IL-KUMMISSJONI EWROPEA

Brussell, 28.6.2023

COM(2023) 368 final

2023/0211(COD)

Proposta għal

REGOLAMENT TAL-PARLAMENT EWROPEW U TAL-KUNSILL

dwar il-forniment ta’ servizzi tal-euro diġitali minn fornituri ta’ servizzi ta’ pagament inkorporati fi Stati Membri li l-munita tagħhom mhijiex l-euro u li jemenda r-Regolament (UE) 2021/1230 tal-Parlament Ewropew u tal-Kunsill

(Test b’rilevanza għaż-ŻEE)

{COM(2023) 364 final} - {COM(2023) 369 final} - {SEC(2023) 257 final} - {SWD(2023) 233 final} - {SWD(2023) 234 final}

MEMORANDUM TA’ SPJEGAZZJONI

1.KUNTEST TAL-PROPOSTA

•Raġunijiet u objettivi tal-proposta

Din il-proposta tikkomplementa r-Regolament (UE) Nru (XXX/XXX) li jistabbilixxi l-euro diġitali fir-rigward ta’ servizzi tal-euro diġitali pprovduti minn fornituri ta’ servizzi ta’ pagament inkorporati fi Stati Membri li l-munita tagħhom mhijiex l-euro. Ir-Regolament (XXX/XXX) li jistabbilixxi l-euro diġitali huwa indirizzat lill-Istati Membri li l-munita tagħhom hija l-euro. Sabiex jiġi żgurat li l-forniment ta’ servizzi tal-euro diġitali minn fornituri ta’ servizzi ta’ pagament inkorporati fi Stat Membru li l-munita tiegħu mhijiex l-euro, ikun issorveljat b’mod adegwat fiż-żona tal-euro mill-awtoritajiet kompetenti tal-Istat Membru li l-munita tiegħu mhijiex l-euro, huwa meħtieġ li jiġu stabbiliti regoli li japplikaw għal dawn il-fornituri ta’ servizzi ta’ pagament. Ir-regoli li jirregolaw l-aċċess għall-euro diġitali u l-użu tiegħu fl-Istati Membri li l-munita tagħhom mhijiex l-euro jinsabu fl-Artikolu 18 tar-Regolament (UE) Nru (XXX/XXX) dwar l-istabbiliment tal-euro diġitali.

•Konsistenza mad-dispożizzjonijiet eżistenti fil-qasam ta’ politika

Dan ir-Regolament huwa konsistenti mad-Direttiva (UE) 2015/2366 tal-Parlament Ewropew u tal-Kunsill tal-15 ta’ Novembru 2015 dwar is-servizzi ta’ pagament fis-suq intern, kif emendata bid-Direttiva XXX/23. Id-Direttiva dwar is-Servizzi ta’ Pagament tipprevedi regoli armonizzati li jirregolaw il-forniment b’xejn ta’ servizzi ta’ pagament fl-Unjoni kollha u jenħtieġ li tapplika wkoll għal tranżazzjoni ta’ pagament f’euro diġitali. B’mod partikolari, dan ir-Regolament se jippermetti lill-fornituri ta’ servizzi ta’ pagament inkorporati fi Stat Membru li l-munita tiegħu mhijiex l-euro, joffru lir-residenti taż-żona tal-euro servizzi diġitali ta’ pagament bl-euro flimkien ma’ servizzi bankarji jew ta’ pagament oħrajn, permezz ta’ forniment ta’ servizzi b’xejn jew stabbiliment b’xejn.

•Konsistenza ma’ politiki oħra tal-Unjoni

Dan ir-Regolament huwa meħtieġ biex tiġi evitata kwalunkwe frammentazzjoni fis-suq intern, peress li l-fornituri kollha tas-servizzi ta’ pagament tal-UE, irrispettivament minn fejn ikunu ġew liċenzjati, jenħtieġ li jkunu f’pożizzjoni li jipprovdu servizzi simili biex jaqdu bl-aħjar mod lin-negozji u lin-nies.

