IL-KUMMISSJONI EWROPEA

Brussell, 6.2.2026

COM(2026) 10 final

2026/0037(BUD)

Proposta għal

DEĊIŻJONI TAL-PARLAMENT EWROPEW U TAL-KUNSILL

dwar il-mobilizzazzjoni tal-Fond Ewropew ta’ Aġġustament għall-Globalizzazzjoni għall-Ħaddiema Ssensjati wara applikazzjoni mill-Awstrija – EGF/2025/005 AT/KTM

MEMORANDUM TA’ SPJEGAZZJONI

KUNTEST TAL-PROPOSTA

1.Ir-regoli applikabbli għall-kontribuzzjonijiet finanzjarji mill-Fond Ewropew ta’ Aġġustament għall-Globalizzazzjoni għall-Ħaddiema Ssensjati (FEG) huma stabbiliti fir-Regolament (UE) 2021/691 tal-Parlament Ewropew u tal-Kunsill tat-28 ta’ April 2021 dwar il-Fond Ewropew ta’ Aġġustament għall-Globalizzazzjoni għall-Ħaddiema Ssensjati (FEG) u li jħassar ir-Regolament (UE) Nru 1309/2013 1 .

2.Fil-15 ta’ Settembru 2025, l-Awstrija ppreżentat l-applikazzjoni EGF/2025/005 AT/KTM għal kontribuzzjoni finanzjarja mill-FEG, wara sensji f’KTM fl-Awstrija.

3.Wara l-valutazzjoni li għamlet ta’ din l-applikazzjoni, il-Kummissjoni kkonkludiet li f’konformità mad-dispożizzjonijiet kollha applikabbli tar-Regolament (UE) 2021/691, il-kundizzjonijiet għall-għoti ta’ kontribuzzjoni finanzjarja mill-FEG ġew issodisfati.

SOMMARJU TAL-APPLIKAZZJONI

VALUTAZZJONI TAL-APPLIKAZZJONI

Proċedura

4.L-Awstrija ppreżentat l-applikazzjoni EGF/2025/005 AT/KTM fi żmien 12-il ġimgħa mid-data li fiha ġew issodisfati l-kriterji ta’ intervent stipulati fl-Artikolu 4 (2), il-punt (a), tar-Regolament (UE) 2021/691, fil-15 ta’ Settembru 2025. Il-Kummissjoni kkonfermat il-wasla tal-applikazzjoni fl-istess data. Il-Kummissjoni kellha f’idejha t-traduzzjoni tal-applikazzjoni fl-14 ta’ Ottubru 2025 u talbet informazzjoni addizzjonali mingħand l-Awstrija sat-28 ta’ Ottubru 2025. Tali informazzjoni addizzjonali ngħatat fi żmien 15-il jum ta’ xogħol mit-talba. L-iskadenza ta’ 50 jum ta’ xogħol mill-wasla tal-applikazzjoni kompluta li fiha l-Kummissjoni trid tiffinalizza l-valutazzjoni tagħha tal-konformità tal-applikazzjoni mal-kundizzjonijiet għall-għoti ta’ kontribuzzjoni finanzjarja tiskadi fis-6 ta’ Frar 2026.

Eliġibbiltà tal-applikazzjoni

Intrapriżi u benefiċjarji kkonċernati

5.L-applikazzjoni relatata ma’ 233 ħaddiem issensjati li l-attività tagħhom waqfet f’KTM (KTM Gruppe) fis-settur ekonomiku klassifikat taħt id-Diviżjoni 30 tan-NACE Reviżjoni 2 (Manifattura ta’ tagħmir ieħor tat-trasport). Is-sensji mogħtija mill-intrapriża jinsabu fir-reġjun NUTS 2 tal-Awstrija ta’ Fuq (AT31).

Kriterji ta’ intervent

6.L-Awstrija ppreżentat l-applikazzjoni skont il-kriterji ta’ intervent tal-Artikolu 4(2), il-punt (a) tar-Regolament (UE) 2021/691, li jirrikjedi l-waqfien tal-attività ta’ mill-anqas 200 ħaddiem issensjati fuq perjodu referenzjarju ta’ 4 xhur f’intrapriża fi Stat Membru, inklużi ħaddiema ssensjati minn fornituri u produtturi downstream u/jew persuni li jaħdmu għal rashom li l-attività tagħhom tkun waqfet.

7.Il-perjodu ta’ referenza ta’ 4 xhur għall-applikazzjoni jibda mill-25 ta’ Frar 2025 sal-25 ta’ Ġunju 2025.

8.Matul il-perjodu referenzjarju kien hemm 233 ħaddiem issensjati f’KTM.

