
1. il-possibbiltà tal-użu tal-vetturi għat-trasport ikkombinat (mhux obbligatorju);
2. il-konfigurazzjoni tal-fus skont l-Anness II (mhux obbligatorju);
3. kemm għandha żmien fi snin (mill-ewwel reġistrazzjoni tagħha) il-vettura għat-trasport bit-triq (it-trakk jew iż-żiemel);
4. il-piż massimu permissibbli, f'100 kg;
5. il-kapaċità għat-tagħbija, f'100 kg;
6. l-operatur tal-vettura NACE Rev. 2 fil-livell tal-klassi (livell b'erba' diġitali) (mhux obbligatorju) ( 5 );
7. it-tip ta’ trasport (b'kiri jew b'kumpens/għal rasu);
8. it-total ta’ kilometri misjuqa matul il-perjodu tas-sondaġġ;
8.1. imgħobbi;
8.2. vojt (inklużi l-vjaġġi taż-żiemel mingħajr nofs karru) (mhux obbligatorju);
9. il-vettura piżata, li għandha tintuża biex jinkisbu r-riżultati kompleti mid-data individwali jekk id-data tkun inġabret fuq il-bażi ta’ kampjuni kif jiġu.
Il-konfigurazzjonijiet suċċessivi
Meta l-vettura għat-trasport bit-triq magħżula għas-sondaġġ ikun trakk waħdu, jiġifieri mingħajr karru, matul il-perjodu tas-sondaġġ, din tkun tikkonstitwixxi fiha nfisha l-vettura tat-triq għat-trasport tal-merkanzija.
Madanakollu, meta l-vettura għat-trasport bit-triq li tintgħażel għas-sondaġġ tkun żiemel — li f'dak il-każ ikollu nofs karru mehmuż miegħu — jew meta jkun trakk li miegħu jkun mehmuż karru, id-data meħtieġa taħt dan ir-Regolament tkun dwar il-vettura għat-trasport tal-merkanzija tat-triq meħuda bħala ħaġa sħiħa. F'dan il-każ, jista' jkun hemm bidla fil-konfigurazzjoni matul il-perjodu tas-sondaġġ (bi trakk li miegħu jiżdied karru jew li jibdel il-karru matul il-perjodu, jew żiemel li jibdel il-karru tiegħu). F'każ bħal dan, dawn il-konfigurazzjonijiet suċċessivi għandhom jiġu rreġistrati, u d-data fuq il-vettura għandha tiġi fornuta għal kull vjaġġ. Madanakollu, jekk ma jkunx possibbli li dawn il-konfigurazzjonijiet suċċessivi jiġu rreġistrati, hemm qbil li, fil-każ tal-varjabbli relatati mal-vetturi, dawk li jikkorrispondu mal-konfigurazzjoni fil-bidu tal-ewwel vjaġġ li jkun sar bit-tagħbija matul il-perjodu tas-sondaġġ jew mal-konfirgurazzjoni l-aktar użata matul dak il-perjodu jiġu rreġistrati.
It-tibdil fit-tip tat-trasport
Bl-istess mod, skont il-vjaġġ, it-trasport jista' jsir għal rasu, għall-kiri jew għall-kumpens, u t-tip ta’ trasport għandu jiġi rreġistrat għal kull vjaġġ. Madanakollu, jekk ma jkunx possibbli li jiġu rreġistrati dawn il-bidliet, hemm qbil li “t-tip ta’ trasport” irreġistrat ikun dak li jikkorrispondi mal-mod prinċipali tal-utilizzazzjoni.
A2. IL-VARJABBLI LI GĦANDHOM X'JAQSMU MAL-VJAĠĠ
Matul il-perjodu tas-sondaġġ, il-vettura għat-trasport tal-merkanzija bit-triq tagħmel vjaġġi, jew bla tagħbija (ma jkun hemm ebda merkanzija jew kontenituri vojta fit-trakk, il-karru jew in-nofs karru, li jkunu għalhekk “kompletament vojta”) jew bit-tagħbija (ikun hemm jew merkanzija inkella kontenituri vojta fit-trakk, il-karru jew in-nofs karru, filwaqt li l-kontenituri vojta jkunu ta’ tip partikolari ta’ merkanzija). Id-distanza tal-vettura tat-triq għat-trasport tal-merkanzija meta mgħobbija hija d-distanza bejn l-ewwel post tat-tagħbija u l-aħħar post tal-ħatt (fejn il-vettura għat-trasport tal-merkanzija tkun kompletament żvojtata). Vjaġġ bit-tagħbija jista' għalhekk ikopri ħafna operazzjonijiet bażiċi ta’ trasport.
