EUR-Lex Access to European Union law
This document is an excerpt from the EUR-Lex website
Document 62006CC0194
Opinion of Mr Advocate General Bot delivered on 3 July 2007. # Staatssecretaris van Financiën v Orange European Smallcap Fund NV. # Reference for a preliminary ruling: Hoge Raad der Nederlanden - Netherlands. # Articles 56 EC to 58 EC - Free movement of capital - Taxation of dividends - Concession granted to a fiscal investment enterprise on account of tax deducted at source by another State from dividends received by that enterprise - Restriction of that concession to the amount that a shareholder resident in the Member State of establishment of that enterprise who has made an investment without such an enterprise acting as intermediary could have had credited to income tax on the basis of a convention for the prevention of double taxation - Restriction of that concession by reference to the shares of non-resident shareholders in the capital of that enterprise. # Case C-194/06.
Konklużjonijiet ta' l-Avukat Ġenerali - Bot - 3 ta' Lulju 2007.
Staatssecretaris van Financiën vs Orange European Smallcap Fund NV.
Talba għal deċiżjoni preliminari: Hoge Raad der Nederlanden - l-Olanda.
Artikoli 56 KE sa 58 KE - Moviment liberu tal-kapital - Tassazzjoni ta’ dividendi - Dritt ta’ tpaċija konċess lil impriża ta’ investiment kollettiv ta’ natura fiskali minħabba taxxa mnaqqsa f’ras il-għajn minn Stat ieħor fuq id-dividendi riċevuti minn din l-impriża - Limitazzjoni ta’ din it-tpaċija sa l-ammont li azzjonist residenti fl-Istat Membru fejn hija stabbilita din l-impriża li jkun għamel investiment mingħajr l-intervent ta’ tali impriża jista’ jimputa lit-taxxa fuq id-dħul skond ftehim kontra t-tassazzjoni doppja - Limitazzjoni ta’ din it-tpaċija skond is-sehem ta’ azzjonisti li mhumiex residenti fil-kapital ta’ din l-impriża.
Kawża C-194/06.
Konklużjonijiet ta' l-Avukat Ġenerali - Bot - 3 ta' Lulju 2007.
Staatssecretaris van Financiën vs Orange European Smallcap Fund NV.
Talba għal deċiżjoni preliminari: Hoge Raad der Nederlanden - l-Olanda.
Artikoli 56 KE sa 58 KE - Moviment liberu tal-kapital - Tassazzjoni ta’ dividendi - Dritt ta’ tpaċija konċess lil impriża ta’ investiment kollettiv ta’ natura fiskali minħabba taxxa mnaqqsa f’ras il-għajn minn Stat ieħor fuq id-dividendi riċevuti minn din l-impriża - Limitazzjoni ta’ din it-tpaċija sa l-ammont li azzjonist residenti fl-Istat Membru fejn hija stabbilita din l-impriża li jkun għamel investiment mingħajr l-intervent ta’ tali impriża jista’ jimputa lit-taxxa fuq id-dħul skond ftehim kontra t-tassazzjoni doppja - Limitazzjoni ta’ din it-tpaċija skond is-sehem ta’ azzjonisti li mhumiex residenti fil-kapital ta’ din l-impriża.
Kawża C-194/06.
ECLI identifier: ECLI:EU:C:2007:403
KONKLUŻJONIJIET TAL-AVUKAT ĠENERALI
BOT
ippreżentati fit-3 ta’ Lulju 2007 ( 1 )
Kawża C-194/06
Staatssecretaris van Financiën
vs
Orange European Smallcap Fund NV
“Artikoli 56 KE sa 58 KE — Moviment liberu tal-kapital — Tassazzjoni ta’ dividendi — Dritt ta’ tpaċija konċess lil impriża ta’ investiment kollettiv ta’ natura fiskali minħabba taxxa mnaqqsa f’ras il-għajn minn Stat ieħor fuq id-dividendi riċevuti minn din l-impriża — Limitazzjoni ta’ din it-tpaċija sal-ammont li azzjonist residenti fl-Istat Membru fejn hija stabbilita din l-impriża li jkun għamel investiment mingħajr ma ta’ tali impriża tkun aġixxiet ta’ intermedjarju jista’ jimputa lit-taxxa fuq id-dħul skont ftehim dwar il-ħelsien minn taxxa doppja — Limitazzjoni ta’ din it-tpaċija skont is-sehem ta’ azzjonisti mhux residenti fil-kapital ta’ din l-impriża”
1. |
Il-proċedura preliminari preżenti tirrigwarda s-sistema ta’ tassazzjoni Olandiża fuq l-entitajiet ta’ investiment kollettiv stabbiliti fl-Olanda. Din is-sistema hija maħsuba b’ mod li t-taxxa dovuta lil dan l-Istat Membru fuq id-dividendi li huma rċevuti minn dawn l-impriżi mhijiex mħallsa minnhom stess iżda, wara li tkun saret d-distribuzzjoni tal-benefiċċji tagħhom, mill-azzjonisti kollha tagħhom. Għal dan il-għan, it-taxxa fuq id-dividendi mogħtija lill-impriżi ta’ investiment kollettiv mill-kumpanniji stabbiliti fl-Olanda u miżmuma f’ras il-għajn minn dawn il-kumpanniji huma mħallsa lura lil dawn l-impriżi. |
2. |
Bl-istess mod, l-impriżi ta’ investiment kollettiv jirċievu ukoll mir-Renju tal-Olanda, tpaċija għat-taxxa miżmuma barra mill-pajjiż fuq id-dividendi ġejjin minn pajjiżi oħra. Din it-tpaċija hija suġġetta għal żewġ limitazzjonijiet. L-ewwel nett hija limitata għall-ammont ta’ taxxa barranija li persuna naturali residenti fl-Olanda seta’ jnaqqas mit-taxxa bis-saħħa ta’ ftehim dwar il-ħelsien minn taxxa doppja eżistenti bejn ir-Renju tal-Olanda u l-pajjiż ta’ investiment. It-tieni nett, it-tpaċija hija mnaqqsa skont is-sehem ta’ azzjonisti mhux residenti jew mhux stabbiliti fl-Olanda fil-kapital tal-impriża kkonċernata. |
3. |
Il-Hoge Raad der Nederlanden (Olanda) tistaqsi diversi domandi intiżi biex jippermettulha teżamina l-kompatibbiltà ta’ dawn il-limitazzjonijiet mar-regoli tat-Trattat KE dwar il-moviment liberu tal-kapital. |
4. |
Fil-konklużjonijiet preżenti nfakkar il-prinċipji ġenerali tal-ġurisprudenza għal dak li jirrigwarda d-delimitazzjoni ta’ kompetenza tal-Istati Membri fil-qasam ta’ taxxa fuq id-dividendi u l-prevenzjoni ta’ tassazzjoni doppja. Nindika r-raġuni, fid-dawl ta’ din il-ġurisprudenza, għaliex dawn iż-żewġ restrizzjonijiet huma, fl-opinjoni tiegħi, kuntrarji għad-dispożizzjonijet tal-Artikoli 56 KE u 58 KE. |
I — Il-kuntest ġuridiku
A — Id-dritt Komunitarju
5. |
Skont il-kliem tal-Artikolu 56(1) KE, fil-kuntest tad-dispożizzjonijiet tal-Kapitolu li minnu dak l-Artikolu jagħmel parti, kull restrizzjoni fuq il-moviment tal-kapital bejn l-Istati Membri u bejn l-Istati Membri u pajjiżi terzi hija pprojbita. |
6. |
L-Artikolu 57(1) KE jipprevedi miżuri tranżitorji fir-rigward ta’ pajjiżi terżi. Huwa jipprovdi li: “Id-disposizzjonijiet ta’ l-Artikolu 73b ma jippreġudikawx l-applikazzjoni għall-pajjiżi terzi ta’ xi restrizzjonijiet li jkunu jeżistu fil-31 ta’ Diċembru 1993 skond il-liġi nazzjonali jew il-liġi komunitarja dwar il-moviment tal-kapital lejn jew minn pajjiżi terzi li jinvolvi investiment dirett — inkluż ukoll investiment f’beni immobbli — l-istabbiliment, il-provvediment ta’ servizzi finanzjarji jew id-dħul ta’ titoli fi swieq kapital.” |
7. |
Fl-aħħar nett, l-Artikolu 58 KE jipprovdi: “1. Id-disposizzjonijiet ta’ l-Artikolu 56 m’għandhomx jippreġudikaw id-dritt ta’ l-Istati Membri:
[…] 3. Il-miżuri u l-proċeduri msemmija [fil-paragrafu 1] m’għandhomx jikkostitwixxu mezz ta’ diskriminazzjoni arbitrarja jew restrizzjoni moħbija fuq il-moviment liberu ta’ kapital u ħlasijiet kif definit fl-Artikolu 56 [KE]”. |
B — Id-dritt nazzjonali
8. |
Is-sistema fiskali tal-impriżi ta’ investiment kollettiv hija prevista fl-Artikolu 28 tal-liġi dwar it-tassazzjoni tal-kumpanniji tal-1969 (Wet op de vennootschapsbelasting) u l-Artikolu 6 tad-digriet dwar l-impriżi ta’ investiment kollettiv (Besluit beleggingsinstellingen). |
9. |
Skont l-Artikolu 28 tal-liġi dwar it-tassazzjoni tal-kumpanniji, impriża ta’ investiment kollettiv hija ddefinita bħala kwalunkwe impriża li għandha l-forma ta’ kumpannija pubblika, ta’ kumpannija b’responsabbilita limitata jew ta’ fondi kommuni, li hija stabbilita fl-Olanda u li għandha bħala għan kif ukoll bħala attività effettiva l-investiment ( 2 ). |
10. |
Is-sistema speċifika li għaliha huma suġġetti l-impriżi ta’ investiment kollettiv hija maħsuba b’mod li kemm jista’ jkun issir approssimazzjoni tal-piż fiskali fuq id-dħul minn investimenti magħmula minn dawn l-impriżi ma’ dak li jeżisti fuq l-investimenti magħmula direttament mill-investituri privati. Għaldaqstant, id-dħul tal-investimenti ta’ dawn l-impriżi huwa suġġett, safejn huwa possibbli, għal taxxa bħallikieku kien dħul li minnu jibbenefikaw direttament l-azzjonisti tagħhom. Din l-approssimazzjoni ssir bil-mod deskritt iktar il-quddiem. |
11. |
Il-profitti ta’ impriżi ta’ investiment kollettiv huma suġġetti għal taxxa fuq il-kumpanniji imma huma suġġetti għal rata żero. Bħala korrispettiv, dawn il-profitti għandhom, bħala prinċipju, jiġu ddistribwiti fit-totalità tagħhom lill-azzjonisti fi żmien tmien xhur wara tmiem is-sena fiskali kkonċernata. |
12. |
Meta impriża ta’ investiment kollettiv iżżomm ishma f’kumpanniji stabbiliti fl-Olanda u tirċievi dividendi minn dawn il-kumpanniji, hija tibbenefika minn rifużjoni tat-taxxa Olandiża li kienet imposta fuq dawk id-dividendi u miġbura f’ras il-għajn mill-kumpanniji ta’ distribuzzjoni. |
13. |
Meta entità ta’ investiment kollettiv tirċievi dividendi tas-soċjetajiet stabbiliti fi Stati Membri oħra li kienu suġġetti għal taxxa f’dawn il-pajjiżi, is-sistema hija li ġejja. |
14. |
Fid-dritt Olandiż, ir-reġoli ordinarji intiżi biex jevitaw tassazzjoni doppja ma jipprovdux għall-imputazzjoni tat-taxxa barranija. Fil-fatt, ir-Renju tal-Olanda jillimita l-imputazzjoni tat-taxxa barranija lit-taxxa fuq il-kumpanniji sa’ l-ammont tal-parti tat-taxxa fuq il-kumpanniji Olandiżi li hija proporzjonalment attribwibbli lid-dividendi inkwistjoni. |
15. |
Sa fejn il-profitti ta’ impriża ta’ investiment kollettiv huma suġġetti għal rata żero u fejn għalhekk ebda taxxa hija attribwibbli proporzjonalment mad-dividendi li jiġu minn pajjiżi oħra, il-leġiżjlazzjoni Olandiża tipprevedi sistema msejħa “ta’ tpaċija” tat-taxxa mħallsa barra mill-pajjiż, mal-ammont ta’ taxxa Olandiża li għandha hija dovuta fuq dawn id-dividendi. |
16. |
Din is-sistema ta’ tpaċija hija suġġetta għal żewġ limitazzjonijiet li huma kkontestati fil-kawża prinċipali. |
17. |
Minn naħa, it-tpaċija hija possibli biss jekk, fil-każ ta’ investimenti diretti magħmula minn azzjonisti residenti jew stabbiliti fl-Olanda, dawn jistgħu jeżerċitaw id-dritt ta’ imputazzjoni tat-taxxa barranija lit-taxxa Olandiża, bis-saħħa ta’ liġi li tistabbilixxi l-kwadru fiskali jew ta’ ftehim dwar il-ħelsien minn taxxa doppja. |
18. |
Min-naħa l-oħra, l-ammont ta’ tpaċija hija mnaqqsa skont is-sehem, fil-kapital tal-impriża ta’ investiment kollettiv, ta’ azzjonisti li ma jirrisjedux jew mhux stabbiliti fl-Olanda. |
19. |
