“(55)

il-Kummissjoni tqis li l-aggressjoni kontra l-Ukrajna mir-Russja u l-effetti diretti u indiretti tagħha, inklużi s-sanzjonijiet imposti u l-kontromiżuri meħuda, pereżempju mir-Russja ħolqu inċertezzi ekonomiċi sinifikanti, fixklu l-flussi kummerċjali u l-ktajjen tal-provvista, u wasslu għal żidiet eċċezzjonalment kbar u mhux mistennija fil-prezzijiet, speċjalment fil-gass naturali u l-elettriku, iżda wkoll f’bosta input u materja prima u oġġetti primarji oħra. Dawn l-effetti meħuda flimkien ikkawżaw tfixkil serju tal-ekonomija fl-Istati Membri kollha. It-tfixkil fil-katina ta’ provvista u ż-żieda fl-inċertezza għandhom effetti diretti jew indiretti li jaffettwaw ħafna setturi. Barra minn hekk, il-prezzijiet tal-enerġija li qed jogħlew jaffettwaw prattikament kull attività ekonomika f’kull Stat Membru. Għaldaqstant, il-Kummissjoni tqis li firxa wiesgħa ta’ setturi ekonomiċi fl-Istati Membri kollha huma affettwati minn tfixkil ekonomiku serju. Fuq din il-bażi, il-Kummissjoni tqis li huwa xieraq li jiġu stabbiliti l-kriterji għall-valutazzjoni ta’ miżuri tal-għajnuna mill-Istat li l-Istati Membri jistgħu jieħdu biex jirrimedjaw dan it-tfixkil serju.”

“(56)

L-għajnuna mill-Istat hija b’mod partikolari ġġustifikata u tista’ tiġi ddikjarata kompatibbli mas-suq intern abbażi tal-Artikolu 107(3)(b) tat-TFUE, għal perjodu limitat, jekk isservi biex tirrimedja n-nuqqas ta’ likwidità li jiffaċċjaw l-impriżi li huma affettwati direttament jew indirettament mit-tfixkil serju tal-ekonomija kkawżat mill-aggressjoni militari Russa kontra l-Ukrajna u l-effetti diretti u indiretti tagħha, inklużi s-sanzjonijiet imposti u l-kontromiżuri meħuda, pereżempju mir-Russja. F’dan il-kuntest, il-Kummissjoni tieħu nota li filwaqt li t-tfixkil ekonomiku jaffettwa l-ekonomija b’mod wiesa’ fl-Istati Membri kollha, l-implimentazzjoni ta’ ċerti miżuri biex dawn l-effetti jiġu rimedjati b’mod effettiv tista’ teħtieġ aktar żmien speċifikament fis-setturi tal-produzzjoni primarja tal-prodotti agrikoli, tas-sajd u tal-akkwakultura. F’dawn is-setturi speċifiċi, li huma kkaratterizzati minn sehem partikolarment għoli ta’ impriżi żgħar, il-proċess ta’ aġġustament biex tingħeleb b’mod effettiv il-kriżi attwali jeħtieġ aktar żmien. Barra minn hekk, u b’mod partikolari għall-produzzjoni primarja tal-prodotti agrikoli u sa ċertu punt anki għall-akkwakultura, id-dipendenza fuq l-istaġuni tat-tkabbir annwali u ċ-ċikli tal-ħsad huma karatteristiċi rilevanti speċifiċi għas-settur li għandhom jiġu kkunsidrati, inkluża l-ħtieġa li jinkisbu inputs fi żmien ta’ prezzijiet partikolarment għoljin filwaqt li l-prodotti li jirriżultaw jinbiegħu bil-prezzijiet baxxi attwali. Dan jiġġustifika perjodu ta’ implimentazzjoni eċċezzjonalment itwal għal dawn is-setturi.”

“c.

l-għajnuna tingħata sat-30 ta’ Ġunju 2024 (*1) bl-eċċezzjoni ta’ għajnuna mogħtija lil prodotti agrikoli tal-produzzjoni primarja kif ukoll lil impriżi attivi fis-setturi tas-sajd u tal-akkwakultura, li tista’ tingħata sal-31 ta’ Diċembru 2024;