IL-KUMMISSJONI EWROPEA

Brussell, 18.12.2024

COM(2024) 580 final

2024/0321(NLE)

Proposta għal

DEĊIŻJONI TAL-KUNSILL

dwar il-konklużjoni, f’isem l-Unjoni Ewropea, tal-Ftehim bejn l-Unjoni Ewropea u r-Repubblika Federattiva tal-Brażil dwar kooperazzjoni mal-Aġenzija tal-Unjoni Ewropea għall-Kooperazzjoni fl-Infurzar tal-Liġi (Europol) u l-Pulizija Federali tal-Brażil u permezz tagħhom

MEMORANDUM TA’ SPJEGAZZJONI

1.KUNTEST TAL-PROPOSTA

•Raġunijiet u objettivi tal-proposta

·Deċiżjoni tal-Kummissjoni adottata f’konformità mal-Artikolu 36 tad-Direttiva (UE) 2016/680, li ssib li l-pajjiż terz, territorju jew settur speċifikat wieħed jew iktar f’dak il-pajjiż terz, jew l-organizzazzjoni internazzjonali inkwistjoni tiżgura livell adegwat ta’ protezzjoni (“deċiżjoni ta’ adegwatezza”);

·ftehim internazzjonali konkluż bejn l-Unjoni u l-pajjiż terz jew l-organizzazzjoni internazzjonali skont l-Artikolu 218 tat-TFUE li jagħti prova ta’ garanziji adegwati fir-rigward tal-protezzjoni tal-privatezza u d-drittijiet u l-libertajiet fundamentali tal-individwi;

·ftehim ta’ kooperazzjoni li jippermetti l-iskambju ta’ data personali konkluż qabel l-1 ta’ Mejju 2017, bejn il-Europol u l-pajjiż terz jew l-organizzazzjoni internazzjonali skont l-Artikolu 23 tad-Deċiżjoni 2009/371/ĠAI.

Sa minn meta daħal fis-seħħ ir-Regolament (UE) 2016/794 fl-1 ta’ Mejju 2017, il-Kummissjoni hija responsabbli, f’isem l-Unjoni u l-Istati Membri tagħha, biex tinnegozja ftehimiet internazzjonali ma’ pajjiżi terzi dwar l-iskambju tad-data personali mal-Europol. Sa fejn ikun meħtieġ għat-twettiq tal-kompiti tagħha, il-Europol tista’ wkoll tistabbilixxi u żżomm relazzjonijiet kooperattivi ma’ sħab esterni permezz ta’ ħidma u arranġamenti amministrattivi li waħedhom ma jistgħux ikunu bażi legali għall-iskambju ta’ data personali. Għall-kuntrarju ta’ ftehim internazzjonali, dawk l-arranġamenti jiġu konklużi mill-Europol u ma jorbtux lill-Unjoni Ewropea jew lill-Istati Membri tagħha 2 .

Il-gruppi tal-kriminalità organizzata tal-Amerika Latina huma ta’ theddida serja għas-sigurtà interna tal-Unjoni Ewropea peress li l-azzjonijiet tagħhom huma dejjem aktar marbuta ma’ sensiela ta’ reati fl-Unjoni, b’mod partikolari fil-qasam tat-traffikar tad-droga. Il-Valutazzjoni tal-Unjoni Ewropea tal-2021 tat-Theddid mill-Kriminalità Serja u Organizzata (SOCTA) tenfasizza li kwantitajiet bla preċedent ta’ drogi illeċiti huma ttraffikati lejn l-Unjoni Ewropea mill-Amerka Latina, li jiġġeneraw profitti ta’ diversi biljuni ta’ euro, li jintużaw biex jiffinanzjaw firxa varjata ta’ organizzazzjonijiet kriminali (internazzjonali u bbażati fl-Unjoni Ewropea) u biex idgħajfu l-istat tad-dritt fl-Unjoni Ewropea 3 .

Rapporti reċenti jikkonfermaw li d-disponibbiltà tal-kokaina fl-Ewropa tinsab f’livell għoli u li d-droga hija aktar affordabbli u aċċessibbli għall-konsumaturi milli fil-passat 4 . Il-biċċa l-kbira tal-prodott ikkonfiskat fl-Unjoni Ewropea jiġi ttrasportat bil-baħar, primarjament f’kontejners marittimi 5 , u jiġi ttrasportat lejn l-Unjoni Ewropea direttament mill-pajjiżi tal-produzzjoni kif ukoll mill-pajjiżi ġirien tat-tluq fl-Amerka Latina, inkluż il-Brażil 6 . L-organizzazzjonijiet Brażiljani tal-kriminalità organizzata saru sħab ta’ networks kriminali Kolombjani u jixtru wkoll kokaina prodotta fil-Bolivja u l-Perù. Minbarra l-attivitajiet ta’ traffikar tagħhom, dawn in-networks huma fornituri ta’ servizzi għal networks kriminali li joperaw globalment u li jużaw portijiet Brażiljani għat-traffiku tal-kokaina 7 . Abbażi tal-kwantitajiet ta’ kokaina maqbuda f’portijiet Ewropej u f’portijiet oħra destinati għall-Ewropa, il-Brażil (b’qbid ta’ kokaina ta’ madwar 71 tunnellata) kien wieħed mill-punti ta’ tluq ewlenin fl-2020, kif ilu għal xi snin 8 . Id-data uffiċjali mill-Brażil tikkonferma li l-Ewropa hija l-akbar destinazzjoni għall-kokaina mibgħuta mill-Brażil 9 .

L-organizzazzjonijiet tal-kriminalità organizzata bbażati fl-Amerka Latina huma stabbiliti sew u attivi wkoll f’oqsma oħra ta’ kriminalità li jaqgħu taħt il-mandat tal-Europol, bħaċ-ċiberkriminalità, il-ħasil tal-flus, u r-reati ambjentali.

Fid-Dokument ta’ Programmazzjoni 2022-2024 tagħha, il-Europol indikat li, fost l-oħrajn, id-domanda dejjem tikber għad-drogi u ż-żieda fir-rotot tat-traffikar tad-drogi lejn l-Unjoni Ewropea jiġġustifikaw il-ħtieġa għal kooperazzjoni msaħħa mal-pajjiżi tal-Amerika Latina 10 .

F’dan l-isfond, il-kooperazzjoni bejn l-Europol u l-Brażil għadha għaddejja wara l-iffirmar ta’ Ftehim dwar Kooperazzjoni Strateġika f’April 2017 11 . Ir-riżultati miksuba wara l-implimentazzjoni ta’ dan il-Ftehim u l-istabbiliment tal-Uffiċċju ta’ Kollegament Brażiljan fil-Europol, inkluż l-iskjerament sussegwenti tal-Uffiċjali ta’ Kollegament Brażiljani fil-Europol f’Settembru 2020, wasslu għat-tisħiħ tal-kooperazzjoni f’livell operazzjonali strateġiku mal-Istati Membri u partijiet terzi li huma rrappreżentati fil-Europol.

Minn dak iż-żmien ’l hawn, il-Pulizija Federali tal-Brażil ikkooperat u involviet ruħha b’mod effettiv mal-Istati Membri tal-Unjoni Ewropea u mal-Europol fil-ġlieda kontra l-kriminalità organizzata u t-terroriżmu transnazzjonali, biex b’hekk l-Ewropa u l-bqija tad-dinja saru aktar sikuri. Diġà nkisbu ħafna riżultati pożittivi 12 , mill-iskambju ta’ kuljum ta’ informazzjoni permezz tal-Applikazzjoni ta’ Network għall-Iskambju Sikur ta’ Informazzjoni (SIENA) tal-Europol sal-parteċipazzjoni fil-laqgħat tal-Pjattaforma Multidixxiplinari Ewropea Kontra t-Theddid Kriminali (EMPACT), u investigazzjonijiet konġunti mal-Istati Membri 13 .

Il-Brażil qed jipparteċipa fil-Mekkaniżmu ta’ Koordinazzjoni u Kooperazzjoni tal-Komunità ta’ Stati tal-Amerika Latina u tal-Karibew (CELAC) dwar id-Drogi. Barra minn hekk, il-Brażil hija membru tal-Komunità tal-Pulizija tal-Kontinent Amerikan (Ameripol) u kienet impenjata li tikkontribwixxi għaż-żarmar ta’ gruppi ta’ kriminalità organizzata involuti fil-produzzjoni u t-traffikar tad-droga. Fil-fatt, il-Brażil ġie identifikat bħala sieħeb internazzjonali ewlieni biex inaqqas il-provvista globali tal-kokaina miċ-Ċentru Ewropew għall-Monitoraġġ tad-Droga u d-Dipendenza fuq id-Droga (EMCDDA) 14 .

Madankollu, il-Ftehim dwar il-Kooperazzjoni Strateġika bejn l-Europol u l-Brażil ma jipprovdix bażi legali għall-iskambju ta’ data personali. Madankollu, dan it-tip ta’ kooperazzjoni operazzjonali akbar u l-kondiviżjoni ta’ informazzjoni rilevanti bejn l-Europol u l-Brażil ikunu importanti fil-ġlieda kontra reati serji f’ħafna oqsma ta’ kriminalità ta’ interess komuni, bħat-traffikar tad-droga u r-reati ambjentali, b’mod partikolari meta jitqies ir-rwol prominenti tan-networks kriminali Brażiljani fis-suq globali tad-droga.

Fid-dawl ta’ dan, fid-9 ta’ Marzu 2023, il-Kummissjoni ppreżentat Rakkomandazzjoni, li tipproponi li l-Kunsill jawtorizza l-ftuħ ta’ negozjati għal ftehim bejn l-Unjoni Ewropea u l-Brażil dwar l-iskambju ta’ data personali bejn l-Europol u l-awtoritajiet kompetenti tal-Brażil fil-ġlieda kontra l-kriminalità serja u t-terroriżmu 15 . Fil-15 ta’ Mejju 2023, il-Kunsill ipprovda l-awtorizzazzjoni tiegħu u adotta direttivi ta’ negozjati 16 .

In-negozjati mal-Brażil għal dan il-Ftehim bdew f’Lulju 2023. Fl-interess li jkun hemm strument wieħed, koerenti u legalment vinkolanti li jirregola l-kooperazzjoni bejn l-Europol u l-Brażil, ġew inklużi wkoll dispożizzjonijiet dwar il-kooperazzjoni strateġika u l-iskambju ta’ data mhux personali fil-Ftehim.

Wara tliet ċikli ta’ negozjati u tliet laqgħat tekniċi, in-negozjaturi ewlenin laħqu ftehim preliminari dwar it-test u inizjalaw l-abbozz tat-test tal-Ftehim fit-18 ta’ Ottubru 2024. Il-koleġiżlaturi ġew infurmati u kkonsultati regolarment fl-istadji kollha tan-negozjati, b’mod partikolari billi rrappurtaw lill-grupp ta’ ħidma responsabbli tal-Kunsill u lill-Kumitat LIBE tal-Parlament Ewropew.

•Konsistenza mal-politiki eżistenti tal-Unjoni

2.BAŻI LEGALI, SUSSIDJARJETÀ U PROPORZJONALITÀ

•Bażi legali

L-Artikolu 218(6) tat-Trattat dwar il-Funzjonament tal-Unjoni Ewropea (TFUE) jipprevedi deċiżjonijiet “li [j]ikkonklud[u] l-ftehim.” Peress li l-proposta tikkonċerna oqsma li fihom tiġi applikata l-proċedura leġiżlattiva ordinarja, hija meħtieġa l-approvazzjoni tal-Parlament Ewropew u, għalhekk, il-bażi legali proċedurali hija l-Artikolu 218(6), il-punt (a)(v) TFUE.

Il-proposta għandha żewġ għanijiet u komponenti ewlenin, jiġifieri l-kooperazzjoni fl-infurzar tal-liġi bejn l-Europol u l-Brażil, kif ukoll l-istabbiliment ta’ salvagwardji adegwati fir-rigward tal-protezzjoni tal-privatezza u d-drittijiet u l-libertajiet fundamentali tal-individwi għal din il-kooperazzjoni. Għaldaqstant, il-bażi legali sostantiva jeħtieġ li tkun l-Artikolu 16(2) u l-Artikolu 88 tat-TFUE.

Għaldaqstant, din il-proposta hija bbażata fuq l-Artikolu 16(2) u l-Artikolu 88 TFUE flimkien mal-Artikolu 218(6), il-punt (a)(v) TFUE.

•Sussidjarjetà (għall-kompetenza mhux esklużiva)

•Proporzjonalità

L-objettivi tal-Unjoni fir-rigward ta’ din il-proposta kif stabbiliti hawn fuq jistgħu jinkisbu biss billi jsir ftehim internazzjonali vinkolanti li jipprevedi l-miżuri ta’ kooperazzjoni meħtieġa, filwaqt li tiġi żgurata l-protezzjoni xierqa tad-drittijiet fundamentali. Id-dispożizzjonijiet tal-protokoll huma limitati għal dak li huwa neċessarju biex jintlaħqu l-objettivi ewlenin tiegħu. L-azzjoni unilaterali tal-Istati Membri lejn il-Brażil ma tirrappreżentax alternattiva, peress li l-Europol għandha rwol uniku. Azzjoni unilaterali lanqas ma tipprovdi bażi suffiċjenti għall-kooperazzjoni tal-pulizija ma’ pajjiżi mhux tal-Unjoni Ewropea u ma tiżgurax il-protezzjoni meħtieġa tad-drittijiet fundamentali.