Kalkolu tas-sensji u tal-waqfien ta’ attività

9.Skont l-Artikolu 6, l-ewwel paragrafu, il-punt (a), flimkien mal-Artikolu 5, l-ewwel paragrafu, tar-Regolament (UE) 2021/691, il-waqfien tal-attivitajiet tal-233 ħaddiem issensjati matul il-perjodu ta’ referenza ġie kkalkolat mid-data tat-terminazzjoni de facto tal-kuntratt tal-impjieg jew l-iskadenza tiegħu.

Benefiċjarji eliġibbli

10.Minbarra l-ħaddiema diġà msemmija, il-benefiċjarji eliġibbli jinkludu 1 255 ħaddiem issensjati li l-attività tagħhom waqfet qabel jew wara l-perjodu ta’ referenza ta’ 4 xhur. Dawn il-ħaddiema kollha waqqfu l-attività tagħhom fis-6 xhur ta’ qabel il-bidu tal-perjodu ta’ referenza fil-25 ta’ Frar 2025 u/jew bejn it-tmiem tal-perjodu ta’ referenza u l-jum ta’ qabel l-adozzjoni ta’ din il-proposta, skont l-Artikolu 6, l-ewwel paragrafu, il-punt (b), tar-Regolament (UE) 2021/691, kif meħtieġ mill-Artikolu 6, it-tieni paragrafu, tar-Regolament (UE) 2021/691. Tista’ tiġi stabbilita rabta kawżali ċara mal-event li wassal għall-waqfien tal-attività tal-ħaddiema ssensjati matul il-perjodu ta’ referenza kif meħtieġ mill-Artikolu 6, it-tieni paragrafu, tar-Regolament (UE) 2021/691.

11.L-għadd totali ta’ benefiċjarji eliġibbli huwa 1 488.

Deskrizzjoni tal-avvenimenti li wasslu għas-sensji u għall-waqfien tal-attività

12.L-eventi li wasslu għal dawn is-sensji huma l-proċedimenti ta’ insolvenza ta’ KTM Gruppe.

13.KTM kienet l-akbar impriża sussidjarja ta’ Pierer Mobility AG (90 % tal-fatturat ta’ Pierer). Bħala produttur tal-muturi, KTM żviluppa biex sar l-akbar produttur tal-muturi fl-Unjoni Ewropea (mill-2012). KTM għandha s-sede f’Mattighofen fid-distritt ta’ Braunau fl-Awstrija ta’ Fuq.

14.F’Diċembru 2023, Pierer ħabbret id-delokalizzazzjoni tal-produzzjoni taċ-Ċina u tal-Indja, u dan wassal għall-ewwel mewġa ta’ sensji li eliminaw 300 impjieg fil-pjanta ta’ Mattighofen. Prinċipalment kien minħabba l-kostijiet lavorattivi ħafna inqas f’dawn il-pajjiżi. Fatturi oħra inkludew il-prossimità għas-swieq tat-tkabbir, peress li d-domanda fl-Ewropa bdiet tonqos gradwalment, kif ukoll restrizzjonijiet lavorattivi anqas stretti, u b’hekk kienet possibbli aktar flessibbiltà biex jiġu aġġustati l-livelli tal-produzzjoni għall-iżviluppi tas-suq.

15.Matul l-2024, il-kumpanija esperjenzat kriżi kbira: il-bejgħ naqas b’29,4 %, u dan wassal għal inventorju eċċessiv (265 000 mutur fl-istokk) u telf ta’ EUR 1,1 biljun. Id-dejn ta’ KTM laħaq EUR 1,642 biljun. KTM bdiet tnaqqis kbir fil-kostijiet, inkluż is-sensji ta’ aktar minn 500 impjegat.

16.Minkejja l-isforzi biex il-produzzjoni tiġi rilokata fl-Indja, il-proċedimenti ta’ insolvenza kienu inevitabbli. Il-proċedimenti ta’ ristrutturar bdew għal Pier, bl-abbozz ta’ pjan ta’ ristrutturar għal KTM u l-affiljati tagħha. Fid-29 ta’ Novembru 2024, KTM applika għall-insolvenza. KTM kellha l-ewwel waqfien mill-produzzjoni tagħha minn Diċembru 2024 sa Marzu 2025. Aktar minn 750 impjegat ieħor ingħataw is-sensja. Fil-25 ta’ Frar 2025, il-kredituri approvaw il-pjan ta’ ristrutturar li offrielhom kwota ta’ 30 % minn dak li kienu dovuti. Madankollu kien meħtieġ investitur li jakkwista lil KTM u jħallas il-kwota.

17.Waqt il-laqgħa tal-kredituri, il-proċedimenti ta’ insolvenza tal-Grupp KTM kienu l-akbar li qatt seħħew fl-Awstrija ta’ Fuq.

