Partijiet
Parti operattiva

Partijiet

Fil-Kawża T‑253/12,

Hammar Nordic Plugg AB, stabbilita fi Trollhättan (l-Isvezja), irrappreżentata minn I. Otken Eriksson u U. Öberg, avukati,

rikorrenti,

vs

Il-Kummissjoni Ewropea, irrappreżentata minn D. Grespan u P.‑J. Loewenthal, bħala aġenti, assistiti minn L. Sandberg‑Morch, avukat,

konvenuta,

li għandha bħala suġġett talba għal annullament tad-Deċiżjoni tal-Kummissjoni 2012/293/UE, tat-8 ta’ Frar 2012, dwar l-għajnuna mill-Istat SA.28809 (C 29/10) (ex NN 42/10 & ex CP 194/09) implimentata mill-Isvezja favur Hammar Nordic Plugg AB (ĠU L 150, p. 78),

IL-QORTI ĠENERALI (Is-Seba’ Awla),

komposta minn M. van der Woude, I. Wiszniewska‑Białecka u I. Ulloa Rubio (Relatur), Imħallfin,

Reġistratur: C. Heeren, Amministratur,

wara li rat il-proċedura bil-miktub u wara s-seduta tas-26 ta’ Marzu 2015,

tagħti l-preżenti

Sentenza (1)

Il-fatti li wasslu għall-kawża

[ omissis ]

Proċedura amministrattiva

[ omissis ]

Deċiżjoni kkontestata

[ omissis ]

Proċedura u t-talbiet tal-partijiet

[ omissis ]

25. Permezz ta’ att ippreżentat fir-Reġistru tal-Qorti Ġenerali fit-8 ta’ Ġunju 2012, ir-rikorrenti ppreżentat dan ir-rikors.

26. Ir-rikorrenti titlob li l-Qorti Ġenerali jogħġobha:

– tannulla d-deċiżjoni kkontestata b’mod sħiħ jew parzjalment;

– tikkundanna lill-Kummissjoni għall-ispejjeż.

27. Il-Kummissjoni titlob li l-Qorti Ġenerali jogħġobha:

– tiċħad ir-rikors bħala mhux fondat;

– tikkundanna lir-rikorrenti għall-ispejjeż.

Id-dritt

[ omissis ]

Fuq l-ewwel motiv, ibbażat fuq żbalji ta’ evalwazzjoni fil-kuntest tal-klassifikazzjoni ta’ għajnuna mill-Istat

[omissis]

32. Sabiex tivverifika jekk il-bejgħ ta’ art minn awtorità pubblika lil persuna privata jikkostitwixxi għajnuna mill-Istat, kien hemm lok li l-Kummissjoni tapplika l-kriterju tal-investitur privat f’ekonomija tas-suq, sabiex jiġi vverifikat jekk il-prezz imħallas mill-benefiċjarju preżunt tal-għajnuna, jikkorrispondix mal-prezz li investitur privat, li jopera f’kundizzjonijiet normali ta’ kompetizzjoni, seta’ jiffissa. B’mod ġenerali, l-użu ta’ dan il-kriterju jimplika min-naħa tal-Kummissjoni evalwazzjoni ekonomika kumplessa (sentenza Il‑Kummissjoni vs Scott, punt 31 iktar ‘il fuq, EU:C:2010:480, punt 68).

[ omissis ]

Fuq l-assenza ta’ teħid inkunsiderazzjoni tal-prezz ta’ trasferiment ta’ SEK 8 000 000

[ omissis ]

40. Barra minn hekk, għandu jiġi mfakkar, f’dak li jirrigwarda t-tielet argument tar-rikorrenti, li jispeċifika li ma hemm ebda raġuni li wieħed jirrikorri għal proċedura ta’ sejħa għal offerti formali qabel il-bejgħ, il-Kummissjoni hija marbuta bil-Linji gwida u bil-komunikazzjonijiet li hija tadotta, sa fejn dawn ikunu konformi mar-regoli tat-Trattat FUE u fejn huma aċċettati mill-Istati Membri (sentenza tas-16 ta’ Lulju 2014, Zweckverband Tierkörperbeseitigung vs Il‑Kummissjoni, T‑309/12, EU:T:2014:676, punt 212).

41. Għalhekk, il-Kummissjoni tista’, fl-assenza ta’ proċedura ta’ sejħa għal offerti miftuħa u inkundizzjonata, tibbaża fuq l-istimi li kienu għad-dispożizzjoni tagħha, konformement mal-punt 2(a) tal-komunikazzjoni.