•Għażla tal-istrument

•Drittijiet fundamentali

L-iskambju ta’ data personali u l-ipproċessar tagħha mill-awtoritajiet ta’ pajjiż terz jikkostitwixxu interferenza mad-drittijiet fundamentali għall-privatezza u l-protezzjoni tad-data. Madankollu, il-Ftehim jiżgura n-neċessità u l-proporzjonalità ta’ kwalunkwe interferenza bħal din billi jiggarantixxi l-applikazzjoni ta’ salvagwardji adegwati tal-protezzjoni tad-data personali li tiġi ttrasferita, f’konformità mad-dritt tal-Unjoni Ewropea.

Il-Kapitoli II u IV jipprevedu l-protezzjoni tad-data personali. Abbażi ta’ dan, l-Artikoli 3 sa 15, kif ukoll l-Artikoli 18 u 19, jistabbilixxu prinċipji fundamentali tal-protezzjoni tad-data, inklużi l-limitazzjoni tal-iskop, il-kwalità tad-data u r-regoli applikabbli għall-ipproċessar ta’ kategoriji speċjali ta’ data, l-obbligi applikabbli għall-kontrolluri, inkluż dwar iż-żamma, iż-żamma ta’ rekords, is-sigurtà u fir-rigward ta’ trasferimenti ulterjuri, drittijiet individwali infurzabbli, inkluż dwar l-aċċess, ir-rettifika u t-teħid awtomatizzat ta’ deċiżjonijiet, is-superviżjoni indipendenti u effettiva kif ukoll ir-rimedju amministrattiv u ġudizzjarju.

Is-salvagwardji jkopru l-forom kollha ta’ pproċessar ta’ data personali fil-kuntest tal-kooperazzjoni bejn l-Europol u l-Brażil. L-eżerċizzju ta’ ċerti drittijiet individwali jista’ jiġi ttardjat, limitat jew irrifjutat fejn meħtieġ, raġonevoli u proporzjonat, filwaqt li jitqiesu d-drittijiet u l-interessi fundamentali tas-suġġett tad-data, b’mod partikolari biex jiġi evitat ir-riskju għal investigazzjoni jew prosekuzzjoni kriminali li tkun għaddejja, li tkun ukoll konformi mad-dritt tal-Unjoni.

Barra minn hekk, kemm l-Unjoni Ewropea kif ukoll il-Brażil se jiżguraw li awtorità pubblika indipendenti responsabbli għall-protezzjoni tad-data (awtorità superviżorja) tissorvelja kwistjonijiet li jaffettwaw il-privatezza tal-individwi sabiex tipproteġi d-drittijiet u l-libertajiet fundamentali ta’ persuni fiżiċi fir-rigward tal-ipproċessar ta’ data personali.

L-Artikolu 32 isaħħaħ l-effettività tas-salvagwardji fil-Ftehim billi jipprevedi rieżamijiet konġunti tal-implimentazzjoni tiegħu f’intervalli regolari. It-timijiet tal-evalwazzjonijiet għandhom jinkludu esperti rilevanti dwar il-protezzjoni tad-data u l-infurzar tal-liġi.

Bħala salvagwardja ulterjuri, skont l-Artikolu 21, il-paragrafu 1, fil-każ ta’ nuqqas ta’ twettiq tal-obbligi li jirriżultaw mid-dispożizzjonijiet tal-Ftehim, il-Ftehim jista’ jiġi sospiż. Kwalunkwe data personali trasferita qabel is-sospensjoni għandha tkompli tiġi ttrattata f’konformità ma’ dan il-Protokoll. Barra minn hekk, f’każ ta’ terminazzjoni tal-Ftehim, id-data personali ttrasferita qabel it-terminazzjoni tiegħu għandha tkompli tiġi pproċessata f’konformità mad-dispożizzjonijiet tal-Ftehim.

Barra minn hekk, il-Ftehim jiggarantixxi li l-iskambju ta’ data personali bejn il-Europol u l-Brażil huwa konsistenti kemm mal-prinċipju ta’ nondiskriminazzjoni kif ukoll mal-Artikolu 52(1) tal-Karta, li jiżguraw li l-interferenzi mad-drittijiet fundamentali garantiti mill-Karta jkunu limitati għal dak li huwa strettament neċessarju sabiex jintlaħqu ġenwinament l-għanijiet ta’ interess ġenerali segwiti, soġġett għall-prinċipju ta’ proporzjonalità.

3.RIŻULTATI TAL-VALUTAZZJONIJIET EX-POST, TAL-KONSULTAZZJONIJIET MAL-PARTIJIET IKKONĊERNATI U TAL-EVALWAZZJONIJIET TAL-IMPATT

Mhux applikabbli

4.IMPLIKAZZJONIJIET BAĠITARJI

Ma hemm l-ebda implikazzjoni baġitarja għall-baġit tal-Unjoni.

5.ELEMENTI OĦRA

•Pjanijiet ta’ implimentazzjoni u arranġamenti dwar il-monitoraġġ, l-evalwazzjoni u r-rapportar

Ma hemmx bżonn ta’ pjan ta’ implimentazzjoni, peress li l-Ftehim se jidħol fis-seħħ fid-data tal-wasla tal-aħħar notifika bil-miktub li permezz tagħha l-Unjoni Ewropea u l-Brażil innotifikaw lil xulxin permezz ta’ mezzi diplomatiċi li l-proċeduri tagħhom stess tlestew.

Fir-rigward tal-monitoraġġ, l-Unjoni Ewropea u l-Brażil għandhom jirrieżaminaw b’mod konġunt l-implimentazzjoni tal-Ftehim sena wara d-dħul fis-seħħ tiegħu, u f’intervalli regolari minn hemm ’il quddiem, u addizzjonalment jekk jintalbu minn waħda mill-partijiet u jiġu deċiżi b’mod konġunt.

•Spjegazzjoni fid-dettall tad-dispożizzjonijiet speċifiċi tal-proposta

L-Artikolu 1 jinkludi l-objettiv u l-kamp ta’ applikazzjoni tal-Ftehim.

L-Artikolu 2 jinkludi d-definizzjonijiet tal-Ftehim.

L-Artikolu 3 jinkludi l-għanijiet tal-ipproċessar tad-data personali.

L-Artikolu 4 jipprovdi l-prinċipji ġenerali tal-protezzjoni tad-data li l-Unjoni Ewropea u l-Brażil għandhom jirrispettaw.

L-Artikolu 5 jipprevedi kategoriji speċjali ta’ data personali u kategoriji differenti ta’ suġġetti tad-data, bħal data personali fir-rigward ta’ vittmi ta’ reat kriminali, xhieda jew persuni oħra li jistgħu jipprovdu informazzjoni dwar reati kriminali, jew fir-rigward ta’ persuni taħt l-età ta’ 18-il sena.

L-Artikolu 6 jipprevedi l-ipproċessar awtomatizzat ta’ data personali.

L-Artikolu 7 jipprovdi bażi għat-trasferiment ulterjuri tad-data personali riċevuta.

L-Artikolu 8 jipprevedi d-dritt ta’ aċċess, filwaqt li jiżgura li s-suġġett tad-data jkollu d-dritt, f’intervalli raġonevoli, li jikseb informazzjoni dwar jekk data personali relatata miegħu tiġix ipproċessata skont il-Ftehim.

L-Artikolu 9 jipprevedi d-dritt għal rettifika, tħassir, u restrizzjoni, li jiżgura li s-suġġett tad-data għandu d-dritt li jitlob lill-awtoritajiet kompetenti jikkoreġu/jirrettifikaw data personali mhux preċiża dwar is-suġġett tad-data trasferita skont il-Ftehim.

L-Artikolu 10 jipprevedi n-notifika ta’ ksur ta’ data personali li jaffettwa d-data personali ttrasferita skont il-Ftehim, filwaqt li jiżgura li l-awtoritajiet kompetenti rispettivi jinnotifikaw lil xulxin kif ukoll lill-awtorità superviżorja rispettiva tagħhom dwar dak il-ksur mingħajr dewmien, u jieħdu miżuri biex itaffu l-effetti negattivi possibbli tiegħu.

L-Artikolu 11 jipprevedi l-komunikazzjoni ta’ ksur ta’ data personali lis-suġġett tad-data, filwaqt li jiżgura li l-awtoritajiet kompetenti taż-żewġ Partijiet tal-Ftehim jikkomunikaw lis-suġġett tad-data mingħajr dewmien żejjed fil-każ ta’ ksur ta’ data personali li x’aktarx ikollu effett negattiv serju fuq id-drittijiet u l-libertajiet tiegħu jew tagħha.

L-Artikolu 12 jipprevedi l-ħżin, ir-rieżami, il-korrezzjoni u t-tħassir ta’ data personali.

L-Artikolu 13 jipprevedi ż-żamma ta’ reġistrazzjonijiet tal-ġbir, l-alterazzjoni, l-aċċess, l-iżvelar inkluż trasferimenti ulterjuri, il-kombinazzjoni u t-tħassir ta’ data personali.

L-Artikolu 14 jipprevedi li l-awtorità superviżorja tiżgura li jkun hemm awtorità pubblika indipendenti responsabbli għall-protezzjoni tad-data (awtorità superviżorja) biex tissorvelja kwistjonijiet li jaffettwaw il-privatezza tal-individwi, inklużi r-regoli domestiċi rilevanti skont il-Ftehim għall-protezzjoni tad-drittijiet u l-libertajiet fundamentali ta’ persuni fiżiċi fir-rigward tal-ipproċessar ta’ data personali.

L-Artikolu 15 jipprevedi rimedju amministrattiv u ġudizzjarju, filwaqt li jiżgura li s-suġġetti tad-data jkollhom id-dritt għal rimedju amministrattiv u ġudizzjarju effettiv għall-ksur tad-drittijiet u s-salvagwardji rikonoxxuti fil-Ftehim li jirriżulta mill-ipproċessar tad-data personali tagħhom.

L-Artikolu 16 jipprevedi prinċipji ta’ protezzjoni tad-data applikabbli għall-iskambju ta’ data mhux personali.

L-Artikolu 17 jipprevedi t-trasferiment ulterjuri tad-data personali li tiġi rċevuta.

L-Artikolu 18 jipprevedi l-valutazzjoni tal-affidabbiltà tas-sors u l-preċiżjoni tad-data fir-rigward kemm tad-data personali kif ukoll tad-data mhux personali skambjata skont il-Ftehim.

L-Artikolu 19 jipprevedi s-sigurtà tad-data, filwaqt li jiżgura l-implimentazzjoni ta’ miżuri tekniċi u organizzattivi għall-protezzjoni tad-data personali u mhux personali skambjata skont dan il-Ftehim.

L-Artikolu 20 jipprevedi s-soluzzjoni tat-tilwim, filwaqt li jiżgura li t-tilwim kollu li jista’ jinqala’ b’rabta mal-interpretazzjoni, l-applikazzjoni, jew l-implimentazzjoni tal-Ftehim u kwalunkwe kwistjoni relatata miegħu jagħti lok għal konsultazzjonijiet u negozjati bejn ir-rappreżentanti tal-Unjoni Ewropea u l-Brażil bil-ħsieb li tinstab soluzzjoni reċiprokament aċċettabbli.

L-Artikolu 21 jipprevedi klawżola ta’ sospensjoni.

L-Artikolu 22 jipprovdi għat-terminazzjoni tal-Ftehim.

L-Artikolu 23 jipprevedi r-relazzjoni ma’ strumenti internazzjonali oħra, filwaqt li jiżgura li l-Ftehim la jippreġudika u lanqas jaffettwa d-dispożizzjonijiet legali fir-rigward tal-iskambju ta’ informazzjoni previst fi kwalunkwe trattat, ftehim jew arranġament bejn il-Brażil u kwalunkwe Stat Membru tal-Unjoni Ewropea.

L-Artikolu 24 jipprevedi l-iskambju ta’ informazzjoni klassifikata, jekk meħtieġ skont il-Ftehim.

L-Artikolu 25 jipprevedi t-trattament ta’ talbiet għal aċċess pubbliku għal data trasferita skont il-Ftehim.

L-Artikolu 26 jipprevedi l-punti ta’ kuntatt nazzjonali u l-uffiċjali ta’ kollegament.

L-Artikolu 27 jipprevedi linja ta’ komunikazzjoni sigura.

L-Artikolu 28 jipprevedi l-ispejjeż skont il-Ftehim.

L-Artikolu 29 jipprevedi n-notifika tal-implimentazzjoni tal-Ftehim.

L-Artikolu 30 jipprevedi d-dħul fis-seħħ u l-applikazzjoni tal-Ftehim.

L-Artikolu 31 jipprevedi emendi u supplimenti tal-Ftehim.

L-Artikolu 32 jipprevedi r-rieżami u l-evalwazzjoni tal-Ftehim.

L-Artikolu 33 jipprevedi l-lingwi tal-Ftehim.