18.Fis-17 ta’ Marzu 2025, il-produzzjoni reġgħet bdiet bir-ritmu ta’ xift wieħed (minflok bil-kapaċità sħiħa tal-produzzjoni). Il-ħaddiema li kien fadal bdew jaħdmu inqas ħinijiet u b’inqas paga biex jgħinu fil-ġestjoni tal-kostijiet. Kien inevitabbli li jingħataw iktar sensji. Fit-28 ta’ April 2025, il-produzzjoni kellha tieqaf mill-ġdid minħabba n-nuqqas kontinwu fil-provvista tal-partijiet u tal-komponenti.

19.Fl-aħħar instab investitur. Bajaj Auto International Holdings B.V. ipprovdiet ir-riżorsi meħtieġa biex tiżgura l-kontinwità ta’ KTM fit-22 ta’ Mejju 2025. Il-pagament tal-kwota miftiehma lill-kredituri warrab it-theddida tal-falliment ta’ KTM u r-riskju li l-kumpanija tagħlaq darba għal dejjem. Il-produzzjoni setgħet terġa’ tibda fit-28 ta’ Lulju 2025, filwaqt li tkomplew il-miżuri ta’ awsterità u l-enfasi fuq il-kosteffiċjenza.

Impatt mistenni tas-sensji rigward l-ekonomija lokali, reġjonali jew nazzjonali u l-impjiegi

20.L-insolvenza ta’ KTM laqtet ħażin lir-reġjun madwar is-sede ta’ Mattighofen. Il-kumpanija timpjega aktar minn 4 000 ħaddiem direttament fl-Awstrija ta’ Fuq, u għalhekk mhix biss impjegatur sinifikanti iżda hi wkoll il-pedament ekonomiku ta’ ħafna fornituri u ta’ dawk li jipprovdu s-servizzi. L-ekonomija reġjonali ntlaqtet ħażin mill-insolvenza u dan wassal għal tfixkil serju.

21.B’konsegwenza ta’ dan, il-qgħad fid-distrett ta’ Braunau żdied b’39,8 % f’Ottubru 2024 u b’37,1 % f’Novembru 2024 meta mqabbel mal-istess xhur tas-snin preċedenti.

22.F’Marzu 2025, dan wassal għall-akbar rata ta’ qgħad li qatt ġiet irreġistrata fid-distrett ta’ Braunau li rrappreżentat l-ogħla livell ta’ qgħad fid-distretti tas-suq tax-xogħol kollha fl-Awstrija. Il-qgħad baqa’ kostantement għoli fl-2025.

Applikazzjoni tal-Qafas tal-UE dwar il-Kwalità għall-antiċipazzjoni tal-bidla u r-ristrutturar (QFR)

23.L-Awstrija ddeskriviet kif tqiesu r-rakkomandazzjonijiet stabbiliti fil-Qafas ta’ Kwalità tal-UE għall-antiċipazzjoni tal-bidla u r-ristrutturar. Fl-Awstrija, il-kumpaniji li jagħtu s-sensji mhumiex meħtieġa bil-liġi jew bi ftehim kollettiv, li jistabbilixxu programm għall-impjiegi jew jipparteċipaw f’wieħed, jew jistabbilixxu miżuri oħra biex jappoġġaw lill-ħaddiema milquta. Madankollu, l-intrapriża kkonċernata tista’ b’mod volontarju tikkofinanzja fondazzjoni tax-xogħol responsabbli għall-miżuri fi programm għall-impjiegi 6 .

24.KTM AG kienet għaddejja bi proċedimenti ta’ insolvenza waqt il-perjodu inkwistjoni u għalhekk ma setgħetx tikkontribwixxi għal fondazzjoni għax-xogħol.

25.Rigward l-attivitajiet meħuda biex jassistu lill-ħaddiema ssensjati, l-Awstrija rrapportat li wara n-notifika tal-applikazzjoni għall-insolvenza ta’ KTM, is-Servizz pubbliku tal-impjiegi tal-Awstrija ta’ Fuq minnufih beda jipprovdi pariri lill-ħaddiema milquta, u flimkien mal-Provinċja tal-Awstrija ta’ Fuq, iddeċieda li b’mod volontarju jistabbilixxi u jiffinanzja minn qabel fondazzjoni għall-insolvenza u japplika għall-assistenza mill-FEG.

Kumplimentarjetà ma’ azzjonijiet iffinanzjati minn fondi nazzjonali jew tal-Unjoni

26.L-Awstrija kkonfermat li l-miżuri deskritti hawn taħt li jirċievu kontribuzzjoni finanzjarja mill-FEG mhumiex se jirċievu wkoll kontribuzzjonijiet finanzjarji minn strumenti finanzjarji oħrajn tal-Unjoni.

27.Il-pakkett koordinat ta’ servizzi personalizzati jikkomplementa azzjonijiet iffinanzjati minn fondi nazzjonali oħrajn.