Il-varjabbli li għandhom jingħataw għal kull vjaġġ huma li ġejjin:
1. it-tip tal-vjaġġ skont in-nomenklatura fl-Anness III;
2. il-piż tal-merkanzija li nġarret matul il-vjaġġ jew matul kull stadju tal-vjaġġ, il-piż gross f'100 kg;
3. il-post tat-tagħbija (tal-vettura għat-trasport tal-merkanzija bit-triq, għal vjaġġ bit-tagħbija):
— id-definizzjoni: il-post tat-tagħbija huwa l-ewwel post li minnu l-merkanzija titgħabba fuq il-vettura għat-trasport tal-merkanzija bit-triq, li qabel kienet kompletament vojta (jew fejn iż-żiemel jiġi mehmuż ma’ nofs karru mgħobbi). Għal vjaġġ bla tagħbija, dan huwa l-post tal-ħatt tal-vjaġġ bit-tagħbija preċedenti (l-idea tal-“post fejn jibda l-vjaġġ bla tagħbija”),
— il-kodifika: il-post tat-tagħbija jiġi kkodifikat skont l-Anness VII;
4. il-post tal-ħatt (tal-vettura għat-trasport tal-merkanzija bit-triq, għal vjaġġ bit-tagħbija):
— definizzjoni: il-post tal-ħatt huwa l-aħħar post li fih il-merkanzija tinħatt minn fuq il-vettura għat-trasport tal-merkanzija bit-triq, li wara tkun kompletament vojta (jew fejn iż-żiemel ikun sganċjat minn man-nofs karru). Għal vjaġġ bla tagħbija, huwa l-post tat-tagħbija tal-vjaġġ bit-tagħbija li jkun imiss (l-idea tal-“post fejn jispiċċa l-vjaġġ bla tagħbija”),
— kodifika: il-post tal-ħatt jiġi kkodifikat skont l-Anness VII;
5. id-distanza vvjaġġata: id-distanza attwali bl-esklużjoni tad-distanza magħmula mill-vettura għat-trasport tal-merkanzija bit-triq meta tkun qed tiġi trasportata minn mezz ieħor ta’ trasport;
6. it-tunnellata — il-kilometru magħmula matul il-vjaġġ;
7. il-pajjiżi (mhux aktar minn ħamsa), li jgħaddu minnhom fit-transitu, ikkodifikati skont l-Anness VII;
8. il-post tat-tagħbija, jekk ikun hemm, tal-vettura għat-trasport tal-merkanzija bit-triq fuq mezz ieħor ta’ trasport skont l-Anness VII (mhux obbligatorju);
9. il-post tal-ħatt, jekk ikun hemm, tal-vettura għat-trasport tal-merkanzija bit-triq minn mezzi oħra ta’ trasport skont l-Anness VII (mhux obbligatorju);
10. is-sitwazzjoni “mgħobbi totalment” (proċedura 2) jew “mhux mgħobbi totalment” (proċedura 1) tal-vettura għat-trasport tal-merkanzija bit-triq matul il-vjaġġ inkwestjoni, f'termini tal-volum massimu ta’ spazju użat matul il-vjaġġ (il-proċedura 0 = skont il-konvenzjoni għal vjaġġi bla tagħbija) (mhux obbligatorju).
A3. IL-VARJABBLI LI GĦANDHOM X'JAQSMU MAL-MERKANZIJA (fl-operazzjoni bażika tat-trasport)
Matul vjaġġ bit-tagħbija, jistgħu jitwettqu bosta operazzjonijiet bażiċi tat-trasport, operazzjoni bażika tat-trasport tkun imfissra bħala trasport ta’ tip wieħed ta’ merkanzija (imfissra b'referenza għal livell partikulari tan-nomenklatura) bejn il-post fejn titgħabba u l-post fejn tinħatt.