2024/0321 (NLE)

Proposta għal

DEĊIŻJONI TAL-KUNSILL

dwar il-konklużjoni, f’isem l-Unjoni Ewropea, tal-Ftehim bejn l-Unjoni Ewropea u r-Repubblika Federattiva tal-Brażil dwar kooperazzjoni mal-Aġenzija tal-Unjoni Ewropea għall-Kooperazzjoni fl-Infurzar tal-Liġi (Europol) u l-Pulizija Federali tal-Brażil u permezz tagħhom

IL-KUNSILL TAL-UNJONI EWROPEA,

Wara li kkunsidra t-Trattat dwar il-Funzjonament tal-Unjoni Ewropea, u b’mod partikolari l-Artikolu 16(2) u l-Artikolu 88, flimkien mal-Artikolu 218(6), it-tieni subparagrafu, il-punt (a)(v), u l-Artikolu 218(7) tiegħu,

Wara li kkunsidra l-proposta/kkunsidraw il-proposta tal-Kummissjoni Ewropea,

Wara li kkunsidra l-kunsens tal-Parlament Ewropew,

Billi:

(1)Ir-Regolament (UE) 2016/794 tal-Parlament Ewropew u tal-Kunsill 24 jipprevedi li huwa possibbli li l-Aġenzija tal-Unjoni Ewropea għall-Kooperazzjoni fl-Infurzar tal-Liġi (l-Europol) tittrasferixxi data personali lil awtorità ta’ pajjiż terz, fost l-oħrajn, abbażi ta’ ftehim internazzjonali konkluż bejn l-Unjoni u dak il-pajjiż terz skont l-Artikolu 218 tat-Trattat dwar il-Funzjonament tal-Unjoni Ewropea (TFUE), li jipprovdi salvagwardji adegwati fir-rigward tal-protezzjoni tal-privatezza u d-drittijiet u l-libertajiet fundamentali tal-individwi.

(2)F’konformità mad-Deċiżjoni tal-Kunsill (UE) [XXXX] 25 , il-Ftehim bejn l-Unjoni Ewropea u r-Repubblika Federattiva tal-Brażil dwar kooperazzjoni ma’ u permezz tal-Aġenzija tal-Unjoni Ewropea għall-Kooperazzjoni fl-Infurzar tal-Liġi (Europol) u l-Pulizija Federali tal-Brażil (“il-Ftehim”) ġie ffirmat fi [XX.XX.XXXX], soġġett għall-konklużjoni tiegħu f’data aktar tard.

(3)Il-Ftehim jistabbilixxi relazzjonijiet ta’ kooperazzjoni bejn l-Europol u l-awtoritajiet kompetenti tal-Brażil, u jippermetti t-trasferiment ta’ data personali u mhux personali bejniethom, bl-għan li jiġu miġġielda l-kriminalità serja u t-terroriżmu u tiġi protetta s-sigurtà tal-Unjoni u taċ-ċittadini tagħha.

(4)Il-Ftehim jiżgura r-rispett sħiħ tal-Karta tad-Drittijiet Fundamentali tal-Unjoni, inkluż id-dritt għar-rispett tal-ħajja privata u tal-familja, rikonoxxut fl-Artikolu 7 tal-Karta, id-dritt għall-protezzjoni tad-data personali, rikonoxxut fl-Artikolu 8 tal-Karta u d-dritt għal rimedju effettiv u proċess ġust, rikonoxxut mill-Artikolu 47 tal-Karta. Il-Ftehim jinkludi salvagwardji adegwati għall-protezzjoni ta’ data personali trasferita mill-Europol skont il-Ftehim.

(5)Il-Ftehim ma jaffettwax, u huwa mingħajr preġudizzju għat-trasferiment ta’ data personali jew forom oħra ta’ kooperazzjoni bejn l-awtoritajiet responsabbli għas-salvagwardja tas-sigurtà nazzjonali.

(6)Skont l-Artikolu 218(7) tat-TFUE, huwa xieraq li l-Kunsill jawtorizza lill-Kummissjoni tapprova f’isem l-Unjoni l-modifiki tal-Annessi II, III u IV tal-Ftehim.

(7)L-Irlanda hija marbuta bir-Regolament (UE) 2016/794 u għalhekk qed tieħu sehem fl-adozzjoni ta’ din id-Deċiżjoni.

(8)F’konformità mal-Artikoli 1 u 2 tal-Protokoll Nru 22 dwar il-pożizzjoni tad-Danimarka, anness mat-Trattat dwar l-Unjoni Ewropea u mat-Trattat dwar il-Funzjonament tal-Unjoni Ewropea, id-Danimarka mhijiex qed tieħu sehem fl-adozzjoni ta’ din id-Deċiżjoni u mhijiex marbuta biha jew suġġetta għall-applikazzjoni tagħha.

(9)Il-Kontrollur Ewropew għall-Protezzjoni tad-Data ta l-Opinjoni tiegħu [xxx] fi [xx.xx.xxxx].

(10)Il-Ftehim jenħtieġ li jiġi approvat f’isem l-Unjoni.

(11)F’konformità mat-Trattati, sta għall-Kummissjoni li tipproċedi, f’isem l-Unjoni, biex tagħmel in-notifika prevista fl-Artikolu 30(2) tal-Ftehim, sabiex tesprimi l-kunsens tal-Unjoni li tkun marbuta bil-Ftehim.

(12)F’konformità mat-Trattati, huwa fir-responsabbiltà tal-Kummissjoni li tagħmel in-notifiki previsti fl-Artikoli 14(1), 15, 26(1), 29(1) u 29(2) tal-Ftehim.

ADOTTA DIN ID-DEĊIŻJONI:

Artikolu 1

Il-Ftehim bejn l-Unjoni Ewropea u r-Repubblika Federattiva tal-Brażil dwar il-kooperazzjoni mal-Aġenzija tal-Unjoni Ewropea għall-Kooperazzjoni fl-Infurzar tal-Liġi (Europol) u l-Pulizija Federali tal-Brażil u permezz tagħhom, huwa b’dan approvat f’isem l-Unjoni.

It-test tal-Ftehim huwa mehmuż ma' din id-Deċiżjoni.

Artikolu 2

Għall-finijiet tal-Artikolu 31(2) tal-Ftehim, il-pożizzjoni li għandha tittieħed f’isem l-Unjoni dwar il-modifiki tal-Annessi II, III u IV tal-Ftehim għandha tiġi approvata mill-Kummissjoni wara konsultazzjoni mal-Kunsill.

Artikolu 3

Din id-Deċiżjoni għandha tidħol fis-seħħ fid-data tal-adozzjoni tagħha.

Magħmul fi Brussell,

(1)    Ir-Regolament (UE) 2016/794 tal-Parlament Ewropew u tal-Kunsill tal-11 ta’ Mejju 2016 dwar l-Aġenzija tal-Unjoni Ewropea għall-Kooperazzjoni fl-Infurzar tal-Liġi (Europol) u li jissostitwixxi u jħassar id-Deċiżjonijiet tal-Kunsill 2009/371/ĠAI, 2009/934/ĠAI, 2009/935/ĠAI, 2009/936/ĠAI u 2009/968/ĠAI (ĠU L 135, 24.5.2016, p. 53; ELI: http://data.europa.eu/eli/reg/2016/794/oj), (“Ir-Regolament (UE) 2016/794”).

(2)    L-Artikolu 23(1) u (4) tar-Regolament (UE) 2016/794.

(3)    Il-Valutazzjoni mill-Unjoni Ewropea tat-Theddid mill-Kriminalità Serja u Organizzata (SOCTA) 2021: Influwenza Korrotta: L-infiltrazzjoni u l-imminar tal-ekonomija u s-soċjetà tal-Ewropa mill-kriminalità organizzata, disponibbli fuq https://www.europol.europa.eu/publication-events/main-reports/european-union-serious-and-organised-crime-threat-assessment-socta-2021 .

(4)    Is-Suq tad-Droga tal-UE: Il-kokaina, p. 58, disponibbli fuq https://www.emcdda.europa.eu/publications/eu-drug-markets/cocaine_en .

(5)    Il-Europol u l-kummerċ globali tal-kokaina, p. 5, disponibbli fuq https://www.emcdda.europa.eu/publications/eu-drug-markets/cocaine/europe-and-global-cocaine-trade_en .

(6)    Il-Europol u l-kummerċ globali tal-kokaina, p. 5, disponibbli fuq https://www.emcdda.europa.eu/publications/eu-drug-markets/cocaine/europe-and-global-cocaine-trade_en .

(7)    Is-Suq tad-Droga tal-UE: Il-kokaina, p. 47, disponibbli fuq https://www.emcdda.europa.eu/publications/eu-drug-markets/cocaine_en .

(8)    Is-Suq tad-Droga tal-UE: Il-kokaina, p. 24, disponibbli fuq https://www.emcdda.europa.eu/publications/eu-drug-markets/cocaine_en .

(9)    Is-Suq tad-Droga tal-UE: Il-kokaina, p. 52, disponibbli fuq https://www.emcdda.europa.eu/publications/eu-drug-markets/cocaine_en .

(10)    Id-Dokument ta’ Programmazzjoni tal-Europol 2022-2024, p. 150.    

(11)     https://www.europol.europa.eu/partners-agreements/strategic-agreements .

(12)    Eżempju wieħed tar-riżultati pożittivi msemmija hawn fuq ta’ din il-kooperazzjoni huwa l-Operazzjoni Chameleon/Enterprise, disponibbli fuq https://www.europol.europa.eu/newsroom/news/over-40-arrested-in-biggest-ever-crackdown-against-drug-ring-smuggling-cocaine-brazil-europe.

(13)    Investigazzjoni li rriżultat fil-qbid ta’ sitt tunnellati ta’ kokaina mill-flotta Franċiża, disponibbli fuq https://maoc.eu/french-authorities-seize-6-tons-of-cocaine-in-the-gulf-of-guinea-with-the-support-of-maoc-n/ .

(14)    Is-Suq tad-Droga tal-UE: Il-kokaina, p. 82, disponibbli fuq https://www.emcdda.europa.eu/publications/eu-drug-markets/cocaine_en .

(15)    COM(2023) 132 final.

(16)    Id-Deċiżjoni tal-Kunsill (UE) 2023/1010 tal-15 ta’ Mejju 2023, u d-Dokument tal-Kunsill 8525/23 tat-28 ta’ April 2023.

(17)    COM(2020) 605 finali, 24.7.2020.

(18)    COM(2021) 170 finali, 14.4.2021.

(19)    Il-Ftehim bejn l-Unjoni Ewropea, minn naħa waħda, u New Zealand, min-naħa l-oħra, dwar l-iskambju ta’ data personali bejn l-Aġenzija tal-Unjoni Ewropea għall-Kooperazzjoni fl-Infurzar tal-Liġi (Europol) u l-awtoritajiet ta’ New Zealand kompetenti fil-ġlieda kontra l-kriminalità serja u t-terroriżmu (ĠU L 51, 20.2.2023, p. 4), Il-Kunsill Ewropew – il-Kunsill tal-Unjoni Ewropea, disponibbli fuq https://www.consilium.europa.eu/mt/documents-publications/treaties-agreements/agreement/?id=2022013.

(20)    Id-Dokumenti tal-Kunsill 9339/18, 9334/18, 9331/18, 9342/18, 9330/18, 9333/18, 9332/18, 9320/18 tat-28 ta’ Mejju 2018.

(21)    Id-Dokument tal-Kunsill (UE) 14178/20 tat-18 ta’ Diċembru 2020.

(22)    ĠU C 272 8.7.2021, p.2.

(23)    Id-Deċiżjonijiet tal-Kunsill (UE) 2023/1009, 2023/1008, 2023/1011, 2023/1012 tal-15 ta’ Mejju 2023.

(24)    Ir-Regolament (UE) 2016/794 tal-Parlament Ewropew u tal-Kunsill tal-11 ta’ Mejju 2016 dwar l-Aġenzija tal-Unjoni Ewropea għall-Kooperazzjoni fl-Infurzar tal-Liġi (Europol) u li jissostitwixxi u jħassar id-Deċiżjonijiet tal-Kunsill 2009/371/ĠAI, 2009/934/ĠAI, 2009/935/ĠAI, 2009/936/ĠAI u 2009/968/ĠAI (ĠU L 135, 24.5.2016, p. 53; ELI: http://data.europa.eu/eli/reg/2016/794/oj).