Skont l-Artikolu 6 tad-digriet dwar l-impriżi ta’ investiment kollettiv, meta impriża bħal din jkollha azzjonisti mhux residenti jew mhux stabbiliti fl-Olanda, l-ammont ta’ tpaċija huwa stabbilit skont il-formola li ġejja: T tirrappreżenta t-tpaċija; B tirrappreżenta l-ammont ta’ taxxa li għandu jiġi mnaqqas jekk l-azzjonisti kollha jkunu taxxabbli fl-Olanda; Sr tirrappreżenta l-ammont mħallas, fid-data rilevanti, fuq l-ishma jew fuq il-partijiet tal-impriża ta’ investiment kollettiv li huma miżmuma direttament jew bis-saħħa ta’ entitajiet ta’ investiment kollettiv oħrajn minn persuni fiżiċi li jirrisjedu fl-Olanda jew minn impriżi stabbiliti fl-Olanda u li huma suġġetti għat-taxxa fuq il-kumpanniji, minbarra l-impriżi ta’ investiment kollettiv; S tirrappreżenta l-ammont imħallas f’din l-istess data, fuq l-ishma jew il-partijiet kollha pendenti tal-impriża ta’ investiment kollettiv. |
20. |
Min-naħa tagħhom, l-azzjonisti ta’ impriża ta’ investiment kollettiv huma suġġetti għat-taxxa Olandiża fuq il-profitti ddistribwiti minn din l-impriża, li hija suġġetta għal taxxa f’ras il-għajn min-naħa tal-impriża ta’ distribuzzjoni. |
21. |
F’ dak li jirrigwarda l-azzjonisti li jirrisjedu jew li huma stabbilti fl-Olanda, din l-imposta tikkostitwixxi ħlas bil-quddiem. It-taxxa fuq il-profitti hija imputabbli lit-taxxa fuq id-dħul jew lill-kumpanniji li huma suġġetti għat-taxxa u hija mħallsa lura sakemm hija teċċedi l-ammont ta’ dan tal-aħħar. Fir-rigward tal-azzjonisti residenti jew stabbiliti fi Stati Membri oħra, t-taxxa miżmuma mhijiex suġġetta għal ħlas lura ħlief jekk din hija prevista minn ftehim dwar il-ħelsien minn taxxa doppja jew mill-liġi Olandiża li tistabbilixxi s-sistema fiskali. |
22. |
Il-qorti tar-rinviju tindika li, bis-saħħa ta’ din is-sistema, mhijiex l-impriża ta’ investiment kollettiv li hija intaxxata fuq id-dividendi li hija tirċievi, iżda l-azzjonisti ta’ din tal-aħħar wara li tkun saret d-distribuzzjoni tal-profitti. |
II — Il-fatti u l-proċedura fil-kawża prinċipali
23. |
Il-kumpannija European Smallcap Fund NV ( 3 ) għandha bħala għan l-investiment ta’ fondi f’titoli trasferibbli u assi oħra skont il-prinċipju tat-tqassim tar-riskji. Hija stabbilita f’Amsterdam. Fuq il-livell fiskali, hija kkunsidrata bħala impriża għal investiment kollettiv, fis-sens tal-A rtikolu 28 tal-liġi dwar it-tassazzjoni tal- kumpanniji. |
24. |
Fil-portafoll tagħha hija tamministra titoli maħruġa minn impriżi Ewropej ikkwotati fil-borża. Il-qorti tar-rinviju tippreċiża li waqt l-eżerċizzju ta’ kontabbilità rilevanti, OESF ma kellha ebda sehem f’kumpanniji stabbiliti barra l-Olanda b’mod li setgħet tiddeċiedi l-attivitajiet ta’ dawn il-kumpanniji. |
25. |
L-azzjonisti ta’ OESF huma persuni naturali u ġuridiċi. Matul l-eżerċizzju ta’ kontabbilità pertinenti fil-każ preżenti, il-maġġoranza ta’ dawn l-azzjonisti kienu residenti jew stabbiliti fl-Olanda. Xi ftit minnhom kienu residenti jew stabbiliti fi Stati Membri oħra (il-Belġju, il-Ġermanja, Franza, il-Lussemburgu u r-Renju Unit) jew f’pajjiżi terżi (l-Istati Uniti u l-Iżvizzera). |
26. |
Waqt l-eżerċizzju ta’ kontabbilità 1997/1998, OESF irċeviet, bis-saħħa tas-sehem tagħha f’dawn il-kumpanniji barranin, dividendi li jammontaw għal NLG 5257519.15. Barra mill-pajjiż, ġiet imposta taxxa f’ras il-għajn fuq dawn id-dividendi li tlaħħaq ammont totali ta’ NLG 735320. Din is-somma tinkludi t-taxxa imposta fil-Ġermanja u dik imposta fil-Portugall li hija ta’ NLG 132339 et de NLG 9905 rispettivament. |
27. |
OESF talbet lill-amminnistrazzjoni fiskali Olandiża l-benefiċċju ta’ tpaċija għal dawn it-taxxi barranin, ikkalkulat abbażi tal-ammont totali ta’ NLG 735320. |
28. |
L-amministrazzjoni fiskali kkunsidrat li t-taxxi mħallsa fil-Ġermanja u fil-Portugall kellhom jiġu esklużi mill-bażi ta’ komputazzjoni. Din l-esklużżjoni hija ġġustifikata minħabba l-fatt li, fir-riġward tal-eżerċizzju ta’ kontabbilità rilevanti, il-ftehim ta’ bejn ir-Renju tal-Olanda u r-Repubblika Federali tal-Ġermanja ma kienx jipprevedi d-dritt ta’ tpaċija tat-taxxa Ġermaniża mħallsa fuq id-dividendi li joriġinaw mill-Ġermanja u mħallsa lir-residenti fl-Olanda, u ebda ftehim dwar il-ħelsien minn taxxa doppja ma kien jeżisti bejn ir-Renju tal-Olanda u r-Repubblika tal-Portugall. |
29. |
Għalhekk, l-amminnistrazzjoni fiskali ħadet is-somma ta’ NLG 593076 bħala bażi għall-komputazzjoni tat-tpaċija. Wara dan, bl-applikazzjoni tal-metodu imsemmi fl-Artikolu 6 tad-diġriet relattiv għall-impriżi ta’ investiment kollettiv, li japplika meta l-azzjonisti mhumiex esklużivament persuni naturali jew ġuridiċi li jirrisjedu jew li huma stabbiliti fl-Olanda, hija ffissat l-ammont ta’ tpaċija għal NLG 418013. |
30. |
Il-Gerechtshof te Amsterdam (Qorti tal-Appel ta’ Amsterdam), li quddiemha ġie ppreżentat rikors minn OESF, annullat id-deċiżjoni tal-amministrazzjoni fiskali u ffissat dan l-ammont għal NLG 622006. Din il-Qorti kkunsidrat li kemm l-esklużjoni tat-taxxa mħallsa fil-Ġermanja u fil-Portugall mill-bażi ta’ komputazzjoni tat-tpaċija kif ukoll it-tnaqqis ta’ din tal-aħħar skont il-sehem tal-azzjonisti li jirrisjedu jew li huma stabbiliti barra mill-pajjiż fil-kapital ta’ OESF kienu jikkonstitwixxu ostakolu mhux ġustifikat għall-moviment liberu tal-kapital. |
31. |
Is-Staatssecretaris van Financiën (Seġretarju tal-Istat fil-materja tal-Finanzi) appella minn din is-sentenza quddiem il-Qorti tal-Kassazzjoni. Huwa kkontesta d-deċiżjoni tal-Gerechtshof te Amsterdam fir-rigward kemm tat-teħid inkunsiderazzjoni tat-taxxa mħallsa fil-Ġermanja u fil-Portugall, kif ukoll tat-tnaqqis tat-tpaċija skont il-sehem ta’ azzjonisti li jirrisjedu jew li huma stabbiliti barra mill-Olanda. |
III — Ir-rinviju għal deċiżjoni preliminari
32. |
Il-Hoge Raad der Nederlanden iddeċidiet li tissospendi l-proċedura u tagħmel lill-Qorti tal-Ġustizzja d-domandi preliminari li ġejjin:
|
IV — Analiżi
33. |
Qabel l-eżaminazzjoni tad-domandi magħmula mill-qorti tar-rinviju, huwa opportun li jiġu mfakkra l-prinċipji importanti tal-ġurisprudenza dwar il-delimitazzjoni tal-kompetenza tal-pajjiżi Membri fil-materja ta’ tassazzjoni ta’ dividendi, b’mod partikolari dawk li jikkonċernaw il-mekkaniżmi intiżi sabiex jipprevjenu s-sitwazzjonijiet ta’ tassazzjoni doppja tal-profitti ta’ kumpannija u l-effet ta’ ftehim bilaterali. |
A — Il-prinċipji importanti tal-ġurisprudenza
1. Il-kuntest ġenerali
34. |
It-tassazzjoni tad-dividendi tagħmel parti mit-tassazzjoni diretta li sal-ġurnata ta’ llum mhijiex is-suġġett, fit-Trattat, ta’ attribuzjoni espressa ta’ kompetenza lill-Komunità. Għaldaqstant, l-Istati Membri jistgħu jiddefinixxu b’diskrezzjoni wiesgħa l-kundizzjonijiet li taħthom jistgħu jimponu t-taxxa, jiġifieri r-rata, il-modalitajiet ta’ ġbir, u l-portata ta’ applikazzjoni b’mod unilaterali jew bi ftehim, permezz ta’ ftehim internazzjonali. |
35. |
Madankollu, kif imfakkar regolarment mill-Qorti tal-Ġustizzja, din il-kompetenza mhijiex illimitata. Fil-fatt hija għandha tiġi eżerċitata billi jiġi osservat id-dritt Komunitarju, b’mod partikolari l-libertajiet ta’ moviment previsti mit-Trattat ( 4 ). |
36. |
Id-delimitazzjoni tal-kompetenza tal-Istati Membri minn dawn il-libertajiet ta’ moviment hija tradotta f’żewġ prinċipji. L-ewwel fosthom hija l-projbizzjoni ta’ miżuri diskriminatorji: il-persuna taxxabbli suġġetta għat-taxxa li tiġi minn Stat Membu ieħor ma għandhiex tkun suġġetta għal trattament fiskali diskriminatorju min-naħa tal-Istat Membru ospitanti. It-tieni prinċipju huwa dak tal-projbizzjoni, mill-Istat Membru ta’ oriġini, ta’ ostakoli għall-eżerċizzju tal-libertà ta’ moviment ta’ wieħed miċ-cittadini tiegħu. Dawn huma l-“ostakoli għall-ħruġ”. |
37. |
Fil-kuntest tal-libertà ta’ moviment tal-kapital applikabbli għat-tassazzjoni tal-profitti tal-kumpanniji, fil-gurisprudenza dawn iż-żewġ prinċipji jieħdu l-forma ta’ projbizzjoni, min-naħa, ta’ miżuri fiskali ta’ Stat Membru li jostakolaw il-ġbir minn kumpanniji barranin tal-kapital f’dan l-Istat u, min-naħa l-oħra, ta’ miżuri fiskali ta’ Stat Membru li jiddisswadu lill-persuni li jħallsu t-taxxa f’dak l-Istat milli jinvestu l-kapital tagħhom f’kumpanniji stabbiliti barra mill-pajjiż, bil-partikolarità li, bid-differenza tal-libertajiet l-oħra ggarantiti taħt it-Trattat, dawn il-projbizzjonijiet mhumiex limitati għall-kummerċ intrakomunitarju biss, imma jestendu ruħhom bl-istess mod għall-kummerċ mal-pajjiżi terzi. |
38. |
Konformament mal-prinċipju ta’ non diskriminazzjoni, li huwa applikat permezz tad-diversi libertajiet ta’ moviment previsti mit-Trattat, Stat Membru ma jistax japplika regoli fiskali differenti fil-konfront ta’ sitwazzjonijiet komparabbli jew l-istess regola fiskali lill sitwazzjonijiet differenti. Barra minn hekk, dan il-prinċipju jipprojbixxi mhux biss id-diskriminazzjonijiet ċari bbażati fuq in-nazzjonalità ( 5 ). Huwa jipprojbixxi bl-istess mod kull forma ta’ diskriminazzjoni li, permezz tal-użu ta’ kriterji oħra ta’ distinzjoni, twassal fil-fatt għall-istess riżultat. |
39. |
Fil-qasam tat-tassazzjoni diretta, il-prinċipju ta’ non diskriminazzjoni u l-kompetenza riżervata tal-Istati Membri ġew f’kunflitt, b’mod partikolari, fil-kuntest ta’ miżuri nazzjonali li jipprevedu trattament differenti skont ir-residenza tal-peruna li għandha tħallas it-taxxa. |
40. |
Minn naħa, il-kriterju ta’ residenza fiskali huwa, bħala prinċipju, utilizzat sabiex jiddetermina l-kompetenzi rispettivi ta’ tassazzjoni tal-Istati Membri. Fil-fatt, b’mod ġenerali, l-Istati Membri jintaxxaw lill-persuni naturali jew ġuridiċi li jirrisjedu fit-territorju tagħhom u jintaxxaw lill-persuni mhux residenti fuq il-benefiċċji li jirriżultaw minn attività eżerċitata fit-territorju tagħhom. Bl-istess mod, huma jipprovdu għal vantaġġi fiskali li minnhom jistgħu jibbenefikaw biss il-persuni residenti, bħal fil-każ ta’ miżuri intiżi sabiex jieħdu inkunsiderazzjoni s-sitwazzjoni personali u familjali tagħhom, fir-rigward ta’ liema huma qegħdin f’aħjar sitwazzjoni biex jevalwaw. F’dan ir-rigward, il-Qorti tal-Ġustizzja ammettiet li s-sitwazzjoni ta’ persuni residenti u dik ta’ persuni non residenti mhijiex, b’mod ġenerali, komparabbli ( 6 ). |
41. |
