1)

Il-leġiżlazzjoni stabbilita fid-digriet tal-Ministru għall-Agrikoltura u għall-Iżvilupp Rurali Nru 22/2010 tas-16 ta’ Marzu, fid-digriet tal-Ministru għall-Agrikoltura u għall-Iżvilupp Rurali Nru 34/2010 tad-9 ta’ April, fid-digriet tal-Ministru għall-Iżvilupp Rurali Nru 25/2011 tas-7 ta’ April u fid-digriet tal-Ministru għall-Iżvilupp Rurali Nru 22/2011 tal-25 ta’ Marzu, hija kompatibbli mad-dritt tal-Unjoni li jindika li l-applikazzjoni għall-għajnuna għal bidwi tista’ tiġi biss miċħuda fuq il-bażi tal-kriterji kollha flimkien li huma relatati mal-kunċett ta’ “utent leġittimu tal-art”, li huwa rregolat mil-leġiżlazzjoni nazzjonali, u fl-assenza tal-hekk imsejjaħ “ċertifikat tal-użu tal-art”, li jirriżulta minn dawn il-kriterji, anki jekk il-produttur tal-Unjoni jissodisfa l-kriterji l-oħra relatati mal-applikazzjoni għall-għajnuna u, b’mod partikolari, jista’ jipproduċi l-prova li s-superfiċji ddikjarati huma għad-dispożizzjoni tiegħu, jiġifieri li jiġġestixxi u jagħmel użu minnhom?

2)

Fil-każ ta’ risposta fin-negattiv għall-ewwel domanda, id-dritt tal-Unjoni jeħtieġ li l-aġenzija tal-ħlas tal-Istat Membru, meta tevalwa l-applikazzjoni għall-għajnuna, tikkunsidra provi oħra relatati mar-rekwiżit li “[għandu jkun] disponibbli” msemmi fl-Artikolu 124 tar-Regolament tal-Kunsill (KE) Nru 73/2009? (1)

3)

Fil-każ ta’ risposta fin-negattiv għall-ewwel domanda, mill-perspettiva tad-dritt tal-Unjoni, x’konsegwenzi legali għandha, jiġifieri kif għandha tiġi interpretata jew evalwata fl-applikazzjoni unika d-“dikjarazzjoni mill-bidwi li huwa konxju mill-kundizzjonijiet marbuta mal-iskemi ta’ għajnuna konċernati”, meħtieġa mill-Artikolu 12(1)(e) tar-Regolament tal-Kummissjoni (KE) Nru 1122/2009 (2), fir-rigward ta’ dispożizzjoni restrittiva speċifika tal-Istat Membru bħall-kriterji kollha flimkien li huma relatati mal-“utent leġittimu tal-art”?

4)

Fil-każ ta’ risposta fin-negattiv għall-ewwel domanda, mill-perspettiva tad-dritt tal-Unjoni, x’konsegwenzi legali għandu, jiġifieri kif għandu jiġi interpretat jew evalwat fl-applikazzjoni unika obbligu, impost mill-Istat Membru, li jagħti dikjarazzjoni dwar il-konformità mal-kriterji kollha flimkien li huma relatati mal-kunċett ta’ “utent leġittimu tal-art”, jiġifieri, dwar il-konformità mar-rekwiżiti amministrattivi relatati ma’ dik id-dispożizzjoni restrittiva speċifika tal-Istat Membru?