(25)    [ĠU…]

IL-KUMMISSJONI EWROPEA

Brussell, 18.12.2024

COM(2024) 580 final

ANNESS

tal-

Proposta għal Deċiżjoni tal-Kunsill

dwar il-konklużjoni, f’isem l-Unjoni Ewropea, tal-Ftehim bejn l-Unjoni Ewropea u r-Repubblika Federattiva tal-Brażil dwar kooperazzjoni mal-Aġenzija tal-Unjoni Ewropea għall-Kooperazzjoni fl-Infurzar tal-Liġi (Europol) u l-Pulizija Federali tal-Brażil u permezz tagħhom

ANNESS

ABBOZZ TA’ FTEHIM BEJN L-UNJONI EWROPEA U R-REPUBBLIKA FEDERATTIVA TAL-BRAŻIL DWAR KOOPERAZZJONI MAL-AĠENZIJA TAL-UNJONI EWROPEA GĦALL-KOOPERAZZJONI FL-INFURZAR TAL-LIĠI (EUROPOL) U L-PULIZIJA FEDERALI TAL-BRAŻIL U PERMEZZ TAGĦHOM

L-UNJONI EWROPEA, minn hawn ’il quddiem imsejħa wkoll “l-Unjoni” jew “UE”,

kif ukoll

IR-REPUBBLIKA FEDERATTIVA TAL-BRAŻIL, minn issa ’l quddiem imsejħa “il-Brażil”,

minn hawn ’il quddiem flimkien msejħa “l-Partijiet Kontraenti”,

FILWAQT LI JIKKUNSIDRAW li billi jippermetti l-iskambju ta’ data personali u mhux personali bejn l-Aġenzija tal-Unjoni Ewropea għall-Kooperazzjoni fl-Infurzar tal-Liġi (Europol) u l-awtoritajiet kompetenti tal-Brażil, dan il-Ftehim se joħloq il-qafas għal kooperazzjoni operazzjonali msaħħa bejn l-Unjoni u l-Brażil fil-qasam tal-infurzar tal-liġi, filwaqt li jissalvagwardja d-drittijiet tal-bniedem u l-libertajiet fundamentali tal-individwi kollha kkonċernati, inkluż id-dritt għall-privatezza u l-protezzjoni tad-data,

FILWAQT LI JIKKUNSIDRAW li dan il-Ftehim huwa mingħajr preġudizzju għall-arranġamenti ta’ assistenza legali reċiproka bejn il-Brażil u l-Istati Membri tal-Unjoni li jippermettu l-iskambju ta’ data personali,

FILWAQT LI JIKKUNSIDRAW li dan il-Ftehim ma jimponi l-ebda rekwiżit fuq l-awtoritajiet kompetenti biex jittrasferixxu data personali jew mhux personali u li l-kondiviżjoni ta’ kwalunkwe data personali jew mhux personali mitluba skont dan il-Ftehim tibqa’ volontarja,

FTIEHMU KIF ĠEJ:

KAPITOLU I

DISPOŻIZZJONIJIET ĠENERALI

ARTIKOLU 1

Objettivi u kamp ta’ applikazzjoni

(1)L-objettiv ta’ dan il-Ftehim huwa li jistabbilixxi relazzjonijiet ta’ kooperazzjoni bejn l-Aġenzija tal-Unjoni Ewropea għall-Kooperazzjoni fl-Infurzar tal-Liġi (Europol) u l-awtoritajiet kompetenti tal-Brażil u li jippermetti t-trasferiment ta’ data personali u mhux personali bejniethom, sabiex jappoġġa u jsaħħaħ l-azzjoni mill-awtoritajiet tal-Istati Membri tal-Unjoni u dawk tal-Brażil, kif ukoll il-kooperazzjoni reċiproka tagħhom fil-prevenzjoni u l-ġlieda kontra reati kriminali, inklużi l-kriminalità serja u t-terroriżmu, filwaqt li jiżgura salvagwardji xierqa fir-rigward tad-drittijiet tal-bniedem u l-libertajiet fundamentali tal-individwi, inkluż id-dritt għall-privatezza u l-protezzjoni tad-data.

(2)Il-kamp ta’ applikazzjoni ta’ dan il-Ftehim ikopri l-kooperazzjoni bejn l-Europol u l-awtoritajiet kompetenti tal-Brażil fl-oqsma tal-attivitajiet u fi ħdan il-kompetenza u l-kompiti tal-Europol, kif stabbilit fir-Regolament tal-Europol, kif applikat f’konformità mat-Trattat dwar l-Unjoni Ewropea u t-Trattat dwar il-Funzjonament tal-Unjoni Ewropea, u f’dan il-Ftehim.

ARTIKOLU 2

Definizzjonijiet

Għall-finijiet ta’ dan il-Ftehim, japplikaw id-definizzjonijiet li ġejjin:

(1)“Partijiet Kontraenti” tfisser l-Unjoni Ewropea u r-Repubblika Federattiva tal-Brażil;

(2)“Europol” hija l-Aġenzija tal-Unjoni Ewropea għall-Kooperazzjoni fl-Infurzar tal-Liġi, stabbilita skont ir-Regolament tal-Europol;

(3)“Ir-Regolament tal-Europol” jew “ir-Regolament (UE) 2016/794” huwa r-Regolament (UE) 2016/794 tal-Parlament Ewropew u tal-Kunsill tal-11 ta’ Mejju 2016 dwar l-Aġenzija tal-Unjoni Ewropea għall-Kooperazzjoni fl-Infurzar tal-Liġi (Europol) u li jissostitwixxi u jħassar id-Deċiżjonijiet tal-Kunsill 2009/371/ĠAI, 2009/934/ĠAI, 2009/935/ĠAI, 2009/936/ĠAI u 2009/968/ĠAI (ĠU UE L 135, 24.5.2016, p. 53), jew kwalunkwe emenda għalihom jew suċċessur tagħhom;

(4)“awtoritajiet kompetenti” tfisser, għall-Brażil, l-awtoritajiet domestiċi tal-infurzar tal-liġi li skont il-liġi nazzjonali tal-Brażil huma responsabbli għall-prevenzjoni u l-ġlieda kontra r-reati kriminali kif elenkati fl-Anness II (“awtoritajiet kompetenti tal-Brażil”) u li għalihom punt ta’ kuntatt nazzjonali maħtur fi ħdan il-Pulizija Federali Brażiljana għandu jaġixxi bħala l-punt ċentrali ta’ kuntatt mal-Europol f’konformità mal-Artikolu 26, u, għall-Unjoni, l-Europol;

(5)“Korpi tal-Unjoni” tfisser istituzzjonijiet, korpi, missjonijiet, uffiċċji u aġenziji stabbiliti minn, jew abbażi tat-Trattat dwar l-Unjoni Ewropea (“TUE”) u t-Trattat dwar il-Funzjonament tal-Unjoni Ewropea (“TFUE”), elenkati fl-Anness III;

(6)“reati kriminali” huma t-tipi ta’ reati elenkati fl-Anness I u reati kriminali relatati; reati kriminali jitqiesu relatati mat-tipi ta’ reati elenkati fl-Anness I jekk jitwettqu sabiex jinkisbu l-mezzi biex jitwettqu, jiġu ffaċilitati jew jitwettqu, jew biex tiġi żgurata l-impunità ta’ dawk li jwettqu tali tipi ta’ kriminalità;

(7)“data personali” tfisser kwalunkwe informazzjoni relatata ma’ suġġett tad-data;

(8)“data mhux personali” tfisser data li mhijiex data personali;

(9)“suġġett tad-data” tfisser persuna fiżika identifikata jew identifikabbli; persuna identifikabbli hija persuna li tista’ tiġi identifikata, direttament jew indirettament, b’mod partikolari b’referenza għal identifikatur bħal isem, numru ta’ identifikazzjoni, data ta’ lokalizzazzjoni, identifikatur online jew għal fattur wieħed jew aktar speċifiċi għall-identità fiżika, fiżjoloġika, ġenetika, mentali, ekonomika, kulturali jew soċjali ta’ dik il-persuna;

(10)“data ġenetika” tfisser id-data personali kollha relatata mal-karatteristiċi ġenetiċi tal-individwu li jkunu ntirtu jew ġew akkwiżiti, li tagħti informazzjoni unika dwar il-fiżjoloġija jew is-saħħa ta’ dak l-individwu, li tirriżulta b’mod partikolari minn analiżi ta’ kampjun bijoloġiku tal-individwu inkwistjoni;

(11)“data bijometrika” tfisser data personali li tirriżulta mill-ipproċessar tekniku speċifiku relatat mal-karatteristiċi fiżiċi, fiżjoloġiċi jew komportamentali ta’ persuna fiżika, li tippermetti jew tikkonferma l-identifikazzjoni unika ta’ dik il-persuna fiżika, bħal immaġnijiet tal-wiċċ jew data dattiloskopika;

(12)“ipproċessar” tfisser kwalunkwe operazzjoni jew sett ta’ operazzjonijiet li jitwettqu fuq data personali jew settijiet ta’ data personali, kemm jekk b’mezzi awtomatizzati jew le, bħall-ġbir, ir-reġistrazzjoni, l-organizzazzjoni, l-istrutturar, il-ħżin, l-adattament jew l-alterazzjoni, l-irkupru, il-konsultazzjoni, l-użu, id-divulgazzjoni bit-trażmissjoni, it-tixrid jew modi oħra li jrenduha/jrenduhom disponibbli, l-allinjament jew il-kombinazzjoni, ir-restrizzjoni, it-tħassir jew il-qerda;

(13)“ksur ta’ data personali” tfisser ksur tas-sigurtà li jwassal għal qerda aċċidentali jew illegali, telf, bidliet, divulgazzjoni mhux awtorizzata jew aċċess għal data personali trażmessa, maħżuna jew ipproċessata b’xi mod ieħor;

(14)“awtorità superviżorja” tfisser awtorità domestika indipendenti waħda jew aktar li huma, weħidhom jew b’mod kumulattiv, responsabbli għall-protezzjoni tad-data skont l-Artikolu 14, u li ġew notifikati skont dak l-Artikolu; dan jista’ jinkludi awtoritajiet li r-responsabbiltà tagħhom tkopri wkoll drittijiet oħra tal-bniedem;

(15)“organizzazzjoni internazzjonali” tfisser organizzazzjoni u l-korpi subordinati tagħha regolata bil-liġi internazzjonali pubblika jew kwalunkwe korp ieħor li huwa stabbilit minn, jew abbażi ta’ ftehim bejn żewġ pajjiżi jew aktar.

KAPITOLU II

SKAMBJU TA’ DATA PERSONALI U PROTEZZJONI TAD-DATA

ARTIKOLU 3

Il-finijiet tal-ipproċessar ta’ data personali

(1)Id-data personali mitluba u riċevuta skont dan il-Ftehim għandha tiġi pproċessata biss għall-finijiet tal-prevenzjoni, l-investigazzjoni, il-kxif jew il-prosekuzzjoni ta’ reati kriminali jew l-eżekuzzjoni ta’ pieni kriminali fil-limiti tal-Artikolu 4(5) u l-mandati rispettivi tal-awtoritajiet kompetenti.

(2)L-awtorità kompetenti li tittrasferixxi għandha tindika b’mod ċar, mhux aktar tard mill-mument tat-trasferiment ta’ data personali, l-iskop jew l-iskopijiet speċifiċi li għalihom tkun qed tiġi ttrasferita d-data. Għal trasferimenti lill-Europol, l-iskop jew l-iskopijiet ta’ tali trasferiment għandu/għandhom ikun(u) speċifikat(i) f’konformità mal-iskopijiet speċifiċi tal-proċessar stabbiliti fir-Regolament tal-Europol. Il-Partijiet Kontraenti jistgħu jiddeċiedu bi qbil komuni li d-data personali trasferita tista’ tiġi pproċessata għal skop supplimentari, kompatibbli u speċifiku, li għandu jiġi speċifikat fil-mument ta’ tali qbil komuni u għandu jaqa’ fil-kamp ta’ applikazzjoni tal-paragrafu 1 ta’ dan l-Artikolu.

ARTIKOLU 4

Prinċipji ġenerali tal-protezzjoni tad-data

(1) Kull Parti Kontraenti għandha tipprovdi li d-data personali skambjata skont dan il-Ftehim tkun:

(a)ipproċessata b’mod ġust, legali, f’konformità mar-rekwiżiti ta’ trasparenza fl-Artikolu 29(1), u biss għall-fini jew il-finijiet li għalihom tkun ġiet ittrasferita f’konformità mal-Artikolu 3;

(b)tkun adegwata, rilevanti, u limitata għal dak li huwa meħtieġ b’rabta mal-finijiet li għalihom tkun qed tiġi pproċessata;

(c)preċiża u tinżamm aġġornata; kull Parti Kontraenti għandha tipprovdi li l-awtoritajiet kompetenti tagħha jieħdu kull pass raġonevoli biex jiżguraw li d-data personali li ma tkunx preċiża, b’kont meħud tal-finijiet li għalihom tiġi pproċessata, tiġi rettifikata jew titħassar mingħajr dewmien żejjed;

(d)tinżamm f’forma li tippermetti l-identifikazzjoni tas-suġġetti tad-data għal mhux aktar żmien milli jkun neċessarju għall-finijiet li għalihom id-data personali tkun qiegħda tiġi pproċessata;

(e)tiġi pproċessata b’mod li jiżgura sigurtà adatta tad-data personali.

(2)L-awtorità kompetenti li tittrasferixxi, fil-mument tat-trasferiment ta’ data personali, tista’ tindika kwalunkwe restrizzjoni fuq l-aċċess għaliha jew fuq l-użu li għandu jsir minnha, f’termini ġenerali jew speċifiċi, inkluż fir-rigward tat-trasferiment ulterjuri, tat-tħassir jew tal-qerda tagħha wara ċertu perjodu ta’ żmien, jew il-proċessar ulterjuri tagħha. Fejn il-ħtieġa għal tali restrizzjonijiet issir evidenti wara li tkun ġiet ipprovduta l-informazzjoni, l-awtorità kompetenti li tittrasferixxi għandha tinforma lill-awtorità riċeventi b’dan.

(3)Kull Parti Kontraenti għandha tiżgura li l-awtorità kompetenti riċeventi tikkonforma ma’ kwalunkwe restrizzjoni fuq l-aċċess jew l-użu ulterjuri tad-data personali indikata mill-awtorità kompetenti li tittrasferixxi kif deskritt fil-paragrafu 2.

(4)Kull Parti Kontraenti għandha tipprovdi li l-awtoritajiet kompetenti tagħha jimplimentaw miżuri tekniċi u organizzattivi xierqa b’tali mod li jkunu jistgħu juru li l-ipproċessar se jikkonforma ma’ dan il-Ftehim u li d-drittijiet tas-suġġetti tad-data kkonċernati huma protetti.

