IL-KUMMISSJONI EWROPEA

Brussell, 20.3.2024

COM(2024) 133 final

2024/0069(NLE)

Proposta għal

RAKKOMANDAZZJONI TAL-KUNSILL

dwar Qafas tal-Kwalità għat-Traineeships imsaħħaħ

{SEC(2024) 97 final} - {SWD(2024) 66 final} - {SWD(2024) 67 final} - {SWD(2024) 68 final}

MEMORANDUM TA’ SPJEGAZZJONI

1.KUNTEST TAL-PROPOSTA

•Raġunijiet u objettivi tal-proposta

Fl-evalwazzjoni tagħha tal-2023 ta’ din ir-Rakkomandazzjoni tal-Kunsill ( 7 ), il-Kummissjoni sabet indikazzjonijiet li l-QFT kellu impatt pożittiv fuq il-kwalità tat-traineeships fl-UE. Hija kkonfermat ukoll li t-traineeships għadhom perkors importanti għaż-żgħażagħ biex jidħlu fis-suq tax-xogħol. Barra minn hekk, traineeships ta’ kwalità jistgħu jkunu opportunitajiet utli ta’ titjib tal-ħiliet u/jew taħriġ mill-ġdid għal persuni ta’ kwalunkwe età biex jiksbu ħiliet prattiċi fl-impjieg biex imexxu l-karriera tagħhom f’direzzjoni ġdida.

·Ir-rapport dwar l-eżitu finali tal-Konferenza dwar il-Futur tal-Ewropa ( 8 ) jinkludi l-appell biex jiġi żgurat li t-traineeships u l-impjiegi taż-żgħażagħ jikkonformaw mal-istandards tal-kwalità, inkluż dwar il-pagi, u li l-internships mhux imħallsa fis-suq tax-xogħol u barra mill-edukazzjoni formali jiġu pprojbiti permezz ta’ strument legali.

·Fl-opinjoni tiegħu “It-Trattament Ugwali taż-Żgħażagħ fis-Suq tax-Xogħol” tal-15 ta’ Ġunju 2023 ( 9 ), il-Kumitat Ekonomiku u Soċjali Ewropew (KESE) innota li t-traineeships għandhom joffru kontenut ta’ tagħlim ta’ kwalità tajba u kundizzjonijiet tax-xogħol adegwati, u mhux ikunu sostitut għal impjiegi regolari jew prekundizzjoni għal kollokament f’impjieg.

·Fl-Opinjoni tiegħu “L-Appoġġ għall-Impjieg taż-Żgħażagħ: Pont għall-Impjiegi għall-Ġenerazzjoni li Jmiss” tal-5 ta’ Frar 2021 ( 10 ), il-Kumitat tar-Reġjuni kkunsidra li t-traineeships u l-apprendistati għandhom primarjament jipprovdu esperjenza ta’ tagħlim għaż-żgħażagħ, li jistgħu jgħinuhom jiddeċiedu dwar il-karriera futura tagħhom u jiżviluppaw il-ħiliet tagħhom sabiex jaċċessaw impjieg permanenti.

•Konsistenza mad-dispożizzjonijiet ta’ politika eżistenti fil-qasam tal-politika

·Id-Direttiva (UE) 2019/1152 dwar kundizzjonijiet tax-xogħol trasparenti u prevedibbli billi timmira li ttejjeb it-trasparenza tal-informazzjoni pprovduta (bil-miktub) lit-trainees.

·Id-Direttiva Qafas dwar is-Saħħa u s-Sikurezza Okkupazzjonali (OSH, Occupational Health and Safety) ( 20 ) li tistabbilixxi l-prinċipji ewlenin biex jitħeġġeġ it-titjib fis-saħħa u s-sikurezza fuq il-post tax-xogħol. Din tiggarantixxi r-rekwiżiti minimi ta’ saħħa u sikurezza fl-Ewropa kollha. Id-Direttiva Qafas tikkonferma li, fir-rigward ta’ post tax-xogħol sikur, l-istess regoli japplikaw għall-ħaddiema u t-trainees u hija akkumpanjata minn aktar direttivi li jiffukaw fuq aspetti speċifiċi tas-sikurezza u s-saħħa fuq il-post tax-xogħol.

·Ir-Rakkomandazzjoni tal-Kunsill dwar l-aċċess għall-protezzjoni soċjali għall-ħaddiema u għall-persuni li jaħdmu għal rashom ( 21 ) tirrakkomanda li l-Istati Membri jiżguraw li kemm il-ħaddiema (inkluż it-trainees li huma ħaddiema) kif ukoll dawk li jaħdmu għal rashom ikollhom aċċess għal protezzjoni soċjali effettiva u adegwata. Din ir-Rakkomandazzjoni tkopri l-benefiċċji tal-qgħad, tal-mard u tal-kura tas-saħħa, tal-maternità u tal-paternità, tal-invalidità, tax-xjuħija u tas-superstiti u l-benefiċċji marbutin ma’ aċċidenti fuq ix-xogħol u ma’ mard okkupazzjonali. Filwaqt li tagħmel referenza għal din ir-Rakkomandazzjoni, ir-rakkomandazzjoni proposta se tħeġġeġ l-iżgurar tal-aċċess għal protezzjoni soċjali adegwata għat-trainees kollha, f’konformità mal-leġiżlazzjoni nazzjonali.

·Id-Direttiva tal-Kunsill li tistabbilixxi qafas ġenerali għall-ugwaljanza fit-trattament fl-impjieg u fix-xogħol ( 22 ) tistabbilixxi qafas ġenerali biex tikkumbatti d-diskriminazzjoni fuq bażi ta’ reliġjon jew twemmin, diżabbiltà, età jew orjentazzjoni sesswali f’dak li għandu x’jaqsam mal-impjieg u x-xogħol, bi skop li timplimenta fl-Istati Membri l-prinċipju ta’ ugwaljanza fit-trattament.

Il-miżuri proposti li jiffaċilitaw il-mobbiltà transfruntiera huma konformi mal-objettivi tal-programm Erasmus+, li joffri opportunitajiet ta’ mobbiltà tal-apprendiment tranżnazzjonali u internazzjonali, inkluż għat-trainees.

•Konsistenza ma’ politiki oħra tal-Unjoni

L-investimenti finanzjarji fit-titjib tal-ħiliet u fit-taħriġ mill-ġdid huma fil-qalba tal-Fond Soċjali Ewropew Plus (FSE+), il-Faċilità għall-Irkupru u r-Reżiljenza (RRF, Recovery and Resilience Facility), il-Fond għal Tranżizzjoni Ġusta u l-Erasmus+ u l-Programm Ewropa Diġitali. L-iżvilupp tal-ħiliet huwa appoġġat ukoll mill-investimenti tal-Fond Ewropew għall-Iżvilupp Reġjonali (FEŻR) fl-infrastruttura u t-tagħmir tal-edukazzjoni u t-taħriġ. Ir-Rakkomandazzjoni proposta tirrifletti l-objettivi tal-FSE+ li jappoġġaw lill-Istati Membri u lir-reġjuni fl-isforzi tagħhom biex jiżguraw aċċess ugwali għal opportunitajiet ta’ taħriġ u żvilupp tal-ħiliet u jżidu l-impjegabbiltà tal-forza tax-xogħol Ewropea, b’mod partikolari ż-żgħażagħ. Tappoġġa l-objettivi tal-RRF, b’mod partikolari l-pilastri tagħha dwar il-politiki għall-ġenerazzjoni li jmiss. Ir-Rakkomandazzjoni proposta hija wkoll konformi mal-għan tal-Fond għal Tranżizzjoni Ġusta li jappoġġa tranżizzjoni ġusta lejn ekonomija newtrali għall-klima, b’enfasi fuq ir-reġjuni l-aktar milquta.

Barra minn hekk, l-objettivi tagħha huma konsistenti ma’ dawk tal-inizjattiva ALMA (Aspira, Tgħallem, Aħkem, Ikseb), li hija ffinanzjata mill-FSE+ u li għandha l-għan li tgħin liż-żgħażagħ żvantaġġati barra mill-edukazzjoni, l-impjieg jew it-taħriġ (NEETs) jintegraw fis-soċjetà billi jħaffu t-triq tagħhom lura fl-edukazzjoni, it-taħriġ jew l-impjieg. L-istrument ta’ Appoġġ Tekniku joffri lill-Istati Membri, fuq talba, għarfien espert imfassal apposta biex jirriformaw u jtejbu l-mobbiltà tal-apprendiment, b’mod partikolari permezz ta’ inizjattivi ewlenin li jiffukaw fuq l-attrazzjoni tat-talent, l-edukazzjoni taż-żgħażagħ u l-ħiliet. Is-sejba ta’ persunal b’ħiliet hija sfida għal għadd dejjem akbar ta’ intrapriżi żgħar u ta’ daqs medju (SMEs), li hija enfasizzata wkoll fl-Istrateġija għall-SMEs għal Ewropa sostenibbli u diġitali ( 29 ). L-Istrateġija tisħaq li l-UE tista’ tkompli tgħin biex jiġu indirizzati dawn l-isfidi billi tiffaċilita l-aċċess għat-taħriġ u tgħin biex id-domanda tal-SMEs għat-talenti titqabbel mal-provvista tas-suq tax-xogħol. Il-proposta se tikkomplementa dan l-approċċ. Il-proposta hija konsistenti wkoll mal-Att dwar l-Industrija b’Emissjonijiet Żero Netti, b’mod partikolari l-istabbiliment propost ta’ akkademji Ewropej tal-ħiliet, billi tikkontribwixxi għal forza tax-xogħol b’ħiliet permezz ta’ traineeships ta’ kwalità li jistgħu jgħinu biex jiġu indirizzati n-nuqqasijiet u l-ispariġġi fil-ħiliet. Dan għandu jtaffi l-ħtieġa ta’ ħiliet tal-industriji tat-teknoloġija b’emissjonijiet żero netti.