Dan ir-Regolament huwa konsistenti mal-Istrateġiji tal-Finanzi Diġitali u tal-Pagamenti bl-Imnut 1 tal-Kummissjoni. Dik il-komunikazzjoni enfasizzat li euro diġitali jaġixxi bħala katalist għall-innovazzjoni fil-pagamenti, fil-finanzjament u fil-kummerċ fil-kuntest tal-isforzi li għaddejjin biex titnaqqas il-frammentazzjoni tas-suq tal-pagamenti bl-imnut tal-UE. Għalhekk, jenħtieġ li l-fornituri ta’ servizzi ta’ pagament kull fejn ikunu inkorporati fl-Unjoni jqassmu s-servizzi tal-euro diġitali sabiex jiġi żgurat livell għoli ta’ kompetizzjoni fost il-fornituri tas-servizzi ta’ pagament.

2.BAŻI ĠURIDIKA, SUSSIDJARJETÀ U PROPORZJONALITÀ

•Bażi ġuridika

Dan ir-Regolament huwa bbażat fuq l-Artikolu 114 TFUE, l-istess bħad-Direttiva (UE) 2015/2366. Billi tirregola d-distribuzzjoni tas-servizzi tal-euro diġitali minn fornituri ta’ servizzi ta’ pagament inkorporati fi Stat Membru li l-munita tiegħu mhijiex l-euro, din il-proposta se tiżgura l-moviment liberu ta’ servizzi ta’ pagament madwar l-Unjoni. Din il-proposta se tiżgura li l-Fornituri tas-servizzi ta’ pagament kull fejn ikunu inkorporati fl-Unjoni jkunu soġġetti għal rekwiżiti u standards superviżorji simili li huma meħtieġa għall-finijiet tas-salvagwardja tal-istabbiltà finanzjarja u għall-garanzija ta’ kundizzjonijiet ekwi fost il-fornituri tas-servizzi ta’ pagament.

•Sussidjarjetà

Dan ir-Regolament jagħmel applikabbli d-dispożizzjonijiet rilevanti tar-Regolament (UE) Nru XX dwar l-istabbiliment tal-euro diġitali għall-fornituri ta’ servizzi ta’ pagament inkorporati fl-Istati Membri li l-munita tagħhom mhijiex l-euro. Ir-Regolament (UE) Nru XX dwar l-istabbiliment tal-euro diġitali huwa bbażat fuq l-Artikolu 133 li huwa kompetenza esklużiva tal-Unjoni.

Barra minn hekk, minħabba li l-objettiv segwit mill-miżuri proposti għandu l-għan li jiżgura li l-leġiżlazzjoni eżistenti tal-Unjoni, ibbażata fuq l-Artikolu 114 TFUE, tkun applikabbli fir-rigward tal-forniment ta’ servizzi tal-euro diġitali minn fornituri ta’ servizzi ta’ pagament inkorporati fi Stati Membri li l-munita tagħhom mhijiex l-euro, dan jista’ jinkiseb l-aħjar fil-livell tal-UE aktar milli permezz ta’ inizjattivi nazzjonali differenti.

•Proporzjonalità

Dan ir-Regolament huwa meħtieġ biex jiġu evitati ostakli fis-suq intern, bejn fornituri ta’ servizzi ta’ pagament inkorporati fiż-żona tal-euro u barra minnha. L-obbligi li jinsabu f’dan ir-Regolament huma simili għal dawk stabbiliti fir-Regolament li jistabbilixxi l-euro diġitali, u huma konformi mal-prinċipju tal-proporzjonalità għar-raġunijiet stabbiliti fil-memorandum ta’ spjegazzjoni li jakkumpanja dik il-proposta.

•Għażla tal-istrument

Regolament huwa l-istrument xieraq biex jikkontribwixxi għall-ħolqien ta’ ġabra unika ta’ regoli, peress li għandu applikazzjoni ġenerali u jorbot fl-intier tiegħu u jkun direttament applikabbli fl-Istati Membri kollha, u b’hekk titneħħa l-possibbiltà ta’ differenzi fl-applikazzjoni fl-Istati Membri differenti.

3.RIŻULTATI TAL-EVALWAZZJONIJIET EX POST, TAL-KONSULTAZZJONIJIET MAL-PARTIJIET IKKONĊERNATI U TAL-VALUTAZZJONIJIET TAL-IMPATT

Din il-proposta hija bbażata fuq l-evalwazzjonijiet ex post, il-konsultazzjonijiet mal-partijiet ikkonċernati u l-valutazzjoni tal-impatt imwettqa fil-kuntest tat-tħejjija tal-proposta għal Regolament dwar l-istabbiliment tal-euro diġitali. Il-valutazzjoni tal-impatt tal-proposta għal Regolament dwar l-istabbiliment tal-euro diġitali ġiet ippreżentata lill-Bord tal-Iskrutinju Regolatorju (RSB, Regulatory Scrutiny Board) fl-14 ta’ Ottubru 2022 u approvata fil-25 ta’ April 2023.

