This document is an excerpt from the EUR-Lex website
Document 52025DC0032
REPORT FROM THE COMMISSION TO THE EUROPEAN PARLIAMENT AND THE COUNCIL on the delegation of the power to adopt delegated acts conferred on the Commission pursuant to Regulation (EU) 2020/1056 of the European Parliament and of the Council on electronic freight transport information
RAPPORT TAL-KUMMISSJONI LILL-PARLAMENT EWROPEW U LILL-KUNSILL dwar id-delega tas-setgħat biex jiġu adottati atti delegati mogħtija lill-Kummissjoni skont ir-Regolament (UE) 2020/1056 tal-Parlament Ewropew u tal-Kunsill dwar l-informazzjoni elettronika dwar it-trasport tal-merkanzija
RAPPORT TAL-KUMMISSJONI LILL-PARLAMENT EWROPEW U LILL-KUNSILL dwar id-delega tas-setgħat biex jiġu adottati atti delegati mogħtija lill-Kummissjoni skont ir-Regolament (UE) 2020/1056 tal-Parlament Ewropew u tal-Kunsill dwar l-informazzjoni elettronika dwar it-trasport tal-merkanzija
COM/2025/32 final
IL-KUMMISSJONI EWROPEA
Brussell, 5.2.2025
COM(2025) 32 final
RAPPORT TAL-KUMMISSJONI LILL-PARLAMENT EWROPEW U LILL-KUNSILL
dwar id-delega tas-setgħat biex jiġu adottati atti delegati mogħtija lill-Kummissjoni skont ir-Regolament (UE) 2020/1056 tal-Parlament Ewropew u tal-Kunsill dwar l-informazzjoni elettronika dwar it-trasport tal-merkanzija
1.Introduzzjoni
Ir-Regolament (UE) 2020/1056 dwar l-informazzjoni elettronika dwar it-trasport tal-merkanzija 1 (ir-“Regolament dwar l-eFTI”) jistabbilixxi qafas legali biex l-operaturi ekonomiċi jkunu jistgħu jikkondividu informazzjoni mal-awtoritajiet tal-infurzar f’format elettroniku dwar it-trasport fl-UE tal-merkanzija bit-triq, bil-ferrovija, bil-passaġġi fuq l-ilma interni u bl-ajru.
L-għan tar-Regolament dwar l-eFTI hu li jħeġġeġ id-diġitalizzazzjoni tat-trasport u tal-loġistika tal-merkanzija, sabiex jitnaqqsu l-kostijiet amministrattivi, jittejbu l-kapaċitajiet tal-infurzar tal-awtoritajiet kompetenti u t-trasport isir aktar effiċjenti u sostenibbli. Ir-Regolament dwar l-eFTI daħal fis-seħħ fl-20 ta’ Awwissu 2020. Filwaqt li l-biċċa l-kbira tad-dispożizzjonijiet bdew japplikaw mid-data tad-dħul fis-seħħ tagħhom 2 jew mill-21 ta’ Awwissu 2024 3 , ir-rekwiżit għall-awtoritajiet tal-Istati Membri li jaċċettaw l-informazzjoni ppreżentata għall-kontroll b’mod elettroniku se jibda japplika biss mid-9 ta’ Lulju 2027 4 .
Il-pedamenti tar-Regolament dwar l-eFTI huma l-armonizzazzjoni tad-definizzjonijiet u tal-formati tad-data, u l-miżuri biex jittejbu l-flussi tad-data għal aktar effiċjenza. Għal dan il-għan, l-Artikoli 2(3), 7, 12(5) u 13(3) tar-Regolament jagħtu s-setgħa lill-Kummissjoni li tadotta atti delegati. B’mod partikolari:
a)L-Artikolu 2(3) jagħti s-setgħa lill-Kummissjoni li tadotta atti delegati li jemendaw l-Anness I, li fih informazzjoni regolatorja li taqa’ fil-kamp ta’ applikazzjoni tar-Regolament dwar l-eFTI;
b)L-Artikolu 7 jagħti s-setgħa lill-Kummissjoni li tadotta atti delegati biex tissupplimenta r-Regolament dwar l-eFTI billi tistabbilixxi u temenda s-sett ta’ data komuni tal-eFTI 5 u s-sottosettijiet ta’ data tal-eFTI 6 ;
c)L-Artikolu 12(5) jagħti s-setgħa lill-Kummissjoni li tadotta atti delegati biex tissupplimenta r-Regolament dwar l-eFTI billi tistabbilixxi regoli dwar iċ-ċertifikazzjoni ta’ pjattaformi tal-eFTI 7 u dwar l-użu tal-marka ta’ ċertifikazzjoni, inklużi regoli dwar it-tiġdid, is-sospensjoni u l-irtirar taċ-ċertifikazzjoni;
d)L-Artikolu 13(3) jagħti s-setgħa lill-Kummissjoni li tadotta atti delegati biex tissupplimenta r-Regolament dwar l-eFTI billi tistabbilixxi regoli dwar iċ-ċertifikazzjoni tal-fornituri ta’ servizzi tal-eFTI 8 , inklużi regoli dwar it-tiġdid, is-sospensjoni u l-irtirar taċ-ċertifikazzjoni.