Proċeduri għall-konsultazzjoni mal-benefiċjarji fil-mira, mar-rappreżentanti tagħhom, mas-sħab soċjali jew mal-awtoritajiet lokali u reġjonali

28.L-Awstrija indikat li l-pakkett koordinat ta’ servizzi personalizzati tfassal f’konsultazzjoni mas-sħab soċjali, f’konformità mal-Artikolu 7(4) tar-Regolament (UE) 2021/691. Il-petizzjoni għall-insolvenza ta’ KTM ġiet irreġistrata fid-29 ta’ Novembru 2024. Fil-5 ta’ Diċembru 2024 saret l-ewwel laqgħa ta’ koordinazzjoni mar-rappreżentanti tal-Provinċja tal-Awstrija ta’ Fuq u s-sħab soċjali rigward l-istabbiliment ta’ fondazzjoni għall-insolvenza.

29.Bħala parti mill-proċedura ta’ rikonoxximent tal-fondazzjoni għall-insolvenza mwettqa mis-Servizz pubbliku tal-impjiegi tal-Awstrija ta’ Fuq, ġew ikkonsultati s-sħab soċjali, bħala r-rappreżentanti tal-ekonomija lokali, u l-ħaddiema 7 . L-atturi kollha approvaw l-istabbiliment ta’ fondazzjoni għall-insolvenza. Imbagħad is-sħab soċjali ġew informati bl-applikazzjoni għall-FEG mis-Servizz għas-suq tax-xogħol tal-Awstrija ta’ Fuq.

30.Il-parteċipazzjoni fil-fondazzjoni għall-insolvenza hi volontarja għall-ħaddiema milquta. Il-miżuri maħsuba għal dawk li jeħtieġu assistenza komprensiva u fil-fond.

Benefiċjarji fil-mira u azzjonijiet proposti

Benefiċjarji fil-mira

31.L-għadd stmat ta’ ħaddiema ssensjati li mistennija jipparteċipaw fil-miżuri huwa 420. Skont l-Artikolu 8(7), il-punt (f), tar-Regolament (UE) 2021/691, id-diżaggregazzjoni pprovduta ta’ dawn il-ħaddiema skont il-ġeneru, il-grupp ta’ età u l-livell ta’ edukazzjoni hija kif ġej:

Miżuri proposti

32.Skont l-Artikolu 8(7), il-punt (h), tar-Regolament (UE) 2021/691, il-pakkett koordinat personalizzat li jrid jiġi pprovdut lill-ħaddiema ssensjati jikkonsisti mill-miżuri li ġejjin:

–Ġestjoni tal-każijiet: Din il-miżura għandha l-għan li toffri appoġġ individwalizzat ħafna billi l-parteċipanti jiġu akkumpanjati fl-implimentazzjoni tal-pjan ta’ azzjoni individwali tagħhom u d-dokumentazzjoni u l-valutazzjoni tal-perkorsi tat-taħriġ individwali tagħhom.

–Gwida għall-karriera – orjentazzjoni tal-karriera: Din il-miżura tiġi qabel il-pjan ta’ azzjoni individwali u sservi prinċipalment biex tiċċara l-prospetti tal-karriera abbażi tal-interessi, l-aspetti b’saħħithom u n-nuqqasijiet tal-parteċipanti. Biex jiġi stabbilit pjan ta’ azzjoni, jiġu identifikati l-objettivi għat-taħriġ individwali kif ukoll diskussi l-possibilitajiet ta’ taħriġ. Dan hu bbażat fuq riċerka bir-reqqa tax-xejriet tas-suq tax-xogħol u l-opportunitajiet tax-xogħol prospettivi.

–Taħriġ u taħriġ mill-ġdid: Waqt it-tfassil tal-pjan ta’ azzjoni, tingħata attenzjoni partikolari għat-titjib tal-ħiliet vokazzjonali. Għalhekk, il-parteċipanti jistgħu jsegwu l-korsijiet ta’ taħriġ u taħriġ mill-ġdid skont il-ħtiġijiet tas-suq tax-xogħol, u l-parteċipanti jkunu jistgħu jsibu xogħol ġdid u sostenibbli malajr kemm jista’ jkun.

–Tiftix proattiv għal xogħol: Din il-miżura tinkludi l-assistenza fit-tħejjija ta’ applikazzjonijiet konvinċenti, l-iżvilupp ta’ strateġiji ta’ tiftix u strateġiji individwali u relatati max-xogħol, il-promozzjoni tal-inizjattiva u l-motivazzjoni, l-indirizzar ta’ rifjut, it-tisħiħ tar-reżiljenza, eċċ.

–Allowance għat-taħriġ – sussidju relatat mat-taħriġ: Kull min jipparteċipa fil-programm se jingħata allowance għat-taħriġ biex ikopri l-ispejjeż addizzjonali relatati mat-taħriġ b’rabta mal-parteċipazzjoni fil-miżuri ta’ taħriġ.