Min-naħa l’oħra, leġiżlazzjoni nazzjonali ta’ Stat Membru li tirriżerva vantaġġi fiskali lir-residenti tat-territorju nazzjonali hija ta’ benefiċċju prinċipalmanet għac-ċittadini ta’ dan l-Istat, peress illi, f’ħafna mill-każijiet, il-persuni mhux residenti huma normalment ċittadini ta’ pajjiżi oħra ( 7 ). |
42. |
Huwa dan il-kunflitt li huwa espress fl-Artikolu 58 KE, li jipprovdi li d-dispożizzjonijiet tal-Artikolu 56 KE m’għandhomx jippreġudikaw id-dritt tal-Istati Membri li japplikaw id-dispożizzjonijiet relevanti tal-liġi fiskali tagħhom li jagħmlu distinzjoni bejn persuni taxxabbli li mhumiex fl-istess sitwazzjoni għal dak li jirrigwarda l-post ta’ residenza tagħhom jew rigward il-post fejn il-kapital tagħhom ikun investit, bil-kundizzjoni li dawn id-dispożizzjonijiet m’għandhomx jikkostitwixxu mezz ta’ diskriminazzjoni arbitrarja jew restrizzjoni moħbija fuq il-moviment liberu ta’ kapital u ħlasijiet. |
43. |
Għaldaqstant, leġiżlazzjoni nazzjonali li tagħmel distinzjoni bejn il-persuni li jħallsu t-taxxa abbażi tar-residenza jew il-post fejn investew il-kapital tagħhom ma tistax tiġi kkusidrata kompatibbli mal-Artikoli 56 KE u 58 KE, ħlief jekk din id-differenza fit-trattament tikkonċerna sitwazzjonijiet li mhumiex oġġettivament komparabbli għall-finijiet tal-applikazzjoni tal-miżura fiskali inkwistjoni. |
44. |
Fil-każ kuntrarju, jekk is-sitwazzjonijiet inkwistjoni huma oġġettivament komparabbli, skont il-ġurisprudenza, tali distinzjoni hija konformi mad-dritt Komunitarju biss jekk hija ġġustifikata minn waħda mir-raġunijiet imsemmija fl-Artikolu 58(1)(b) KE jew minħabba raġuni imperattiva ta’ interess ġenerali, bħal ħtieġa li tiġi protetta l-koerenza tas-sistema fiskali, u jekk din ma tmurx lilhinn minn dak li huwa meħtieġ biex jiġi miksub l-għan imfittex mil-leġiżlazzjoni inkwistjoni ( 8 ). |
2. Il-miżuri intiżi għall-prevenzjoni jew tnaqqis tal-effet ta’ tassazzjoni doppja
45. |
F’bosta sentenzi l-Qorti tal-Ġustizzja ppreċiżat il-portata ta’ din id-delimitazzjoni ġenerali tal-kompetenza tal-Istati Membri fil-materja ta’ fiskalità diretta fil-każ ta’ miżuri Statali, unilaterali jew bi ftehim, intiżi biex jipprevjenu jew inaqqsu l-effet ta’ tassazzjoni doppja tal-profitti mqassma mill-kumpanniji. |
46. |
L-ewwel nett, għandu jiġi mfakkar li l-profitti ta’ kumpannija jistgħu jkunu s-suġġett ta’ tassazzjoni doppja f’diversi każijiet. B’hekk, huma jistgħu jkunu s-suġġett ta’ “sensiela ta’ taxxi” jew ta’ “taxxa ekonomika doppja” meta huma imposti fuq żewġ persuni differenti, l-ewwel darba fuq il-kumpannija fil-kuntest ta’ taxxa fuq il-profitti u wara, għat-tieni darba, fuq l-azzjonist li lilu jiġu ddistribwiti, fil-kuntest ta’ taxxa fuq il-kumpanniji jew ta’ taxxa fuq id-dħul, skont jekk l-azzjonist huwiex kumpannija jew persuna. |
47. |
Dawn il-profitti jistgħu ukoll jkunu s-suġġett ta’ “tassazzjoni legali doppja” meta l-istess persuna taxxabbli tiġi intaxxat darbtejn fuq l-istess dħul. Din is-sitwazzjoni tista’ sseħħ meta azzjonist li jirċievi d-dividendi jiġi suġġett, min-naħa, għal taxxa f’ras il-għajn fuq dawn id-dividendi mill-Istat Membru li fih il-kumpannija li toħroġhom hija stabbilita u, min-naħa l-oħra, għal taxxa fuq id-dħul fuq dawn id-dividendi fl-Istat ta’ residenza tiegħu. |
48. |
L-interpretazzjoni tal-ġurisprudenza b’dan il-mod titlaq mill-premessa li, b’mod ġenerali, t-tassazzjoni doppja mhijiex kuntrarja għad-dritt komunitarju. |
49. |
Fil-fatt, ebda miżura ta’ tqassim ta’ kompetenzi bejn l-Istati Membri li huma intiżi sabiex jeliminaw it-tassazzjoni doppja ma ġiet konkluża fil-qafas tat-Trattat. It-tassazzjoni doppja hija pprojbita biss taħt xi direttivi, bħad-Direttiva tal-Kunsill 90/435/KEE ( 9 ), li mhumiex rilevanti fil-każ inkwistjoni ( 10 ). Barra minn dan, b’eċċezzjoni tal-Ftehim 90/436/KEE ( 11 ), l-Istati Membri ma kkonkludew ebda ftehim multilaterali abbażi tal-Artikolu 293 KE f’dan ir-rigward. |
50. |
Żewġ konsegwenzi joħorġu minn din il-premessa. Min-naħa, jekk tassazzjoni doppja tirriżulta mill-eżerċizzju tal-Istati Membri tal-kompetenzi rispettivi tagħhom, bħal fil-każ tat-tassazzjoni ta’ persuna taxxabbli mill-Istat Membru ta’ residenza tagħha fuq id-dħul totali tagħha u t-tassazzjoni tad-dividendi tal-istess persuna mill-Istat li fit-territorju tiegħu ġew mqassma d-dividendi, din mhijiex, fiha innifisha, ksur tad-dritt Komunitarju ( 12 ). |
51. |
Min-naħa l-oħra, fin-nuqqas ta’ miżuri u ta’ ftehim multilaterali f’dan ir-rigward, l-Istati Membri huma liberi li jistabbilixxu l-kriterji tat-tqassim bejniethom tas-setgħa ta’ tassazzjoni u li jieħdu, b’mod unilaterali jew permezz ta’ ftehim bilaterali, il-miżuri meħtieġa sabiex jipprevjenu l-kazijiet ta’ tassazzjoni doppja. Madanakollu, fl-eżerċizzju ta’ din il-kompetenza, l-Istati Membri, kemm fil-kuntest ta’ miżuri unilaterali jew bi ftehim, għandhom jirrispettaw l-eżiġenzi tad-dritt Komunitarju u, b’mod partikolari, dawk li jirriżultaw mil-libertajiet ta’ moviment ( 13 ). |
52. |
Bosta każijiet ippermettew lill-Qorti tal-Ġustizzja tiċċara l-portata ta’ din l-obbligazzjoni f’dak li jirrigwarda t-tassazzjoni tal-Istati Membri, min-naħa, tad-dividendi deħlin, bħala Stat ta’ residenza tal-azzjonist, u, min-naħa l-oħra, tad-dividendi li joħorġu, bħala Stat ta’ oriġini ta’ dawk id-dividendi. |
53. |
F’dak li jirrigwarda t-tassazzjoni tad-dividendi li deħlin, joħroġ mill-ġurisprudenza li meta Stat Membru jintaxxa lill-persuni taxxabbli residenti fuq id-dividendi kollha li jirċievu u jieħu l-miżuri sabiex jipprevjeni jew inaqqas it-tassazzjoni ekonomika doppja ta’ dawk id-dividendi, ma jistax jillimita l-applikazzjoni ta’ dawn id-dispożizzjonijiet lid-dividendi ta’ oriġini nazzjonali, iżda għandu jestendi dan il-benefiċċju għad-dividendi mqassma mill-kumpanniji stabbiliti fl-Istati Membri l-oħra ( 14 ). |
54. |
Il-Qorti tal-Ġustizzja kkonstatat li din l-ugwaljanza fit-trattament hija meħtieġa minħabba li, fir-rigward tal-għan ta’ dawn id-dispożizzjonijiet, il-pożizzjoni ta’ persuna taxxabbli li tirċievi dividendi ġejjin minn Stati Membri oħra hija komparabbli ma’ dik ta’ persuna taxxabbli li tirċievi dividendi ta’ oriġini nazzjonali minħabba li fiż-żewġ każijiet dawn iż-żewġ dividendi setgħu jkunu suġġeti għal “sensiela ta’ taxxi” jew għal “taxxa ekonomika doppja”, li l-imsemmija dispożizzjonijiet kellhom preċiżament l-għan li jipprevjenu jew li jnaqqsu ( 15 ). |
55. |
F’dak li jirrigwarda t-taxxa fuq id-dividendi ħerġin, bl-istess mod teżisti ġurisprudenza stabbilita li tipprovdi li, mill-mument li Stat Membru, b’mod unilaterali jew bi ftehim, jimponi taxxa fuq id-dħul mhux biss tal-azzjonisti residenti, iżda ukoll tal-azzjonisti mhux residenti, fuq id-dividendi li huma jirċievu minn kumpannija residenti, dan l-Istat għandu joqgħod attent li, fir-rigward tal-mekkaniżmu intiż sabiex jipprevjeni jew inaqqas sensiela ta’ taxxi prevista mid-dritt nazzjonali tiegħu, l-azzjonisti mhux residenti jkunu suġġetti għall-istess trattament li jirċievu l-azzjonisiti li huma residenti ( 16 ). |
56. |
Fil-każ ineżami, l-ugwaljanza fit-trattament hija imposta fuq l-Istat Membru ta’ origini tad-dividendi l-għaliex dan l-Istat iddeċieda li jeżerċita l-kompetenza fiskali tiegħu mhux biss fuq id-dividendi mqassma lill-azzjonisti residenti, iżda ukoll fuq id-dividendi mqassma lill-azzjonisti mhux residenti ( 17 ). |
3. L-effetti tal-ftehim bilaterali
57. |
L-evalwazzjoni tal-ġurisprudenza dwar l-effetti tal-ftehim bilaterali fil-materja fiskali tagħti lok għal erba’ duttrini li huma rilevanti għall-kawża preżenti. |
58. |
L-ewwel waħda minn dawn id-duttrini hija li d-drittijiet li joħorġu mill-libertajiet ta’ ċirkolazzjoni garantiti mit-Trattat fi ħdan l-Unjoni Ewropea mhumiex suġġetti għal kundizjonijiet u li Stat Membru ma jistax jqiegħed ir-rispett tagħhom dipendenti fuq il-kontenut ta’ ftehim konkluż ma’ Stat Membru ieħor ( 18 ). Fi kliem ieħor, Stat Membru ma jistax jissuġġetta dawn id-drittijiet għal ftehim ta’ reċiproċità konkluż ma’ Stat Membru ieħor bil-għan li jirċievi vantaġġi korrispondenti minn dak l-Istat ( 19 ). |
59. |
It-tieni duttrina hija li fil-preżenza ta’ miżura fiskali ta’ Stat Membru li tostakola l-libertà ta’ moviment prevista mit-Trattat, ftehim bilaterali jista’ jiġi meħud inkunsiderazzjoni meta huwa jinnewtralizza dan l-ostakolu ( 20 ). Il-Qorti tal-Ġustizzja teżamina jekk l-applikazzjoni tal-leġiżlazzjoni inkwistjoni flimkien mal-ftehim bilaterali tħallix fis-seħħ restrizzjoni għal-libertà tal-moviment applikabbli ( 21 ) jew tirrinvija din id-deċiżjoni lill-qorti nazzjonali ( 22 ). |
60. |
It-tielet duttrina hija li meta persuna taxxabbli li mhijiex residenti tinsab fl-istess sitwazzjoni ta’ persuna taxxabbli residenti, bis-saħħa tal-prinċipju ta’ trattament nazzjonali, hija għandha tibbenefika, taħt l-istess kundizzjonijiet ta’ persuna taxxabbli residenti, mill-vantaġġi li joħorġu minn ftehim bilaterali konkluż bejn l-Istat ta’ residenza u pajjiż terż ( 23 ). |
61. |
Ir-raba’ duttrina hija li d-dritt Komunitarju ma jobbligax lil Stat Membru li jestendi lill-persuna taxxabbli li mhijiex residenti li ma tinsabx f’sitwazzjoni komparabbli ma’ dik ta’ persuna taxxabbli residenti, il-benefiċċju ta’ ftehim bilaterali konkluż ma’ pajjiż li mhuwiex dak tal-persuna taxxabbli li mhijiex residenti ( 24 ). Fi kliem ieħor id-dritt Komunitarju fil-qasam fiskali ma jobbligax lil Stat Membru li jakkorda lir-residenti ta’ Stat Membru ieħor il-benefiċċju tal-klawżola tal-pajjiż l-iktar favorit. |
62. |
Huwa fil-kuntest ta’ dawn il-prinċipji kbar ta’ ġurisprudenza li ser neżamina d-domandi preliminari mqajma mill-Hoge Raad der Nederlanden. |
B — Fuq id-domandi preliminari
1. Introduzzjoni
a) Fuq il-libertà ta’ moviment applikabbli
63. |
Preliminarjament, għandu jiġi mfakkar li l-ġbir, minn azzjonist li jirrisjedi jew li huwa stabbilit fi Stat Membru, ta’ dividendi li jiġu minn kumpaniji mhux residenti jikkonstitwixxi moviment ta’ kapital fis-sens tal-Artikolu 56 KE ( 25 ). |
64. |
