IL-KUMMISSJONI EWROPEA
Brussell, 17.6.2025
COM(2025) 328 final
2025/0178(NLE)
Proposta għal
DEĊIŻJONI TAL-KUNSILL
dwar il-pożizzjoni li għandha tittieħed f’isem l-Unjoni Ewropea fil-Kumitat ta’ Assoċjazzjoni fil-Konfigurazzjoni tal-kummerċ stabbilit mill-Ftehim ta’ Assoċjazzjoni bejn l-Unjoni Ewropea u l-Komunità Ewropea tal-Enerġija Atomika u l-Istati Membri tagħhom, minn naħa waħda, u l-Ukrajna, min-naħa l-oħra, rigward l-għoti reċiproku tat-trattament tas-suq intern mill-Unjoni Ewropea u mill-Ukrajna fir-rigward tas-settur tar-roaming f’networks pubbliċi tal-komunikazzjoni mobbli
MEMORANDUM TA’ SPJEGAZZJONI
1.Suġġett tal-proposta
Din il-proposta tikkonċerna d-deċiżjoni tal-Kunsill li tistabbilixxi l-pożizzjoni li għandha tittieħed f’isem l-Unjoni Ewropea fil-Kumitat ta’ Assoċjazzjoni fil-konfigurazzjoni tal-Kummerċ (il-“Kumitat għall-Kummerċ”) b’rabta mal-adozzjoni prevista ta’ deċiżjoni li tagħti trattament reċiproku tas-suq intern fir-rigward tas-settur tar-roaming fuq networks pubbliċi tal-komunikazzjoni mobbli. Din il-proposta hija skont l-Artikolu 4(3) tal-Anness XVII (Approssimazzjoni regolatorja) tal-Ftehim ta’ Assoċjazzjoni bejn l-Unjoni Ewropea u l-Komunità Ewropea tal-Enerġija Atomika u l-Istati Membri tagħhom, minn naħa waħda, u l-Ukrajna, min-naħa l-oħra (il-“Ftehim”).
Abbażi tal-monitoraġġ u l-valutazzjoni formali mill-Unjoni, f’konformità mal-Appendiċi XVII-6 tal-Anness XVII tal-Ftehim, u l-valutazzjoni li l-Unjoni lestiet għall-fini tal-Artikolu 4(2) tal-Anness XVII tal-Ftehim, kif ippreżentata mill-Kummissjoni u approvata mill-Kunsill, l-att propost għandu l-għan li jinkludi lill-Ukrajna fis-suq intern tal-Unjoni fir-rigward tas-settur tar-roaming f’networks pubbliċi tal-komunikazzjoni mobbli. L-att propost se jippermetti lill-utenti finali tas-servizzi biex jibbenefikaw, bla riżerva għal ċerti limitazzjonijiet eċċezzjonali, minn servizzi tar-roaming irregolati bil-prezzijiet bl-imnut domestiċi tagħhom.
2.Kuntest tal-proposta
2.1.Il-Ftehim ta’ Assoċjazzjoni
Il-Ftehim għandu l-għan li: (i) joħloq il-kundizzjonijiet għal relazzjonijiet ekonomiċi u kummerċjali msaħħa li jwasslu għall-integrazzjoni gradwali tal-Ukrajna fis-suq intern tal-Unjoni, inkluż billi tiġi stabbilita Żona ta’ Kummerċ Ħieles Approfondita u Komprensiva, kif stipulat fit-Titolu IV (Kummerċ u Kwistjonijiet relatati mal-Kummerċ) tal-Ftehim; u (ii) jappoġġa l-isforzi tal-Ukrajna biex tlesti t-tranżizzjoni lejn ekonomija tas-suq li tiffunzjona permezz, fost affarijiet oħra, tal-approssimazzjoni progressiva tal-leġiżlazzjoni tagħha ma’ dik tal-Unjoni. Il-Ftehim daħal fis-seħħ fl-1 ta’ Settembru 2017. Minn dakinhar ’l hawn, l-Ukrajna talbet aktar integrazzjoni fir-rigward tar-roaming f’networks pubbliċi tal-komunikazzjoni mobbli fl-Unjoni, b’mod partikolari permezz ta’ trattament tas-suq intern għall-fini ta’ tali roaming. L-għoti ta’ trattament tas-suq intern jirrikjedi l-approssimazzjoni mal-acquis tal-Unjoni dwar ir-roaming u l-promulgazzjoni sħiħa u l-implimentazzjoni sħiħa tiegħu fil-liġi tal-Ukrajna. L-Unjoni vvalutat li dawn il-kundizzjonijiet huma ssodisfati u għandha, abbażi ta’ dan, tinforma lill-Kumitat għall-Kummerċ u tipproponi li l-Kumitat għall-Kummerċ jiddeċiedi li l-Partijiet jagħtu lil xulxin trattament tas-suq intern fir-rigward tas-settur tar-roaming f’networks pubbliċi tal-komunikazzjoni mobbli.
