Min aħna

L-Aġenzija tal-Unjoni Ewropea għat-Tmexxija Operattiva ta’ Sistemi tal-IT fuq Skala Kbira fl- Ispazju ta’ Libertà, Sigurtà u Ġustizzja (eu-LISA), li nħolqot fl-2011, hija rregolata bir-Regolament (UE) 2018/1726 tal-Parlament Ewropew u tal-Kunsill (1).

L-eu-LISA hija responsabbli mit-tmexxija operattiva tas-Sistema ta’ Informazzjoni ta’ Schengen (SIS II) (2), tas-Sistema ta’ Informazzjoni dwar il-Viża (VIS) (3), il-Eurodac (4), id-DubliNet (5), l-implimentazzjoni ta’ referenza ECRIS (6) u l-e-CODEX (7).

L-Aġenzija ġiet ukoll fdata bit-tħejjija, l-iżvilupp jew il-ġestjoni operattiva tas-Sistema ta’ Dħul/Ħruġ (EES) (8), is-Sistema Ewropea ta’ Informazzjoni u Awtorizzazzjoni għall-Ivvjaġġar (ETIAS) (9), l-ECRIS-TCN (10), verżjoni riveduta tal-Eurodac (11), kif ukoll żvilupp ta’ soluzzjonijiet ta’ interoperabbiltà (12) bejn sistemi tal-IT fuq skala kbira.

eu-LISA hija wkoll inkarigata bl-iżvilupp u t-tħaddim ta’ pjattaforma ta’ kollaborazzjoni biex tappoġġa l-funzjonament ta’ timijiet ta’ investigazzjoni konġunti (JITs CP) (13), il-Pjattaforma tal-Applikazzjoni tal-Viża tal-UE (14), u r-router Prüm II (15), l-aġġornament ta’ DubliNet għall-fini tar-Regolament dwar l-ażil u l-ġestjoni tal-migrazzjoni (16), u biex tiżgura konnessjonijiet nazzjonali u aċċess għal data speċifika għall-iskrinjar ta’ ċittadini ta’ pajjiżi terzi fil-fruntiera esterna (17). eu-LISA hija wkoll responsabbli għall-kompiti relatati mal-infrastruttura tal-komunikazzjoni tas-sistemi mogħtija lilha, ħlief għal dawk is-sistemi li jużaw EuroDomain għal dan il-għan (18).

L-objettiv tal-eu-LISA huwa li tiżgura l-iżvilupp ta’ sistemi tal-IT fuq skala kbira, l-operat effettiv, sigur u kontinwu ta’ sistemi tal-IT fuq skala kbira; it-tmexxija effiċjenti u finanzjament responsabbli tas-sistemi tal-IT fuq skala kbira; kwalità adegwatament għolja tas-servizz għall-utenti tas-sistemi tal-IT fuq skala kbira; kontinwità u servizz mingħajr interruzzjoni; livell għoli ta’ protezzjoni tad-data u livell xieraq ta’ sigurtà tad-data u tas-sigurtà fiżika.

Is-sede tal-Aġenzija se tkun Tallinn, fl-Estonja. Il-kompiti relatati mal-iżvilupp u l-ġestjoni operattiva jitwettqu fis-sit tekniku fi Strasburgu, Franza. Sit ta’ riżerva jinsab installat f’Sankt Johann im Pongau, fl-Awstrija.

L-eu-LISA hija allokata 399 membru tal-persunal u għas-sena 2024 għandha baġit ta’ EUR 265,44 miljun.

X’qegħdin nipproponu

Qed nipproponu l-kariga tad-Direttur Eżekuttiv tal-eu-LISA.

Id-Direttur Eżekuttiv se jmexxi l-Aġenzija, ikun ir-rappreżentant legali tagħha u jkun responsabbli mill-implimentazzjoni tal-kompiti assenjati lill-Aġenzija mir-Regolament li joħloqha. Se jassisti u jagħti rendikont lill-Bord tat-Tmexxija u se jirrapporta lill-Parlament Ewropew dwar il-qadi ta’ dmirijietu meta jiġi mistieden jagħmel dan. Il-Kunsill jista' jistieden lid-Direttur Eżekuttiv jirrapporta dwar it-twettiq ta’ dmirijietu.