Il-varjabbli li għandhom jingħataw relatati ma’ operazzjoni bażika tat-trasport matul vjaġġ bit-tagħbija huma dawn li ġejjin:
1. it-tip tal-merkanzija, skont il-livell ta’ diviżjoni li tirreferi għal klassifikazzjoni xierqa (ara l-Anness IV);
2. il-piż tal-merkanzija: il-piż gross f'100 kg;
3. jekk ikun meħtieġ, il-klassifikazzjoni tal-merkanzija bħala perikoluża skont il-kategorji ewlenin tad-Direttiva 2008/68/KE tal-Parlament Ewropew u tal-Kunsill tal-24 ta’ Settembru 2008 dwar it-trasport fuq l-art ta’ oġġetti perikolużi ( 6 ) mogħtija fl-Anness V ta’ dan ir-Regolament;
4. it-tip tat-tagħbija kif mogħtija fl-Anness VI (mhux obbligatorju);
5. il-post tat-tagħbija tal-merkanzija, ikkodifikat skont l-Anness VII;
6. il-post tal-ħatt tal-merkanzija, ikkodifikat skont l-Anness VII;
7. id-distanza vvjaġġata, id-distanza attwali bl-esklużjoni tad-distanza misjuqa mill-vettura għat-trasport tal-merkanzija bit-triq waqt li tkun qed tiġi trasportata minn mezzi oħra ta’ trasport.
L-operazzjonijiet tat-trasport imwettqa matul vjaġġ tat-tip “dawra jew ġbir jew distribuzzjoni” (vjaġġ tat-tip 3)
Għal dan it-tip ta’ vjaġġ, b'ħafna postijiet ta’ tagħbija u/jew ħatt, tkun ħaġa prattikament impossibbli li wieħed jitlob lill-operaturi tat-trasport biex jiddeskrivu l-operazzjonijiet bażiċi tat-trasport.
Fil-każ ta’ dawn il-vjaġġi, meta dawn jiġu identifikati bħala tali, tinħoloq ġeneralment operazzjoni tat-trasport bażika, singola u nominali fuq il-bażi tal-informazzjoni dwar il-vjaġġ.
Kull Stat Membru għandu jinforma lill-Kummissjoni dwar id-definizzjoni tiegħu għal dan it-tip ta’ vjaġġ u jispjega l-assunzjonijiet simplifikanti li hu jiġi obbligat li japplika fil-ġbir tad-data dwar l-operazzjonijiet ta’ trasport korrispondenti.
Parti 2
APPENDIĊI METODOLOĠIKA
Vjaġġi bit-tagħbija u operazzjonijiet bażiċi tat-trasport
Waqt li jiddependi mill-Istat Membru kkonċernat, l-informazzjoni dwar it-trasport tinġabar fuq il-bażi ta':
— deskrizzjoni ta’ kull operazzjoni bażika ta’ trasport ta’ merkanzija (b'dettalji addizzjonali dwar vjaġġi bla tagħbija),
— jew deskrizzjoni tal-vjaġġi magħmula mill-vettura fit-twettiq ta’ dawn l-operazzjonijiet bażiċi għat-trasport tal-merkanzija.
Fil-maġġoranza tal-każijiet, meta jsir vjaġġ bit-tagħbija dan ikun jirrappreżenta operazzjoni bażika waħda ta’ trasport:
— b'tip wieħed ta’ merkanzija mgħobbija (b'referenza għall-klassifikazzjoni tal-merkanzija użata, f'dan il-każ l-20 diviżjoni derivata mill-klassifikazzjoni tal-NST) ( 7 ),
— b'post wieħed għat-tagħbija tal-merkanzija,
— b'post wieħed għall-ħatt tal-merkanzija.
F'dan il-każ iż-żewġ metodi użati jkunu kompletament ekwivalenti, u l-informazzjoni miġbura miż-żewġ metodi tiddeskrivihom it-tnejn:
— it-trasport tal-merkanzija (l-operazzjonijiet bażiċi kollha għat-trasport tal-merkanzija),
— il-vjaġġi li jsiru mill-vetturi fit-twettiq ta’ dan it-trasport, bid-dettalji tal-kapaċitajiet tal-vetturi u l-utilizzazzjoni ta’ dawn il-kapaċitajiet (il-vjaġġ bit-tagħbija bil-koeffiċjent tal-utilizzazzjoni; il-vjaġġ bla tagħbija).