[ omissis ]

Fuq l-assenza ta’ eżami tal-eżistenza ta’ għajnuna mill-Istat matul ix-xiri tal-faċilità minn FABV għal SEK 17 000 000

[ omissis ]

60. Fl-ewwel lok, għandu jingħad li, fis-sunt tad-deċiżjoni tagħha ta’ ftuħ tal-proċedura ta’ investigazzjoni formali tal-bejgħ tal-faċilità minn FABV lir-rikorrenti, il-Kummissjoni indikat, f’dak li jirrigwarda l-bejgħ ta’ din il-faċilità ta’ Chips lil FABV, hekk kif ġej:

“Il-prezz imħallas minn FABV biex tixtri l-Faċilità ma jidhirx li hu ogħla mill-valur fis-suq, kif indikat minn konsulenti indipendenti ta’ parti terza. Għalhekk, wieħed jista’ jeskludi li t-Tranżazzjoni A fiha element ta’ għajnuna u ma tikkostitwix għajnuna mill-Istat skont it-tifsira tal-Artikolu 107(1) TFUE.”

61. Għalhekk il-Kummissjoni, f’dak li jirrigwarda l-bejgħ tal-faċilità ta’ Chips lil FABV, ħadet deċiżjoni, konformement mal-Artikolu 4(2) tar-Regolament tal‑Kunsill (KE) Nru 659/1999, tat-22 ta’ Marzu 1999, li jistabbilixxi regoli dettaljati għall-applikazzjoni tal-Artikolu [108 TFUE] (ĠU Edizzjoni Speċjali bil-Malti, Kapitolu 8, Vol. 1, p. 339), li t-termini tagħha b’mod ċar jissuġġerixxu li hija finali.

62. Issa, jekk deċiżjoni tal-Kummissjoni tiddikjara li miżura ma tikkostitwixxix għajnuna mill-Istat fis-sens tal-Artikolu 107(1) TFUE mingħajr ma tiftaħ il-proċedura ta’ investigazzjoni formali prevista fl-Artikolu 108(2) TFUE u jekk persuna interessata tissalvagwardja d-drittijiet proċedurali li hija għandha permezz tal-istess dispożizzjoni, hija għandha tippreżenta rikors quddiem il-Qorti Ġenerali kontra din id-deċiżjoni fit-terminu previst mill-ħames paragrafu tal-Artikolu 263 TFUE (digriet tas-27 ta’ Novembru 2001, Wöhr vs Il‑Kummissjoni, T‑222/00, Ġabra, EU:T:2001:274, punt 34 ).

63. F’din il-kawża, għandu jiġi kkonstatat li r-rikorrenti ma ppreżentatx tali rikors f’dan it-terminu.

64. Fit-tieni lok, kif indikat mill-Kummissjoni, il-proċeduri li jippermettu r-revoka ta’ deċiżjoni finali li fiha hija kkonstatat li miżura ma tikkostitwixxix għajnuna mill-Istat hija stabbilita fl-Artikolu 9 tar-Regolament Nru 659/1999, li permezz tagħha l-Kummissjoni tista’ tirrevoka tali deċiżjoni jekk din ġiet adottata fuq il-bażi ta’ informazzjoni ineżatta ta’ importanza determinanti.

65. Issa, l-uniku argument tar-rikorrenti dwar l-allegata informazzjoni ineżatta hija dik dwar ir-rata ta’ diżokkupazzjoni tal-bini inkluża fl-ewwel stima. Ir-rikorrenti tindika li l-memorandum ta’ bejgħ tal-faċilità ta’ Chips lil FABV kienet ibbażata fuq rata ta’ diżokkupazzjoni ta’ 10 %, meta din fil-fatt kienet ta’ 100 % f’dak li jirrigwarda l-proprjetajiet vakanti. Ir-rikorrenti tikkontesta wkoll l-indikazzjoni tal-Kummissjoni li hija kienet informata mill-awtoritajiet lokali li kerrej instab mit-13 ta’ Frar 2008.

66. F’dan ir-rigward, għandu jiġi kkonstatat li r-rikorrenti ma tipproduċi l-ebda prova insostenn tal-affermazzjonijiet tagħha u lanqas ma tispjega liema rata ta’ diżokkupazzjoni kienet, fil-fehma tagħha, eżatta għall-faċilità kollha.

67. L-argumenti l-oħra tar-rikorrenti huma biss affermazzjonijiet, mhux issostanzjati, u li ma jissodisfawx ir-rekwiżiti stabbiliti mill-Artikolu 9 tar-Regolament Nru 659/1999.