2.BAŻI LEGALI, SUSSIDJARJETÀ U PROPORZJONALITÀ

•Bażi legali

Il-proposta hija bbażata fuq l-Artikoli 153(1)(b), 165(4), 166(4) u 292 tat-TFUE.

Skont l-Artikolu 153(1)(b) tat-TFUE, l-UE trid issostni u tikkomplementa l-attivitajiet tal-Istati Membri fil-qasam tal-kundizzjonijiet tax-xogħol.

Skont l-Artikolu 165 tat-TFUE, l-UE għandha tikkontribwixxi għall-iżvilupp ta’ edukazzjoni ta’ kwalità billi tinkoraġġixxi kooperazzjoni bejn l-Istati Membri u, jekk ikun meħtieġ, billi tappoġġa u tissupplimenta l-azzjonijiet tagħhom, filwaqt li tirrispetta għal kollox ir-responsabbiltà tal-Istati Membri għal dak li hu kontenut ta’ tagħlim u l-organizzazzjoni ta’ sistemi ta’ edukazzjoni u d-diversità kulturali u lingwistika tagħhom. Skont il-paragrafu 4 tal-Artikolu 165 tat-TFUE, l-armonizzazzjoni tal-liġijiet u tar-regolamenti tal-Istati Membri hija eskluża, filwaqt li l-Kunsill, fuq proposta mill-Kummissjoni, jista’ jadotta r-rakkomandazzjonijiet.

Skont l-Artikolu 166 tat-TFUE, l-UE għandha timplimenta politika ta’ formazzjoni vokazzjonali li għandha tappoġġa u tissupplimenta l-azzjoni tal-Istati Membri, filwaqt li tirrispetta għal kollox ir-responsabbiltà tal-Istati Membri għall-kontenut u l-organizzazzjoni tal-formazzjoni vokazzjonali. Skont il-paragrafu 4 tal-Artikolu 166 tat-TFUE, l-armonizzazzjoni tal-liġijiet u tar-regolamenti tal-Istati Membri hija eskluża, filwaqt li l-Kunsill, fuq proposta mill-Kummissjoni, jista’ jadotta r-rakkomandazzjonijiet.

Skont l-Artikolu 292 tat-TFUE, il-Kunsill jista’ jadotta r-rakkomandazzjonijiet abbażi ta’ proposta tal-Kummissjoni f’oqsma li jaqgħu taħt il-kompetenza tal-UE.

•Sussidjarjetà (għall-kompetenzi mhux esklużivi)

Qafas tal-Kwalità għat-Traineeships imsaħħaħ se jappoġġa u jissupplimenta l-azzjoni nazzjonali f’dan il-qasam f’konformità mal-Artikoli 165, 166 u 153 tat-TFUE. Din l-inizjattiva tapplika l-prinċipju tas-sussidjarjetà billi tqis bis-sħiħ li s-sistemi tal-edukazzjoni u t-taħriġ huma kompetenza nazzjonali, filwaqt li l-UE tista’ tappoġġa u tikkomplementa l-politiki nazzjonali dwar il-kundizzjonijiet tax-xogħol. L-inizjattiva tirrispetta bis-sħiħ id-diversità tas-sistemi nazzjonali ta’ traineeships u tipproponi sett ta’ kriterji komuni biex jintrifdu dawk l-iskemi differenti, filwaqt li tiżgura benefiċċji kemm għat-trainee (irrispettivament mill-istatus tal-impjieg tagħhom) kif ukoll għall-fornituri tat-traineeships.

L-inizjattiva se ttejjeb it-trasparenza u l-fehim reċiproku tas-sistemi ta’ traineeships, b’mod partikolari, il-kwalità tat-traineeships, madwar l-UE. Dan jista’ jkollu wkoll impatt pożittiv fuq il-mobbiltà transfruntiera tat-trainees peress li approċċ ikkoordinat fil-livell tal-UE jiżgura sinerġiji u kooperazzjoni, filwaqt li jimmassimizza l-effetti pożittivi.

•Proporzjonalità

•Għażla tal-istrument

3.RIŻULTATI TAL-EVALWAZZJONIJIET EX POST, TAL-KONSULTAZZJONIJIET MAL-PARTIJIET IKKONĊERNATI U TAL-VALUTAZZJONIJIET TAL-IMPATT

•Evalwazzjonijiet ex post/kontrolli tal-idoneità tal-leġiżlazzjoni eżistenti

•Konsultazzjonijiet mal-partijiet ikkonċernati

Attivitajiet speċifiċi ta’ konsultazzjoni saru fl-2022 bħala parti mill-evalwazzjoni tal-Kummissjoni tal-2023 tal-QFT ( 33 ), b’mod partikolari permezz ta’ stħarriġ ta’ konsultazzjoni pubblika. L-evalwazzjoni inkludiet ukoll konsultazzjonijiet immirati tal-awtoritajiet nazzjonali u reġjonali responsabbli għall-politiki tal-edukazzjoni, it-taħriġ u l-impjiegi, is-sħab soċjali, il-fornituri tal-edukazzjoni u t-taħriġ, l-esperti akkademiċi li jaħdmu fuq kwistjonijiet tas-suq tax-xogħol, l-organizzazzjonijiet li jirrappreżentaw liż-żgħażagħ, it-trainees żgħażagħ (preċedenti, attwali u potenzjali futuri) u partijiet ikkonċernati oħra fil-livell tal-UE, nazzjonali u reġjonali. Sabiex jintlaħqu dawn il-partijiet ikkonċernati kollha, intużaw attivitajiet u metodi ta’ konsultazzjoni differenti, bħal intervisti, laqgħat ta’ konsultazzjoni mmirati, stħarriġ immirat għat-trainees u studji tal-każijiet.

Barra minn hekk, bħala parti mill-istudju li jesplora l-kuntest, l-isfidi u s-soluzzjonijiet possibbli fir-rigward tal-kwalità tat-traineeships fl-UE, sar stħarriġ online mal-partijiet ikkonċernati nazzjonali. Dan kellu l-għan li jiġbor informazzjoni dwar il-prattiki attwali tan-negozji fir-rigward tat-traineeships u li jidentifika prattiki tajbin implimentati fl-Istati Membri u l-impatt tagħhom fuq il-kwalità tat-traineeships. L-istħarriġ dam għaddej mill-15 ta’ Ġunju sat-8 ta’ Settembru 2023 u kien immirat lejn l-awtoritajiet pubbliċi nazzjonali, l-assoċjazzjonijiet nazzjonali tan-negozju/tal-impjegaturi, in-negozji individwali, it-trade unions nazzjonali, l-organizzazzjonijiet nazzjonali taż-żgħażagħ, l-organizzazzjonijiet tas-soċjetà ċivili u l-istituzzjonijiet edukattivi. Saru wkoll intervisti mmirati mal-partijiet ikkonċernati fil-livell tal-UE.

Sar stħarriġ iddedikat ma’ “Panel tal-SMEs” mid-Direttorat Ġenerali tal-Impjiegi, l-Affarijiet Soċjali u l-Inklużjoni (DĠ EMPL), id-Direttorat Ġenerali għas-Suq Intern, l-Industrija, l-Intraprenditorija u l-SMEs (DĠ GROW), il-Kunsill Ewropew tal-Innovazzjoni u l-Aġenzija Eżekuttiva Ewropea għall-Kunsill Ewropew tal-Innovazzjoni u għall-SMEs (EISMEA) u bl-appoġġ tan-Network Enterprise Europe bejn it-12 ta’ Ottubru u d-9 ta’ Novembru 2023.

L-istħarriġ tal-Ewrobarometru Flash (523) ( 36 ) eżamina l-perċezzjonijiet taż-żgħażagħ dwar l-integrazzjoni tagħhom fis-suq tax-xogħol, b’enfasi partikolari fuq it-traineeships. Bejn il-15 u l-24 ta’ Marzu 2023, 26 334 persuna li għandhom bejn it-18 u l-35 sena mill-Istati Membri kollha għamlu l-istħarriġ online.

•Il-ġbir u l-użu tal-għarfien espert

·studju kkummissjonat minn esperti esterni, li minnu ntużaw ir-riżultati preliminari: “Study exploring the context, challenges and possible solution in relation to the quality of traineeships in the EU” minn konsorzju ta’ Ernst &Young (EY), iċ-Ċentru għall-Istudji Politiċi Ewropej (CEPS) u Open Evidence (li jmiss)

·studju estern li jappoġġa l-evalwazzjoni tal-Qafas tal-Kwalità għat-Traineeships, Rapport Finali, Jannar 2023 ( 37 )

·l-istħarriġ Flash tal-Ewrobarometru dwar il-perċezzjoni taż-żgħażagħ ta’ kif integraw fis-suq tax-xogħol, b’fokus partikolari fuq it-traineeships ( 38 )

•Valutazzjoni tal-impatt

•Drittijiet fundamentali

4.IMPLIKAZZJONIJIET BAĠITARJI

5.ELEMENTI OĦRA

•Pjanijiet ta’ implimentazzjoni u arranġamenti għall-monitoraġġ, l-evalwazzjoni u r-rapportar

•Dokumenti ta’ spjegazzjoni (għad-direttivi)

•Spjegazzjoni dettaljata tad-dispożizzjonijiet speċifiċi tal-proposta

Ir-Rakkomandazzjoni proposta toffri sett ta’ kriterji għal traineeships ta’ kwalità, filwaqt li tippermetti l-flessibbiltà fl-implimentazzjoni mill-Istati Membri. Dan jagħtihom l-opportunità jqisu n-natura speċifika u l-ħtiġijiet differenti tal-iskemi ta’ traineeships nazzjonali tagħhom.

Objettiv u kamp ta’ applikazzjoni

Il-Punt 1 jistabbilixxi l-objettiv tal-qafas imsaħħaħ biex tittejjeb il-kwalità tat-traineeships, b’mod partikolari l-kontenut tat-tagħlim u t-taħriġ u l-kundizzjonijiet tax-xogħol.