Skont dan ir-Regolament, it-trasport tal-merkanzija u l-vjaġġi li jsiru mill-vetturi għandhom jiġu deskritti t-tnejn, imma mhux mixtieq li tiġi imposta fuq l-operaturi tat-trasport żieda eċċessiva fil-piż tal-istatistiki billi dawn jintalbu jiddeskrivu fid-dettall it-trasport tal-merkanzija u l-vjaġġi tal-vetturi.
Għalhekk, l-NSOs fl-Istati Membri, waqt il-kodifika tal-kwestjonarji, għandhom jikkostitwixxu mill-ġdid id-data li ma tkunx espliċitament meħtieġa mill-operaturi tat-trasport mid-data li dawn jiġbru fuq il-bażi tal-“operazzjoni bażika tal-ġarr” jew tal-“vjaġġ tal-vettura”.
Il-problema tqum meta ħafna operazzjonijiet bażiċi tat-trasport isiru matul vjaġġ wieħed bit-tagħbija, li jista' jkun minħabba:
— li jkun hemm ħafna postijiet tat-tagħbija u/jew tal-ħatt tal-merkanzija (imma jkunu limitati fil-għadd, inkella dawn ikunu dawriet ta’ ġbir jew distribuzzjoni, li jkunu jeħtieġu trattament speċjali). F'dan il-każ dawn id-diversi postijiet ta’ tagħbija u/jew ta’ ħatt jiġu rreġistrati, sabiex jiġu kkalkulati direttament it-tunnellat-il-kilometru li jkunu saru matul il-vjaġġ, u l-uffiċċju tal-istatistika jkun jista' jikkostitwixxi mill-ġdid l-operazzjonijiet bażiċi tat-trasport;
— u/jew
— jkun hemm ħafna tipi ta’ merkanzija trasportati matul il-vjaġġ bit-tagħbija, fatt li ġeneralment ma jitniżżilx fl-istatistiki, peress li tip wieħed biss ta’ merkanzija (singola jew prinċipali) jintalab. F'dan il-każ it-telf tal-informazzjoni jiġi aċċettat u l-Istati Membri li jwettqu dan it-tip ta’ simplifikazzjoni għandhom jagħmlu referenza espliċita għalih lill-Kummissjoni.
ANNESS II
IL-KLASSIFIKAZZJONI TAL-KONFIGURAZZJONIJIET TAL-FUS
Meta tintuża kombinazzjoni ta’ vetturi, il-konfigurazzjoni tal-fus tgħodd l-għadd totali ta’ fusien, jiġifieri l-fusien tat-trakk jew taż-żiemel, flimkien ma’ dawk tal-karru jew nofs karru.
Il-kategoriji tal-fusien huma dawn li ġejjin:
|
|
Il-kodifika |
|
1. L-għadd tal-fusien fil-każ ta’ vetturi singoli (trakkijiet): |
|
|
2 |
120 |
|
3 |
130 |
|
4 |
140 |
|
oħrajn |
199 |
|
2. L-għadd ta’ fusien fil-każ ta’ kombinazzjonijiet ta’ vetturi: trakk u karru: |
|
|
2+1 |
221 |
|
2+2 |
222 |
|
2+3 |
223 |
|
3+2 |
232 |
|
3+3 |
233 |
|
oħrajn |
299 |
|
3. L-għadd ta’ fusien fil-każ ta’ kombinazzjonijiet ta’ vetturi: żiemel u nofs karru: |
|
|
2+1 |
321 |
|
2+2 |
322 |
|
2+3 |
323 |
|
3+2 |
332 |
|
3+3 |
333 |
|
oħrajn |
399 |
|
4. Żiemel biss |
499 |
ANNESS III
IL-KLASSIFIKAZZJONI TAT-TIPI TA' VJAĠĠI
1. Vjaġġ bit-tagħbija li jinvolvi operazzjoni bażika waħda ta’ ġarr.
2. Vjaġġ bit-tagħbija li jinvolvi ħafna operazzjonijiet ta’ ġarr, imma li ma jkunx ikkunsidrat bħala dawra ta’ ġbir jew distribuzzjoni.