2.2.Il-Kumitat ta’ Assoċjazzjoni fil-Konfigurazzjoni tal-kummerċ
Skont l-Artikolu 465(4) tal-Ftehim, il-kwistjonijiet kollha relatati mat-Titolu IV (Kummerċ u Kwistjonijiet relatati mal-Kummerċ) tal-Ftehim għandhom jiġu indirizzati fil-Kumitat għall-Kummerċ. F’konformità mal-Artikolu 4(3) tal-Anness XVII tal-Ftehim, dak il-Kumitat jista’ jiddeċiedi li l-Partijiet jagħtu lil xulxin trattament tas-suq intern fis-settur tas-servizzi li huwa milqut mill-approssimazzjoni regolatorja. Skont l-Artikolu 465(3) tal-Ftehim, dawn id-deċiżjonijiet għandhom ikunu vinkolanti għall-Partijiet, li għandhom jieħdu l-miżuri xierqa biex jimplimentawhom. Il-Kumitat għall-Kummerċ għandu jadotta d-deċiżjonijiet tiegħu bi ftehim bejn il-Partijiet.
2.3.L-att previst tal-Kumitat ta’ Assoċjazzjoni fil-Konfigurazzjoni tal-kummerċ
Il-Kumitat għall-Kummerċ għandu jadotta deċiżjoni biex jagħti trattament reċiproku tas-suq intern fir-rigward tas-settur tar-roaming f’networks pubbliċi tal-komunikazzjoni mobbli (“l-att previst”).
L-iskop tal-att previst huwa li l-Partijiet għall-Ftehim jagħtu lil xulxin trattament tas-suq intern kif stabbilit fl-Artikolu 4(3) sa (7) tal-Anness XVII tal-Ftehim.
Dan jikkonforma mal-objettiv tal-approssimazzjoni regolatorja gradwali tal-Ukrajna mal-acquis tal-Unjoni kif stabbilit fil-preambolu tal-Ftehim u fl-Artikolu 124 tal-Ftehim, li jikkonċerna speċifikament l-approssimazzjoni regolatorja fil-komunikazzjonijiet elettroniċi.
L-att previst se jsir vinkolanti għall-Partijiet f’konformità mal-Artikolu 465(3) tal-Ftehim, li jipprevedi li: “Il-Kumitat ta’ Assoċjazzjoni għandu jkollu s-setgħa li jadotta deċiżjonijiet fil-każijiet previsti f’dan il-Ftehim u f’oqsma li fihom il-Kunsill ta’ Assoċjazzjoni ddelega s-setgħat lilu. Id-deċiżjonijiet huma vinkolanti għall-Partijiet, li jieħdu l-miżuri xierqa biex iwettquhom. Il-Kumitat ta’ Assoċjazzjoni għandu jadotta d-deċiżjonijiet tiegħu bi ftehim bejn il-Partijiet”.
Mid-data ddeterminata bl-att previst, l-acquis tal-Unjoni dwar ir-roaming, kif speċifikat fl-Anness XVII Appendiċi XVII-3 tal-Ftehim, għandu jinqara f’konformità mal-Anness XVII Appendiċi XVII-1 il-punti 1 sa 6 tal-Ftehim, sakemm ma jkunx previst mod ieħor fl-Anness XVII Appendiċi XVII-3 tal-Ftehim.