33.Il-gwida għall-karriera kif ukoll il-miżuri għat-taħriġ u għat-taħriġ mill-ġdid jgħinu fit-tixrid tal-ħiliet meħtieġa fl-era industrijali diġitali u f’ekonomija effiċjenti fir-riżorsi, kif meħtieġ mill-Artikolu 7(2) tar-Regolament (UE) 2021/691. Fil-kuntest tal-gwida għall-karriera, tingħata attenzjoni partikolari lill-importanza tal-prospetti tal-karriera fl-impjiegi ekoloġiċi (impjiegi fis-setturi bħall-enerġija rinnovabbli, il-kostruzzjoni sostenibbli u r-rinnovazzjoni, u l-ġestjoni tal-ilma u tal-ilma mormi). Fil-miżuri ta’ taħriġ u ta’ taħriġ mill-ġdid, meta jitfasslu l-pjanijiet ta’ azzjoni individwali, issir enfasi fuq il-ħiliet diġitali, b’mod partikolari għal dawk il-parteċipanti mingħajr għarfien preċedenti jew b’għarfien bażiku ħafna.

34.L-azzjonijiet proposti u deskritti hawnhekk, huma magħmula minn miżuri ta’ politika attiva tas-suq tax-xogħol fl-ambitu tal-azzjonijiet eliġibbli stipulati fl-Artikolu 7 tar-Regolament (UE) 2021/691. Dawn l-azzjonijiet ma jiħdux post il-miżuri passivi ta’ protezzjoni soċjali.

35.L-Awstrija tat l-informazzjoni meħtieġa dwar il-miżuri li huma obbligatorji għall-intrapriża kkonċernata permezz tal-liġi nazzjonali jew skont il-ftehimiet kollettivi. F’konformità mal-Artikolu 9(1) tar-Regolament (UE) 2021/691, l-Awstrija kkonfermat li dawn il-miżuri mhumiex se jiġu sostitwiti b’kontribuzzjoni finanzjarja mill-FEG.

Baġit stmat

36.Il-kostijiet totali stmati huma EUR 3 011 040, li jinkludu nefqa ta’ EUR 2 895 120 għal servizzi personalizzati u nefqa ta’ EUR 115 920 għal attivitajiet ta’ tħejjija, ġestjoni, informazzjoni u pubbliċità, kontroll u rapportar.

37.Il-kontribuzzjoni finanzjarja totali mitluba mill-FEG hija EUR 1 806 624 (60 % tal-kostijiet totali).

38.Skont l-Artikolu 8(7), il-punt (m), tar-Regolament (UE) 2021/691, l-Awstrija speċifikat li l-prefinanzjament nazzjonali hu kondiviż b’mod ugwali mill-gvern tal-Awstrija ta’ Fuq u s-Servizz pubbliku tal-impjiegi tal-Awstrija (Arbeitsmarktservice). Il-kofinanzjament jingħata mis-Servizz pubbliku tal-impjiegi tal-Awstrija (Arbeitsmarktservice).

39.Il-kostijiet tal-miżuri identifikati fit-tabella ta’ hawn fuq bħala miżuri skont l-Artikolu 7(2), it-tieni subparagrafu, il-punt (b), tar-Regolament (UE) 2021/691 ma jaqbżux il-35 % tal-kostijiet totali għall-pakkett koordinat ta’ servizzi personalizzati. L-Awstrija kkonfermat li dawn il-miżuri huma kundizzjonali fuq il-parteċipazzjoni attiva tal-benefiċjarji fil-mira f’attivitajiet ta’ tiftix ta’ impjieg jew ta’ taħriġ.

Perjodu ta’ eliġibbiltà tan-nefqa

40.L-Awstrija bdiet tipprovdi s-servizzi personalizzati lill-benefiċjarji fil-mira fl-1 ta’ Marzu 2025. In-nefqa fuq il-miżuri għalhekk se tkun eliġibbli għal kontribuzzjoni finanzjarja mill-FEG mill-1 ta’ Marzu 2025 sa 24 xahar wara d-data tad-dħul fis-seħħ tad-Deċiżjoni ta’ Finanzjament.

41.L-Awstrija bdiet iġġarrab in-nefqa amministrattiva biex timplimenta l-FEG fl-1 ta’ Marzu 2025. In-nefqa għall-attivitajiet ta’ tħejjija, ġestjoni, informazzjoni u pubbliċità, kif ukoll dawk ta’ kontroll u rappurtar għandha għalhekk tkun eliġibbli għal kontribuzzjoni finanzjarja mill-FEG mill-1 ta’ Marzu 2025 sa 31 xahar wara d-data tad-dħul fis-seħħ tad-Deċiżjoni ta’ Finanzjament.