Jirriżulta mill-ġurisprudenza li leġiżlazzjoni nazzjonali li timponi fuq il-ġbir ta’ dividendi taxxa li r-rata tagħha tiddependi mill-oriġini, nazzjonali jew le, ta’ dawk id-dividendi, independentament mis-sehem tal-parteċipazzjoni li l-azzjonist iżomm fil-kumpannija li toħroġhom, tista’ taqa’ kemm taħt l-Artikolu 43 KE, dwar il-libertà ta’ stabbiliment, kif ukoll taħt l-Artikolu 56 KE, dwar il-libertà ta’ moviment tal-kapital ( 26 ). Madanakollu, meta s-sehem tal-azzjonist fil-kapital ta’ kumpannija ma tpoġġiehx f’pożizzjoni li jkun jista’ jeżerċita influwenza żgura fuq id-deċiżjonijiet ta’ dik il-kumpannija, u lanqas ma tpoġġieh f’pożizzjoni li jiddetermina l-attivitajiet tagħha, id-dispożizzjonijiet tal-Artikolu 56 KE biss huma applikabbli ( 27 ). |
65. |
Jirriżulta mill-informazzjoni mogħtija mill-qorti tar-rinviju li s-sehem ta’ OESF fil-kapital tal-kumpanniji li ħarġu d-dividendi, waqt l-eżerċizzju ta’ kontabbiltà rilevanti, ma tpoġġiehiex f’sitwazzjoni li jista’ tiddeċiedi dwar l-attivitajiet ta’ dawn il-kumpanniji. Għaldaqstant, huwa fid-dawl tad-dispożizzjonijiet tat-trattat dwar il l-libertà ta’ moviment ta’ kapital, u biss fil-konfront ta’ dawn tal-aħħar, li ser neżamina l-kompatibbiltà tal-limitazzjonijiet kkontestati mad-dritt Komunitarju. |
b) Fuq il-kontenut tad-domandi preliminari u l-ordni ta’ eżami tagħhom
66. |
Il-qorti tar-rinviju tpoġġi tliet sensieliet ta’ domandi preliminari. Permezz tal-ewwel domanda tagħha, paragrafi a) u b), hija tistaqsi lill-Qorti tal-Ġustizzja dwar il-kompatibbiltà taż-żewġ limitazzjonijiet inkwistjoni mal-Artikoli 56 KE u 58 KE. |
67. |
Permezz tat-tieni domanda tagħha, paragrafi a) sa ċ), li magħhom nannetti t-tielet domanda, paragrafi b) u ċ), hija tipprova ssir taf liema konsegwenzi għandhom jiġu dedotti mill-fatt li impriża ta’ investiment kollettiv bħal OESF investiet f’pajjiżi terzi u għandha hija stess azzjonisti li jirrisjedu jew li huma stabbiliti f’pajjiżi terzi. |
68. |
Fl-aħħar nett, permezz tat-tielet domanda, paragrafu a), il-qorti tar-rinviju tistaqsi jekk il-fatt li t-taxxa mħallsa fi Stat ieħor hija ogħla mit-taxxa imposta fuq id-dividendi mqassma mill-ġdid lill-azzjonisti barranin fl-Istat Membru fejn l-impriża ta’ investiment kollettiv hija stabblita għandha jkollha effett fuq ir-risposti mogħtija lid-domandi preċedenti. |
69. |
Ser neżamina suċċessivament dawn it-tliet sensieliet ta’ domandi. |
2. Fuq l-ewwel sensiela ta’ domandi preliminari
a) Fuq l-ewwel domanda, paragrafu a)
70. |
Permezz tal-ewwel domanda tagħha, paragrafu a), il-qorti tar-rinviju tistaqsi, essenzjalment, jekk l-Artikoli 56 KE u 58 KE jipprekludux leġiżlazzjoni ta’ Stat Membru bħall-leġiżlazzjoni Olandiża inkwistjoni li, waqt li tipprovdi għall-benefiċċju ta’ impriżi ta’ investiment kollettiv, tpaċija intiża li tieħu inkunsiderazzjoni taxxa mħallsa f’ras il-għajn fi Stat Membru ieħor fuq id-dividendi imqassma lill-imsemmija impriżi, tillimita din it-tpaċija sal-ammont li persuna naturali li tirrisjedi fit-territorju tal-Olanda setgħet tpaċi bis-saħħa ta’ ftehim dwar il-ħelsien minn taxxa doppja konkluż ma’ Stat Membu ieħor. |
71. |
Permezz ta’ din id-domanda, l-imsemmija qorti tipprova ssir taf jekk ir-rifjut tal-awtorità fiskali Olandiża, li tieħu inkunsiderazzjoni t-taxxi mħallsa minn OESF fil-Ġermanja u fil-Portugall fuq id-dividendi li joriġinaw minn dawn l-Istati, huwiex kuntrarju għall-Artikoli 56 KE u 58 KE. |
72. |
Il-qorti tar-rinviju tiddikjara li hija ssaqsi din id-domanda lill-Qorti tal-Ġustizzja minħabba l-fatt li impriża ta’ investiment kollettiv li tirċievi dividendi ta’ kumpanniji stabbiliti fl-Olanda tibbenefika minn ħlas lura tat-taxxa kollha Olandiża fuq id-dividendi miġbura f’ras il-għajn minn dawn il-kumpanniji. |
73. |
Fid-dawl ta’ din il-konstatazzjoni, OESF u l-Kummissjoni tal-Komunitajiet Ewropej isostnu li s-sistema kkontestata tagħmel differenza ta’ trattament li mhijiex ġustifikata bejn it-taxxa miġbura f’ras il-għajn fil-Ġermanja u fil-Portugall u dik miġbura f’ras il-għajn fl-Olanda u li hija, minħabba dan il-fatt, kuntrarja għad-dritt Komunitarju. |
74. |
OESF issostni ukoll li din is-sistema hija, bl-istess mod, kuntrarja għall-Artikoli 56 KE u 58 KE minħabba li, fil-każ ta’ investiment fl-Istati Membri kollha minbarra l-Ġermanja u l-Portugall, l-impriża ta’ investiment kollettiv tirċievi tpaċija intiża sabiex tipprevjeni jew tnaqqas it-tassazzjoni doppja tad-dividendi. |
75. |
Min-naħa tiegħu, il-Gvern Olandiż isostni li s-sistema kkontestata hija konformi mad-dritt Komunitarju. Fil-fatt, skont hu, din is-sistema ma tagħmel ebda distinzjoni abbażi tal-oriġini tad-dividendi peress li r-rifużjoni tat-taxxa Olandiża tikkonstitwixxi, fir-realtà, eżenzjoni, b’tali mod li l-impriżi ta’ investiment kollettiv ma jkunux intaxxati la fuq id-dividendi nazzjonali u lanqas fuq id-dividendi barranin. Għaldaqstant, it-tassazzjoni doppja li tolqot lid-dividendi li joriġinaw mill-Ġermanja u mill-Portugall huma r-riżultat, fil-każ preżenti, tal-eżerċizzju minn kull wieħed minn dawn l-Istati Membri tal-kompetenzi tagħhom fil-qasam fiskali u s-sitwazzjoni fil-kawża preżenti hija komparabbli ma’ dik fil-kawża li tat lok għas-sentenza Kerckhaert u Morres, iċċitata iktar ’il fuq. |
76. |
Bl-istess mod, il-Gvern Olandiż jesponi li l-fatt li t-taxxa imposta fil-Ġermanja u fil-Portugall ma tagħtix lok għal tpaċija, kuntrarjament għat-taxxa mħallsa f’ras il-għajn fi Stati Membri oħra bħall-Italja, hija inerenti mill-kontenut ta’ ftehim bilaterali konklużi bejn dawn l-Istati, b’ tali mod li, minn dan l-aspett, is-sitwazzjoni fil-kawża preżenti hija komparabbli mal-kawża li tat lok għas-sentenza D, iċċitata iktar ’il fuq. |
77. |
Jiena naqbel mal-fehma tal-Gvern Olandiż fir-rigward l-ewwel parti tal-analiżi tiegħu. Kuntrarjament għal OESF u għall-Kummissjoni, jiena ma nemminx li s-sistema fiskali kkontestata għandha tiġi kkunsidrata bħala kuntrarja għad-dritt Komunitarju meta jsir paragun bejn t-trattament, f’din is-sistema, ta’ dividendi ġejjin mill-Ġermanja u mill-Portugall ma’ dak ta’ dividendi ġejjin mill-Olanda. |
78. |
Min-naħa l-oħra, bħal OESF, jiena tal-fehma li s-sistema inkwistjoni tmur kontra l-Artikoli 56 KE u 58 KE meta hija tapplika fil-konfront tad-dividendi ġejjin mill-Ġermanja u mill-Portugall trattament anqas favorevoli minn dak riżervat għad-dividendi ġejjin minn Stati Membri oħra. Jiena tal-fehma li l-limitazzjoni tal-benefiċċju ta’ tpaċija previst minn din is-sistema għat-taxxa miġbura f’ras il-għajn fi Stati Membri oħra minbarra l-Ġermanja u l-Portugall ma tistax tkun kkunsidrata bħala differenza fit-trattament inerenti għall-ftehim bilaterali konklużi bejn ir-Renju tal-Olanda u l-Istati Membri fis-sens tas-sentenza D, iċċitata iktar ’il fuq. |
79. |
Ser nittratta suċċessivament kull wieħed minn dawn il-punti. |
80. |
Preliminarjament, għandu jiġi mfakkar li bis-saħħa tas-sistema fiskali kkontestata, impriża ta’ investiment kollettiv hija intaxxata b’rata żero fuq il-profitti tagħha u l-azzjonisti tagħha huma intaxxati fit-totalità tal-profitti li jiġu mqassma lilhom minn din l-impriża, independentament mill-oriġini tagħhom, jiġifieri kemm id-dividendi mqassma mill-kumpanniji stabbiliti fl-Olanda kif ukoll dawk ta’ oriġini barranin. Għaldaqstant, il-profitti mqassma lil impriża ta’ investiment kollettiv minn kumpanniji stabbilti fil-Ġermanja u fil-Portugall, jagħmlu parti mill-profitti intaxxati fl-Olanda meta jiġu mqassma lill-azzjonisti ta’ din l-impriża, permezz ta’ taxxa miġbura f’ras il-għajn minn din tal-aħħar. |
81. |
Bl-istess mod, huwa paċifiku li t-taxxa fuq id-dividendi Olandiżi, li hija miġbura f’ras il-għajn mill-kumpanniji stabbiliti fl-Olanda hija mħallsa lura lill-impriża ta’ investiment kollettiv u li din l-impriża tirċievi, min-naħa tar-Renju tal-Olanda, tpaċija għat-taxxa mħallsa f’ras il-għajn fi Stati Membri oħra minbarra l-Ġermanja u l-Portugall. |
82. |
F’dawn iċ-ċirkustanzi, huwa iktar vantaġġjuż għal impriża ta’ investiment kollettiv li tinvesti f’kumpanniji stabbiliti fl-Olanda kif ukoll fi Stati Membri oħra minbarra l-Ġermanja u l-Portugall, milli tinvesti f’kumpanniji stabbilti f’dawn iż-żewġ Stati Membri. Fil-fatt, filwaqt li d-dividendi li joriġinaw mill-Olanda huma intaxxati darba waħda biss fil-livell ta’ azzjonisti, u filwaqt li d-dividendi ġejjin minn Stati Membri oħra minbarra l-Ġermanja u l-Porugall jagħtu lok għal tpaċija għat-taxxa mħallsa f’ras il-għajn, id-dividendi ġejjin minn dawn iż-żewġ Stati Membri tal-aħħar jibqgħu suġġetti għal tassazzjoni doppja. |
83. |
Għaldaqstant, din id-differenza ta’ trattament tista’ tiddisswadi lill-impriżi ta’ investiment kollettiv milli jinvestu fil-Ġermanja kif ukoll fil-Portugall, u tista’ tikkonstitwixxi xkiel għall-ġbir, minn kumpanniji stabbiliti f’dawn l-Istati Membri, ta’ kapital fl-Olanda minn tali impriżi. |
84. |
Madanakollu, skont il-ġurisprudenza, tali restrizzjonijiet huma kuntrarji għad-dispożizzjonijiet tal-Artikoli 56 KE u 58 KE biss jekk huma l-konsegwenza ta’ diskriminazzjoni ċara jew moħbija, jiġifieri jekk huma r-riżultat tal-istess sistema fiskali ta’ Stat Membru li tapplika regola differenti għal sitwazzjonijiet komparabbbli jew l-istess regola għal sitwazzjonijiet differenti. |
85. |
Meta nqabblu t-trattament, fis-sistema fiskali kkontestata, tad-dividendi li joriġinaw mill-Ġermanja u mill-Portugall ma’ dik ta’ dividendi ta’ oriġini Olandiżi, u meta wieħed jinsab fil-livell tal-impriża ta’ investiment kollettiv, wieħed jikkonstata li dawn id-dividendi, independentament mill-oriġini tagħhom, mhumiex intaxxati mid-dritt Olandiz. |
86. |
Fil-fatt, kif jindika l-Gvern Olandiż, il-ħlas lura tat-taxxa Olandiża fuq id-dividendi, miġbura permezz ta’ taxxa mħallsa f’ras il-għajn mill-kumpanniji li jqassmu d-dividendi li huma stabbiliti fl-Olanda, hija fil-fatt ekwivalenti għall-eżenzjoni tal-impriża ta’ investiment kollettiv minn din it-taxxa. Il-taxxa miġbura f’ras il-għajn minn dawn il-kumpanniji mhijiex, fil-fatt, ħlief meżż ta’ rkupru tat-taxxa imposta fuq id-dividendi li hija dovuta minn min jirċevihom ( 28 ). Sa fejn impriża ta’ investiment kollettiv hija intaxxata b’0 % fuq il-profitti tagħha, huwa loġiku li din it-taxxa mħallsa f’ras il-għajn hija mħallsa lura lilha ( 29 ). |
87. |
Bl-istess mod, id-dividendi mqassma lil tali impriża minn kumpanniji stabbiliti fil-Ġermanja u fil-Portugall mhumiex intaxxati mid-dritt Olandiż fil-livell ta’ din l-impriża. Għalhekk, f’dan l-istadju, d-dritt Olandiż ma japplikax għad-dividendi li joriġinaw mill-Ġermanja u mill-Portugall trattament differenti minn dak riżervat għad-dividendi Olandiżi. |
