Il-Kummissjoni Ewropea tinforma lill-operaturi tal-Unjoni Ewropea li hemm dubji raġonevoli dwar l-applikazzjoni xierqa tat-trattament preferenzjali u dwar l-applikabbiltà tad-dikjarazzjoni tal-oriġini ppreżentata fl-Unjoni Ewropea għall-prodotti tal-ħut tal-Kapitolu 03 u l-intestatura 1604 tas-SA importati mis-Senegal lejn l-UE skont l-Iskema Ġenerali tal-UE ta’ Preferenzi (SĠP).

Wara żjara ta’ monitoraġġ tal-Kummissjoni Ewropea li saret bejn l-5 u d-9 ta’ Diċembru 2022 fis-Senegal u sensiela ta’ inkjesti biex jinkisbu aċċertamenti, l-awtoritajiet Senegaliżi ma rnexxilhomx juru b’mod sodisfaċenti li l-prodotti tal-ħut jissodisfaw ir-regoli tas-SĠP tal-UE meta jiġu esportati lejn l-UE b’dikjarazzjoni dwar l-oriġini.

Mingħajr informazzjoni dwar il-miżuri meħuda mill-awtoritajiet kompetenti Senegaliżi biex jiżguraw li l-esportazzjonijiet tal-prodotti tal-ħut jikkonformaw mar-regoli tal-oriġini biex jibbenefikaw mill-preferenzi tariffarji tas-SĠP, il-Kummissjoni Ewropea ma tistax tiġi assigurata dwar l-oriġini Senegaliża tal-prodotti importati, speċjalment il-prodotti tas-sajd.

Għalhekk, l-operaturi tal-Unjoni Ewropea li jiddikjaraw u/jew jippreżentaw evidenza dokumentarja tal-oriġini għall-prodotti msemmija hawn fuq, huma rrakkomandati li jieħdu l-prekawzjonijiet kollha meħtieġa, peress li r-rilaxx tal-oġġetti inkwistjoni għaċ-ċirkolazzjoni libera jista’ jkun soġġett għal tariffi MFN u jagħti lok għal dejn doganali.