Id-Direttur Eżekuttiv jmexxi/tmexxi u jimmaniġġja/timmaniġġja l-Aġenzija u jieħu/tieħu responsabbiltà sħiħa mill-operazzjonijiet tagħha, billi jiżgura/tiżgura li jintlaħqu l-objettivi tal-Aġenzija. Ir-responsabbiltajiet speċifiċi jinkludu:

—	l-amministrazzjoni ta’ kuljum tal-Aġenzija u l-operat tal-Aġenzija;

—	it-tħejjija u l-implimentazzjoni tal-proċeduri, tad-deċiżjonijiet, tal-istrateġiji, tal-programmi u tal-attivitajiet adottati mill-Bord tat-Tmexxija, fil-limiti stabbiliti fir-Regolament li joħloqha, ir-regoli ta’ implimentazzjoni tiegħu u l-liġi tal-Unjoni applikabbli;

—	it-tħejjija tal-abbozz tal-baġit għas-sena ta’ wara, l-abbozz tad-dikjarazzjoni tal-estimi tad-dħul u l-infiq tal-Aġenzija, u d-dokument uniku tal-programmazzjoni;

—	ir-rapportar dwar l-implimentazzjoni tal-programmi ta’ ħidma, l-iżvilupp jew il-funzjonament tekniku ta’ kull sistema tal-IT fuq skala kbira;

—

il-ħarsien tal-interessi finanzjarji tal-Unjoni permezz ta’ miżuri preventivi kontra l-frodi, mill-korruzzjoni u minn kwalunkwe attività illegali oħra, billi jagħmel/tagħmel kontrolli effettivi u, jekk jinstabu xi irregolaritajiet, billi jirkupra/tirkupra l-ammonti li tħallsu bi żball u, meta dan ikun xieraq, billi jimponi/timponi penali amministrattivi u finanzjarji li jkunu effettivi, proporzjonati u dissważivi;

X’qegħdin infittxu (il-kriterji tal-għażla)

Il-kandidati jenħtieġ li jkollhom:

Ħiliet fl-immaniġġjar — Rekord ippruvat ta’ ġestjoni f’livell maniġerjali b’suċċess ta’ timijiet kbar u proġetti, inkluża l-kapaċità ta’ tmexxija, motivazzjoni u żvilupp tal-potenzjal ta’ tim bi sfondi multinazzjonali u multidixxiplinari; Esperjenza miksuba f’ambjent multikulturali tkun ta’ vantaġġ. — Esperjenza fil-ġestjoni ta’ riżorsi finanzjarji sinifikanti f’ambjent nazzjonali, Ewropew u/jew internazzjonali, inkluż l-ippjanar amministrattiv, baġitarju u l-kontroll intern.

Ħiliet u esperjenza speċjalizzati — Esperjenza ppruvata fil-qasam tas-sistemi tal-IT fuq skala kbira miksuba f’amministrazzjoni pubblika jew settur privat nazzjonali, Ewropew jew internazzjonali, inkluż permezz ta’ funzjonijiet mhux tekniċi. — Għarfien fil-qasam tal-protezzjoni tad-data. — Għarfien tajjeb tal-leġiżlazzjoni tal-Unjoni fuq l-iskambju tal-informazzjoni u sistemi tal-IT fuq skala kbira fil-qasam tal-libertà, tas-sigurtà u tal-ġustizzja jkun vantaġġ. — Fehim profond tal-kuntest tal-UE u tal-interazzjoni bejn l-amministrazzjonijiet nazzjonali u l-istituzzjonijiet tal-UE jkun ta’ vantaġġ.

Kwalitajiet personali — Kapaċitajiet interpersonali, analitiċi, ta’ teħid ta’ deċiżjonijiet, ħiliet organizzattivi u ta’ negozjar eċċellenti. — Il-kapaċità li jikkomunika/tikkomunika b’mod mexxej u effiċjenti u jibni/tibni relazzjonijiet ta’ ħidma tajbin mal-istituzzjonijiet tal-Unjoni Ewropea u ma’ diversi partijiet ikkonċernati esterni, kif ukoll li jirrappreżenta/tirrappreżenta l-aġenzija f’fora internazzjonali.

Kundizzjonijiet essenzjali (ir-rekwiżiti tal-eliġibbiltà)

Il-kandidati se jiġu kkunsidrati biss għall-fażi tal-għażla abbażi tar-rekwiżiti formali li ġejjin, li jridu jiġu ssodisfati sal-iskadenza għall-applikazzjonijiet:

—	Nazzjonalità: il-kandidati jridu jkunu ċittadini ta’ wieħed mill-Istati Membri tal-Unjoni Ewropea.