Għal raġunijiet ta’ konsistenza mad-Direttiva dwar is-Servizzi ta’ Pagament, jenħtieġ li l-fornituri tas-servizzi ta’ pagament kollha tal-UE jkollhom id-dritt li jiddistribwixxu servizz diġitali ta’ pagament bl-euro fiż-żona tal-euro. Dan se jkompli jikkontribwixxi għal suq ta’ pagamenti bl-imnut innovattiv u kompetittiv.

4.IMPLIKAZZJONIJIET BAĠITARJI

Dan ir-Regolament ma għandu l-ebda implikazzjoni għall-baġit.

5.ELEMENTI OĦRA

•Pjanijiet ta’ implimentazzjoni u arranġamenti dwar il-monitoraġġ, l-evalwazzjoni u r-rapportar

•Spjegazzjoni fid-dettall tad-dispożizzjonijiet speċifiċi tal-proposta

Kamp ta’ applikazzjoni (l-Artikolu 1)

Distribuzzjoni tal-euro diġitali (l-Artikolu 3)

Liġi applikabbli u l-awtoritajiet kompetenti (l-Artikoli 4 sa 6)

Dispożizzjonijiet finali (l-Artikolu 8)

2023/0211 (COD)

Proposta għal

REGOLAMENT TAL-PARLAMENT EWROPEW U TAL-KUNSILL

dwar il-forniment ta’ servizzi tal-euro diġitali minn fornituri ta’ servizzi ta’ pagament inkorporati fi Stati Membri li l-munita tagħhom mhijiex l-euro u li jemenda r-Regolament (UE) 2021/1230 tal-Parlament Ewropew u tal-Kunsill

(Test b’rilevanza għaż-ŻEE)

IL-PARLAMENT EWROPEW U L-KUNSILL TAL-UNJONI EWROPEA,

Wara li kkunsidraw it-Trattat dwar il-Funzjonament tal-Unjoni Ewropea, u b’mod partikolari l-Artikolu 114 tiegħu,

Wara li kkunsidraw il-proposta tal-Kummissjoni Ewropea,

Wara li l-abbozz tal-att leġiżlattiv intbagħat lill-parlamenti nazzjonali,

Wara li kkunsidraw l-opinjoni tal-Bank Ċentrali Ewropew 2 ,

Wara li kkunsidraw l-opinjoni tal-Kumitat Ekonomiku u Soċjali Ewropew 3 ,

Filwaqt li jaġixxu skont il-proċedura leġiżlattiva ordinarja,

Billi:

(1)Il-Kummissjoni enfasizzat fl-Istrateġiji tal-Finanzi Diġitali u tal-Pagamenti bl-Imnut 4 ta’ Settembru 2020 li l-euro diġitali, bħala munita diġitali tal-bank ċentrali għall-konsumatur, taġixxi bħala katalist għall-innovazzjoni fil-pagamenti, fil-finanzjament u fil-kummerċ fil-kuntest tal-isforzi kontinwi biex titnaqqas il-frammentazzjoni tas-suq tal-pagamenti bl-imnut tal-UE.

(2)Ir-Regolament (UE) [daħħal ir-referenza – proposta għal Regolament tal-Parlament Ewropew u tal-Kunsill dwar l-istabbiliment tal-euro diġitali – COM(2023) 369 final] dwar l-istabbiliment tal-euro diġitali jistabbilixxi l-euro diġitali u jistabbilixxi regoli li jikkonċernawh, b’mod partikolari fir-rigward tal-istatus tal-valuta legali, id-distribuzzjoni, l-użu u l-karatteristiki essenzjali tiegħu, bil-ħsieb li l-euro jiġi adattat għall-bidliet teknoloġiċi u li jiġi żgurat l-użu tiegħu bħala munita unika.