Sistemi ta’ ġestjoni u kontroll

42.L-applikazzjoni fiha deskrizzjoni tas-sistema ta’ ġestjoni u kontroll meħtieġa skont l-Artikolu 23 tar-Regolament (UE) 2021/691, li tispeċifika r-responsabbiltajiet tal-korpi involuti. L-Awstrija nnotifikat lill-Kummissjoni li permezz ta’ ftehim amministrattiv bejn il-Ministeru Federali Awstrijak għax-xogħol, għall-affarijiet soċjali, għas-saħħa, għall-kura u għall-protezzjoni tal-konsumatur (unità IX/A/3) bħala l-awtorità maniġerjali Awstrijaka tal-FEG, u l-Awstrija ta’ Fuq, il-kontribuzzjoni finanzjarja se tkun ġestita mid-Dipartiment tal-Awstrija ta’ Fuq għall-ekonomija u għar-riċerka. Il-funzjoni ta’ kontroll ta’ l-ewwel livell ġiet ikkuntrattata lil Public Management & Consulting GmbH, fi Vjenna. Il-funzjoni tal-awtorità tal-awditjar titwettaq mill-istess dipartiment fid-Direttorat tal-Awstrija ta’ Fuq għall-ippjanar reġjonali u għall-iżvilupp ekonomiku u rurali, li jaġixxi wkoll bħala l-awtorità tal-awditjar tal-Awstrija ta’ Fuq kemm għall-Fond Ewropew għall-iżvilupp rurali kif ukoll għall-Fond għal Tranżizzjoni Ġusta. Għalhekk, l-awtorità tal-awditjar topera b’mod separat u indipendenti mid-Dipartiment għall-ekonomija u għar-riċerka biex tiġi żgurata s-separazzjoni adegwata tal-kompiti.

Impenji provduti mill-Istat Membru kkonċernat

43.L-Awstrija tat l-assigurazzjonijiet kollha meħtieġa fir-rigward ta’ dawn li ġejjin:

–il-prinċipji tat-trattament ugwali u tan-nondiskriminazzjoni se jiġu rispettati fl-aċċess għall-miżuri proposti u għall-implimentazzjoni tagħhom,

–inżammet il-konformità mar-rekwiżiti stabbiliti fil-leġiżlazzjoni nazzjonali u tal-UE dwar is-sensji kollettivi,

–kwalunkwe finanzjament doppju se jiġi evitat,

–il-kontribuzzjoni finanzjarja mill-FEG se tkun konformi mar-regoli proċedurali u materjali tal-Unjoni dwar l-għajnuna mill-Istat.

IMPLIKAZZJONI BAĠITARJA

Proposta baġitarja

44.Il-FEG ma għandux jaqbeż ammont annwali massimu ta’ EUR 30 miljun (fi prezzijiet tal-2018), kif stabbilit fl-Artikolu 8 tar-Regolament tal-Kunsill (UE, Euratom) 2020/2093 tas-17 ta’ Diċembru 2020 li jistabbilixxi l-qafas finanzjarju pluriennali għas-snin mill-2021 sal-2027 14 emendat bir-Regolament tal-Kunsill (UE, Euratom) 2024/765 tad-29 ta’ Frar 2024 15 .

45.Wara li eżaminat l-applikazzjoni fir-rigward tal-kundizzjonijiet stabbiliti fl-Artikolu 13(1) u (2) tar-Regolament (UE) 2021/691, u wara li qieset l-għadd ta’ benefiċjarji fil-mira, il-miżuri proposti u l-kostijiet stmati, il-Kummissjoni tipproponi li l-FEG jiġi mmobilizzat għall-ammont ta’ EUR 1 806 624, li jirrappreżenta 60 % tal-kostijiet totali tal-miżuri proposti, sabiex tingħata kontribuzzjoni finanzjarja għall-applikazzjoni.

46.Id-deċiżjoni proposta għall-mobilizzazzjoni tal-FEG se tittieħed b’mod konġunt mill-Parlament Ewropew u mill-Kunsill skont l-Artikolu 15(1), l-ewwel subparagrafu, it-tieni sentenza, tar-Regolament (UE) 2021/691, u kif stabbilit fil-punt 9 tal-Ftehim Interistituzzjonali tas-16 ta’ Diċembru 2020 bejn il-Parlament Ewropew, il-Kunsill tal-Unjoni Ewropea u l-Kummissjoni Ewropea dwar dixxiplina baġitarja, dwar kooperazzjoni f’materji baġitarji u dwar ġestjoni finanzjarja tajba, kif ukoll dwar riżorsi proprji ġodda, inkluż pjan direzzjonali lejn l-introduzzjoni ta’ riżorsi proprji ġodda 16 .

Atti relatati

47.Fl-istess waqt li tippreżenta din il-proposta għal deċiżjoni sabiex jiġi mmobilizzat il-FEG, il-Kummissjoni se tippreżenta lill-Parlament Ewropew u lill-Kunsill proposta għal trasferiment tal-ammont ta’ EUR 1 806 624 għal-linja baġitarja rilevanti.