—

Lawrja jew diploma universitarja: il-kandidati jrid ikollhom: — livell ta’ edukazzjoni li jikkorrispondi għal studji universitarji mitmuma u ċċertifikati b’diploma, meta l-perjodu normali tal-edukazzjoni universitarja jkun ta’ erba’ (4) snin jew aktar; — jew inkella livell ta’ edukazzjoni li jikkorrispondi għal studji universitarji mitmuma ċċertifikati b’diploma u esperjenza professjonali xierqa ta’ mill-inqas sena (1) meta l-perjodu normali tal-edukazzjoni universitarja jkun tal-inqas tliet (3) snin (din is-sena ta’ esperjenza professjonali ma tistax tkun inkluża fl-esperjenza professjonali postgradwatorja meħtieġa hawn taħt).

—	Esperjenza professjonali: il-kandidati jrid ikollhom tal-inqas 15-il sena esperjenza professjonali postgradwatorja (19) f’livell li l-kwalifiki msemmija hawn fuq jagħtu aċċess għalih. Mill-inqas ħames (5) snin minn din l-esperjenza professjonali trid tkun fil-qasam tal-attivitajiet tal-Aġenzija.

—	Esperjenza maniġerjali: mill-anqas 5 snin mill-esperjenza professjonali postgradwatorja jridu jkunu nkisbu f’funzjoni maniġerjali ta’ livell għoli (20) f’qasam rilevanti għal din il-kariga.

—

Lingwi: il-kandidati jrid ikollhom għarfien tajjeb ħafna ta’ waħda mil-lingwi uffiċjali tal-Unjoni Ewropea (21) u għarfien sodisfaċenti ta’ lingwa oħra minn dawn il-lingwi uffiċjali. Waqt l-intervista/i, il-bordijiet tas-selezzjoni se jivverifikaw jekk il-kandidati jikkonformawx mar-rekwiżit ta’ għarfien sodisfaċenti ta’ lingwa uffiċjali oħra tal-UE. Dan jista’ jinkludi li l-intervista, jew parti minnha, issir f’din il-lingwa l-oħra.

—

Età massima: il-kandidati jridu jkunu jistgħu jlestu l-mandat kollu ta’ erba’ (5) snin qabel ma jilħqu l-età tal-irtirar, mill-mument tal-għeluq tal-applikazzjoni. Fil-każ tal-persunal temporanju tal-Unjoni Ewropea, l-età tal-irtirar hija definita bħala l-aħħar tax-xahar li fih il-persuna tagħlaq 66 sena (ara l-Artikolu 47 tal-Kundizzjonijiet tal-Impjieg applikabbli għall-Aġenti l-oħra tal-Unjoni Ewropea (22)).

Għażla u ħatra

Id-Direttur Eżekuttiv jinħatar mill-Bord Amministrattiv tal-eu-LISA abbażi ta’ lista mqassra ta’ mill-inqas tliet kandidati mħejjija mill-Kummissjoni Ewropea.

Sabiex tistabbilixxi din il-lista ristretta, il-Kummissjoni Ewropea torganizza selezzjoni skont il-proċeduri tal-għażla u tar-reklutaġġ tagħha (ara d-Dokument dwar il-Politika dwar Uffiċjali Għolja (23)).

Bħala parti minn din il-proċedura tal-għażla, il-Kummissjoni Ewropea tistabbilixxi bord tal-preselezzjoni. Dan il-bord janalizza l-applikazzjonijiet kollha, jipproċedi bl-ewwel verifika tal-eliġibbiltà u jidentifika l-kandidati li jkollhom l-aħjar profil fid-dawl tal-kriterji tal-għażla msemmija hawn fuq, u li jkunu jistgħu jiġu mistiedna għal intervista mal-bord tal-preselezzjoni.

B’segwitu ta’ dawn l-intervisti, il-bord tal-preselezzjoni jfassal il-konklużjonijiet tiegħu u jipproponi lista ta’ kandidati għal intervisti oħra mal-Kumitat Konsultattiv dwar il-Ħatriet (CCA, Consultative Committee on Appointments) tal-Kummissjoni Ewropea. Is-CCA, filwaqt li jqis il-konklużjonijiet tal-bord tal-preselezzjoni, jiddeċiedi dwar il-kandidati li għandhom jiġu mistiedna għal intervista.