(3)Huwa essenzjali li jiġi żgurat li l-fornituri kollha ta’ servizzi ta’ pagament, kemm jekk inkorporati fl-Istati Membri li l-munita tagħhom hija l-euro kif ukoll fi Stati Membri li l-munita tagħhom mhijiex l-euro, ikunu jistgħu jiddistribwixxu l-euro diġitali u għalhekk jeżerċitaw il-libertà tagħhom li jipprovdu servizzi fl-Unjoni. Il-forniment ta’ servizz ta’ pagament bl-euro diġitali mill-fornituri kollha tas-servizzi ta’ pagament jikkontribwixxi għal livell għoli ta’ innovazzjoni, jiffaċilita l-pagamenti u jżid il-kompetizzjoni madwar l-Unjoni u huwa meħtieġ biex tiġi ssalvagwardjata l-integrità tas-suq uniku. Għalhekk, jenħtieġ li l-fornituri kollha tas-servizzi ta’ pagament inkorporati fl-Unjoni jkunu f’pożizzjoni li jiddistribwixxu servizzi ta’ pagament bl-euro diġitali bl-istess kundizzjonijiet lil persuni fiżiċi jew ġuridiċi residenti jew stabbiliti fl-Istati Membri li l-munita tagħhom hija l-euro, lil persuni fiżiċi jew ġuridiċi li jkunu fetħu kont tal-euro diġitali fiż-żmien li kienu residenti jew stabbiliti fl-Istati Membri li l-munita tagħhom hija l-euro, iżda li ma għadhomx jirrisjedu jew stabbiliti f’tali Stati Membri, u lill-viżitaturi fiż-żona tal-euro. Jenħtieġ li l-fornituri ta’ servizzi ta’ pagament inkorporati fi Stati Membri li l-munita tagħhom mhijiex l-euro jkunu wkoll f’pożizzjoni li jiddistribwixxu l-euro diġitali lil kwalunkwe persuna fiżika jew ġuridika oħra residenti jew stabbilita fi Stati Membri li l-munita tagħhom mhijiex l-euro u f’pajjiżi oħra taż-Żona Ekonomika Ewropea jew fi kwalunkwe pajjiż terz soġġett għall-kundizzjonijiet stabbiliti fir-Regolament (UE) [daħħal ir-referenza – proposta għal Regolament tal-Parlament Ewropew u tal-Kunsill dwar l-istabbiliment tal-euro diġitali – COM(2023) 369 final].

(4)Jenħtieġ li l-fornituri tas-servizzi ta’ pagament inkorporati fl-Istati Membri li l-munita tagħhom mhijiex l-euro japplikaw l-istess regoli bħala fornituri tas-servizzi ta’ pagament fl-Istati Membri li l-munita tagħhom hija l-euro għall-finijiet ta’ distribuzzjoni tal-euro diġitali. Dan huwa essenzjali sabiex jiġi żgurat li d-distribuzzjoni tal-euro diġitali mill-fornituri kollha tas-servizzi ta’ pagament inkorporati fl-Unjoni ssir b’mod uniformi.

(5)Il-forniment ta’ servizzi ta’ pagament diġitali bl-euro minn fornituri tas-servizzi ta’ pagament inkorporati fi Stati Membri li l-munita tagħhom mhijiex l-euro, jenħtieġ li jkun soġġett għall-istess standards superviżorji bħal dawk applikati għall-fornituri ta’ servizzi ta’ pagament inkorporati fi Stati Membri li l-munita tagħhom hija l-euro. Għal dan il-għan, jenħtieġ li d-dispożizzjonijiet rilevanti tad-Direttiva (UE) 2015/2366 tal-Parlament Ewropew u tal-Kunsill 5 , kif sostitwita bid-Direttiva (UE) [daħħal ir-referenza – proposta għal Direttiva dwar servizzi ta’ pagament u servizzi ta’ flus elettroniċi fis-suq intern – COM/2023/366 final], u tad-Direttiva (UE) 2015/843 6 kif sostitwita bid-Direttiva (UE) [daħħal ir-referenza – proposta għal Direttiva Kontra l-Ħasil tal-Flus - COM/2021/423 final] japplikaw għas-superviżjoni mill-awtoritajiet kompetenti u mir-reġim ta’ sanzjonijiet u għall-arranġamenti superviżorji bejn l-awtoritajiet kompetenti tal-Istati Membri domiċiljari u l-Istati Membri ospitanti, li jikkonċernaw il-forniment ta’ servizzi ta’ pagament bl-euro diġitali minn fornituri ta’ servizzi ta’ pagament stabbiliti fl-Istati Membri li l-munita tagħhom mhijiex l-euro.