[ omissis ]

Fuq l-assenza ta’ teħid inkunsiderazzjoni tal-kriterju tal-investitur privat f’ekonomija tas-suq

[ omissis ]

78. F’din il-kawża, ma huwiex ikkontestat li, fl-istess jum, jiġifieri fit-13 ta’ Frar 2008, FABV xtrat il-faċilità għal ammont ta’ SEK 17 000 000 u li tat lir-rikorrenti għażla ta’ xiri għal ammont ta’ SEK 8 000 000.

79. Fl-ewwel lok, għandu jiġi kkonstatat li huwa dubjuż li investitur privat kien wettaq tali operazzjoni.

80. Fit-tieni lok, għandu jiġi osservat li jirriżulta mill-punt 16 tad-deċiżjoni ta’ ftuħ li FABV aċċettat prezz ta’ bejgħ mill-ġdid iktar baxx fit-tama li jiġi żgurat it-tħaddim kontinwu tal-faċilità u li jiġu ssalvagwardjati l-impjiegi. Għaldaqstant huwa stabbilit fost il-partijiet li l-komun dejjem kellu dan l-għan, hekk kif ir-rikorrenti fakkret hija stess fir-rikors. Huwa wkoll indikat, fil-punt 58 tad-deċiżjoni kkontestata, li dan l-għan huwa wkoll l-uniku wieħed imsemmi mill-awtoritajiet Svediżi lill-Kummissjoni.

81. Barra minn hekk, jirriżulta mill-ittra tas-27 ta’ Novembru 2009, iċċitata mir-rikorrenti, li FABV ikkunsidrat li l-proġett fejn hija tixtri l-faċilità u wara tikrih lir-rikorrenti, li mbagħad hija min-naħa tagħha tikrih lil Nya li Topp, jippermetti t-tħaddim kontinwu tal-faċilità u li jiġu ssalvagwardjati l-impjiegi mhedda mill-għeluq ta’ din.

82. FABV għalhekk iddeċidiet, hekk kif huwa indikat f’din l-ittra, li titlob lill-komun kontribut ta’ SEK 9 000 000, intiż sabiex ikopri t-telf inerenti għall-bejgħ tal-faċilità lir-rikorrenti għal SEK 8 000 000 . F’dan ir-rigward, il-Kummissjoni pproduċiet kopja ta’ sentenza mogħtija mill-Kammarrätt i Göteborg (Qorti Amministrattiva tal-Appell ta’ Göteborg, l-Isvezja) tal-1 ta’ Diċembru 2012, dwar it-talba ta’ FABV sabiex tnaqqas telf tal-kapital insegwitu għall-bejgħ tal-faċilità lir-rikorrenti.

[ omissis ]

Fuq in-nuqqas ta’ affidabbiltà tal-aħħar stima, adottata mill-Kummissjoni

[ omissis ]

Fuq l-assenza ta’ teħid inkunsiderazzjoni tat-trasferiment ulterjuri tal-faċilità għal ammont ta’ SEK 8 000 000

[ omissis ]

Fuq il-kuntratt ta’ kiri bejn ir-rikorrenti u Nya Topp

[ omissis ]

Fuq it-tieni motiv, ibbażat fuq l-effett fuq il-kummerċ bejn Stati Membri u d-distorsjoni tal-kompetizzjoni

[ omissis ]

Fuq it-tielet motiv, ibbażat fuq l-obbligi ta’ eżami u ta’ motivazzjoni, kif ukoll tad-drittijiet tad-difiża

[ omissis ]

Fuq l-obbligu ta’ eżami mill-Kummissjoni

[ omissis ]

Fuq l-obbligu ta’ motivazzjoni

[ omissis ]

Fuq id-drittijiet tad-difiża tar-rikorrenti

[ omissis ]

Fuq l-ispejjeż

[ omissis ]

(1) .

(1) – Qed jiġu riprodotti biss il-punti ta’ din is-sentenza li l-Qorti Ġenerali tqis li l-pubblikazzjoni tagħhom hija utli.

Parti operattiva

Għal dawn il-motivi,

IL-QORTI ĠENERALI (Is-Seba’ Awla)

taqta’ u tiddeċiedi:

1) Ir-rikors huwa miċħud.

2) Hammar Nordic Plugg AB għandha tbati, minbarra l-ispejjeż tagħha stess, dawk sostnuti mil-Kummissjoni Ewropea.