Il-Punt 2 jispjega l-kamp ta’ applikazzjoni tal-qafas imsaħħaħ, li japplika għat-trainees kollha, irrispettivament mill-istatus tal-impjieg tagħhom. Dan jiċċara li, għal dawk it-trainees li huma ħaddiema, il-qafas japplika biss jekk ma jkunx hemm dispożizzjonijiet ekwivalenti jew aktar favorevoli stabbiliti fil-liġi tal-UE.

Ftehim bil-miktub

Il-Punti 3 u 4 jirrakkomandaw li t-traineeships ikunu bbażati fuq ftehim bil-miktub u jaġġornaw il-kontenut tal-ftehim bil-miktub billi jirrakkomandaw informazzjoni addizzjonali dwar il-komponent tat-tagħlim, il-kompiti, l-arranġamenti ta’ mentoraġġ u l-protezzjoni soċjali.

Kundizzjonijiet tat-tagħlim u tax-xogħol

Il-Punti 5 sa 15 jistabbilixxu l-kundizzjonijiet tat-tagħlim u tax-xogħol, inkluż l-objettivi tat-tagħlim u t-taħriġ, il-paga ġusta, id-drittijiet u l-kundizzjonijiet tax-xogħol applikabbli skont il-liġi tal-UE u nazzjonali applikabbli, l-assenjazzjoni ta’ superviżur u mentor, il-kundizzjonijiet għal traineeships mill-bogħod/ibridi, durata raġonevoli (inkluż għal traineeships ripetuti/konsekuttivi), it-tiġdid u t-terminazzjoni tat-traineeships u l-mezzi għat-trainees biex jirrapportaw prattika ħażina u kundizzjonijiet ħżiena. Jistabbilixxu wkoll li l-fornituri tat-traineeships ma jistgħux jirrikjedu li l-kandidati jkollhom esperjenza ta’ xogħol preċedenti.

Protezzjoni soċjali

Il-Punt 16 jirrakkomanda aċċess għal protezzjoni soċjali adegwata f’konformità mal-prattiki nazzjonali filwaqt li titqies ir-Rakkomandazzjoni tal-Kunsill dwar l-aċċess għall-protezzjoni soċjali għall-ħaddiema u l-persuni li jaħdmu għal rashom.

Rikonoxximent ta’ traineeships

Il-Punt 17 jaġġorna r-rikonoxximent xieraq tat-traineeships billi jżid li dan ir-rikonoxximent, fejn xieraq u jekk possibbli, jenħtieġ li jiġi prodott f’format diġitali.

Rekwiżiti ta’ trasparenza

Il-Punti 18 sa 20 jistabbilixxu r-rekwiżiti ta’ trasparenza u jżidu li l-avviżi r-reklami ta’ postijiet battala għandhom jipprovdu wkoll informazzjoni dwar il-livell tal-paga, il-kundizzjonijiet tax-xogħol, il-kopertura tal-protezzjoni soċjali u l-kompiti mistennija.

Traineeships inklużivi

Il-Punti 21 sa 24 jirrakkomandaw miżuri dwar traineeships inklużivi (inkluż billi jiġu żgurati t-trattament ugwali u n-nondiskriminazzjoni u billi jittejbu l-aċċess u s-sensibilizzazzjoni għal dawk f’sitwazzjonijiet vulnerabbli), lingwaġġ newtrali f’avviżi/reklami ta’ postijiet battala, sensibilizzazzjoni u bidliet, fejn rilevanti, biex tiġi żgurata l-aċċessibbiltà, inkluż għal dawk f’sitwazzjonijiet vulnerabbli, b’mod partikolari trainees (kandidati) b’diżabbiltà.

Traineeships transfruntiera

Il-punti 25 sa 29 jaġġornaw il-miżuri mmirati biex jiffaċilitaw it-traineeships transfruntiera, filwaqt li jappellaw għal gwida prattika u informazzjoni dwar traineeships transfruntiera permezz tal-EURES u billi jinkoraġġixxu l-applikazzjoni tal-prinċipji tal-qafas imsaħħaħ, fejn applikabbli, fi ftehimiet ta’ mobbiltà tat-traineeships ma’ organizzazzjonijiet ospitanti barra mill-UE.

Appoġġ addizzjonali għat-traineeships

Il-Punt 30 jirrakkomanda appoġġ addizzjonali għat-traineeships, b’mod partikolari billi jipprovdi gwida għall-karriera u opportunitajiet ta’ network.

Kundizzjonijiet qafas

Il-Punti 31 sa 33 jistabbilixxu l-elementi rigward il-kundizzjonijiet qafas, inkluż dwar l-involviment tas-sħab soċjali, is-servizzi għall-impjiegi, l-istituzzjonijiet tal-edukazzjoni u t-taħriġ u partijiet ikkonċernati oħra. Huwa rrakkomandat ukoll li jiġi żgurat li r-rappreżentanti tal-ħaddiema jkunu jistgħu jiddefendu d-drittijiet tat-trainees.

L-applikazzjoni tal-qafas tal-kwalità msaħħaħ

Il-Punti 34 sa 35 jipprovdu rakkomandazzjonijiet dwar l-applikazzjoni tal-QFT imsaħħaħ, inkluż għall-Istati Membri biex jippreżentaw pjan ta’ implimentazzjoni, u billi jipprevedu appoġġ finanzjarju u mhux finanzjarju għall-fornituri tat-traineeships, b’mod partikolari l-SMEs.

Appoġġ biex tiżdied l-impjegabbiltà tat-trainees

Il-Punti 36 sa 37 jistabbilixxu miżuri ta’ appoġġ biex tiżdied l-impjegabbiltà tat-trainees u jirrakkomandaw li l-fornituri tat-traineeships jingħataw inċentivi biex jipproponu impjieg wara traineeship u jużaw il-fondi tal-UE għal traineeships li jkunu konformi mal-prinċipji tal-Qafas imsaħħaħ.

Segwitu

2024/0069 (NLE)

Proposta għal

RAKKOMANDAZZJONI TAL-KUNSILL

dwar Qafas tal-Kwalità għat-Traineeships imsaħħaħ

IL-KUNSILL TAL-UNJONI EWROPEA,

Wara li kkunsidra t-Trattat dwar il-Funzjonament tal-Unjoni Ewropea, u b’mod partikolari l-Artikolu 292, flimkien mal-Artikoli 153(1)(b), 165(4) u 166(4) tiegħu,

Wara li kkunsidra l-proposta tal-Kummissjoni Ewropea,

Billi:

(1)F’Marzu 2014, il-Kunsill adotta r-Rakkomandazzjoni dwar Qafas tal-Kwalità għat-Traineeships ( 43 ) (“ir-Rakkomandazzjoni tal-2014”) biex jipprovdi standards ta’ kwalità fl-Unjoni kollha għat-traineeships. Din irrakkomandat 21 prinċipju għat-traineeships biex tittejjeb il-kwalità tat-traineeships, b’mod partikolari biex jiġi żgurat kontenut ta’ tagħlim u taħriġ ta’ kwalità għolja u kundizzjonijiet tax-xogħol adegwati biex tiġi appoġġata t-tranżizzjoni mill-edukazzjoni għax-xogħol u tiżdied l-impjegabbiltà tat-trainees. Ir-Rakkomandazzjoni tal-2014 tkopri t-traineeships kollha ħlief dawk li huma parti mill-kurrikuli tal-edukazzjoni u t-taħriġ formali u dawk regolati skont il-liġi nazzjonali u li t-tlestija tagħhom hija rekwiżit obbligatorju għall-aċċess għal professjoni speċifika.

(2)Ir-Rakkomandazzjoni tal-Kunsill dwar Qafas Ewropew għal Apprendistati ta’ Kwalità u Effettivi ( 44 ) fiha 14-il kriterju għal apprendistati ta’ kwalità u effettivi bl-għan li jiġi żgurat li l-iskemi ta’ apprendistat ikunu responsivi għall-ħtiġijiet tas-suq tax-xogħol u jipprovdu benefiċċji kemm għall-istudenti kif ukoll għall-impjegaturi. Dawn jinkludu kriterji għall-kundizzjonijiet tat-tagħlim u tax-xogħol u kriterji għall-kundizzjonijiet qafas.

(3)Il-Garanzija għaż-Żgħażagħ imsaħħa ( 45 ) għandha l-għan li tiżgura li ż-żgħażagħ taħt l-età ta’ 30 sena jirċievu offerta ta’ kwalità tajba ta’ impjieg, edukazzjoni kontinwa, apprendistat jew traineeship fi żmien erba’ xhur minn meta jsiru qiegħda jew minn meta jħallu l-edukazzjoni. Ir-Rakkomandazzjoni tal-2014 serviet bħala punt ta’ referenza importanti biex tkejjel il-kwalità tal-offerti ta’ traineeships taħt il-Garanzija għaż-Żgħażagħ imsaħħa.

(4)L-iffaċilitar tat-tranżizzjoni lejn impjiegi ta’ kwalità huwa meħtieġ biex tintlaħaq il-mira ewlenija tal-Unjoni ta’ rata ta’ impjieg ta’ 78 % tal-popolazzjoni li għandhom bejn l-20 u l-64 sena sal-2030 ( 46 ).

(5)It-traineeships jistgħu jgħinu liż-żgħażagħ jiksbu esperjenza prattika u professjonali, itejbu l-impjegabbiltà tagħhom, u jiffaċilitaw it-tranżizzjoni tagħhom lejn impjieg stabbli. Minnhom infushom, it-traineeships huma perkors importanti għas-suq tax-xogħol. Għall-impjegaturi, it-traineeships jipprovdu opportunitajiet biex jattiraw, iħarrġu, u jżommu ż-żgħażagħ. Dawn jistgħu jnaqqsu l-kost tat-tiftix u r-reklutaġġ ta’ persunal b’ħiliet, meta t-trainees jiġu offruti pożizzjoni regolari wara t-traineeship tagħhom.