3.Pożizzjoni li għandha tittieħed f’isem l-Unjoni
Il-pożizzjoni li għandha tiġi adottata f’isem l-Unjoni hija li tappoġġa l-adozzjoni tal-att previst mill-Kumitat għall-Kummerċ.
L-Anness XVII tal-Ftehim jipprevedi approssimazzjoni regolatorja bejn il-Partijiet f’diversi setturi, inklużi s-servizzi ta’ telekomunikazzjoni. Ladarba tiġi ssodisfata l-approssimazzjoni gradwalment estiża lill-elementi kollha tal-acquis tal-Unjoni msemmija fl-Anness XVII Appendiċi XVII-3 tal-Ftehim, l-approssimazzjoni tista’ twassal għall-integrazzjoni gradwali tal-Ukrajna fis-suq intern tal-Unjoni, permezz tal-għoti reċiproku ta’ trattament tas-suq intern f’konformità mal-Artikolu 4(3) tal-Anness XVII tal-Ftehim. L-Ukrajna talbet aktar integrazzjoni fil-qasam tar-roaming. Id-Deċiżjoni Nru 1/2023 tal-Kumitat ta’ Assoċjazzjoni UE-Ukrajna fil-Konfigurazzjoni tal-Kummerċ ikkomplementat l-Anness XVII Appendiċi XVII-3 tal-Ftehim bl-atti rilevanti relatati mar-roaming. Fis-7 ta’ Novembru 2024, l-Ukrajna nnotifikat lill-Unjoni li hija tqis li ġew issodisfati l-kundizzjonijiet għall-promulgazzjoni u l-implimentazzjoni tal-acquis tal-Unjoni għar-roaming u talbet valutazzjoni komprensiva. Id-Deċiżjoni Nru 1/2025 tal-Kumitat ta’ Assoċjazzjoni UE-Ukrajna fil-konfigurazzjoni tal-Kummerċ introduċiet adattamenti speċifiċi addizzjonali għall-Parti A tal-Appendiċi XVII-3 tal-Anness XVII tal-Ftehim. Fis-6 ta’ Ġunju 2025, l-Ukrajna ssupplimentat in-notifika inizjali tagħha wara li ffirmat fil-liġi l-aħħar miżura ta’ traspożizzjoni li kien fadal.
Skont l-Artikolu 4(2) tal-Anness XVII tal-Ftehim, l-Unjoni wettqet valutazzjoni komprensiva u ddeterminat fuq il-bażi tagħha li l-Ukrajna tissodisfa l-kundizzjonijiet għall-promulgazzjoni u l-implimentazzjoni tal-acquis tal-Unjoni fis-settur tar-roaming f’networks pubbliċi tal-komunikazzjoni mobbli. Skont l-Anness XVII l-Artikolu 4(3) tal-Ftehim, l-Unjoni infurmat lill-Kumitat għall-Kummerċ dwar ir-riżultat pożittiv tal-valutazzjoni komprensiva tagħha.
Abbażi ta’ dan, l-Unjoni għandha tipproponi li l-Kumitat għall-Kummerċ jiddeċiedi li l-Partijiet jagħtu lil xulxin trattament tas-suq intern fir-rigward tas-settur tar-roaming f’networks pubbliċi tal-komunikazzjoni mobbli, skont l-Artikolu 4(3) tal-Anness XVII tal-Ftehim.
Din id-deċiżjoni timplimenta l-politika kummerċjali komuni tal-Unjoni fir-rigward ta’ Sieħeb tal-Lvant u pajjiż kandidat, abbażi tad-dispożizzjonijiet tal-Ftehim. Hija konsistenti mal-objettiv tal-approssimazzjoni regolatorja gradwali tal-Ukrajna mal-acquis tal-Unjoni kif stabbilit fil-preambolu tal-Ftehim.