Il-kandidati li jkunu msejħa għal intervista mas-CCA jipparteċipaw għal ġurnata sħiħa f’ċentru ta’ evalwazzjoni immexxi minn konsulenti tar-reklutaġġ esterni li jevalwaw il-ħiliet ta’ ġestjoni. Abbażi tar-riżultati tal-intervista u r-rapport taċ-ċentru ta’ evalwazzjoni, il-KKĦ jistabbilixxi lista preliminari tal-kandidati li jikkunsidra xierqa biex jaqdu l-funzjonijiet ta’ Direttur Eżekuttiv tal-eu-LISA.

Il-kandidati fuq il-lista qasira tas-CCA jiġu intervistati mill-Membru/i tal-Kummissjoni responsabbli għad-Direttorat Ġenerali inkarigat mir-relazzjonijiet mal-Aġenzija (24).

Wara dawn l-intervisti, il-Kummissjoni Ewropea tadotta lista mqassra ta’ mill-anqas tliet kandidati, li tiġi kkomunikata lill-Bord Amministrattiv tal-eu-LISA. Dan tal-aħħar jista’ jiddeċiedi li jintervista l-kandidati qabel jaħtar id-Direttur Eżekuttiv minn fost il-kandidati fuq il-lista ristretta tal-Kummissjoni. L-inklużjoni fuq il-lista ristretta ma tiggarantixxix il-ħatra.

Il-kandidati jistgħu jintalbu jagħmlu iktar intervisti u/jew testijiet minbarra dawk indikati hawn fuq. Qabel ma jinħatru, il-kandidati proposti mill-Kummissjoni għandhom jiġu mistiedna jagħmlu dikjarazzjoni quddiem il-kumitat jew kumitati kompetenti tal-Parlament Ewropew u jwieġbu il-mistoqsijiet li jagħmlulhom il-membri tal-kumitat. Wara li jkun sema’ d-dikjarazzjoni, il-Parlament Ewropew għandu jadotta opinjoni li tagħti l-fehma tiegħu u jista’ jindika kandidat preferut.

Jenħtieġ li l-kandidat li jintgħażel ikollu ċertifikat validu ta’ approvazzjoni tas-sigurtà mingħand l-awtorità tas-sigurtà nazzjonali tiegħu, jew ikun f’pożizzjoni li jikseb wieħed. Approvazzjoni ta’ sigurtà personali hija deċiżjoni amministrattiva wara investigazzjoni ta’ sigurtà mwettqa mill-awtorità tas-sigurtà nazzjonali kompetenti tal-individwu f’konformità mal-liġijiet u r-regolamenti nazzjonali applikabbli tas-sigurtà, u li tiċċertifika li individwu jkun jista’ jingħata aċċess għal informazzjoni klassifikata sa livell speċifikat. (Kun af li jista’ jingħata bidu għall-proċedura meħtieġa biex tinkiseb approvazzjoni tas-sigurtà biss wara li ssir talba mill-impjegatur, u mhux mill-kandidat individwali).

Sakemm l-approvazzjoni tas-sigurtà personali ma tkunx għadha ngħatat mill-Istat Membru kkonċernat u l-proċedura tal-approvazzjoni ma tkunx ġiet kompluta bl-informazzjoni meħtieġa legalment mid-Direttorat tas-Sigurtà tal-Kummissjoni Ewropea, il-kandidat ma jkunx jista’ jaċċessa Informazzjoni Klassifikata tal-UE (EUCI, EU Classified Information) fil-livell ta’ CONFIDENTIEL UE/EU CONFIDENTIAL jew ogħla, u lanqas ma jkun jista’ jattendi laqgħat li fihom tiġi diskussa tali EUCI.

Opportunitajiet indaqs

Il-Kummissjoni u l-Aġenzija jfittxu li jiksbu l-objettiv strateġiku tal-ugwaljanza bejn il-ġeneri fil-livelli maniġerjali kollha sa tmiem il-mandat attwali u japplikaw politika ta’ opportunitajiet indaqs u ta’ nondiskriminazzjoni f’konformità mal-Artikolu 1(d) tar-Regolamenti tal-Persunal filwaqt li jinkoraġġixxu applikazzjonijiet li jistgħu jikkontribwixxu għal aktar diversità, ugwaljanza bejn il-ġeneri u bilanċ ġeografiku kumplessiv.