(6)In-nuqqas ta’ ħaddiema jeżisti f’ħafna xogħlijiet u fil-livelli kollha tal-ħiliet. Dan hu mistenni jiżdied bit-tnaqqis ipproġettat fil-popolazzjoni fl-età tax-xogħol u bid-domanda li qed tiżdied għal diversi xogħlijiet rilevanti għat-tranżizzjoni doppja ekoloġika u diġitali. Iż-żieda fil-parteċipazzjoni fis-suq tax-xogħol u t-titjib tal-ħiliet u/jew it-taħriġ mill-ġdid taż-żgħażagħ jistgħu jikkontribwixxu biex jittaffew dawn in-nuqqasijiet. Traineeships ta’ kwalità jistgħu jkunu perkors utli ta’ titjib tal-ħiliet u/jew taħriġ mill-ġdid għal persuni ta’ kwalunkwe età biex jiksbu ħiliet prattiċi fl-impjieg biex jidħlu fis-suq tax-xogħol jew biex jieħdu l-karriera tagħhom f’direzzjoni ġdida.

(7)Il-Konferenza dwar il-Futur tal-Ewropa ressqet proposta biex jiġi żgurat li l-internships u l-impjiegi taż-żgħażagħ jaderixxu ma’ standards tal-kwalità, inkluż dwar il-pagi u l-projbizzjoni ta’ internships mhux imħallsa fis-suq tax-xogħol u barra mill-edukazzjoni formali ( 47 ).

(8)Il-Parlament Ewropew adotta riżoluzzjoni skont l-Artikolu 225 tat-TFUE b’rakkomandazzjonijiet lill-Kummissjoni dwar traineeships ta’ kwalità f’Ġunju 2023 ( 48 ). Fir-riżoluzzjoni tiegħu, jistieden lill-Kummissjoni “taġġorna u ssaħħaħ ir-Rakkomandazzjoni tal-Kunsill tal-2014 u tittrasformaha fi strument leġiżlattiv aktar b’saħħtu”. Huwa stieden ukoll lill-Kummissjoni tinkludi prinċipji addizzjonali f’qafas tal-kwalità għat-traineeships aġġornat. B’mod speċifiku, il-Parlament Ewropew appella lill-Kummissjoni biex “tipproponi direttiva dwar traineeships fis-suq tax-xogħol miftuħ, traineeships fil-kuntest ta’ ALMPs u traineeships li huma parti obbligatorja mit-taħriġ professjonali, sabiex jiġu żgurati standards minimi tal-kwalità, inklużi regoli dwar it-tul tat-traineeships, l-aċċess għall-ħarsien soċjali f’konformità mal-liġi u l-prattika nazzjonali kif ukoll remunerazzjoni li tiżgura standard ta’ għajxien deċenti sabiex jiġu evitati l-prattiki ta’ sfruttament”.

(9)Il-Kummissjoni wettqet konsultazzjoni f’żewġ stadji mas-sħab soċjali fil-livell tal-Unjoni skont l-Artikolu 154 tat-TFUE dwar il-ħtieġa, l-objettivi u l-mezzi legali għal azzjoni potenzjali li tkompli ttejjeb il-kwalità tat-traineeships. Ma kien hemm ebda ftehim bejn is-sħab soċjali biex jidħlu f’negozjati fir-rigward ta’ dawk il-kwistjonijiet. Madankollu, huwa importanti li tittieħed azzjoni fil-livell tal-Unjoni f’dan il-qasam billi jiġi adattat il-qafas attwali dwar it-traineeships filwaqt li jitqiesu l-eżiti tal-konsultazzjoni tas-sħab soċjali.

(10)Il-Kummissjoni kkonsultat b’mod estensiv mal-partijiet ikkonċernati, inkluż it-trainees u l-organizzazzjonijiet taż-żgħażagħ, il-fornituri tat-traineeships, l-awtoritajiet pubbliċi nazzjonali, l-istituzzjonijiet edukattivi, u l-esperti mill-akkademja.

(11)Barra minn hekk, fl-2023, il-Kummissjoni evalwat ir-Rakkomandazzjoni tal-2014 ( 49 ) u sabet li traineeships ta’ kwalità, li jirriflettu l-prinċipji ta’ dik ir-Rakkomandazzjoni, jikkontribwixxu biex tiżdied l-impjegabbiltà taż-żgħażagħ. Filwaqt li l-prinċipji tal-kwalità tar-Rakkomandazzjoni tal-2014 tqiesu li għadhom rilevanti u ta’ valur miżjud, l-evalwazzjoni kkonkludiet ukoll li l-applikazzjoni ta’ dawk il-prinċipji u l-monitoraġġ u l-infurzar tagħhom kellhom jittejbu. Hija sabet ukoll lok għat-tisħiħ tal-qafas, inkluż dwar aspetti relatati mal-paga u l-aċċess għall-protezzjoni soċjali. Barra minn hekk, biex tiġi ffaċilitata t-tranżizzjoni għal relazzjoni ta’ impjieg regolari, il-fornituri tat-traineeships jistgħu jipprovdu aktar enfasi fuq l-appoġġ ta’ wara l-kollokament. Sabet ukoll li l-impjegaturi jistgħu jiġu assistiti aħjar permezz ta’ gwida prattika u appoġġ finanzjarju kif ukoll billi dan l-appoġġ jintrabat mal-applikazzjoni tal-prinċipji tal-kwalità.

(12)L-evalwazzjoni identifikat ukoll il-ħtieġa li tiġi żgurata l-inklużività u li jittejjeb l-aċċess għat-traineeships għal persuni f’sitwazzjonijiet vulnerabbli. B’mod partikolari, il-minoranzi, il-persuni b’diżabbiltà, dawk li jgħixu f’reġjuni rurali, remoti u ultraperiferiċi, dawk bi sfond soċjoekonomiku u/jew ta’ migrazzjoni żvantaġġat, il-komunità tar-Rom, u dawk b’livell edukattiv aktar baxx, jiffaċċjaw ostakli fl-aċċess għall-opportunitajiet ta’ traineeship. Fost ostakli oħra, il-persuni b’diżabbiltà jsibu ostaklu biex jaċċessaw it-traineeships minħabba n-nuqqas ta’ programmi ta’ traineeships adattati għall-ħtiġijiet tagħhom, pereżempju dawk li jaqdu rekwiżiti speċifiċi ta’ aċċessibbiltà.

(13)L-istħarriġ tal-Ewrobarometru tal-2023 (FL523) ( 50 ) sab li 55 % ta’ dawk li wieġbu li għamlu traineeship tħallsu jew ġew ikkumpensati finanzjarjament, li hija żieda minn 40 % fl-istħarriġ tal-Ewrobarometru tal-2013 (FL378) ( 51 ). Barra minn hekk, fl-2023 33 % ta’ dawk li wieġbu, wieġbu li kellhom aċċess sħiħ (u 28 % ta’ dawk li wieġbu parzjali) għall-protezzjoni soċjali ( 52 ).

(14)Din ir-Rakkomandazzjoni tindirizza l-ħtieġa li jissaħħaħ il-qafas tal-kwalità għat-traineeships kif identifikat mill-evalwazzjoni u minn diversi partijiet ikkonċernati msemmija hawn fuq. Għandha l-għan li ttejjeb il-kwalità tat-traineeships, b’mod partikolari fir-rigward tal-kontenut tat-tagħlim u t-taħriġ u l-kundizzjonijiet tax-xogħol, bl-għan li tiffaċilita t-tranżizzjoni mill-edukazzjoni, il-qgħad jew l-inattività għax-xogħol.

(15)Għall-finijiet ta’ din ir-Rakkomandazzjoni, it-traineeships għandhom jinftiehmu bħala perjodu limitat ta’ prattika tax-xogħol, li jinkludi komponent sinifikanti ta’ tagħlim u taħriġ, imwettqa sabiex tinkiseb esperjenza prattika u professjonali bil-ħsieb li tittejjeb l-impjegabbiltà u tiġi ffaċilitata t-tranżizzjoni għal relazzjoni ta’ impjieg regolari jew l-aċċess għal professjoni. Mingħajr preġudizzju għal tipi oħra ta’ traineeships li jistgħu jeżistu, ġew identifikati l-erba’ tipi ta’ traineeships li ġejjin: traineeships tas-suq miftuħ, traineeships li huma parti minn politiki attivi tas-suq tax-xogħol, traineeships li huma parti mill-kurrikuli tal-edukazzjoni u t-taħriġ formali, u traineeships li huma rekwiżit obbligatorju għall-aċċess ta’ ċerta professjoni.

(16)It-traineeships tas-suq miftuħ huma bbażati fuq ftehimiet bilaterali mhux obbligatorji bejn trainee u fornitur ta’ traineeship (pubbliku/privat/mingħajr skop ta’ qligħ) mingħajr l-involviment ta’ parti terza u mingħajr konnessjoni formali mal-edukazzjoni jew it-taħriġ.

(17)It-traineeships bħala parti mill-politiki attivi tas-suq tax-xogħol (ALMP) jiġu offruti lil dawk inattivi jew qiegħda jew lil dawk f’riskju li jispiċċaw qiegħda, normalment b’istituzzjoni pubblika (spiss servizz għall-impjiegi) li taġixxi bħala intermedjarju bejn il-fornitur tat-traineeship u t-trainee.

(18)It-traineeships jistgħu jkunu wkoll kollokamenti ta’ tagħlim ibbażati fuq ix-xogħol li huma parti mill-kurrikuli tal-edukazzjoni u t-taħriġ formali (skola, edukazzjoni vokazzjonali jew edukazzjoni għolja u taħriġ).

(19)Il-liġi nazzjonali tista’ tirregola wkoll ċerti traineeships u tagħmel it-tlestija tagħhom obbligatorja għall-aċċess għal professjoni speċifika (eż. mediċina, arkitettura, eċċ.).

(20)Din ir-Rakkomandazzjoni tapplika għat-traineeships kollha msemmija fil-premessi (16) sa (19).