4.Bażi legali
4.1.Bażi legali proċedurali
4.1.1.Prinċipji
L-Artikolu 218(9) tat-Trattat dwar il-Funzjonament tal-Unjoni Ewropea (TFUE) jipprevedi deċiżjonijiet li jistabbilixxu “l-pożizzjonijiet li għandhom jiġu adottati f’isem l-Unjoni f’sede stabbilita fi ftehim, meta dik is-sede tintalab tadotta atti li jkollhom effetti legali, sakemm dawn ma jkunux atti li jissupplimentaw jew jemendaw il-qafas istituzzjonali tal-ftehim.”
Il-kunċett ta’ “atti li jkollhom effetti legali” jinkludi atti li għandhom effetti legali bis-saħħa tar-regoli tad-dritt internazzjonali li jirregolaw il-korp inkwistjoni. Dan jinkludi wkoll l-istrumenti li ma għandhomx effett vinkolanti skont id-dritt internazzjonali, iżda li “jistgħu jinfluwenzaw b’mod determinanti l-kontenut tal-leġiżlazzjoni adottata mil-leġiżlatura tal-UE”.
4.1.2.Applikazzjoni għal dan il-każ
Il-Kumitat għall-Kummerċ huwa korp stabbilit permezz tal-Ftehim. Id-deċiżjoni li jadotta l-Kumitat għall-Kummerċ tikkostitwixxi att li jkollu effetti legali. L-att previst ikun vinkolanti skont id-dritt internazzjonali f’konformità mal-Artikolu 465(3) tal-Ftehim. Mid-data ddeterminata mill-Partijiet fl-att previst, l-acquis tal-Unjoni dwar ir-roaming speċifikat fl-Anness XVII Appendiċi XVII-3 tal-Ftehim, irid jiġi applikat fl-Unjoni f’konformità mal-Anness XVII Appendiċi XVII-1 il-punti 1 sa 6 tal-Ftehim, sakemm ma jkunx previst mod ieħor fl-Anness XVII Appendiċi XVII-3 tal-Ftehim. L-att previst ma jissupplimentax jew jemendax il-qafas istituzzjonali tal-Ftehim. Għalhekk, il-bażi legali proċedurali għad-deċiżjoni proposta tal-Kunsill hija l-Artikolu 218(9) tat-TFUE.
4.2.Bażi legali sostantiva
4.2.1.Prinċipji
Il-bażi legali sostantiva biex tittieħed deċiżjoni skont l-Artikolu 218(9) tat-TFUE tiddependi primarjament mill-objettiv u l-kontenut tal-att previst li dwaru tittieħed pożizzjoni f’isem l-Unjoni. Jekk l-att previst ikollu żewġ għanijiet jew żewġ komponenti, u jekk wieħed minn dawk l-għanijiet jew komponenti jkun jista’ jiġi identifikat bħala dak ewlieni, filwaqt li l-ieħor ikun sempliċiment inċidentali, id-deċiżjoni skont l-Artikolu 218(9) tat-TFUE trid tissejjes fuq bażi legali sostantiva unika, jiġifieri dik meħtieġa mill-għan jew mill-komponent ewlieni jew predominanti.
4.2.2.Applikazzjoni għal dan il-każ
L-Artikolu 207 TFUE huwa l-bażi legali għall-politika kummerċjali komuni tal-Unjoni. B’mod partikolari, l-ewwel subparagrafu tal-Artikolu 207(4) TFUE jipprevedi l-bażi legali għall-kummerċ fis-servizzi, bl-eċċezzjoni tas-servizzi tat-trasport, fir-rigward ta’ pajjiżi mhux tal-UE, inklużi stipulazzjonijiet dwar il-kundizzjonijiet tal-qafas regolatorju għall-provvista ta’ tali servizzi.
L-objettiv u l-kontenut ewlenin tal-att previst huma relatati mal-politika kummerċjali komuni tal-Unjoni minħabba li l-att jikkonċerna l-kummerċ fis-servizzi ta’ telekomunikazzjoni mal-Ukrajna. Għalhekk, il-bażi legali sostantiva għad-deċiżjoni tal-Kunsill proposta hija l-Artikolu 207 TFUE.
4.3.Konklużjoni
Il-bażi legali tad-Deċiżjoni proposta tal-Kunsill għandha tkun l-Artikolu 207 TFUE flimkien mal-Artikolu 218(9) TFUE.
