“Peress li, skont l-Artikolu 4(2) tad-Direttiva 93/13/KEE (1), l-evalwazzjoni tan-natura abbużiva tal-klawżoli ma tirrigwarda la d-definizzjoni tas-suġġett prinċipali tal-kuntratt u lanqas l-adegwatezza bejn il-prezz u r-remunerazzjoni, minn naħa, u s-servizzi jew il-prodotti pprovduti inkambju, min-naħa l-oħra, sakemm dawn il-klawżoli jkunu fformulati b’mod ċar u li jinftiehem;

u

peress li, b’mod konformi mal-Artikolu 2[2](a) tad-Direttiva 2008/48/KE (2), id-definizzjoni li l-Artikolu 3(g) ta’ din l-istess direttiva tagħti lill-kunċett tal-ispiża totali tal-kreditu lill-konsumatur, li jinkludi l-kummissjonijiet kollha li l-konsumatur għandu jħallas għall-ftehim ta’ kreditu ta’ konsum, ma huwiex applikabbli għad-determinazzjoni tas-suġġett ta’ ftehim ta’ kreditu ggarantit b’ipoteka,

għalhekk

il-kunċetti ta ‘suġġett’ u/jew ta’ ‘prezz’ fis-sens tal-Artikolu 4(2) tad-Direttiva 93/13/KEE jistgħu jiġu interpretati fis-sens li kummissjoni (imsejħa ‘kummissjoni għal riskju’ mill-partijiet fil-ftehim ta’ kreditu ggarantit b’ipoteka u kkalkulat bil-formula li ġejja: 0,22 % applikat fuq il-bilanċ tal-kreditu, dovut kull xahar fid-data ta’ skadenza, matul il-perijodu kollu ta’ validità tal-ftehim ta’ kreditu) tagħmel parti mis-‘suġġett’ u/jew il-‘prezz’ ta’ ftehim ta’ kreditu ggarantit b’ipoteka?”