3. Vjaġġ bit-tagħbija tat-tip ta’ dawra ta’ ġbir jew distribuzzjoni.
4. Vjaġġi bla tagħbija.
ANNESS IV
IL-KLASSIFIKAZZJONI TAL-MERKANZIJA
|
Diviżjoni |
Deskrizzjoni |
|
01 |
Prodotti tal-agrikoltura, tal-kaċċa u tal-forestrija; ħut u prodotti oħra tas-sajd |
|
02 |
Faħam u lignite; żejt mhux raffinat u gass naturali |
|
03 |
Metalli mhux maħduma u prodotti oħra tal-minjieri u tal-barrieri; pit; uranju u torju |
|
04 |
Prodotti tal-ikel, xorb u tabakk |
|
05 |
Tessuti u prodotti tat-tessuti; ġilda u prodotti tal-ġilda |
|
06 |
Injam u prodotti tal-injam u tas-sufra (għajr għamara); oġġetti magħmulin mit-tiben u materjal tal-immaljar; polpa, karta u prodotti tal-karta; materjal stampat u materjal irrekordjat |
|
07 |
Kokk u prodotti taż-żejt irraffinat |
|
08 |
Kimiċi, prodotti kimiċi, u fibri magħmula mill-bniedem; gomma u prodotti tal-plastik; fjuwil nukleari |
|
09 |
Prodotti oħra minerali li mhumiex metalliċi |
|
10 |
Metalli bażiċi; prodotti ffabbrikati mill-metall, għajr makkinarju u tagħmir |
|
11 |
Makkinarju u tagħmir n.e.c.; makkinarju tal-uffiċċji u kompjuters; makkinarju u apparat elettriku n.e.c.; tagħmir u apparat tar-radju, tat-televiżjoni u tal-komunikazzjoni; strumenti mediċi, ta’ preċiżjoni u ottiċi; arloġġi tal-id u arloġġi oħrajn |
|
12 |
Tagħmir ta’ trasport |
|
13 |
Għamara; oġġetti oħra manifatturati n.e.c. |
|
14 |
Materja prima sekondarja; skart muniċipali u tip ieħor ta’ skart |
|
15 |
Posta, pakketti postali |
|
16 |
Tagħmir u materjal utilizzat għat-trasport tal-merkanzija |
|
17 |
Oġġetti imressqa fil-ġarr minn djar u uffiċċji; bagalji trasportati separatament mill-passiġġieri; vetturi bil-mutur li jinġarru għat-tiswija; oġġetti oħra li ma jkunux għas-suq n.e.c. |
|
18 |
Merkanzija raggruppata: taħlita ta’ tipi ta’ merkanzija li huma trasportati flimkien |
|
19 |
Merkanzija mhux identifikabbli: merkanzija li għal xi raġuni ma tistax tiġi identifikata u għalhekk ma tistax tiġi assenjata lill-gruppi 1–16. |
|
20 |
Merkanzija oħra n.e.c. |
ANNESS V
IL-KLASSIFIKAZZJONI TA’ KATEGORIJI TA’ MERKANZIJA PERIKOLUŻA
|
1 |
Splussivi |
|
2 |
Gassijiet, ikkumpressati, likwifikati jew imdewba taħt pressjoni |
|
3 |
Likwidi li jieħdu n-nar |
|
4.1 |
Solidi li jieħdu n-nar |
|
4.2 |
Sostanzi li jaqbdu weħidhom |
|
4.3 |
Sostanzi li, f’kuntatt mal-ilma, jarmu gassijiet li jaqbdu |
|
5.1 |
Sostanzi ossidanti |
|
5.2 |
Perossidi organiċi |
|
6.1 |
Sostanzi tossiċi |
|
6.2 |
Sostanzi li jistgħu jikkaġunaw infezzjonijiet |
|
7 |
Materjal radjuattiv |
|
8 |
Korrużivi |
|
9 |
Sostanzi perikolużi mixxellanji |
ANNESS VI
IL-KLASSIFIKAZZJONI TAT-TIPI TAL-MERKANZIJA ( 8 )
|
0 |
Merkanzija likwida mhux stivata (bla unità ta’ tagħbija) |
|
1 |
Merkanzija solida mhux stivata (bla unità ta’ tagħbija) |
|
2 |
Kontenituri kbar ta’ merkanzija |
|
3 |
Kontenituri oħrajn ta’ merkanzija |
|
4 |
Merkanzija li tinġarr fuq pallets |
|
5 |
Merkanzija qabel ma tiġi mbragata |
|
6 |
Unitajiet mobbli awtomoventi |
|
7 |
Unitajiet mobbli oħra |
|
8 |
(Riservat) |
|
9 |
Tipi oħra ta’ merkanzija |
ANNESS VII
IL-KODIFIKA TAL-POSTIJIET FEJN ISSIR T-TAGĦBIJA U L-ĦATT TAL-PAJJIŻI U R-REĠJUNI
1. Il-postijiet fejn issir it-tagħbija u l-ħatt għandhom jiġu kkodifikati kif ġej:
(a) analiżi reġjonali fi gruppi sal-Livell 3 tan-Nomenklatura tal-Entitajiet Territorjali għall-Istatistika (NUTS), għall-Istati Membri;
(b) listi ta’ reġjuni amministrattivi mogħtijin mill-pajjiż terz ikkonċernat, rigward Stati li mhumiex membri iżda li huma partijiet kontraenti tal-Ftehim dwar Iż-Żona Ekonomika Ewropea (ŻEE), jiġifieri l-Islanda, Liechtenstein u n-Norveġja;
(c) il-kodiċi 2-alpha ISO 3166, għal pajjiżi terzi oħra. L-aktar kodiċi li jintużaw ta’ spiss qed jidhru fit-tabella tal-punt 2(b) ta’ dan l-Anness.