(6)Bl-istess mod, bħal fil-każ tal-awtoritajiet kompetenti tal-Istati Membri li l-munita tagħhom hija l-euro skont ir-Regolament (UE) [daħħal ir-referenza – proposta għal Regolament tal-Parlament Ewropew u tal-Kunsill dwar l-istabbiliment tal-euro diġitali – COM(2023) 369 final], jenħtieġ li l-awtoritajiet kompetenti responsabbli skont id-Direttiva (UE) 2015/2366 għas-superviżjoni tal-forniment ta’ servizzi ta’ pagament jikkooperaw ukoll mal-Bank Ċentrali Ewropew għall-finijiet tas-superviżjoni tal-applikazzjoni tal-obbligi relatati mal-pagamenti stabbiliti fir-Regolament (UE) [daħħal ir-referenza – proposta għal Regolament tal-Parlament Ewropew u tal-Kunsill dwar l-istabbiliment tal-euro diġitali – COM(2023) 369 final].

(7)F’konformità mal-Artikolu (4), il-punt (25), tad-Direttiva 2015/2366, fondi tfisser karti tal-flus u muniti, flus skritturali jew flus elettroniċi. Bħala forma ġdida ta’ flus tal-bank ċentrali b’valuta legali, l-euro diġitali jenħtieġ li jitqies bħala fondi skont id-Direttiva 2015/2366 kif sostitwita bid-Direttiva (UE) [daħħal ir-referenza – proposta għal Direttiva dwar is-servizzi ta’ pagament u s-servizzi ta’ flus elettroniċi fis-suq intern - COM/2023/366 final] li testendi d-definizzjoni ta’ fondi għall-forom kollha ta’ flus tal-bank ċentrali maħruġa għall-użu mill-konsumaturi. L-istess definizzjoni ta’ fondi jenħtieġ li tiġi inkluża fir-Regolament (UE) 2021/1230 tal-Parlament Ewropew u tal-Kunsill tal-14 ta’ Lulju 2021 dwar il-ħlas transkonfinali fl-Unjoni.

(8)Billi l-objettivi ta’ dan ir-Regolament ma jistgħux jinkisbu biżżejjed mill-Istati Membri, peress li r-regoli applikabbli għall-fornituri ta’ servizzi ta’ pagament iridu jkunu l-istess irrispettivament minn jekk humiex inkorporati fi Stat Membru li l-munita tiegħu hija l-euro jew le, iżda jistgħu jinkisbu aħjar fil-livell tal-Unjoni minħabba l-iskala jew l-effetti tal-azzjoni biex tiġi żgurata l-integrità tas-suq uniku, l-Unjoni tista’ tadotta miżuri, f’konformità mal-prinċipju ta’ sussidjarjetà kif stabbilit fl-Artikolu 5 tat-Trattat dwar l-Unjoni Ewropea. F’konformità mal-prinċipju ta’ proporzjonalità kif stabbilit f’dak l-Artikolu, dan ir-Regolament ma jmurx lil hinn minn dak li huwa meħtieġ sabiex jinkisbu dawk l-objettivi.

(9)Il-Kontrollur Ewropew għall-Protezzjoni tad-Data u l-Bord Ewropew għall-Protezzjoni tad-Data ġew ikkonsultati f’konformità mal-Artikolu 42 tar-Regolament (UE) 2018/1725 u taw opinjoni konġunta dwar [XX XX 2023],

ADOTTAW DAN IR-REGOLAMENT:

Artikolu 1
Suġġett u kamp ta’ applikazzjoni

Dan ir-Regolament jistabbilixxi regoli li jikkonċernaw:

(a)l-obbligi speċifiċi li l-fornituri ta’ servizzi ta’ pagament inkorporati fl-Istati Membri li l-munita tagħhom mhijiex l-euro għandhom japplikaw meta jipprovdu servizzi ta’ pagament bl-euro diġitali;

(b)is-superviżjoni u l-infurzar tal-obbligi msemmija fil-punt (a) mill-Istati li l-munita tagħhom mhijiex l-euro;

(c)l-obbligi speċifiċi li l-manifatturi tat-tagħmir oriġinali ta’ apparat mobbli u l-fornituri ta’ servizzi ta’ komunikazzjoni elettronika skont it-tifsira tal-Artikolu 2(1) tad-Direttiva (UE) 2018/1972 stabbiliti fl-Istati Membri li l-munita tagħhom mhijiex l-euro għandhom japplikaw fir-rigward tal-euro diġitali.