(5)Kull Parti Kontraenti għandha tiżgura li l-awtoritajiet kompetenti tagħha ma jittrasferixxux data personali li tkun inkisbet bi ksur manifest tad-drittijiet tal-bniedem rikonoxxuti min-normi tal-liġi internazzjonali li jorbtu lill-Partijiet Kontraenti. Kull Parti Kontraenti għandha tiżgura li d-data personali riċevuta ma tintużax biex tintalab, tingħata jew tiġi eżegwita l-piena tal-mewt jew kwalunkwe forma ta’ tortura u trattament jew pieni krudili, inumani jew degradanti oħra.

(6)Kull Parti Kontraenti għandha tiżgura li jinżamm rekord tat-trasferimenti kollha ta’ data personali skont dan il-Ftehim u tal-għan jew l-iskopijiet għal dawk it-trasferimenti.

ARTIKOLU 5

Kategoriji speċjali ta’ data personali u kategoriji differenti ta’ suġġetti tad-data

(1)It-trasferiment u l-ipproċessar ulterjuri ta’ data personali fir-rigward ta’ vittmi ta’ reat kriminali, ta’ xhieda jew ta’ persuni oħra li jistgħu jipprovdu informazzjoni dwar reati kriminali, jew fir-rigward ta’ persuni taħt it-18-il sena, għandu jkun ipprojbit sakemm tali trasferiment ma jkunx strettament meħtieġ u proporzjonat f’każijiet individwali għall-prevenzjoni jew għall-ġlieda kontra reat kriminali.

(2)It-trasferiment u l-ipproċessar ulterjuri ta’ data personali li tiżvela oriġini razzjali jew etnika, opinjonijiet politiċi, twemmin reliġjuż jew filosofiku, jew sħubija fi trade union, data ġenetika, data bijometrika għall-fini ta’ identifikazzjoni unika ta’ persuna fiżika, jew data dwar is-saħħa, jew data li tikkonċerna l-ħajja sesswali jew l-orjentazzjoni sesswali ta’ persuna fiżika għandu jkun permess biss fejn strettament meħtieġ u proporzjonat f’każijiet individwali għall-prevenzjoni jew il-ġlieda kontra reat kriminali, u jekk dik id-data, ħlief data bijometrika, tissupplimenta data personali oħra.

(3)Il-Partijiet Kontraenti għandhom jiżguraw li l-ipproċessar tad-data personali skont il-paragrafi 1 u 2 ta’ dan l-Artikolu jkun soġġett għal salvagwardji xierqa li jħarsu kontra r-riskji speċifiċi involuti, inklużi restrizzjonijiet fuq l-aċċess, miżuri għas-sigurtà tad-data skont it-tifsira tal-Artikolu 19 limitazzjonijiet fuq trasferimenti ulterjuri skont l-Artikolu 7.

ARTIKOLU 6

Ipproċessar awtomatizzat ta’ data personali

Deċiżjonijiet ibbażati unikament fuq ipproċessar awtomatizzat tad-data personali skambjata, inkluż it-tfassil ta’ profili, li jistgħu jipproduċu effett legali negattiv fuq is-suġġett tad-data jew jaffettwawh b’mod sinifikanti, għandhom ikunu pprojbiti, sakemm ma jkunux awtorizzati fil-liġi għall-prevenzjoni jew il-ġlieda kontra reat kriminali u b’salvagwardji xierqa għad-drittijiet u l-libertajiet tas-suġġett tad-data, inkluż mill-inqas id-dritt li jinkiseb intervent uman.

ARTIKOLU 7

Trasferiment ulterjuri tad-data personali li tiġi riċevuta

(1)Il-Brażil għandu jiżgura li l-awtoritajiet kompetenti tiegħu jittrasferixxu biss data personali riċevuta skont dan il-Ftehim lil awtoritajiet oħra fil-Brażil jekk:

(a)L-Europol ikun ta l-awtorizzazzjoni espliċita tiegħu minn qabel;

(b)il-fini jew il-finijiet tat-trasferiment ulterjuri jkunu l-istess bħall-fini jew il-finijiet oriġinali tat-trasferiment mill-Europol; kif ukoll

(c)it-trasferiment ulterjuri huwa soġġett għall-istess kundizzjonijiet u salvagwardji bħal dawk li japplikaw għat-trasferiment oriġinali.

Mingħajr preġudizzju għall-Artikolu 4(2), ir-rekwiżit stabbilit fil-punt (a) ta’ dan il-paragrafu ma għandux għalfejn jiġi ssodisfat meta l-awtorità riċeventi tkun hija stess awtorità kompetenti tal-Brażil.

(2)L-Unjoni għandha tiżgura li l-Europol tittrasferixxi biss data personali riċevuta skont dan il-Ftehim lil awtoritajiet fl-Unjoni għajr dawk elenkati fl-Anness III jekk:

(a)il-Brażil ikun ta l-awtorizzazzjoni espliċita tiegħu minn qabel;

(b)l-għan tat-trasferiment ulterjuri jkun l-istess bħall-iskop tat-trasferiment mill-Brażil; kif ukoll

(c)it-trasferiment ulterjuri huwa soġġett għall-istess kundizzjonijiet u salvagwardji bħal dawk li japplikaw għat-trasferiment oriġinali.

Mingħajr preġudizzju għall-Artikolu 4(2), ir-rekwiżit stabbilit fil-punt (a) ta’ dan il-paragrafu ma għandux għalfejn jiġi ssodisfat meta l-awtorità riċeventi tkun waħda mill-korpi jew mill-awtoritajiet elenkati fl-Anness III.

(3)Il-Brażil għandu jiżgura li t-trasferimenti ulterjuri ta’ data personali riċevuti mill-awtoritajiet kompetenti tagħha skont dan il-Ftehim lill-awtoritajiet ta’ pajjiż terz jew lil organizzazzjoni internazzjonali jkunu pprojbiti, sakemm ma jiġux issodisfati l-kundizzjonijiet li ġejjin:

(a)L-Europol ikun ta l-awtorizzazzjoni espliċita tiegħu minn qabel;

(b)il-fini jew il-finijiet tat-trasferiment ulterjuri jkunu l-istess bħall-fini jew il-finijiet oriġinali tat-trasferiment mill-Europol; kif ukoll

(c)it-trasferiment ulterjuri huwa soġġett għall-istess kundizzjonijiet u salvagwardji bħal dawk li japplikaw għat-trasferiment oriġinali.

(4)Il-Europol tista’ tagħti l-awtorizzazzjoni tagħha skont il-paragrafu 3, punt a, ta’ dan l-Artikolu għal trasferiment ulterjuri lill-awtorità ta’ pajjiż terz jew lil organizzazzjoni internazzjonali biss jekk u sa fejn ikun hemm fis-seħħ deċiżjoni ta’ adegwatezza, ftehim internazzjonali li jipprovdi salvagwardji xierqa fir-rigward tal-protezzjoni tal-privatezza u d-drittijiet u l-libertajiet fundamentali tal-individwi, ftehim ta’ kooperazzjoni jew kwalunkwe raġuni legali oħra għat-trasferimenti ta’ data personali fis-sens tar-Regolament tal-Europol li jkopri t-trasferiment ulterjuri.

(5)L-Unjoni għandha tiżgura li t-trasferimenti ulterjuri ta’ data personali riċevuta mill-Europol skont dan il-Ftehim lil awtoritajiet ta’ pajjiżi terzi jew organizzazzjoni internazzjonali jkunu pprojbiti, sakemm ma jiġux issodisfati l-kundizzjonijiet li ġejjin:

(a)il-Brażil ikun ta l-awtorizzazzjoni espliċita tiegħu minn qabel;

(b)l-iskop jew l-iskopijiet tat-trasferiment ’il quddiem huwa l-istess bħall-iskop oriġinali tat-trasferiment mill-Brażil; kif ukoll

(c)it-trasferiment ulterjuri huwa soġġett għall-istess kundizzjonijiet u salvagwardji bħal dawk li japplikaw għat-trasferiment oriġinali.

(6)Fl-applikazzjoni ta’ dan l-Artikolu, trasferimenti ulterjuri ta’ kategoriji speċjali ta’ data personali msemmija fl-Artikolu 5 għandhom ikunu permessi biss jekk tali trasferimenti ulterjuri jkunu strettament meħtieġa u proporzjonati f’każijiet individwali li jikkonċernaw reati kriminali.

DRITTIJIET TAS-SUĠĠETTI TAD-DATA

ARTIKOLU 8

Dritt ta’ aċċess

(1)Il-Partijiet Kontraenti għandhom jiżguraw li s-suġġett tad-data jkollu d-dritt, f’intervalli raġonevoli, li jikseb informazzjoni dwar jekk id-data personali relatata miegħu hijiex ipproċessata skont dan il-Ftehim, u meta dan ikun il-każ, l-aċċess għal mill-inqas l-informazzjoni li ġejja:

(a)konferma dwar jekk id-data li tirrelata miegħu jew magħha tkunx qed tiġi pproċessata jew le;

(b)informazzjoni dwar mill-inqas l-għan jew l-iskopijiet tal-ipproċessar, il-kategoriji ta’ data kkonċernati, u fejn applikabbli r-riċevituri jew il-kategoriji ta’ riċevituri li lilhom tiġi żvelata d-data;

(c)l-eżistenza tad-dritt li jintalbu mingħand l-awtorità kompetenti r-rettifika, it-tħassir ta’ data personali jew ir-restrizzjoni tal-ipproċessar ta’ data personali li tikkonċerna s-suġġett tad-data;

(d)indikazzjoni tal-bażi legali għall-ipproċessar;

(e)il-perjodu previst li matulu d-data personali tkun se tinħażen, jew jekk dak ma jkunx possibbli, il-kriterji użati biex jiġi ddeterminat dak il-perjodu;

(f)komunikazzjoni f’forma intelliġibbli tad-data personali li tkun qed tiġi pproċessata u ta’ kwalunkwe informazzjoni disponibbli dwar is-sorsi tagħha.

(2)F’każijiet fejn jiġi eżerċitat id-dritt ta’ aċċess skont il-paragrafu 1, il-Parti Kontraenti li tittrasferixxi tiġi kkonsultata bil-miktub, fuq bażi mhux vinkolanti qabel ma tittieħed deċiżjoni finali dwar it-talba għal aċċess.

(3)Il-Partijiet Kontraenti jistgħu jipprevedu li l-għoti ta’ informazzjoni bi tweġiba għal kwalunkwe talba skont il-paragrafu 1 jiġi ttardjat, irrifjutat jew ristrett jekk u sakemm tali dewmien, rifjut jew restrizzjoni jikkostitwixxu miżura li hija meħtieġa u proporzjonata b’kont meħud tad-drittijiet fundamentali u l-interessi tas-suġġett tad-data, sabiex:

(a)jiżguraw li kwalunkwe investigazzjoni u prosekuzzjoni kriminali ma jiġux ipperikolati;

(b)jipproteġu d-drittijiet u l-libertajiet ta’ partijiet terzi; jew

(c)jipproteġu s-sigurtà nazzjonali u l-ordni pubbliku jew il-prevenzjoni tal-kriminalità.

(4)Il-Partijiet Kontraenti għandhom jiżguraw li l-awtorità kompetenti li tkun irċeviet it-talba tinforma lis-suġġett tad-data bil-miktub dwar kwalunkwe dewmien, rifjut jew restrizzjoni ta’ aċċess u dwar ir-raġunijiet għal tali dewmien, rifjut jew restrizzjoni ta’ aċċess. Dawn ir-raġunijiet jistgħu jitħallew barra jekk u sakemm dan idgħajjef l-iskop tad-dewmien, ir-rifjut jew ir-restrizzjoni skont il-paragrafu 3. L-awtorità kompetenti għandha tinforma lis-suġġett tad-data dwar il-possibbiltà li jressaq ilment mal-awtoritajiet superviżorji rispettivi u dwar mezzi disponibbli oħra ta’ rimedju amministrattiv u ġudizzjarju previsti fl-oqfsa legali rispettivi tagħhom.

ARTIKOLU 9

Dritt għal rettifika, tħassir u restrizzjoni

(1)Il-Partijiet Kontraenti għandhom jiżguraw li s-suġġett tad-data jkollu d-dritt li jkollu data personali mhux preċiża trasferita skont dan il-Ftehim rettifikata mill-awtoritajiet kompetenti. Filwaqt li jitqiesu l-għan jew l-għanijiet tal-ipproċessar, dan jinkludi d-dritt li d-data personali mhux kompluta tiġi ttrasferita skont dan il-Ftehim.

(1)Rettifika għandha tinkludi t-tħassir ta’ data personali li ma tkunx għadha meħtieġa għall-għan jew għall-għanijiet li għalihom tiġi pproċessata.

(2)Il-Partijiet Kontraenti jistgħu jipprovdu għar-restrizzjoni tal-ipproċessar aktar milli t-tħassir ta’ data personali jekk ikun hemm raġunijiet raġonevoli biex wieħed jemmen li tali tħassir jista’ jaffettwa l-interessi leġittimi tas-suġġett tad-data.

(3)L-awtoritajiet kompetenti għandhom jinfurmaw lil xulxin bil-miżuri meħuda skont il-paragrafi 1, 2 u 3. L-awtorità kompetenti li tirċievi għandha tirrettifika, tħassar jew tirrestrinġi l-ipproċessar f’konformità mal-azzjoni meħuda mill-awtorità kompetenti li tittrasferixxi.