88. |
Wara dan, meta neżamina s-sistema fiskali kkontestata fil-livell tal-azzjonisti ta’ impriża ta’ investiment kollettiv, nikkonstata li dawn huma intaxxati mid-dritt Olandiż fuq it-totalità tal-profitti mqassma minn din l-impriża, mingħajr ma ssir distinzjoni abbażi tal-oriġini tad-dividendi miġbura minn din. F’dan l-istadju, l-imsemmija sistema lanqas ma tipprevedi regoli differenti għad-dividendi li joriġinaw mill-Ġermanja u mill-Portugall u dawk ta’ oriġini Olandiża. |
89. |
Fid-dawl ta’ din l-analiżi, il-fatt li d-dividendi li joriġinaw mill-Ġermanja u mill-Portugall huma suġġetti għal piż fiskali iktar oneruż mid-dividendi ta’ oriġini Olandiża ma jirriżultax minn differenza ta’ trattament imputabbli lis-sistema fiskali tal-Olanda, iżda jirriżulta mid-deċiżjoni tal-Gvernijiet Ġermaniżi u Portugiżi li jintaxxaw OESF fuq id-dividendi mqassma lil din l-impriża minn kumpanniji stabbiliti fit-territorji rispettivi tagħhom. |
90. |
Għalhekk, fl-opinjoni tiegħi, is-sitwazzjoni fil-kawża preżenti hija differenti minn dik inkwistjoni fil-kawża li tat lok għas-sentenza Manninen, iċċitata iktar ’il fuq, li għaliha għamlet referenza l-qorti tar-rinviju kif ukoll OESF u l-Kummissjoni. Fil-fatt, f’din il-kawża, il-leġiżlazzjoni Finlandiża akkordat lill-persuni intaxxati prinċipalment fil-Finlandja kreditu fiskali għad-dividendi imqassma lill-kumpanniji stabbiliti f’dak l-Istat Membru. Dan il-kreditu fiskali kellu bħala għan il-prevenzjoni tat-tassazzjoni ekonomika doppja ta’ dawn id-dividendi. Kien jikkonsisti fit-tpaċija tat-taxxa dovuta mill-kumpannija li tqassam id-dividendi bħala taxxa fuq il-kumpanniji, ma’ dik dovuta mill-azzjonist bħala taxxa fuq id-dħul. |
91. |
L-imsemmi kreditu fiskali huwa differenti f’żewġ aspetti mis-sistema ta’ ħlas lura inkwistjoni fil-kawża preżenti. |
92. |
Minn naħa, kif rajna, dan il-ħlas lura m’għandux bħala l-għan tiegħu li jieħu inkunsiderazzjoni t-taxxa fuq il-kumpanniji dovuta mill-kumpanniji stabbiliti fl-Olanda, imma li teżenta lill-impriża ta’ investiment kollettiv mit-taxxa fuq id-dividendi. Min-naħa l-oħra, il-leġiżlazzjoni inkwistjoni fil-kawża Manninen, iċċitata iktar ’il fuq, kienet tipprevedi trattament differenti għal sitwazzjonijiet komparabbli, peress li l-kreditu fiskali kien riżevat għad-dividendi mqassma mill-kumpanniji nazzjonali waqt li azzjonist Finlandiż kien ukoll intaxxat fil-Finlandja fuq id-dividendi li joriġinaw minn Stati Membri oħra u li ebda provvediment ma kien meħud mid-dritt Finlandiż biex jieħu inkunsiderazzjoni t-taxxa fuq il-kumpanniji li kienet ġiet imħallsa mill-kumpanniji li qassmu d-dividendi. |
93. |
Barra minn hekk, l-eżenzjoni li irriżultat mis-sistema kkontestata hija differenti minn dik prevista mid-dritt Olandiż inkwistjoni fil-kawża li tat lok għas-sentenza Verkooijen, iċċitata iktar ’il fuq, li għaliha OESF u l-Kummissjoni għamlu referenza. Din il-liġi kienet tipprevedi, fil-fatt, eżenzjoni tat-taxxa fuq id-dħul li kienu suġġetti għaliha d-dividendi mqassma lill-azzjonisti li kienu persuni fisiċi, bil-kundizzjoni li d-dividendi jiġu mqassma minn kumpanniji li għandhom is-sede tagħhom fl-Olanda. |
94. |
Sa fejn dawn l-azzjonisti kienu intaxxati fl-Olanda fuq it-totalità tad-dividendi li huma jirċievu, inklużi dawk li joriġinaw minn Stati Membri oħra, il-limitazzjoni tal-eżenzjoni għad-dividendi nazzjonali kienet tikkonstitwixxi differenza fit-trattament tad-dividendi nazzjonali u tad-dividendi li joriġinaw minn Stati Membri oħra. |
95. |
Iżda, kif diġà ġie msemmi, is-sistema fiskali Olandiża tal-impriżi ta’ investiment kollettiv ma tittrattax b’mod differenti d-dividendi li joriġinaw mill-Olanda u dawk li joriġinaw mill-Ġermanja u mill-Portugall. |
96. |
Għaldaqstant, id-domanda li tqum fil-kawża preżenti hija jekk ir-Renju tal-Olanda, f’tali sitwazzjoni, kienx obbligat mid-dritt Komunitarju li jipprevedi tpaċija tat-taxxa miġbura f’ras il-għajn fil-Ġermanja u fil-Portugall minħabba l-fatt li d-dividendi li kienu joriġinaw fl-Olanda ma kinux suġġetti għal tassazzjoni doppja. |
97. |
Jiena ma naħsibx li dan huwa l-każ peress li d-dritt Komunitarju, f’tali sitwazzjoni, ma jobbliga la lill-Ġermanja u lill-Portugall u lanqas lill-Olanda sabiex jirrinunzjaw għas-setgħa ta’ tassazzjoni tagħhom. Bħall-Gvern Olandiż, jiena tal-fehma li s-sitwazzjoni fil-kawża preżenti tista’ tiġi assimilata ma’ dik li tat lok għas-sentenza Kerckhaert u Morres, iċċitata iktar ’il fuq. |
98. |
Bħal f’dik il-kawża, ninsabu quddiem sitwazzjoni li fiha d-dividendi li joriġinaw minn Stati Membri oħra huma suġġetti għal trattament identiku mill-leġiżlazzjoni nazzjonali kkontestata u huma milquta minn tassazzjoni doppja minħabba l-eżerċizzju, minn dawn l-Istati, tas-setgħa tagħhom li jintaxxaw f’ras il-għajn. F’dik is-sentenza, il-Qorti tal-Ġustizzja ddeċidiet li d-dispożizzjonijiet tat-trattat relattivi għall-moviment liberu tal-kapital ma jipprekludix li leġiżlazzjoni ta’ Stat Membru li, fil-kuntest tat-taxxa fuq id-dħul, tissuġġetta għall-istess rata uniformi ta’ taxxa d-dividendi ta’ azzjonijiet ta’ kumpanniji stabbiliti f’dan l-Istat u d-dividendi ta’ azzjonijiet ta’ kumpanniji stabbiliti fi Stat Membru ieħor, mingħajr ma tipprevedi l-possibbiltà ta’ tpaċija għat-taxxa miġbura f’ras il-għajn f’dan l-Istat Membru l-ieħor. |
99. |
Jidhirli li tali soluzzjoni tista’ tiġi applikata għal-kawża preżenti. Il-fatt li r-Renju tal-Olanda għandu fl-istess waqt il-kwalità ta’ Stat ta’ residenza tal-persuna taxxabbli, meta neżamina s-sistema kkontestata fil-livell ta’ tassazzjoni ta’ impriżi ta’ investiment kollettiv, kif ukoll il-kwalità tal-Istat minn fejn joriġinaw id-dividendi, meta neżamina din is-sistema fl-istadju ta’ tassazzjoni tal-azzjonisti ta’ dawn l-impriżi, ma jbiddilx din l-analiżi. |
100. |
Għall-kuntrarju, jiena mhinix tal-istess fehma bħall-Gvern Olandiż meta, fis-sistema fiskali kkontestata, inqabbel t-trattament tad-dividendi li joriġinaw mill-Ġermanja u mill-Portugall ma’ dak tad-dividendi li joriġinaw minn Stati Membri oħra. |
101. |
Hekk kif indikajt preċedentament, il-libertajiet ta’ moviment jipprekludu kwalunkwe leġiżlazzjoni ta’ Stat Membru li tipprevedi, mingħajr ġustifikazzjoni, regola differenti għal sitwazzjonijiet identiċi jew l-istess regola għal-sitwazzjonijiet differenti. Hekk kif joħroġ mis-sentenza tat-12 ta’ Settembru 2006 Cadbury Schweppes u Cadbury Schweppes Overseas ( 30 ), din il-projbizzjoni ta’ miżuri diskriminatorji ma tirrigwardax biss id-differenzi fit-trattament bejn presuna taxxabbli residenti li jinvesti fl-Istat ta’ residenza u persuna taxxabbli residenti li jinvesti fi Stat ieħor tal-Unjoni. Hija tapplika ukoll għall-miżuri nazzjonali li jipprevedu sistema li tagħmel distinzjoni bejn l-Istati Membri u li tittratta l-investimenti fi Stat tal-Unjoni b’mod anqas favorevoli minn dawk magħmula fi Stat Membru ieħor. |
102. |
Huwa paċifiku li fil-kawża D, iċċitata iktar ’il fuq, ġie deċiż li d-dritt Komunitarju ma kienx jimponi lill-Olanda testendi lis-Sur D, cittadin Ġermaniż residenti fil-Ġermanja, il-benefiċċju tal-ftehim bilaterali konkluż bejn ir-Renju tal-Olanda u r-Renju tal-Bejġju. Għaldaqstant, is-Sur D ma setax jippretendi l-benefiċċju ta’ tnaqqis fit-taxxa fuq il-propjetà dovuta fl-Olanda, li persuna taxxabbli residenti fil-Bejġju li kienet tinsab fl-istess sitwazzjoni setgħet kellha b’applikazzjoni ta’ dan il-ftehim bilaterali. |
103. |
F’dik il-kawża, il-Qorti tal-Ġustizzja ddeċidiet li d-differenza fit-trattament bejn D. u persuna taxxabbli residenti fil-Belġju ma kinitx kuntrarja għad-drittt Komunitarju, peress illi ma kinux jinsabu fl-istess sitwazzjoni. Il-Qorti tal-Ġustizzja bbażat din l-evalwazzjoni fuq żewġ sejbiet: min-naħa, din il-persuna taxxabbli, fil-kwalità ta’ persuna naturali residenti fil-Belġju, kienet ikkuntemplata mill-imsemmi ftehim, u minn naħa l-oħra, il-fatt li d-drittijiet u l-obbligazzjonijiet reċiproċi previsti minn din tal-aħħar japplikaw esklużivament għall-persuni residenti f’wieħed miż-żewġ Stati Membri kontraenti kienet konsegwenza inerenti għall-ftehim bilaterali kontra t-tassazzjoni doppja. Minn dan hija kkonkludiet li d-dispożizzjoni tal-ftehim Belġjo Olandiż li kienet takkorda l-benefiċċju tat-tnaqqis lir-residenti fil-Belġju ma kinitx tikkonstitwixxi vantaġġ li jista’ jiġi separat mill-kumplament ta’ din tal-aħħar, imma kienet tagħmel parti intergrali minnha u kienet tikkontribwixxi għall-ekwilibru ġenerali tagħha ( 31 ). |
104. |
Jirriżulta li hija l-ħtieġa li jiġi ppreżervat l-ekwilibru u r-reċiproċità tal-impenji assunti b’mod bilaterali li tiġġustifika li tiġi limitata l-portata ta’ applikazzjoni ta’ dawn il-ftehim lill-persuni naturali u ġuridiċi kkuntemplati minn dawn tal-aħħar. Għaldaqstant hija din l-eżigenza li twassal għall-konklużjoni li mhijiex diskriminatorja d-differenza ta’ trattament hekk maħluqa bejn ir-residenti ta’ Stati Membri differenti li, irrispettivament mill-applikazzjoni tad-dispożizzjonijiet ta’ dawn il ftehim, jinsabu fl-istess sitwazzjoni. |
105. |
Sa fejn il-ġurisprudenza elaborata mis-sentenza D, iċċitata iktar ’il fuq, tidher eċċezzjoni għall-prinċipju ta’ non diskriminazzjoni, hija għandha, fl-opinjoni tiegħi, tiġi suġġetta għal interpretazzjoni stretta. Din hija r-raġuni għaliex ma naħsibx li din il-ġurisprudenza hija applikabbli għall-kawża preżenti. |
106. |
Fil-fatt, meta tiġi eżaminata s-sitwazzjoni ta’ impriża ta’ investiment kollettiv li tinvesti fil-Ġermanja jew fil-Portugall u dik ta’ impriża ta’ investiment kollettiv li tinvesti fi Stat Membru ieħor bħal fl-Italja, għandu jiġi kkonstatat li la l-ewwel impriża u lanqas t-tieni ma huma koperti minn ftehim bilaterali kontra t-tassazzjoni doppja. |
107. |