Kundizzjonijiet tal-impjieg

Is-salarji u l-kundizzjonijiet ta’ impjieg huma stipulati fil-Kundizzjonijiet tal-Impjieg applikabbli għall-Aġenti l-Oħra (25).

Il-kandidat magħżul jiġi impjegat mill-Bord Maniġerjali tal-Aġenzija bħala Aġent Temporanju fil-grad ta’ AD14 (26). Il-kandidat jiġi kklassifikat skont it-tul tal-esperjenza professjonali preċedenti tiegħu fil-pass 1 jew il-pass 2 fi ħdan dak il-grad.

Il-kandidat jiġi maħtur għal mandat inizjali ta’ ħames (5) snin, li possibbilment jista’ jiġi estiż għal massimu ta’ ħames (5) snin skont ir-Regolament li jistabbilixxi l-Aġenzija kif applikabbli fiż-żmien tal-ħatra.

L-applikanti jenħtieġ li jieħdu nota tar-rekwiżit li dwar it-twettiq b’suċċess ta’ perjodu ta’ prova ta’ disa’ xhur, skont il-Kundizzjonijiet tal-Impjieg ta’ Aġenti Oħra applikabbli għall-persunal il-ġdid kollu.

Il-post tal-impjieg huwa Tallinn, l-Estonja.

Informazzjoni importanti għall-kandidati

Infakkru lill-kandidati li x-xogħol tal-bordijiet tas-selezzjoni huwa kunfidenzjali. Il-kandidati ma jistgħux jagħmlu kuntatt dirett jew indirett mal-membri individwali tagħhom u dan lanqas ma jista’ jsir f’isimhom minn ħaddieħor. Kull mistoqsija għandha tiġi indirizzata lis-segretarjat tal-bord rilevanti.

Il-protezzjoni tad-data personali

Il-Kummissjoni se tiżgura li d-data personali tal-kandidati tkun ipproċessata kif meħtieġ mir-Regolament (UE) 2018/1725 tal-Parlament Ewropew u tal-Kunsill (27). Dan b’mod partikolari japplika għall-kunfidenzjalità u għas-sigurtà ta’ tali data.

Indipendenza u dikjarazzjoni tal-interessi

Qabel jibda jaqdi dmirijietu, id-Direttur Eżekuttiv jintalab jagħmel dikjarazzjoni ta’ impenn li jaġixxi b’mod indipendenti fl-interess pubbliku u li jiddikjara kull interess li jista’ jitqies bħala li jippreġudika l-indipendenza tiegħu.

Proċedura tal-applikazzjoni

Qabel tissottometti l-applikazzjoni tiegħek, jenħtieġ li tivverifika b’attenzjoni jekk tissodisfax ir-rekwiżiti ta’ eliġibbiltà kollha (il-“Kundizzjonijiet essenzjali”), b’mod partikolari fir-rigward tat-tipi ta’ diplomi, l-esperjenza professjonali ta’ livell għoli kif ukoll il-kapaċità lingwistika meħtieġa. Jekk ma tissodisfax xi wieħed mir-rekwiżiti ta’ eliġibbiltà, dan ikun ifisser li se tiġi eskluż awtomatikament mill-proċedura tal-għażla.

Jekk tkun trid tapplika, trid tirreġistra permezz tal-Internet fuq is-sit web li ġej u ssegwi l-istruzzjonijiet li jirrigwardaw id-diversi stadji tal-proċedura:

https://ec.europa.eu/dgs/human-resources/seniormanagementvacancies/

Irid ikollok indirizz tal-posta elettronika validu. Dan se jintuża biex tiġi kkonfermata r-reġistrazzjoni tiegħek kif ukoll biex jibqa’ jsir kuntatt miegħek waqt l-istadji differenti tal-proċedura. Għaldaqstant nitolbuk iżżomm lill-Kummissjoni Ewropea informata bi kwalunkwe bidla fl-indirizz tal-posta elettronika tiegħek.

Biex timla l-applikazzjoni tiegħek, trid ittella’ CV f’format PDF, preferibbilment fil-format tas-CV tal-Europass (28), u timla ittra ta’ motivazzjoni online (massimu ta’ 8 000 karattru). Is-CV u l-ittra ta’ motivazzjoni tiegħek jistgħu jintbagħtu bi kwalunkwe lingwa uffiċjali tal-Unjoni Ewropea.

Huwa fl-interess tiegħek li tiżgura li l-applikazzjoni tiegħek tkun akkurata, dettaljata u veritiera.

