DEĊIŻJONI TAL-KUNSILL Nru 2 ta' l-1997

(Adottata fid-9 laqgħa fit-18 ta' Ġunju 1997)

LINJI GWIDA GĦALL-AĊĊESS TAL-PUBBLIKU GĦAL DOKUMENTI TA' L-EFTA

IL-KUNSILL,

Bix-xewqa li jikseb trasparenza akbar u għoti aħjar ta' informazzjoni lill-pubbliku dwar l-attivitajiet ta' l-EFTA

Konvint li hu utli li l-pubbliku jingħata l-aktar aċċess wiesa' possibbli għad-dokumenti ta' l-EFTA,

Wara li kkunsidra l-abbozz ta' linji gwida mgħoddija għall-kunsiderazzjoni tal-Kunsill ta' l-EFTA mill-Kumitat Permanenti ta' l-Istati ta' l-EFTA fil-laqgħa tiegħu tas-26 ta' Settembru 1996.

IDDEĊIEDA LI:

Il-linji gwida għall-aċċess tal-pubbliku għad-dokumenti ta' l-EFTA kif stabbiliti fl-Anness għal din id-Deċiżjoni huma hawnhekk approvati u jistgħu jitpoġġew għad-dispożizzjoni tal-pubbliku ġenerali.

Din id-deċiżjoni għandha tidħol fis-seħħ hekk kif tkun adottata mill-Kumitat Permanenti ta' l-Istati ta' l-EFTA.

ANNESS

LINJI GWIDA GĦALL-AĊĊESS TAL-PUBBLIKU GĦAL DOKUMENTI TA' L-EFTA

Dawn il-linji gwida japplikaw għal talbiet indirizzati lis-Segretarjat ta' l-EFTA għal aċċess tal-pubbliku għal dokumenti ta' l-EFTA:

DOKUMENTI PUBBLIĊI TA' L-EFTA

Id-dokumenti ta' l-EFTA li ġejjin huma pubbliċi:

—	Il-Konvenzjoni ta' Stokkolma;

—	Il-Ftehim ta' Kummerċ Ħieles ma' pajjiżi terzi;

—	Id-Dikjarazzjonijiet Konġunti dwar il-kooperazzjoni;

—	Ir-Rapporti Annwali ta' l-EFTA

Id-dokumenti ta' l-EFTA/ŻEE li ġejjin huma pubbliċi:

—	Il-Ftehim taż-ŻEE;

—	Il-Verżjoni Konsolidata ta' l-Annessi għall-Ftehim taż-ŻEE u s-Supplement taż-ŻEE għall-Ġurnal Uffiċjali;

—	L-aġendi tal-Kunsill taż-ŻEE;

—	Il-konklużjonijiet tal-Kunsill taż-ŻEE;

—	L-Aġendi tal-Kumitat Konġunt taż-ŻEE;

—	Id-Deċiżjonijiet tal-Kumitat Konġunt taż-ŻEE;

—	L-Aġendi tal-Kumitat Permanenti ta' l-Istati ta' l-EFTA;

—	Il-Listi tad-Deċiżjonijiet adottati tal-Kumitat Konġunt taż-ŻEE;

—	Il-Listi ta' proposti ta' Leġiżlazzjoni tal-KE li jistgħu jkunu ta' relevanza għall-Ftehim taż-ŻEE (‘l-acquis fi stadju ta' żvilupp’ tal-KE);

—	Il-Listi ta' leġiżlazzjoni adottata tal-KE li qed tiġi kkunsidrata l-inkorporazzjoni tagħha fil-Ftehim taż-ŻEE;

—	Id-dokumenti ta' informazzjoni dwar programmi magħżula fil-qasam tas-Sottokumitat IV.

Il-biċċa l-kbira ta' l-informazzjoni msemmija hawn fuq tinsab fuq is-Sit ta' l-Internet ta' l-EFTA (www.efta.int)

DOKUMENTI OĦRA TA' L-EFTA

Il-prinċipju tat-trasparenza huwa applikat kemm jista' jkun. L-aċċess tal-pubbliku għad-dokumenti ta' l-EFTA japplika fir-rispett xieraq tad-dispożizzjonijiet li jirregolaw il-protezzjoni ta' l-informazzjoni kklassifikata. Madankollu, il-klassifikazzjoni ta' kwalunkwe dokument mhux bilfors li teskludi lil dan l-istess dokument milli jitpoġġa għad-dispożizzjoni tal-pubbliku. L-aċċess jista' jkun miċħud meta l-iżvelar tad-dokumenti jista' jkun ta' ħsara:

—	għall-ħarsien ta' l-interess pubbliku (sigurtà pubblika, relazzjonijiet internazzjonali, eċċ);

—	għall-ħarsien ta' l-individwu u tal-privatezza;

—	għall-ħarsien tas-segretezza kummerċjali u industrijali;

—	għall-ħarsien ta' l-interessi finanzjarji ta' l-EFTA;

—	għall-ħarsien tal-kunfidenzjalità kif mitluba mill-persuna li tkun tat l-informazzjoni, jew kif mitlub mil-Leġiżlazzjoni ta' l-Istat Membru li jkun ta l-informazzjoni;

—	għaIl-ħarsien ta' l-interess ta' l-istituzzjoni fil-kunfidenzjalità tal-proċedimenti.

KIF JINKISEB AĊĊESS PUBBLIKU GĦAD-DOKUMENTI L-OĦRA TA' L-EFTA

Meta jirċievi talbiet għall-aċċess pubbliku għal dokumenti oħrajn ta' l-EFTA, is-Segretarjat għandu jippreżenta dawn it-talbiet lid-delegazzjonijiet ta' l-EFTA għall-approvazzjoni, u dawn għandhom jieħdu azzjoni dwarhom mingħajr dewmien. Jekk talba tiġi miċħuda, l-entitajiet li jista' jsir rikors għalihom huma l-Kunsill ta' l-EFTA għal dokumenti dwar attivitajiet li jkunu twettqu f'Ġinevra, u l-Kumitat Permanenti ta' l-Istati ta' l-EFTA għal dokumenti dwar attivitajiet li jkunu twettqu fi Brussell.