—

F’dan ir-rigward qiegħed jiġi sostnut li sa fejn l-imsemmi Artikolu 7 jippermetti li l-kumpannija stabbilita, sussidjarja tad-dikjaranti unika, ma tiġix attribwita l-kwoti kkalkolati fuq il-bażi ta’ valuri ta’ referenza tagħha, jiġifieri tattribwixxi dawn il-kwoti esklużivament lid-dikjaranti unika, li jkollu l-istess proprjetarju effettiv tal-ewwel kumpannija stabbilita, huwa jagħti lok għal ksur tal-Artikoli 15 u 16 tar-Regolament (UE) Nru 517/2014.

—

F’dan ir-rigward qiegħed jiġi sostnut li ġaladarba d-deċiżjonijiet tal-Kummissjoni jċaħħdu b’mod irraġonevoli lis-sussidjarja tar-rikorrenti mill-kwoti ta’ idrofluworokarburi li l-allokazzjoni tagħhom din is-sussidjarja jkollha dritt fuq il-bażi tal-valuri ta’ referenza tagħha nnifisha dawn jagħtu lok għal ksur tad-drittijiet fundamentali tar-rikorrenti. Sa fejn ir-Regolament ta’ Implimentazzjoni huwa intiż li jillimita/jipprekludi l-allokazzjoni ta’ kwoti lill-parteċipanti l-ġodda li qabel ma kinux joperaw fis-suq, l-applikazzjoni li wettqet il-Kummissjoni fil-konfront tas-sussidjarja tar-rikorrenti (u għaldaqstant tar-rikorrenti nnifisha) hija vvizzjata minħabba użu ħażin ta’ poter. Id-difetti u r-raġunijiet invokati japplikaw ukoll għall-każ fejn il-kwoti dovuti lis-sussidjarja tar-rikorrenti jitqiesu li jkunu ġew allokati lir-rikorrenti bħala dikjaranti unika.

—

F’dan ir-rigward qiegħed jiġi sostnut li l-applikazzjoni mwettqa tal-Artikolu 7 tar-Regolament ta’ Implimentazzjoni 2019/661 jmur effettivament lil hinn minn dak li huwa meħtieġ u neċessarju sabiex jintlaħqu l-għanijiet tar-regolamentazzjoni intiżi għal sfruttament tar-reġistru elettroniku li jkun aħjar u iktar effiċjenti. Id-difetti u r-raġunijiet involkati japplikaw ukoll għall-każ fejnil-kwoti dovti lis-sussidjarja tar-rikorrenti jitqiesu li jkunu ġew allokati lir-rikorrenti bħala dikjaranti unika: f’tali każ, in-natura invażiva tad-deċiżjonijiet dwar l-organizzazzjoni imprenditorjali tal-grupp li tiegħu hija responsabbli r-rikorrenti, b’konsegwenzi kontabbli u fiskali, minbarra ekonomiċi, ma jidhru b’ebda mod iġġustifikati u raġonevoli fid-dawl tal-għanijiet li r-regolamentazzjoni tixtieq tilħaq.

—

F’dan ir-rigward qiegħed jiġi sostnut li d-dannu għall-attività tar-rikorrenti li jiġi kkawżat miċ-ċaħda tal-kwoti lis-sussidjarja tagħha, anki fejn il-kwoti jiġu allokati lir-rikorrenti nnifisha, jirriżulta fi ksur tal-libertajiet fundamentali tas-suq intern, fosthom il-libertà ta’ stabbiliment u l-moviment liberu ta’ kapital, ġaladarba r-rikorrenti hija kumpannija rregolata mil-liġi Taljana li għamlet użu mid-drittijiet ta’ stabbiliment u ta’ moviment liberu tal-kapital iggarantiti mid-dritt tal-Unjoni sabiex takkwista kumpannija rregolata mil-liġi Spanjola sabiex f’dak is-suq twettaq parti mill-attività kummerċjali tagħha.

—

F’dan ir-rigward qiegħed jiġi sostnut li r-rikorrenti għandha d-dritt li torganizza l-attività imprenditorjali tagħha, kif ukoll dik tal-grupp ta’ impriżi kkontrollati minnha fuq il-bażi tal-aspettattivi leġittimi ta’ profitt li jirriżultaw mill-aspettattiva ta’ kwoti ġġenerati mill-valuri ta’ referenza (anki) tas-sussidjarja Spanjola tagħha. Id-deċiżjoni li ma jiġux allokati kwoti lil Tazzetti SA tippreġudika dawn il-prinċipji u tikser l-obbligu ta’ motivazzjoni previst mill-Artikolu 296 TFUE inkwantu d-deċiżjoni tal-Kummissjoni hija nieqsa minn kwalunkwe spjegazzjoni u kull ipoteżi ta’ bilanċ ta’ interessi hija ppreġudikata. Il-preġudizzju jirriżulta wkoll fil-każ fejn il-kwoti tas-sussidjarja Spanjola tagħha jiġu allokati lir-rikorrenti inkwantu dikjaranti unika.

—

F’dan ir-rigward qiegħed jiġi sostnut li d-deċiżjonijiet ikkontestati jirriżultaw f’li jiġi attribwit lil Tazzetti SA sitwazzjoni mhux differenti minn dik mogħtija lill-parteċipanti l-ġodda fis-suq, filwaqt li l-kumpannija sussidjarja Tazzetti SA, bħar-rikorrenti, hija kumpannija stabbilita li ilha minn żmien bi preżenza kkonsolidata fis-suq.