Għaldaqstant, il-fatt li impriża ta’ investiment kollettiv li tinvesti fl-Italja tibbenefika minn tpaċija tat-taxxa mħallsa f’ras il-għajn fuq id-dividendi li joriġinaw minn dan l-Istat ma jirriżultax mill-applikazzjoni awtomatika tal-ftehim bilaterali konkluż bejn ir-Renju tal-Olanda u r-Repubblika tal-Italja, imma minn deċiżjoni unilaterali tal-Gvern Olandiż li jestendi l-benefiċċju ta’ dan il-ftehim lill-impriżi ta’ investiment kollettiv. Għaldaqstant, ma jistax jiġi kkonstatat li d-dritt ta’ tali impriżi għat-tpaċija tat-taxxa mħallsa f’ras il-għajn fi Stat Membru li kkonkluda ftehim bilaterali mar-Renju tal-Olanda jikkostitwixxi parti integrali minn dan il-ftehim u jikkontribwixxi għall-ekwilibriju tagħha. Għaldaqstant, l-estenzjoni tad-dritt tat-tpaċija għad-dividendi li joriġinaw mill-Ġermanja u mill-Portugall ma jipperikolax l-ekwilibriju u r-reċiproċità tal-impenji li jinsabu fil-ftehim bilaterali konklużi mir-Renju tal-Olanda. |
108. |
F’dawn iċ-ċirkustanzi, jiena tal-fehma li l-Qorti tal-Ġustizzja għandha tassigura l-osservanza tal-prinċipju ta’ non diskriminazzjoni, li jikkonstitwixxi l-bażi stess tas-suq intern u li jorbot lill-Istati Membri meta huma jeżerċitaw il-kompetenzi tagħhom fil-qasam fiskali. Jiena tal-fehma li mill-mument li l-leġiżlatur Olandiż iddeċieda li jagħti lil impriżi ta’ investiment kollettiv tpaċija għat-taxxa mħallsa f’ras il-għajn fil-każ ta’ dividendi li joriġinaw minn ċerti Stati Membri, filwaqt li, kif indika huwa stess, ma kienx marbut li jagħmel dan minn ftehim bilaterali konklużi ma’ dawn l-Istati, ma setax jeskludi minn dan il-vantaġġ id-dividendi li joriġinaw minn Stati Membri oħra bħal-Portugall u l-Ġermanja. |
109. |
Għaldaqstant, jiena nipproponi li r-risposta tal-Qorti tal-Ġustizzja għall-ewwel domanda, paragrafu (a), tkun li l-Artikoli 56 KE u 58 KE għandhom jiġu interpretati fis-sens li jipprekludu leġiżlazzjoni ta’ Stat Membru, bħal-leġiżlazzjoni Olandiża inkwistjoni li, filwaqt li tipprevedi favur impriżi ta’ investiment kollettiv tpaċija intiża sabiex tieħu inkunsiderazzjoni t-taxxa miġbura f’ras il-għajn minn Stat Membru ieħor fuq id-dividendi mqassma lill-imsemmija impriżi, tillimita din it-tpaċija għall-ammont li persuna naturali li tirrisjedi fit-territotju Olandiż setgħet tpaċi bis-saħħa ta’ ftehim dwar il-ħelsien minn taxxa doppja konkluż mal-Istat Membru l-ieħor. |
b) Fuq l-ewwel domanda, pargrafu (b)
110. |
Permezz tal-ewwel domanda, paragrafu (b), il-qorti tar-rinviju tistaqsi, essenzjalment, jekk l-Artikoli 56 KE u 58 KE għandhomx jiġu interepretati fis-sens li jipprekludu leġiżlazzjoni ta’ Stat Membru li, waqt li jipprevedu favur impriżi ta’ investiment kollettiv tpaċija intiża sabiex tieħu inkunsiderazzjoni t-taxxa miġbura f’ras il-għajn minn Stat Membru fuq id-dividendi mqassma lill-imsemmija impriżi, tillimita din it-tpaċija jekk u sa fejn l-azzjonisti tal-impriża kkonċernata huma persuni naturali li ma jirrisjedux fl-Olanda jew impriżi li mhumiex suġġetti għat-taxxa Olandiża fuq il-kumpanniji. |
111. |
Permezz ta’ din id-domanda, l-imsemmija qorti tixtieq tkun taf jekk it-tnaqqis tat-tpaċija mogħti lil OESF proporzjonalment skont is-sehem fil-kapital tagħha ta’ azzjonisti li jirrisjedu jew li huma stabbilti fi Stati Membri oħra minbarra l-Olanda (il-Belġju, il-Ġermanja, Franza, il-Lussemburgu Renju Unit) u fi Stati terzi (l-Istati Uniti u l-Isvizzera) huwiex konformi mal-libertà ta’ moviment tal-kapital. |
112. |
Il-qorti tar-rinviju tirrileva li hija tistaqsi din id-domanda lill-Qorti tal-Ġustizzja fid-dawl tal-fatt li impriża ta’ investiment kollettiv li tinvesti fl-Olanda tibbenefika minn ħlas lura tat-taxxa miġbura f’ras il-għajn fuq id-dividendi ta’ origini nazzjonali, independentament mill-post ta’ residenza jew ta’ stabbiliment tal-azzjonisti tagħha. |
113. |
Kuntrarjament għall-Kummissjoni, jiena ma naħsibx li minn dan l-aspett s-sistema kkontestata tmur kontra d-dritt Komunitarju. Hekk kif rajt fil-kuntest tal-eżami ta’ kompatibbiltà tal-ewwel limitazzjoni mad-dritt komunitarju, l-eżenzjoni ta’ impriża ta’ investiment kollettiv mit-taxxa Olandiża fuq id-dividendi ma kinitx tobbliga lir-Renju tal-Olanda jipprevedi sistema ta’ tpaċija tat-taxxa mħallsa f’ras il-għajn fuq id-dividendi barranin. |
114. |
Bħala riżultat, il-fatt li impriża ta’ investiment kollettiv tkun suġġetta għal tnaqqis fit-tpaċija, intiż sabiex jieħu inkunsiderazzjoni t-taxxa mħallsa f’ras il-għajn fuq id-dividendi li joriġinaw minn pajjiżi oħra skont is-sehem ta’ azzjonisti barranin fil-kapital tagħha, ma jmurx kontra d-dritt Komunitarju fid-dawl tal-fatt li din l-impriża hija eżenti mit-taxxa Olandiża fuq id-dividendi independentament mill-post ta’ residenza jew ta’ stabbiliment tal-azzjonisti tagħha. |
115. |
Għall-kuntrarju, jiena tal-fehma li l-limitazzjoni kkontestata tmur kontra l-Artikoli 56 KE u 58 KE meta neżamina l-effetti tagħha fuq il-movimenti ta’ kapital bejn impriża ta’ investiment kollettiv u l-azzjonisti tagħha. |
116. |
L-ewwel nett, fil-fatt, il-limitazzjoni inkwistjoni tirrestrinġi l-movimenti ta’ kapital. B’hekk, impriża ta’ investiment kollettiv li l-azzjonisti kollha tagħha jirrisjedu jew huma stabbiliti fl-Olanda u li tinvesti barra mill-pajjiż, tibbenefika minn tpaċija tat-taxxa mħallsa f’ras il-għajn sa’ l-ammont tat-taxxa Olandiża li hija imposta fuq id-dividendi barranin. Min-naħa l-oħra, impriża ta’ investiment kollettiv li parti mill-azzjonisti tagħha huma barranin tara’ t-tpaċija tagħha mnaqqsa skont is-sehem ta’ dawn l-azzjonisti fil-kapital tagħha. |
117. |
F’dan ir-rigward għandu jiġi mfakkar li skont is-sistema fiskali inkwistjoni, l-ammont ta’ benefiċċji ddistribwiti lill-azzjonisti hija kkalkolata bit-teħid inkunsiderazzjoni tal-ħlas lura tat-taxxa miġbura f’ras il-għajn fuq id-dividendi mqassma mill-kumpanniji stabbiliti fl-Olanda, kif ukoll tat-tpaċija mogħtija minħabba t-taxxa miġbura f’ras il-għajn barra mill-pajjiż fuq id-dividendi li joriġinaw minn Stati oħra. Wara dan, l-ammont ta’ profitti għad-distribuzzjoni li jiġi b’hekk stabbilit huwa mqassam bejn l-azzjonisti tal-impriża ta’ investiment kollettiv skont il-sehem tagħhom fil-kapital ta’ din tal-aħħar, u l-azzjonisti tagħha huma intaxxati fuq dawn id-dividendi fl-Olanda, permezz ta’ taxxa mħallsa f’ras il-għajn mill-impriża. |
118. |
Minn dan jirriżulta li l-limitazzjoni tat-tpaċija tat-taxxa barranija skont is-sehem ta’ azzjonisti barranin fil-kapital tal-impriża kkonċernata tippenalizza mingħajr distinzjoni l-azzjonisti kollha tagħha, inkwantu hija għandha l-effett li tnaqqas l-ammont totali tal-profitti għat-tqassim. |
119. |
Għaldqstant, limitazzjoni bħal din hija ta’ xkiel għall-ġabra, minn impriża ta’ investiment kollettiv, ta’ kapital fi Stati Membri oħra u f’pajjiżi terżi u hija tiddisswadi lill-investitutri barranin li jixtru ishma fiha. |
120. |
Sussegwentement, kuntrarjament għal dak li jsostni l-Gvern Olandiż, dawn ir-restrizzjonijiet ma jistgħux jiġu ġġustifikati mill-fatt li l-azzjonisti residenti jew stabbiliti barra mill-pajjiż mhumiex fl-istess sitwazzjoni bħal dik ta’ azzjonisti residenti jew stabbbiliti fl-Olanda. Fil-fatt, kif tenfasiżża l-qorti tar-rinviju, l-azzjonisti kollha ta’ impriża ta’ investiment kollettiv huma intaxxati fl-Olanda fuq id-dividendi ddistribwiti minn din l-impriża, independentement mill-post ta’ residenza jew ta’ stabbiliment tagħhom. Jirriżulta li impriża ta’ investiment kollettiv li tinvesti barra mill-pajjiż u li tinkludi azzjonisti barranin tinsab, f’dan ir-rigward, fl-istess sitwazzjoni ta’ impriża ta’ investiment kollettiv li tinvesti barra mill-pajjiż u li l-azzjonisti tagħha huma kollha residenti jew stabbiliti fl-Olanda. |
121. |
Bħala konsegwenza, u konformament mal-ġurisprudenza elaborata fis-sentenza iċċitata iktar ’il fuq Test Claimants in Class IV of the ACT Group Litigation kif ukoll Denkavit Internationaal u Denkavit France, mill-mument li r-Renju tal-Olanda ddeċieda li jagħti lill-impriżi ta’ investiment kollettiv tpaċija f’forma ta’ taxxa mħallsa barra mill-pajjiż u li jintaxxa lill-azzjonisti ta’ dawn l-impriżi ta’ investiment kollettiv independentement mir-residenza jew post ta’ stabbiliment tagħhom, kellu jestendi l-benefiċċju ta’ din it-tpaċija lill-impriżi ta’ investiment kollettiv li għandha azzjonisti mhux residenti ( 32 ). |
122. |
Għaldaqstant, nipproponi lill-Qorti tal-Ġustizzja li r-risposta għall-ewwel domanda, paragrafu b), tkun li l-Artikoli 56 KE u 58 KE għandhom jiġu interpretati fis-sens li jipprekludu leġiżlazzjoni ta’ Stat Membru bħall-leġiżlazzjoni Olandiża inkwistjoni milli, filwaqt li tipprevedi favur impriżi ta’ investiment kollettiv tpaċija intiża li tieħu inkunsiderazzjoni t-taxxa miġubra f’ras il-għajn fi Stat Membru ieħor fuq id-dividendi mqassma lill-imsemmija impriżi, tillimita din it-tpaċija jekk u sa fejn il-shareholding tal-impriża kkonċernata huwa magħmul minn persuni fisiċi li ma jirrisjedux fl-Olanda jew minn impriżi mhux suġġetti għat-taxxa Olandiża fuq il-kumpanniji. |
3. Fuq it-tieni sensiela ta’ domandi preliminari
123. |
Il-qorti tar-rinviju tiddikjara li hija trid issib risposta għal żewġ mistoqsijiet. |
124. |
L-ewwel nett, hija tixtieq tkun taf jekk hemmx lok li ssir distinzjoni bejn id-dividendi li joriġinaw minn Stat Membru tal-Komunità jew taż-Żona Ekonomika Ewropea (ŻEE) u d-dividendi ġejjin minn pajjiżi terzi. Hija ssostni li trid issib risposta għal din il-mistoqsija peress li OESF, matul l-eżerċizzju ta’ kontabbiltà rilevanti, irċeviet dividendi minn kumpannija stabbilita fl-Iżvizzera. |
125. |
It-tieni nett, il-qorti tar-rinviju tistaqsi lilha nnifisha dwar jekk il-projbizzjoni prevista mill-Artikolu 56 għandhiex l-istess portata fir-rigward tal-movimenti ta’ kapital li joriġina minn u li sejjer lejn pajjiżi terżi u dawk fi ħdan l-Unjoni Ewropea u ż-ŻEE. F’dan ir-rigward, hija tixtieq li jiġi ppreċiżat jekk dan l-artikolu jimponix fuq Stat Membru l-obbligu li jirrinunzja għall-vantaġġ fil-kuntest tal-moviment liberu ta’ kapital ma’ pajjiż terz, filwaqt li dan tal-aħħar, ipotetikament, mhuwiex marbut mit-Trattat u għaldaqstant mhux marbut li jagħmel sagrifiċċju simili. Għalhekk, minħabba dan in-nuqqas ta’ reċiproċità, għandu jiġi deċiż jekk restrizzjonijiet jistgħux jiġu ġġustifikati minħabba raġunijiet li ma jistgħux jiġu użati fik-kuntest Komunitarju. |
126. |