Il-Kummissjoni tingħata s-setgħa li tadotta atti delegati msemmija fl-Artikoli hawn fuq għal perjodu ta’ ħames snin mill-20 ta’ Awwissu 2020. Id-delega ta’ din is-setgħa tiġi estiża b’mod taċitu għal perjodi ta’ żmien identiċi sakemm il-Parlament Ewropew jew il-Kunsill ma jopponux tali estensjoni mhux aktar tard minn tliet xhur qabel it-tmiem ta’ kull perjodu.
F’konformità mal-Artikolu 14(2), il-Kummissjoni hija meħtieġa tfassal rapport dwar id-delega tas-setgħat mhux aktar tard minn disa’ xhur qabel jintemm il-perjodu ta’ ħames snin. Dan ir-rapport ikopri dan l-obbligu.
2.Eżerċizzju ta’ setgħat delegati
Mid-data tal-adozzjoni ta’ dan ir-rapport, il-Kummissjoni eżerċitat darbtejn is-setgħa tagħha li tadotta atti delegati skont ir-Regolament dwar l-eFTI:
·F’konformità mal-Artikolu 2(3), fil-15 ta’ Lulju 2024 adottat ir-Regolament Delegat tal-Kummissjoni (UE) 2024/2025 9 biex jemenda l-Parti B tal-Anness I tar-Regolament dwar l-eFTI, filwaqt li jinkorpora r-referenzi għar-rekwiżiti ta’ informazzjoni regolatorja fil-liġi nazzjonali nnotifikati lill-Kummissjoni mill-Istati Membri f’konformità mar-Regolament dwar l-eFTI.
·F’konformità mal-Artikolu 7, fis-26 ta’ Lulju 2024 adottat ir-Regolament Delegat tal-Kummissjoni (UE) 2024/2024 10 biex jissupplimenta r-Regolament dwar l-eFTI fir-rigward tal-istabbiliment tas-sett ta’ data komuni tal-eFTI u tas-sottosettijiet ta’ data tal-eFTI.
Il-Kummissjoni għadha ma użatx is-setgħat delegati previsti fl-Artikoli 12(5) u 13(3). Madankollu, l-atti delegati rispettivi qed jitħejjew u mistennija jiġu adottati mill-Kummissjoni fit-tieni kwart tal-2025.
Ir-Regolament Delegat li jissupplimenta r-Regolament dwar l-eFTI fir-rigward tal-istabbiliment tas-sett ta’ data komuni tal-eFTI u tas-sottosettijiet ta’ data tal-eFTI ġie adottat wara l-iskadenza tal-21 ta’ Frar 2023 stabbilita fl-Artikolu 7(3) tar-Regolament dwar l-eFTI. Dan kien prinċipalment minħabba l-kumplessità tal-attivitajiet ta’ mmappjar u ta’ mmudellar tad-data tal-għadd kbir ta’ atti legali tal-UE u nazzjonali li jaqgħu fil-kamp ta’ applikazzjoni tar-Regolament dwar l-eFTI 11 . Il-kriżi tal-COVID-19 kellha wkoll impatt fuq il-ġbir u l-konsultazzjoni tad-data, peress li dak iż-żmien l-awtoritajiet tal-Istati Membri fis-settur tat-trasport kienu involuti fil-ġestjoni tal-kriżijiet.
F’konformità mal-prinċipji stabbiliti fil-Ftehim Interistituzzjonali tat-13 ta’ April 2016 dwar it-Tfassil Aħjar tal-Liġijiet 12 , il-Kummissjoni jeħtiġilha tikkonsulta esperti maħtura minn kull Stat Membru qabel ma tadotta att delegat. Meta kienet qed tħejji ż-żewġ regolamenti delegati, il-Kummissjoni wettqet konsultazzjoni xierqa u trasparenti mal-esperti tal-Istati Membri u mal-operaturi tas-settur tan-negozju li pparteċipaw fil-Forum dwar it-Trasport u l-Loġistika Diġitali ( E03280 ), b’mod speċifiku fis-Sottogrupp 3: Atti Delegati ta’ Informazzjoni Elettronika dwar it-Trasport tal-Merkanzija (eFTI). L-esperti appoġġaw id-dispożizzjonijiet inklużi fir-regolamenti delegati 13 .
Matul il-proċess proċedurali u tat-teħid tad-deċiżjonijiet, il-Kummissjoni bagħtet id-dokumenti rilevanti kemm lill-Parlament Ewropew kif ukoll lill-Kunsill. Il-Parlament u l-Kunsill ma kellhom l-ebda oġġezzjoni għall-adozzjoni taż-żewġ regolamenti delegati.