Artikolu 2
Definizzjonijiet

Għall-finijiet ta’ dan ir-Regolament, għandhom japplikaw id-definizzjonijiet li ġejjin:

1.“euro diġitali” tfisser il-forma diġitali tal-munita unika disponibbli għall-persuni fiżiċi u ġuridiċi kif definit fl-Artikolu 2, il-punt 1 tar-Regolament (UE) [daħħal ir-referenza — proposta għal Regolament tal-Parlament Ewropew u tal-Kunsill dwar l-istabbiliment tal-euro diġitali – COM (2023) 369 final];

2.“fornitur ta’ servizzi ta’ pagament” tfisser fornitur ta’ servizzi ta’ pagament kif definit fl-Artikolu 4, il-punt (11), tad-Direttiva (UE) 2015/2366;

3.“servizz ta’ pagament bl-euro diġitali” tfisser servizz ta’ pagament bl-euro diġitali kif definit fl-Artikolu 2, il-punt (8) tar-Regolament (UE) [daħħal ir-referenza — proposta għal Regolament tal-Parlament Ewropew u tal-Kunsill dwar l-istabbiliment tal-euro diġitali – COM (2023) 369 final];

4.“residenza” tfisser il-post fejn persuna fiżika tkun legalment residenti fl-Unjoni kif definit fl-Artikolu 2, il-punt (2), tad-Direttiva 2014/92/UE tal-Parlament Ewropew u tal-Kunsill 7 ;

5.“viżitatur” tfisser persuna fiżika kif definita fl-Artikolu 2, il-punt 22 tar-Regolament (UE) [daħħal ir-referenza – proposta għal Regolament tal-Parlament Ewropew u tal-Kunsill dwar l-istabbiliment tal-euro diġitali – COM (2023) 369 final];

6.“Stat Membru li l-munita tiegħu mhijiex l-euro” tfisser Stat Membru kif definit fl-Artikolu 2, il-punt 23 tar-Regolament (UE) [daħħal ir-referenza – proposta għal Regolament tal-Parlament Ewropew u tal-Kunsill dwar l-istabbiliment tal-euro diġitali – COM (2023) 369 final];

7.“apparat mobbli” tfisser apparat mobbli kif definit fl-Artikolu 2, il-punt 31, tar-Regolament (UE) [daħħal ir-referenza – proposta għal Regolament tal-Parlament Ewropew u tal-Kunsill dwar l-istabbiliment tal-euro diġitali – COM(2023) 369 final].

Artikolu 3
Forniment ta’ servizzi ta’ pagament bl-euro diġitali

Fil-qafas tad-Direttiva (UE) 2015/2366, il-fornituri ta’ servizzi ta’ pagament inkorporati fl-Istati Membri li l-munita tagħhom mhijiex l-euro jistgħu jipprovdu servizzi ta’ pagament bl-euro diġitali lil:

(a)persuni fiżiċi u ġuridiċi residenti jew stabbiliti fl-Istati Membri li l-munita tagħhom hija l-euro;

(b)persuni fiżiċi u ġuridiċi li jkunu fetħu kont tal-euro diġitali fiż-żmien li kienu residenti jew stabbiliti fl-Istati Membri li l-munita tagħhom hija l-euro, iżda li ma għadhomx jirrisjedu jew ma għadhomx stabbiliti f’tali Stati Membri;

(c)viżitaturi;

(d)persuni fiżiċi u ġuridiċi residenti jew stabbiliti fi Stati Membri li l-munita tagħhom mhijiex l-euro, soġġetti għall-kundizzjonijiet stabbiliti fl-Artikolu 18 tar-Regolament (UE) [daħħal ir-referenza – proposta għal Regolament tal-Parlament Ewropew u tal-Kunsill dwar l-istabbiliment tal-euro diġitali – COM (2023) 369 final];

(e)persuni fiżiċi u ġuridiċi residenti jew stabbiliti f’pajjiżi terzi, inklużi territorji taħt ftehim monetarju mal-Unjoni Ewropea, soġġetti għall-kondizzjonijiet stabbiliti fl-Artikoli 19 u 20 tar-Regolament (UE) [daħħal ir-referenza – proposta għal Regolament tal-Parlament Ewropew u tal-Kunsill dwar l-istabbiliment tal-euro diġitali - COM(2023) 369 final].