Ladarba tkun lestejt ir-reġistrazzjoni online tiegħek, se tirċievi ittra elettronika li tikkonferma li l-applikazzjoni tiegħek ġiet irreġistrata. Jekk ma tirċevix ittra elettronika ta’ konferma, l-applikazzjoni tiegħek ma tkunx ġiet irreġistrata!

Jekk jogħġbok innota li mhuwiex possibbli li ssegwi l-progress tal-applikazzjoni tiegħek online. Il-Kummissjoni Ewropea tikkuntattjak direttament rigward l-istat tal-applikazzjoni tiegħek.

L-applikazzjonijiet li jintbagħtu bil-posta elettronika ma jiġux aċċettati. Jekk tkun teħtieġ iktar informazzjoni u/jew tiltaqa’ ma’ problemi tekniċi jekk jogħġbok ibgħat ittra elettronika lil: HR-MANAGEMENT-ONLINE@ec.europa.eu

Hija r-responsabbiltà tiegħek li timla r-reġistrazzjoni online fil-ħin. Nagħtuk parir li ma tħallix għall-aħħar jiem biex tapplika, minħabba li traffiku tal-internet qawwi jew xi problema fil-konnessjoni tal-internet tiegħek jistgħu jwasslu biex ir-reġistrazzjoni online tieqaf ħesrem qabel ma tkun lestejtha, u b’hekk ikollok tirrepeti l-proċess kollu. Ladarba jiskadi ż-żmien għas-sottomissjoni tar-reġistrazzjonijiet, l-ebda data ma tkun tista’ tiddaħħal. Ir-reġistrazzjonijiet li jaslu tard ma jiġux aċċettati.

Data tal-għeluq

Id-data tal-għeluq għar-reġistrazzjoni hija t-30 ta’ Ottubru 2024, 12.00 nofsinhar, ħin ta’ Brussell, u wara din id-data ma jkunx iktar possibbli li tirreġistra.

---

(1)   ĠU L 295, 21.11.2018, p. 99), ELI: http://data.europa.eu/eli/reg/2018/1726/oj.

(2)   ĠU L 312, 7.12.2018, p. 1, ELI: http://data.europa.eu/eli/reg/2018/1860/oj.

ĠU L 312, 7.12.2018, p. 14, ELI: http://data.europa.eu/eli/reg/2018/1861/oj.

ĠU L 312, 7.12.2018, p. 56 (ELI: http://data.europa.eu/eli/reg/2018/1862/oj.

(3)   ĠU L 218, 13.8.2008, p. 60, ELI: http://data.europa.eu/eli/reg/2008/767/oj.

(4)   ĠU L 180, 29.06.2013, p.1, ELI: http://data.europa.eu/eli/reg/2013/603/oj.

(5)   ĠU L 222, 5.9.2003, p. 3, ELI: http://data.europa.eu/eli/reg/2003/1560/oj.

(6)   ĠU L 135, 22.5.2019, p. 1, ELI: http://data.europa.eu/eli/reg/2019/816/oj.

(7)   ĠU L 150, 1.6.2022, p. 1, ELI: http://data.europa.eu/eli/reg/2022/850/oj.

(8)   ĠU L 327, 9.12.2017, p. 20, ELI: http://data.europa.eu/eli/reg/2017/2226/oj.

(9)   ĠU L 236, 19.9.2018, p. 1, ELI: http://data.europa.eu/eli/reg/2018/1240/oj.

(10)   ĠU L 135, 22.5.2019, p. 1, ELI: http://data.europa.eu/eli/reg/2019/816/oj.

(11)   ĠU L, 2024/1358, 22.5.2024, ELI: http://data.europa.eu/eli/reg/2024/1358/oj.

(12)   ĠU L 135, 22.5.2019, p. 27, ELI: http://data.europa.eu/eli/reg/2019/817/oj

ĠU L 135, 22.5.2019, p. 85, ELI: http://data.europa.eu/eli/reg/2019/818/oj.

(13)   ĠU L 132, 17.05.2023, p. 1, ELI: http://data.europa.eu/eli/reg/2023/969/oj.

(14)   ĠU L, 2023/2667, 7.12.2023 ELI: http://data.europa.eu/eli/reg/2023/2667/oj.

(15)  (ĠU L, 2024/982, 5.4.2024, ELI: http://data.europa.eu/eli/reg/2024/982/oj.

