L-għanijiet tal-Ftehim attwali huma (i) li tinkiseb uniformità fil-leġiżlazzjoni nazzjonali u internazzjonali fir-rigward tal-karatteristiċi fiżikokimiċi u organolettiċi taż-żjut taż-żebbuġa, taż-żjut mir-residwi taż-żebbuġ u taż-żebbuġ tal-mejda sabiex jiġi evitat kwalunkwe ostaklu għall-kummerċ (ii) li jitwettqu attivitajiet fil-qasam tal-ittestjar fiżikokimiku u organolettiku sabiex jiżdied l-għarfien dwar il-karatteristiċi tal-kompożizzjoni u tal-kwalità tal-prodotti taż-żebbuġ, bl-għan li jiġu kkonsolidati l-istandards internazzjonali, u (iii) li jissaħħaħ ir-rwol tal-IOC bħala forum ta’ eċċellenza għall-komunità xjentifika internazzjonali fil-qasam taż-żebbuġ u taż-żejt taż-żebbuġa.

L-Unjoni Ewropea hija parti għall-Ftehim 1 .

Il-Kunsill tal-Membri tal-Kunsill Internazzjonali taż-Żebbuġ (“il-Kunsill tal-Membri”) huwa l-ogħla awtorità u korp tat-teħid tad-deċiżjonijiet tal-IOC u għandu jeżerċita s-setgħat u l-funzjonijiet kollha li huma meħtieġa biex jintlaħqu l-objettivi ta’ dan il-Ftehim. Bħala Parti għall-Ftehim, l-Unjoni Ewropea hija membru tal-IOC u hija rappreżentata fil-Kunsill tal-Membri. Skont l-Artikolu 19(2) tal-Ftehim, il-Kunsill tal-Membri jista’ jieħu deċiżjonijiet li jemendaw il-Ftehim. F’konformità mal-Artikolu 10(3) tal-Ftehim, id-deċiżjonijet tal-Kunsill tal-Membri dwar kwalunkwe emenda possibbli tal-Ftehim għandhom jittieħdu b’kunsens.

Matul il-120 laqgħa tiegħu, fl-20 ta’ Novembru 2024, il-Kunsill tal-Membri ddeċieda li joħloq grupp ta’ ħidma biex jiddiskuti dwar emendi possibbli tal-Ftehim. Din il-proposta kienet oriġinarjament ippreżentata mill-Iran u t-Tuneżija u kienet tikkonċerna bidliet potenzjali fl-Artikoli 11 u 32 tal-Ftehim. Wara konsultazzjoni mal-Grupp ta’ Ħidma dwar Prodotti Bażiċi (PROBA), id-delegazzjoni tal-Unjoni Ewropea proponiet li jiġu inklużi f’din id-diskussjoni elementi oħra għar-rieżami, relatati mal-Artikoli 1, 2, 7, 16 u 17 tal-Ftehim.

L-Artikolu 1 tal-Ftehim jirreferi għall-objettivi ġenerali tiegħu, fir-rigward tal-istandardizzazzjoni u r-riċerka, fir-rigward tat-tkabbir taż-żebbuġ u l-kooperazzjoni teknika u fir-rigward tal-promozzjoni tal-prodotti taż-żebbuġ, it-tixrid tal-informazzjoni u l-ekonomija taż-żebbuġ.

L-Artikolu 2 tal-Ftehim jinkludi d-definizzjonijiet għall-finijiet tal-Ftehim.

L-Artikolu 7 tal-Ftehim jiddefinixxi s-setgħat u l-funzjonijiet tal-korpi differenti fl-IOC, b’mod partikolari għall-Kunsill tal-Membri u s-Segretarjat Eżekuttiv tal-IOC.

L-Artikolu 11 tal-Ftehim jirreferi għall-ishma ta’ parteċipazzjoni fl-IOC, u l-metodu ta’ kalkolu tiegħu, li jiddetermina wkoll il-kontribuzzjoni ta’ Membru.

L-Artikolu 16 jirreferi għall-ħlas tal-kontribuzzjonijiet, is-sospensjoni tad-drittijiet tal-vot, l-esklużjoni mill-Ftehim u l-iskedar mill-ġdid tal-obbligi finanzjarji.