Huwa fid-dawl ta’ dawn il-kunsiderazzjonijiet li l-qorti tar-rinviju tistaqsi, permezz tat-tieni domanda tagħha, paragrafu b), jekk l-Artikolu 56 KE għandux l-istess portata fir-rigward tal-moviment liberu ta’ kapital li joriġina minn jew li sejjer lejn pajjiżi terzi, bħal dik fil-kuntest intrakomunitarju, u, permezz tat-tieni domanda tagħha, paragrafu ċ), jekk, fil-każ ta’ risposta negattiva lid-domanda preċedenti, l-Artikolu 56 KE jipprekludix l-ewwel limitazzjoni, sa fejn din hija intiża li tieħu inkunsiderazzjoni t-taxxa imposta f’ras il-għajn f’pajjiż terż, meta din il-limitazzjoni hija motivata minħabba l-fatt li l-shareholding tal-impriża kkonċernata huwa kompost ukoll minn azzjonisti barranin. |
127. |
Permezz tat-tieni domanda tagħha, paragrafu a), il-qorti tar-rinviju tistaqsi jekk il-kunċett ta’ “investiment dirett” użat fl-Artikolu 57(1) KE, li jippermetti lill-Istati Membri li jżommu fis-seħħ dawk ir-restrizzjonijiet għall-movimenti ta’ kapital li joriġina minn jew li sejjer lejn pajjiżi terzi li jeżistu fil-31 ta’ Diċembru 1993 meta jinvolvu investimenti bħal dawn, jinkludix ukoll il-pussess ta’ pakkett ta’ azzjonijiet f’kumpannija li ma jippermettix li tiġi eżerċitata influwenza deċiżiva fuq l-amministrazzjoni jew il-kontroll ta’ din il-kumpannija. |
128. |
Fl-aħħar nett, permezz tat-tieni domanda tagħha, paragrafu a) u b), hija tistaqsi lill-Qorti tal-Ġustizzja dwar jekk il-fatt li l-azzjonisti barranin tal-impriża ta’ investiment kollettiv kkonċernata jirrisjedu jew huma stabbiliti fi Stat Membru ieħor, jew f’pajjiż li miegħu l-Istat Membru ta’ fejn l-impriża hija stabbilita kkonkluda ftehim li jipprevedi, abbażi ta’ obligazzjonijiet reċiproċi, it-tpaċija tat-taxxa f’ras il-għajn fuq id-dividendi, għandux effett fuq ir-risposti mogħtija lid-domandi preċedenti. |
129. |
Fl-ewwel lok, ser neżamina t-tieni domanda, paragrafu b), inkwantu hija tikkonċerna l-investimenti ta’ OESF fi Stat terz, kif ukoll it-tieni domanda, paragrafu ċ) u a), li tagħmel referenza biss għall-dawn l-investimenti. Immedjatament wara, ser nanalizza t-tieni domanda, paragrafu b), inkwantu hija tieħu inkunsiderazzjoni l-fatt li numru mill-azzjonisti ta’ OESF huma residenti jew huma stabbiliti fi Stat terz, kif ukoll it-tielet domanda, paragrafu b) u ċ), li tirrigwarda din is-sitwazzjoni. |
130. |
Il-qorti tar-rinviju tistaqsi lill-Qorti tal-Ġustizzja t-tieni domanda, paragrafu a) sa ċ), minħabba l-fatt li OESF irċeviet dividendi minn kumpannija stabbilita fl-Iżvizzera. Jiena tal-opinjoni li din id-domanda mhijiex ammissibli peress li mhijiex neċessarja sabiex tiġi riżolta l-kawża prinċipali. Fil-fatt, jirriżulta mill-fatti mogħtija mill-qorti tar-rinviju li t-taxxi f’ras il-għajn imposti fl-Iżvizzera fuq id-dividendi mqassma lil OESF u li ġejjin minn dan l-Istat ġew meħuda inkunsiderazzjoni fil-kalkolazzjoni tat-tpaċija. Jirriżulta ukoll minn dawn il-fatti li l-uniċi taxxi f’ras il-għajn li ma ġewx meħuda inkunsiderazzjoni ġew imposti fi Stati Membri, jiġifieri fil-Ġermanja u fil-Portugall. |
131. |
Għaldaqstant, fid-dawl tal-ġurisprudenza ( 33 ), jiena tal-opinjoni li mhemmx lok li tingħata risposta ghat-tieni domanda, paragrafu b), inkwantu hija tikkonċerna l-investiment tal-OEFS fl-Iżvizzera, u lanqas għat-tieni domanda, paragrafu ċ) li tirrigwarda speċifikament dawn l-investimenti. |
132. |
Ser neżamina issa t-tieni domanda, paragrafu b), inkwantu hija tirreferi għas-sehem ta’ azzjonisti residenti jew stabbiliti fi Stati terzi fil-kapital ta’ OESF, kif ukoll it-tielet domanda, paragrafu b) u ċ). |
133. |
Fir-rigward tar-raġunijiet li għalihom il-qorti tar-rinviju tagħmel dawn id-domandi, nipproponi lill-Qorti tal-Ġustizzja li teżaminahom flimkien u li tifhimhom fis-sens li din il-qorti qiegħda tistaqsi jekk il-limitazzjonijiet inkwistjoni jistgħux jiġu ġġustifikati mill-fatt li numru mill-azzjonisti tal-impriża ta’ investiment kollettiv kkonċernata mhumiex residenti jew stabbiliti fi Stat Membru jew fi Stat terz li miegħu l-Istat Membru ta’ stabbiliment ta’ din l-impriża kkonkluda ftehim li jipprevedi, abbażi ta’ obligazzjonijiet reċiproċi, it-tpaċija tat-taxxa imposta f’ras il-għajn fuq id-dividendi. |
134. |
Huwa paċifiku li, kif ġie mfakkar preċedentament, il-Qorti tal-Ġustizzja ammettiet li ma jistax jiġi eskluż li restrizzjoni għall-movimenti ta’ kapital li joriġina minn jew li sejjer lejn Stati terzi hija ġġustifikata minħabba raġuni mogħtija f’ċirkustanzi fejn din ir-raġuni mhijiex ta’ natura li tikkonstitwixxi ġustifikazzjoni valida għal-restrizzjoni tal-moviment ta’ kapital bejn l-Istati Membri. |
135. |
Il-Qorti tal-Ġustizzja tat indikazzjonijet fir-rigward tar-raġunijiet li jistgħu jiġu ammessi. Dawn ir-raġunijiet jirriżultaw mill-fatt li Stat terz mhuwiex marbut mid-dritt Komunitarju, b’mod partikolari mill-totalità ta’ obligazzjonijiet ta’ koperazzjoni fil-materja ta’ skambju ta’ informazzjoni u ta’ assistenza fil-ġbir ta’ djun. Il-Gvern Olandiż isostni li dawn ir-raġunijiet jistgħu ukoll jiġu dedotti min-nuqqas ta’ reċiproċità fir-rispett tal-obbligi tal-Artikolu 56 KE. |
136. |
Fi kwalunkwe każ, fiċ-ċirkustanzi tal-kawża preżenti, ma naħsibx li l-limitazzjonijiet kkontestati jistgħu jiġu ġġustifikati minn raġuni speċifikament inerenti fil-moviment ta’ kapital ma’ pajjiżi terzi. Fil-fatt, kif diġà għidt qabel, il-limitazzjonijiet ikkontestati għandhom bħala effett li jillimitaw l-ammont totali ta’ profitt imqassam bejn l-azzjonisti kollha, independentament mill-post ta’ residenza jew ta’ stabbiliment tagħhom u b’hekk jippenalizzaw lil dawn tal-aħħar mingħajr distinzjoni. Barra minn hekk, jirriżulta mill-indikazzjonijiet mogħtija mill-qorti tar-rinviju li, matul l-eżerċizzju ta’ kontabbiltà rilevanti, parti mill-azzjonisti barranin ta’ OESF kienu residenti jew stabbiliti fi Stati Membri oħra. |
137. |
Konsegwentament, anki jekk wieħed jassumi li l-limitazzjonijiet kkontestati setgħu jiġu ġġustifikati minħabba raġuni speċifikament inerenti għall-movimenti ta’ kapital li joriġina minn jew li sejjer lejn pajjiżi terzi li kieku l-azzjonisti kollha tal-impriża ta’ investiment kollettiv kkonċernata kienu residenti jew stabbiliti fi Stat terz, tali ġustifikazzjoni ma’ tistax tiġi meħuda inkunsiderazzjoni fil-kawża preżenti. |
138. |
Għaldaqstant, nipproponi li r-risposta għat-tieni domanda, paragrafu b), u għat-tielet domanda, paragrafu b) u ċ), tkun li l-limitazzjonijiet inkwistjoni ma jistgħux jiġu ġġustifikati minħabba l-fatt li numru mill-azzjonisti tal-impriża ta’ investiment kollettiv kkonċernata mhumiex residenti jew stabbiliti fi Stat Membru ieħor jew f’pajjiż terz li miegħu l-Istat Membru ta’ stabbiliment ta’ din l-impriża kkonkluda ftehim li jipprevedi, abbażi ta’ obligazzjonijiet reċiproċi, t-tpaċija tat-taxxa imposta f’ras il-għajn fuq id-dividendi. |
4. Fuq it-tielet domanda, paragrafu a)
139. |
Permezz tat-tielet domanda, paragrafu a), il-qorti tar-rinviju tistaqsi jekk il-fatt li l-taxxa imposta fi Stat Membru ieħor fuq id-dividendi mqassma minn dan il-pajjiż hija iktar għolja mit-taxxa fuq id-dividendi mqassma lill-azzjonisti barranin fl-Istat Membru ta’ fejn l-impriża ta’ investiment kollettiv hija stabbilita, għandux effett fuq ir-risposti mogħtija lid-domandi preċedenti. |
140. |
L-imsemmija qorti tagħmel din id-domanda lill-Qorti tal-Ġustizzja għaliex ir-rata tat-taxxa imposta f’ras il-għajn fil-Portugall fuq id-dividendi mqassma lil OESF li ġejjin minn dan l-Istat Membru kienet ta’ 17.5 %, filwaqt li dik tat-taxxa imposta f’ras il-għajn fl-Olanda fuq id-dividendi ddistribwiti lill-azzjonisti ta’ OESF hija ta’ 15 %. |
141. |
Jiena tal-opinjoni li dan il-fatt m’għandux effet fuq ir-risposti mogħtija lill-ewwel sensiela ta’ domandi preliminari. |
142. |
Fil-fatt, fir-rigward tal-ewwel limitazzjoni, it-tpaċija mogħtija mir-Renju tal-Olanda tat-taxxa imposta f’ras il-għajn fi Stat Membru ieħor, minbarra l-Ġermanja u l-Portugall, ma tiddependix mir-rata ta’ dawn it-taxxi. It-taxxi imposta f’ras il-għajn fil-Portugall għandhom, għaldaqstant, ikunu suġġetti għal trattament ekwivalenti u għandhom jagħtu lok għal tpaċija, independentement mill-fatt li r-rata tagħhom hija ogħla minn dik tat-taxxa Olandiża imposta f’ras il-għajn fuq id-dividendi distribwiti l-azzjonisti ( 34 ). |
143. |
L-istess raġunament japplika għat-tieni limitazzjoni. It-tpaċija mogħtija minħabba taxxi imposti f’ras il-għajn fi Stat Membru ieħor minn impriża ta’ investiment kollettiv li l-azzjonisti kollha tagħha jirrisjedu jew huma stabbiliti fl-Olanda, lanqas ma tiddependi mir-rata ta’ din it-taxxa f’ras il-għajn. Għaldaqstant, impriża ta’ investiment kollettiv li l-kapital tagħha huwa miżmum parzaljment jew fit-totalità tiegħu minn azzjonisti barranin għandu jibbenefika minn din it-tpaċija independentement mir-rata ta’ taxxa imposta f’ras il-għajn fl-Istat Membru ta’ fejn ġejjin id-dividendi. |
144. |
Għaldaqstant, nipproponi li r-risposta għat tielet domanda, paragrafu a), tkun li l-fatt li t-taxxa imposta fi Stat Membru ieħor fuq id-dividendi ġejjin minn dan il-pajjiż hija iktar għolja mit-taxxa fuq id-dividendi mqassma lill-azzjonisti barranin fl-Istat Membru fejn l-impriża ta’ investiment kollettiv hija stabbilita, m’għandux effett fuq ir-risposti mogħtija lid-domandi preċedenti. |
V — Konklużjoni
145. |
Fid-dawl tal-kunsiderazzjonijiet preċedenti, nipproponi li d-domandi magħmula mill-Hoge Raad der Nederlanden jiġu mwieġba b’dan il-mod:
|
( 1 ) Lingwa oriġinali: il-Franċiż.
( 2 ) Skont il-qorti tar-rinviju, il-kundizzjonijiet l-oħra neċessarji mhumiex relevanti fil-każ ineżami.
( 3 ) Iktar ’il quddiem “OESF”
( 4 ) Sentenza tas-6 ta’ Marzu 2007, Meilicke et (C-292/04, Ġabra p. I-1835, punt 19 u l-ġurisprudenza ċċitata).
( 5 ) F’dak li jirrigwarda l-kumpanniji fis-sens tal-Artikolu 48 KE, is-sede tagħhom isservi sabiex tiddetermina r-rabta tagħhom mal-ordni ġuridiku tal-Istat, bl-istess mod bħaċ-ċittadinanza tal-persuni naturali (sentenza tat-13 ta’ Lulju 1993, Commerzbank, C-330/91, Ġabra p. I-4017, punt 13).
( 6 ) Sentenza tal-14 ta’ Frar 1995, Schumacker (C-279/93, Ġabra p. I-225, punt 31).
( 7 ) Fir-rigward tal-persuni naturali, ara s-senteza Schumacker, iċċitata iktar ’il fuq (punti 28 u 29), u, fir-rigward tal-persuni ġuridiċi, is-sentenza Commerzbank, iċċitata iktar ’il fuq (punt 15).
( 8 ) Sentenza tas-7 ta’ Settembru 2004, Manninen (C-319/02, Ġabra p. I-7477, punt 29).
