1)

L-Artikolu 101 TFUE jipprekludi leġiżlazzjoni nazzjonali, bħal dik tal-Artikolu 14 tal-legge 24 novembre 1981, n. 689 (il-Liġi Nru 689 tal-24 ta’ Novembru 1981), li, għall-finijiet tal-eżerċizzju tas-setgħat ta’ sanzjoni, timponi fuq l-Autorità Garante della Concorrenza e del Mercato (l-Awtorità għall-Protezzjoni tal-Kompetizzjoni u tas-Suq) l-obbligu li tikkomunika lill-impriżi kkonċernati d-deċiżjoni ta’ bidu ta’ proċedura ta’ investigazzjoni – li tindika, inter alia, l-elementi essenzjali relatati mal-ksur allegat – fi ħdan terminu ta’ preskrizzjoni ta’ 90 jum, jew 360 jum għall-impriżi residenti barra mill-pajjiż, li jibdew jiddekorru mill-mument meta l-Awtorità ssir taf bil-ksur?

2)

L-Artikolu 101 TFUE u d-Direttiva (UE) 2019/1 tal-Parlament Ewropew u tal-Kunsill tal-11 ta’ Diċembru 2018 sabiex l-awtoritajiet tal-kompetizzjoni tal-Istati Membri jingħataw setgħat biex ikunu inforzaturi aktar effettivi, u biex jiġi żgurat il-funzjonament tajjeb tas-suq intern (1), għandhom jiġu interpretati fis-sens li jipprekludu leġiżlazzjoni nazzjonali li tipprevedi l-annullament bħala konsegwenza awtomatika tal-ksur tat-terminu raġonevoli għall-bidu tal-proċedura ta’ investigazzjoni, mingħajr ma jkollu jiġi kkonstatat il-ksur effettiv tad-drittijiet tad-difiża? Sussidjarjament, dawn jipprekludu leġiżlazzjoni nazzjonali li, meta jkun hemm tali ksur tat-terminu raġonevoli għall-bidu tal-proċedura ta’ investigazzjoni tqiegħed fuq l-Awtorità (u mhux fuq l-impriżi) l-oneru tal-prova ulterjuri li l-ksur tal-imsemmi terminu konkretament ikun kiser id-drittijiet tad-difiża?