L-Artikolu 17 jirreferi għall-kontrolli finanzjarji tal-IOC.

L-Artikolu 32 tal-Ftehim jistabbilixxi l-proċess ta’ emendar permezz tal-Kunsill tal-Membri, inkluża n-notifika tal-aċċettazzjoni lid-depożitarju tal-Ftehim mill-membri kollha qabel ma jidħol fis-seħħ.

Huwa fl-interess tal-Unjoni li tirriforma l-IOC biex dan ikompli jiġi allinjat mal-prattiki li l-Unjoni trawwem f’korpi internazzjonali tal-prodotti bażiċi oħra, kif ukoll mal-iżviluppi fis-suq dinji taż-żejt taż-żebbuġa. Din ir-riforma għandha mill-anqas twassal għal sistema ta’ skedar imtejba fir-rigward tal-kontribuzzjonijiet finanzjarji tal-Membri, kif ukoll għal proċedura ta’ ratifika aktar sempliċi għall-emendi tal-Ftehim. Ir-riforma għandha taġġorna wkoll l-objettivi tal-IOC f’konformità mar-realtajiet tas-settur taż-żebbuġ. Huwa previst ukoll titjib minuri ulterjuri tal-Ftehim.

Id-deċiżjoni proposta tippermetti lill-Kummissjoni tiftaħ negozjati dwar l-emendar tal-Ftehim u tinvolvi ruħha ma’ membri oħra f’każ li jkollhom imexxu l-proposti ta’ riforma.

3.1.1.    Prinċipji

L-Artikolu 218(3) tat-Trattat dwar il-Funzjonament tal-Unjoni Ewropea (TFUE) jipprevedi l-awtorizzazzjoni tal-ftuħ tan-negozjati u, skont is-suġġett tal-ftehim previst, in-nomina tan-negozjatur tal-Unjoni jew tal-kap tat-tim tan-negozjati tal-Unjoni.

L-Artikolu 218(4) tat-TFUE jipprevedi li l-Kunsill għandu jindirizza direttivi lin-negozjatur u jaħtar kumitat speċjali, u li n-negozjati jridu jsiru f’konsultazzjoni ma’ dan il-kumitat.

3.1.2.    Applikazzjoni għal dan il-każ

Billi l-għan ta’ din ir-rakkomandazzjoni huwa għal Deċiżjoni tal-Kunsill li tawtorizza l-ftuħ tan-negozjati fil-Kunsill tal-Membri tal-Kunsill Internazzjonali taż-Żebbuġ, il-bażi legali proċedurali għad-deċiżjoni proposta hija l-Artikolu 218(3) u 218(4) tat-TFUE. Il-bażi legali sostantiva hija l-Artikolu 207(4) tat-TFUE, fid-dawl tal-kamp ta’ applikazzjoni orizzontali tal-emendi proposti tal-ftehim li jikkonċerna l-istandardizzazzjoni fir-rigward tat-tkabbir taż-żebbuġ u l-kooperazzjoni teknika u fir-rigward tal-promozzjoni tal-prodotti taż-żebbuġ, it-tixrid tal-informazzjoni u l-ekonomija taż-żebbuġ, u li ġie ffirmat u konkluż fuq dik il-bażi.

L-Artikolu 218(3) tat-TFUE jipprevedi li l-Kummissjoni jew ir-Rappreżentant Għoli tal-Unjoni għall-Affarijiet Barranin u l-Politika ta’ Sigurtà għandhom jippreżentaw rakkomandazzjonijiet lill-Kunsill, li għandu jadotta deċiżjoni li tawtorizza l-ftuħ ta’ negozjati. Fid-dawl tas-suġġett tal-ftehim previst, hija l-Kummissjoni li għandha tippreżenta rakkomandazzjoni għal dak l-għan.

Billi l-ftehim previst ikopri esklużivament kwistjonijiet oħra għajr il-Politika Estera u ta’ Sigurtà Komuni, il-Kummissjoni għandha tinħatar bħala n-negozjatur skont l-Artikolu 218(3) tat-TFUE.