5.Pubblikazzjoni tal-att previst
Id-deċiżjoni tal-Kumitat għall-Kummerċ dwar l-għoti reċiproku tat-trattament tas-suq intern fir-rigward tas-settur tar-roaming f’networks pubbliċi tal-komunikazzjoni mobbli se tipproduċi drittijiet u obbligi fl-Unjoni u fl-Ukrajna. Għaldaqstant, huwa xieraq li tiġi ppubblikata f’Il-Ġurnal Uffiċjali tal-Unjoni Ewropea wara l-adozzjoni tagħha.
2025/0178 (NLE)
Proposta għal
DEĊIŻJONI TAL-KUNSILL
dwar il-pożizzjoni li għandha tittieħed f’isem l-Unjoni Ewropea fil-Kumitat ta’ Assoċjazzjoni fil-Konfigurazzjoni tal-kummerċ stabbilit mill-Ftehim ta’ Assoċjazzjoni bejn l-Unjoni Ewropea u l-Komunità Ewropea tal-Enerġija Atomika u l-Istati Membri tagħhom, minn naħa waħda, u l-Ukrajna, min-naħa l-oħra, rigward l-għoti reċiproku tat-trattament tas-suq intern mill-Unjoni Ewropea u mill-Ukrajna fir-rigward tas-settur tar-roaming f’networks pubbliċi tal-komunikazzjoni mobbli
IL-KUNSILL TAL-UNJONI EWROPEA,
Wara li kkunsidra t-Trattat dwar il-Funzjonament tal-Unjoni Ewropea, u b’mod partikolari l-Artikolu 207(4), l-ewwel subparagrafu, flimkien mal-Artikolu 218(9) tiegħu,
Wara li kkunsidra l-proposta tal-Kummissjoni Ewropea,
Billi:
(1)Il-Ftehim ta’ Assoċjazzjoni bejn l-Unjoni Ewropea u l-Komunità Ewropea tal-Enerġija Atomika u l-Istati Membri tagħhom, minn naħa waħda, u l-Ukrajna, min-naħa l-oħra (il-“Ftehim”) daħal fis-seħħ fl-1 ta’ Settembru 2017.
(2)Skont l-Artikolu 4(3) tal-Anness XVII tal-Ftehim, il-Kumitat ta’ Assoċjazzjoni fil-Konfigurazzjoni tal-kummerċ (il-“Kumitat għall-Kummerċ”) jista’ jiddeċiedi li l-Partijiet jagħtu lil xulxin trattament tas-suq intern fir-rigward tas-setturi tas-servizzi milqutin b’approssimazzjoni regolatorja.
(3)Matul l-2025, il-Kumitat għall-Kummerċ jenħtieġ li jadotta abbozz ta’ Deċiżjoni dwar l-Unjoni Ewropea u l-Ukrajna li tagħti lil xulxin trattament tas-suq intern fir-rigward tas-settur tar-roaming f’networks pubbliċi tal-komunikazzjoni mobbli.
(4)Kif iddikjarat fil-preambolu tal-Ftehim u f’konformità mal-Artikolu 124 tal-Ftehim, il-Partijiet għall-Ftehim jirrikonoxxu l-importanza tal-approssimazzjoni tal-leġiżlazzjoni eżistenti tal-Ukrajna ma’ dik tal-Unjoni Ewropea, li jfisser li l-Ukrajna għandha tiżgura li l-leġiżlazzjoni eżistenti u l-leġiżlazzjoni futura jenħtieġ li gradwalment isiru kompatibbli mal-acquis tal-Unjoni.
(5)L-Ukrajna talbet aktar integrazzjoni fir-rigward tas-settur tar-roaming fl-Unjoni, b’mod partikolari billi tibbenefika mit-trattament tas-suq intern għall-fini tas-servizzi tar-roaming.