Il-Kummissjoni tqis li s-setgħa li tadotta atti delegati msemmija fl-Artikoli 2(3), 7, 12(5) u 13(3) tar-Regolament dwar l-eFTI jenħtieġ li tinżamm fis-seħħ sakemm ir-Regolament dwar l-eFTI jibqa’ applikabbli. Dan sabiex jiġi żgurat l-aġġornament tas-sett ta’ data komuni tal-eFTI u tas-sottosettijiet ta’ data tal-eFTI, f’konformità mal-bidliet fid-dispożizzjonijiet legali tal-UE u nazzjonali fil-kamp ta’ applikazzjoni tar-Regolament u mal-iżviluppi fl-istandards rilevanti tal-UE jew internazzjonali, u biex jiġu stabbiliti u jinżammu aġġornati r-regoli dwar iċ-ċertifikazzjoni kemm tal-pjattaformi tal-eFTI kif ukoll tal-fornituri ta’ servizzi tal-eFTI 14 .
3.Konklużjoni
B’dan ir-rapport, il-Kummissjoni ssodisfat l-obbligu tagħha li tirrapporta lill-Parlament Ewropew u lill-Kunsill dwar l-użu tagħha tas-setgħat delegati skont l-Artikolu 14 tar-Regolament dwar l-eFTI.
Il-Kummissjoni eżerċitat b’mod attiv u xieraq is-setgħat delegati mogħtija lilha bir-Regolament dwar l-eFTI. Il-Kummissjoni tqis li l-estensjoni ta’ din id-delega tas-setgħat biex jiġu adottati atti delegati kienet u tibqa’ xierqa, f’konformità mal-Artikolu 14 tar-Regolament dwar l-eFTI (estensjoni taċita). Tali estensjoni se tippermetti lill-Kummissjoni tkompli tissupplimenta r-Regolament dwar l-eFTI u temenda l-Anness I tiegħu, tiżgura l-aġġornament tas-sett ta’ data komuni tal-eFTI u tas-sottosettijiet ta’ data tal-eFTI u l-adozzjoni ta’ dispożizzjonijiet għal fluss ta’ data bla xkiel u sigur fl-ambjent tal-iskambju ta’ data tal-eFTI (regoli dwar iċ-ċertifikazzjoni tal-pjattaforma tal-eFTI u tal-fornituri ta’ servizzi tal-eFTI).
Il-Kummissjoni tistieden lill-Parlament Ewropew u lill-Kunsill jieħdu nota ta’ dan ir-rapport.
ĠU L 249, 31.7.2020, p. 33.
Skont l-Artikolu 18(3) tar-Regolament dwar l-eFTI, l-Artikoli 2(2), 5(4), 7, 8, 9(2) u 10(2) japplikaw mid-data li fiha jidħol fis-seħħ ir-Regolament.
Ara l-Artikolu 18(2).
Ara l-Artikolu 5(1), din id-data ġiet ikkalkulata minn 30 xahar wara d-data tad-dħul fis-seħħ tal-ewwel atti delegati u ta’ implimentazzjoni adottati skont l-Artikoli 7 u 8 tar-Regolament. Dawn l-atti tal-aħħar daħlu fis-seħħ fid-9 ta’ Jannar 2025.
“sett ta’ data komuni tal-eFTI”: sett komprensiv ta’ elementi ta’ data strutturati li jikkorrispondu għas-sottosettijiet ta’ data kollha tal-eFTI, fejn l-elementi ta’ data komuni għas-sottosettijiet ta’ data differenti tal-eFTI jkunu inklużi darba biss.
“sottosett ta’ data tal-eFTI”: sett ta’ elementi ta’ data strutturati li jikkorrispondu għall-informazzjoni regolatorja meħtieġa skont att legali speċifiku tal-UE jew liġi nazzjonali msemmija fl-Artikolu 2(1) tar-Regolament dwar l-eFTI.
“pjattaforma tal-eFTI”: soluzzjoni bbażata fuq it-teknoloġija tal-informazzjoni u tal-komunikazzjoni (ICT), bħal sistema operattiva, ambjent operattiv jew bażi tad-data, maħsuba biex tintuża għall-ipproċessar tal-eFTI.
“fornitur ta’ servizz tal-eFTI”: persuna fiżika jew ġuridika li tipprovdi servizz tal-eFTI lill-operaturi ekonomiċi kkonċernati abbażi ta’ kuntratt.
B’kollox, 182 biċċa leġiżlazzjoni tal-UE u nazzjonali bħalissa jaqgħu fil-kamp ta’ applikazzjoni tar-Regolament, u abbażi tagħhom ġie stabbilit l-istess għadd ta’ sottosettijiet ta’ data tal-eFTI.
ĠU L 123, 12.5.2016, p. 1.
Id-dokumenti u r-rapporti tal-laqgħat rilevanti jinsabu fir- Reġistru tal-gruppi ta’ esperti tal-Kummissjoni u entitajiet oħra simili (europa.eu) .
Dawn ir-regoli għandhom kontenut tekniku. Dawn se jiġu inklużi fl-atti delegati (li bħalissa qed jitħejjew) li l-Kummissjoni għandha s-setgħa li tadotta skont l-Artikoli 12(5) u 13(3) tar-Regolament dwar l-eFTI.