(16)   ĠU L, 2024/1351, 22.5.2024, ELI: http://data.europa.eu/eli/reg/2024/1351/oj.

(17)   ĠU L, 2024/1352, 22.5.2024, ELI: http://data.europa.eu/eli/reg/2024/1352/oj.

ĠU L, 2024/1356, 22.5.2024, ELI: http://data.europa.eu/eli/reg/2024/1356/oj.

(18)  Bħalissa l-Eurodac tuża EuroDomain, u fil-futur ukoll l-ECRIS-TCN u r-router Prüm II.

(19)  L-esperjenza professjonali titqies biss jekk tkun tirrappreżenta relazzjoni ta’ ħidma konkreta li tkun definita bħala ħidma reali u ġenwina, bi ħlas u bħala impjegat (kull tip ta’ kuntratt) jew fornitur ta’ servizz. L-attivitajiet professjonali li jkunu saru fuq bażi part-time għandhom jiġu kkalkulati pro rata, abbażi tal-perċentwal iċċertifikat ta’ sigħat full-time li jkunu nħadmu. Il-leave tal-maternità / parentali / għall-adozzjoni jitqies jekk ikun fil-qafas ta’ kuntratt ta’ xogħol. Id-dottorati (PhD) huma assimilati mal-esperjenza professjonali, anki meta mhux bi ħlas, iżda għal perjodu ta’ mhux aktar minn tliet (3) snin, dment li d-dottorat ikun tlesta b’suċċess. Perjodu partikolari jista’ jingħadd darba biss.

(20)  Għas-snin kollha li matulhom tkun inkisbet l-esperjenza maniġerjali, jenħtieġ li l-kandidati jindikaw b’mod ċar fil-curriculum vitae tagħhom: (1) it-titlu u r-rwol tal-karigi maniġerjali okkupati; (2) l-għadd ta’ persunal li kellhom taħthom meta kienu f’dawn il-karigi; (3) id-daqs tal-baġits li kellhom f’idejhom; (4) l-għadd ta’ saffi ġerarkiċi fuqhom u taħthom; kif ukoll (5) l-għadd ta’ kollegi fl-istess livell.

(21)   https://eur-lex.europa.eu/legal-content/EN/TXT/?uri=CELEX%3A01962R0031-20240101.

(22)   ĠU 45, 14.6.1962, p. 1385/62, test konsolidat: https://eur-lex.europa.eu/legal-content/EN/TXT/?uri=CELEX%3A01962R0031-20240101.

(23)   https://commission.europa.eu/jobs-european-commission/job-opportunities/managers-european-commission_mt.

(24)  Sakemm il-Membru tal-Kummissjoni kkonċernat, f’konformità mad-Deċiżjoni tal-Kummissjoni tal-5 ta’ Diċembru 2007 (PV(2007) 1811) u tat-30 ta’ Settembru 2020 (PV(2020) 2351), ma jkunx iddelega dan il-kompitu.

(25)   ĠU 45, 14.6.1962, p. 1385/62, test konsolidat: https://eur-lex.europa.eu/legal-content/EN/TXT/?uri=CELEX%3A01962R0031-20240101.

(26)  Il-koeffiċjent ta’ korrezzjoni applikabbli għar-remunerazzjoni u għall-pensjonijiet tal-uffiċjali u ta’ aġenti oħra tal-Unjoni Ewropea għall-Estonja huwa stabbilit għal 95,5 % mill-1 ta’ Jannar 2024. Dan il-koeffiċjent huwa suġġett għal reviżjoni annwali.

(27)  Ir-Regolament (UE) 2018/1725 tal-Parlament Ewropew u tal-Kunsill tat-23 ta’ Ottubru 2018 dwar il-protezzjoni ta’ persuni fiżiċi fir-rigward tal-ipproċessar ta’ data personali mill-istituzzjonijiet, korpi, uffiċċji u aġenziji tal-Unjoni u dwar il-moviment liberu ta’ tali data, u li jħassar ir-Regolament (KE) Nru 45/2001 u d-Deċiżjoni Nru 1247/2002/KE (ĠU L 295, 21.11.2018, p. 39, ELI: http://data.europa.eu/eli/reg/2018/1725/oj).

(28)  Tista’ ssib informazzjoni dwar kif toħloq l-Europass CV tiegħek online hawnhekk: https://europa.eu/europass/en/create-europass-cv