(21)Peress li t-traineeships u l-programmi ta’ tagħlim ibbażati fuq ix-xogħol fl-edukazzjoni u t-taħriġ vokazzjonali kif stabbilit fir-Rakkomandazzjoni tal-Kunsill dwar Qafas Ewropew għal Apprendistati ta’ Kwalità u Effettivi ( 53 ) jvarjaw b’mod sinifikanti bejn l-Istati Membri, l-Istati Membri huma mħeġġa jivvalutaw liema miż-żewġ oqfsa ta’ kwalità japplikaw għall-esperjenzi ta’ tagħlim ibbażati fuq ix-xogħol tal-edukazzjoni u t-taħriġ vokazzjonali (VET), skont il-karatteristiċi speċifiċi nazzjonali u reġjonali tagħhom. Meta jagħmlu dan, biex jiżguraw li l-istudenti kollha fit-tagħlim imsejjes fuq ix-xogħol jirċievu l-ogħla livell ta’ protezzjoni, l-Istati Membri huma mħeġġa japplikaw il-kundizzjonijiet qafas li huma aktar protettivi fost iż-żewġ oqfsa, f’konformità maċ-ċirkostanzi nazzjonali.

(22)In-nuqqas ta’ paga ġusta u aċċess għal protezzjoni soċjali adegwata jippreżentaw ostakli għall-aċċess ugwali għall-opportunitajiet ta’ traineeship. Fin-nuqqas ta’ sors alternattiv ta’ introjtu, il-gruppi f’sitwazzjonijiet vulnerabbli għandhom it-tendenza li joqogħdu lura milli jinvolvu ruħhom fi traineeships, b’mod partikolari meta l-paga tkun assenti jew baxxa, jew meta jiġġarrbu kostijiet addizzjonali, pereżempju billi jagħmlu traineeship f’reġjun jew pajjiż differenti.

(23)Il-lakuni fl-aċċess għall-protezzjoni soċjali jistgħu jpoġġu l-benesseri u s-saħħa (mentali) tat-trainees f’riskju, jikkontribwixxu għall-inċertezza ekonomika, il-prekarjetà u r-riskju ta’ faqar tagħhom. Dan ir-riskju huwa partikolarment għoli għal trainees minn gruppi soċjoekonomikament żvantaġġati u/jew f’sitwazzjonijiet vulnerabbli oħra. It-trainees jistgħu jiffaċċjaw l-ostakli fl-aċċess għad-drittijiet u l-benefiċċji soċjali b’mod partikolari minħabba l-istorja kontributorja qasira tagħhom. Barra minn hekk, il-biċċa l-kbira tal-iskemi ta’ protezzjoni soċjali (bl-eċċezzjoni tal-benefiċċji tal-kura tas-saħħa) jeħtieġu status ta’ impjieg, li jeskludi t-trainees li mhumiex meqjusa bħala ħaddiema.

(24)Durata mtawla jew akkumulazzjoni ta’ traineeships multipli tista’ ddewwem l-aċċess għal relazzjonijiet ta’ impjieg regolari għat-trainees individwali kkonċernati. Dawn jistgħu jkunu wkoll indikattivi ta’ traineeships li qed jintużaw biex jieħdu post relazzjonijiet ta’ impjieg regolari.

(25)Durata mtawla ta’ traineeship tista’ tkun ġustifikata jekk tkun ġustifikata min-natura u l-iskop tat-tip speċifiku ta’ traineeship. Eżempji ta’ eċċezzjonijiet jistgħu jkunu traineeships li t-tlestija tagħhom hija rekwiżit obbligatorju għall-aċċess għal professjoni speċifika, fejn it-trajettorja biex jinkisbu l-għarfien, il-kompetenzi u l-esperjenza meħtieġa tiġġustifika esperjenza ta’ traineeship itwal. Ċerti traineeships li huma parti minn politiki attivi tas-suq tax-xogħol immirati lejn l-integrazzjoni tal-persuni f’sitwazzjoni vulnerabbli jistgħu jibbenefikaw ukoll minn durata itwal. Xi traineeships li huma parti mill-kurrikuli tal-edukazzjoni u t-taħriġ formali jista’ jkollhom durata itwal għal raġunijiet marbuta mal-kurrikuli.

(26)Traineeships ripetuti, u prattiki mmirati lejn is-sostituzzjoni ta’ impjiegi b’relazzjonijiet ta’ impjieg moħbija bħala traineeships, jistgħu jiġu indotti minn fornituri ta’ traineeships li jitolbu esperjenza preċedenti fl-istess qasam ta’ attività jew f’wieħed simili f’avviżi ta’ postijiet battala. Id-durata ġenerali tat-traineeships xi drabi tittawwal ukoll permezz ta’ traineeships ripetuti, inkluż dawk konsekuttivi, mal-istess impjegatur. Dawn il-prattiki jistgħu jkunu indikazzjoni oħra ta’ relazzjoni ta’ impjieg moħbija bħala traineeship. Madankollu, jista’ jkun hemm raġunijiet oġġettivi li abbażi tagħhom il-fornituri tat-traineeships jistgħu jirrikjedu esperjenza ta’ xogħol preċedenti minn trainees (kandidati). Każijiet bħal dawn jistgħu jinvolvu perijodu ekwivalenti ta’ esperjenzi ta’ xogħol preċedenti bħala alternattiva għal lawrja f’ċertu qasam ta’ attività jew kompetenza. Trajettorja għall-aċċess għal professjoni speċifika tista’ tiġġustifika wkoll esperjenza ta’ xogħol preċedenti qabel ma jinbeda traineeship aktar speċjalizzat.

(27)L-evalwazzjoni enfasizzat il-ħtieġa li jissaħħaħ l-appoġġ għat-trainees matul it-traineeship permezz ta’ mentoraġġ xieraq. Għalhekk, ir-rwol tas-superviżur jenħtieġ li jiġi kkomplementat b’mentor, li r-rwol tiegħu jkun jinkludi konsulenza, ikkowċjar u appoġġ lit-trainee bil-ħsieb tal-iżvilupp personali kif ukoll l-integrazzjoni fl-ambjent tax-xogħol, kull fejn ikun possibbli filwaqt li jitqiesu l-ħtiġijiet organizzattivi u d-daqs tal-fornitur tat-traineeship.

(28)Mill-pandemija tal-COVID-19 ’l hawn, żdiedet il-prevalenza ta’ arranġamenti ta’ xogħol mill-bogħod u ibridi. Sabiex jiġu żgurati l-kwalità u l-aċċessibbiltà ta’ traineeships mill-bogħod u ibridi, huma meħtieġa adattamenti għall-prattika miżjuda tat-telexogħol f’termini ta’ ambjent tax-xogħol xieraq (inkluż tagħmir) u organizzazzjoni tax-xogħol. Dan tal-aħħar jinkludi gwida, mentoraġġ, u kompiti adatti għal mod ta’ ħidma mill-bogħod u ibridu.

(29)Sabiex tiżdied it-trasparenza tal-informazzjoni dwar opportunità ta’ traineeship, il-fornituri tat-traineeships għandhom jiġu mħeġġa jinkludu informazzjoni dwar it-termini u l-kundizzjonijiet tat-traineeship, b’mod partikolari dwar il-livell ta’ paga, il-kundizzjonijiet tax-xogħol, il-kopertura tal-protezzjoni soċjali, inkluż l-assigurazzjoni tas-saħħa u tal-inċidenti, il-kompiti mistennija u l-komponent tat-tagħlim u t-taħriġ fl-avviżi ta’ postijiet battala u r-reklami għat-traineeships possibbilment billi tiġi inkluża ħolqa għal sit web li fih din l-informazzjoni.

(30)Il-fornituri tat-traineeships għandhom jiġu mħeġġa jipprovdu informazzjoni dwar il-politiki ta’ reklutaġġ, b’mod partikolari dwar is-sehem ta’ trainees reklutati. Dan jiġi kkalkulat billi jiġi diviż l-għadd ta’ trainees li ġew impjegati (wara t-tlestija tat-traineeship) biex jimlew pożizzjoni ta’ impjieg regolari bin-numru totali ta’ trainees fl-istess stabbiliment fl-istess sena.

(31)Is-servizzi għall-impjiegi u fornituri oħra ta’ gwida għall-karriera jenħtieġ li jiġu mħeġġa japplikaw l-istess rekwiżiti ta’ trasparenza bħall-fornituri tat-traineeships meta jipprovdu l-informazzjoni dwar l-opportunitajiet ta’ traineeship. Madankollu huwa rikonoxxut li s-servizzi għall-impjiegi u fornituri oħra ta’ gwida għall-karriera jistgħu ma jkunux konxji tal-elementi kollha ta’ informazzjoni elenkati taħt ir-rekwiżiti ta’ trasparenza u jistgħu jkunu dipendenti fuq ir-rieda tal-fornituri tat-traineeships li jikkondividu din l-informazzjoni.

(32)Sabiex jiġi żgurat aċċess ugwali għal gruppi f’sitwazzjonijiet vulnerabbli, hija meħtieġa sensibilizzazzjoni msaħħa għal dawn il-gruppi, bħal permezz ta’ komunikazzjoni mmirata u strateġiji ta’ sensibilizzazzjoni. Sabiex tiġi żgurata l-effettività ta’ dawn l-istrateġiji ta’ sensibilizzazzjoni, huwa essenzjali li jiġu involuti l-partijiet ikkonċernati rilevanti bħas-servizzi għall-impjiegi u l-istituzzjonijiet tal-edukazzjoni u t-taħriġ u li jitfasslu l-għodod ta’ komunikazzjoni u informazzjoni użati biex tintlaħaq l-aktar firxa wiesgħa ta’ persuni possibbli, inkluż dawk b’ċerti diżabbiltajiet (eż. siti web adattati u faċli biex jinqraw).

(33)Sabiex tiġi żgurata l-applikazzjoni tar-Rakkomandazzjoni, jeħtieġ li jissaħħaħ l-appoġġ lill-impjegaturi permezz ta’ gwida prattika u appoġġ finanzjarju, filwaqt li dan tal-aħħar jista’ jkun jiddependi fuq il-kundizzjoni li t-traineeships offruti jaderixxu mal-prinċipji tal-kwalità ta’ din ir-Rakkomandazzjoni.