(4)Il-Partijiet Kontraenti għandhom jipprovdu lill-awtorità kompetenti li tkun irċeviet it-talba biex tinforma lis-suġġett tad-data bil-miktub mingħajr dewmien żejjed, u fi kwalunkwe każ fi żmien tliet xhur minn meta tirċievi talba skont il-paragrafu 1 jew 2, li d-data li tikkonċerna s-suġġett tad-data tkun ġiet rettifikata, imħassra jew l-ipproċessar ikun ġie ristrett.

(5)Il-Partijiet Kontraenti għandhom jipprevedu li l-awtorità kompetenti li tkun irċeviet it-talba tinforma lis-suġġett tad-data bil-miktub, mingħajr dewmien żejjed u fi kwalunkwe każ fi żmien tliet xhur minn meta tirċievi talba ta’ kwalunkwe rifjut ta’ rettifika, tħassir jew restrizzjoni tal-ipproċessar, bir-raġunijiet għal tali rifjut u bil-possibbiltà li jitressaq ilment mal-awtoritajiet superviżorji rispettivi u mezzi oħra disponibbli ta’ rimedju amministrattiv u ġudizzjarju previsti fl-oqfsa legali rispettivi tagħhom.

ARTIKOLU 10

Notifika ta’ ksur tad-data personali lill-awtoritajiet ikkonċernati

(1)Il-Partijiet Kontraenti għandhom jiżguraw, fil-każ ta’ ksur ta’ data personali li jaffettwa data personali trasferita skont dan il-Ftehim, li l-awtoritajiet kompetenti rispettivi jinnotifikaw lil xulxin kif ukoll lill-awtorità superviżorja rispettiva tagħhom dwar dak il-ksur ta’ data personali mingħajr dewmien, u jieħdu miżuri biex itaffu l-effetti negattivi possibbli tiegħu.

(2)In-notifika għandha mill-inqas:

(a)tiddeskrivi n-natura tal-ksur ta’ data personali inklużi, fejn hu possibbli, il-kategoriji u n-numru approssimattiv tas-suġġetti tad-data kkonċernati u l-kategoriji u n-numru approssimattiv ta’ reġistrazzjonijiet ikkonċernati ta’ data personali;

(b)tiddeskrivi l-konsegwenzi mistennija tal-ksur ta’ data personali;

(c)tiddeskrivi l-miżuri meħuda jew proposti li għandhom jittieħdu mill-awtorità kompetenti biex tindirizza l-ksur tad-data personali, inklużi l-miżuri meħuda biex jittaffew l-effetti negattivi possibbli tiegħu.

(3)Sa fejn ma jkunx possibbli li tiġi pprovduta l-informazzjoni kollha meħtieġa fl-istess ħin, din tista’ tiġi pprovduta f’fażijiet. L-informazzjoni pendenti għandha tiġi pprovduta mingħajr aktar dewmien żejjed.

(4)Il-Partijiet Kontraenti għandhom jiżguraw li l-awtoritajiet kompetenti rispettivi tagħhom jiddokumentaw kwalunkwe ksur ta’ data personali li jaffettwa d-data personali ttrasferita skont dan il-Ftehim, inklużi l-fatti relatati mal-ksur tad-data personali, l-effetti tiegħu u l-azzjoni ta’ rimedju meħuda, biex b’hekk l-awtorità superviżorja rispettiva tagħhom tkun tista’ tivverifika l-konformità mar-rekwiżiti legali applikabbli.

ARTIKOLU 11

Komunikazzjoni lis-suġġett tad-data dwar il-ksur tad-data personali

(1)Il-Partijiet Kontraenti għandhom, fejn ksur ta’ data personali kif imsemmi fl-Artikolu 10 x’aktarx jaffettwa serjament u b’mod negattiv id-drittijiet u l-libertajiet tas-suġġett tad-data, jipprevedu li l-awtoritajiet kompetenti rispettivi tagħhom jikkomunikaw il-ksur tad-data personali lis-suġġett tad-data mingħajr dewmien żejjed.

(2)Il-Komunikazzjoni lis-suġġett tad-data skont il-paragrafu 1 għandha tiddeskrivi, fejn possibbli, in-natura tal-ksur ta’ data personali, tirrakkomanda miżuri biex jittaffew l-effetti negattivi possibbli tal-ksur ta’ data personali, u tipprovdi l-isem u d-dettalji ta’ kuntatt tal-punt ta’ kuntatt fejn tista’ tinkiseb aktar informazzjoni.

(3)Il-komunikazzjoni lis-suġġett tad-data skont il-paragrafu 1 ma għandhiex tkun meħtieġa jekk:

(a)id-data personali kkonċernata mill-ksur kienet soġġetta għal miżuri ta’ protezzjoni teknoloġika xierqa li jagħmlu d-data ma tinftiehemx minn kwalunkwe persuna li ma tkunx awtorizzata li jkollha aċċess għal dik id-data;

(b)ittieħdu miżuri sussegwenti li jiżguraw li d-drittijiet u l-libertajiet tas-suġġett tad-data x’aktarx li ma jibqgħux jiġu affettwati b’mod sever; jew

(c)il-komunikazzjoni lis-suġġett tad-data skont il-paragrafu 1 tkun tinvolvi sforz sproporzjonat, b’mod partikolari minħabba l-għadd ta’ każijiet involuti; f’każ bħal dan, minflok għandu jkun hemm komunikazzjoni pubblika jew miżura simili li fiha s-suġġett tad-data jiġi informati b’mod ugwalment effettiv.

(4)Il-Komunikazzjoni lis-suġġett tad-data skont il-paragrafu 1 tista’ tiġi ttardjata, ristretta jew titħalla barra fejn tali komunikazzjoni x’aktarx li:

(a)tostakola l-inkjesti, l-investigazzjonijiet jew il-proċeduri uffiċjali jew legali;

(b)tippreġudika l-prevenzjoni, il-kxif, l-investigazzjoni u l-prosekuzzjoni ta’ reati kriminali jew l-eżekuzzjoni ta’ pieni kriminali, l-ordni pubbliku jew is-sigurtà nazzjonali;

(c)taffettwa d-drittijiet u l-libertajiet ta’ partijiet terzi;

fejn dan jikkostitwixxi miżura meħtieġa u proporzjonata b’kunsiderazzjoni xierqa għall-interessi leġittimi tas-suġġett tad-data kkonċernat.

ARTIKOLU 12

Ħżin, rieżami, korrezzjoni u tneħħija tad-data personali

(1)Il-Partijiet Kontraenti għandhom jipprovdu għal limiti ta’ żmien xierqa li għandhom jiġu stabbiliti għall-ħażna ta’ data personali riċevuta taħt dan il-Ftehim jew għal reviżjoni perjodika tal-ħtieġa għall-ħażna ta’ data personali, sabiex id-data personali tinħażen biss sakemm ikun meħtieġ għall-iskop jew l-iskopijiet li għalihom tiġi trasferita.

(2)Fi kwalunkwe każ, il-ħtieġa għal ħażna kontinwa ta’ data personali għandha tiġi riveduta mhux aktar tard minn tliet snin wara li d-data personali tkun ġiet trasferita, u jekk ma tittieħed l-ebda deċiżjoni ġustifikata u dokumentata dwar it-tkomplija tal-ħażna ta’ data personali, id-data personali għandha titħassar awtomatikament wara tliet snin.

(3)Meta awtorità kompetenti jkollha raġuni biex temmen li d-data personali li tkun ġiet ittrasferita preċedentement minnha ma tkunx korretta, preċiża, ma għadhiex aġġornata jew ma kellhiex tiġi ttrasferita, hija għandha tinforma lill-awtorità kompetenti riċeventi, li għandha tikkoreġi jew tħassar dik id-data, u tipprovdi notifika dwar dan lill-awtorità kompetenti trasferenti.

(4)Meta awtorità kompetenti jkollha raġuni biex temmen li d-data personali li tkun irċeviet preċedentement ma tkunx korretta, preċiża, ma għadhiex aġġornata jew ma kellhiex tiġi ttrasferita, hija għandha tinforma lill-awtorità kompetenti li tittrasferixxi, li għandha tipprovdi l-pożizzjoni tagħha dwar il-kwistjoni. Meta l-awtorità kompetenti li tittrasferixxi tikkonkludi li d-data personali mhijiex korretta, mhijiex preċiża, ma għadhiex aġġornata jew ma kellhiex tiġi ttrasferita, hija għandha tinforma lill-awtorità kompetenti riċeventi, li għandha tikkoreġi jew tħassar dik id-data, u tipprovdi notifika dwar dan lill-awtorità kompetenti trasferenti.

ARTIKOLU 13

Reġistrazzjoni u dokumentazzjoni

(1)Il-Partijiet Kontraenti għandhom jipprovdu għaż-żamma ta’ reġistrazzjonijiet jew dokumentazzjoni tal-ġbir, alterazzjoni, aċċess, żvelar inklużi trasferimenti ulterjuri, kombinazzjoni u tħassir ta’ data personali.

(2)Ir-reġistri jew id-dokumentazzjoni msemmija fil-paragrafu 1 għandhom jitqiegħdu għad-dispożizzjoni tal-awtorità superviżorja rispettiva fuq talba għall-fini ta’ verifika tal-legalità tal-ipproċessar, l-awtomonitoraġġ u l-iżgurar tal-integrità u s-sigurtà xierqa tad-data.

ARTIKOLU 14

Awtorità superviżorja

(1)Kull Parti Kontraenti għandha tiżgura li jkun hemm awtorità pubblika responsabbli għall-protezzjoni tad-data (awtorità superviżorja) biex tissorvelja indipendentament kwistjonijiet li jaffettwaw id-dritt għall-privatezza tal-individwi, inklużi r-regoli domestiċi rilevanti skont dan il-Ftehim, sabiex jiġu protetti d-drittijiet u l-libertajiet fundamentali ta’ persuni fiżiċi fir-rigward tal-ipproċessar ta’ data personali. Il-Partijiet Kontraenti għandhom jinnotifikaw lil xulxin bl-awtorità li kull waħda minnhom tinnomina bħala l-awtorità superviżorja.

(2)Il-Partijiet Kontraenti għandhom jiżguraw li kull awtorità superviżorja:

(a)taġixxi b’indipendenza sħiħa fit-twettiq tal-kompiti tagħha u fl-eżerċitar tas-setgħat tagħha; għandha taġixxi ħielsa minn influwenza esterna u la tfittex u lanqas taċċetta struzzjonijiet; il-membri tagħha għandu jkollhom mandat sigur, inklużi salvagwardji kontra t-tneħħija arbitrarja;

(b)ikollha r-riżorsi umani, tekniċi u finanzjarji, il-bini u l-infrastruttura meħtieġa għat-twettiq effettiv tal-kompiti tagħha u għall-eżerċitar tas-setgħat tagħha;

(c)ikollha setgħat effettivi ta’ investigazzjoni u ta’ intervent biex teżerċita sorveljanza fuq il-korpi li tissorvelja, u biex tinvolvi ruħha fi proċedimenti legali;

(d)għandha s-setgħa li tisma’ lmenti minn individwi dwar l-użu tad-data personali tagħhom mill-awtoritajiet kompetenti taħt is-superviżjoni tagħha.

ARTIKOLU 15

Rimedju amministrattiv u ġudizzjarju

(1)Is-suġġetti tad-data għandu jkollhom id-dritt għal rimedju amministrattiv u ġudizzjarju effettiv għall-ksur tad-drittijiet u s-salvagwardji rikonoxxuti f’dan il-Ftehim li jirriżultaw mill-ipproċessar tad-data personali tagħhom. Il-Partijiet Kontraenti għandhom jinnotifikaw lil xulxin bil-leġislazzjoni domestika li kull wieħed minnhom jikkunsidra bħala li tipprovdi għad-drittijiet iggarantiti taħt dan l-Artikolu.

(2)Dan għandu jinkludi d-dritt għal kumpens għal kwalunkwe dannu kkawżat lis-suġġett tad-data.

KAPITOLU III

SKAMBJU TA’ DATA MHUX PERSONALI

ARTIKOLU 16

Prinċipji tal-protezzjoni tad-data għal data mhux personali

(1)Kull Parti Kontraenti għandha tipprevedi li d-data mhux personali skambjata skont dan il-Ftehim tiġi pproċessata b’mod ġust u legali, u b’mod li jiżgura sigurtà xierqa tad-data mhux personali.

(2)L-awtorità kompetenti li tittrasferixxi tista’ tindika, fil-mument tat-trasferiment ta’ data personali, kwalunkwe restrizzjoni fuq l-aċċess għaliha jew fuq l-użu li għandu jsir minnha, f’termini ġenerali jew speċifiċi, inkluż fir-rigward tat-trasferiment ulterjuri, tat-tħassir jew tal-qerda tagħha wara ċertu perjodu ta’ żmien, jew il-proċessar ulterjuri tagħha. Fejn il-ħtieġa għal tali restrizzjonijiet issir evidenti wara li tkun ġiet ipprovduta d-data, l-awtorità kompetenti li tittrasferixxi għandha tinforma lill-awtorità riċeventi b’dan.

(3)Kull Parti Kontraenti għandha tiżgura li l-awtorità kompetenti riċeventi tikkonforma ma’ kwalunkwe restrizzjoni fuq l-aċċess jew l-użu ulterjuri tad-data mhux personali indikata mill-awtorità kompetenti li tittrasferixxi kif deskritt fil-paragrafu 2.