2. Għall-kodifika ta’ pajjiżi li jsir qsim minn ġo fihom waqt it-transitu (sezzjoni 7 ta’ l-Anness I, parti A2), għandhom jintużaw dawn il-kodiċi tal-pajjiżi li ġejjin:
(a) il-parti 2-alpha tal-kodiċi NUTS, kif jidhru fit-tabella t'hawn taħt, għall-Istati Membri;
(b) il-kodiċi 2-alpha ISO 3166, għall-pajjiżi l-oħrajn kollha. L-aktar kodiċi li jintużaw ta’ spiss jidhru fit-tabella ta’ hawn taħt.
TABELLA TAL-KODIĊIJIET TAL-PAJJIŻI
(a) Stati membri (li jikkorrispondu għall-kodiċijiet tal-pajjiżi 2-alpha NUTS)
|
Pajjiż |
Kodiċi |
|
Il-Belġju |
BE |
|
Il-Bulgarija |
BG |
|
Ir-Repubblika Ċeka |
CZ |
|
Id-Danimarka |
DK |
|
Il-Ġermanja |
DE |
|
L-Estonja |
EE |
|
L-Irlanda |
IE |
|
Il-Greċja |
►C1 EL ◄ |
|
Spanja |
ES |
|
Franza |
FR |
|
Il-Kroazja |
HR |
|
L-Italja |
IT |
|
Ċipru |
CY |
|
Il-Latvja |
LV |
|
Il-Litwanja |
LT |
|
Il-Lussemburgu |
LU |
|
L-Ungerija |
HU |
|
Malta |
MT |
|
Il-Pajjiżi l-Baxxi |
NL |
|
L-Awstrija |
AT |
|
Il-Polonja |
PL |
|
Il-Portugall |
PT |
|
Ir-Rumanija |
RO |
|
Is-Slovenja |
SI |
|
Is-Slovakkja |
SK |
|
Il-Finlandja |
FI |
|
L-Isvezja |
SE |
|
Ir-Renju Unit |
UK |
|
Nota: pajjiżi fl-ordni uffiċjali tal-Unjoni Ewropea |
|
(b) Pajjiżi oħra (b'kodiċi 2-alpha ISO 3166)
|
Pajjiż |
Kodiċi |
|
Albanija |
AL |
|
Bosnija u Ħerzegovina |
BA |
|
Il-Bjelorussja |
BY |
|
L-Isvizzera |
CH |
|
▼M1 ————— |
|
|
L-Islanda |
IS |
|
Liechtenstein |
LI |
|
Ir-Repubblika ta’ Moldova |
MD |
|
Montenegro |
ME |
|
Dik li kienet ir-Repubblika Jugoslava tal-Maċedonja |
MK (1) |
|
In-Norveġja |
NO |
|
Il-Federazzjoni Russa |
RU |
|
Is-Serbja |
RS |
|
It-Turkija |
TR |
|
L-Ukraina |
UA |
|
(1) Kodiċi provviżorju, li ma jippreġudikax bl-ebda mod l-isem definittiv ta’ dan il-pajjiż, li għandu jiġi miftiehem wara l-konklużjonijiet tan-negozjati li għaddejjin bħalissa fuq dan is-suġġett fin-Nazzjonijiet Uniti. Nota: pajjiżi fl-ordni tal-kodiċi. |
|
ANNESS VIII
REGOLAMENT IMĦASSAR FLIMKIEN MA' LISTA TAL-EMENDI SUĊĊESSIVI TIEGĦU
|
Regolament tal-Kunsill (KE) Nru 1172/98 (ĠU L 163, 6.6.1998, p. 1) |
|
|
Ir-Regolament tal-Kummissjoni (KE) Nru 2691/1999 (ĠU L 326, 18.12.1999, p. 39) |
|
|