(34)It-traineeships transfruntiera jistgħu jkunu partikolarment siewja peress li t-trainees jistgħu jitgħallmu lingwa oħra, ikunu esposti għal ambjent jew kultura ġdida u għalhekk jistgħu jiksbu ħiliet trasversali rilevanti. Hemm indikazzjonijiet li l-mobbiltà transfruntiera tat-trainees żdiedet ( 54 ), iżda ż-żgħażagħ għadhom jiffaċċjaw diffikultajiet biex jaċċessaw traineeships transfruntiera minħabba nuqqas ta’ mezzi finanzjarji u n-nuqqas ta’ disponibbiltà ta’ informazzjoni rilevanti (u suffiċjenti). Hija meħtieġa informazzjoni aktar konkreta u prattika dwar it-traineeships transfruntiera, bħal pereżempju dwar l-EURES, biex tittejjeb l-aċċessibbiltà.

(35)Il-mezzi biex jirrapportaw prattika ħażina u kundizzjonijiet tax-xogħol ħżiena jistgħu jappoġġaw lit-trainees fl-infurzar tad-drittijiet tax-xogħol tagħhom. Barra minn hekk, jekk it-trainees jitħallew ikollhom id-drittijiet tagħhom difiżi mir-rappreżentanzi tal-ħaddiema, dan isaħħaħ il-pożizzjoni tagħhom.

(36)Il-programmi tal-Istati Membri li jippromwovu u joffru traineeships ta’ kwalità jistgħu jiġu appoġġati finanzjarjament mill-Fondi Ewropej. Il-Fond Soċjali Ewropew Plus (FSE+) stabbilit mir-Regolament (UE) 2021/1057 ( 55 ), il-Faċilità għall-Irkupru u r-Reżiljenza (RRF, Recovery and Resilience Facility) stabbilita mir-Regolament (UE) 2021/241 ( 56 ) għal riformi u investimenti eliġibbli previsti fil-pjanijiet għall-irkupru u r-reżiljenza tal-Istati Membri għat-twettiq matul il-ħajja tal-Faċilità sa tmiem l-2026, il-Fond għal Tranżizzjoni Ġusta stabbilit mir-Regolament (UE) 2021/1056 ( 57 ) u l-Istrument ta’ Appoġġ Tekniku (TSI, Strument ta’ Appoġġ Tekniku) stabbilit mir-Regolament (UE) 2021/240 ( 58 ), jistgħu jappoġġaw l-implimentazzjoni tar-Rakkomandazzjoni mill-Istati Membri.

(37)Sabiex tiżgura approċċi konsistenti fost l-Istati Membri, il-Kummissjoni pproponiet direttiva (COM(2024) 132) li tistabbilixxi qafas komuni ta’ prinċipji u miżuri biex jittejbu u jiġu infurzati l-kundizzjonijiet tax-xogħol tat-trainees u biex jiġu miġġielda r-relazzjonijiet regolari ta’ impjieg moħbija bħala traineeships.

(38)F’dak li għandu x’jaqsam mal-informazzjoni li għandha tiġi pprovduta lit-trainees fil-ftehim tat-traineeship bil-miktub, it-trainees li huma ħaddiema huma intitolati għar-rekwiżiti minimi relatati mal-informazzjoni kif stabbiliti fid-Direttiva (UE) 2019/1152 tal-Parlament Ewropew u tal-Kunsill ( 59 ). Sa fejn mhumiex koperti minn din id-Direttiva, l-elementi f’din ir-rakkomandazzjoni jenħtieġ li jitqiesu flimkien ma’ dawk ir-rekwiżiti minimi għat-trainees li huma ħaddiema.

(39)L-implimentazzjoni ta’ din ir-Rakkomandazzjoni jenħtieġ li ma tikkostitwixxix raġunijiet validi għat-tnaqqis tal-livell ġenerali ta’ protezzjoni mogħti lit-trainees koperti minn din ir-Rakkomandazzjoni.

(40)Din ir-Rakkomandazzjoni jenħtieġ li tevita li timponi restrizzjonijiet amministrattivi, finanzjarji jew legali b’mod li jxekklu l-ħolqien jew l-iżvilupp ta’ intrapriżi żgħar u ta’ daqs medju (SMEs). L-Istati Membri huma għalhekk mistiedna jivvalutaw l-impatt tal-politiki jew ir-riformi tagħhom fuq l-SMEs sabiex jiżguraw li l-SMEs ma jiġux affettwati b’mod sproporzjonat, b’attenzjoni speċifika għall-mikrointrapriżi u l-piż amministrattiv, u jippubblikaw ir-riżultati ta’ dawn il-valutazzjonijiet.

(41)Din ir-Rakkomandazzjoni tħassar ir-Rakkomandazzjoni tal-Kunsill tal-10 ta’ Marzu 2014 dwar Qafas tal-Kwalità għat-Traineeships li għalhekk jenħtieġ li ma tibqax tiġi applikata aktar mill-Istati Membri.

JIRRIKONOXXI L-INTENZJONI TAL-KUMMISSJONI LI

(42)trawwem kooperazzjoni mill-qrib mal-Istati Membri, mas-sħab soċjali u ma’ partijiet ikkonċernati oħra bil-ħsieb li din ir-Rakkomandazzjoni tiġi applikata malajr.

(43)taħdem mal-Istati Membri, is-sħab soċjali, is-servizzi għall-impjiegi, l-organizzazzjonijiet taż-żgħażagħ u tat-trainees, l-istituzzjonijiet tal-edukazzjoni u t-taħriġ u partijiet ikkonċernati oħra biex tippromwovi din ir-Rakkomandazzjoni, inkluż permezz ta’ sensibilizzazzjoni dwar il-prinċipji tal-kwalità u l-benefiċċji tat-traineeships għaż-żgħażagħ u l-fornituri tat-traineeships.

(44)tħeġġeġ u tappoġġa l-implimentazzjoni ta’ din ir-Rakkomandazzjoni, inkluż permezz tal-iffaċilitar tal-iskambju tal-aħjar prattiki fost l-Istati Membri u fost il-partijiet ikkonċernati permezz ta’ networks eżistenti, inkluż sħubijiet tal-ħiliet skont il-Patt għall-Ħiliet.

(45)tappoġġa l-implimentazzjoni ta’ din ir-Rakkomandazzjoni permezz ta’ finanzjament rilevanti tal-Unjoni, f’konformità mal-oqfsa legali rilevanti, biex jiżdied l-għadd ta’ traineeships ta’ kwalità.

(46)taħdem b’mod konġunt mal-Istati Membri fuq il-ġbir ta’ sett limitat ta’ data dwar it-traineeships, b’mod partikolari bil-ħsieb li jiġi mmonitorjat il-progress fl-applikazzjoni ta’ din ir-Rakkomandazzjoni filwaqt li jittieħed kont tal-piż ta’ rapportar mhux meħtieġ.

(47)tkompli l-monitoraġġ f’kooperazzjoni mal-Istati Membri u bl-appoġġ tal-Kumitat tal-Impjiegi, il-progress fl-applikazzjoni tal-Qafas tal-Kwalità għat-Traineeships imsaħħaħ, filwaqt li tibni fuq l-istrumenti ta’ monitoraġġ eżistenti użati fil-qafas tas-Semestru Ewropew.

(48)tirrapporta lill-Kunsill dwar il-progress fl-applikazzjoni ta’ din ir-Rakkomandazzjoni abbażi tal-informazzjoni pprovduta mill-Istati Membri fi żmien [tliet snin] mid-data tal-adozzjoni tagħha.

ADOTTA DIN IR-RAKKOMANDAZZJONI

Objettiv u kamp ta’ applikazzjoni

1.Din ir-Rakkomandazzjoni għandha l-għan li ttejjeb il-kwalità tat-traineeships, b’mod partikolari fir-rigward tal-kontenut tat-tagħlim u t-taħriġ u l-kundizzjonijiet tax-xogħol, bl-għan li tiġi ffaċilitata t-tranżizzjoni mill-edukazzjoni, il-qgħad jew l-inattività għax-xogħol.

2.Jenħtieġ li din ir-Rakkomandazzjoni tkopri t-trainees kollha, irrispettivament mill-istatus tal-impjieg tagħhom, inkluż it-trainees li huma ħaddiema biss sa fejn u sal-punt li dispożizzjonijiet ekwivalenti jew aktar favorevoli ma jkunux stabbiliti fil-liġi tal-Unjoni.

Prinċipji ta’ kwalità

B’DAN JIRRAKKOMANDA LI L-ISTATI MEMBRI:

Ftehim bil-miktub

3.jiżguraw li t-traineeships ikunu bbażati fuq ftehim bil-miktub konkluż fil-bidu tat-traineeship bejn it-trainee u l-fornitur tat-traineeship.

4.jiżguraw li l-ftehimiet tat-traineeships jistabbilixxu l-elementi ta’ informazzjoni elenkati fl-Artikolu 4 tad-Direttiva (UE) 2019/1152, il-komponent tat-tagħlim u t-taħriġ, inkluż l-objettivi tiegħu, il-kundizzjonijiet tax-xogħol, il-kompiti li għandhom jitwettqu, l-arranġamenti għall-mentoraġġ, is-superviżjoni u l-evalwazzjoni, id-dettalji dwar il-kopertura tal-protezzjoni soċjali, inkluż fir-rigward tal-kopertura għall-mard u l-kura tas-saħħa kif ukoll għall-aċċidenti fuq il-post tax-xogħol u l-mard okkupazzjonali, id-drittijiet u l-obbligi tal-partijiet skont il-liġi tal-Unjoni u nazzjonali applikabbli, il-ftehimiet kollettivi u l-prattika, u, fejn rilevanti, il-politiki tal-fornitur tat-traineeships dwar il-kunfidenzjalità u s-sjieda tad-drittijiet tal-proprjetà intellettwali.

Kundizzjonijiet tat-tagħlim u tax-xogħol

5.jiżguraw li t-trainees jiġu kkonsultati meta jiġu stabbiliti l-objettivi speċifiċi ta’ tagħlim u taħriġ tat-traineeship sabiex jgħinu lit-trainees jiksbu esperjenza prattika u ħiliet rilevanti. Il-kompiti assenjati lit-trainee għandhom jippermettu li dawn l-objettivi jintlaħqu.