(4)Kull Parti Kontraenti għandha tiżgura li l-awtoritajiet kompetenti tagħha ma jittrasferixxux data mhux personali li tkun inkisbet bi ksur manifest tad-drittijiet tal-bniedem rikonoxxuti min-normi tal-liġi internazzjonali li jorbtu lill-Partijiet Kontraenti. Kull Parti Kontraenti għandha tiżgura li d-data mhux personali riċevuta ma tintużax biex tintalab, tingħata jew tiġi eżegwita piena tal-mewt jew kwalunkwe forma ta’ trattament krudili jew inuman.

ARTIKOLU 17

Trasferiment ulterjuri tad-data mhux personali li tiġi riċevuta

(1)Il-Brażil għandu jiżgura li l-awtoritajiet kompetenti tiegħu jittrasferixxu biss data mhux personali riċevuta skont dan il-Ftehim lil awtoritajiet oħra tal-Brażil jew lill-awtoritajiet ta’ pajjiż terz jew lil organizzazzjoni internazzjonali, jekk:

(a)L-Europol ikun ta l-awtorizzazzjoni espliċita tiegħu minn qabel;

(b)it-trasferiment ulterjuri huwa soġġett għall-istess kundizzjonijiet u salvagwardji bħal dawk li japplikaw għat-trasferiment oriġinali.

Mingħajr preġudizzju għall-Artikolu 16(2), ir-rekwiżit stabbilit fil-punt (a) ta’ dan il-paragrafu ma għandux għalfejn jiġi ssodisfat meta l-awtorità riċeventi tkun hija stess awtorità kompetenti tal-Brażil.

(2)L-Unjoni għandha tiżgura li l-Europol tittrasferixxi biss data mhux personali riċevuta skont dan il-Ftehim lil korpi jew awtoritajiet oħra tal-Unjoni ta’ pajjiżi terzi jew organizzazzjoni internazzjonali, jekk:

(a)il-Brażil ikun ta l-awtorizzazzjoni espliċita tiegħu minn qabel;

(b)it-trasferiment ulterjuri huwa soġġett għall-istess kundizzjonijiet u salvagwardji bħal dawk li japplikaw għat-trasferiment oriġinali.

Mingħajr preġudizzju għall-Artikolu 16(2), ir-rekwiżit stabbilit fil-punt (a) ta’ dan il-paragrafu ma għandux għalfejn jiġi ssodisfat meta l-awtorità riċeventi tkun waħda mill-korpi jew mill-awtoritajiet elenkati fl-Anness III.

KAPITOLU IV

DISPOŻIZZJONIJIET KOMUNI GĦALL-ISKAMBJU TA’ DATA PERSONALI U MHUX PERSONALI

ARTIKOLU 18

Valutazzjoni tal-affidabbiltà tas-sors u l-preċiżjoni tad-data

(1)L-awtoritajiet kompetenti għandhom jindikaw sa fejn ikun possibbli, mhux aktar tard mill-mument tat-trasferiment tad-data, l-affidabbiltà tas-sors tad-data skambjata skont dan il-Ftehim abbażi ta’ wieħed jew aktar mill-kriterji li ġejjin:

(a)“(A)” fejn ma jkun hemm l-ebda dubju dwar l-awtentiċità, l-affidabbiltà u l-kompetenza tas-sors, jew jekk id-data tiġi pprovduta minn sors li, fil-passat, ikun wera li huwa affidabbli fil-każijiet kollha;

(b)“(B)” fejn id-data tiġi pprovduta minn sors li minnu l-informazzjoni riċevuta fil-biċċa l-kbira tal-każijiet tkun uriet li hija affidabbli;

(c)“(C)” fejn id-data tiġi pprovduta minn sors li minnu l-informazzjoni riċevuta fil-biċċa l-kbira tal-każijiet tkun uriet li mhijiex affidabbli;

(d)“(X)” fejn l-affidabbiltà tas-sors ma tistax tiġi vvalutata.

(2)L-awtoritajiet kompetenti għandhom jindikaw kemm jista’ jkun, sa mhux aktar tard mill-mument tat-trasferiment tad-data, il-preċiżjoni tad-data abbażi ta’ wieħed jew aktar mill-kriterji li ġejjin:

(a)“(1)” għal data li l-preċiżjoni tagħha ma tkunx f’dubju fil-ħin tat-trasferiment;

(b)“(2)” għal data magħrufa personalment mis-sors iżda mhux magħrufa personalment mill-uffiċjal li jgħaddiha;

(c)“(3)” għal data mhux magħrufa personalment mis-sors iżda kkorroborata minn informazzjoni oħra diġà rreġistrata;

(d)“(4)” għal data li mhijiex magħrufa personalment mis-sors u li ma tistax tiġi kkorroborata.

(3)Meta l-awtorità kompetenti li tirċievi, abbażi tal-informazzjoni diġà fil-pussess tagħha, tasal għall-konklużjoni li l-valutazzjoni tad-data pprovduta mill-awtorità kompetenti li tittrasferixxi jew tas-sors tagħha mwettqa f’konformità mal-paragrafi 1 u 2 teħtieġ korrezzjoni, hija għandha tinforma lil dik l-awtorità kompetenti u għandha tipprova taqbel dwar emenda għall-valutazzjoni. L-awtorità kompetenti li tirċievi ma għandhiex tbiddel il-valutazzjoni tad-data riċevuta jew tas-sors tagħha mingħajr tali ftehim.

(4)Jekk awtorità kompetenti tirċievi data mingħajr valutazzjoni, hija għandha tipprova kemm jista’ jkun u fejn possibbli bi ftehim mal-awtorità kompetenti li tittrasferixxi tivvaluta l-affidabbiltà tas-sors jew il-preċiżjoni tad-data abbażi tal-informazzjoni li diġà tkun fil-pussess tagħha.

(5)Jekk ma tkun tista’ ssir l-ebda valutazzjoni affidabbli, id-data għandha tiġi evalwata f’konformità mal-paragrafu 1, il-punt d, u l-paragrafu 2, il-punt (d), kif applikabbli.

ARTIKOLU 19

Sigurtà tad-data

(1)Il-Partijiet Kontraenti għandhom jiżguraw li d-data trasferita skont dan il-Ftehim tiġi pproċessata b’mod li jiżgura sigurtà xierqa tad-data.

(2)Il-Partijiet Kontraenti għandhom jiżguraw l-implimentazzjoni ta’ miżuri tekniċi u organizzattivi biex jipproteġu d-data skambjata skont dan il-Ftehim. Il-modalitajiet għall-implimentazzjoni ta’ tali miżuri għandhom jiġu stabbiliti bejn l-Europol u l-awtoritajiet kompetenti tal-Brażil.

(3)Fir-rigward tal-ipproċessar awtomatizzat tad-data, il-Partijiet Kontraenti għandhom jiżguraw l-implimentazzjoni ta’ miżuri mfassla biex:

(a)jiċħdu l-aċċess lil persuni mhux awtorizzati għal tagħmir li jipproċessa użat għall-ipproċessar tad-data (kontroll tal-aċċess għat-tagħmir);

(b)jipprevjenu l-qari, l-ikkupjar, il-modifika jew it-tneħħija mhux awtorizzata tal-mezzi tad-data (kontroll tal-mezzi tad-data);

(c)jipprevjenu li tiddaħħal data b’mod mhux awtorizzat kif ukoll l-ispezzjoni, il-modifika jew it-tħassir mhux awtorizzat ta’ data maħżuna (kontroll tal-ħżin);

(d)jipprevjenu l-użu ta’ sistemi awtomatizzati ta’ pproċessar minn persuni mhux awtorizzati bl-użu ta’ tagħmir għall-komunikazzjoni tad-data (kontroll tal-utent);

(e)jiżguraw li l-persuni awtorizzati biex jużaw sistema ta’ proċessar ta’ data awtomatizzata jkollhom aċċess biss għad-data koperta mill-awtorizzazzjoni għall-aċċess tagħhom (kontroll tal-aċċess għad-data);

(f)jiżguraw li jkun possibbli li jiġi verifikat u stabbilit lil liema korpi tista’ tintbagħat jew intbagħtet data bl-użu ta’ tagħmir ta’ komunikazzjoni tad-data (kontroll tal-komunikazzjoni);

(g)jiżguraw li jkun possibbli li jiġi vverifikat u stabbilit liema data ddaħħlet f’sistemi awtomatizzati tal-ipproċessar u meta u minn min iddaħħlet id-data (kontroll tal-input);

(h)jiżguraw li jkun possibbli li jiġi vverifikat u stabbilit liema data ġiet aċċessata, minn liema membru tal-persunal u f’liema ħin (reġistru tal-aċċess);

(i)jipprevjenu l-qari, l-ikkupjar, il-modifika jew it-tħassir mhux awtorizzati ta’ data waqt it-trasferiment tad-data jew waqt it-trasportazzjoni tal-mezzi tad-data (“kontroll tat-trasport”);

(j)jiżġuraw li s-sistemi installati jistgħu, f’każ ta’ interruzzjoni, jiġu rranġati minnufih (irkupru);

(k)jiżguraw li l-funzjonijiet tas-sistema jaħdmu mingħajr difett, li s-sejbien ta’ difetti fil-funzjonijiet jiġi rrappurtat minnufih (affidabbiltà) u li d-data konservata ma tistax tiġi korrotta mid-disfunzjoni tas-sistema (integrità).

KAPITOLU V

TILWIM

ARTIKOLU 20

Soluzzjoni ta’ tilwimiet

It-tilwim kollu li jista’ jinqala’ b’konnessjoni mal-interpretazzjoni, l-applikazzjoni jew l-implimentazzjoni ta’ dan il-Ftehim u kwalunkwe kwistjoni relatata miegħu għandhom jagħtu lok għal konsultazzjonijiet u negozjati bejn ir-rappreżentanti tal-Partijiet Kontraenti bil-ħsieb li tintlaħaq soluzzjoni reċiprokament aċċettabbli.

ARTIKOLU 21

Klawżola ta’ sospensjoni

(1)Fil-każ ta’ nuqqas ta’ twettiq tal-obbligi li jirriżultaw minn dan il-Ftehim, kwalunkwe Parti Kontraenti tista’ tissospendi dan il-Ftehim temporanjament parzjalment jew kompletament permezz ta’ notifika bil-miktub lill-Parti Kontraenti l-oħra permezz ta’ mezzi diplomatiċi. Tali notifika bil-miktub ma għandhiex issir qabel ma l-Partijiet Kontraenti ikunu ħadu sehem f’perjodu raġonevoli ta’ konsultazzjoni mingħajr ma tkun instabet soluzzjoni, u s-sospensjoni għandha ssir effettiva għoxrin jum mid-data tal-wasla ta’ tali notifika. Sospensjoni bħal din tista’ titneħħa mill-Parti Kontraenti li tkun qed tissospendi b’notifika bil-miktub lill-Parti Kontraenti l-oħra. Is-sospensjoni għandha titneħħa immedjatament malli tiġi riċevuta tali notifika.

(2)Minkejja kwalunkwe sospensjoni ta’ dan il-Ftehim, data personali u mhux personali li taqa’ fil-kamp ta’ applikazzjoni ta’ dan il-Ftehim u ttrasferita qabel is-sospensjoni ta’ dan il-Ftehim għandha tkompli tiġi pproċessata f’konformità ma’ dan il-Ftehim.

ARTIKOLU 22

Terminazzjoni

(1)Dan il-Ftehim jista’ jiġi tterminat fi kwalunkwe ħin minn waħda mill-Partijiet Kontraenti permezz ta’ notifika bil-miktub permezz ta’ mezzi diplomatiċi. It-terminazzjoni għandha tidħol fis-seħħ tliet xhur wara d-data li fiha tiġi riċevuta n-notifika.

(2)Jekk xi waħda mill-Partijiet Kontraenti tagħti avviż ta’ terminazzjoni skont dan l-Artikolu, il-Partijiet Kontraenti għandhom jiddeċiedu liema miżuri huma meħtieġa biex jiżguraw li kwalunkwe kooperazzjoni mibdija taħt dan il-Ftehim tiġi konkluża b’mod xieraq. Fi kwalunkwe każ, fir-rigward tad-data personali kollha u tad-data mhux personali kollha miksuba permezz tal-kooperazzjoni skont dan il-Ftehim qabel ma dan ma jibqax fis-seħħ, il-Partijiet Kontraenti għandhom jiżguraw li l-livell ta’ protezzjoni li taħtu d-data personali u mhux personali tkun ġiet trasferita jinżamm wara li tidħol fis-seħħ it-terminazzjoni.

KAPITOLU VI

DISPOŻIZZJONIJIET FINALI

ARTIKOLU 23

Rabta ma’ strumenti internazzjonali oħra

Dan il-Ftehim ma għandux jippreġudika jew b’xi mod ieħor jaffettwa jew ikollu impatt fuq id-dispożizzjonijiet legali fir-rigward tal-iskambju ta’ informazzjoni previst minn kwalunkwe trattat ta’ assistenza legali reċiproka, kwalunkwe ftehim jew arranġament ieħor ta’ kooperazzjoni, jew relazzjoni ta’ ħidma ta’ infurzar tal-liġi għall-iskambju ta’ informazzjoni bejn il-Brażil u kwalunkwe Stat Membru tal-Unjoni.