48.Fl-istess waqt li adottat din il-proposta għal deċiżjoni biex jiġi mmobilizzat il-FEG, il-Kummissjoni adottat deċiżjoni dwar kontribuzzjoni finanzjarja li fiha deċiżjoni ta’ finanzjament skont it-tifsira tal-Artikolu 110 tar-Regolament (UE, Euratom) 2024/2509 17 . Dik id-deċiżjoni ta’ finanzjament se tidħol fis-seħħ fid-data li fiha l-Kummissjoni tiġi notifikata bl-approvazzjoni tat-trasferiment baġitarju mill-Parlament Ewropew u mill-Kunsill skont l-Artikolu 15(2), l-ewwel subparagrafu, tar-Regolament (UE) 2021/691.

2026/0037 (BUD)

Proposta għal

DEĊIŻJONI TAL-PARLAMENT EWROPEW U TAL-KUNSILL

dwar il-mobilizzazzjoni tal-Fond Ewropew ta’ Aġġustament għall-Globalizzazzjoni għall-Ħaddiema Ssensjati wara applikazzjoni mill-Awstrija – EGF/2025/005 AT/KTM

IL-PARLAMENT EWROPEW U L-KUNSILL TAL-UNJONI EWROPEA,

Wara li kkunsidraw it-Trattat dwar il-Funzjonament tal-Unjoni Ewropea,

Wara li kkunsidraw ir-Regolament (UE) 2021/691 tal-Parlament Ewropew u tal-Kunsill tat-28 ta’ April 2021 dwar il-Fond Ewropew ta’ Aġġustament għall-Globalizzazzjoni għall-Ħaddiema Ssensjati (FEG) u li jħassar ir-Regolament (UE) Nru 1309/2013 18 , u b’mod partikolari l-Artikolu 15(1), l-ewwel subparagrafu, tiegħu,

Wara li kkunsidraw il-Ftehim Interistituzzjonali tas-16 ta’ Diċembru 2020 bejn il-Parlament Ewropew, il-Kunsill tal-Unjoni Ewropea u l-Kummissjoni Ewropea dwar dixxiplina baġitarja, dwar kooperazzjoni f’materji baġitarji u dwar ġestjoni finanzjarja tajba, kif ukoll dwar riżorsi proprji ġodda, inkluż pjan direzzjonali lejn l-introduzzjoni ta’ riżorsi proprji ġodda 19 , u b’mod partikolari l-punt 9 tiegħu,

Wara li kkunsidraw il-proposta tal-Kummissjoni Ewropea,

Billi:

(1)Il-Fond Ewropew ta’ Aġġustament għall-Globalizzazzjoni għall-Ħaddiema Ssensjati (FEG) għandu l-għan li juri solidarjetà u li jħeġġeġ impjiegi deċenti u sostenibbli fl-Unjoni billi jipprovdi appoġġ għall-ħaddiema ssensjati u għal persuni b’impjieg indipendenti li l-attività tagħhom tkun waqfet fil-każ ta’ eventi kbar ta’ ristrutturar u jgħinhom jirritornaw għal impjieg deċenti u sostenibbli mill-aktar fis possibbli.

(2)Il-FEG ma għandux jaqbeż ammont annwali massimu ta’ EUR 30 miljun (fi prezzijiet tal-2018), kif stabbilit fl-Artikolu 8 tar-Regolament tal-Kunsill (UE, Euratom) 2020/2093 20 emendat bir-Regolament tal-Kunsill (UE, Euratom) 2024/765 21 , u fl-Artikolu 16 tar-Regolament (UE) 2021/691.

(3)Fil-15 ta’ Settembru 2025, l-Awstrija ppreżentat applikazzjoni biex jiġi mobilizzat il-FEG f’konformità mal-Artikolu 8(1) tar-Regolament (UE) 2021/691, fir-rigward tas-sensji tal-ħaddiema f’KTM (KTM Gruppe) fl-Awstrija. Din ġiet issupplimentata b’informazzjoni addizzjonali provduta f’konformità mal-Artikolu 8(5) tar-Regolament (UE) 2021/691. Dik l-applikazzjoni titqies li tikkonforma mal-kundizzjonijiet għall-għoti ta’ kontribuzzjoni finanzjarja mill-FEG kif stabbilit fl-Artikolu 13 tar-Regolament (UE) 2021/691, abbażi tal-valutazzjoni li saret mill-Kummissjoni fil-Proposta għal deċiżjoni ta’ mobilizzazzjoni tal-Parlament Ewropew u tal-Kunsill 22 .

(4)Għalhekk, il-FEG jenħtieġ li jiġi mmobilizzat sabiex jipprovdi kontribuzzjoni finanzjarja ta’ EUR 1 806 624 fir-rigward tal-applikazzjoni ppreżentata mill-Awstrija.