6.jiżguraw li t-trainees jitħallsu b’mod ġust , filwaqt li jqisu elementi bħall-kompiti u r-responsabbiltajiet tat-trainee, l-intensità tax-xogħol tat-trainee, u l-piż tal-komponent tat-tagħlim u t-taħriġ.

7.jiżguraw li d-drittijiet u l-kundizzjonijiet tax-xogħol tat-trainees skont il-liġi tal-Unjoni u nazzjonali applikabbli, inkluża l-leġiżlazzjoni dwar is-saħħa u s-sikurezza, il-limiti għall-ħin massimu tax-xogħol fil-ġimgħa, il-perjodi minimi ta’ mistrieħ ta’ kuljum u fil-ġimgħa u, fejn applikabbli, l-intitolamenti minimi għall-vaganzi, jiġu rispettati permezz ta’ monitoraġġ u infurzar effettivi.

8.jiżguraw li l-fornituri tat-traineeships jaħtru superviżur biex jiggwida lit-trainee fil-kompiti assenjati, jissorvelja l-attivitajiet imwettqa mit-trainee u jimmonitorja u jivvaluta l-progress tagħhom.

9.jiżguraw li l-fornituri tat-traineeships jaħtru mentor li jaġixxi bħala konsulent għat-trainee, u jipprovdi kkowċjar u appoġġ, kull fejn ikun possibbli filwaqt li jitqiesu l-ħtiġijiet organizzattivi u d-daqs tal-fornitur tat-traineeship.

10.jiżguraw li l-fornituri tat-traineeships jipprovdu ambjent tax-xogħol xieraq, sikur u tajjeb għas-saħħa, inkluż tagħmir u organizzazzjoni tax-xogħol fil-każ ta’ traineeships mill-bogħod u ibridi.

11.jiżguraw tul ta’ żmien raġonevoli tat-traineeships li ma jaqbiżx is-sitt xhur, ħlief f’każijiet fejn tul ta’ żmien itwal ikun iġġustifikat minn raġunijiet oġġettivi u jikkunsidra l-prattiki nazzjonali. Fil-każ ta’ traineeships ripetuti, inklużi dawk konsekuttivi, mal-istess impjegatur, jiżguraw li t-tul totali ta’ dawk it-traineeships ma jaqbiżx is-sitt xhur, ħlief f’każijiet fejn tul ta’ żmien itwal ikun ġustifikat minn raġunijiet oġġettivi.

12.jiċċaraw iċ-ċirkostanzi u l-kundizzjonijiet li taħthom traineeship jista’ jiġi estiż jew imġedded wara t-tmiem tat-traineeship inizjali.

13.jiżguraw li l-impjegaturi ma jirrikjedux li l-kandidati għal traineeships ikollhom esperjenza ta’ xogħol preċedenti fil-qasam tal-attività, ħlief f’każijiet fejn tali rekwiżit ikun ġustifikat minn raġunijiet oġġettivi.

14.jiżguraw il-prattika li fil-ftehim ta’ traineeship ikun speċifikat li jew it-trainee jew il-fornitur tat-traineeship jistgħu jtemmuh permezz ta’ komunikazzjoni bil-miktub, billi jipprovdu avviż minn qabel ta’ tul xieraq fid-dawl tat-tul tat-traineeship u l-prattika nazzjonali rilevanti.

15.jiżguraw, f’kooperazzjoni mal-awtoritajiet kompetenti, mezzi għat-trainees biex jirrapportaw prattiki ħżiena u kundizzjonijiet tax-xogħol ħżiena u jipprovdu informazzjoni dwar dawk il-mezzi.

Protezzjoni soċjali

16.jiżguraw li t-trainees ikollhom aċċess għal protezzjoni soċjali adegwata, inkluż il-kopertura meħtieġa f’konformità mal-leġiżlazzjoni nazzjonali, u filwaqt li jqisu, fejn applikabbli, ir-Rakkomandazzjoni tal-Kunsill tat-8 ta’ Novembru 2019 ( 60 ).

Rikonoxximent xieraq tat-traineeships

17.jippromwovu r-rikonoxximent u l-validazzjoni tal-għarfien, il-ħiliet u l-kompetenzi miksuba matul it-traineeships u jħeġġu lill-fornituri tat-traineeships jaffermawhom, abbażi ta’ valutazzjoni, permezz ta’ ċertifikat, fejn xieraq, u jekk possibbli f’format diġitali.

Rekwiżiti ta’ trasparenza

18.jiżguraw li l-fornituri tat-traineeships jinkludu fl-avviżi u r-reklami ta’ postijiet battala informazzjoni dwar it-termini u l-kundizzjonijiet tat-traineeship, b’mod partikolari dwar il-livell tal-paga, il-kundizzjonijiet tax-xogħol, il-kopertura tal-protezzjoni soċjali, inkluż l-assigurazzjoni tas-saħħa u tal-inċidenti, il-kompiti mistennija u l-komponent tat-tagħlim u t-taħriġ.

19.iħeġġu lill-fornituri tat-traineeships jagħtu informazzjoni dwar il-politiki ta’ reklutaġġ, inkluż is-sehem ta’ trainees reklutati f’dawn l-aħħar snin.

20.jinkoraġġixxu lis-servizzi għall-impjiegi u lil fornituri oħra ta’ gwida għall-karriera, biex meta jipprovdu informazzjoni dwar it-traineeships, japplikaw ir-rekwiżiti ta’ trasparenza kif elenkati fil-punt 18.

Traineeships inklużivi

21.itejbu s-sensibilizzazzjoni għal trainees potenzjali li jappartjenu għal gruppi f’sitwazzjonijiet vulnerabbli, inkluż billi jqajmu kuxjenza dwar il-benefiċċji ta’ traineeships ta’ kwalità f’termini ta’ impjegabbiltà akbar.

22.jiżguraw it-trattament ugwali u n-nondiskriminazzjoni fit-traineeships, inkluż fil-kriterji tal-għażla u l-politiki ta’ reklutaġġ, u jtejbu l-aċċess għall-opportunitajiet ta’ traineeships għall-applikanti potenzjali kollha, b’mod partikolari dawk minn gruppi f’sitwazzjonijiet vulnerabbli.

23.jiżguraw li l-fornituri tat-traineeships jużaw lingwaġġ newtrali għall-ġeneru u inklużiv fl-avviżi u r-reklami ta’ postijiet battala.

24.jiżguraw li l-programmi ta’ traineeships, inklużi l-postijiet tax-xogħol, it-taħriġ, l-għodod diġitali, it-tagħmir tal-uffiċċju u tax-xogħol, jiġu adattati għall-ħtiġijiet individwali tat-trainees fejn rilevanti, b’mod partikolari għat-trainees b’diżabbiltà, anke permezz tal-għoti ta’ akkomodazzjoni raġonevoli xierqa f’konformità mal-Artikolu 5 tad-Direttiva tal-Kunsill 2000/78/KE.

Traineeships transfruntiera

25.jiffaċilitaw il-mobbiltà transfruntiera tat-trainees fl-Unjoni inter alia, billi jiċċaraw il-qafas legali nazzjonali applikabbli għat-traineeships u jistabbilixxu regoli ċari dwar l-ospitar ta’ trainees minn u l-bgħit ta’ trainees lejn Stati Membri oħra u billi jnaqqsu l-formalitajiet amministrattivi.

26.jagħmlu użu min-network tal-EURES biex jappoġġaw il-mobbiltà transfruntiera tat-trainees u jiskambjaw l-informazzjoni dwar traineeships imħallsa permezz tal-portal tal-EURES, f’konformità mad-dispożizzjonijiet korrispondenti tar-Regolament (UE) 2016/589 tal-Parlament Ewropew u tal-Kunsill ( 61 ).

27.jiżviluppaw aktar materjal ta’ gwida prattika u informazzjoni għal trainees (potenzjali) dwar traineeships transfruntiera permezz tal-EURES, inkluż f’formati li huma aċċessibbli għal persuni b’tipi differenti ta’ diżabbiltajiet.

28.jappoġġaw lill-fornituri tat-traineeships u lill-istituzzjonijiet tal-edukazzjoni u t-taħriġ fl-iffaċilitar tat-traineeships transfruntiera, filwaqt li jagħmlu l-aħjar użu mill-inizjattivi Ewropej, b’mod partikolari l-programm Erasmus+ stabbilit mir-Regolament (UE) 2021/817 tal-Parlament Ewropew u tal-Kunsill ( 62 ).

29.jinkoraġġixxu l-applikazzjoni tal-prinċipji ta’ din ir-Rakkomandazzjoni, fejn applikabbli, fil-ftehimiet ta’ mobbiltà tat-traineeships bejn l-organizzazzjonijiet li jibagħtu fl-Unjoni Ewropea u l-organizzazzjonijiet ospitanti barra mill-Unjoni.

Appoġġ addizzjonali għat-traineeships

30.iħeġġu lill-fornituri tat-traineeships kif ukoll lill-organizzazzjonijiet intermedjarji, bħas-servizzi għall-impjiegi u l-istituzzjonijiet tal-edukazzjoni u t-taħriġ, jipprovdu appoġġ ta’ gwida għall-karriera matul it-traineeship, bħal konsulenza dwar il-karriera u opportunitajiet ta’ networking, biex jiffaċilitaw it-tranżizzjoni lejn relazzjoni ta’ impjiegregolari wara t-traineeship.

Kundizzjonijiet qafas

31.jiżguraw l-involviment attiv tas-sħab soċjali fl-applikazzjoni ta’ din ir-Rakkomandazzjoni.

32.jippromwovu l-involviment attiv tas-servizzi għall-impjiegi, l-istituzzjonijiet tal-edukazzjoni u t-taħriġ, il-fornituri tat-taħriġ u partijiet ikkonċernati rilevanti oħra fl-applikazzjoni ta’ din ir-Rakkomandazzjoni.