Artikolu 4
Liġi applikabbli

1.Ir-rekwiżiti stabbiliti fl-Artikolu 13, l-Artikolu 14(1), il-Kapitolu V, l-Artikolu 18, il-Kapitolu VII, il-Kapitolu VIII u l-Kapitolu IX tar-Regolament (UE) Nru X dwar l-istabbiliment tal-euro diġitali, għandhom ikunu applikabbli għall-fornituri ta’ servizzi ta’ pagament inkorporati fit-territorju tal-Istati Membri li l-munita tagħhom mhijiex l-euro li jipprovdu servizzi diġitali ta’ pagament bl-euro f’konformità mal-Artikolu 1 ta’ dan ir-Regolament.

Ir-rekwiżit stabbilit fl-Artikolu 33 tar-Regolament (UE) [daħħal ir-referenza– proposta għal Regolament tal-Parlament Ewropew u tal-Kunsill dwar l-istabbiliment tal-euro diġitali – COM(2023) 369 final] għandu jkun applikabbli għall-manifatturi tat-tagħmir oriġinali ta’ apparat mobbli u għall-fornituri ta’ servizzi ta’ komunikazzjonijiet elettroniċi skont it-tifsira tal-Artikolu 2(1) tad-Direttiva (UE) 2018/1972 stabbiliti fl-Istati Membri li l-munita tagħhom mhijiex l-euro. 

2.F’konformità mal-Artikolu 4(25) tad-Direttiva (UE) 2015/2366 tal-Parlament Ewropew u tal-Kunsill, fil-25 ta’ Novembru 2015, dwar servizzi ta’ pagament fis-suq intern, kif emendata bid-Direttiva (UE) [daħħal ir-referenza – proposta għal Direttiva dwar is-servizzi ta’ pagament u s-servizzi ta’ flus elettroniċi fis-suq intern - COM/2023/366 final] , id-dispożizzjonijiet ta’ dik id-Direttiva għandhom japplikaw għat-tranżazzjonijiet ta’ pagament bl-euro diġitali.

3.F’konformità mal-Artikolu 2(10) tar-Regolament (UE) 2021/1230 tal-Parlament Ewropew u tal-Kunsill tal-14 ta’ Lulju 2021 dwar il-ħlas transkonfinali fl-Unjoni, id-dispożizzjonijiet ta’ dak ir-Regolament għandhom japplikaw għal tranżazzjonijiet ta’ pagament bl-euro diġitali.

4.Mingħajr preġudizzju għall-Artikolu 37 tar-Regolament [daħħal ir-referenza – proposta għal Regolament tal-Parlament Ewropew u tal-Kunsill dwar l-istabbiliment tal-euro diġitali – COM(2023) 369 final], id-Direttiva (UE) 2015/849 tal-Parlament Ewropew u tal-Kunsill, tal-20 ta’ Mejju 2015, dwar il-prevenzjoni tal-użu tas-sistema finanzjarja għall-finijiet tal-ħasil tal-flus jew il-finanzjament tat-terroriżmu u r-Regolament (UE) 2015/847 tal-Parlament Ewropew u tal-Kunsill tal-20 ta’ Mejju 2015 dwar l-informazzjoni li takkumpanja t-trasferimenti ta’ fondi għandhom japplikaw fir-rigward tal-euro diġitali.

Artikolu 5
Awtoritajiet kompetenti

1.Id-Direttiva (UE) 2015/2366 tal-Parlament Ewropew u tal-Kunsill għandha tapplika għas-superviżjoni mill-awtoritajiet kompetenti u r-reġim ta’ sanzjonijiet u għall-arranġamenti superviżorji bejn l-awtoritajiet kompetenti tal-Istati Membri domiċiljari u tal-Istati Membri ospitanti, fir-rigward tal-attivitajiet tal-fornituri ta’ servizzi ta’ pagament stabbiliti fi Stati Membri li l-munita tagħhom mhijiex l-euro fir-rigward tal-euro diġitali għall-finijiet tal-applikazzjoni ta’ dan ir-Regolament u l-obbligi msemmija fil-Kapitoli IV, V, VI u VII tar-Regolament (UE) [daħħal ir-referenza – proposta għal Regolament tal-Parlament Ewropew u tal-Kunsill dwar l-istabbiliment tal-euro diġitali – COM (2023) 369 final].