Punt 10.15 tal-Anness II tal-Att tal-Adeżjoni tal-2003 (ĠU L 236, 23.9.2003, p. 561) |
|
|
Regolament (KE) Nru 1882/2003 tal-Parlament Ewropew u tal-Kunsill (ĠU L 284, 31.10.2003, p. 1) |
L-Anness II, il-punt 27 biss |
|
Ir-Regolament tal-Kunsill (KE) Nru 1791/2006 (ĠU L 363, 20.12.2006, p. 1) |
L-Anness, il-punt 8.5 biss |
|
Regolament (KE) Nru 1893/2006 tal-Parlament Ewropew u tal-Kunsill (ĠU L 393, 30.12.2006, p. 1) |
L-Artikolu 13 biss |
|
Regolament tal-Kummissjoni (KE) Nru 1304/2007 (ĠU L 290, 8.11.2007, p. 14) |
L-Artikolu 2 biss |
|
Regolament (KE) Nru 399/2009 tal-Parlament Ewropew u tal-Kunsill (ĠU L 126, 21.5.2009, p. 9) |
|
ANNESS IX
TABELLA TA’ KORRELAZZJONI
|
Regolament (KE) Nru 1172/98 |
Dan ir-Regolament |
|
L-Artikolu 1 |
L-Artikolu 1 |
|
L-Artikolu 2, mill-ewwel sal-erbatax-il inċiż |
L-Artikolu 2, punti (a) sa (n) |
|
L-Artikolu 3 |
L-Artikolu 3 |
|
L-Artikolu 4 |
L-Artikolu 4 |
|
L-Artikolu 5(1), (2) u (3) |
L-Artikolu 5(1), (2) u (3) |
|
L-Artikolu 5(4) |
— |
|
L-Artikolu 5(5) |
— |
|
L-Artikolu 6 |
L-Artikolu 6 |
|
L-Artikolu 7(1) u (2) |
L-Artikolu 7(1) u (2) |
|
L-Artikolu 7(3) |
— |
|
L-Artikolu 8 |
— |
|
— |
L-Artikolu 8 |
|
L-Artikolu 10(1) u (2) |
L-Artikolu 9(1) u (2) |
|
L-Artikolu 10(3) |
— |
|
L-Artikolu 11 |
— |
|
— |
L-Artikolu 10 |
|
L-Artikolu 12 |
L-Artikolu 11 |
|
L-Annessi A sa G |
L-Annessi I sa VII |
|
— |
L-Anness VIII |
|
— |
L-Anness IX |
( 1 ) Il-Pożizzjoni tal-Parlament Ewropew tal-1 ta’ Diċembru 2011 (għadha mhijiex ippubblikata fil-Ġurnal Uffiċjali) u id-Deċiżjoni tal-Kunsill tat-12 ta’ Diċembru 2011.
( 2 ) ĠU L 163, 6.6.1998, p. 1.
( 3 ) ĠU L 87, 31.3.2009, p. 164.
( 4 ) ĠU L 55, 28.2.2011, p. 13.
( 5 ) Il-klassifikazzjoni tal-istatistika tal-attivitajiet ekonomiċi fl-Unjoni Ewropea
( 6 ) ĠU L 260, 30.9.2008, p. 13.
( 7 ) NST: In-nomenklatura uniformi tal-merkanzija għall-istatistiki tal-ġarr.
( 8 ) Il-Kummissjoni Ekonomika tan-Nazzjonijiet Uniti għall-Ewropa — Kodiċi għat-tipi ta’ merkanzija, pakketti u materjali tal-imballaġġ, ir-Rakkomandazzjoni 21 adottata mill-Grupp ta’ Ħidma dwar l-Iffaċilitar tal-Proċeduri għall-Kummerċ Internazzjonali, Ġinevra, Marzu 1986.