33.jiżguraw li r-rappreżentanti tal-ħaddiema jkunu jistgħu jinvolvu ruħhom fi kwalunkwe proċedura ġudizzjarja jew amministrattiva rilevanti biex jinfurzaw kwalunkwe wieħed mid-drittijiet u l-obbligi li jirriżultaw mil-liġi nazzjonali applikabbli. Huma jistgħu jaġixxu f’isem trainee wieħed jew aktar jew b’appoġġ għalih f’każ ta’ ksur ta’ xi dritt jew obbligu li jirriżulta mil-liġi nazzjonali applikabbli, bl-approvazzjoni ta’ dak it-trainee jew ta’ dawk it-trainees.

L-implimentazzjoni fil-livell nazzjonali

L-applikazzjoni tal-Qafas tal-Kwalità għat-Traineeships imsaħħaħ

34.jieħdu miżuri xierqa biex japplikaw din ir-Rakkomandazzjoni malajr kemm jista’ jkun u jippreżentaw pjan ta’ implimentazzjoni li jistabbilixxi l-miżuri korrispondenti li għandhom jittieħdu fil-livell nazzjonali sa [data tal-adozzjoni + 18-il xahar].

35.jipprevedu appoġġ finanzjarju u/jew mhux finanzjarju bħal gwida prattika għall-fornituri ta’ traineeships b’mod partikolari biex jilħqu gruppi vulnerabbli u għal kumpaniji mikro, żgħar u ta’ daqs medju, fl-applikazzjoni ta’ din ir-Rakkomandazzjoni.

Appoġġ biex tiżdied l-impjegabbiltà tat-trainees

36.joffru inċentivi lill-fornituri tat-traineeships biex joffru lit-trainees relazzjoni ta’ impjieg regolari wara t-tlestija ta’ traineeship b’suċċess.

37.jagħmlu użu mill-fondi u l-istrumenti rilevanti tal-Unjoni biex jiżdied l-għadd ta’ traineeships ta’ kwalità li jsegwu l-gwida deskritta f’din ir-Rakkomandazzjoni.

Segwitu

38.flimkien mal-Kummissjoni, jaħdmu fuq il-ġbir ta’ data dwar it-traineeships, bil-ħsieb partikolari li jinformaw it-tfassil tal-politika dwar traineeships ta’ kwalità.

Magħmul fi Brussell,

(1)    Il-Linji Gwida Politiċi għall-Kummissjoni Ewropea li jmiss 2019–2024. “Unjoni li Tirsisti għal Aktar. L-Aġenda Tiegħi għall-Ewropa.” Disponibbli online .

(2)    Il-qgħad fost iż-żgħażagħ (15-25 sena) kien ta’ 14,9 % f’Jannar 2024, meta mqabbel mar-rata ġenerali tal-qgħad (20-64 sena) ta’ 6,0 % (Eurostat).

(3)     COM(2021) 102 final.

(4)     Ewrobarometru Flash 523 (2964/FL523).

(5)    Dan ma jinkludix it-traineeships li huma obbligatorji għall-aċċess għal professjoni.

(6)    Dawn in-numri jenħtieġ li jiġu interpretati b’kawtela peress li huma bbażati fuq il-kombinazzjoni tar-riżultati tal-Ewrobarometru Flash 523 (is-sehem ta’ trainees li għamlu traineeships b’durata totali ta’ aktar minn 6 xhur li ddikjaraw ukoll li ma tgħallmux affarijiet utli professjonalment) u d-data tal-EU-LFS dwar l-għadd ta’ trainees imħallsa.

(7)    Disponibbli online .

(8)     Conference on the Future of Europe. Report on the final outcome. May 2022.

(9)     Disponibbli online .

(10)    Disponibbli online .

(11)    Disponibbli online .

(12)     COM(2022) 548 final .

(13)     “Study exploring the context, challenges and possible solution in relation to the quality of traineeships in the EU” minn konsorzju ta’ Ernst &Young (EY), iċ-Ċentru għall-Istudji Politiċi Ewropej (CEPS) u Open Evidence (li jmiss).

(14)    ĠU C 456, 18.12.2018, p. 16.

(15)    COM (2024) 1 final.

(16)    COM (2020) 276 final.

(17)    ĠU C 372, 4.11.2020, p. 1–9.

(18)    ĠU C 417, 2.12.2020, p. 1–16.

(19)     https://ec.europa.eu/social/main.jsp?catId=1147&langId=mt .

(20)    ĠU L 183, 29.6.1989, p. 1–8.

(21)    ĠU C 387, 15.11.2019, p. 1–8.

(22)    ĠU L 303, 2.12.2000, p. 16–22.

(23)    COM(2020) 620 final. Disponibbli online .

(24)    ĠU C 93, 19.3.2021, p. 1–14.

(25)

   ĠU C 153, 2.5.2018, p. 1-6.

(26)     Disponibbli online .

(27)

   COM(2020) 274 final.

(28)    COM(2023) 719 final. 2023/0405 (NLE).

(29)    Il-Komunikazzjoni tal-Kummissjoni “Strateġija għall-SMEs għal Ewropa sostenibbli u diġitali”, COM/2020/103 final.

(30)    COM(2024)131.

(31)    Disponibbli online .

(32)    Disponibbli online .

(33)    Disponibbli online .

(34)     Disponibbli online .

(35)     Disponibbli online .

(36)     Disponibbli online .

(37)     Disponibbli online .  

(38)     Disponibbli online . 

(39)     Disponibbli online . .

(40)    Dokument ta’ Ħidma tal-Persunal tal-Kummissjoni, Rapport tal-Valutazzjoni tal-Impatt (2024), li jakkumpanja l-proposta għal Direttiva tal-Parlament Ewropew u tal-Kunsill dwar it-titjib u l-infurzar tal-kundizzjonijiet tax-xogħol tat-trainees u l-ġlieda kontra r-relazzjonijiet ta’ impjieg moħbija bħala traineeships u l-proposta għal Rakkomandazzjoni tal-Kunsill dwar Qafas tal-Kwalità għat-Traineeships imsaħħaħ, li ġej.

(41)    Inkluż is-Servizz Legali, is-SĠ, id-DĠ CNECT, id-DĠ EAC, il-JRC, id-DĠ COMM, id-DĠ GROW, id-DĠ JUST, id-DĠ REGIO u d-DĠ AGRI.

(42)    Il-Bord tal-Iskrutinju Regolatorju, it-Tieni Opinjoni “Pożittiva b’riżervi” dwar il-valutazzjoni tal-impatt Qafas tal-Kwalità għat-traineeships tat-28 ta’ Frar 2024 (li għandha tiġi ppubblikata).

(43)    ĠU C 88, 27.3.2014, p. 1. Disponibbli online .

(44)    ĠU C 417, 2.12.2020, p. 1–16.

(45)    ĠU C 372, 4.11.2020, p. 1-9.

(46)    Waħda mit-tliet miri soċjali fil-livell tal-UE inklużi fil- Pjan ta’ Azzjoni tal-Pilastru Ewropew tad-Drittijiet Soċjali  Għandha tinkiseb sal-2030.

(47)    Conference on the Future of Europe, Report on the final outcome – May 2022. Disponibbli online .

(48)    Riżoluzzjoni tal-Parlament Ewropew tal-14 ta’ Ġunju 2023 li jinkludi rakkomandazzjonijiet lill-Kummissjoni dwar traineeships ta’ kwalità fl-Unjoni (2020/2005 (INL)). Disponibbli online .

(49)    Disponibbli online .

(50)    Disponibbli online .

(51)    Disponibbli online .

(52)    L-istħarriġ mill-Ewrobarometru tal-2013 staqsa dwar il-kopertura tal-assigurazzjoni tas-saħħa (73 % tar-rispondenti ddikjaraw li kienu koperti), iżda mhux dwar il-kopertura tal-protezzjoni soċjali.

(53)    ĠU C 417, 2.12.2020, p. 1–16.

(54)    Kif turi l-prevalenza tat-traineeships transfruntiera: żieda minn 9 % fl-2014 għal 19 % fl-2022 skont l-evalwazzjoni tar-Rakkomandazzjoni tal-Kunsill tal-2014, appoġġata mir-riżultati tal-istħarriġ mill-Ewrobarometru (FL523) tal-2023 fejn 21 % ta’ dawk li wieġbu għamlu mill-inqas traineeship wieħed f’pajjiż ieħor tal-UE.

(55)    ĠU L 231, 30.6.2021, p. 21–59.

(56)    ĠU L 57, 18.2.2021, p. 17–75.

(57)    ĠU L 231, 30.6.2021, p. 1–20.

(58)    ĠU L 57, 18.2.2021, p. 1–16.

(59)    ĠU L 186, 11.7.2019, p. 105–121.

(60)    Ir-Rakkomandazzjoni tal-Kunsill tat-8 ta’ Novembru 2019 dwar l-aċċess għall-protezzjoni soċjali għall-ħaddiema u għall-persuni li jaħdmu għal rashom (ĠU C 387, 15.11.2019, p. 1).

(61)    Ir-Regolament (UE) 2016/589 tal-Parlament Ewropew u tal-Kunsill tat-13 ta’ April 2016 dwar network Ewropew ta’ servizzi tal-impjiegi (EURES), aċċess tal-ħaddiema għas-servizzi ta’ mobbiltà u integrazzjoni ulterjuri tas-swieq tax-xogħol u li jemenda Regolamenti (UE) Nru 492/2011 u (UE) Nru 1296/2013 (ĠU L 107, 22.4.2016, p. 1). Disponibbli online.

(62)    Ir-Regolament (UE) 2021/817 tal-Parlament Ewropew u tal-Kunsill tal-20 ta’ Mejju 2021 li jistabbilixxi Erasmus+: il-Programm tal-Unjoni għall-edukazzjoni u taħriġ, żgħażagħ u sport u li jħassar ir-Regolament (UE) Nru 1288/2013 (ĠU L 189, 28.5.2021, p. 1). Disponibbli online .