(6)Id-Deċiżjoni Nru 1/2023 tal-Kumitat ta’ Assoċjazzjoni UE-Ukrajna fil-Konfigurazzjoni tal-Kummerċ ikkomplementat l-Anness XVII Appendiċi XVII-3 tal-Ftehim (Regoli applikabbli għas-servizzi ta’ telekomunikazzjoni) bl-atti rilevanti tal-Unjoni relatati mar-roaming f’networks pubbliċi tal-komunikazzjoni mobbli.
(7)Skont l-Artikolu 4(2) tal-Anness XVII tal-Ftehim, fis-7 ta’ Novembru 2024, l-Ukrajna nnotifikat lill-Unjoni li qieset li ġew issodisfati l-kundizzjonijiet għall-promulgazzjoni u l-implimentazzjoni tal-acquis tal-Unjoni fis-settur tar-roaming f’networks pubbliċi tal-komunikazzjoni mobbli u talbet lill-Unjoni biex twettaq valutazzjoni komprensiva.
(8)Fis-6 ta’ Ġunju 2025, l-Ukrajna ssupplimentat in-notifika inizjali tagħha wara li ffirmat fil-liġi l-aħħar miżura ta’ traspożizzjoni li kien fadal.
(9)Id-Deċiżjoni Nru 1/2025 tal-Kumitat ta’ Assoċjazzjoni UE-Ukrajna fil-konfigurazzjoni tal-Kummerċ introduċiet ċerti adattamenti speċifiċi addizzjonali għall-Parti A tal-Appendiċi XVII-3 tal-Anness XVII tal-Ftehim.
(10)Skont l-Artikolu 4(2) tal-Anness XVII tal-Ftehim, l-Unjoni wettqet valutazzjoni komprensiva u ddeterminat fuq il-bażi tagħha li l-Ukrajna tissodisfa l-kundizzjonijiet għall-promulgazzjoni u l-implimentazzjoni tal-acquis tal-Unjoni fis-settur tar-roaming f’networks pubbliċi tal-komunikazzjoni mobbli.
(11)Skont l-Anness XVII l-Artikolu 4(3) tal-Ftehim, l-Unjoni infurmat lill-Kumitat għall-Kummerċ dwar ir-riżultat pożittiv tal-valutazzjoni komprensiva tagħha.
(12)F’dan l-isfond, f’konformità mal-Artikolu 4(3) tal-Anness XVII tal-Ftehim, l-Unjoni u l-Ukrajna jenħtieġ li jagħtu lil xulxin trattament tas-suq intern fir-rigward tas-settur tar-roaming f’networks pubbliċi tal-komunikazzjoni mobbli.
(13)Għalhekk huwa xieraq li tiġi stabbilita l-pożizzjoni li għandha tittieħed f’isem l-Unjoni fil-Kumitat għall-Kummerċ peress li d-Deċiżjoni dwar l-Unjoni Ewropea u l-Ukrajna u l-għoti reċiproku ta’ trattament tas-suq intern fir-rigward tas-settur tar-roaming f’networks pubbliċi tal-komunikazzjoni mobbli se tkun vinkolanti fuq l-Unjoni,
ADOTTA DIN ID-DEĊIŻJONI:
Artikolu 1
Il-pożizzjoni li għandha tittieħed f’isem l-Unjoni matul is-sena 2025 fil-Kumitat ta’ Assoċjazzjoni fil-konfigurazzjoni tal-Kummerċ (il-“Kumitat għall-Kummerċ”) stabbilit bil-Ftehim ta’ Assoċjazzjoni bejn l-Unjoni Ewropea u l-Komunità Ewropea tal-Enerġija Atomika u l-Istati Membri tagħhom, minn naħa waħda, u l-Ukrajna, min-naħa l-oħra, fir-rigward tal-għoti reċiproku ta’ trattament tas-suq intern fir-rigward tas-settur tar-roaming f’networks pubbliċi tal-komunikazzjoni mobbli għandha tkun ibbażata fuq l-abbozz ta’ Deċiżjoni ta’ dak il-Kumitat mehmuż ma’ din id-Deċiżjoni.
Artikolu 2
Din id-Deċiżjoni għandha tidħol fis-seħħ fid-data tal-adozzjoni tagħha.
Magħmul fi Brussell,
Għall-Kunsill
Il-President