(5)Sabiex jitnaqqas kemm jista’ jkun iż-żmien biex jiġi mobilizzat il-FEG, jenħtieġ li din id-Deċiżjoni tapplika mid-data tal-adozzjoni tagħha,

ADOTTAW DIN ID-DEĊIŻJONI:

Artikolu 1

Għall-baġit ġenerali tal-Unjoni għas-sena finanzjarja tal-2026, il-Fond Ewropew ta’ Aġġustament għall-Globalizzazzjoni għall-Ħaddiema Ssensjati għandu jiġi mmobilizzat sabiex jipprovdi l-ammont ta’ EUR 1 806 624 f’approprjazzjonijiet ta’ impenn u ta’ pagament.

Artikolu 2

Din id-Deċiżjoni għandha tidħol fis-seħħ fil-jum tal-pubblikazzjoni tagħha f’Il-Ġurnal Uffiċjali tal-Unjoni Ewropea. Għandha tapplika minn [ id-data tal-adozzjoni tagħha ] 23*.

Magħmul fi Brussell,

(1)    ĠU L 153, 3.5.2021, p. 48.

(2)    Ir-Regolament Delegat tal-Kummissjoni 2019/1755 tat-8 ta’ Awwissu 2019 li jemenda l-Annessi tar-Regolament (KE) Nru 1059/2003 tal-Parlament Ewropew u tal-Kunsill dwar l-istabbiliment ta’ klassifikazzjoni komuni ta’ unitajiet territorjali għall-istatistika (NUTS). ĠU L 270, 24.10.2019, p. 1–56.

(3)    KTM Gruppe magħmul minn KTM AG, KTM Components GmbH (inkluż Vöcklabrucker Metallgießerei GmbH) u KTM R&D GmbH.

(4)    ĠU L 393, 30.12.2006, p. 1.

(5)    F’konformità mal-Artikolu 7(5) tar-Regolament (UE) 2021/691.

(6)    Programm għall-impjiegi hu pakkett personalizzat ta’ miżuri għall-ħaddiema li ngħataw is-sensja. Spiss jinbeda mill-intrapriża li tagħti s-sensja lill-persunal u jieħu l-forma legali ta’ fondazzjoni għax-xogħol (Arbeitsstiftung) f’konformità mat-Taqsima 18 tal-Att tal-Awstrija dwar l-assigurazzjoni kontra l-qgħad. F’każ ta’ insolvenza, l-awtoritajiet pubbliċi jistgħu jistabbilixxu tali fondazzjoni fil-forma ta’ fondazzjoni għall-insolvenza (Insolvenzstiftung).

(7)    Il-Kamra tal-Kummerċ tal-Awstrija ta’ Fuq fis-6 ta’ Frar 2025, u t-Trade union tal-ħaddiema privati (GPA) u t-Trade union tal-ħaddiema tal-produzzjoni (PROGE) fis-7 ta’ Frar 2025.

(8)    ISCED 0-2

(9)    ISCED 3

(10)    ISCED 4

(11)    ISCED 5-8

(12)    Biex jiġu evitati d-deċimali, ġew ittondjati l-kostijiet stmati għal kull ħaddiem. Madankollu, l-ittondjar ma għandu l-ebda impatt fuq il-kost totali ta’ kull miżura, li jibqa’ bħal dak fl-applikazzjoni preżentata mill-Awstrija.

(13)    It-totali ma jaqblux minħabba l-ittondjar.

(14)    ĠU L 433 I, 22.12.2020, p. 11.

(15)    ĠU L, 2024/765, 29.2.2024, ELI: http://data.europa.eu/eli/reg/2024/765/oj.

(16)    ĠU L 433 I, 22.12.2020, p. 28.

(17)    Ir-Regolament (UE, Euratom) 2024/2509 tal-Parlament Ewropew u tal-Kunsill tat-23 ta’ Settembru 2024 dwar ir-regoli finanzjarji applikabbli għall-baġit ġenerali tal-Unjoni (riformulazzjoni), ĠU L, 2024/2509, 26.9.2024, ELI: http://data.europa.eu/eli/reg/2024/2509/oj.

(18)    ĠU L 153, 3.5.2021, p. 48.

(19)    ĠU L 433 I, 22.12.2020, p. 28

(20)    Ir-Regolament tal-Kunsill (UE, Euratom) Nru 2020/2093 tas-17 ta’ Diċembru 2020 li jistabbilixxi l-qafas finanzjarju pluriennali għas-snin 2021 sa 2027 (ĠU L 433 I, 22.12.2020, p. 11).

(21)    ĠU L, 2024/765, 29.2.2024, ELI: http://data.europa.eu/eli/reg/2024/765/oj.

(22)    COM (2026) 10

(23) *    Id-data għandha tiddaħħal mill-Parlament qabel il-pubblikazzjoni fil-ĠU.