( 9 ) Direttiva tal-Kunsill tat-23 ta’ Lulju 1990 dwar is-sistema komuni tat-tassazzjoni li tapplika fil-każ tal-kumpanniji prinċipali u sussidjarji ta’ Stati Membri differenti (ĠU L 225, p. 6). Bl-istess mod ara ukoll, id-Direttiva tal-Kunsill 2003/48/KE tat-3 ta’ Ġunju 2003 dwar tassazzjoni ta’ riżervi fuq id-dħul fil-forma ta’ pagamenti ta’ imgħaxx (ĠU L 157, p. 38) u d-Direttiva tal-Kunsill Nru 2003/49/KE tat-3 ta’ Ġunju 2003 dwar sistema komuni ta’ tassazzjoni applikabbli għall-pagamenti ta’ imgħax u ta’ royalties bejn kumpanniji assoċjati ta’ Stati Membri differenti (ĠU L 157, p. 49).
( 10 ) Id-Direttiva 90/435, skont il-verżjoni fis-seħħ waqt l-eżerċizzju ta’ kontabbiltà inkwistjoni, kienet applikabbli għall-kumpanniji li kellhom sehem ta’ mhux anqas minn 25 % fil-kapital ta’ kumpannija ta’ Stat Membru ieħor. Barra minn dan, bis-saħħa tal-Artikolu 2 tagħha, hija tapplika biss għall-kumpanniji li huma suġġetti għat-taxxa tal-kumpanniji, u huwa magħruf li l-impriżi ta’ investiment finanzjarju, jekk huma suġġetti għal din it-taxxa, huma suġġetti għal taxxa b’rata żero.
( 11 ) Ftehim tat-23 ta’ Lulju 1990, dwar ħelsien minn taxxa doppja fil-każ ta’ aġġustament ta’ profitti ta’ impriżi assoċjati (ĠU L 255, p. 10).
( 12 ) F’dan ir-rigward ara s-sentenza tal-14 ta’ Novembru 2006, Kerckhaert u Morres (C-513/04, Ġabra p. I-10967), fir-rigward tal-leġiżlazzjoni Belġjana li, fil-kuntest ta’ taxxa fuq id-dħul tissuġġetta, bl-istess rata ta’ taxxa uniformi, id-dividendi ta’ azzjonijiet ta’ kumpanniji stabbiliti fil-Bejġju u d-dividendi ta’ kumpanniji stabbiliti fi Stat Membru ieħor, mingħajr ma tipprevedi l-possibbiltà ta’ tpaċija tat-taxxa imposta f’ras il-għajn fl-Istat Membru l-ieħor. Il-Qorti kkonstatat li s-sistema fiskali inkwistjoni ma tagħmel ebda distinzjoni bejn id-dividendi ta’ kumpanniji stabbiliti fil-Belġju u dawk tal-kumpanniji stabbiliti fi Stat Membru ieħor. Hija kkunsidrat li l-konsegwenzi żvantaġġużi li l-applikazzjoni ta’ sistema bħal din tista’ tħalli fuq persuna li tirċievi dividendi li kienu suġġetti għal taxxa f’ras il-għajn fi Stat Membru ieħor toħroġ sempliċiment mill-eżerċizzju parallel ta’ żewġ Stati Membri tal-kompetenzi fiskali tagħhom (punt 20).
( 13 ) Sentenza tal-21 ta’ Settembru 1999, Saint-Gobain ZN (C-307/97, Ġabra p. I-6161, punti 57 u 58).
( 14 ) Fir-rigward tal-għoti ta’ eżenzjoni fiskali fuq id-dħul li hija mogħtija fuq id-dividendi mqassma lill-azzjonisti li huma persuni naturali, ara s-sentenza tas-6 ta’ Ġunju 2000, Verkooijen (C-35/98, Ġabra p. I-4071); fir-rigward tal-applikazzjoni ta’ rata definittiva jew imnaqqsa bin-nofs, s-sentenza tal-15 ta’ Lulju 2004, Lenz (C-315/02, Ġabra p. I-7063); fir-rigward tal-għoti ta’ kreditu fiskali, s-sentenzi ċċitati iktar ’il fuq Manninen u Meilicke et, u fir-rigward tal-eżenzjoni mit-taxxa fuq il-kumpanniji għad-dividendi ta’ oriġini nazzjonali, fejn id-dividendi ta’ oriġini barranin kienu suġġetti għal din it-taxxa u li taw dritt biss għal tnaqqis tat-taxxa eventwali imposta f’ras il-għajn fl-Istat Membru fejn tirrisjedi l-Kumpannija li tqassam dawk id-dividendi, sentenza tat-12 ta’ Diċembru 2006, Test Claimants in the FII Group Litigation (C-446/04, Ġabra p. I-11753, punti 61 sa 71).
( 15 ) Sentenza Test Claimants in the FII Group Litigation, iċċitata iktar ’il fuq (punt 62). L-istess ħtieġa ma teżistix awtomatikament fil-konfront ta’ dividendi mqassma minn kumpanniji stabbiliti f’pajjiżi terzi. F’din is-sentenza, il-Qorti tal-Ġustizzja ammettiet li mhuwiex eskluż li Stat Membru jkun jista’ juri li restrizzjoni fil-movimenti tal-kapital lejn jew li joriġina minn pajjiż terz huwa ġġustifikat minħabba raġuni mogħtija fiċ-ċirkustanzi fejn din ir-raġuni ma tkunx ta’ natura li tikkostitwixxi ġustifikazzjoni valida għar-restrizzjoni tal-movimenti tal-kapital bejn Stati Membri. Dan jista’ jkun il-każ, b’mod partikolari, f’sitwazzjoni li timplika l-verifika ta’ taxxa mħallsa minn kumpanniji li jiddistribwixxu d-dividendi u li huma stabbiliti fi Stati terzi meta, peress li l-miżuri leġiżlattivi Komunitarji intiżi għall-koperazzjoni bejn l-awtoritajiet fiskali nazzjonali, bħad-Direttiva tal-Kunsill 77/799/KEE tad-19 ta’ Diċembru 1977 dwar għajnuna reċiproka mill-awtoritajiet kompetenti tal-Istati Membri fil-qasam tat-tassazzjoni diretta (ĠU L 336, p. 15), mhumiex applikabbli, il-verifika tat-taxxa mħallsa minn dawn il-kumpanniji fl-Istat ta’ residenza tagħhom tista’ tirriżulta iktar diffiċli minn kuntest ġenwinament Komunitarju (punti 169 sa 171).
( 16 ) Fir-riġward ta’ leġiżlazzjoni ta’ Stat Membru li tipprovdi sistema ta’ kreditu fiskali fil-konfront tad-dividendi mqassma minn kumpannija residenti lill-azzjonisiti residenti tagħha kif ukoll lill-azzjonisti mhux residenti meta dan huwa previst minn ftehim dwar il-ħelsien minn taxxa doppja, ara sentenza tat-12 ta’ Diċembru 2006, Test Claimants in Class IV of the ACT Group Litigation (C-374/04, Ġabra p. I-11673) u fir-riġward ta’ leġiżlazzjoni nazzjonali li tintaxxa d-dividendi mqassma minn kumpanniji sussidjarji residenti lill-kumpanniji prinċipali stabbiliti fi Stat Membru ieħor u li teżenta, kważi b’mod totali, lid-dividendi mqassma lill-kumpanniji prinċipali residenti, ara s-sentenza tal-14 ta’ Diċembru 2006, Denkavit Internationaal u Denkavit France (C-170/05, Ġabra p. I-11949).
( 17 ) Sentenza Test Claimants in Class IV of the ACT Group Litigation, iċċitata iktar ’il fuq (punt 70).
( 18 ) Sentenza tat-28 ta’ Jannar 1986, Kummissjoni v Franza (270/83, Ġabra p. 273, punt 26).
( 19 ) Ibidem.
( 20 ) Sentenza Denkavit Internationaal u Denkavit France, iċċitata iktar ’il fuq (punt 45 u l-ġurisprudenza ċċitata).
( 21 ) Ibidem (punt 47).
( 22 ) Sentenza Test Claimants in Class IV of the ACT Group Litigation, iċċitata iktar ’il fuq (punt 71).
( 23 ) Sentenza Saint Gobain ZN, iċċitata iktar ’il fuq (punt 59). F’din is-sentenza l-Qorti tal-Ġustizzja ddikjarat li l-attività stabbli ta’ kumpannija li mhijiex residenti għandha, bħal kumpanniji residenti, tibbenefika mill-eżenzjoni fiskali mit-taxxa tal-kumpanniji fir-rigward tad-dividendi mqassma minn kumpanniji stabbiliti f’pajjiż terż, previst minn ftehim fiskali konkluż ma’ dan il-pajjiż terż.
( 24 ) Sentenza tal-5 ta’ Lulju 2005, D. (C-376/03, Ġabra p. I-5821). F’din il-kawża, D., ċittadin Ġermaniż li jirrisjedi fil-Ġermanja, li kellu 10 % tal-ammont tal-proprjetà tiegħu fl-Olanda u li kien suġġetta għal taxxa fuq il-proprjetà f’dan l-Istat Membru minħabba l-beni li kellu, talab biex jibbenefika mit-tnaqqis previst mil-leġiżlazzjoni Olandiża applikabbli għal persuni residenti. Il-Qorti tal-Ġustizzja ddikjarat li din it-taxxa kienet simili għat-taxxa fuq id-dħul, u li kienet stabbilita skont il-kapaċità kontributtiva tal-persuna. Minn dan hija ddeduċiet illi persuna li mhijiex residenti, li kellha biss parti żgħira tal-proprjetà tagħha fl-Olanda, ma kinitx tinsab fl-istess sitwazzjoni ta’ persuna residenti, b’tali mod li ma setgħetx tippretendi l-benefiċċju tat-tnaqqis inkwistjoni. Sussegwentement, qamet id-domanda dwar jekk D. kienx suġġett għal diskriminazzjoni peress illi persuna residenti fil-Belġju, li kienet tinsab f’sitwazzjoni analoga ma tiegħu, setgħet tibbenefika minn tnaqqis bis-saħħa ta’ ftehim li kien ġie konkluż bejn ir-Renju a’tal-Olanda u r-Renju tal-Belġju. Il-Qorti tal-Ġustizzja kkunsidrat li tali differenza ta’ trattament ma kinitx kontra d-dritt Komunitarju. Ara, fl-istess sens, is-sentenza Test Claimants in Class IV of the ACT Group Litigation, iċċitata iktar ’il fuq, fuq id-differenza ta’ sitwazzjoni, li tirriżulta mill-fatt li fost il-ftehim bilaterali konkluzi bejn Stat Membru u Stati oħra, xi uħud minnhom biss jipprevedu kreditu fiskali favur ir-residenti a’tal-Istati kontraenti.
( 25 ) Sentenza Verkooijen, iċċitata iktar ’il fuq (punti 28 sa 30).
( 26 ) Sentenza tal-24 ta’ Mejju 2007, Holböck (C-157/05, Ġabra p. I-4051, punt 24 u l-ġurisprudenza ċċitata).
( 27 ) Ara, f’dan is-sens, is-sentenza Test Claimants in Class IV of the ACT Group Litigation, iċċitata iktar ’il fuq (punt 36).
( 28 ) Skont l-ispjegazzjoni mogħtija mill-Gvern Olandiż, din is-sistema ta’ taxxa imposta f’ras il-għajn għandha l-għan li tantiċipa t-taxxa fuq id-dħul jew dik fuq il-kumpanniji li titħallas fuq id-dividendi sabiex tevita kull forma ta’ ħabi min-naħa tal-azzjonisti.
( 29 ) Fl-osservazzjonijiet tiegħu bil-miktub, il-Gvern Olandiż sostna li inizjalment il-leġiżlazzjoni kienet tipprevedi eżenzjoni tat-taxxa fuq id-dividendi, iżda din l-eżenzjoni kellha tiġi sostitwita mis-sistema kkonstestata minħabba r-restrizzjonijiet amministrattivi li kienet timponi fuq l-impriżi ta’ investiment kollettiv, sabiex jiġġustifikaw il-pożizzjoni tagħhom mal-kumpanniji ta’ distribuzzjoni qabel kull tqassim ta’ dividendi.
( 30 ) C-196/04, Ġabra, p. I-7995, punti 43 sa 46.
( 31 ) Sentenza D., iċċitata iktar ’il fuq (punti 59 à 62). L-istess analiżi kienet adottata mill-Qorti tal-Ġustizzja fis-sentenza Test Claimants in Class IV of the ACT Group Litigation, iċċitata iktar il-fuq, fir-rigward tad-differenza ta’ trattament imposta fuq kumpanniji mhux residenti fir-Renju Unit, minħabba l-fatt li, fost il-ftehim konklużi minn dan l-Istat Membru ma’ Stati Membri oħra, xi ftit minnhom kienu jipprevedu kreditu fiskali għall-kumpanniji residenti fl-imsemmija Stati Membri, waqt li oħrajn ma kinux jippreveduh (punti 84 sa 91).
( 32 ) Sentenza Denkavit Internationaal u Denkavit France, iċċitata iktar ’il fuq (punt 37 u l-ġurisprudenza ċċitata).
( 33 ) Ara, b’mod partikolari, is-sentenzi Lenz, iċċitata iktar ’il fuq (punt 52), u tal-21 ta’ Frar 2006, Ritter Coulais (C-152/03, Ġabra p. I-1711, punt 15 u l-ġurisprudenza ċċitata).
( 34 ) F’dan ir-rigward, għandu jiġi ppreċiżat li għall-kuntrarju ta’ dak li qalet OESF fis-seduta, il-Gvern Olandiż mhuwiex marbut li jħallasha lura t-totalità tat-taxxa mħallsa fil-Portugall jekk is-sistema fiskali kkonstestata, hekk kif fimtha jien, tillimita t-tpaċija, intiża sabiex tieħu inkunsiderazzjoni t-taxxa imposta f’ras il-għajn fuq id-dividendi ġejjin minn barra l-pajjiż, għall-ammont ta’ taxxa Olandiża li hija imposta fuq dawk id-dividendi. It-taxxa imposta f’ras il-għajn fil-Portugall għandha tagħti lok għad-dritt ta’ tpaċija fl-istess ċirkustanzi bħat-taxxi mħallsa fl-Istati Membri l-oħra.