2.Id-Direttiva (UE) 2015/843 għandha tapplika għas-superviżjoni mill-awtoritajiet kompetenti u r-reġim ta’ sanzjonijiet u għall-arranġamenti superviżorji bejn l-awtoritajiet kompetenti tal-Istati Membri domiċiljari u tal-Istati Membri ospitanti dwar l-attivitajiet tal-fornituri ta’ servizzi ta’ pagament inkorporati fi Stati Membri li l-munita tagħhom mhijiex l-euro, stabbiliti fir-rigward tal-euro diġitali għall-fini tal-applikazzjoni ta’ dan ir-Regolament u l-obbligi li jinsabu fil-Kapitolu IX tar-Regolament (UE) [daħħal ir-referenza – proposta għal Regolament tal-Parlament Ewropew u tal-Kunsill dwar l-istabbiliment tal-euro diġitali – COM (2023) 369 final].  

Artikolu 6
Kooperazzjoni mal-Bank Ċentrali Ewropew

Għall-finijiet tas-superviżjoni tal-applikazzjoni tal-Kapitoli IV, V u VII tar-Regolament (UE) [daħħal ir-referenza – proposta għal Regolament tal-Parlament Ewropew u tal-Kunsill dwar l-istabbiliment tal-euro diġitali – COM(2023) 369 final], l-awtoritajiet kompetenti msemmija fl-Artikolu 4(1) għandhom jikkooperaw mal-Bank Ċentrali Ewropew.

Artikolu 7
Emendi

L-Artikolu 2(10) tar-Regolament (UE) 2021/1230 tal-Parlament Ewropew u tal-Kunsill tal-14 ta’ Lulju 2021 dwar il-ħlasijiet transkonfinali fl-Unjoni huwa sostitwit b’“‘fondi’ tfisser flus tal-bank ċentrali maħruġa għall-użu bl-imnut, flus skritturali jew flus elettroniċi”.

Artikolu 8
Dħul fis-seħħ u applikazzjoni

Dan ir-Regolament għandu jidħol fis-seħħ fl-għoxrin jum wara dak tal-pubblikazzjoni tiegħu f’Il-Ġurnal Uffiċjali tal-Unjoni Ewropea.

Dan ir-Regolament għandu jorbot fl-intier tiegħu u japplika direttament fl-Istati Membri f’konformità mat-Trattati.

Magħmul fi Brussell,

(1)    Komunikazzjoni tal-Kummissjoni lill-Parlament Ewropew, lill-Kunsill, lill-Kumitat Ekonomiku u Soċjali Ewropew u lill-Kumitat tar-Reġjuni dwar Strateġija għall-Finanzi Diġitali għall-UE (COM/2020/591 final)

(2)    ĠU C [...], [...], p. [...].

(3)    ĠU C […], […], p. […].

(4)    Il-Komunikazzjoni tal-Kummissjoni lill-Parlament Ewropew, lill-Kunsill, lill-Kumitat Ekonomiku u Soċjali Ewropew u lill-Kumitat tar-Reġjuni dwar Strateġija għall-Finanzi Diġitali għall-UE (COM/2020/591 final)

(5)    Id-Direttiva (UE) 2015/2366 tal-Parlament Ewropew u tal-Kunsill tal-25 ta’ Novembru 2015 dwar is-servizzi ta’ pagament fis-suq intern, li temenda d-Direttivi 2002/65/KE, 2009/110/KE, 2013/36/UE u r-Regolament (UE) Nru 1093/2010, u li tħassar id-Direttiva 2007/64/KE (ĠU L 337, 23.12.2015, p. 35).

(6)    Id-Direttiva (UE) 2015/849 tal-Parlament Ewropew u tal-Kunsill tal-20 ta’ Mejju 2015 dwar il-prevenzjoni tal-użu tas-sistema finanzjarja għall-finijiet tal-ħasil tal-flus jew il-finanzjament tat-terroriżmu, li temenda r-Regolament (UE) Nru 648/2012 tal-Parlament Ewropew u tal-Kunsill, u li tħassar id-Direttiva 2005/60/KE tal-Parlament Ewropew u tal-Kunsill u d-Direttiva tal-Kummissjoni 2006/70/KE (ĠU L 141, 5.6.2015, p. 73).

(7)    Id-Direttiva 2014/92/UE tal-Parlament Ewropew u tal-Kunsill tat-23 ta’ Lulju 2014 dwar il-komparabbiltà tat-tariffi relatati mal-kontijiet tal-ħlas, il-bdil tal-kontijiet tal-ħlas u l-aċċess għal kontijiet tal-ħlas b’karatteristiċi bażiċi (ĠU L 257, 28.8.2014, p. 214).