ARTIKOLU 24

Skambju ta’ informazzjoni klassifikata

Fejn meħtieġ taħt dan il-Ftehim, il-modalitajiet għall-iskambju ta’ informazzjoni klassifikata għandhom jiġu stabbiliti bejn l-Europol u l-awtoritajiet kompetenti tal-Brażil.

ARTIKOLU 25

Talbiet għal Aċċess Pubbliku

Talbiet għal aċċess pubbliku għal dokumenti li fihom data personali jew mhux personali trasferita skont dan il-Ftehim għandhom jiġu sottomessi lill-Parti Kontraenti li tittrasferixxi għall-konsultazzjoni mill-aktar fis possibbli.

ARTIKOLU 26

Punt ta’ kuntatt nazzjonali u uffiċjali ta’ kollegament

(1)Il-Brażil għandu jaħtar punt ta’ kuntatt nazzjonali fi ħdan il-Pulizija Federali Brażiljana biex jaġixxi bħala l-punt ċentrali ta’ kuntatt bejn l-Europol u l-awtoritajiet kompetenti tal-Brażil. Il-Brażil għandu jinnotifika lill-UE bil-punt ta’ kuntatt nazzjonali maħtur tiegħu. Il-Brażil għandu jiżgura d-disponibbiltà kontinwa tal-punt ta’ kuntatt nazzjonali erbgħa u għoxrin siegħa kuljum, sebat ijiem fil-ġimgħa. Kwalunkwe skambju dirett bejn l-Europol u awtoritajiet kompetenti oħra tal-Brażil, li għandu jkun limitat għall-kuntest ta’ operazzjonijiet speċifiċi, għandu jirċievi awtorizzazzjoni minn qabel u espressa mill-punt ta’ kuntatt nazzjonali.

(2)Il-Europol u l-Brażil għandhom itejbu l-kooperazzjoni tagħhom kif stabbilit f’dan il-Ftehim permezz tal-iskjerament ta’ uffiċjal(i) ta’ kollegament mill-Brażil. Il-Europol tista’ tiskjera uffiċjal(i) ta’ kollegament fil-Brażil. Il-kompiti tal-uffiċjali ta’ kollegament, in-numru tagħhom, u l-ispejjeż involuti, għandhom jiġu stabbiliti bejn l-Europol u l-Pulizija Federali tal-Brażil.

ARTIKOLU 27

Linja ta’ komunikazzjoni sigura

Għandha tiġi stabbilita linja ta’ komunikazzjoni sigura għall-fini ta’ skambju ta’ data personali u mhux personali bejn l-Europol u l-awtoritajiet kompetenti tal-Brażil. Il-modalitajiet għall-istabbiliment, l-implimentazzjoni, il-kostijiet u l-operat tal-linja ta’ komunikazzjoni sigura għandhom jiġu stabbiliti bejn l-Europol u l-Pulizija Federali tal-Brażil.

ARTIKOLU 28

Spejjeż

Il-Partijiet Kontraenti għandhom jiżguraw li l-awtoritajiet kompetenti jerfgħu l-ispejjeż tagħhom stess li jinqalgħu matul l-implimentazzjoni ta’ dan il-Ftehim, sakemm ma jkunx stabbilit mod ieħor bejn l-Europol u l-Pulizija Federali tal-Brażil.

ARTIKOLU 29

Notifika ta’ implimentazzjoni

(1)Kull Parti Kontraenti għandha tipprovdi li l-awtoritajiet kompetenti tagħha jagħmlu disponibbli għall-pubbliku dokument li jistabbilixxi f’forma intelliġibbli d-dispożizzjonijiet dwar l-ipproċessar ta’ data personali trasferita taħt dan il-Ftehim inklużi l-mezzi disponibbli għall-eżerċizzju tad-drittijiet tas-suġġetti tad-data. Kull Parti Kontraenti għandha tinnotifika kopja ta’ dak id-dokument lill-Parti Kontraenti l-oħra.

(2)Fejn mhux diġà fis-seħħ, kull Parti Kontraenti għandha tiżgura li l-awtoritajiet kompetenti għandhom jadottaw regoli li jispeċifikaw kif il-konformità mad-dispożizzjonijiet dwar l-ipproċessar ta’ data personali trasferita skont dan il-Ftehim se tiġi infurzata fil-prattika. Kull Parti Kontraenti għandha tinnotifika kopja ta’ dawk ir-regoli lill-Parti Kontraenti l-oħra u lill-awtoritajiet superviżorji rispettivi.

(3)In-notifiki minn Parti Kontraenti magħmula skont l-Artikoli 14(1), 15, 26(1), 29(1) u 29(2) ta’ dan il-Ftehim għandhom isiru permezz ta’ mezzi diplomatiċi, f’note verbale waħda.

ARTIKOLU 30

Dħul fis-seħħ u applikazzjoni

(1)Dan il-Ftehim għandu jiġi approvat mill-Partijiet Kontraenti skond il-proċeduri tagħhom stess.

(2)Dan il-Ftehim għandu jidħol fis-seħħ fid-data tal-wasla tal-aħħar notifika bil-miktub li permezz tagħha l-Partijiet Kontraenti jkunu nnotifikaw lil xulxin permezz ta’ mezzi diplomatiċi li l-proċeduri msemmija fil-paragrafu 1 ikunu tlestew.

(3)Sabiex dan il-Ftehim jidħol fis-seħħ, huwa meħtieġ li n-notifiki minn Parti Kontraenti msemmija fl-Artikolu 29(3) jiġu aċċettati mill-Parti Kontraenti l-oħra permezz ta’ mezzi diplomatiċi. Dan il-Ftehim għandu jidħol fis-seħħ fl-ewwel jum wara d-data tal-wasla tal-aħħar aċċettazzjoni tan-notifiki msemmija fl-Artikolu 29(3).

(4)Minn meta jidħol fis-seħħ, il-Partijiet Kontraenti għandhom jiżguraw li kwalunkwe strument legali ieħor li jirregola l-kooperazzjoni bejn l-Europol u l-awtoritajiet kompetenti tal-Brażil jitħassar minnufih.

ARTIKOLU 31

Emendi u supplimenti

(1)Dan il-Ftehim jista’ jiġi emendat bil-miktub, fi kwalunkwe ħin b’kunsens reċiproku bejn il-Partijiet Kontraenti permezz ta’ notifika bil-miktub skambjata permezz ta’ mezzi diplomatiċi. L-emendi għal dan il-Ftehim għandhom jidħlu fis-seħħ skont il-proċedura legali prevista fl-Artikolu 30(1) u (2).

(2)L-Annessi għal dan il-Ftehim jistgħu jiġu aġġornati, kif meħtieġ, permezz ta’ skambju ta’ noti diplomatiċi. Tali aġġornamenti għandhom jidħlu fis-seħħ f’konformità mal-proċedura legali prevista fl-Artikolu 30(1) u (2).

(3)Il-Partijiet Kontraenti għandhom jidħlu f’konsultazzjonijiet fir-rigward tal-emendar ta’ dan il-Ftehim jew l-Annessi tiegħu fuq talba ta’ xi waħda mill-Partijiet Kontraenti.

ARTIKOLU 32

Rieżami u evalwazzjoni

(1)Il-Partijiet Kontraenti għandhom jirrieżaminaw b’mod konġunt l-implimentazzjoni ta’ dan il-Ftehim sena wara d-dħul fis-seħħ tiegħu, u f’intervalli regolari minn hemm ’il quddiem, u addizzjonalment jekk mitluba minn waħda mill-Partijiet Kontraenti u deċiżi b’mod konġunt.

(2)Il-Partijiet Kontraenti għandhom jevalwaw dan il-Ftehim b’mod konġunt erba’ snin wara d-data tal-applikazzjoni tagħha.

(3)Il-Partijiet Kontraenti għandhom jiddeċiedu minn qabel dwar il-modalitajiet tar-reviżjoni ta’ l-implimentazzjoni ta’ dan il-Ftehim u għandhom jikkomunikaw lil xulxin il-kompożizzjoni tat-timijiet rispettivi tagħhom. It-timijiet għandhom jinkludu esperti rilevanti fl-oqsma tal-protezzjoni tad-data u tal-infurzar tal-liġi. Soġġett għal-liġijiet applikabbli, il-parteċipanti kollha f’rieżami għandhom ikunu mitluba li jirrispettaw il-kunfidenzjalità tad-diskussjonijiet u jkollhom awtorizzazzjonijiet ta’ sigurtà xierqa. Għall-finijiet ta’ kwalunkwe rieżami, l-Unjoni u l-Brażil għandhom jiżguraw aċċess għad-dokumentazzjoni, għas-sistemi u għall-persunal rilevanti.

ARTIKOLU 33

Dan il-Ftehim għandu jitfassal b’mod duplikat bil-Bulgaru, biċ-Ċek, bid-Daniż, bl-Estonjan, bil-Finlandiż, bil-Franċiż, bil-Ġermaniż, bil-Grieg, bl-Ingliż, bl-Irlandiż, bil-Kroat, bil-Latvjan, bil-Litwan, bil-Malti, bin-Netherlandiż, bil-Pollakk, bil-Portugiż, bir-Rumen, bis-Slovakk, bis-Sloven, bl-Ispanjol, bl-Iżvediż, bit-Taljan u bl-Ungeriż, u kull test ikun ugwalment awtentiku. Fil-każ ta’ kwalunkwe diverġenza bejn it-testi ta’ dan il-Ftehim, it-test Ingliż għandu jipprevali.

ANNESS I

OQSMA TA’ KRIMINALITÀ

Ir-reati kriminali huma:

–terroriżmu,

–kriminalità organizzata,

–traffikar tad-droga,

–attivitajiet ta’ ħasil tal-flus,

–reati konnessi ma’ sustanzi nukleari u radjuattivi,

–faċilitazzjoni ta’ dħul klandestin ta’ migranti,

–traffikar tal-bnedmin,

–reati konnessi ma’ vetturi bil-mutur,

–qtil, offiżi fiżiċi gravi fuq il-persuna,

–kummerċ illeċitu ta’ organi u tessuti tal-bniedem,

–ħtif ta’ persuna, żamma illegali u teħid ta’ ostaġġi,

–razziżmu u ksenofobija,

–serq u serq aggravat,

–traffikar illeċitu ta’ beni kulturali, inklużi oġġetti antiki u opri tal-arti,

–ingann u frodi,

–reati kontra l-interessi finanzjarji tal-Unjoni,

–abbuż minn informazzjoni privileġġata u manipulazzjoni tas-suq finanzjarju,

–rikattar organizzat u estorsjoni,

–falsifikazzjoni u piraterija tal-prodotti,

–falsifikazzjoni ta’ dokumenti amministrattivi u traffikar tagħhom,

–falsifikazzjoni ta’ flus u ta’ mezzi ta’ ħlas,

–kriminalità permezz tal-kompjuter,

–korruzzjoni,

–traffikar illeċitu fl-armi, munizzjon u splussivi,

–traffikar illeċitu fi speċi ta’ annimali fil-periklu,

–traffikar illeċitu fi speċi u varjetajiet ta’ pjanti fil-periklu,

–reati ambjentali, inkluż it-tniġġis mill-bastimenti,

–traffikar illeċitu ta’ sustanzi ormonali u ta’ promoturi oħrajn ta’ tkabbir,

–abbuż sesswali u sfruttament sesswali, inkluż materjal ta’ abbuż sesswali tat-tfal u s-solleċitazzjoni tat-tfal għal skopijiet sesswali,

–ġenoċidji, delitti kontra l-umanità u delitti tal-gwerra.

Il-forom ta’ kriminalità msemmija f’dan l-Anness għandhom jiġu vvalutati mill-awtoritajiet kompetenti tal-Brażil f’konformità mal-liġi tal-Brażil u mill-Europol f’konformità mal-liġijiet applikabbli tal-Unjoni Ewropea u tal-Istati Membri tagħha.

ANNESS II

L-AWTORITAJIET KOMPETENTI TAL-BRAŻIL

L-awtoritajiet kompetenti tal-Brażil huma:

Il-Pulizija Federali tal-Brażil, u

Il-Politiki Ċivili tal-Istati u d-Distrett Federali, u

L-unitajiet tal-Ministeru tal-Ġustizzja u s-Sigurtà Pubblika responsabbli għall-prevenzjoni u l-ġlieda kontra reati kriminali f’konformità mal-liġi Brażiljana.

ANNESS III

KORPI TAL-UNJONI U AWTORITAJIET TAL-ISTATI MEMBRI TAL-UE

(a)Korpi tal-Unjoni:

Missjonijiet/Operazzjonijiet tal-Politika ta’ Sigurtà u ta’ Difiża Komuni, limitati għall-attivitajiet tal-infurzar tal-liġi

L-Uffiċċju Ewropew Kontra l-Frodi (OLAF)

L-Aġenzija Ewropea għall-Gwardja tal-Fruntiera u tal-Kosta (Frontex)

Il-Bank Ċentrali Ewropew (BĊE)

Uffiċċju tal-Prosekutur Pubbliku Ewropew (EPPO)

L-Aġenzija tal-Unjoni Ewropea għall-Kooperazzjoni fil-Ġustizzja Kriminali (Eurojust)

L-Uffiċċju tal-Proprjetà Intellettwali tal-Unjoni Ewropea (EUIPO)

(b)l-awtoritajiet responsabbli fl-Istati Membri tal-UE għall-prevenzjoni u l-ġlieda kontra r-reati kriminali, f’konformità mal-Artikolu 2(a) u l-Artikolu 7 tar-Regolament dwar l-Europol.